.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

20.5.08

ايميل .. ومواصفات الزوج المثالي بعين ست الكل الكويتية


دخلت غرفتها

قطت جنطتها على الصوفا

حذفت صندلها ذاك الصوب

وفلت شعرها وانثرته كأنها تنفض تعب اليوم عن ذهنها

قطت عمرها على فراشها ... تنفست بعمق

غمضت عينها ... وسرحت

فتحت عنيها .. شغلت الراديو .. دندنت مع الأغنية

سحبت اللاب توب

فتحت صفحة مدونة الزين تقرا جديدها

"مواصفات الزوجة المثالية في عين الرجل الكويتي"

فتحت صفحة الإيميل وكتبت

عزيزتي الزين

موضوعك أثار الكثير من التساؤلات في ذهني وأشعل فتيل التمرد في داخلي وأيقظ كل ما أطفأته من جموح لمشاعري بالفترة الأخيرة.

من أعطي الرجل الحق بأن يملي شروطه بالطريقه المجحفة هذي بحق كيان وتفكير وعقلية المرأة .. كيف يجرؤ أن يراها بتلك الطريقة .. شلون ما عندهم ادراك ان الشكل ينشبع منه بس الفكر هو اللي يشحذ المشاعر وينميها ويغذيها وينعشها .

شلون صاروا شبابنا يفكرون بهالطريقه ... يبون وحده مثل الطبل صيتها عالي بس من داخلها طبل فاضيه ... هذي شكثر بتم وياها وتنبهر بجمالها ... اوكي انا معاهم ان الله جميل يحب الجمال .. بس الجمال مو بس بالشكل .... الجمال له مقاييس كثيرة ... ادري الحين بيقولون هذي اكيد جيكرة عشان جذيه مو عاجبها الكلام .. بالعكس انا ابعد ما يكون عن الجكر بس ارفض تماما اني اقيم على اساس شكلي .. لسبب واحد اني احمل من الفكر والقيم والمبادئ والثقافه ما يعادل قطيع من اشكال أشباه الرجال .. اوكي أنا محتده شوي .. ويمكن تكون ردة فعلي شوي مبالغ فيها ... بس لي متى نرضى بمثل هالنظرة المتدنية لنا احنا البنات ... هل لازلنا جواري نباع ونشترى على اساس الجمال؟؟؟؟؟؟؟

ليش مصيرنا مرتبط بكلمة رجل ... ليش لازم نمر ونعيش تجارب عاطفية فاشلة وبالأخير نرضى بالنصيب .. ليش البنت تعتبر مثل الفاكهه الموسمية مرغوب فيها لعمر معين وعقب ما تعديه تنحط على الرف .. وليش لازم الوحده تتزوج .. واذا ما تزوجت قلنا مسكينه عانس .. وليش المطلقة تنتهي حياتها ... وليش المجتمع دايم يلوم البنت على فشلها بحياتها الزوجية؟

الحين الوحده لما يتقدم لها واحد ما ينبلع شكله شيقولون لها؟ الرجال مخابر مو مناظر ... يعني اهم مهم عندهم الشكل بس احنا لأ مو مهم !!!!!!!

اوكي الزين ... تعالي نتكلم بنفس منطقهم ... بالله عليج واحد أمه معتله فيه وخواته ينحاشون من شكله وربعه قاصين بثقل دمه .. انا ليش آخذه ... عشان مخابره؟؟؟؟ ولين انصك علينا الباب وتجابلنا شسوي بالمخابر ... وازيدج من الشعر بيت ... عنده روحه موت ... يدور على الحلاة .. واهو كلمتين سنعين ما يعرف يقول ودج تقولين له ارحم الله والديك اسكت .... احس اني قاعدة أغلي ... وتدرين شنو اللي يحر أكثر .. انه يتشرط اذا بغى ياخذ كويتية ... بس لين انعمى على عينه وخذا اجنبية لغى هالشروط كلها ... وخذا له وحده حيا الله تطبخ له وتييب له عيال وتربيهم له ... وياليت على جذيه .. آخر شي تاخذ عياله وتنحاش منه .

واحنا ناخذهم ونسنعهم ونداريهم ونداري اهلهم .. ونكون الصدر الحنون والأم الرؤوم والحبيبة والطبيبة .. والزوجه وآخر شي مثل العومة ماكولة ومذمومه ... يقعد بالديوانية مع ربعه يذم فيها ... واذا دقت له تليفون ... صار عليها عنتر جدام ربعه عشان يقولون رياااااال عفية عليه.

لو بقعد أقول وأعد ما راح اخلص .. يالزين احنا في مجتمع ذكوري ما يرحم ... مصيرنا بيد رجل ... أب .. أخ .. زوج .. أو حتى حبيب ... فهم صحيح لعلاقة الرجل بالمرأة ماكو .. منعدمة ... حتى القوامة فسروها غلط ... وما ابي ادخل بمتاهات الدين عشان لا انرجم ... كافي تخبيصي اللي فوق.

في مجتمع مثل هذا بتظل المرأة تشترى وتباع مثل السلعة الرخيصة أو الغالية بحجة الزواج . للأسف رغم التعليم رغم التطور الفكري والثقافي ... لازالت المرأة يساوم عليها بحجة الزواج .... أنا ما أعمم الوضع ... بس ما نبي ننكر أنه موجود.

وبالنهاية عقب عاصفة البوح هذي كلها ابيج تبردين قلبي وتحطين مواصفات تعجيزية مثل ما اهم حطوا وابصم لج بالعشرة .... ماراح يتطابق مع شروطنا حتى واحد.

ادري طولت عليج وخربطت وايد واحتديت اكثر بس والله من اللي فيني

شاكرة لج اتاحة هالمساحه لي من الفضفضة النسائية...:)

***************

قريتوا .....

لا أحد يغلط على البنت قلبها مليان ...ملياااااان .... ويفيض مثل الوديان

وبناء على طلب الجماهير الغفيرة نستعين على الشقا بالرحمن ونبلش بموصفات عريس الغفلة:

أن يكون طويلا مثل ماثيو ماكونهي

جذاب مثل هيو جاكمان

وسيم مثل جوني دب

له صوت جورج كولوني

مفتول العضلات شنكول الحركات شلولح مثل ما قال عادل امام

(ترجمة شنكول وشلولح عند اخوانا المصريين)

حنون مثل مكدريمي في Grey’s anatomy واللي ما يعرفه ينزل المسلسل من النت ويتعلم منه

وخفيف الطينة وشيطون مثل مكستيمي هم بنفس المسلسل يااااازينه

وان يكون لماح وشديد الملاحظة والذكاء مثل المحقق كونان

أن يكون شديد العزم ذو ارادة مثل جون سميث حبيب بوكاهانتس

أن يكون له ابتسامة جود لو

وطريقة كلام راسل كرو

أن يكون مقداما جسورا مثل توم كروز في مهمة مستحيلة

أن تكون سيارته آخر موديل بس بدون اقساط لو سمحتوا

أن يكون متحدث مثل طه حسين روحاني مثل جبران ورومانسي ويعشق المرأة مثل نزار قباني

أن يملك شاليه او شقة بره واذا ما صار على الأقل مزرعة بالوفرة

ان يعمل بقطاع خاص او مؤسسة حكومية عشان معاشه يكون راهي

أن يعرف كيف يطبخ واذا ما يعرف خل يجابل قناة فتافيت ويتعلم

أن يكون ستايل بس بدون مبالغة والا شكينا بأهليته كرجل خصوصا ان هالنماين كثرانين فما نبي تمويه اذا سمحتوا

يفضل أن يكون يتيم وخواته متزوجات منعا وتداركا للمشاكل

ان يكون كريما معطاءا مثل الملوك

رقيقا منكسرا امامها كالصعلوك

أن يعرف أصول التعامل والأتكيت عشان لا يفشلها بالمحافل والمجتمعات

أن يتقبل أن يكون عندها أصحاب وأصدقاء من الجنسين بدون ما يشتغل عليها بنظام غيره وأصول

أن يكون عنده استعداد يجابل اليهال أثناء غياب الماما وبدون تذمر

ويشاركها بواجبات المنزل بدون ما يقول لها أنا الريال وهذا شغل الحريم

أن لا يتابع القنوات الغنائية وما تصير عيونه بقمة راسه اذا شاف هيفا أو نااااانسي

وخاصة قناة غنوة

أن يستمع إليها كشهريار حتى يطلع النهار

أن يبحث عن الأشياء اللي تهمها ويعرف نوعية هالإهتمامات عشان يعرف شلون يوصل لتفكيرها ومن ثم أكيد قلبها

والحواااار.... الحوار... يعرف شنو اهمية الحوار ... ترى يا فلان الحبيبة ما تشم على راحة ايدها وعندها البلورة السحرية عشان تعرف انت شلون تفكر أو شنو يرضيك ... جرب تصارحها وتقول لها شنو اللي يسعدك وشنو اللي ناقصك ... وبعدين تشره أو دور غيرها بره

وحط في بالك الزواج الثاني مبدأ مرفوض وإنسى سالفة أن الشرع حلل أربع

ولازم يكون في شوية ابداع وابتكار باختيار الهدايا وبسنا عطور شبعنا

ومو كل ما بغيت تتحلى عليها قلت لها لبسي أحمر ؟؟؟؟؟ @@ خلصنا عاد راحت موضة الأحمر غير بالألوان لو سمحت

ولا يقول لها سوي مثل زوجة فلان أو صيري مثل بعلة علان لسبب بسيط أنت بعد مو مثل فلان ولا تعرف تسوي مثل علان

ولا يقعد يركز على عيوبها وينسى ان اهو بعد فيه عيوب وسبحانه ربي كلنا بشر يعني بعدنا ما صرنا ملائكة

وأخيرا لا يقول لها طبخي مثل أمي أو لبسي مثل اختي .... اصحى يابابا أهلك شي وآنا شي ثاني

بالنهاية في شغلة مهمة لازم يعرفها الحبوب والحظيظ اللي بياخذها .... اهي تحبك ترى بس بالمقابل انت بعد حبها ولا تاخذها بالضمان .. لأن محد يضمن احد

الزواج والسعاده يبي لهم شغل ... شغغغغغل مثل ماقال عبدالحسين عبدالرضا

اتمنى كلامي كان خفيف عليكم




تنبيه: العنف بالكلام او العنف الجسدي مرفوض بتاتا فننصحكم بالإمتناع عنهم لأن ممكن يحوشكم مثله بالمقابل

ايه وتنبيه ثاني : البوست مو بالضرورة يعبر عن رأي صاحبة المدونة فرجاءا (ن) شوي شوي علي ولا أحد يسبني

فوتكم بعافية

:)

18.5.08

بعد الإنتخابات .... نحتاج كسرة موووووود



مواصفات الزوجة المثالية في عين الرجل الكويتي

أن تكون خفيفة الظل طبيعية مثل الأمريكيات
أن تكون مثيرة مثل الإيطاليات
أن تكون طويلة وممشوقة مثل العارضات البرازيليات
أن تكون أنيقة مثل الفرنسيات
أن تعرف أن ترقص مثل المصريات
أن تحازيه مثل الجاريات وتصير له شهرزاد كل ليلة
أن تعرف أن تتغنج مثل اللبنانيات
أن تعرف أن تنظم له الشعر وتتغزل بجماله مثل البدويات
أن تكون بيضاء مثل السوريات
طويلة الشعر مثل الهنديات
مدبرة للمنزل مثل الفليبينيات
وتترس له البيت عيال مثل الفلسطينيات بس هااا لازم يتم جسمها مثل ما اهو ما يتغير حتى لو تييب عشر
ولازم تربيهم وتدرسهم مثل المدرسات
أن تكون مطيعة مثل اليابانيات
وأن تكون كريمه معه مثل الأميرات
وان تكون موظفه ورايحه الحج توفيرا للمصاريف
وإذا فكر وتزوج عليها لازم تسكت لأن هذا حقه الشرعي والقصور منها مو منه
واذا ما صار لازم تموت قبله عشان يلحق يستانس عقب عينها
وإذا صاحب عليها لازم تسكت وتحارب وتجاهد عشان ترجعه لعشها الهانئ لأن أكيد اهو دور وناسته بره لأن اهي ما تعرف تنوسه
وأن تكون مؤمنة مثل الصحابيات
وقنوعه مثل حريم أول
وأخيرا وليس آخرا أن تطبخ له وتحن عليه وتداريه مثل أمه
وتتحمل نحاسة أهلة وجيادتهم مثل سندريلا
وأن تعشقه مثل ولادة
وتكون بريئة مثل ليلى والذيب
وهادية مثل الجميلة النائمة
ورقيقة مثل بوكاهانتس
ومضحية مثل ليتل ميرميد
ودلوعه مثل بيتي بوب
ومنظمة مثل النملة
ودؤوبه مثل النحلة
وجامحه ... أحيانا طبعا مو على طول مثل المهرة
وشفافة وترد الروح مثل قلاص الماي البارد
ليه ناداها قالت سم
ولين قعد يمها غنت له وحشتني
ولين غاب قالت ياناسين الحبايب ليه القسوة
ولين خان صاحت متى يوعى ضميره ويعرف اكو ابن آدم يحبها الحب الصدوقي
ولين هبدها قالت له نااااارك ولا جنة هلي
واذا بغى شي صارت له مارد المصباح يطلب يجاب وعندها له كل شي مباح




أنا قلبي نضى من البوست
شلون انتوا

مع الإعتذار للرجال الحقيقيين بس هذا واقع حاصل واللي بيحتد خل ينطر مواصفات الزوج المثالي بعيون البنت الكويتية

وعلى فكرة مو كل الرياييل هالشكل .. ولا كلهم مو هالشكل ولوما الشين ما عرفنا الزين ورجاءا لحد ياخذ الموضوع بحساسية ، لأن البوست مو بالضروة يعبر عن وجهة نظر صاحبة المدونة فلا أحد يسبني بليز

لسبب واحد ... هذا البوست مجرد .....................كسرة مود

:))

12.5.08

قارئة الفنجان


طلسم أنت في فنجان قهوتي
تحكيه لي تلك الغجرية
تبحث في عيني عن سر تلك الأحجية
تسبر غوري لترسم لك هوية
أخفيك عنها بين تراكمات ربكتي
بين الأحاديث والصور
بين مشطي و خصلات شعري
داخل زجاجة عطري
أخفيك بين ثنايا أصابعي وفي دفء كفي
أخفيك بين الورقة والقلم
بين خطواتي .. بصوت همساتي
تمسك كفي .. تتبع دربك ... تخبرني بأنك هناك
ابتسم ... أسألها من تكون

تصفعني بعلامة استفهام كبيرة
هل حقا تجهلين من يكون!!
وأنفاسك تجهر باسمه وتنأى صرخات السكون
انظري ...
هنا طير شارد قد ترك جناحيه في صدرك
يرفرف عندما تذكرين حديثه
وهنا .. مهرة قد جنحت وتمردت .. ربما تكون عاشقة
وتلك .. هي وسادة خالية .. تملأها الأماني .. لا شي أكثر

وتبتسم ...

طريقك طويل ... معبد بالأساطير ... مملوء بالخيالات
وما كتب هناك .. في صدر السماء .. هو آت (ن) آت
هنا أراك .. من بعيد .. تغتسلين بالنور كل صباح
تسلكين طريق السماء .. تمسكين شعاعا (ن) من نور
تلبسينه كقوس قزح .. تسابقين الفجر وترتمين على اوراق الغاردينيا
مشبعة بالحنين .. وتشربين وجدك من كأس(ن) لا ينضب
هنا .. أنت تنسجين قصصا (ن) ليس لها من الحقيقة نصيب .. ألا تدركين!؟

أتنهد .. انظر لعينيها الحالكة السواد وأتساءل
أنت تمزحين ؟

أنا أقرأ فنجانك يا صغيرتي فلماذا تستهجنين
أنت في سبيل عشقك كل يوم قربانا تذبحين
ومن أشعة الشمس ثوبا وهميا تخيطين
وعقدا (ن) ترصعه النجوم والأجرام في عنقك تتقلدين
فأي حلم ياعزيزتي تحلمين


أنا لا أحلم ... ولكني أبحث عن مرسى لقواربي
أبحث عن كف(ن) يعانق كفي ورجل يعشق وصفي
رجل يرتحل بي كل ليلة لذلك القمر
رجل يطيب لي معه السهر
يحدثني .... يحاورني .. ويغزو وحدتي حتى السحر
رجل يغزل من خصلات شعري سجادة لصلاته
رجل يهمس اسمي كلما لثم ثغره نبض الحياة في عنقي
رجل يغزو السحاب ليروي عطشي
ويعشق الياسمين لأنه يحكي له حكايتي

أنا ...
أبحث عن فارسي


يا ابنتي ... لقد انتهى عهد الفرسان
وعهد النبل قد ولى ولم يبق الا الفئران

هل قيل لك انك تجيدين وأد الأحلام
ولكن حلمي أنا لا يوأد
ومع كل فجر صباح جديد يولد
هل أتممت قراءة فنجاني أم أن هناك المزيد

تتنهد بعمق ... تتمتم ببعض الكلمات
انتظري ... هناك المزيد .. فأنا لم انته
ابصمي هنا ...


تتبحر مرة أخري بفنجاني ترفع رأسها
لماذا أراك هنا تبكين .... وعلى ماذا تحزنين؟

ابتسم ... ألي أنا هذا السؤال تسألين
أنت من هنا تنجمين!!


تنظر إلي ... تبصرني ولا تبصرني
إني أراك حبيبا لقلبك تفقدين
وثعبان كبير يلتهم كل ما تعشقين
ولبلد تحيطه الجبال ترحلين
صعب هو طريقك ... ولكنك بالنهاية تصلين


صه .. توقفي ... لا اريدك أن تكملي

هي الأيام .... ولسوف تبصرين

هي خدعة يكذب بها المنجمون

تبتسم

أترك فنجاني ... مملوءا (ن) ببقايا قهوتي
والكثير الكثير ... من الأحلام

وغدا يوم آخر ... يوم جديد ... يحمل لي حلما (ن)أجمل

وأملا(ن) أكبر.......إلى حين


















6.5.08

كل عام ومدونتي بخير


عام كامل .. وأنا اسكب أفكاري هنا ... أشارككم بخواطري ... بمشاعر قد كانت حكرا علي نفسي ثم أشعتها بينكم

أكتب في مدونتي ومدونتي تحكيني لكم .. تحكي الزين بتفاصيلها ... تجدونها مختبئة وراء الكلمة والحرف والفكرة ... وتجدونها أوضح وأكثر بينكم بالردود على تعليقاتكم وتواصلكم معها

عام كامل أهديتكم الكثير خلاله وأخذت منكم أكثر.. من تفاعل ومشاركة .. مواساة ومؤازرة .. حب وابتسامة .. والكثير من اللحظات الجميلة عبر حروفكم البسيطة والمحبة حتى أدمنت تواجدي بينكم

تجتاحني في هذه اللحظة الكثير من المشاعر .. حب ... احتواء .. امتنان لتواجدي بينكم ... والكثير الكثير من الدفء

وككل طريق نسلكه ونتعثر أحيانا بانكساراته و احباطاته ... كانت نصوصي ... ولكن بالمقابل كسبت الكثير من الأصدقاء ... منهم من شجعني على الاستمرار .. ومنهم من وجهني وساعدني على صقل حروفي لأصل إلى ما وصلت إليه اليوم

أسماء كثيرة ... معظمها بلا وجوه ... تركت في نفس الزين شيئا لا يقدر بثمن .. تجربة أضافت لي الكثير .. وربما خلقت مني الزين أخرى .. أحبها أكثر واعتز بما تملكه من حس قد لامس قلوب الكثيرين والكثيرات منكم

مفعمة أنا اليوم بالمشاعر... تغلبني عبراتي ...واعجز عن التعبير ... لا تضحكون علي بس هذا بالفعل إحساسي

وحدة سألتني شنو االلي كسبتيه من المدونة ... ما فكرت لوهلة جاوبتها وقلت ... إخوان وخوات ما تربطني فيهم الا الكلمة ومع هذا أحببتهم وأحبوني من خلال شاشه وكي بورد .. دون انتظار المقابل في زمن غلبت عليه المصالح

كثير هو ما يدور بخاطري... كثيرة هي الكلمات... مشاعري لكم بعمق محيط أزرق كلون السماء ..

أريد قول الكثير ويعجز قلمي اليوم ...

اختصر كل هذا بكلمة واحدة

أحبكم ... وشكرا لكم لكل دقيقة أمضيتموها هنا عند الزين وكل كلمة شاركتموني بها




4.5.08

حوار ماميش .... فجة ماميش ... زواج ماميش



ما يسولف معاي ... وإذا سولفت معاه ما يسمعني ... ما يستوعب آنا شقاعدة أقول
ابتدأت حديثها معانا واهي تشتكي منه .. ومن قلة اهتمامه باللي تقوله ..
الزين : يعني شلون ما يستوعب؟
سبيكه : يعني مثلا آنا قاعدة أتكلم عن شي يلقط له كلمة ويسأل عنها بس بطريقه مالها علاقة بالموضوع ... وتحسينه حاضر معاج بس باله مو وياج يسمع بس ما يستمع
الزين : اهاا .. الحين فهمتج ... طيب حاولي تلفتين انتباهه لهمالموضوع
حصه : أي تلفت انتباهه .. تقول لج الريال حاقرها .. تقولين لفتي انتباهه
الزين : حصة خلج محضر خير... خلينا نسمع البنت شتقول
سبيكه : يعني إنتوا تهقون ما قلت له .. ما نبهته ... ما عصبت وزعلت ... يصير خوش واحد فترة ويرجع مثل الأول عقبها .. ما كو فايدة آنا أتصور كل الرياييل جذيه
حصه : لا حبيبتي اهم بس على المشتهاة يسمعون اللي يبونه .. ويصيرون صمخان عن اللي ما يبون يسمعونه
الزين : لا حول الله .....شوفي بيكا .. اللي آنا اعرفه إن الريال مخلوق نظري مو سمعي .. يعني عشان يلفت انتباهه الشي لازم يشوفه لازم تستفزين النظر فيه أول
سبيكه : يعني شلون بالله .. قاعدة اسولف له عن حلم شايفته البارحة شسوي له .. أوقف على طولي وأمثله له .. أقص له الحلم مع خلفية موسيقية وإضاءة ملونة.. اذبح روحي وإذا انتبه أقول له ترى بغيت أقص لك حلمي
الزين : ههههههههههههههه واي إنتي حدج منقهرة
حصه : هاااو .. شلون ما تنقهر .. أنا لو مكانها انفجر مو بس انقهر
سبيكه : لا زيون مو جذيه .... الموضوع إن ما عاد بينا حوار .. الحوار انلغى
الزين : شلون يعني ما تسولفون كلش
سبيكه : نسولف .. بلا نسولف ... بس سوالف مالها طعم .. ما فيها هذاك الاهتمام أو الشغف عشان تعرفين الطرف الثاني شنو بيقول
الزين : شنو تسولفون عنه يعني ؟
سبيكه : العيال .. طلباتهم .. البيت واحتياجاته .. التزاماتنا .. مسئولياتنا .. قلت لج شي مالها طعم
الزين : بس؟؟؟
سبيكه : ايه بس ... شنو يعني تبينا نسولف عنه .. آخر كتاب قريته مثلا .. لو الألبوم الفلاني حق المطرب العلاني
الزين : وليش لأ
سبيكه : ماااااااكو ... إنتي بتذبحيني ... عيل انا يايتج ششكي منه
الزين : اووووه .. هدي إنتي عاد شوي .. خل افهم عشان اقدر اعطيج رايي
حصه : إنتي خبلة .. والله أريح لج .. شلج بالطلايب .. خليه جذيه لاهي عنج ... الريال متى ما صار ما عنده شغل غيرج .. يعل .. تنقثين من وجوده .. تقولين عوووع فج شوي رحم الله والديك
سبيكه : حصه ....إنتي وضعج غير... لا تحكمين علي حياتي من تجربتج وحياتج إنتي .. بعدين تهقين آنا محتاجه يقول لي قسط السيارة شكثر باقي عليه .. ولا الشغالة مالت اليهال بتروح ديرتها ولا حتي حمودي لازم نوديه عيادة الأسنان ... كل هذا ادري فيه ... ليش ما يعرف يقول شي ثاني ....يمسك الجريدة ساعة يخش راسه فيها .. ما يعرف يسولف معاي عشر دقايق؟؟
الزين : إنتي سولفي معاه .. إنتي فتحي مواضيع ممكن تهمه وممكن تلفت انتباهه
حصه : وليييش تلفت انتباهه .. يابنتي انتي بنعمة .. صدقيني .. خليه بعيد هالشكل وعيشي حياتج
سبيكه : أي حياة؟؟ أنا لو بسوي اللي تقولين عليه ليش تزوجت من الأول جان قعدت عند أهلي أحسن لي
حصه : ايه والله قصوا علينا .. قالوا لنا الزواج وناسه وصدقناهم .. هاا شوفي الزين شلون مرتاحه بلا زواج بلا عوار راس
الزين : قل أعوذ برب الفلق .. بس افتريتي علي .. وبعدين محد طقج على ايدج .. هذا وانتي ماخذة ريلج عن حب ... وبغيتي تموتين لين وافقوا أهلج
سبيكه : زيون ما عليج منها .. خلج معاي .. قولي لي شسوي
الزين : مدري يا بيكا .. بس أكيد إنتي تعرفين ريلج أحسن مني .. وتعرفين من وين تدخلين له وتوصلين له .. حاولي تخلقين له الجو اللي يحبه .. تفتحين معاه مواضيع ممكن يسولف فيها
سبيكه : حصه علميني شسوي
حصه : شدراني .. إنتي علميني شلون منحشه ريلج عشان أسوي مثلج .. اللي عندي لازق لي لزقه .. ما يفج ... يروح الديوانية ساعه ما مداني أتنفس الا كاهو فوق راسي .. يتنا الانتخابات وفرحت قلت بينشغل شوي ... ماكو يفتر على المقرات وهالكني مكالمات ومسجات .. بختنق بموت .. مو معطيني مجال أتنفس .. نسيت شي اسمه شوق .... لاعت جبدي خلاص
الزين : عقدتوني بحياتي.. الحين اللي لاهي عنها مو مرتاحة واللي لازق فيها مو مرتاحة عيل وين الراحه علموني
سبيكه : اسم الله عليج زيون ... زين لج حصيص
حصه : شنو اللي زين لي ... بذمتج مو حياتها أريح من حياتنا .. بيكا على الأقل تقدر تروح وتيي على كيفها .. تنام متى ماتبي ... تاكل متى ما تبي ... تسافر .. لها حياتها ومساحتها الخاصة فيها
الزين : من يقول ... ووين راحوا أهلي .. والتزاماتي معاهم وقوانينهم اللي ما تخلص
سبيكه : لا بس زيون مو مثلنا ... يعني إحنا مسؤولياتنا أكثر.... ريل لازم تدارينه وتشوفين طلباته وعيال لازم تدرسينهم و تربينهم أحسن تربية وتوفرين لهم احتياجاتهم .. و إنتي تيين بالأخير.. احتياجاتج .. طلباتج .. ووقتج اللي مقسم ما بين شغل وبيت وعيال وزوج ... ينتهي اليوم ... و إنتي ما اختليتي بنفسج حتى نص ساعه
حصه : حتى تكرمين الحمام واقفين لج على الباب ... يبون منج شي ... ولا اهو ناطر تطلعين يبي الحمام
سبيكه : ويه عاد حصه شدعوة ... شنو حمام عمومي بالدور اهو
الزين : شنو هذا... صدموني بعد أكثر الله يخليكم ... لوعوا جبدي زيادة
سبيكه : لا زيون .... ما عليج منا ... إحنا قاعدين نذكر لج السلبيات بس أكيد في ايجابيات
الزين : ليش انتوا خليتوا فيها ايجابيات .... كرهتوني بالطاري كله
حصه : عشتوا ... اقول ليكون بس ليه يالج اللي بالي بالج بتقولين لأ
الزين : بلشنا بالتنقز ... ما تعرفين .. لسانج عليه قرصات عجيبة
سبيكه : ايه زيون صج شصار عليكم
الزين : ما صار ... وعقب كلامكم ما ظنتي بيصير
سبيكه : هااااو .... ليش احنا شقلنا؟؟؟
حصه : يمه يا عيارة البنات
الزين : انتوا قبل لا افكر كسرتوا فيني
سبيكه : غلطانة ... اصلا انتي لازم تهيئين روحج للأسوء .. الزواج مو كله وناسه ... فيه الكثير من المشاركه وبكل شي ... بالفرح والطرح ... بالضيجه والسعى ... بالصحة والمرض
حصه : ابسط شي فرشة اسنانج يم فرشة اسنانه ... مخدتج يم مخدته ... ساعات ممكن يمشط بمشطج .... وانتى الوحيدة اللي تشوفينه بأسوأ حالاته قبل أحسنها ... وهو تعبان .. وهو مريض .. وهو محبط ... أول ما يقعد من النوم وويهه متفخ
الزين : واااااي ... بس سكتي خلاص ما أبي اسمع
حصه : والله ... ليكون على بالج بيجابلج واهو متسنع على طول .... هييي اصحى
سبيكه : حصيص ... مو جذيه .. شوي شوي على البنت
الزين : أنا ما قلت جذيه ... وصفج انتي للموضوع يخليني اقول شهالحالة
سبيكه : زيون ... شفتي هاللي قالته حصه ترى كله صج بس بالمقابل في أشياء تغطي على هذا كله
الزين : مثل؟؟؟
سبيكه : بيكون لج الحبيب ... والصدر الوسيع ... بيكون لج السند والعضيد ... بيوقف معاج بأزماتج وضيقاتج من غير ما ينتظر مقابل ...وعند الحاجة بيعطيج الراي السديد.. بيشيلج بالمرض ... وبيعينج على أمور حياتج .. يمكن يلهى شوي ... بس آخر شي يرجع لج واهو مشتاق
حصه : ايه والله ... صاجة بيكا ... بيكون لج العقل لين ينيتي .. والثقل لين استخفيتي ... والعدال لين خربطتي .. بيصلح لج بدلياتج ... وبيرتب لج حق روحاتج ويياتج وسفراتج ... وبيشاركج بيزاتج
الزين : @@
سبيكه : وانتي ما تعرفين تقولين حجوة سنعه
حصه : ويه عاد ... آنا اقصد إن الجيب واحد وعمره ماراح يبخل عليها ... والحياة مشاركه مثل ما قلتي
سبيكه : زيوون ... الزواج أخذ وعطا ... ستر وغطا ... سكن للروح قبل الجسد ... دوا للوحدة ... وعلاج للوحشة .... روح تآنس روح ... وقلب يحب قلب ... وكف تدفي كف ... هدف واحد ... وجسدين في كيان واحد
حصة : وأشياء أخرىRated يعني
سبيكه : وربي بطقج ... سكتي شوي
حصه : زيييييين خلاص بسكت
الزين : بس ... ما أبي اسمع زيادة كفيتوا ووفيتوا ... وان بغيت اعرف زيادة بسألكم
سبيكه : خوش عيل ... أخليكم أنا ... بروح أدور رقم فوزية دريع اسألها عن مشكلتي
حصه : ويييييييه ... شهالعبو ... الحين توج مسوية روحج أم العريف وقاعدة تعطين زيون عصارة وخلاصة تجربتج الزواجية ... صج باب النجار مشلع
سبيكه : إنتي قولي المثل عدل بعدين حاسبيني .. يالله سلام
حصه : سلامين
الزين : أنا بعد بمشي ... مالي خلق أتأخر .. أمي هاللأيام شابه علي شبه
حصه : هاااو يعني آنا اللي ماوراي والي ... اخذوني بطريجكم ... أكيد بعلي بريحاته ضايق خلقه
الزين : بينا ألو
سبيكه : ألو
حصه : صار