.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

4.5.08

حوار ماميش .... فجة ماميش ... زواج ماميش



ما يسولف معاي ... وإذا سولفت معاه ما يسمعني ... ما يستوعب آنا شقاعدة أقول
ابتدأت حديثها معانا واهي تشتكي منه .. ومن قلة اهتمامه باللي تقوله ..
الزين : يعني شلون ما يستوعب؟
سبيكه : يعني مثلا آنا قاعدة أتكلم عن شي يلقط له كلمة ويسأل عنها بس بطريقه مالها علاقة بالموضوع ... وتحسينه حاضر معاج بس باله مو وياج يسمع بس ما يستمع
الزين : اهاا .. الحين فهمتج ... طيب حاولي تلفتين انتباهه لهمالموضوع
حصه : أي تلفت انتباهه .. تقول لج الريال حاقرها .. تقولين لفتي انتباهه
الزين : حصة خلج محضر خير... خلينا نسمع البنت شتقول
سبيكه : يعني إنتوا تهقون ما قلت له .. ما نبهته ... ما عصبت وزعلت ... يصير خوش واحد فترة ويرجع مثل الأول عقبها .. ما كو فايدة آنا أتصور كل الرياييل جذيه
حصه : لا حبيبتي اهم بس على المشتهاة يسمعون اللي يبونه .. ويصيرون صمخان عن اللي ما يبون يسمعونه
الزين : لا حول الله .....شوفي بيكا .. اللي آنا اعرفه إن الريال مخلوق نظري مو سمعي .. يعني عشان يلفت انتباهه الشي لازم يشوفه لازم تستفزين النظر فيه أول
سبيكه : يعني شلون بالله .. قاعدة اسولف له عن حلم شايفته البارحة شسوي له .. أوقف على طولي وأمثله له .. أقص له الحلم مع خلفية موسيقية وإضاءة ملونة.. اذبح روحي وإذا انتبه أقول له ترى بغيت أقص لك حلمي
الزين : ههههههههههههههه واي إنتي حدج منقهرة
حصه : هاااو .. شلون ما تنقهر .. أنا لو مكانها انفجر مو بس انقهر
سبيكه : لا زيون مو جذيه .... الموضوع إن ما عاد بينا حوار .. الحوار انلغى
الزين : شلون يعني ما تسولفون كلش
سبيكه : نسولف .. بلا نسولف ... بس سوالف مالها طعم .. ما فيها هذاك الاهتمام أو الشغف عشان تعرفين الطرف الثاني شنو بيقول
الزين : شنو تسولفون عنه يعني ؟
سبيكه : العيال .. طلباتهم .. البيت واحتياجاته .. التزاماتنا .. مسئولياتنا .. قلت لج شي مالها طعم
الزين : بس؟؟؟
سبيكه : ايه بس ... شنو يعني تبينا نسولف عنه .. آخر كتاب قريته مثلا .. لو الألبوم الفلاني حق المطرب العلاني
الزين : وليش لأ
سبيكه : ماااااااكو ... إنتي بتذبحيني ... عيل انا يايتج ششكي منه
الزين : اووووه .. هدي إنتي عاد شوي .. خل افهم عشان اقدر اعطيج رايي
حصه : إنتي خبلة .. والله أريح لج .. شلج بالطلايب .. خليه جذيه لاهي عنج ... الريال متى ما صار ما عنده شغل غيرج .. يعل .. تنقثين من وجوده .. تقولين عوووع فج شوي رحم الله والديك
سبيكه : حصه ....إنتي وضعج غير... لا تحكمين علي حياتي من تجربتج وحياتج إنتي .. بعدين تهقين آنا محتاجه يقول لي قسط السيارة شكثر باقي عليه .. ولا الشغالة مالت اليهال بتروح ديرتها ولا حتي حمودي لازم نوديه عيادة الأسنان ... كل هذا ادري فيه ... ليش ما يعرف يقول شي ثاني ....يمسك الجريدة ساعة يخش راسه فيها .. ما يعرف يسولف معاي عشر دقايق؟؟
الزين : إنتي سولفي معاه .. إنتي فتحي مواضيع ممكن تهمه وممكن تلفت انتباهه
حصه : وليييش تلفت انتباهه .. يابنتي انتي بنعمة .. صدقيني .. خليه بعيد هالشكل وعيشي حياتج
سبيكه : أي حياة؟؟ أنا لو بسوي اللي تقولين عليه ليش تزوجت من الأول جان قعدت عند أهلي أحسن لي
حصه : ايه والله قصوا علينا .. قالوا لنا الزواج وناسه وصدقناهم .. هاا شوفي الزين شلون مرتاحه بلا زواج بلا عوار راس
الزين : قل أعوذ برب الفلق .. بس افتريتي علي .. وبعدين محد طقج على ايدج .. هذا وانتي ماخذة ريلج عن حب ... وبغيتي تموتين لين وافقوا أهلج
سبيكه : زيون ما عليج منها .. خلج معاي .. قولي لي شسوي
الزين : مدري يا بيكا .. بس أكيد إنتي تعرفين ريلج أحسن مني .. وتعرفين من وين تدخلين له وتوصلين له .. حاولي تخلقين له الجو اللي يحبه .. تفتحين معاه مواضيع ممكن يسولف فيها
سبيكه : حصه علميني شسوي
حصه : شدراني .. إنتي علميني شلون منحشه ريلج عشان أسوي مثلج .. اللي عندي لازق لي لزقه .. ما يفج ... يروح الديوانية ساعه ما مداني أتنفس الا كاهو فوق راسي .. يتنا الانتخابات وفرحت قلت بينشغل شوي ... ماكو يفتر على المقرات وهالكني مكالمات ومسجات .. بختنق بموت .. مو معطيني مجال أتنفس .. نسيت شي اسمه شوق .... لاعت جبدي خلاص
الزين : عقدتوني بحياتي.. الحين اللي لاهي عنها مو مرتاحة واللي لازق فيها مو مرتاحة عيل وين الراحه علموني
سبيكه : اسم الله عليج زيون ... زين لج حصيص
حصه : شنو اللي زين لي ... بذمتج مو حياتها أريح من حياتنا .. بيكا على الأقل تقدر تروح وتيي على كيفها .. تنام متى ماتبي ... تاكل متى ما تبي ... تسافر .. لها حياتها ومساحتها الخاصة فيها
الزين : من يقول ... ووين راحوا أهلي .. والتزاماتي معاهم وقوانينهم اللي ما تخلص
سبيكه : لا بس زيون مو مثلنا ... يعني إحنا مسؤولياتنا أكثر.... ريل لازم تدارينه وتشوفين طلباته وعيال لازم تدرسينهم و تربينهم أحسن تربية وتوفرين لهم احتياجاتهم .. و إنتي تيين بالأخير.. احتياجاتج .. طلباتج .. ووقتج اللي مقسم ما بين شغل وبيت وعيال وزوج ... ينتهي اليوم ... و إنتي ما اختليتي بنفسج حتى نص ساعه
حصه : حتى تكرمين الحمام واقفين لج على الباب ... يبون منج شي ... ولا اهو ناطر تطلعين يبي الحمام
سبيكه : ويه عاد حصه شدعوة ... شنو حمام عمومي بالدور اهو
الزين : شنو هذا... صدموني بعد أكثر الله يخليكم ... لوعوا جبدي زيادة
سبيكه : لا زيون .... ما عليج منا ... إحنا قاعدين نذكر لج السلبيات بس أكيد في ايجابيات
الزين : ليش انتوا خليتوا فيها ايجابيات .... كرهتوني بالطاري كله
حصه : عشتوا ... اقول ليكون بس ليه يالج اللي بالي بالج بتقولين لأ
الزين : بلشنا بالتنقز ... ما تعرفين .. لسانج عليه قرصات عجيبة
سبيكه : ايه زيون صج شصار عليكم
الزين : ما صار ... وعقب كلامكم ما ظنتي بيصير
سبيكه : هااااو .... ليش احنا شقلنا؟؟؟
حصه : يمه يا عيارة البنات
الزين : انتوا قبل لا افكر كسرتوا فيني
سبيكه : غلطانة ... اصلا انتي لازم تهيئين روحج للأسوء .. الزواج مو كله وناسه ... فيه الكثير من المشاركه وبكل شي ... بالفرح والطرح ... بالضيجه والسعى ... بالصحة والمرض
حصه : ابسط شي فرشة اسنانج يم فرشة اسنانه ... مخدتج يم مخدته ... ساعات ممكن يمشط بمشطج .... وانتى الوحيدة اللي تشوفينه بأسوأ حالاته قبل أحسنها ... وهو تعبان .. وهو مريض .. وهو محبط ... أول ما يقعد من النوم وويهه متفخ
الزين : واااااي ... بس سكتي خلاص ما أبي اسمع
حصه : والله ... ليكون على بالج بيجابلج واهو متسنع على طول .... هييي اصحى
سبيكه : حصيص ... مو جذيه .. شوي شوي على البنت
الزين : أنا ما قلت جذيه ... وصفج انتي للموضوع يخليني اقول شهالحالة
سبيكه : زيون ... شفتي هاللي قالته حصه ترى كله صج بس بالمقابل في أشياء تغطي على هذا كله
الزين : مثل؟؟؟
سبيكه : بيكون لج الحبيب ... والصدر الوسيع ... بيكون لج السند والعضيد ... بيوقف معاج بأزماتج وضيقاتج من غير ما ينتظر مقابل ...وعند الحاجة بيعطيج الراي السديد.. بيشيلج بالمرض ... وبيعينج على أمور حياتج .. يمكن يلهى شوي ... بس آخر شي يرجع لج واهو مشتاق
حصه : ايه والله ... صاجة بيكا ... بيكون لج العقل لين ينيتي .. والثقل لين استخفيتي ... والعدال لين خربطتي .. بيصلح لج بدلياتج ... وبيرتب لج حق روحاتج ويياتج وسفراتج ... وبيشاركج بيزاتج
الزين : @@
سبيكه : وانتي ما تعرفين تقولين حجوة سنعه
حصه : ويه عاد ... آنا اقصد إن الجيب واحد وعمره ماراح يبخل عليها ... والحياة مشاركه مثل ما قلتي
سبيكه : زيوون ... الزواج أخذ وعطا ... ستر وغطا ... سكن للروح قبل الجسد ... دوا للوحدة ... وعلاج للوحشة .... روح تآنس روح ... وقلب يحب قلب ... وكف تدفي كف ... هدف واحد ... وجسدين في كيان واحد
حصة : وأشياء أخرىRated يعني
سبيكه : وربي بطقج ... سكتي شوي
حصه : زيييييين خلاص بسكت
الزين : بس ... ما أبي اسمع زيادة كفيتوا ووفيتوا ... وان بغيت اعرف زيادة بسألكم
سبيكه : خوش عيل ... أخليكم أنا ... بروح أدور رقم فوزية دريع اسألها عن مشكلتي
حصه : ويييييييه ... شهالعبو ... الحين توج مسوية روحج أم العريف وقاعدة تعطين زيون عصارة وخلاصة تجربتج الزواجية ... صج باب النجار مشلع
سبيكه : إنتي قولي المثل عدل بعدين حاسبيني .. يالله سلام
حصه : سلامين
الزين : أنا بعد بمشي ... مالي خلق أتأخر .. أمي هاللأيام شابه علي شبه
حصه : هاااو يعني آنا اللي ماوراي والي ... اخذوني بطريجكم ... أكيد بعلي بريحاته ضايق خلقه
الزين : بينا ألو
سبيكه : ألو
حصه : صار

هناك 45 تعليقًا:

Q8i Blogger يقول...

اووووله .. والله مسوينها قصه

سهالات تره

زواج .. عيال .. عيال العيال .. بح

بسيط السيناريو

شنو فرشاة وجسدين بجسد وخشمين بحلج !!
كلش ماله داعي

الزين يقول...

وه وه

من الصبح خوش زفه

سلم قول احم قول درب
تنحنح بعدين زف

:)

اكيد بسيط السيناريو والحياة حلوة

انت يعني غشيم عن سوالف الحريم

حيا الله من زارنا

ولا تزفني مره ثانية لو سمحت

باغي الشهادة يقول...

أنا لو أعلق بالتفصيل لألفت كتب على الحوار
:-)

لكن أقول إنه مثال واقعي على حالنا، والزواج بدعاء الله حلو وأنس وسعادة وسكينة

kuwaitya_7saweya يقول...

لووووووووووووووووووول
بس والله حوار قوي
وكلام منطقي

5roofa يقول...

لوووووووووول واااي تدرين شنوو حبيت حصه

ياربي دشت قلبيي دمها خفيف لوول

تدرين زوزو في سؤال انسال وااي حسيت عقبها اني عايشة القصه من قبل
امبي غريبه انه السؤال يطري بكل مكان و بنفس الطريقه

بس انا راي من راي الزين تلفت انتباه بالصورة عشان تكتمل عنده الصوت

لوول قلبنا دعاية زين
p;

salamz sweetee...

حسافتج يا كويت يقول...

كلام الزين زين
وهالشي موجود فعلا

لكن اكو شي ماتعرفونة

الريال يحب سوالف الرياييل فالمرأة لازم تدور شنو يحب الريال وتقولة والعكس صحيح

والمصريين قالو مثل حلو


اللي مراته مفرفشة ...
جوزها يجي من العشا

اي اللي مرتة تونسة ومفرفشة ومدردحة
زوجها ايي من اول الليل من العشاء وما يتاخر بالليل
لانة بلحق عليها

وما اقط اللوم على الحريم ولا معنى كلامي المراة لازم تصير 24 ساعة مفرفشة
لكن المراة بالاوقات اللي ريلها يصير داخل كهفة ومعزول خل توخر عنة ولا طلع خل تجابلة باللي يحبة

والعكس صحيح

ShLaLaT يقول...

الغاليه الزين

بعض من الحوار واقع وبعضه مبالغ فيه

لو الريال لزقه عسل على قلبها مو ريلها ؟؟

حلو الريال مرات يفج شويه بس اهي تقدر تساعده
تقوله اشترك بنادي
تقوله روح تعشى مع ربعك العب كره

اهي تقترح عليه يعني
بس مو تقول عنه لزقه !!

والحوار بعد لازم المره تعرف شلون تتكلم مع ريلها
معروف الرياييل ما يتحجون مع حريمهم وايد لازم تسحب منه الحجي
اهي لازم تفتح حوار مشوق عشان ينجذب ويتكلم


خوش بوست
يعطيج العافيه حبيبتي

الزين يقول...

باغي شهادة

:)

والله ادري
الحوار شوي مثير للجدل
بس الأمثلة واقعية وتلاقيها حواليك

ومثل ما قلت الزواج بالنهاية هو انس وسعادة وسكينة

ولا ليش نسعى له اذا كان كله أذى

مرورك جدا أسعدني

الزين يقول...

كويتية حساوية

عاد تصدقين كنت فاقدتج
وايد مو شوية

سعيدة اني رسمت هالضحكة على شفاهج

لا تغيبين ترى لج فرية

الزين يقول...

خروفاااا

اشوه انج ضحكتي
متحبلة لج

يبي لج تصيرين مثل حصه قوية

اهي من ناحية دمها خفيف فدمها عسل
وبما انها من احد الشخصيات اللي خلقتها للحوار

فهي بالنسبة لي جميلة جدا

شوفي عاد من يشهد للعروسه

:))))))

اكيد لازم تدور على الوسيله اللي تجذبه صوبها

والمرأة الذكية تعرف مفاتيح زوجها

وخوووووووووش دعاية

:**

الزين يقول...

حسافتج ياكويت

شي طبيعي ان الريال يحب سوالف الرياييل

وكل ريال سالفته تختلف عن غيره
واحد يحب الكرة
وواحد يحب يشيل اثقال
وواحد يحب الأدب
والأخير يحب الأدب والمسرح

واللي مهووس سياسه

وهذول بصوب والحداقة بصوب
:)))

ونفس الشي بالنسبة للحريم

كل واحد لازم يعرف هوى نفس الثاني ويشاركه اهتماماته

حسافتج بذمتك
منو يحب النكد
كلنا نحب الفرفشه والوناسه
وذا كانت الصحبة طيبه احسن واحسن
واذا كانت هالصحبة نصك الثاني
هذا اطيب الطيبات

عجبتني سالفة الكهف
وايد
لأن وصفك صح
وخري عنه ... عطيه فجة
خليه يشتاق لج
خليه يدورج

واذا اقبل استبشرى بدخلته
الريال يحب الوجه الصبوح ما يحب العبوس

بس تدري
انا اشوفها ان المره عشان تسوي كل هذا يبي لها قوة

جهااااد يا حسافتج
اسأل ام الزين بس عقب جم سنه
مو الحين

:))))

مع زياجة الحمل والمسؤوليات
ايد وحدة ما تصفق
الأثنين لازم يشتغلون على سعادتهم
وفهمهم لبعض

ولا انت شرايك

الزين يقول...

شلالات

غاليتي ... ياليت كنت ابالغ
صدقيني الأمثلة وايد

هالكلام تقولينه حق اللي توهم يدد

بس مع الوقت المره تحتاج مساحتها من الحرية واهو نفس الشي

البعد يخلق الشوق
حصه قالت نسيت شلون اشتاق كثر ما اهو معاي

وبعدين لا تنسين المره عيارة
تبيه يجابلها وتبيه يوخر

بالنهاية هم بتتحلطم
وماكو احد عاجبه حاله
ومع هذا الحب موجود هناك في مكان ما
ولا جان ما قالت خل اروح له قاعد بريحاته

يعني حنت لوجودها حواليها
وعلى فكرة الريال لين بغى يطلع مع ربعه او يلعب كره ما ينطرها تقوله
او تقترح عليه

وفي شغلة صغييييييرة غابت عن بالج
الحريم بينهم وبين بعض يخافون من الحسد
فلما تسمع فلانه في نقص بحياتها بتقول حتى انا
كله عياره ويور

تصدقين حتى لو تتعلم شلون تحاوره
من غير ما نحس احنا مع الوقت نتغير
ومع زيادةالحمل والمسؤوليات حتى الإهتمامات تبتدي تاخذ منحى آخر

ومثل ما قالت الزين
شوفي اهتماماته وكلميه بمواضيع تثيره عشان يتكلم

كل وحدة تعرف مفاتيح زوجها
بس السالفه يبي لها شوية تعب

على العموم هذي قضية ازلية
انكتب فيها كتب
شلون توصلين لعقل زوجج وتحاورينه

سعيده بوجودج دائما
:**

حسافتج يا كويت يقول...

لا واللة لا الله من لامج

كلامج على عيني وراسي

لا وانا اشوف ان الريال يتعب مخة وايد والمراة اتعب جسمها وراحتها
الريال يفكر بالمستقبل والمسؤولية وايد علية وووووو

اما المرة تتعب بالحمال والولادة وبالتربية والسهر

الزواج مشاركة والمليان يدلؤ عالفاضي

وكافبي المرة تمر بمراحل ومتغيرات الريال ما يمر فيها عشان جذي مايفهمها

وشوفيني انا اكتب هالكلام وساعات لا صار واللة ما افهمة


ترى عالم المراة صج عالم غريب
واللي مصبرنا علية هو انا ما نقدر نستغني

والزواج احسة مثل بطل الماي اللي فية فتحتيت فتحة فيها عسل والفتحة الثانية فيها خروع

الشاطر اللي ايي عطشاااااان ويوقف قبل لا يشرب وتمعن ايهو العسل ؟؟ ويشربة
أما بالنسبة للحياة الزوجية فماكو احد كامل

بس الدنيا تمشي والشاطر اللي يطلع من الهنيا او هالزواج باقل اخطاء

7osen يقول...

خووووش حوار زوزو

تصدقين حتى انا ربعي المتزوجين ما عندهم إلا يتشكوون من زوجاتهم

ههههه مساكين تشوفين شكثر متشمت فيهم وأتطنز عليهم

يعني لما نتيمع بالويك إند أول ما يدق تليفون أحد منهم أعرف إذا زوجته من ويها تلقينه أعتفس وضاق خلقه ههههه

والله حالتهم حالة
ولا بعد إذا بنطلع مكان لازم أسألهم جم النسبة اليوم ،، نسبة الموافقة على الخروج
ههههه

يعني حالتهم حالة هالمتزوجين

الحياة الزوجية واايد صعبة تحتاج تفاهم وتضحية وتقدير من كل طرف للثاني واهم شي فسحة الحرية يعني مايصير أي احد يسلب حرية الثاني

وأخيراً الله يرزق بالزوج الصالح إن شاءالله

تايهه في بحرها يقول...

سلالالالام ..

اولا .. زيونة احييج صراحة على هالاسلوب الرائع والاكثر من راقي اصفق لج صرااحة جكجكجكجكجك >> صفقه خخخ

ثانيا موضوعج طوييل وسالفه ماتنتهي والحوار ماعلييه كلام كل اللي انقال صح مية مية وبعدين لو بنتكلم وبنتعمق فهالسالفه بيطلع الصبح وانا مابنخلص ..

بس كل اللي ابي اقوله ان الحياة الزوجية بحر ماله نهاية الشاطر اللي يقدر يكون ربان يعرف شلون يدير سفينته لي شاطي الاستقرار وكل شخص سواء ريال ولا مرة يقدر على هالشي مو مخصص على واحد منهم بس علينا نسوي شي واحد الا وهو سياسة الهدوء وانفتاح التفكير متبل بشوي من الرومنسية وكل شي انشالله بيكون تمام التمام ..

ماحبيت اطول لاني بهذر ولاني بساكته خخ
:)))) وتقبلي مروري حياتوو ..
تايهه في بحرها

الخيلاء يقول...

واي الزين هذا الحوار دايما ايصير

بينا العزاب و بين الصديقات المتزوجات P:

قلب طفله يقول...

حواااااااااار واقعي

و ياكثر الحريم من نمونة سبيجه

و حصه و البنيه اللي ضايعه بينهم

الزين يخرعونج من الزواج و حتى مجرد

التفكير فيه لووووول

بس اللي يحيرني الحريم لما يكون ريلها يمها و معاها ع الحلوه و المره تمل منه و تقول ابيه يفج عني شوي !!
و اللي هاملها و ما يدري عن هوى دارها تشكي منه و من اهماله .

وقت يمعة الحريم كل وحده تذم بالريل و الحياة الزوجيه مع ان بعضهم مافي اسعد منهم يمكن خوف من العين و لا بس حشرا مع الناس عيد !!!

بس المره السنعه تكسب ريلها لو كان موده غريب عجيب و هم الريال الكفو يكسب مرته و يراعي الله فيها .

بس مع وجود هالحوار في ناس سعيده بحياتها و راضيه بالمقسوم و ربي يتمم على الجميع و يسعدهم .


تسلمين يا الزين و كل

ما تكتبين زين على زين

دمتي بحب و سعاده

U-Turn يقول...

طرح متميز

وموضوع حلو :]

لوووووووول اما حصه بدعت خفيفة طينه :]
الله يعيينج شكلهم شيبوا راسج بهالسوالف وخرعووج ..,,

ومثل ما يقولون الزواج سلاح ذو حدين:P


بس الصراحه يسلم إييدج على هالبوست
لو كنت مفكره إني أتزوج الحيين هونــت
:p


يعطيج العافيه على هالحجي الزين

البمبره يقول...

احلى شي في الموضوع ان فرشةاسناني يم فرشة اسنانه والله وصف ما يخطر على البال بس الي ما يدري يعوف الموضوع صج بس تدرين ترا كل بنات الكويت عارفين هالشي وما يردهم لأن يشوفون امهم واختهم وخالتهموجارتهم عايشين بنفس الطريقة. والسالفة ماشية وهاذا ملح الحياة.
بس بيكا اسم دلع حلو
تسلمين لي

mtfa2el يقول...

حصة هذي المفروض تنشات على تحبيطاتها
اللي بيركز على السلبيات ما راح يشوف الا السلبيات
الإيجابيات دايماُ أكثر بس نحتاج نشوفها
نحتاج نكثرها مع الوقت
نحتاج نعرف ان السلبيات موجودة بس مهمتنا نقللها
لأنه هذي اهي الدنيا
محد يقدر يعيش احلام وردية على طول

ClOuDs يقول...

عزيزتي الزين :)

حوار رائع و واقعي جداً

بيني و بينج احنا يا الحريم نموت عالتحلطم.. أحس اذا ما تحلطمنا و شكينا ما نعيش .. ننفجر.. فتشوفين كل ما صار حق وحده مشكله مع زوجها راحت شكت حق أمها أو اختها أو رفيجاتها بس لأنها تبي تشكي.. تبي أحد يفهمها لأن الريال ساعات ما يفهم المره..


و بالنسبة لسالفة بيكا و حصيصه .. أنا أشوف ان الريال لازم يكون بين هالنموذجين الحلوين هذيله :)
يعني..
يطلع و يروح و ايي بس باعتدال .. يعني مو 24 ساعه بره البيت و ما يدري عن الدنيا و لا يكون 24 ساعه بالبيت قاعد مجابل مرته ما يخليلها فرصه تروح و لا تيي و لا يعطيها فجه تجابل روحها .. لازم يفج عنها شويه عشان توله عليه و اهو بعد يوله عليها

و ما فيها شي اذا حددولهم يوم بالاسبوع يطلعون فيه بروحهم بدون اليهال و يوم يطلعون اليهال و يوم أو يومين يطلع فيهم الريال بروحه عاد كيفه بيروح ديوانيه بيطلع مع ربعه كيفه.. ويوم زواره و جذي..
أنا بصراحه هذا الاسلوب اللي متبعته مع زوجي و مرتاحه جذي لأني أدري يوم الثلاثا و اليمعه يروح الديوانية و الخميس و اليمعه أنا أزور و السبت نطلع مع الصغيره و باجي أيام الاسبوع فري D:

آسفة طولت عليج :)

إلى اللقاء ^_^

Najmah يقول...

زيون
يعني انتي حاسة بوضعي
انا عايشة نفس دور الزين بالضبط
كل ما رفيجاتي تكلمواا
اقولهم سكتوااا عقدتوني بالزواج
والله احنا المساكين محسودين على ولا شي :Pp

Sn3a يقول...

الزين
احب الحوارات الصجيه
اللي مافيها مسلسلات وافلام

الرياييل كل واحد فيهم يمثل معادله خاصه
والمعادله فيها ارقام وكل بنت عليها تفهم معادله الريال
(بنت هندسه ماتعرف تكلم الا بهالطريقه) ماعليه اعذرينا

بنت تتشكى ان ريلها موجود ومو موجود
يسمع بس ما (يستمع)
الثانيه تحاول تقنعها ان (فكه ) احسنلج
بس بنظري
الثانيه هم تشكي من الموضوع
بس اهيا ماهمها او يهمها بس تخجل تقول

بس تدرين
محد بيخليه يسمع غيره اهيا
احس مافي نصيحه تنطبق على الرياييل

كتاب الرجال من المريخ ابدا ما ينطبق على الرياييل
بس ينطبق على البنات بطريقه غريبه

تسلمين

ShLaLaT يقول...

الزينه



مو بس يخافون من الحسد
الكويتيين بطبعهم يحبون يتشكون

شوفي بكل قعده لازم يفتح حوار للتشكي بالنسبه حق المره والريال


انا اقول المفروض ما يتشكون عشان يبينون للناس ان حياتهم مثاليه
وهذا اهو السنع
مو يروحون ويخرون الأكو والماكو وجنه الزوج عدو لدود
او المره مصيبه !!


ارد واقول الكل يبالغ

الزين يقول...

حسافتج ياكويت

عداك العيب ياخوي

كلك سنع وعقل ماشاء الله عليك

الله يحفظ لك ام الزين ويبلغك بالزين قول آمين

بـابـل يقول...

اللي آنا اعرفه إن الريال مخلوق نظري مو سمعي .. يعني عشان يلفت انتباهه الشي لازم يشوفه لازم تستفزين النظر فيه أول



صباح الورد


صح لسانك يالزين صج الريال مخلوق نظرى
مو سمعي:)

حوار نسائي طبيعي ويدور بكل مكان

ونصيحة مني ونصيحة منك تمشي الحياة ونحل مشاكلنا بالود والمحبة

الله يسعدك يالزين تستاهلين كل خير ومحبة



وبس


بابل

hamdool يقول...

قاعد أتخيّل قعدتكم و هذرتكم
جنكم دعاية العيايز مالت

خوديها .. آخرها أطيبها

p;

الزين يقول...

حسين

تسلم لي ياخوي
اهم شي انه عجبك

تدري اهو اصلا التشكي صار من طبعنا احنا الكويتيين

ما نعرف ما نقعد ونتحلطم ونتشكى
تهقا من الحر؟؟

حرام عليك حسين لا تتشمت
باجر انت بتتزوج وبتصير واحد منهم
لا تستغرب ولا تستبعد
اصلا هذا داء تصاب فيه من غير ما تحس
جك بم ولا انت مسلم الخيط والمخيط لها

وتيي بعدين تشكي لي
:))))))

ما اتصور انها صعبه
ماكو شي صعب الا اللي نصعبه احنا ياحسين

اهي بس يبي لها تعب شوي
انت عشان تحصل على اللي تبيه لازم تبذل جهد زياده

احنا نبي كل شي على البراد
ومثل ما قلت فسحة الحرية وااااايد مهمة

وحيا الله حسين
الا بقول لك شفيك مكسل
ماكو بوست يديد؟؟؟

الزين يقول...

تايهه في بحرها

سلامين أهلين ومرحبتين

مشكورة وايد على التحية والتصفيق
:)

خل اقول لج شي
ماكو قاعدة موحدة تنطبق على كل الأزواج
وكل حاله لها وضعها
فاللي يتطبق على فلانة مع زوجها مو بالضرورة يصلح حق علانة

وبعدين الحياة ما تستقر على حال
يوم فوق يوم تحت
ويوم بالنص

احنا لازم نكيف نفسنا مع الظروف
ونحاول نطوعها عشان المركب تمشي
والمرونة مهمة بهالناحية

الهدوء وانفتاح التفكير مع شوية رومانسية وانتي صاجة

بالعكس هذري

يازت لي هذرتج

وحيااااج الله

:)

الزين يقول...

الخيلاء

لاحظتي ... يعني ما يبته من مخباتي

:)

بس ديري بالج لا تتأثرين فيهم
كل حاله ولها وضعها

ومبروك على القبول بالماستر
فرحت لج يالشيخه
ومثل ما قلتي الفال حق استكانتنا

مرورج اسعدني

:**

الزين يقول...

قلب طفلة

أثني على كلامج كله
عداج العيب

اهم شي الواحد ما يتأثر بوجهة النظر السلبية
ويشوف الإيجابيات

يازينج ويازين حضورج

:**

الزين يقول...

U-Turn

الله يسلمج حبيبتي
حصة طينتها خفيفة
وعسولة حيل

بس بقول لج شغله
ترى الشخصيات اللي بالحوار شخصيات وهمية
انوجدت براسي وبس
مالهم وجود اصلا
والحوار ابد ما صار الا في خيالي
اتمنى اني كنت واقعية فيه

لااااااا

شتهونين
انتي ركزي على الإيجابيات اللي قالتها بيكا

صدقيني كل شي له جانب شين وزين
احنا اللي علينا مثل ما يقولون نحط الحلو فوق المر ونكمل

:)

وحياج الله يالشيخه

الزين يقول...

البمبرة

حيا الله اهل فيلجا
اخييييه ياحلوها يا حلو بحرها وريحتها
لما الحين تروحون؟؟

احنا نروح نحدق حواليها
وساعات نبندر هناك
تبين نويبية حدقي هناك
والأيام الزبيدي حلالي
والكراف عجيب

انا شكلي شطيت بعيد
بس والله احبها
ولو يحصل لي بيت هناك جان من زماااااان هادة الديرة

:)

نرجع حق موضوعنا

فرشة اسناني يم فرشة اسنانه
هذي نظرة واقعية بحته
الوصف بسيط بس يبين لج حجم المشاركة بالحياة الزوجية

وعجبج اسم بيكا
:)))

ايه ويامالج من خرابيطي

البمبرة
اول زيارة لج
واتمنى ما تكون الأخيرة

:**

الزين يقول...

متفائل

هااااو ليش تبي تشوتها
حرام عليك
البنت ما قالت شي
وبعدين الضرب مرفوض
والعنف ما يصلح وما يمشي عندنا

صح كلامك الوردي مو دايم
والألوان متعدده
والقلم بيدنا
نرسم ونلون براحتنا

ولا تهدد بالطق مره ثانية
ادري فيك مسالم

:)

وحيا الله متفائل

الزين يقول...

ClOuDs

غاليتي
شهادتج بواقعية الحوار اعتز فيها جدا
خصوصا ان واضح من كلامج انج متزوجة
وعارفة الوضع شلون صاير

ومثل ما قلتي المفروض الريال يكون بين هالنموذجين المطروحين بالحوار
بس هذا ما يعني انه النموذج الصح غير موجود
بالعكس موجودين والله يكثرهم
انا بغيت اسلط الضوء على النماذج اللي ممكن تكون سلبية نوعا ما

وعلى فكرة خوش جدول اللي انتي حاطته
عجبني

;)

حياج الله وساعة المباركه
وجودج في مودنتي اضاف لرصيدها الكثير

اتمنى اشوفج مره ثانية

الزين يقول...

نجمة

تفاءلوا بالخير يانجمة
لا تخلين كلمة توديج وكلمة تييبج
ومثل ما اكو الشين اكو الزين

:)

وهذا طبع الآدمي دايما يركز على السلبيات

ولا ليش نزلت الآية اللي تقول واما بنعمة ربك فحدث
لأن احنا اصلا ما نتكلم على الزين
بس نتحلطم على الشين

ومن ناحية محسودين ايه والله محسودين
واللي يدري يدري
واللي ما يدري شيقووووول

وحيا الله نجمتي
:**

الزين يقول...

سنعه

هلا وغلا
يازين من زارنا


الرياييل كل واحد فيهم يمثل معادله خاصه
والمعادله فيها ارقام وكل بنت عليها تفهم معادله الريال

عفية عليج يبتيها صح

كتاب الرجال من المريخ ابدا ما ينطبق على الرياييل

لااااحظتي؟؟؟

تدرين ليش
لأن كل ريال عالم بحد ذاته
تحتاجين تكتشفينه بروحة
وتحطين قواعدج على اساس شخصيته

ماشاء الله علي
اصلح صح
:))))

يسلم عمرج يارب ويخليج

الزين يقول...

شلالات

:))))
بقول لج شي بس لا تزعلين بلييييز

انتي وايد محتره من الموضوع صح
احسج باطين جبدج الثلاثه منهم

وانا معاج الحياة الزوجية لها قدسيتها
ومو كل شي ينقال

بس بعد شتسوين
حريم

:**
ياحبي لج شكلج عصبيه ناااار
ومن ربعي

البمبره يقول...

حوار حريمي بحت واحلى شي سبيكة صارت بيكا.
هذا الوضع طبيعي جدا في ديرتنا وما يمنع من ان البنات يبون الزواج يعني ميش مو ماميش

الزين يقول...

البمبرة

ميش ليش لأ

ايدي على ايدج
نمشمش يميع

:)))

فتى الجبل يقول...

يا يبه الريال مايحب الحنة
يحب الحجي المختصر وبس

charisma يقول...

:)

يحلو الحوار

طول ما انااقرى الابتسامه ما فارقت ويهى

:)

هذى سنة الحياة
محد مرتاح يالزين اهم شى ان يكون الريال يخاف الله فيج حبيب وطيب

والباجى ايى بعدين الكل يذمر محد عاجبه حاله ههههههه

قولى امين
يا ربى نفرح فييج والله يكتبلج الخير والصالح :**

الزين يقول...

فتى الجبل

:)

اوكي وصلت المعلومة
مشكور على الزيارة
والإفادة

الزين يقول...

كاريزما

مافي احد مرتاح
وكل واحد همه على قده

صح؟؟

طيب وولد حلال ويخاف الله فيج
صح يا كاريزما
انتي صح

مشكوره على الدعوة
ربي يفرح قلبج ويسعدج يارب
:**

kAiKa-MGroMa يقول...

looool

حصه تشوق وتوّنس :>

وصج الحياة الزوجيه صعبه بس المره اهي اللي تشكر الريال ومنها اهوا يصير يا مفترس يا مليق يامراقب يا فيلسوف يا طبيعي مثل ريلي ^-^ ..