.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

31.1.08

سوالف قلب ... أول سالفة


فلان :زيون
الزين :يس
فلان :شفيج؟
الزين :ليش تسأل؟
فلان :أحسج بعيده مو معاي
الزين :يمكن
فلان :شاللي شاغلج
الزين :ما أبي اقول ..مالي خلق
فلان :بيييه ... أنتي شكلج مقفلة كلش
الزين :فلان ... شتبي
فلان :شفيييييج.. ليش معصبه .. شاللي عافسج
الزين : ماني معصبه .. شفيني .. خلني بليييز
فلان :ماراح أخليج ... أحس مودج مو راكب عدل ...قولي لي ... من حقه الكلام اللي كاتبته

عشان اكتب لك
ولك انت بس
بهاللحظه
اكون ينيت
اكون نسيت
كل ابجديات الحيا
اللي عليها تربيت
لا تقول لي اني ينيتقول لي اني نسيت عقلي وحبيت


الزين :لي أنا
فلان :الزييين ... يالله عاد قولي... من له؟؟؟ من تعنين فيه؟؟
الزين :اللي اهو ..وليش حاط في بالك إني أعني أحد فيه... يعني أنا كل ما كتبت شي لازم أعني فيه أحد؟
فلان :خايفه تقولين
الزين : (بهمس) يمكن
فلان :قوليها لي .. أنا
الزين : (بهمس اكثر) ليش تبي تعرف
فلان :يهمنى اعرف .. أبي أعرف
الزين :تفرق
فلان :أوووف يالدعالة ... يالله عاد قولي

الزين : تبينى أقول ..... تعرف لما تحس راسك معبا كلام... وصدرك مليان.. كل شي فيك يقول.. ما عدا لسانك مو راضي ينطق ما يبي يقول ... لما تحس ضلوعك ضاجت بأنفاسك ... لما تحس عوار بقلبك بس تدري إن مو قلبك اللي يعورك ..إحساسك اللي مالي هالقلب اهو اللي يعورك ... تعرف هالشعور فلان؟ .. تعرفه؟ .. أنا الحين جذيه

فلان :الزين (يهمس بأسمها) شفيج؟؟؟ شاللي متعبج
الزين :ودي اذبحك ... فلاااان ..
فلان :زناط سيده ... بدون كلام
الزين :يصير؟؟
فلان :ههههههه .. يا حلوج لين عصبتي
الزين :و إنت يا شينك لين استعبطت
فلان :قولي لي شلون كان يومج
الزين :دوام ... وبيت ... وإنت
فلان :أنا كان دوام ورجعت تغديت ونمت ....وشوي بروح الديوانية
الزين :أنا ما سألتك شلون يومك ... أنا قلت لك انك إنت كنت جزء من يومي
فلان :عمري والله الزين ...صج؟
الزين :شرايك انت يعني ... ايه صج
فلان : (صمت)
الزين :ليش ساكت؟؟؟
فلان :زين ... إنتي مصرة تفتحين هالباب
الزين :أي باب؟
فلان :الحين منو فينا قاعد يستعبط
الزين :حدد لي أي باب
فلان :إنتي ما فكرتي ليش أنا ساعات متحفظ معاج ؟
الزين :بلا
فلان :إنتي مفكرة إني موحاس فيج ... مو قادر اقراج عدل
الزين :يعني إنت حاس فينى ؟؟ بحيرتي؟؟
فلان :أنا بحيرة أكثر منج
الزين :ليش فلان؟؟ ليش؟؟
فلان :ما خطر على بالج يوم إن إحنا ظروفنا مختلفه حيل... من محيطين مختلفين ...... إن لو حبينا بعض في اللي يمنعنا نكمل ونكون لبعض

الزين :إنت شقاعد تقول؟؟
فلان :الزين .. أنا واقعي وما ابيج إنتي تتأذين... ما أبي أدخلج معاي في معركه ممكن تكون خسرانه ... معركه في مجتمع ما يرحم

الزين :بس اسكت .... لاتكمل
فلان :لأ بكمل وإنتي لازم تسمعيني ...أنا ما أبي اغشج .. زيون إنتي تعنين لي الكثير والكثير هذا اهو اللي معذبني

الزين :ليش؟؟ ....ليش؟؟؟ .....ليش؟؟؟
فلان :من صجي آنا أسف
الزين :لا تعتذر ...شبيسوي الإعتذار... قول لي فلان ...... ليش من الأول .... ليش وصلتني هنيه .... ليش وأنت تدري أنت شنو مجبل عليه؟؟؟ ليش؟

فلان :أنا اعتذرت ... بس صدقينى ما كان بيدي ... ما كنت املك إحساسي ... ما قدرت ابتعد .. ما كنت ادري إني داش مكان مو لي ...مو مكاني .. ويوم دريت ما قدرت انسحب

الزين :والحين ياي تقول لي هالحجي ... شنو منتظر مني؟؟
فلان :مادري الزين ... مادري
الزين :سهل يا فلان ... مفكر القرار سهل؟؟ إنت مسكت ايدي وخذتني معاك بدرب أمنت نفسي فيه معاك ماهمنى اللي بييني عقب... وبالنص وقف وقلت لي هوووووب ... وقفي .. ما يصير نكمل!!!!

مو مهم انا ارضى
المهم انت ترضى
قلبك لقلبي يفضى
يحوى الروح اللي باعت كل شي
بس انت ترضى
مو مهم عيونك تشوف
الهوى بعيوني ولقلبي تحوف
تطلب وصالي وتمد لي الكفوف
مو مهم


فلان :مو سهل ... بس اهو راجع لج ... وإنتي مو ملزمه بشي تجاهي .. وأنا راح احترم قرارج
الزين :إنت حتى في هذي ما تبي تحمل الوزر
فلان :أنا ما ابي اشيل ذنبج معاي طول عمري
الزين :أنا مو قادرة أفكر
فلان :حبيبتي
الزين :حبيبتك؟؟؟ الحين تقولها ... الحين يا فلان؟؟ إنت قلتها لأني معورة قلبك لو تعينيها يا فلان؟
فلان :الزيييين ... شتبينى اقول ... ايه اعنيها
الزين :بس ... بس .. بس .. وايد وايد .. كل هذا وايد على يوم واحد
فلان :أستغفر الله
الزين :خلني الحين ... كل هذا اكبر من استيعابي .. وايد علي
فلان :الزين
الزين :أكلمك تالي فلان
فلان :زين
الزين :فلاااان ... خلني
فلان :بخليج ... بخليج ... بس حطي في بالج انا راضي بقرارج مهما كان
الزين :خير إن شاء الله
فلان :روحي حبيبتي
الزين :لا تقولها لي ... مو الحين ... حرام عليك .... مو حاسه بطعمها .. أحسها مرة
فلان :روحي الزين .. روحي
الزين :باي

فلان :حافظج الله

هناك 38 تعليقًا:

MKSARAT SAYED SAAD يقول...

زوزوتا ازيك
في مثل عندنا بيقول
مراية الحب عامية
وكتير بيفسرو المثل دة على ان الحبيب او الحبيبة مش بيقدروا يشوفو عيوب بعض لكن ممكن يطبق المثل دة على علاقتهم ببعض على نظرتهم لمستقبلهم على طبيعة التعامل اللي هتكون بينهم
وللأسف الواحد لما بيحب بيبقى مش عامل حساب لأي حاجة وبيقي كمان مش عايز لا يشوف ولا يسمع حاجة الا عن اللي بيحبة وبس وعند ظهور المشاكل واللي ممكن تكون حائل بين اكتمال شكل الحب دة
يبتدي كل واحد يتصدم في الظروف وفي اللي قدامة وتبتدي ظواهر التضحيات تبان في العلاقة
لكن في الاخر هيفضل هو دة الحب جنون وتشتت وحنان وشوق هيفضل طول عمرة يحسس كل اللي بيحبوا بكل المشاعر وما يعاكسها من مترادفات
----
انا غبت لأنى كنت مشغول شوية لكن الجديد موجود على مدونتى باسم خطوط متوازية بس انت بردة اللي مش بتطمنى
وبالنسبة للترجمة طول ما انتى مش بغوطى قوي في الكلمات الصعبة بقدر افهم
ومليش دعوة بقى مهو يتعلميني لغتك يا تعلميني لغتك :)
تحياتي لك يا الزينة
صاحب المكسرات

Shather يقول...

الزيين شفييج @@ عسى ما شر !!

هالبوست فيه إنِّ !!

magnoonah يقول...

اليوم مع الطوز ما قلت لج انه مودي كلثوميات


وطول اليوم بس مشغله انت عمري
وقاعده ادندن معاها
احس اني بدوامه وبداخل هالدوامه لقيت زاويه وبهالزاويه قعدت بروحي ادور عالراحه ولو لحظات


انت الامل الي احيا بنوره
عمره ما يبعد يوم عن عيني
وانت الشوق الي اسمع صوته
لما تغيب عني يناديني
وانت الحب الي مافيش غيره
لو يسعدني يوم او يقتلني


سمعتي ام كلثوم شنو تقول

منو فينا يختار من يحب ومنو فينا عارف شنو مكتوب له
مو دايما اقولج اني بحب بعقلي قبل قلبي
انا اول وحده اقولج هالشي صعب واتوقع انه مستحيل


كلنا ضايع بدوامته وكلنا عارف الطريق للطلعه منها
بس محد يقدر يقول للحب وقف لا تكمل وتعشش بقلبي

فهمتيني؟؟

فراوله يقول...

مساالورد والجوري
غاليتي الحبيبه
اغلا زوزو
هالمره الاحاسيس غير
تعور حيل
ويدمي لها القلب
):
بس شنقول حق فلسفة القدر
ماكل مايتمناه المرء يدركه
ودنا باشياء كثيره ويمكن نبلش نمشي بالطريج بس
بنص المطاف نقول بس مانقدر نكمل
واهنيييييييييييه المصيبه
والالم اللي ماله نهايه
...
دمت بدفء وعذوبه
ابدا
:*

Reflections يقول...

); it hurttsssssss

Najmah يقول...

حسيت بالاحساس اللي حسيته ببوست
(أحبه .. أبيه )
لا زلت مصرة ان الحب يقدر يخلي الانسان
يقهر كل الظروف والاختلافات

تهقين يمكن اغير رايي؟
مادري

AseeL يقول...

ظروف مختلفة...

و... محيطين مختلفين؟!

تلك أعذار يخبئها الرجل في جيوب قلبه حين الرحيل.. لمحطات أخر... اكتفى وفقط!

من يحب.. يدوس بقلبه على كل الفوارق ويمد جسورا من ود فوق كل البحار الفاصلة...

بعض الرجال في مضارب الحب..
يجيدون الاعتذارات

وبعض الرجال في مضارب الحب..
يتقنون الانتصارات

ليس عصفورك.. بوصلة القدر.. تحيد عن وجهه بعيدا... إلى وجه آخر... مكتوب بين ثنايا السماء

دمت بمودة

Fahad Al Askr يقول...

ما فهمت، شصاير؟

منو فلان، وشنو مجتمع ومحيطين، ممكن تعيدين علي مرة ثانية، بس شوي شوي، لأن الانترنت عندي بطيء يثولون يبيله أسبوع يتصحل، ومالي خلق أحط لي شونت

5roofa يقول...

ليييييييييييييييش؟؟؟

ليش يسوي جذي

:'(((((

والله حرام عليج زوزوتاا موتني من البجي توني يايه من بابل انتوا شفيكم علي اليوم


الزين : تبينى أقول ..... تعرف لما تحس راسك معبا كلام... وصدرك مليان.. كل شي فيك يقول.. ما عدا لسانك مو راضي ينطق ما يبي يقول ... لما تحس ضلوعك ضاجت بأنفاسك ... لما تحس عوار بقلبك بس تدري إن مو قلبك اللي يعورك ..إحساسك اللي مالي هالقلب اهو اللي يعورك ... تعرف هالشعور فلان؟ .. تعرفه؟ .. أنا الحين جذيه

والله قلبي يعورني من صج والله ليش هالاحساس تدرين والله مادري ليش اقولك ليش؟

ماادري ماادري والله مادري بس حرام عليج جد موتيني من البجي الله يسامحج

:"(

salamz...

5roofa يقول...

و صج شي ثاني اكره انه الظروف و الفرق بينا اهو الي يحدد علاقتنا اكره الاحساس في
اكره اني اعيشه
اكره انه يحدد حياتي

اكره اني للحين قاعده ابجي
:(

سامحيني مو قصدي اعصب على البوست الي فات الشي مو منج مني انا السموحه خيتوو بس مادري والله مادري

:(

salamz

فريج سعود يقول...

الله يساعدج عليه

ZoZOta يقول...

صديقى صاحب المكسرات

انا كويسه وبسأل عنك

المرايا هنا ماكانتش عميه
كانت مبصرة ولكن ....

هل نختار نحن من نحب ومن نعشق
هو القلب والقدر من يلعب لعبته هنا
بالضبط كما ذكرت هو جنون
حالة سبات للعقل يتسلط به القلب ويفرض قانونه
وعند الصحوة تختل كل الموازين

ولم اغب عن مدونتك قرأت ما كتبت
وثق اني اتابع من بعيد
يمكن اعجز احيانا عن ترك تعليق لأن النص مس اقصى القلب ولم اعد قادرة على التعبير

اما عن الترجمه فلا تعتل هم
وهعلمك لغتي الجميلة
مع قناعتي التامه ان لغة القلوب لا تحتاج معلم
:)

تحياتي لك يا صديقي
ودمت بكل مودة

ZoZOta يقول...

شذر

مافينى الا العافية
البوست ما فيه انه
فيه قصة

قصة كل بنت حبت ولم يكن بالحسبان ان حبها ييه بالزمن والظرف الصح

مو بالضرورة تكون قصتى

هنيه الزين تتكلم بلسان كل البنات
انا وانتي وغيرنا

:**

ولهت عليج

ZoZOta يقول...

مجنونة

:*****

اما عن اليوم فالجو عجيييييييب
ومشوار صغير على البحر اعاد لي الحياة
:)

كلثوميات
الله
المزاج مرفع شكله

كلامج صح منو فينا يختار ومنو فينا عارف

تحبين بقلبج
هممممممم
يصير؟؟؟

انا اقول له لا توقف
امس واليوم وباجر
:))))

مينونه ادري
تذكرين سالفة بحبه يابابا

:))))

انا فاهمتج مثل ما انتى فاهمتني
وغاب بدري يامجنونه يامن يجيبه

:*

ZoZOta يقول...

فراوله

مساء الطيبة والناس الطيبين يا فراوله

ادري تعور والله
اهي فلسفة للقدر مثل ما قلتي

بس اكيد الألم له نهاية
واكيد في نهايات سعيده
تابعينى
وبتعرفين من السوالف

دمت بكل الحب يالغالية

:**

ZoZOta يقول...

reflections

well..... LUV HURTssss

:*

ZoZOta يقول...

نجمة

راح تغيرينه
صبرى علي شوي

:**
وخلج مع سوالف قلب
بتعرفين شنو اقصد

ZoZOta يقول...

اسيل

بعض الرجال في مضارب الحب يا اسيل
البعض
والبعض يتقص الأنتصارات
والبعض يسلك اسهل الطرق
الإستسلام

اتفق معك
ليش عصفورها .. وسوف تجد الوجه الآخر
هناك .. في مكان ما

السوالف ما خلصت
خلج معاي وتابعي قصة الزين

مشكورة على الزيارة
كنت اتمناها من زمان

:**

ZoZOta يقول...

فهد العسكر

مو صاير شي
شفيك مخترع

:)

فلان هو من احبته تلك الفتاة مدركة ان هواها بلا امل

المجتمع والمحيطين هو كل المعوقات اللي تمنع انهم يكونون لبعض

اما بالنسبة للإنترنت نت فالعالم كله يشتكي من البطئ

ارجع حق مدونة فريج سعود عشان تعرف السبب

:)))

انا بعد مالي خلق احط الشو نت

ZoZOta يقول...

خروفة

ليش ياماماليش
ليش انتى دمعتج متطرفة
رحمي نفسج شوية
عورتي قلبي عليج والله

اسم الله عليج
ذكري الله بس
مو جذيه

الدنيا لما الحين حلوة يا بنية

:)

ZoZOta يقول...

خروفة مره ثانيه

الحياة موكلها حلوه ولا كلها مره
ولو ما المر ما عرفنا طعم الحلو
قسى قلبج
وقوي عودج

:*

ZoZOta يقول...

فريج سعود

الله يعينها عليه
انا مالي شغل
لو كانت الزين هنيه هي انا كانت ردة فعلي بتكون شي ثاني

:))

صج قشرة

7osen يقول...

حلوة هالحوارات

راح أنتظر السوالف القادمة

:)

محـــــارة يقول...

زيون أخيتي وحبيبتي .. نفس الأدوار باختلاف الأسماء ونفس الكلام وبنفس الدهشه

شسالفة شنو صاير ماني فاهمه الغلط بمنو .. بالقلوبنا وبالثقه الي منحناها لناس رجولتها ماتقدر تشيل كل هالحمل

فالرد والظروف أسهل يشيلونها هالحب والتعب بتويله لواقع كنا نتوقعه منهم يقاتلون لما يحصلون عليه

الي أقدر أقوله أن قلوبنا راحت وحبت ناس مو قد هالحب .. والزمن ماهو الزمن وحب أعيال هالوقت يبيه سهل والظروف مسيرت له بس صدقيني خيره لنا لأن ربي يحبنا تدرين ليش

لما يكون الي يحبج بأصعب موقف تخلى عنج فهذا وين تأمنين معاه حياتج ومستقبلج فالله وياه والي بقدر هالقلب راح يحصل عليه متى مالرب كتب .. وربي يوفقج لأنج تستاهلين كل الخير

MnO YeNSa يقول...

المشكلة انه كل مجتمع تحكمه ظروفه و الانســـان لما يحب ابدا ما يحسب حساب الدنيا و المجتمع و ويكون مسير ومشاعره اللي تحكمه و اصعب شىء لما تدرين انج راح تتعبين معاه وراح تتعبين و تموتين بدونــــــــــه حيل حيل ...والله العالم

مشكورة :*.. مادري حسيت اب كلماتج وايد هالمرة حسيتها طالعه من القلب .. عسى ماشر فيج شي ؟؟

الزين يقول...

حسين

حلت دنياك يالشيخ
انتظر القادم
:)

الزين يقول...

:(

كلامج يعور
وييه على جرح الكثيرات

الله يوفق الجميع حبيبتي
تسلمين

الزين يقول...

منو ينسى

انا ما فينى الا العافية
ولا تربطين الحوار فيني

هي ليست قصة الزين بالذات
هي قصة الكثيرات
حبيت اطرحها بشكل حوار

:**

مشكورة على اهتمامج
تابعينى اذا تبين تعرفين الزين اللي بالحوار شصار وياها

:)

غير معرف يقول...

ليش؟؟؟؟

Q8 uniQue يقول...

لو هالحوار "تأليف" فإنتي داهية

ويسعدني إضافة عنوان مدونتج "المزدحمة بالأحاسيس" عندي.

الزين يقول...

غير معرف

@@
عشان

شكله لغز يديد هذا

:)

الزين يقول...

Q8 uniQue

:))))

هو تأليف
يمكن أخذت كلمة من هنيه وكلمة من هناك
بس بالنهاية كل الحوار كان في خيالي وبس
مجرد تأليف

ايه انا داهية
:)))

يسعدني اني اكون من المختارين لديك

وحياك الله

تابعني عشان تكمل الباجي

esTeKaNa يقول...

سمعت نبرة حبه
وهمس غضبها
حيرة روحها
وانكسار نفسه
!!
بغض النظر عن اي حقيقة
هناك احساس مؤلم
قاتل
للطرفين
احساس مبكي...
قرأت سالفة ذاك القلب
وضعت في ردود كل من رد
افكر
واراجع احساسها
وارجع مرة اخرى لكلماته وكلماتها
واصمت....لا شئ سوى دمعة عين
تأثرت وآثرت ان لا اعكر رقة احساس هذا البوست باي كلمة
:***
تسلمين يا الزين بكل سالفه قلب
بكل احساس
بكل كلمة تكتبينها تبهريني اكثر
دمتي لنا موطن للحب
منبع للابداع متجدد لا ينضب

وللكلام بقية:*

ANGEL HEART يقول...

اخ يالزين هالحوار يتكرر كل يوم وكل لحظه ويذبح قلب عاش بامل

الزين يقول...

استكانة

بيييييييييه
كل هذا حسيتي فيه
الله على قلبج يا استكانه
يبيله قلب اكبر منه
يحبه ويعرف قدره

:**

بعدي انتي والله

الزين يقول...

ANGEL HEART

ادري والله
ادري
واذا تبين الصج
هذي ماهي قصة الزين
هذي قصة كل بنت حبت
واكتشفت ان الحب ماكان بمحلة
لسبب او لآخر

:**

لؤلؤة يقول...

خيال واقعي
لكن اللي ودي أبلعه: كيف سهلة على الريال قلب العواطف علشان الظروف
والبنت نقعد سنين علشان تنسى!!!!
مو عجيبة هذي!!!!
تسلمين على مساحة التفكير اللي نلقاها دوم في كتاباتج:))

الزين يقول...

لؤلؤة

بكل بساطه احنا مساحة الوفا بقلوبنا اكبر

والدليل على هالشغله ان نظل على العهد حتى لو اهم هجرونا

تصدقين غباء منا
بس شنسوي قلوبنا انخلقت هالشكل

يقول لج الريال موتة زوجته مثل طقة الكوع

تعوره وايد بس بسرعه تطيب

ويرجع يتزوج عقبها

وهذي واهي زوجته وينهم عشرة عمر

مشكوره على التعليق

من الواضح انج قاعدة تتمشين بمدونتي وماخذه وقتج

مشكوووووووووره
:**