.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

30.12.07

لقاء




هذا أنا
أحمل قلبك بين جدران قلبي
أحضن كفك وسط كفي
وتحتضن سماؤك سمائي

هذا أنا
استسلم لقدرك لأنه قدري
اشترى الأحلام بكل سخاء
ألونها بلون الشمس
لرغبتي في البقاء
رغم كل التعب والشقاء

هذا أنا
استلقي هنا إلى جانبك
التحف دفئك والأمان
وعطرك الفواح بكل مكان
يبات بين أضلعي
متمسكا بتلك اللحظة
لحظة كان فيها الاشتياق
أقوى من كل العقلاء

هذا أنا
استقبل بعيني المطر
أغتسل به .. أنئي إحساسي بالغربة معك
أغمض جفني
واسترجع لحظات اللقاء
أنفاسك وأنفاسي
دخان سيجارة مهجورة
دفء عنقك عندما التقته شفتاي
رائحة يومك الطويل
صوتك يهمس لي الشوق
إصبعك يمسح عقدة التفكير بين حاجبي
يلثم أطراف وجنتي
يحدثني عن القرب كم هو لذيذ
ودقات قلبك تذكرني بأني هناك
أجمع كل زهور الربيع
أحصد الشتاء

أحبك
أنت تعلمين أنى أحبك
قلتها وأنت تجمع ما تبعثر من شعري على كتفك
وابتسامة وجد تلون تلك الشفاه
وطعم مساء جمعنا معا(ن)
لازال يبحث عن كأس يرتوي منه
تلمسني فأنسى أني احتاج للهواء
تهمسنى فلا أعبأ بعطشى للماء
ارتوي وتتوه الكلمات بين السكنات
تصهرني وتشكلني من جديد
فلا أبحث عني من أنا ومن أكون

هذا أنا
بين أحضانك
يختلط كياني بكيانك
وأذوب بحرارة صيفك
وأنسى أن اليوم كان يوما شتويا ممطرا وباردا
قبل اللقاء

26.11.07

أصفاد


وكان اللقاء
بين أحرف الهجاء
نقتنص اللحظة
كل منا يدرك فضوله لمعرفة الآخر
كل منا يرمى الطعم ليلتقطه الآخر
لا أتقن لعبة الكلمات المتقاطعة
فأنا واضحة كوضوح الشمس
عندما ارغب بشيء فانا أرغبه بكل بساطه
دون تبرير ودون أعذار
هل يدرك ذلك؟؟

قلبي يحدثني أن ابتعد
عقلي يحثني أن ابتعد
هل ابتعد؟؟
ربما كان الابتعاد هروب
وأنا اكره الهروب
أحب المواجهة
مواجهة مشاعري
مواجهة الآخر
لا ادري .... هو تهور أم شجاعة

لماذا أحس أن الهاوية أمامي وهو معلق بسقفها
لماذا أحس انه سيبتلعني مع كل أحلامي
سوف يمسخني لأصبح انتصارا جديدا لواحدة من غزواته
يلغيني يعجنني ويخلقني له هو فقط
ولن أكون أنا ثانية في محراب عبوديته
سوى جارية تقبل قدميه صباحا
وتلثم شفتيه مساءا
جارية تتقن الغناء والتمايل على الحان الغجر
ترضى غروره حتى وقت السحر
تتقن فنون السمر
تنبت على جسده الزهر
تنتشي كلما نال منها الوطر

فهل استلقى بأحضان من قد يلوثني بالعار مغمسا بالانبهار
أم ارحل مبتعدة وأنا عطشى لطعم الحب
تاركة خلفي حلمي بدفء القرب
وحلتي المحاكة من شعاع القمر
وشمس قد انطفأت مع نهايات اللقاء
تثقل خطاي كل الذكريات
والكثير من الأحجيات
والصناديق المقفلة والمعبأة بالحكايات
وعطر ذلك المساء
وشعر منثور بلا استحياء

لماذا الخضوع؟؟
لماذا البقاء؟؟
لماذا كل هذا الشقاء؟؟
أريد الهروب
أريد كسر كل القيود
وأصفادك قد لوثتها الدماء
دماء أسري ونفي الوجود


وتأتي النهاية
حكاية أنثى قد سيرتها الغواية
وتزينت بالأصفاد حول معصميها
لرجل كان من أشباه الرجال
يظن النساء لعبة وهواية


إلى كل إمرأة تستهويها العبودية بالحب
وترضخ لقيود التملك لأرضاء غرور رجل ما

مع الإعتذار للثلة الباقية من الرجال الحقيقيين


7.11.07

ما فينا من زعل ....صح؟؟



بزة : صباح الخير يا بعدي
شميس : صباح النور
بزة : نمت زين
شميس : الحمد الله .. نمت كافي
بزة : اهاا يعنى ما نمت زين
شميس : تأخرت شويه ما جاني النوم
بزة : ليش حبيبي
شميس : أفكر فيج..وأراقب نجمتنا .. تدرين .. سميتها باسمج
بزة : يا بختي .. نجمة و باسمي
شميس : كانت تلمع وايد .. شكيت انج انتي دازتها لي.. تسهر على راحتي
بزة : يمكن .. شدراك.. كل شي جايز
شميس : قريتي الزين شنو كاتبه عنا
بزة : قريت
شميس : يعنى ما علقتي
بزة : شتبينى أقول .. اللي علقوا كفوا ووفوا
شميس : معقولة كل شي قريتيه عجبج
بزة : همممم ... أكيد لأ
شميس : لوير بجت ... وايد تأثرت بالقصة.. "لما تموت روح تبقى الروح الثانية تنتظر الموت حتى تلتقي الروح اللي كرهت العيش بدونها ... تهقين صج كلامها؟؟
بزة : إنت اللي تسأل .. كنت اعتقد الجواب عندك يا شميس
شميس : كنت أبي اسمعها منج إنتى
بزة : هممم .. وعذبة.. شرايك بكلامها؟؟
شميس : إنتى شيطانه.. تعرفين شلون تغيرين الموضوع
بزة : أانااا... شيطانه؟؟؟ حرام عليك أنا فقيييرة
شميس : كلمة فقيرة هذي فيها كل الشطانه ..ههههههه
بزة : أنا شفت عذبة استرسلت على غير العادة ... وتكلمت عن حياتها بكل راحة ورضا.. تدري.. أنا أشوف فيها من الزين وايد
شميس : ممكن ..جايز .. يصير
بزة : وقطوتها ماتت
شميس : الغريب إن البشر يستكثرون علينا إحساسنا بالغربة بعد ما يفارقونا أحبابنا ..كأن المشاعر حكر عليهم اهم بس
بزة : مو كلهم يا بعدي .. مو كلهم .. إنت لاحظت إن عذبة مادحة فيني
شميس : ما تنلام .. إنتى اكو احد ما يحبج
بزة : هذا عشان إنت تحبني تقول هالحجي
شميس : هذا لأنج إنتى حلوة وايد .. وااااااايد
بزة : صج أنا رقيقه مثل ما تقول كويت دول ؟؟
شميس : إنتى من صجج؟؟
بزة : اوكي خلاص .. اللي بعده
شميس : بروك تقول الوفا موجود والأمثلة قليله
بزة : أنا وياها بهالكلام
شميس : بس انا ما فهمت براك شيقصد بكلمة جايز؟؟؟
بزة : هممممممم .. تبي الصج ..حتى أنا ومالي خلق أفكر
شميس : نيي حق أحلا انجنير
بزة : حبيبة الزين
شميس : الزين حبايبها وايد
بزة : تقول إذا افقدت تستمرض
some dayشميس : الله يعينها..منو هذي

بزة : مادري والله بس مو عاجبتها الصورة

شميس : ليش اهم المفروض يعلقون على الموضوع لوعلي الصورة
بزة : اللي اهو ......اللي بعده..... فهد العسكر .. يا حبي له.. دمه عسل
شميس : بزة .. كملي أحسن
بزة : أوكيش ....تغار يا بعدي
شميس : تدرين انى أموت غيره
بزة : من فهد
شميس : من الهوا اللي حولج
بزة : شفته شقايل
شميس : يبي يسوينا فيلم
بزة : تهقا بنصير مشهورين .. بزة وشميس
شمي : هههههه .. مينونه
بزة : أنا أبي جنيفر انستون تمثل دوري بالفيلم
شميس : إيه صح .. كلش عاد ما فيها منج
بزة : أكيد ... أنا أحلا
شميس : متفائل يقول إن الوفا موجود بس ماكو احد يستاهل
بزة : هذا شكله مقروص
شميس : لا تحكمين على الناس
بزة : شوف شميس .. شي طبيعي إن ردودهم يصير فيها إسقاط من تجاربهم اللي مروا فيها.. وكل واحد ينظر للموضوع من زاويته اهو وعلى حسب تجربته
شميس : بس مو الكل
بزة : إيه صح .. أنا معاك مو الكل
شميس : سليمان
بزة : شفيه
شميس : الزين تقول انه خاطره ثجيل .. فيه شي مضايقه
بزة : عاد الحين صج الزين اهى اللي قاعده تسوي إسقاط لتجربتها
شميس : حرام عليج
بزة : شعندك تدافع عنها
شميس : ههههههه...ما أدافع .. وانتى من صجج تغارين من الزين
بزة : أنا عارفة نفسي عدل .. وما أغار من احد
شميس : اوكي .. خلينا نكمل
بزة : إيه .. نكمل .. شو عليه
شميش : ويلوموني فيج .. يا بنتي إنتى انترناشيونال
بزة : هههههه ...... خل نشوف مكسرات سيد سعد والأرنب كلكل

شميس :.... فقير.. سووه ملوخية بالأنارب
بزة : اسم الله عليك .. طالع من يتكلم
شميس : وانتى شنو.. قاعدتلي على الوحدة
بزة : اووووه .. عاد انت لا تصير حساس لهدرجه
شميس : شرايج بكلام النحيس
بزة : أقول لو بعد بتزعل
شميس : لا قولي
بزة : بحبه يا بابا
شميس : بزوووه
بزة : اطفرك ... والله اطفرك
شميس : يسأل شكثر بتتعقد الأمور وشنو بيصير إذا أرنب حب بطه ؟؟
بزة : وايد .. اعتقد بتتعقد وايد
شميس : تهقين ما يدري ؟؟
بزة : أكيد يدري بس اهو يبي يسمعها من الزين .. على ما أظن
شميس : تعالي نشوف حسين شقايل
بزة : يقول إن البشر ما يموتون من الفراق
شميس : غلطان
بزة : اوكي هذا رايك انت وإحنا نحترم جميع الآراء
شميس : ايه نعم .. عدل
بزة : هنا تقول قليل مثل هالوفا يحصل
شميس : وعندها قصة مشابهه لقصتنا
!!!!!بزة : يعنى إحنا مو متفردين بسالفتنا مثل قيس وليلى ؟؟؟؟
شميس : أقول ...... استريحي
بزة : اوكي عاد لا تزف
شميس : إنتى مصرة تنسين إحنا شنو واهم شنو
بزة : صدقني ما نسيت .. يمكن أتناسى .. بس ما نسيت
شميس : قولي لي بزة .. تهقين اللي يحب يقدر ينسى
بزة : شلون ينسى... إذا كان كل شي فيه يذكره باللي يحبه
شميس : حياتي إنتى
بزة : نغير الموضوع أحسن
شميس : ايه نغير أحسن
بزة : سنعه عورها قلبها
شميس : ويامالها من عوار القلب
بزة : خروفه
شميس : الزين ما حطت لها خصل شعر هالمره بالبوست
بزة : هههههههه .. حرام عليك
شميس : بس والله حبوبه هالبنت .. وأحس فيها وايد فقيرة
بزة : ايه صح.. ذكرتني بقصه قصها لي واحد عن الواوي والخروفة .. أقولها لك تالي ..هههههه
شميس : صار

بزة : كاريييزما
شميس : بييه ..هالكثر مشتطة
بزة : أحبها وايد .. كثر ما الزين تحبها
شميس : شقالت كاريزما
بزة : حبتنى وايد .. يااااا بختى
شميس : بس ما عندها إيمان كافي بالحب
بزة : يمكن بعدها ما لقت شميس
شميس : شميس ما انخلق الا حق بزة وبس
بزة : آآخ يا قلبي
شميس : نكمل
"بزة : ايه نكمل .. نكمل ..الدنيا "بالأول على بالي تتكلمين عن وحده بعدين طلعت بطه؟؟؟؟؟؟؟
!@#$%^ليش أنا مو وحده!!!! ترى صج عصبت
شميس : بزة.. وبعدين وياج .. إنتى بطه وبتظلين بطه
بزة : ما احبك
شميس : ادري .. تموتين فيني
بزة : شوية مو وايد
شميس : اهى موته .. شلون شويه لو وايد
بزة : موتى أنا .. كيفي
شميس : ماكو فايدة .......... اللي بعده ..... قصة خيال
"بزة : "إن افترقنا فلا بد لنا من أن نكون من زرع حبا فإما ينمو بهم أو ينمو بنا
شميس : بالله.. وصفها عجيب
بزة : مرهفة الإحساس بحكمة عجيبة
شميس : يا بختها فيج وانتى تمدحين فيها هالشكل
بزة : هههههه .. قول يا بخت الزين فيها....اللي بعده
شميس : مشاااااري ..رجل السياسة
بزة : مو دايما
شميس : غالبا
بزة : تبي الصج ... الكل الحين صاير يكتب بالسياسة .. شي يملل
شميس : كل واحد يكتب اللي يريحه يا بزة

بزة : مادري .. بس اعتقد لو إحنا بنعرف أخبار البلد .. والأزمات السياسية نقرا الجرايد أحسن
شميس : كلامج صح .. وللأسف وايد مدونات أدبية التهمتها السياسة
بزة : حتى فهد العسكر صار يكتب سياسة مؤخرا
شميس : إنتى شقصتج وياه؟؟؟؟؟؟؟
بزة : والله ما عندي قصة .. شفيك انت .. بس افتقدت روحه المرحة والساخرة هذا كل الموضوع
شميس : هم شايلين هم هالبلد وما ينلامون
بزة : مادري بس انا رأيي ان المدونات واحة الواحد ينسى فيها همومه مو يتذكر ويتم يطحن بنفسه وبالنس اللي حواليه
شميس : زين يا بزة
بزة : افففف .. يا شينك لين صرت جذيه .... بنرجع نغار

شميس : بزة .. اللي يحب مثلج ما يملك الا انه يغار
بزة : انت على بالك انت بس تغار
@@ : شميس
بزة : يعنى أنا ما أغار من قطوة الفريج اللي كانت تتغنج لك ذاك اليوم وطارت عيونها عليك
شميس : يا بنتي هذي قطوة
بزة : وانا بطه؟؟؟ يعنى شفرقت
شميس : الفرق انه ممكن تاكلنى وتاكلج .. فهمتي
بزة : ايه صح.. فهمتى
شميس : لوير ردت تبجي ..الله يعينها
بزة : ابييييييييييه .. شفت فريج سعود شقايل عنا
شميس : ايه قايل إن زواج عتريس من فؤاده بااااااطل
بزة : هههههههه .. انت والزين وربي نفس الشي
شميس : يعنى إنتى فسري لي عدم التكافؤ اللي يقصده
بزة : مالي خلق
شميس : عيل خل نشوف الحساوية شتقول
!!!!!بزة : تقول إنها بجت وتضحك بنفس الوقت
شميس : يمكن دموع الفرح
بزة : جايز
شميس : نجمة

بزة : أي نجمه؟؟ اللي تشوفها من شباكك كل ليله
شميس : ههههه .. عمري إنتى
بزة : ادري بنفسي عياره
شميس : اوووف حدج
بزة : تقول إنها كل مره تغير إجابتها على السؤال
شميس : نخليها لين ترسي على رأي
بزة : وأخيرا .. فتى الجبل
شميس : يديد هذا
بزة : عنده وجهة نظر
شميس : وانا وياه فيها
بزة : اوووف تعبت
شميس : الله يعين الزين .. كل هذول ردت عليهم
بزة : لأنها تحبهم وتهتم لهم
شميس : ولأنها تكتب لهم
بزة : تهقا الزين لقت شميس مالها
شميس : هههههههه.... تيين نسألها
بزة : هيا بنا

4.11.07

بزة وشميس ... وعودة الذكريات


بزة

جميله ... بيضاء ... ملفوفة القوام ... مثيرة بمشيتها .. يقطر الغنج من عينيها العسليتين وصوتها المبحوح بطريقه تسلب الألباب

بزة

رقيقة... حنونة.. تحب الاحتواء بدفء الأحضان.. تعشق الاستلقاء بالشمس .. ويستهويها اللعب بالماء كما الأطفال

بزة

تمرح في الربيع كما الفراشات ... وتستمتع بصحبة صديقها شميس.... تنعم برفقته نهارا وتستلقي إلى جانبه ليلا لتخلد إلى الراحة

بزة

كانت تحلم أن تحلق بعيدا مع كل طير مهاجر... تبحر بعيدا مع كل مركب مسافر .. تحلم مع اشراقة كل نهار... وتعيش المحال مع كل غروب

بزة

تعشق كل ما هو مجهول ... تبحث عن الغموض .... تقبل على الحياة كأنها صندوق مملوء بالخبايا والهدايا

كبرت بزة ... واكتملت أنثى مع ضوء القمر... وأدركت أنها لن تكون كما تريد إلا بوجوده هو... ملتحفة أحضانه

طرقت كل الأبواب بحثا(ن) عنه ... فضولها يقتلها لمعرفة المزيد... للغوص هناك ... علها تجد مبتغاها

ولم تدرك بزة أنها كانت مجرد بطة صغيرة في عالم البشر ... تقتل أحلامها لتشبع الجوع


نعم بزة كان بطتي البيضاء ... سحرتني ببراءتها عندما اشتريتها فرخ صغير يغطيها زغب اصفر من سوق الوفرة

ادري ودكم تطقوني الحين ... بس صدقوني بزة كانت كل شي وصفته ... كانت كالأطفال تعلب وتمرح... تربت كطفلة صغيرة مدللة مع صديقها الصغير الأرنب شميس

تصوروا بطة وأرنب طفلين صغيرين ... نسوا هويتهم وتذكروا فقط أنهم أصحاب... يلعبون معا(ن).. يأكلون معا(ن)... ويخلدون إلى النوم ليلا معا(ن)... ألفة غريبة ما كان بينهم... صحبة ، احتواء... وربما حب ... من يعلم

الغريب بالموضوع إنّ بزة كانت تتصرف كأنها قطة تعشق الغنج والدلال... يعنى كانت بطه تحب التلزق بالكويتي الفصيح ... تحب الاحتواء... تناديها تلاقيها تييك طياره تتقلب كثر ما اهى سمينه ومتكتكة... تمد لها ايدك تلاقيها تقط منقارها بكفك ... بس تشوفني قاعدة بالحديقة يت سطرت يمي اهى وشميس

أثنينهم تحف ... ما يفارقون بعض أبد ... نسوا هويتهم وصاروا مالهم اسم ثاني غير بزة وشميس .. إذا ناديت بزة تبعها شميس ... وإذا ناديت شميس تبعته بزة

وتصوروا حزة العصاري غرامهم يسطرون عند الباب يطالعون الرايح والياي ... وقبل المغرب تلاقينهم تمشوا يميع ادخلوا البيت وقعدوا تحت الشجر... استقبالا(ن) لليل.

بزة وشميس حبوا بعض ولم يفترقوا أبدا

المشكلة إن روح الاستكشاف عند بزة كانت سبب لنهايتها على ما اعتقد...يعنى عادي تلاقيها اهى وشميس بالسكة يتمشون ... ومن بيت لين بيت يسيرون ... ولين اشبعوا من الدوارة يرجعون

وبما أنها متربية في بيت عز .. والنعمة تبين عليها ... وتخلي اليوعان يشتهيها .. اختفت بزة .. وين راحت الله اعلم ؟؟؟

وكان يوم الله لا يوريكم ... اسم الله عليكم عزا ... والزين الدموع أربع أربع ... وتعال سكّت ... واللي ذبحني أكثر ييت أبي اتغدى ولا الغدا مجبوس دياي ......... يالله وتخيلت بزة الحين تنأكل في مكان ما في بيت ما ... و لك أن تتصور شعوري وأنا الأم المكلومة .. أم بزة

المشكلة مو فيني الحين ... الأرنب شميس حاشه اكتئاب شديد ... تصدقون انه اضرب عن الأكل والشرب .. وتم قاعد مكانهم اللي ينامون فيه ... لغاية ما مات

غريبة صح؟؟؟؟

أنا عن نفسى ما لقيت تفسير غير إن شميس كان ضحية الافتقاد ... افتقاد بزة... ذبحه الشوق.. وما تحمل الوله... شميس كان يحب بزة لدرجة انه رفض الحياة من بعدها .. بزة انأكلت ... وشميس انتحر جوعاً حزنا لفراق محبو بته

....وتظل بزة وشميس ذكرى حلوة لطفولة اعشق العودة إليها كلما ثقل صدري بالهموم

!!!سؤال يطرح نفسه في نهاية قصة بزة وشميس ... تعتقدون نحصل هالوفا بين البشر

30.9.07

من تأمن له


من تقدر تأمن له


في زمن صار الوصل فيه صعب
والغدر يطوي في بطنه كل صفات
والمشاعر يغلفها الزيف
والقرب غاية للطعن
و الحب ينشرى وينباع
والحبيب ماهو حبيب
والصديق يحملك الجميل
ينتظر يوم اللي يندفع فيه الثمن
والكذب ينولد مع كل ذكر وأذان
وصارت الأمور كلها مختلطه ببعض
وصار الغلط له الف اسم ومليون عذر وكذا لون
صارت الأقنعه هوايه نلبسها ونغيرها مع ملابسنا
وصار الوضوح عمله مالها وجود
و الصراحه تنذكر باسم الرياء والنفاق
وصار النفاق هو سمة كل العلاقات
من تأمن له اذا كنت تحس انك من زمن ثاني
وعالم آخر و البساطه فيك عيب
وانك تكون انت ضعف
من تأمن له لين صرت بليا سلاح
بلا سند
والذيابه محاوطتك بكل اتجاه
تنهش بلحمك وتلذذ
من تأمن له لين تلونوا البشر
وصاروا مو بشر
والطفل اللي ربي بحضنك
كبر ورفع عليك السلاح
والحق يندفن بليا جفن
من تأمن له
اذا صارت الضحكه مجرد صوت يكمل باجي الحديث
ودليل على هزيمتك ونصر غريمك
والحروب حواليك تدور
والدم صار طعمه مستساغ
والأبتسامه عشان تشوف الأنياب المسنونه عليك
من تأمن له اذا كنت محصور بحالتين يا غارم يا مغروم
يا ظالم يا مظلوم
والمشاعر عملة رخيصه رخيصه بين ايادي المتسلقين
من تأمن له اذا كان نورك يعمى عين عدوك
ويشعل الغيره بين حناياه
ينتظر لحظة يلومك بكلمة شينه
يخنق حروفك بيدينه
من تأمن له اذا اكتشفت ان السواد داخل اقرب الناس
واقرب الناس هم ظلمتك
هم غربتك
هم كل صرخه وكل آه
وشكوتك لحن ينطرب له من تصيد لك الهفوات
وعد عليك الزلات
وحفر لك الف حفرة وحفره
ينتظر طيحتك .. انكسارك
ويا ويلك لين طحت وانكسرت
يا ويلك
من تأمن له لين صارت دمعتك قريبه
تكشفك وتعلن صفاءك
وتنرجم بألف حصوة وحجرلأنك ضعيف
كتلة مشاعر
ما تبي شي
غير الحنان غير الأمان
وأي أمان هذا اللي تنباع فيه الأوطان
بحفنة مصالح مالها صالح
من تأمن له لين رفضت الكبر
ولبست التواضع
ونسوا انك آدمى معجون بالكبرياء
من تأمن له
لين استباحوك
وللناس قصوك وقالوك ولاكوا سمعتك مثل السر المباح
من تأمن له
لين صار ليلك فجره بعيد
والشمس تيي وتروح
وعلى ارضك ما تلوح
وين الوطن وين السكن
اذا كان حتى القمر يغير اوطانه بليا ثمن
واذا كان السكن ما يعنى الا حفنة تراب
ينشرى وينبنى ويرد ينباع
من تأمن له اذا كانت غربتك داخلك
والحزن ياكلك بكل لحظة تحاول تبتدي فيها من جديد
تبتعد عن كل اللي متعبك
تقطه ورا ظهرك
وتحاول تكون آدمي
بين ناس نسوا معنى الآدمية
من تأمن له لين تعب قلبك
وجربت تستريح
تدور على واحة فيها تروي العطش تنسى اللى راح
تلقى واحتك اصلا سراب
وقصر انت بنيته بخيالك ماله ابواب
تلعب الأشباح فيه
وتاكل جدرانه عصوف الرياح
من تامن له
يا دنيتى يا واحتى تاهت منى الأسباب
من تأمن له
غير رب كريم
وتصرخ باعلى صوتك
الله كريم
الله كريم

22.9.07

الزين والحداق




مساكم الله بالخير

او صبحكم الله بالخير

من بداية رمضان تلخبط عندنا الوقت

الصبح والمسا صار واحد

كلنا ارواح مسخره للعباده

طالبة القرب من اللي خلقها

ادري طولت عليكم الغيبه

بس اليوم البوست غير

وحدى مشتطه ابي اسولف لكم

امس طلعت الحداق ...... هياااااااااااااااااااااااااا

والله كانت الطلعه وناسه حد الدوسه

الجو كان عجيب ما كأن قاعدين بالكويت

بدون مبالغة ... كان ودى اتمدد واحط راسي وانام

بس وين ..... ههههههه .... من كثر ما كان الصيد حلالي على الأقل بالنسبه لي

ما قدرت حتى اشرب استكانة شاي ....مع انى ما اشرب شاي

بس يقولون ان الحداقه لازم يشربون شاي مع سيجاره ... :Pp

المهم انا ما حصلي لا هذا ولا ذاك

الحصيله النهائية ثلاث نويبية بس شنو ..... احلا شي حق فطورنا اليوم

وعقبها قررت اعتزل الفن عقب ما اعترفوا العصابه اللي معاي مع بوسه على الراس انى شيخة الحداقه

شرايكم فيني

شوفوا الصور بنفسكم وحكموا

11.9.07

نور ... اخذيني معاج


الزين : صاحية؟….مو نايمه؟

نور : صاحية

الزين : اقدر اسولف معاج شوي

نور : قولي

الزين : تعبانه

نور : من شنو؟

الزين : من الظلمه

نور : ادري

الزين : شدراج؟!

نور : احس فيج

الزين : تشوفيني؟

نور : دايما .. أنا حولج وحواليج

الزين : ولهت عليج

نور : وانا اكثر

الزين : ما عندي أحد اقول له

نور : قولي لي أنا

الزين : انتى هناك

نور : وهنيه بعد

الزين : بيقولون مينونه

نور : ما يدرون .. ما عليج منهم .. لا تفكرين باللي بيقولونه

الزين : فراقج ذبحني .. ورمضان على الأبواب.. ساعديني اعدى هاليومين…. احس اني
قاعده اختنق بدونج

نور : لا تقولين جذيه .. أنتى اقوى

الزين : ماني قادره اواصل

نور : عشاني بتواصلين

الزين : شلون .. وايدج مو بيدي

نور : بتقدرين

الزين : صرت ما أعرف نفسي

نور : بس تعرفيني انا … اتبعيني

الزين : تذكرين لما كنا صغار.. تذكرين رمضان

نور : اذكر

الزين : تذكرين لما كنتى تيوعين تالي الليل وننزل نطبخ

نور : ههههههه .. اذكر.. مرقة الربيان

الزين : ههههههه .. كانت بربس

نور : كانت حلوة

الزين : تذكرين سهرنا لين الصبح .. تذكرين السوالف

نور : انتى تذكرين؟

الزين : لا تسأليني .. انا عايشه على هالذكريات

نور : ثبتي أكثر

الزين : ابيج يمى …. ابي اتسند عليج

نور : انا رحت خلاص … انتى كملي

الزين : خليني اشوفج .. خلى الحلم اييبج عندي

نور : مو بكيفنا

الزين : نور

نور : صبري واحتسبي

الزين : صبرت … والصبر مر

نور : حليه بالإيمان

الزين : قاعده احاول

نور : حاولي اكثر

الزين : غرفتج مثل ما اهي

نور : اشوفها

الزين : ودي يرد فينى الزمن وتكونين هناك

نور : ماكنت مرتاحه .. كنت وايد تعبانه
الزين : ادري .. كنت احس فيج

نور : كنت اداريج

الزين : تغيرت …ما عدت الأولية

نور : انكسرتى

الزين : وايد … روحتج اكسرتني

نور : غلطانه

الزين : ليش؟

نور : اللي يحبونج وايد .. واللي محتاجين لج اكثر .. حطي محبتج لي فيهم

الزين : انتى غير .. مو مثلهم

نور : ما عليه .. ماكو احد مثل احد

الزين : ابيج انتى

نور : انا مو عندج

الزين : ليش ما علمتيني شسوي قبل لا تمشين

نور : انا لمحت لج .. انتى ما استوعبتي

الزين : كنت قوية لأنج يمي … ما هقيت ان ليه طال الوقت بضعف جذيه

نور : منتى ضعيفه .. يتهيأ لج .. كنتى اقوى منهم كلهم

الزين : كنت اقوى عشانك

نور : والحين صيري بعد عشاني

الزين : تعبت .. تعبت يالنور … ابي الضوى يدخل قلبي

نور : اهو موجود .. دوري عليه .. انتى اللي معتمته

الزين : خذيني معاج … خذيني عندج

نور : خلج واقعية .. هذا مو تفكير.. هذا ضعف

الزين : محتاجه لوجودج يمي

نور : عمرى ما تركتج .. روحي دايما معاج

الزين : عشان جذيه لما رحتى .. روحى انا اتبعتج

نور : زيون

الزين : ابي اصيح

نور : صيحي .. بس تذكري اني ارتحت

الزين : ابي ارتاح معاج

نور : ذكرينى بالخير … ادعي لي .. محتاجه الدعاء

الزين : ربي يرحمج

نور : ربي يصبرج




4.9.07

والتقينا... الزين بعد الكلاكيت




الزمان : مساء يوم الخميس

المكان : ماكي / الأفنيوز

والتقينا

نوره : زيون شفيج..... فيج شي

الزين : نوو .... مافيني

نوره : تعرفينهم اللي دخلوا؟؟

الزين تهز راسها بصمت

قماشه : واو شفتيهم

ريم : اكو واحد منهم ياخذ العقل ..... مزيون

الزين ترفع راسها تناظرها

نوره : زين .... شفيج

الزين : مافيني ... يمكن يوعانه شوي


أخ يا قلبي

وصدفه تلاقينا

ولمست روحي ايدينه

ادور اثر فراقي بعينه

صار الوجود لونهم

هزنى يوم ناظرني بلحظة

حتى خاتمي ثقل باصبعي

حتى انفاسي تغيرت ... اسرعت

صار حضوره دنيتي


ريم : ابيه زيون .... الحلو المزيون .... أخييييه .... مو شايل عينه عنج

نوره : بس .... الثقل زين ... شفيج اليوم صايره أي شي


الزين ترفع راسها تلتقي عيونه تحس بغصه يوقف كل شي حواليها ما تسمع ما تشوف وما
تحس إلا بوجوده


انتى وينج

انتى وينك

ليش الجفا يازين

كنت بارد معاي ..... كنت اهدا من هواي

كنتى تطلبين وايد ....... كنتى تعطين من غير حساب

ما قدرت اقايش معاج ...... انا مو جذيه

انا ما اعرف ادلع .... ما اعرف اقول

شسوي انخلقت وتربيت جذيه

يعني انا استعيلت

مادري

شلون ما تدري

لين الحين ما عندك جواب


قماشه : الزين ....... زيوووووووووووون ... وين رحتي

الزين : هممممم .... نعم .... سوري سرحت

ريم : اللي ماخذ عقلج

نوره : قموش ذوقي هذا عجيب .... خلوها ..... توها تقول يوعانه ... زيون !! ما تاكلين

الزين : مو جنه حر شوية


البنات يتطالعون


لا تطالعني جذيه انت عارف تأثير عيونك علي

لا تسرحين فيني بهالشكل لا تضعفيني اكثر

يا ليت الدنيا انا وانت وبس

حلوة ..... مثل ما خبرتج .. حلوة ......ايامنا كانت حلوة

ما عرفت قدري ولا قدرها


نوره : زيون .... البوست الأخير كان حلو ....حسيت انج تتكلمين عنى .. تقصديني بهالكلام
قماشه : وانتى كل ما اكتبت شي قلتي عنج ... ما صارت .... ووين رحنا احنا .... احنا لنا
دور بعد .. اصلا هالمره كانت تقصدني انا مو انتي

ريم : ياحلوكم .... وانا وين رحت

الزين : بس عاد فضحتونا .... انا كنت اقصدكم كلكم وانا بعد وياكم.... بس سكتوا

ريم : أي شي .... انتى ليش معصبه

الزين : يوزي عني .... وماني معصبة

نوره : اقول زيون

الزين : همممم

نوره : كملي سالفة الزين ..... تذكرينها؟


ترفع عيونها تطالعه واهو لاهي مع ربعه

ريم : ايه كمليها .... خليهم يلتقون .... رجعينهم لبعض .... خليه يحبها ويترجاها ترجع له

قماشه : ايه .. ايه ... عيشي الحلم ... ماكو فايده فيج ... مخج ترللي

ريم : اووووووووه انتى عاد ... شنو يعني ما يصير نحلم ؟ اصلا احلا شي انج تحلمين

نوره : نبي انتقام ..... خليها تنتقم منه

قماشه : يا سلاااااااااام .. غرام وانتقام .... صار فيلم عربي

الزين : مادري ... احس ان السالفه مصخت ... وانا اصلا مليت من هالقصه

ريم : كسري المود .... صار لج فتره كله شعر ... نبي اكشن .... نبي قصص

نوره : يالله زيون .... بلييييييييييز ... بوست واحد بليز


يطالعها واهي سرحانه يتساءل .... شتفكرين فيه .... ياليت اعرف ... ياليت اقدر اقراج الحين

ترفع عيونها ..... يبتسم لها ..... تصد


الزين : ليش لأ ....نكتب بوست واحد وبس


قماشه : تهقون سالفة الحب هذي صجية .... يعني اقصد اكو حب مثل ما تكتبه الزين
بقصايدها

ريم : ههههههه ... لازم يكون ... أي شي ...... انا وحده ماراح اتزوج الا لما احب

نوره : ماكو .... شبابنا ما يعرفون يحبون ..... كلهم يبون يلعبون .... بعدين يما خطبي لي

قماشه : انا وحده مابي احب .... ما بي ينكسر قلبي

الزين : وشدراج بينكسر قلبج

قماشه : انتوا .... كل وحده قصتها قصه..... وانا ماني مينونه اسوي مثلكم

الزين : تبين نصيحتى .... انحبي بس لا تحبين

نوره : انتى تتكلمين جد .... انتى اكثر وحده تسوق للحب ببلوقها

الزين : لأنه موجود .... بس للأسف ولا وحده منا صادفته

ريم : يعني انتى تبين تقولين لنا انج ما حبيتي ابد

الزين : هههههه ... يمكن .... ويمكن

نوره : اهاااا شوفي عاد ... اليمكن واليمكن هذي فيها إنه .... ومنتى منحاشه بتقولين يعني
بتقولين

قماشه : بنحطج وبنربطج ولازم بتقوليييييييييييين

ريم : يما ..... ريا وسكينه اسم الله على قلبي

الزين : ميانين رسمي

نوره : ايييييييييه..... جبرني الوقت انا ارد لك ....تشمت فرصه وجت لك

ريم : وانت عاد من الله تبيها

الزين : وتدري انا ... احبك ... احبك والله احبك

نوره : اخيييييييييييه


تشمت فينى وتشفى .. وحسابك معاي صفى ... واذا ودك تعذبني ... الزمن كفى ووفى .... جبرني الوقت انا ارد لك

احسب الناس مثلي بطيبي ... وعلى نفسي ابديهم ... أأمنهم وهذا هو عيبي ... ومليون مره
انصدم فيهم

تهقا أن رجعتي سهله ... تعتقد اني برجع .... انت موهوم ... موهوم


قماشه : زيون هييييييي ... وين رحتي

الزين : مارحت ... وياكم

قماشه : شوفي عاد ... تبين الصج .. انا ترى النهاية ما عجبتني .... حسيت ان ما فيها آكشن

الزين : أي نهاية؟؟؟؟

قماشه : وتقولين انج معانا ..... نهاية قصة الزين .... والله ابصم بالعشر وعلى يبهتى بعد
انج اليوم فيج شي ... شنو مادري

ريم تتفحص وي الزين

ريم : ايه محلوة .... شمسويه حق بشرتج ....ابيييييييه لا تقولين اوباجي بعد

نوره : وانتي كله بره الموضوع

الزين : شلون يعني يا ام اكشن انتى ..... يتكافخون.... تموتين على العنف

قماشه : انتوا ليش جذيه ظالميني ... بالله ويهي انا مال عنف ... كل اللي اقصده على الأقل
خل نكون واقعيين .... يتهاوشون ... يتحاسبون .. مادري

تهقا كان لازم نشد مع بعض ... نحاسب بعض ... يمكن حزتها نحن حق بعض

تهقين انج لو ما تركتيني بهالسرعه كنت راح احبج اكثر


عيناك .... آه من عيناك

دخان سيجارتك احتواني كما لم تحتويني يداك

همس عطرك يداعب مخيلتي

يثقل مقلتي بكل الأحلام والأمنيات

يهزمنى ...يقتلني ..... يطرحنى بكل المتاهات


الزين : بس الزين مومن طبايعها تناجر وتداحر..... اهى مو شخصيتها انها تستجدي
مشاعره ناحيتها .... وماكو حب ايي بالقوة .... وانا اعتقد ان اهو ما حبها ..... اهو تعود
على وجودها بحياته لفترة ...... وساعات هالتعود كان يثقل عليه

يصير مو فاضي لها ... مو صوبها ... وماكو شي يجبره يتواصل معاها... بس لو كان
يحبها ... كان الوضع وايد راح يختلف


نوره : بيييييه .... انتى وايد عايشه الجو ومحتره

الزين : عشان اكتب عن الزين لازم اكون الزين نفسها ... اعيش قصتها

ريم : والله ما يندري عنج .... ما تنعرف مايتج .... ساعات تكونين غامضه ... ساعات
احس ان كل اللي قاعد يصيير صج ... مو خيال


الزين : هههههههه ..... تهقين

قماشه : بس والله اذا حبيتى وما علمتيني بحاربج ..... وتكونين اكبر هبله اذاعشتي قصتج
اللي كتبتيها وعارفه شنو نهايتها .... بلا حب بلا خرابيط


نوره : الحياة حلوة .... لعبى واستانسى في حدود المعقول بس لا تتعلقين ... شحقه عاد احط
لي واحد يلوع جبدي ... ويلعوزني ... واسوي له يا دهينه لا تنكتين .. وبالنهاية ...... بح


ريم : ووين المتعه انج ما تعيشين هالمشاعر .... مشاعر الوله .. الشوق .... الوناسه لما
تلتقينه

قماشه : انتى خلج عايشه بالأحلام لما ايي لج اللي يعطيج طراق سنع

الزين : تبون تحلون لو نمشي

ريم : ايه ... ايه نتمشى شوي ... نهضم ... ونمتع ناظرينا ..... هههههههه

نوره : انتى يالفاصله

الزين : انا ابي قهوة

قماشه : وانا ابي حلو

نوره : افف انتى يالنمله ياللى تموتين على الحلاة

ريم : انا ما عندي مانع ... على شرط

الكل : شرطي

ريم : نشرب قهوة بعديلية ..... هاهاهاهاهاها

نوره : أحلا ااااا

قماشه : شالسالفه

الزين : ماكو خليج انتى مثل ما انتي ... هذول فاصلين


الزين تناظره بعيونها للحظة

الزين : انا ابي ارجع البيت

البنات : ليييييييييييييييييييييش؟؟؟

الزين : تعبت ... ابي ارجع


نوره : اوكي ... قموش عيل نكمل القعده في بيتكم

الزين : لأ ... تعالوا عندي ... ما ابي اقعد بروحي

ريم : يا شينكم


انا ماشية ... ويمكن ما اشوفك مره ثانية
ويمكن صدفتنا اليوم كانت عشان تعلمني
شنو اللي انا خليته وراي ومشيت وشنو اللي خسرته
.... تدري .... اكتشفت اني ما خسرت الا الوقت اللي قضيته معاك
.... اما انت .... منت اللي في بالي .... يمكن اكون في لحظة حنيت ... اشتقت ...
وعذبتني الأفكار..... بس الحين تأكدت ان كل اللي كان ... كل المشاعر ...كله .. كله ...
كان تعود... كان مجرد فراغ ... وانت عبيته ... والفراغ لازال موجود ....
والف غيرك يعبيه

فرصه سعيده








24.7.07

انا قلبي يحاسبني ..... الزين


قلبي يصرخ ... ذبحتيني ... قطعتي عروق ترويني

ابي فلان ... يداريني .... يحس فينى.... ويسقيني

ابي بدينج ترجيعلي هوى سنيني

تبيني ارجع

تبيني لذباحي انا اتبع

تبيني اسامح هوي فلان

تبيني اعيد اللي كان

افاا يا قلب

ترضاها لو الأيام دارت بي وكسر فيني

ترضاها اصير لواحد عمره ما يحس فيني

ترضاها اكون لواحد قلبه ما يدفيني


قرارج انتي اللي نجل فيني

نسى انه هوي يومي

حشى يوفي

نبضى اللي يدق فيني


عجيب امرك

انت اللي شكيت جفاه

انت اللي ماطاوعك قلبه ..... وهواه


انا ادري بعلومي وعلومه

ولو نسى هوى روحي مالومه

أبيه يمي يكون مرتاح

ابي ايامنا افراح

ابي اصير له صندوق .... وهو المفتاح


اكيد ينيت

اكيد انك مشتقاق له حيل الحيل

ترى فلان يا قليبي غنى عنا

ودروبه ماهي صوبك ولا يمنا


ما اصدق ...

ما اسمح لج احساسي تجذبينه

صج يالزين ؟؟ قدر ينسى


اجل ينسى


لا تقولين

انا ماقول ... وجفوته كل هالوقت هي اللى تقول

تبي اذكرك

تبي اعد لك

تبينا نقص اللي صار

حجي واسرار

تبيني اذكرك بالرجوى والإلحاح

يوم غط عني هواي ايام

حبيبي انا قلبي صار ملتاع

ابي اسمع صدى صوتك

يقول لي صار

ويغيب عني دهر وامرار


واحساسي بذاك الوقت

كأن الدنيا صارت هو

وهو ناسي

هواك جاسي

دمر كل احساسى

هقيتك عزتي وناسي


تلومينه

تلومين اللي كنتى سهله بيدينه

تلومين اللي قلتي الآه.... وانتى تذكرينه

تلومين اللي حلمت معاج في يوم تلمينه

وتاخذينه باحضانج لدنيا لونها وردي

تحسبينه ... بالألوان يحس فينا

تراه اعمى ما يبصر

النيرة اللي بيدينه


تعب فكرى وانا ادور له اعذار

اقول منى اللي صار

الوم نفسي ومالومه

مع اني اعرف علومه

مع اني كنت متأكده هواه بياع

اشوف عيونى تنادي له

تشكي له... ليالي طوال


حلفت يالزين ما أدري شعلاجى

ابي انساه

ابي اسلاه

ابي احيا بلا ذكراه

عطيني وقت

اكيد بقدر ..... اكيد بقدر

وعلى جروحي انا بصبر

يبي لي اسبوع مو اكثر

احس بغيبته واحتر

وبعد الإسبوع

بيرد قلبج يورد و يزهر

ويفرش لج بساط اخضر

الا يالزين وزين الزين

بخليج تفرحين اكثر

يوم انساه وبعد واسلاه

وادور من يسد فرقاه
وعلى بعاده....... انا بقدر


















21.7.07

يا متلف الروح .... الزين كلاكيت آخر مرة


هو : نايمة
الزين : اهمممم .... وقاعده احلم بعد
هو : اكيد حلم قوي .... والرقابه مقطعته
الزين : @@ .... فلان ... اخاف انت اللي مو صاحي .. نايم
هو : ههههههه لأ .. اطفرج عشان تصحصحين
الزين : صحيت خلاص .... انت تدري الساعة جم
هو : ايه ادري ..... ابي اكلمج
الزين : خلها الصبح بليييز
هو : انتى مو تقولين صحيتي ... خلاص
الزين : اوكي ... خير .. قول شعندك
هو : يومين اكلمج وماتردين علي
الزين : ماعندي شي اقوله
هو : من متى
الزين : فلان ... قول اللي عندك من غير مقدمات
هو : الله يالنفس ..... شدعوة يبا ... شنو اللي صار يستاهل كل هالزعل
الزين : ماصار شي ... وماني زعلانه ... بالعكس انا مرتاحه
هو : اشتقت لج ... فقدتج وايد
الزين : انت وينك فيه
هو : الشاليه
الزين : اشوف المزاج مضبوط
هو : مزاجي مضبوط لأنج رديتي على
الزين : اووووه .... كلام يديد
هو : اليوم سمعت اغنية وطريتي على بالي
الزين : أي اغنية
هو : يا متلف الروح ... ادري شكثر تحبين السامري
الزين : والله ماخذ بالك
هو : اكيد ماخذ بالي ....زيون الجو عجيب على البحر .... ياليتج تشوفين القمر
الزين : يا بختك
هو : قولي لي شسويتي بهاليومين
nothing much الزين : المعتاد
هو : زين .... شفيج
الزين : شفيني ؟
هو : انتى لما الحين زعلانه
الزين : قلت لك ماني زعلانه
هو : شنو يرضيج .... شنو يرجع زيون القبلية
الزين : هذي انا ما تغيرت
هو : ماكنتى جذيه
الزين : انت سويتني جذيه
هو : تيين نلعب لعبه
الزين : ههههه ... فجأتني
هو : جد .... تيين نرجع يهال
الزين : وبعدين
هو : نطلع نلعب يميع
الزين : بدون قيود ... بدون تحفظات
هو : بدون مشاغل ... مثل ما تبين
الزين : شنلعب؟
هو : هممممم ... شنلعب؟
الزين : حيلة .... عنبر ..... هياااا .....نلعب عنبر
هو : ههههههههه
الزين : بس اخاف تعورني بالكرة
هو : افا عليج .... قبل لا احد يعورج ... اقط روحي عليج

الزين تتنفس بعمق


هو : شفيج سكتي؟؟؟؟
الزين : فلان ..... احنا شقاعدين نسوي
هو : نسولف
الزين : وبعدين
هو : شنو اللي بعدين

هو : يعني ما رديتي
الزين : ما تشوف ان هالكلام ييه متأخر ... مثل مطر الصيف لا يروي ولا يخضر
هو : حيرتينى يالزين .... ماني عارف شتبين
الزين : مابي شي .... خلاص ... مابي شي
هو : شتقصدين
الزين : اقصد اللي فهمته
هو : زين ... انتي عارفه شنو قاعده تقولين
الزين : ومتاكده من قراري
هو : تبيني اطلع من حياتج
الزين : احنا مانصلح لبعض ... عمرك ما راح تقدر ترضيني ... وعمرى ما راح ارتاح معاك ... انت يا فلان من عالم وانا من عالم ثاني .... وانا تعبت ... ومليت ... والسالفه كلها ما عادت تهمني مثل الأول

هو : شنو اللي صار حق هذا كله ... انتى ليش مصرة تكبرين الأمور
الزين : بالعكس انا قاعده اعطي الأمور حجمها مو اكثر
هو : هذا آخر كلامج
الزين : ايه
هو : اوكي .... الله يوفقج ............. في امان الله
الزين : بحفظ الله
هو : زين ..... ... ابي منج شغلة قبل لا امشى
الزين : تفضل
هو : اذا احتجتى أي شي .....أي شي .... لا تترددين تكلميني .... عديني اخو من اخوانج
الزين : تسلم .... اكيد اخو ..... مو اكثر
هو : اخليج
الزين : الله وياك



19.7.07

تعب قلبي .... الزين كلاكيت رابع مره


الزين : تعبتني معاك .. تعبتني

هو : قصبن على والله مشغول

الزين : وانا تعبت من انشغالك .. انت منت فاضي لى ... تعبت من حالة الوله اللي مالها تالي
.. انت اصلا تقريبا منت موجود بحياتي

هو : لا تقولين جذيه .. انا كلي لج .. انتى حياتي

الزين : وينه .... ما اشوفه هالحجي ... انت حتى لما تكون مشتاق ما تقولها

هو : الزين .. عطيني وقت ... احتاج اتعلم

الزين : وقت ... انا مستعده اعطيك عمرى عشان كلمة وحدة حلوة
.. انت يا فلان بخيل ... بخيل علي بمشاعرك ... وانا
صعب علي .. وايد صعب انتظر شخص .. كلمة ولهت عليج يستصعبها


هو : لا تقولين جذيه ... انا قاعد احاول

الزين : مو كفاية

هو : شلون ... قولي لي شنو يرضيج

الزين : ابي من وقتك زياده .... ابيك تلغى عقلك للحظة ... تخلي قلبك يحجي من غير تحفظات
.... انت ذبحتني ببرودك
بهدوئك ... خنقتني

هو : خنقتج ؟؟؟؟

الزين : ايه خنقتنى .... حجمت مشاعري ... صرت خايفه اقول
... خايفه اتكلم لا انفهم غلط ... انت حتى الخيال رافض تعيشه معاي

هو : زين .... انا قلت لج من البداية انا واحد ريولي بالقاع ... عقلي يسبق قلبي ... احسب حساب الكلمة قبل لا انطقها

الزين : مو معاي ... انت لو صج لي معزة عندك ... لو انا ملكت جزء صغير من قلبك
... لو انا حويت جزء اصغر من حياتك ما كنت راح تحاسب معاي ... كنت راح تحس اني نفسك
... انا انت ... احنا واحد

هو : زيون .... زيون ... انتى شقاعده تقولين

الزين : اقول اللي احسه .... غيابك يجرحنى يا فلان

هو : انتى فيج شي .... قولي لي عشان اعرف اريحج

الزين : كل هذا وما قلت ... ياربي .. فلان .... انا بسألك سؤال..... انت تعرف تعصب .... تعرف تنفعل

هو : انتى شنو تبين توصلين له .... تبيني اعصب ... وبعدين وعقب ما اعصب وازعل

الزين : يا فلان انا حاسه انى مولعه .... وانت قاعد بالثلاجه

هو : يعني ترتاحين لين عصبت وزعلت عليج

الزين : مادري شنو ابي ... وما دري شنو يريحنى

هو : اوكي هدي شوي ... ذكري الله ... انتى وايد معصبه

الزين : يعني شنو ... على بالك ان ياهل تقص على بكلمتين

هو : زيون .... شفيج اليوم ... شاللي تغير

الزين : قول شاللي مافيني .. انت يننتني ... طلعتني من طوري... وتسألني شاللي تغير
... ما تغير شي ... لازاد ولا نقص ... انا مادري انا شنو بالضبط بالنسبة لك ... وين مكاني بحياتك

هو : انتى الزين .... حبيبتي

انفعل ... خلني أحس أنك معاي

كسر الدنيا بيدك ... اعصر دموعي بكفك ... وانت تتنفس هواي

على صوتك .... هزني بقوة ... خلني احسن أن حبك ..... أقوى

خذني بأحضانك وقولي ..... رضوتج فيها ... رضاي


الزين : فلان

هو : ابوي إنتي

الزين : انا بمشي .... بفل

هو : وين رايحه ... شنو اللى صار .. الزين أنا ماني قادر افهمج

الزين : تعبت يا ولد الناس ... وماني لاقية راحتى معاك

هو : انتى أكيد تتغشمرين

الزين : ......لأ ما اتغشمر

هو : زين ردي علي

الزين : ..... شقول

هو : يعني شنو شقول؟ ...... قولي اللي في بالج

الزين : قلته............. وخلص الحجي

هو : ........... ؟

الزين : اخليك

هو : برجع أكلمج

الزين : باي

هو : برجع أكلمج زيون


أبرحل تاركه احلامي معاك

جروحي كثيرة ودواها هواك

أبرحل ... وقصصنا تسايرني

تذكرنى بضنى حبي

تذكرنى باللي جرى بيننا

أبرحل واتركك

يمكن رحيلي يحركك

يمكن غيابي يكوي دمعتك

يمكن تكون الزين ماهي قصتك



16.7.07

الزين ..... كلاكيت ثالث مره


الزين .... كلاكيت ثالث مره

الزين : الأوتيل عجيب ... خيالي

هو : مستانسه

الزين : وايد ما تصدق شكثر ... بس ناقصنى انك تكون معاي

هو : شلون

الزين : بسيطه ... ادز لك سعفه بس تمسك عدل
.. نص ساعه وانت عندي نشرب شاي مع بعض بالبلكونه
هو : خوش فكره

الزين : صج ... يعني انت بتيي عشاني لو عشان الشاي

هو : الأثنين يالزين ... الأثنين


الليل تقضى وخلص

شبقى فيني من شوقي تدور عليه

بعلومك انا ابخص

عندك مليون شي تنشغل فيه
بنيتي انتظر العمر كله

وبنيتك تعطيني شوية ثواني

هو : شسويتي اليوم ..... وين رحتي

الزين : كل شي اوو ولا شي .... تدري ودي اسبح بالبحر... ابي الشمس تلوني
ابي الملح يذوبنى ... ابي التراب يغازلني .... وابي هذيج النخلة تضللني
.. ابي اكون جزء من الصوره اللي جدامي .. احسها .. المسها .. اذوق طعمها

هو : سبحى ..... بحر عمان كله لج

الزين : تيي وياي نسبح يميع

هو : انا مو مال بحر ... انا حدي حمام السباحه

الزين : ايه صح خلنى اسبح بروحي مثل الميده

هو : هههههههه مينونه

الزين : اكيد مينونه خصوصا انك ماتحب الميد
.. بس تدري انا ما عندى مانع اصير لك صبوره

هو : انتى حورية

الزين : همممم ... حورية كويتية في بحر عمان .... يا سلااااام
... وايي حداق عماني يصيدني ويعطيني الدانه عشان ارضى فيه

ألا يا نول

علمنى ليه رماني دهري وسط الجول

ونجل فيني بدروب الهوا حلو الزول

الا يانول


هو : انتى من وين تييبين هالحجي

الزين : منك ... منى ... من الجو ... من الحاله اللي اعيشها

هو : أي حالة تقصدين؟؟

الزين : لا تشغل بالك ... انا حالاتي كثيره ... وكل يوم لي حاله

هو : وممكن اعرف شنو الحالة اللي انتي عايشتها الحين

الزين : ما اعتقد تبي تعرف

هو : يعتمد

الزين : علي؟؟؟

هو : على الحالة

الزين : اوكي ... انا ابيك الحين يمي .. بهاللحظة .... ابي اشوف عمان بعيونك
... ابي احسها بكلامك .. بلونك ..... حتى بسكوتك


هو : الزين ..... وينج

الزين : موجوده .... ما تحتاج تدور علي .... اشتقت لي؟

هو : اكيد

الزين : شكثر

هو : مادري

الزين : يعني شلون .... هذي شلون افهمها بالله

هو : مادري يعني وايد

الزين : ليش احس فيك بعيد

هو : انتى بعمان

الزين : انت بعيد بفكرك ... بروحك .. بقلبك ... الدروب اهي اللي تتباعد مو القلوب

وانت بعيد.... بعيد وايد

الزين : تعال نحلم

هو : شنحلم فيه

الزين : ايدي بيدك .... تسايرني واسايرك ... تراب البحر يلاعب ريولنا
... تلون عيونك سماي ... وعطرك يلف هواي ... وانسى الدنيا وانت معاي

خطاوينا على تراب البحر تلف فينا دنيا كلها اسرار

خطاوينا تسير الهوا فينا وتحجي قصة الماضي قصة البحار

ترك اهله ترك ناسه

ترك الثغر الذي باسه ... ترك عالم ما داسه

ركب بانوش معلي شراعه دوم ومخلى

وراه عالم يسرى كما الأحلام ... يقول يا مال

خطاوينا تجر فينا حنين سنين

قصص اسرار

لها في قلبي بيت ودار

وسط صندوق مبيت

حزاوي امك وامي

وديرة جدك وجدي

ودانه تأسر البحار

وتدري شصار.... لقى الدانه..... نسى اهلة

نسى من باع الدنيا من أجله

وصار بعيد
بعيد عن العين .... وبعيد عن القلب

14.7.07

عمان فى اربعة ايام


عمان

عبق الماضي .. عراقة لا توصف
... سحر ازلي

شمس مشرقه تلفحك بكل احتواء
جبال شاهقه تسقيك الشموخ

بحر أزرق ينافس السماء بصفائه ... يحكي قصص البحار .... يصدح باليامال

بخور يملكك .... يأسرك .. تتبعه لتعرف السر وراء كل القصص والحكايا

بشرة سمراء لوحها الشقاء والقناعه و حب الوطن

عمانيون بلا وهن ... بلا انكسار

طيبة متناهية ... كرم لا يوصف.. وابتسامة لا تموت

شواطئ ممتده تناديك لتحتويك ... لتغسل الحنين للصفاء .. لتبعد عنك كل ما هو مزيف

رمال ذهبية كأنها حلم


كانت اربعة ايام قضيتها هناك .. بعيدا عن كل زخم الحياة

تحت النخيل ... يداعب الرمل اصابعي وتلفحنى الشمس بدفء عجيب

وامتطي تلك الموجه لتتلقفني اخرى مرحبة بي كأنها تحضنني بعد طول فراق

بسيطة تلك العمانية.... من ارتدت العباءة بكل فخر دون رتوش اوروبية

عينان ساحرتان ومبسم لم تلوثه مساحيق تجميلية

كحل اسود كما الليل يبرز ما تخفيه عيناها من غموض

عطر شرقي يتطاير حولها لتسحرك بوجودها

جبال تلتحفها السماء ... طرق ممتده بكل انسيابية .. تجعلك تحب مواصلة المسير

بيوت بيضاء كما الدرر ... بطابع شرقي بحت .. يحمل الهوية العمانية بكل فخر

لم ارى دمار جونو ولكنني رأيت سواعد عمانية سمراء تحتضن هذا الوطن
.. تعمل بلا كلل ولا وهن

لتبينه من جديد ... واي وطن

وكان سوق مطرح كأنه لحظة قد خطفت من زمن قد مضى

كأننى ارى شهرزاد تبحث عن عطرها الليلة

عن اساورها الفضية وخلخالها الرنان .. لتسحر بهما شهريار

وكأن صندوق الدنيا قد فتح للحظة

لأنتقى منه جواهري الثمينه

احجار غريبه

من هنا خاتم ومن هناك قرط

وارى العطار امامي ... بأعشابه .. ولون النساء بيده

حنة حمراء ... وكحل قد خاط به عيناه .. وسؤال يطرح نفسه

عطار هو ام ساحر ينام بمصباح علاء الدين ليلا

كل ما في عمان تحسبه قد حيك من قصص السندباد

كان البلد جميلا جميل

وكانت الصحبة اجمل

اليك يا من رافقتني بمغامرتي الصغيره

لقد اعطتيني ما احتجته من الإحساس بالسلام ... بالحب والإحتواء

كنت نعم الصديق واروع صحبه

دمتى لي يا غاليتي ودام القرب بيننا






9.7.07

الزين .... كلاكيت ثاني مره




الزين : مساعد

هو : مساعد منو؟

الزين : بس يا بحر

هو : ههههههه

الزين : ابي الدانه

هو : هههههه ...يالفاصله

الزين : تهقا اكو مثل مساعد الحين

هو : مادري

الزين : لا تقول مادري ..... هذي مالتي

هو : شتبيني اقول

الزين : أي شي .... لا تبوق كلماتي


الزين : فلان

هو : ابوي

الزين : بس جذيه بغيت اناديك ..... احب اناديك ... احس روحي تناديك قبل شفايفي

هو : بيييييييه ...... كل هذا معزة

الزين : ايه كيفي ... معزتي وكيفي ..... مشاعري وكيفي

هو : انتي صج تحسين بهالشي

الزين : شرايك انت

هو : ما تخافين اييج يوم وماتلاقيني .... بح

الزين : هممم ...... اروح اشتغل احسن

هو : ليش زعلتي

الزين : ماني زعلانه

هو : عيل ليش عصبتي

الزين : ماني معصبه

هو : ليش ما تبين تحجين .... وين بتروحين

الزين : بروح فيلجا اقط روحي بالبحر عشان اغرق وياكلني السمج

وييي مساعد يدور علي .... بس هالمره ما يلقى الدانه


هو : لا تقولين جذيه .... اقط روحي وراج

هو : زيون

الزين : عيونها

هو : انتي ليش تعزيني هالكثر .... شنو فيني مخليج متعلقه فيني لهدرجه

الزين : اشياء وايد

هو : مثل

الزين : مثل مداراتك لي ... تتحمل ينوني ..... مزاجي اللي ماله سما ولا قاع
... ساعه فوق وساعه تحت

هو : بس انتي ما تعرفيني عدل

الزين : احب اللي عرفته لما الحين
.. يمكن احتاج اعرفك زياده بس انت مو معطيني فرصه ولا انت واضح كفايه معاي

هو : شلون ... بالعكس انا واضح وياج

الزين : لأ مو دايما ... ساعات احسك عندك حجي يدور في بالك وماتبي تقوله

هو : متى هذا

الزين : مادري الحين ... ما اذكر .. بس لما تحصل بقول لك


الزين : بسافر

هو : وين

الزين : عمان .. مع صاحبتي

هو : ليش عمان؟

الزين : بروح اسوي لك سحر

هو : سكنهم بمساكنهم ... بعدين انتى مو محتاجه تسوين لي سحر ... انتي سحرج منج وفيج

الزين : بخلينهم يسحروني انا ... يسووني ميداليه تشيلها وياك على طول

هو : هههههههه .... ومن قال لج انتي مو وياي على طول

الزين : صج .... انا وياك على طول

هو : ايه صج

الزين : بتوله علي ... بتشتاق لي

هو : اكيد

الزين : شكثر

هو : مادري


الزين : تهقا اكو واحد مثل مساعد الحين

هو : لأ

الزين : ليش لأ

هو : عشان مساعد فكر بقلبه وماكو الحين احد يفكر بقلبه

الزين : انا اذا لقيت مساعد ما ابي الدانه ..... ابيه اهو وبس

هو : انتى مينونه

الزين : مو شي

هو : احلا ينون

هو : زيون ..... الزين ... احلا زين ..... زيونتى

الزين : روحها..... قول ... تبي تروح تكمل شغلك ... بخليك ... ماراح أأذيك
.... بس ما اضمن لك إني ما اتحرش فيك بعد شوي

هو : انا كلي لج .... انتي تامرين

الزين : ياربي .... وما يبينى انجبر فيه

هو : يالله سلام

الزين : بحفظ الله

7.7.07

بيروت سامحينى


بيروت
وصحبة من رحلوا.. وفنجان قهوة الصباح .... وصخرة الروشه.... وحوار العشاق على شواطئ صيدا.... وبيت الصابون.... وشجرة الزيتون.... حرفيو لبنان ... وثوب ابيض طويل اشتريته لترتديه ولم يسعفك الوقت

عطور الحمرا..... وزهرة الليمون.... وحلم بالاستقرار هناك..... عالم آخر تركته هناك معك... في مستشفى البيطار... مسجى بجوار جسدك النحيل...ورائحة الجاردينيا تعيد ذكريات كل تلك الأحاديث الصغيرة..... والضحكات الليلية ... مع نسيم البحر المحمل بطعم ارجيلة الحلبي .... وألف سؤال لم تجب عليه قارئة الفنجان..... وليالي السوليدير ... وشالك الأحمر تدفئين به عنقك النحيل والذي أنهكه المرض ....وزجاجة عطر لم تمسها يداك... تركتها تحمل رائحة الافتقاد لغادة لم يبقى من أثرها سوى تلك العينان العسليتان....تنادي الخلاص بلحظة وداع

هل تذكرين ذلك النهر وتلك الأمسية في مقهى لم اعد اذكر اسمه... هل تذكرين كل الصور الجميلة التي جمعتنا في لحظة أمل .... ودخان سيجارة تعانق يد أبو خالد... يبحث عن الرضا بعينيك المكسورتين .... خوفا من غد لن يأتي وشغف بالحياة لم يشبع .... وانتظار شفاء لم يكتب .... وصحبة زمن قد وقف عند باب الموت.... ورمضان بطعم آخر محمل بابتهالات المساجد عند الغروب ... وحكايا بعلبك ..... وأطفالنا الصغار يلهون هناك بين الأشجار

هناك تركتك مغمضة العينين ... خالية الجسد ... وحيدة المرسى ... دون أن تكون مراكبي مصاحبة لزورق قد اخترتيه لترحلي على متنه عندما مللت الانتظار ... وأغنية وحدن تصدح بها فيروز تأتيني من آخر الممر....وديمة ناعمة تلفح جبهتي وأنا ابتهل لله بان يتقبلك بواسع رحمته ....وخاتم لم تتحلى به يداك ... و اسوارة مهجورة بجانب فراشك .... مع مصحف قد بقى مغلق مع ثنية عند سورة ياسين

بيروت .... مدينة حملت لي الأمل والألم بكف واحد.....ولم يبقى منها غير الذكريات ..... استرجعها ليلا بمخيلتي.... يعذبني صوت انكسار أمواجها .... صخب شوارعها .... وذكريات قهوة الهيمنجوي بالموفنبيك .... ورائحة البخور صباحا استعدادا للخروج..... وإفطار مقابل البحر .. وعشقك لذلك المكان ....سمير جعجع .... السيد حسن نصر الله .....جنوب لبنان ... البقاع ... بحمدون ....ومسجد نبي الله أيوب .... والقديسة رفقه ... ايجينى وحبيبها دوري .... رانيا وريمون .... توينى ..... نبيل .... روبير وسوزان .... يونس جورج .....نجلا ... اسما ..... وأبو مصطفى رحمه الله وتلك الليلة التي سبقك بها..... ونظرات عينيك الزائغتين ... والعشرات من الأسئلة المخفية بهما..... توني وقصة حب من طرف واحد ..... ومطار بيروت ... ناظم وحسين ... أحبوك وبكوك عند الوداع .... وعودة لك بتابوت لا يحمل من بيروت إلا الختم

ولازالت بيروت تتزين بأجمل الحلل ... صاخبة ... جميلة ... مغرية... كغانية لم تمل الرقص... لا زلت احن لبيروت .... لا زلت أعيش الذكريات ..... أعيد الأحاديث .... استرجع الصور .... واكره الرجوع...

بيروت .... عذرا ...فأنا لن أعود



سامحيني

6.7.07

كل الحكاية اشتقت لك ..... نوال


الزين : اشتقت لك البارحه

هو : كنت تعبان والنوم سلطان يازين

الزين : ارتحت

هو : الحمدالله

الزين : تقدر ترتاح من غيري

هو : شكو

الزين : لا تقول لي شكو .. ما احبها هالكلمة

الزين : طلعت الشمس من غيرك

هو : ههههه ... بروحج

الزين : بروحي .. كانت ثقيله

هو : شلون قدرتي

الزين : ناديت اسمك واشرقت

هو : ما اقدر عليج بالحجي

الزين : انت تدري الحجي صنعتي

هو : شمسهرج لين الصبح

الزين : سهرانه على طاريك ..اناديك ....اغني لك

هو : شنو غنيتي؟

الزين : غاب بدري انا يا من يجيبه

هو : بييييييييه عتيجه

الزين : ليش ما تحب العتق

هو : احبه وايد


هو : زين

الزين : عيونها

هو : متملل وتعبان

الزين : تعال نسافر ....تعال نبعد ونروح ديره ما يعرفنا فيها احد

هو : وين تبين تروحين

الزين : مادري .....ابي مكان فيه بحر ما اشوف فيه غير اللون الأزرق

هو : تعالي نروح جزر الأباطور

الزين : جزر الأباطور؟؟؟؟ وين هذي

هو : هممم سألي سعد

الزين : أي سعد

هو : درب الزلق

الزين : ههههههه .......ماتيوز من سوالفك

هو : يعني انتي اللي تيوزين

الزين : انا؟؟؟؟؟

هو : انتى نزقه

الزين : بعضا مما عندكم

هو : مو كثرج ... انا نقطه في بحرج

الزين : انت بحري كله


انت تعرف كيف أحبك

وان عشقى هو حربك

وان سلاحك اهو قلبك

لين صارت دروبي ودربك

مستحيل ..... اتلاقى


هو : زين

الزين : عيونها

هو : بس جذيه .......ابي انادي اسمج

الزين : تحبه .. تحب اسمى

هو : انتي شكلج خاطرج تتدلعين

الزين : ليش لأ.. أنا بنت واحب الدلع

هو : بس انتى غير عن البنات.. انتي اعقل

الزين : انا مابي اكون اعقل .. ابي اصير مثلهم
هو : لا تتغيرين انتى جذيه مثل الحلم .. مو مصدق انه في وحده مثلج بهالوقت
الزين : ما قلت لي ...اشتقت لي

هو : اكيد.. وانتى تدرين انى اشتاق لج

الزين : ليش ما تقولها

هو : انا ما اعرف اقول ....ليش البنات دايما يحتاجون يسمعون هالحجي

الزين: لأنهم بنات ... ولأن البنت تحتاج تحس بالأمان
.... ولأن امانها متعلق بكلمتين منك ....ملاقه ... هااا

هو : منتى مليقه .... وانتي تدرين

الزين : حيرتني

هو : انتي حيرتيني

الزين : اوكي تعال نحط حيرتي على حيرتك ونحل هاللغز

هو : أي لغز

الزين : لغزنا انا وياك

هو : شتقصدين

الزين : ما اقصد شي


هو : زيون

الزين : هلا

هو : شكلج زعلتي

الزين : ماني زعلانه ..ولهانه
... والوله عندي وصل الخط الأحمر ولين ولهت وايد اصير عسرة
.... ومزاجي يصير كلش مو خوش

هو : زيون
الزين : هلا

هو : بوستج الأخير حلو

الزين : صج ...عجبك

هو : ايه وايد ... احلا شي لما قلتي ..... اتعلم كم رجمتني العيون ..... بكل الظنون

وبعدين تعالي .... ليش حافية القدمين؟؟ تدرين .. قولي حق الخال قحطة يضبطج

الزين : هههههههه .......درب الزلق مره ثانية

هو : على طول

الزين : اموت بدمك العسل

الزين : ماقلت لي ... انت اليوم احسن

هو : حديد.... تحاتيني

الزين : وانا عندي غيرك احاتيه

هو : مشكوره على مداراتج لي بالحبيبه


أداريك...

ولو حصل لي في عيني اخبيك

وامسك عروقي لا اتفجر ليه يابوا طاريك

واحبس الكلمة بلحظة ما تلمس شفاهي وتفضح كلمة حلوة قلتها فيك


هو : اخليج الحين

الزين : اوكي .....بسمع صوتك مره ثانية

هو : على حسب الفضاوة


روح وخذ قلبي معك

لجل روحي تتبعك

نبضه في صدري غريب

يرتجي اغلى حبيب

تنشد جروحي دواك

تجرع السم من جفاك

روح وخذ قلبي معك


في حفظ الله يالغالي

29.6.07

عندما أشتاق إليك




عندما أشتاق اليك


أبحث عنك في كل خلايا جسدي


لأجدك هنا بين كفي ومعصمي عند نبضى تعيش




عندما اشتاق اليك


اقتنص كل شعاع يصل إلى عيني ومقلتاي


لأجدك بين رمشي وجفني عند مدمعى تعيش




عندما أشتاق اليك


أجمع الذكريات لأخيط منها حلة من الحكايا


وأجدك بين قلمي وأوراقي تعيش




عندما أشتاق إليك


أسطر الأمنيات على خيط رفيع من الحرير


لأرتديه ثوبا ألقاك به عندما تسرع وانت تسير إلي


وأجدك هنا أقرب لي من حلتى تلتحف دفئ جسدي




عندما أشتاق للشوق نفسه


يصبح الوجد خيالي


وتصبح أنت وجودي




فلا تبخل على بهذا الخيال


ولا تحرمنى من هذا الوجود


فيا من تشتاق روحي له


حلفتك بالله

هل مر بك يوم دون ان تشتاق إلي؟