.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

6.1.08

نصايح أمي








هذا البوست اهداء خاص لحبيبة قلبي وصاحبتى لوير



أمي تقول بنت الحلال لازم تكون لزوجها سهل بسيط
بشعر طويل لليله دليل
وكلها دلال
ليمن لفت يرْوح بطرفها بخور (ن) وطيب
وليمن طلب يلقاها تلبي طلبته من غير كلام
وليمن سرى من سمرته تلقاه بكل حب وحنان
أمي تقول لا تتركيه يوم (ن) ينام وبقلبه ملام
ولا تعودينه عالزعل
باجر يمل
باجر عن دروبج يفل
يزهق من قعدتج ويكل

أمي تقول المره لازم تكون كل الحريم
تكون له إخته ونخوته
تكون له أم بكسرته
تكون له عشق بدنيته

أمي تقول بنت الحلال لابد يكون عندها الراي الصويب
لابد تجمع بعقلها منه الشتات
تجي له زتات من يذكر إن دنيته درب صعيب
ترفع يدها بالدعاء والله المجيب

أمي تقول بنت الأصول لابد تكون لزوجها نهار وليل
تكون له أهله وعزوته
تكون له سلوى بخلوته
تكون له هيل بقهوته
تكون له صويحب وحدته
وتصير له سراي بظلمته
تبقى عليه لو مابقى
رغم الضيم والشقا
لي غاب عنها تحفظه
في حضرته وفي غربته

أمي تقول
يا بنية ارضي بالحصير
باجر تري رجلج يصير
ويلبسج الثوب الحرير
صبري بعد ... باجر يهب ريح السعد
خلي حبج سلوتج .. وذكري ربج بصحوتج وبغفوتج
طلبيه يوسع رزقته برزقتج
ابن الأصول ما ينسى عمره وقفتك
ما ينسى انج كنتي له عز وسند
عمرج مدد
وثوبج غطاه وروحج بعد

هذا يابنت جواب السؤال
كيف انا عشت بكل هالدلال
كيف كان أبوج يعطي ويسخي
وعمره ما يعرف محال



هناك 64 تعليقًا:

نون النساء يقول...

الزيــــــــــــــــــــــــــن

شنوو هالكلااااااااااااااام الحلوووووووووو
وايد وايد وايد حلووووو

اتعرفين الشعور لما اتكون البنت خلاص بتتزوج
وقاعده تلم بقشها عشان تروح بيت ريلها
واتتي امها وتنام عندها اخر ليلة
تقعد تسولفلها جذي


يسلم قلبج وقلب امج ان شاء الله
قولي امين

:*

Broke يقول...

الله


حسيت إني قاعد أتابع مسلسل تراثي قديم .. حلو المشهد اللي رسمتيه بكلامج

و حلوة النصيحة اذا يت بهالأسلوب

البوست المفروض يقرونه كل البنات المقبلات على الزواج .. والله لو يطبقونه ..أتوقع تخف نسبة الطلاق و الخلافات التافهة بشكل كبير

mtfa2el يقول...

هذي النصايح ولا بلاش
حبي راس الوالدة عني

فتى الجبل يقول...

يا ليت البنات يسمعون هالحجي

محـــــارة يقول...

الزين كلام كبير هذا .. تبارك الرحمن على مافيه من معنى وجزالة بالأسلوب وعذوبة بالكلمات

زيون مافيه وصف يوفيج ويكفيج حرام هالقلم يكون مكانه الكيبورد ايدج ربي يحظفج وعيني عليج بارده تنلف بحرير

وعقلج يتخزن ويكون مصدر لهذي وذك

ما شاء الله تبارك الرحمن .. ربي يحفظج يالغاليه فخوره وااايد فيج .. أنتي مبدعه بمعنى كل حرف

غير معرف يقول...

omech tgol wana agol entay el san3 kela wo 9ij hal mara shy ghair methel ma geltay keep on luv it :************************

MKSARAT SAYED SAAD يقول...

زوزوتا
ازيك
معلش مش عارف اعلق في كلمات تقيلة علياومش عارف افهما
وبالنبي ابقي اعملي حسابي واكتبيلي الترجمة:)انا صديقك بردة
تحياتي لزوزوتا الجميلة

lawyer يقول...

الغاليه اشكرج جزييييييييييل الشكر على اهدائج لي هالكلمات الروعه

صدقيني بحفظها عن غيب

و بطبقها و بخلي ربي دايمااااا امام عيوووووووووووني و بخلي خلامج ترجيه باذني

بعد رووووووووووحي تسلمين


والله مرات من كثر ما انبهههههههر مدري شقوووووول


تسلمييييييييييين يابعدي

Najmah يقول...

الله شنو هالكلام الحلو

حبييييته

نصايح من ذهب

صح لسانج وصح لسان خالتي

عسى ربي يحفظها ويخليها لكم ذخر يارب

7osen يقول...

صح السانها امج

ياليت كل الحريم يسمعون هالكلام

و ( ينفذونه )

طائر بلا وطن يقول...

الحين شنو يفك حواء من آدم عقب هالبوست
:p

يا ليت يا الزين .. ما راح أقول بتكون الدنيا
بخير لأن آدم يتحمل أكيد الجزء الآخر من المسؤولية

بس أكيد بعد كثير مشاكل بتنحل و كثير أمور
بتتعدل و تصير أحسن

والله أعرف رياييل - رياجيل عشان قلم ما يزعل- ههههه
ما سنعهم إلا حريمهم و صارو آوادم بحق هههه
عقب الزواج

الله كريم

أنا أطالب بتعميم هالنشرة و في ميزان حسنات
من يوزعها ههههه على البنات و الأمهات
مرة وحدة


وايد حلو يا الزين .. فيك عتق يا بنت
:)


عسى الله يخليك و يخلي والدتك و أمهات الجميع
بسماحتهم و طيبتهم و قلوبهم الكبيرة
و خبرتهم بالحياة

و أمي تسلم عليك
:p

darkness يقول...

مساج الله بالخير

صح السان الوالده


انا اقول الام الاصيله اللي تخاف على بنتها و تنشد سعادتها

اللي ربت بنتها و تعرف ربها

اللي تبي تبني بيت بنتها و تخليها تعيش بهنا و سعاده

اهي اللي تقول مثل هالقول

ربي يسعدج دنيا و اخره يا خالتي يا ام الزين

و ربي يفرحج ببنتج و يرزقج جنات مثل البنات

الزين الله يخلي لج هالام الذهبه

:)

Fahad Al Askr يقول...

سلمي على الوالدة وقولي لها
يمة ترى ريايل قبل يروحون سمرات الحين يروحون قعدات يا ماما

وبعدين يوم إن كل هالود بينك وبين لوير دزي لها إيميل وريحينا من التعليق

ريما تقول اليوم الجو حلو

وين حلو، غبار وعوافير وبرد

بس

qesat_5ayal يقول...

مرحبا

تدرين داشة اقول اني متضايقة من شي بااايخ
من بوست
او من افكار يوحي لي فيها بوستات
من نوع اللي فات
:P
المشكلة ان هالبوست نفس الحالة


يمكن لانه مأثر فيني


يا ملقي


بس لا زلت أقول لا للزواج قبل التخرج
بعد تدرين بعيش شبابي
:P


أنا أمر بمرحلة صعبة
عندي باكر امتحان

يالله ربما باكر تلقيني بوجه آخر
في حينها اكون عطلت
وحتى النفسية تغيرت




دعواتك يالطيبة
رايحة أدرس
:)

a7La eNG يقول...

شي شي شي عجــيــــب ...

لا اله الا الله تبارك الرحمن تف تف تف
:*******

شفتها ... حرمة كبيرة قديرة ...
ريحة طيب و بخور ... و دراعة بقصة تحت الصدر ... و ملامح تغرق طيبة و حنان ... تجاعيد تنضح حكمة و أصالة ...

شفتها .. و سمعت نبرة الحرص و الأمومة بصوتها ..

شفته .. بعينها و اللمعة اللي كانت فيها و اهيا تختم بطاريه ...


ااااااااااه يا الزين

نشتاق للبساطة و الأمان ...

شفت يدتي والله
:")

Яeema يقول...

فهد العسكر مطلع علي إشاعه إني برة الديرة


هاهاهاهاهاها

الزين
نصايح الوالده كانت تنفع أيام ريايل الدروازه

مو ينفع حق رياييل العازه و أنا أختج

سمعي كلام فهد العسكر تراه شايف و عارف

:)

vancouver يقول...

تعااااااااااااااااااااالي بخطبج حق اخووووووي

يزينج ويزين امج
والله


بس على شرط
اتطبقين كللللللللل اللي قالته
هههههههه

`~MnO YeNSa! ~` يقول...

البوست هالمرة خطيـــــــــــــــــــــر .. حبيته وايد .. خليتيني بجو ثــــــــــاني و اليوم برد موت بعد


الصراحة تسلمــــــــــــــن :* ..

ray يقول...

هذا أول

الحين هالنصايح عطيها حق الرياييل
كل خراب بيوت تلقين سبته رجل

نسبة الطلاق المرتفعة مو بس غلط البنت
الحين روحي القي نظرة ... مافي احد سنع

البلاوي اللي قاعدة تصير بالكويت مو طبيعية ... و الغريب ان الكويت كلها عيونها بالسما ما يشوفون شي

و على قولة ريما ... راحوا رياييل الدروازة

زيوون البوست وايد حلو , رجعتينا سنييين ورا .. أيام السنع, أيام لمى كانت البنت بنت و الريال ريال

و بنفس الوقت ... نرفزني

لأن زمن الحين مو مثل أول ... و هالنصايح لازم يقابلها زيارة للواقع ولا ماراح تنفع

البنت على عماها بتتزوج و تتوهق بسبة هالنصايح

ZoZOta يقول...

نون

ياهلا ومرحبا

زارتنا البركه حبيبتى انتي

يا فرحتي وانتي عاجبج الكلام يا نون

:)

اعرفه هالشعور
جنها حزاية تقولها واهي مرتاحة البال ومتطمنه ان بنتها رايحه بيت عدلها
وتبي تعطيها خبرتها كلها
وتتطمن عليها اكثر

تسلم لي هالطلة يانون
ويخلي لج حبايبج يارب

:**

ZoZOta يقول...

بروك

:)

مسلسل تراثي قديم

بالضبط

هذا كان شعوري وانا اكتب النص
ولا يهمج بسوي منه نسخ واوزعه على كل بنت ناوية على الزواج

واصير حزتها مصلحه اجتماعيه

وانافس فوزيه دريع

وييييييييع

يالله الستر

:**

ZoZOta يقول...

متفائل

وصلت الحبه
وقلت لها من متفائل
قلت هااااو شيطلع هذا

قلت لها زميل بعالم المدونات يمه
قلت لا بالله فلحنا

:)))))))

مشكور على التعليق

ZoZOta يقول...

فتى الجبل

ياليت البنات يسمعون

ترى حتى رياييلنا مو مقصرين

ولا انت شرايك؟؟

ZoZOta يقول...

محارة

:)

والله تحرجينى بهالكلام يامحارتي
كلامج وايد علي يالشيخه
كل اللي سويته شوية سوالف مع العوده
وحبيت اشارك حبايبي والناس بخبرتها

كتبته باسلوبي

ويستاهل عيونكم

الله يحفظ الكل والجميع
ويطيب خاطر كل الحبايب

:**

ZoZOta يقول...

غير معرف

ياااااا بعدهم والله

:**

ايه غير شفتي شلون

انا لين قلت لج شي

اسويه

لو شرايج؟

ZoZOta يقول...

مكسرات سيد سعد

انا متأسفه خالص يا سيد
ادينى المفردات الصعبه عليك وانا مستعده اترجمهالك
وبرسم الخدمه

هو انا اقدر

انت اكيد صديقي من غير كلام

:)

ZoZOta يقول...

ماراح ارد عليج هنيه

ارد عليج على الهواء مباشر

:)))

اخاف العذال ينشبون فينا

:**

ZoZOta يقول...

نجمة

حلت دنياج يا قلبي انتي

صح بدنج يالغالية

ويحفظج يارب

وبالنسبه لمجنونة

هي بخير وعافية

بس مريحه شوي من عالم المدونات على شوية مشاغل ماخذتها منا

ان شاء الله بوصل لها سلامج وسؤالج

:**

ZoZOta يقول...

حسين

صح بدنك يالشيخ

اقول حسين شكلي بسوي نصايح الوالدة بروشارات واوزعها على البنات

يمكن الله ورحمته

:)))

مشكور على المرور يالشيخ

ZoZOta يقول...

طائر بلا وطن

احلى ما في الموضوع ان البوست خلاك تطلع من المكان اللي انت منخش فيه وتعلق

لااااااا انا شكلي بوخر فوزية دريع واصفط مكانها

وانزل كتاب اسميه عشررة وصايا لأحلى الصبايا

:))))

فينى عتق

أنا أم العتق افا عليك

الله يسلمك على هالدعوة الحلوة

وجودك اليوم اسعدني يا طائر

مشكور من اقصى قلبي

وسلم على الوالدة

:)))

ZoZOta يقول...

داركنس

صبحج الله بالخير

يالشيخه انا اعتقد كل الأمهات يبون بناتهم متهنين

بس كل وحده وطريقتها وقناعاتها

عسى الله يحفظ لج الوالدة ويسعدج يا قلبي

مشكورة من اقصى قلبي على الكلام الطيب

:**

ZoZOta يقول...

فهد العسكر

الله يسلمك وصل

وتقول لك الله يجيرنا من هل القعدات
هذول نقضبهم الباب

وبعدين انا ولوير نيتاز انت شنو اللي حارق خبزتك

خل ريما تقول اللي تقوله
اهي عاجبها الجو ياربي

انت شفيك على الأوادم اليوم

واليوم صج برد

ZoZOta يقول...

قصة خيال

ياهلا باللي لفاني يا هلا به

انتي حدج شكلج ملخلطه من الإمتحانات
أي افكار وأي ايحاءات تقصدين يا بنية
وشنهي الحالة اللي تقصدينها

@@

والتأثير كان سلبي لو ايجابي

منتي مليقه لا تقولين جذيه

عيشي ياماما عيشي وسوي الله يعجبج

وضربي الدنيا بعرض الطوفه

:))

ان شاء الله اليوم النفسية احسن

بالي وياج من البارحه

ودعيت لج وايد

:**

ZoZOta يقول...

ريما

حياج الله يالشيخه

يالله صيت غنى ولا صيت فقر

شعليج

:))))

واللي انا اشوفه واعرفه ان رياييل الدروزاه موجودين

قلة قليلة ما تبين

والشر يعم والخير يخص

ZoZOta يقول...

فانكوفر

لووووووووووووول

ساعة المباركه حبيبتي انتي

الزين كله انتي

مسألة التطبيق تعتمد

تدرين شلون

انا بكتب بوست يديد عن مواصفات الرجل المثالي بعيوني

خل نشوف اذا المواصفات تنطبخ على اخيج
وتالي نقرر

:**

ZoZOta يقول...

منو ينسى

هالمرة الإسم صح

:))))

اليوم مو برد الا سحتني
اهم شي ان عجبج البوست

يسلم عمرج يارب

:****

ZoZOta يقول...

Ray

شهالعوافير اللي يتنى من تعليقج

شوفي يا بعدهم
اي خلاف دايما يتطلب طرفين
يعنى ماكو خلاف سببه واحد بس
انا ما الوم الريال
ولا الوم المره

بس اكيد الأثنين لهم دخل باستمرار الخلاف واستفحاله
الا في حالات بسيطه يكون طرف منهم قاعد يتلكك وعنده رس مثل ما تقول أمي

اسم الله عليج من النرفزة
تدرين شلون انا عن جد بكتب نص مقابل
يعي الريال نصايح شلون يحافظ على بيته
ويحب زوجته

وان شاء الله تلقين اللي يسرج

:****

Someday يقول...

hathy el zebdah!
ابن الأصول
kilhatha for that person, only!!, men of these days!!! allahoma yakafaey!! sheybayen b3eynhom!?!?!

charisma يقول...

الله الله يا الزين
يا حلو البنات السنعات
وااى بسوى برنت البوست وبهدى بنت بتملج قريب
توقع ماكو احلى من هالكلمات
روووعه

تسلم ايدج
:**

esTeKaNa يقول...

نبرة الحكمه في صوتها
ونظرة الحب في عيونها
وزين البنات بين ايدها
!!
يا الزين...اسمحي لي بس هذا ازين بوست
حبيته بكل كلمه فيه
بصدقه
بروحه
بكل شي فيه
اييييييييييييه يا الزين
هذا اللي طول عمرنا نسمعه
وهذا اللي عليه ربينا وكبرنا
لما ينقال بناتنا فيهم وفيهم اقول ليش؟
اللي ربينا عليه ما كان جذي
ونصايح امهاتنا ما علمتنا جذي
الزين هذا البوست دفعه تفائل للجميع
الله يحفظها يارب
ويبلغها فيج عروسه
ويهني القلب اللي خذا الزين لنفسه:**

عثماني يقول...

مساج الله بالخير اخيتي الزين

خوووووش كلام

بس وين الحريم اللي يسمعونة

واذا سمعوه هل يفهمونة؟؟

واذا فهموه .. يطبقونة؟؟

ما هقيت بنات هالوقت يعرفون هالنصايح

حافظج الله اخيتي الغالية

وسعتي صدري بهالبوست

فريج سعود يقول...

الله الله على كلام الوالدة
انصح مكتب الارشاد الاسري بالمحكمة انهم لا ينصحون ولا يزودون حجي بس يسمعون الي بتطلق هالكلام وهي تهون وتطلع من
المحكمة وهي لامة ريلها
والله امج سنعة والنعم فيها

qesat_5ayal يقول...

مسا الأنوار
بعد عمري على هالدعوة

الامتحان كان اسهل من المتوقع
والنتايج ان شاء الله خير


والبوست يا قلبي عسل عسل
نصايح ذهب

مو بس جذي ،، طريقة السرد حنونة وايد



يا زين كان كلامي بحق ملخبط
وكانت الايحاءءات ايحاءات اي موضوع يكون عن زواج
وكان الموضوع عن زواج
عاد الافكار تعرف تلعب

بس خلص الامتحان
وانتهت اللخبطة



يسلملي قلبج يا الزين

qesat_5ayal يقول...

نسيت

كنت بسلم على اللي شالع بلوقه
بس كنت بقوله
كن بخير أينما حللت يا طائر

ولا تطول الغيبات
:)
ترانا نشتاق

sologa-bologa يقول...

توني ياي من السفر
وقعدت اقرا اللي طافني بس بدون تعليقات
لكن لما قريت هالمقطع
أبت نفسي إلا أن تعلق
:)

تكون له هيل بقهوته

هذا بروحه عن قصيدة كاملة


ودمتم بحب وود

ZoZOta يقول...

أحلى انجنير

سقط سهوا من الشطه وانا ارد على الناس

:)))))


ماي ورد طال مرج ماي ورد

:)))

واااااي

انتي وصفتيها احسن مني
بدعتي بوصفها اصلا


بالفعل نشتاق لهم
لحضنهم وبساطتهم

لعقلهم وحكمتهم

تدرين

دمعت عينى

انا بعد شفت يدتي الله يرحمها

:**

ZoZOta يقول...

someday

yes ابن الأصول

لا تجمعين

مثل ما في الشين في الزين
احنا علينا نفتح عيونا لما نيي نختار

:)

ZoZOta يقول...

كاريزما

:)

مشكوره بيبي

سوي برنت سوي

كل بناتنا يستاهلون
الله يوفقها يارب ويبلغنا فيج يا كروووز

يسلم لي عمرج يالغلا

:******

ZoZOta يقول...

استكانه

:*******

على كل الحجي الزين والطيب اللي علقتى فيه

بالضبط
هذا الحجي اللي ربينا عليه
وطول عمرنا نسمعه من امهاتنا
بس هل التطبيق سهل في زمن مثل زمنا
مع رياييل مثل رياييل هالأيام
تعتقدين؟؟

انا اقول لو خليت خربت
بس هم النسبه الأكبر ما يستاهلون المره تصير لهم كل هذا

ربي يفرحني فيج
ونيي انا ولوير نزفج عروس يارب

:)))

ZoZOta يقول...

عثماني

مساك الله بالخير والكرامه

لا تظلم الحريم يا عثماني
الشين موجود بس هم بعد الزين موجود

واصابع ايدك مو وحده

مشكور على الزياره اخوي
جعله وصل ما ينقطع

حافظك الرحمن ويوسع صدرك دنيا وآخره يارب

ZoZOta يقول...

فريج سعود

ومن قال يالشيخ

مشكور وبوصل الرساله حق الجهات المختصه

:))

ZoZOta يقول...

قصة خيال

مساء الورد
تستاهلين الدعوة وصاحبة الدعوة

:)

الله يبشرج بالخير يارب
ويوفقج ويسمح دربج آمين

اليوم الكلام مصفصف

بالتعليق الأولي ما فهمت ولا شي بينى وبينج

:)))))

بس هم عسل على قلبي

مشكوره من اقصى اقاصيص قلبي

:))))

فسريها عاد انتي

ZoZOta يقول...

قصة خيال

وصلت المسج

:)

ZoZOta يقول...

سلوقا بلوقا

ما طافك وايد
بس احنا اللي فقدنا وجودك هاليومين
مكانك كان مبين ياخوي

وبما ان ابت نفسك الا ان تعلق

فانت اليوم هيل قهوتنا

وصب قهوة يا ولد

:)

5roofa يقول...

حبييييييييييييت

امبي نصايح ولا بمليون مال اقراها حق مدرساتنا الي كله يتحلطموووون على ريايلهم و الزواج

والله هذا الكلام الي ييريح مو طحنت الجبد لوول

تسلمين و يخلي لج ماماتج ياارب

salamz sweetee....

صبا يقول...

والله انتي الي كلج سنع
عسا الله يحفظج

تسلم ايدج علي هالكلام الحلو

كلام امج صادق من القلب جان زين يطبق
الله يخليلج امج ويهنيها فيج

ارد واقول هذا احلي كلام ونصيحه سمعتها ب2008

مشكووووووووره وااااااايد

وهذي بوسه علي راس ماما اموااااااااه

تحياتي من القلب للماما ولج

Aldenya يقول...

الله
يا محلاها من نصايح
نعم الامهات أمج
الله يحفظها لج
ويعطيها الصحة والعافية

Ra7aLaH يقول...

lovely words...

اجار الدين كشمش يقول...

الزين ..ما تي امج أتعلم امي؟

وإلا اتعرف عليها ؟..خل اطخخ امي ..من يقولون البنات او الجناين ..اه ..امي طبت قبلهم
ان جان اهي قهوه.. وإلا عرس وإلا تسيوره..بس لا تقولون السينما !!ة امي ما تقدر على الحكره..تبق !!ة
اي ريل امي اجابله؟

يالزين ..امي رايها..بس ما ورا..لا تعطين الريل ويه اكثر من اللازم ..وتكسرين عمرج وتقرقمين
وهو متنغمش ..حتى عطلة الاعياد
بيسافر..طبي قبله بالطياره ..واذا قال انا معاي الربع ..قولي له الله معاك..الله يونسك بالعافيه ..بس ترا انا..بسافر مع ربعي بعد..ترا نسيت اقولك !!1 بقول لج.. يااا واليهال ؟
ردي عليه ..اليهال نق الي تبي ..تبيهم عند امي ولا عند امك
الي تبي حبيبي ..بس قول

هذا راي امي بالريايل..حالي حاله .

ها الزين.. اشرايج ..معزمه امي تسير عليكم ؟
فمالله

ZoZOta يقول...

خروفه

يسلم عمرج يارب
مشكوره وايد

بقول لج شي
نظام التحلطم هذا حبيبتي جزء من تراثنا ككويتيين

ما تقدرين تغيرينه ولا تلغينه

الريال زين
الريال شين

البنت زينه لو شينه

هم بعد بنتحلطم

:)))

سلامز بيبي

ZoZOta يقول...

صبا

مشكوره على البوسه وتراها وصلت

:)

وكل اللي قلتيه بعضا مما عندكم يالشيخه

متابعتج لي تسعدني على طول

لا تقاطعين

:*

ZoZOta يقول...

الدنيا

تسلمين يالشيخه
ما عليج زود

الله يحفظج يارب
ويبلغ اميمتج فيج

:*

ZoZOta يقول...

رحاله

زياره اول مره
واتمنى ما تكون الأخيره

مشكوره يالشيخه

وحياج الله

ZoZOta يقول...

اجار الدين كشمش

:)))))

لا تقول جذيه
ترى مالكم بركه الا اهي

امك ياحليلها تحب تطرب نفسها
واذا تبي دروس حياه الله
ساعةالمباركه

تصير رفيجة امي يومين وامي تقلبها لكم

بس هااا دير بالك
ترى محنا ملائكة

ومع الزين لازم ايي شي شين
تحمل انت عاد

يعين الله ياخوي

يعين الله

ايه معزمه تزورنا

شوية حكاره من امي
وشوية انطلاق من امك

خوش مكس

:)))

منورنا يالشيخ