.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

31.1.08

سوالف قلب ... أول سالفة


فلان :زيون
الزين :يس
فلان :شفيج؟
الزين :ليش تسأل؟
فلان :أحسج بعيده مو معاي
الزين :يمكن
فلان :شاللي شاغلج
الزين :ما أبي اقول ..مالي خلق
فلان :بيييه ... أنتي شكلج مقفلة كلش
الزين :فلان ... شتبي
فلان :شفيييييج.. ليش معصبه .. شاللي عافسج
الزين : ماني معصبه .. شفيني .. خلني بليييز
فلان :ماراح أخليج ... أحس مودج مو راكب عدل ...قولي لي ... من حقه الكلام اللي كاتبته

عشان اكتب لك
ولك انت بس
بهاللحظه
اكون ينيت
اكون نسيت
كل ابجديات الحيا
اللي عليها تربيت
لا تقول لي اني ينيتقول لي اني نسيت عقلي وحبيت


الزين :لي أنا
فلان :الزييين ... يالله عاد قولي... من له؟؟؟ من تعنين فيه؟؟
الزين :اللي اهو ..وليش حاط في بالك إني أعني أحد فيه... يعني أنا كل ما كتبت شي لازم أعني فيه أحد؟
فلان :خايفه تقولين
الزين : (بهمس) يمكن
فلان :قوليها لي .. أنا
الزين : (بهمس اكثر) ليش تبي تعرف
فلان :يهمنى اعرف .. أبي أعرف
الزين :تفرق
فلان :أوووف يالدعالة ... يالله عاد قولي

الزين : تبينى أقول ..... تعرف لما تحس راسك معبا كلام... وصدرك مليان.. كل شي فيك يقول.. ما عدا لسانك مو راضي ينطق ما يبي يقول ... لما تحس ضلوعك ضاجت بأنفاسك ... لما تحس عوار بقلبك بس تدري إن مو قلبك اللي يعورك ..إحساسك اللي مالي هالقلب اهو اللي يعورك ... تعرف هالشعور فلان؟ .. تعرفه؟ .. أنا الحين جذيه

فلان :الزين (يهمس بأسمها) شفيج؟؟؟ شاللي متعبج
الزين :ودي اذبحك ... فلاااان ..
فلان :زناط سيده ... بدون كلام
الزين :يصير؟؟
فلان :ههههههه .. يا حلوج لين عصبتي
الزين :و إنت يا شينك لين استعبطت
فلان :قولي لي شلون كان يومج
الزين :دوام ... وبيت ... وإنت
فلان :أنا كان دوام ورجعت تغديت ونمت ....وشوي بروح الديوانية
الزين :أنا ما سألتك شلون يومك ... أنا قلت لك انك إنت كنت جزء من يومي
فلان :عمري والله الزين ...صج؟
الزين :شرايك انت يعني ... ايه صج
فلان : (صمت)
الزين :ليش ساكت؟؟؟
فلان :زين ... إنتي مصرة تفتحين هالباب
الزين :أي باب؟
فلان :الحين منو فينا قاعد يستعبط
الزين :حدد لي أي باب
فلان :إنتي ما فكرتي ليش أنا ساعات متحفظ معاج ؟
الزين :بلا
فلان :إنتي مفكرة إني موحاس فيج ... مو قادر اقراج عدل
الزين :يعني إنت حاس فينى ؟؟ بحيرتي؟؟
فلان :أنا بحيرة أكثر منج
الزين :ليش فلان؟؟ ليش؟؟
فلان :ما خطر على بالج يوم إن إحنا ظروفنا مختلفه حيل... من محيطين مختلفين ...... إن لو حبينا بعض في اللي يمنعنا نكمل ونكون لبعض

الزين :إنت شقاعد تقول؟؟
فلان :الزين .. أنا واقعي وما ابيج إنتي تتأذين... ما أبي أدخلج معاي في معركه ممكن تكون خسرانه ... معركه في مجتمع ما يرحم

الزين :بس اسكت .... لاتكمل
فلان :لأ بكمل وإنتي لازم تسمعيني ...أنا ما أبي اغشج .. زيون إنتي تعنين لي الكثير والكثير هذا اهو اللي معذبني

الزين :ليش؟؟ ....ليش؟؟؟ .....ليش؟؟؟
فلان :من صجي آنا أسف
الزين :لا تعتذر ...شبيسوي الإعتذار... قول لي فلان ...... ليش من الأول .... ليش وصلتني هنيه .... ليش وأنت تدري أنت شنو مجبل عليه؟؟؟ ليش؟

فلان :أنا اعتذرت ... بس صدقينى ما كان بيدي ... ما كنت املك إحساسي ... ما قدرت ابتعد .. ما كنت ادري إني داش مكان مو لي ...مو مكاني .. ويوم دريت ما قدرت انسحب

الزين :والحين ياي تقول لي هالحجي ... شنو منتظر مني؟؟
فلان :مادري الزين ... مادري
الزين :سهل يا فلان ... مفكر القرار سهل؟؟ إنت مسكت ايدي وخذتني معاك بدرب أمنت نفسي فيه معاك ماهمنى اللي بييني عقب... وبالنص وقف وقلت لي هوووووب ... وقفي .. ما يصير نكمل!!!!

مو مهم انا ارضى
المهم انت ترضى
قلبك لقلبي يفضى
يحوى الروح اللي باعت كل شي
بس انت ترضى
مو مهم عيونك تشوف
الهوى بعيوني ولقلبي تحوف
تطلب وصالي وتمد لي الكفوف
مو مهم


فلان :مو سهل ... بس اهو راجع لج ... وإنتي مو ملزمه بشي تجاهي .. وأنا راح احترم قرارج
الزين :إنت حتى في هذي ما تبي تحمل الوزر
فلان :أنا ما ابي اشيل ذنبج معاي طول عمري
الزين :أنا مو قادرة أفكر
فلان :حبيبتي
الزين :حبيبتك؟؟؟ الحين تقولها ... الحين يا فلان؟؟ إنت قلتها لأني معورة قلبك لو تعينيها يا فلان؟
فلان :الزيييين ... شتبينى اقول ... ايه اعنيها
الزين :بس ... بس .. بس .. وايد وايد .. كل هذا وايد على يوم واحد
فلان :أستغفر الله
الزين :خلني الحين ... كل هذا اكبر من استيعابي .. وايد علي
فلان :الزين
الزين :أكلمك تالي فلان
فلان :زين
الزين :فلاااان ... خلني
فلان :بخليج ... بخليج ... بس حطي في بالج انا راضي بقرارج مهما كان
الزين :خير إن شاء الله
فلان :روحي حبيبتي
الزين :لا تقولها لي ... مو الحين ... حرام عليك .... مو حاسه بطعمها .. أحسها مرة
فلان :روحي الزين .. روحي
الزين :باي

فلان :حافظج الله

29.1.08

سوالف قلب


ليش غيابك يعور
ليش كل ما ييت الهّي نفسي .. اشغلها ألاقي أفكاري تنتهي عند اسمك
ليش الجو ما يصير بارد وايد ولا دافي وايد الا في حضورك
ليش طعم الأشياء ماله أهمية إذا إنت منت موجود
ليش انا بكبري مالي معني الا إذا إنت عطيتني هالمعني
ليش أحس إني ضعيفة وايد جدامك
سهل ينكسر خاطري
وسهل إنت تطيبه لي
ليش أحس إن كل الحجي كله كله يصير حجي وبس إذا ماكان لك
ليش أحس إني أبي أسمعك أبي أحسك وأبي أكون وياك وبس
ليش كل ما جيت ابعد يرجعني شي ما اعرفه
شي يسحبني من دنيتي ويقول لي هنيه إنتي مكانج
كل المقاييس اختلفت عندي من عرفتك
إنت حاس فيني؟؟
إنت تدري شكثر أنا ملخبطه معاك ومن غيرك صح؟؟
حتى الأغاني اللي أحبها لين شاركتني فيها صارت أجمل
وأبحرت فيني أكثر
وغيبتني زود
ليش أحسك ساعات تتقن لعبة الهروب من مشاعرك
وساعات تنتظرني أنا اللي أنحاش
ليش مديم افشل اجمع أفكاري واكسرها حروف و إنت تكلمني
ليش الكل مهتم فيني وأنت بس اللي تهمني
شنو فيك غير؟؟
ليش اسألتي معاك صعبه وسهلة بنفس الوقت
وليش آنا خايفه من الإجابة أكثر منك
لا تجاوب
خلنا جذيه
كل الأسئلة معلقه بدون حل
مثل الألغاز
انت بكبرك لغز كبير بحياتي
ما أبي أحله
غموضه اهو اللي آسرني
ويمكن لين لقيت الحل
أفل ... وأمشي






25.1.08

حتى الثمالة


املأني احساسا بك حتى الثمالة
فغيابك قد جعلني
كالليل بلا قمر
كالصحراء بلا مطر
كالبراري بلا شجر
كالعاصفة بلا هواء
كالبحر بلا زرقه
املأني احساسا بك حتى الثمالة
دعني احبك
دعني اهبك واستمد منك الحياة
دعني اغرق بقهقهاتك الشقية
استلقى بجانبك استنشق عطرك
احلق مع أنفاسك
املأ بها وجودي حتى آخر قطرة
حتى آخر رمق
لا أريد من العالم ان يحتوينى
احضانك تكفينى
لا أريد من الجداول ان تروينى
صوتك .. لمساتك .. قربك يسقينى
حتى قهوة الصباح لن تكفينى
لكي استيقظ من عبقك حين تسكنني وتحيينى
طفلة شقيه بين احضانك تبقيني
إمرأة تتغنج وصوتك العذب يشجيني
سكرة قبلتك تغيبني ثم تبعثني من جديد لصحوة تنهيني
املأني احساسا بك.. تذوقني ..ارتشفني .......ثم ارتويني







20.1.08

شهالأحلام ياربي؟؟؟


البس بيجامتي المفضله
استلقى بالفراش ... أطفي الأباجوره .. التقط مسباحي ... أقرا الورد اللي تعودت عليه ومن ثم ابتدأ بالتسبيح
واستسلم للنوم متمنية ان تكون احلامي سعيده

أنا في مكان ما .. لا أعرفه .. هو مدرسه ... مبنى حكومي ... مزدحمة مواقفه ... أطلع سويتج سيارتي .... أدورها

وين سيارتي؟؟؟ وين راحت؟؟؟ أنا وين صفطتها ... وأتم احوس وأدور حوالين المبنى وبكل المواقف..وانا شكلي ضايعه .. مو لاقية سيارتي .. والناس مشوا .. وانا بروحي واقفه .. محتاره وين سيارتي ؟؟؟
ادخل سكه فيها سيارة صافطه مو سيارتي بس اقول اهي سيارتي .. أركبها .. مالها بيبان @@... أصحى من الحلم

ألم مو طبيعي بمعدتي ... وميته حر

هذا الحلم يتكرر معاي وايد .. مت أبي أعرف شسالفته ... كل مره المكان يختلف بس النتيجه وحده أدور سيارتي ما الاقيها

سيارتي حبيبتى ... المشكله لو تعرفون شكثر احب سيارتي ... لدرجة اني الصبح لما اصعد السيارة احب السكان واصبح عليها .. لا تضحكون علي .. بس هذا اللي يحصل

هالحلم يذكرني بالمرحلة الإبتدائية لازمنى حلم واحد ... أروح المدرسه اكتشف اني مو لابسه جوتيي عزكم الله ... نفس الحلم مرارا وتكرارا ... خلصنا الإبتدائية ... يت مرحلة المتوسطه والثانوية ... عندي ريسايتل .. ابلش عزف على البيانو ... موسيقى من اروع ما يمكن ايي عند نغمة معينة ما القى مفتاحها على البيانو .. شايلينه ؟؟؟؟!!!!
وين راح؟؟ شلون اكمل المعزوفه؟؟؟ التفت الناس كلها تطالعني....ارجع ابي اكمل الاقي كل المفاتيح ملخبطه .. اصحى من الحلم مرعوبه من الريساتل متأكده اني بخوره

ظل الحلم ملازمني لغاية ما بطلت اعزف ... شهالشقا ياربي

كل هذا يثير عندي تساؤل ... ليش نفس الحلم .... ليش المكان غير والنتيجه وحده
البارحه كنت راح انزل الشارع اتأكد ان سيارتي موجوده ... لا تضحكون بس والله هالفكرة راودتني وتميت مده اتقلب عشان ارجع انام

الحين قولوا لي شسالفة هالحلم معاي؟؟؟؟ وليش يتكرر؟؟
وهم أبي أسأل تحصل وياكم هالسالفه ... حلم وايد يتكرر وبشكل مزعج

انا شكلي صكيت على أحلام فهد العسكر

15.1.08

أحبه .. أبيه


جلست بجانبي
تحكي لي القصص
تشاركني ألمها ضحكاتها مخاوفها حتى أنفاسها وتنهداتها
تخفي الطفلة برداء امرأة عاشقه
تطري اسمه بين سالفه والثانيه
اهو قال ... اهو سوي ... فلان يحس ... فلان يعرف ...
لا حديث لها سوي فلان
اتراها تحبه؟؟؟
لا بل تعشقه .. تعشق حتى عيوبه وزلاته
لم يخلق بالعالم كله لها رجل سواه
رغم التعب ... رغم الشقاء .. رغم الجوع لحضنة والإشتياق
رغم العطش لصوته والحنين لصدره
تبحث عنه في كل الوجوه .. برائحة القهوة ... بطعم المطر.. بصوت فيروز .. بنحيب طير قد فارق الوطن وصاح يشدو على الشجر
تسرح وتمرح عيناها على ملامحي ... تتأملني .. تبحث عن هويتي .. ثم تهمس لي الشوق له
تعبه هي من الفراق ... من بعد المسافات ... مشتعلا جسدها بكل تلك الذكريات ... مشتاقة للقاء .... للهمسات ..... للمسات
تحيا كرها له مساءا وتموت عشقا له صباحا
أحبه ... ابيه يالزين ... ما أبي غيره ... حتى لو ما يبينى
هل يعلم ... هل يدرك ... انها امرأة من اساطير شهرزاد ... تعشق وتذوب وتنصهر شوقا
تبتسم ... تضحك ... ولا تصل ضحكتها لأقصى زوايا القلب
راح اعرف من الجريده انه راح يالزين
وكانت دموعها اغزر من زخات المطر في ذلك اليوم
ابي اكون يمه
ابي اعطيه من غير حساب
ابي لو راح اقول عطيته
وقفت يمه
راح واهو راضي علي .. وما قصرت بحقه
ليش مستكثر علي هالشي
فلانه .... هو يحبج ويبي يوفر عليج الألم
ألم عمرج ماراح تنسينه ولا تتخطينه
ومن قال لج اني مو عايشته الحين
انا صرت زوجته وترملت واهو بعده ما اخذني ولا راح
يعتصرنى الألم .... يقتلنى العجز وانا اراها تبحر في حزن يسحقها ولا املك من الأمر الا انا أبكي معها ولربما أبكيها
تركتني وهي على موعد مع الأنتظار عله يحن ويلتقيان ثانيه ، ولم ادرك كم تركت من الفراغ خلفها
احساس بالخواء ربما
هي كذلك ... تملكك دون تكلف وبلا رياء
احبك يا من كنت صديقتي وصحبة جميله لذلك المساء

ولن ادع قصة محدثتي دون تساؤل اقيظ جموح ما في داخلي ... تمرد على واقع مرير.. لما ذا نحب اذاً؟؟؟؟
ما الجدوي اذا كنا نبحث عن الأعذار مسبقاً حتى لا نجتمع مع من احببناه
الظروف .... المسافات ... وربما المرض .. ولا ندرك أن الظروف نحن من خلقناها وبيدنا تطويعها ... المسافات نحن من افتعلناها وبيدنا اختصارها .. المرض والشفاء من الله حين يأمر بذلك سبحانه
نحن لا نملك من العمر الا اللحظة .. فالأمس قد رحل وبات تاريخاً لا نملك من تغييره أنملة .. وغداً في علم الغيب لا نعلم من منا يحيا ومن ينهي رحلته بذنب مغفور وعمل صالح مقبول
اليوم هو كل ما نملك .. اللحظه ... لم العناء ... لماذا نجهد في اختلاق الأعذار وتلوين الأسباب وتبرير المسافات
لماذا نجعل احتواءنا لمن نحب صعبا .. واللقاء مستحيلا .. والحضن بارداً
ربما لن نكون هنا غداً ولكننا الآن معاً .. اعطني يديك .. خذني لأحضانك .. طوع الظروف واختصر المسافات
ولنكن معاً

رسالة له..... برودك ذبحني .. كسرني
رسالة لها ... عندما يغلق باب يفتح ألف شباك

12.1.08

ولد الحلال







يمه
علميني بصريني
كيف أعرف وكيف أميز وكيف أختار

شوفي يالزين .....وحطي حجوتي لج ترجية بذانيج الأثنين
وقبل اقولج لازم تعرفين
نصيبج لابد يصيبج والزواج ماهو لعبه
هوشراكه بين قلبين
يربحون ... يخسرون ... كله بيدهم وبيد الرحمن الرحيم
واذا بتعرفين ولد الحلال
بيكون مثل ما بتسمعين




ولد الحلال يا بنيتى
لما يشوف إن دنيته ذي كلها بعينج
لما يحس إن الحياة يعني بوسه على جبينج
لما يحقق طلبتج ويحطها بين ايدينج
لما تكونين بعد الكعبة كرمها الله جبلته
يذكرج للرحمن ويدعي لج بالهداية والصلاح والثبات بسجدته
وإذا صرتي بيومه انتي حبه وانتي سلوته
ولي بجيتي ولي شكيتى فزت بقلبه عزته ونخوته
ولي صحا بعد الرقاد من نومه
يناظر زولج ويعدج فجر يومه
ولما يرضيج لأجل يرضي ربه
ويطلب منج تدعي له يسمح دربه
ولما يحرص رزق يومه يكون حلال
ولما يفتخر ويقول للجميع ... هذي أم العيال
وحطي في بالج يا بنيتي مو كل طويل الشوارب ريال
الرياييل حبيبتي قول وأفعال
ولد الحلال يا الزين ما يرضى بالضيم
ولا يرضى يبات وقلبه مكسور وظليم
ولد الحلال يالزين عند الشدايد تلقينه ظهر
وما يرضى لج بالقهر
ولي مرضتي يسهر على راحتج حتى لو دهر
يبشرج بالأجر رغم التعب ورغم السهر
ولد الحلال يابنيه ليه شهقتى يسمى عليج
ولي زعلتي بالغلا يشتريج
ولي بعدتي يدور عليج يبيج
وبروحه يحضنج ويفتديج
وليه عطشتي يالزينه بيده يسقيج ويرويج
ولد الأصول لي قبل فزوا له كل الرجال
والأصول يالزين ماهي دشداشه وغتره وعقال
وحطي في بالج ترى امه ثم انتي
لوما امه ما استويتي زوجة له ولاكنتي أم لعياله
وهنياله من رضا والديه هنيا له
ظفر بالجنه بطيب افعاله





6.1.08

نصايح أمي








هذا البوست اهداء خاص لحبيبة قلبي وصاحبتى لوير



أمي تقول بنت الحلال لازم تكون لزوجها سهل بسيط
بشعر طويل لليله دليل
وكلها دلال
ليمن لفت يرْوح بطرفها بخور (ن) وطيب
وليمن طلب يلقاها تلبي طلبته من غير كلام
وليمن سرى من سمرته تلقاه بكل حب وحنان
أمي تقول لا تتركيه يوم (ن) ينام وبقلبه ملام
ولا تعودينه عالزعل
باجر يمل
باجر عن دروبج يفل
يزهق من قعدتج ويكل

أمي تقول المره لازم تكون كل الحريم
تكون له إخته ونخوته
تكون له أم بكسرته
تكون له عشق بدنيته

أمي تقول بنت الحلال لابد يكون عندها الراي الصويب
لابد تجمع بعقلها منه الشتات
تجي له زتات من يذكر إن دنيته درب صعيب
ترفع يدها بالدعاء والله المجيب

أمي تقول بنت الأصول لابد تكون لزوجها نهار وليل
تكون له أهله وعزوته
تكون له سلوى بخلوته
تكون له هيل بقهوته
تكون له صويحب وحدته
وتصير له سراي بظلمته
تبقى عليه لو مابقى
رغم الضيم والشقا
لي غاب عنها تحفظه
في حضرته وفي غربته

أمي تقول
يا بنية ارضي بالحصير
باجر تري رجلج يصير
ويلبسج الثوب الحرير
صبري بعد ... باجر يهب ريح السعد
خلي حبج سلوتج .. وذكري ربج بصحوتج وبغفوتج
طلبيه يوسع رزقته برزقتج
ابن الأصول ما ينسى عمره وقفتك
ما ينسى انج كنتي له عز وسند
عمرج مدد
وثوبج غطاه وروحج بعد

هذا يابنت جواب السؤال
كيف انا عشت بكل هالدلال
كيف كان أبوج يعطي ويسخي
وعمره ما يعرف محال