.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

20.5.08

ايميل .. ومواصفات الزوج المثالي بعين ست الكل الكويتية


دخلت غرفتها

قطت جنطتها على الصوفا

حذفت صندلها ذاك الصوب

وفلت شعرها وانثرته كأنها تنفض تعب اليوم عن ذهنها

قطت عمرها على فراشها ... تنفست بعمق

غمضت عينها ... وسرحت

فتحت عنيها .. شغلت الراديو .. دندنت مع الأغنية

سحبت اللاب توب

فتحت صفحة مدونة الزين تقرا جديدها

"مواصفات الزوجة المثالية في عين الرجل الكويتي"

فتحت صفحة الإيميل وكتبت

عزيزتي الزين

موضوعك أثار الكثير من التساؤلات في ذهني وأشعل فتيل التمرد في داخلي وأيقظ كل ما أطفأته من جموح لمشاعري بالفترة الأخيرة.

من أعطي الرجل الحق بأن يملي شروطه بالطريقه المجحفة هذي بحق كيان وتفكير وعقلية المرأة .. كيف يجرؤ أن يراها بتلك الطريقة .. شلون ما عندهم ادراك ان الشكل ينشبع منه بس الفكر هو اللي يشحذ المشاعر وينميها ويغذيها وينعشها .

شلون صاروا شبابنا يفكرون بهالطريقه ... يبون وحده مثل الطبل صيتها عالي بس من داخلها طبل فاضيه ... هذي شكثر بتم وياها وتنبهر بجمالها ... اوكي انا معاهم ان الله جميل يحب الجمال .. بس الجمال مو بس بالشكل .... الجمال له مقاييس كثيرة ... ادري الحين بيقولون هذي اكيد جيكرة عشان جذيه مو عاجبها الكلام .. بالعكس انا ابعد ما يكون عن الجكر بس ارفض تماما اني اقيم على اساس شكلي .. لسبب واحد اني احمل من الفكر والقيم والمبادئ والثقافه ما يعادل قطيع من اشكال أشباه الرجال .. اوكي أنا محتده شوي .. ويمكن تكون ردة فعلي شوي مبالغ فيها ... بس لي متى نرضى بمثل هالنظرة المتدنية لنا احنا البنات ... هل لازلنا جواري نباع ونشترى على اساس الجمال؟؟؟؟؟؟؟

ليش مصيرنا مرتبط بكلمة رجل ... ليش لازم نمر ونعيش تجارب عاطفية فاشلة وبالأخير نرضى بالنصيب .. ليش البنت تعتبر مثل الفاكهه الموسمية مرغوب فيها لعمر معين وعقب ما تعديه تنحط على الرف .. وليش لازم الوحده تتزوج .. واذا ما تزوجت قلنا مسكينه عانس .. وليش المطلقة تنتهي حياتها ... وليش المجتمع دايم يلوم البنت على فشلها بحياتها الزوجية؟

الحين الوحده لما يتقدم لها واحد ما ينبلع شكله شيقولون لها؟ الرجال مخابر مو مناظر ... يعني اهم مهم عندهم الشكل بس احنا لأ مو مهم !!!!!!!

اوكي الزين ... تعالي نتكلم بنفس منطقهم ... بالله عليج واحد أمه معتله فيه وخواته ينحاشون من شكله وربعه قاصين بثقل دمه .. انا ليش آخذه ... عشان مخابره؟؟؟؟ ولين انصك علينا الباب وتجابلنا شسوي بالمخابر ... وازيدج من الشعر بيت ... عنده روحه موت ... يدور على الحلاة .. واهو كلمتين سنعين ما يعرف يقول ودج تقولين له ارحم الله والديك اسكت .... احس اني قاعدة أغلي ... وتدرين شنو اللي يحر أكثر .. انه يتشرط اذا بغى ياخذ كويتية ... بس لين انعمى على عينه وخذا اجنبية لغى هالشروط كلها ... وخذا له وحده حيا الله تطبخ له وتييب له عيال وتربيهم له ... وياليت على جذيه .. آخر شي تاخذ عياله وتنحاش منه .

واحنا ناخذهم ونسنعهم ونداريهم ونداري اهلهم .. ونكون الصدر الحنون والأم الرؤوم والحبيبة والطبيبة .. والزوجه وآخر شي مثل العومة ماكولة ومذمومه ... يقعد بالديوانية مع ربعه يذم فيها ... واذا دقت له تليفون ... صار عليها عنتر جدام ربعه عشان يقولون رياااااال عفية عليه.

لو بقعد أقول وأعد ما راح اخلص .. يالزين احنا في مجتمع ذكوري ما يرحم ... مصيرنا بيد رجل ... أب .. أخ .. زوج .. أو حتى حبيب ... فهم صحيح لعلاقة الرجل بالمرأة ماكو .. منعدمة ... حتى القوامة فسروها غلط ... وما ابي ادخل بمتاهات الدين عشان لا انرجم ... كافي تخبيصي اللي فوق.

في مجتمع مثل هذا بتظل المرأة تشترى وتباع مثل السلعة الرخيصة أو الغالية بحجة الزواج . للأسف رغم التعليم رغم التطور الفكري والثقافي ... لازالت المرأة يساوم عليها بحجة الزواج .... أنا ما أعمم الوضع ... بس ما نبي ننكر أنه موجود.

وبالنهاية عقب عاصفة البوح هذي كلها ابيج تبردين قلبي وتحطين مواصفات تعجيزية مثل ما اهم حطوا وابصم لج بالعشرة .... ماراح يتطابق مع شروطنا حتى واحد.

ادري طولت عليج وخربطت وايد واحتديت اكثر بس والله من اللي فيني

شاكرة لج اتاحة هالمساحه لي من الفضفضة النسائية...:)

***************

قريتوا .....

لا أحد يغلط على البنت قلبها مليان ...ملياااااان .... ويفيض مثل الوديان

وبناء على طلب الجماهير الغفيرة نستعين على الشقا بالرحمن ونبلش بموصفات عريس الغفلة:

أن يكون طويلا مثل ماثيو ماكونهي

جذاب مثل هيو جاكمان

وسيم مثل جوني دب

له صوت جورج كولوني

مفتول العضلات شنكول الحركات شلولح مثل ما قال عادل امام

(ترجمة شنكول وشلولح عند اخوانا المصريين)

حنون مثل مكدريمي في Grey’s anatomy واللي ما يعرفه ينزل المسلسل من النت ويتعلم منه

وخفيف الطينة وشيطون مثل مكستيمي هم بنفس المسلسل يااااازينه

وان يكون لماح وشديد الملاحظة والذكاء مثل المحقق كونان

أن يكون شديد العزم ذو ارادة مثل جون سميث حبيب بوكاهانتس

أن يكون له ابتسامة جود لو

وطريقة كلام راسل كرو

أن يكون مقداما جسورا مثل توم كروز في مهمة مستحيلة

أن تكون سيارته آخر موديل بس بدون اقساط لو سمحتوا

أن يكون متحدث مثل طه حسين روحاني مثل جبران ورومانسي ويعشق المرأة مثل نزار قباني

أن يملك شاليه او شقة بره واذا ما صار على الأقل مزرعة بالوفرة

ان يعمل بقطاع خاص او مؤسسة حكومية عشان معاشه يكون راهي

أن يعرف كيف يطبخ واذا ما يعرف خل يجابل قناة فتافيت ويتعلم

أن يكون ستايل بس بدون مبالغة والا شكينا بأهليته كرجل خصوصا ان هالنماين كثرانين فما نبي تمويه اذا سمحتوا

يفضل أن يكون يتيم وخواته متزوجات منعا وتداركا للمشاكل

ان يكون كريما معطاءا مثل الملوك

رقيقا منكسرا امامها كالصعلوك

أن يعرف أصول التعامل والأتكيت عشان لا يفشلها بالمحافل والمجتمعات

أن يتقبل أن يكون عندها أصحاب وأصدقاء من الجنسين بدون ما يشتغل عليها بنظام غيره وأصول

أن يكون عنده استعداد يجابل اليهال أثناء غياب الماما وبدون تذمر

ويشاركها بواجبات المنزل بدون ما يقول لها أنا الريال وهذا شغل الحريم

أن لا يتابع القنوات الغنائية وما تصير عيونه بقمة راسه اذا شاف هيفا أو نااااانسي

وخاصة قناة غنوة

أن يستمع إليها كشهريار حتى يطلع النهار

أن يبحث عن الأشياء اللي تهمها ويعرف نوعية هالإهتمامات عشان يعرف شلون يوصل لتفكيرها ومن ثم أكيد قلبها

والحواااار.... الحوار... يعرف شنو اهمية الحوار ... ترى يا فلان الحبيبة ما تشم على راحة ايدها وعندها البلورة السحرية عشان تعرف انت شلون تفكر أو شنو يرضيك ... جرب تصارحها وتقول لها شنو اللي يسعدك وشنو اللي ناقصك ... وبعدين تشره أو دور غيرها بره

وحط في بالك الزواج الثاني مبدأ مرفوض وإنسى سالفة أن الشرع حلل أربع

ولازم يكون في شوية ابداع وابتكار باختيار الهدايا وبسنا عطور شبعنا

ومو كل ما بغيت تتحلى عليها قلت لها لبسي أحمر ؟؟؟؟؟ @@ خلصنا عاد راحت موضة الأحمر غير بالألوان لو سمحت

ولا يقول لها سوي مثل زوجة فلان أو صيري مثل بعلة علان لسبب بسيط أنت بعد مو مثل فلان ولا تعرف تسوي مثل علان

ولا يقعد يركز على عيوبها وينسى ان اهو بعد فيه عيوب وسبحانه ربي كلنا بشر يعني بعدنا ما صرنا ملائكة

وأخيرا لا يقول لها طبخي مثل أمي أو لبسي مثل اختي .... اصحى يابابا أهلك شي وآنا شي ثاني

بالنهاية في شغلة مهمة لازم يعرفها الحبوب والحظيظ اللي بياخذها .... اهي تحبك ترى بس بالمقابل انت بعد حبها ولا تاخذها بالضمان .. لأن محد يضمن احد

الزواج والسعاده يبي لهم شغل ... شغغغغغل مثل ماقال عبدالحسين عبدالرضا

اتمنى كلامي كان خفيف عليكم




تنبيه: العنف بالكلام او العنف الجسدي مرفوض بتاتا فننصحكم بالإمتناع عنهم لأن ممكن يحوشكم مثله بالمقابل

ايه وتنبيه ثاني : البوست مو بالضرورة يعبر عن رأي صاحبة المدونة فرجاءا (ن) شوي شوي علي ولا أحد يسبني

فوتكم بعافية

:)

هناك 52 تعليقًا:

حسافتج يا كويت يقول...

لحظة نسيتي شي مهم؟؟!!

يكون عندة إخت مثل الزين عشان يفتخر فيها



مساج اللة بالخير

أغط اشوية الاقيج مشلخة الريايبل بالبوست اللي طاف؟؟

5roofa يقول...

تصدقين كسرت خاطري احس قلبها صج متروسه لول

ليش مصيرنا مرتبط بكلمة رجل ... ليش لازم نمر ونعيش تجارب عاطفية فاشلة وبالأخير نرضى بالنصيب .. ليش البنت تعتبر مثل الفاكهه الموسمية مرغوب فيها لعمر معين وعقب ما تعديه تنحط على الرف .. وليش لازم الوحده تتزوج .. واذا ما تزوجت قلنا مسكينه عانس .. وليش المطلقة تنتهي حياتها ... وليش المجتمع دايم يلوم البنت على فشلها بحياتها الزوجية؟

بس هالجملة يابتها صححححححححح

صج احيها على الي قالته لول بس حرام تره مو الكل عشان لا يقولون شريرات صرنا

-----------

الحين على فارس احلامي الي قلتي مواصفاته لوول



واااااااااااااااااااي والله زاغ قلبي علي

ولا انه نفس مكدريمي

وماكستيمي

و صوت جورج كلوونيي

يااااااااااااااربي البي البي لوووول

صججج نبي جذي يسمع و يسولف و يخليني يا دهينه لا تنكتين ضروري اخذ واحد و اسوي جذي
و لازم يشعر فييني نفس نزار
و يغنيلي نفس عبدالحليم بعد
حدي عشت بحلم وردي لول

ياا اناااااا يا اهوو لوول شرايج فيني لوووول
p;

merci ya 7elwaa

salamz...

ShLaLaT يقول...

لوووووووووول الزينه


شوفي شرط ان يقبل ان يكون لها اصحاب من الجنسين انا مابيه


شروطي مو وايده

ابيه مصلي مسمي وصلاة الفير والمغرب بالمسيد
ابيه يغار علي غيره معتدله
يبوس راسي كل يوم قبل ما انام
ينطرني لما انام بعدين ينام
ما يخليني اشوف تلفزيون بروحي
ابيه يشلخني تلفونات
ابيه يصارحني بكل شي فأنا ولله الحمد متفتحه
ابيه يعرف اني ما اعرف اطبخ ولا ابي اتعلم وحدي حدي بيضه
ابي اسكن ببيت اهله اخاف اقعد ببيت شكبره بروحي
ابيه يعشق السينما ومتابع جيد للأفلام الهنديه
ابيه الكلام الحلو على طول على لسانه
ابيه يدللني كالطفله
يحميني كالشي الغالي
ابي احس ان لي ظهر وسند اذا كان معاي
ابيه اطول مني .. امتن مني بس بدون كروش


اتوقع هذا كافي .. واذا نص شروطي توفرت اكون مقتنعه فيه
وبالأخير الزواج نصيب ما اقدر احدد الشخص على الشروط اللي حطيتهم
بس تقدرين تقولين هذي امنيات اتمنى توافرها بزوج المستقبل ان شاء الله



والله يرزقنا الزوج الصالح

صالح..للشعر يقول...

الزيييييييييين

بما اني اول واحد اعلق
وبما انج ما رديتي على تعليقي اللي طاف
سامحيني راح اطول
بالنسبة للرساله،، انا حطيت نفسي بمكانها ودمعت عيني شوي
صح ما تنلام،
بس هم هذا هو المنطق، يعني ما يصير اقعد انا بالبيت والبنت تخطبني، مع ان ودي:)
وبالنسبة للمواصفات الرجالية
آآآآآآه
صعبتيها علينا وايد
وامثلتج كلها ممثلين مايسوون بيزه بالنسبة لي على الاقل
وبعدين عادل امام يقول شلولخ مو شلولح

يكفي الرجل القوة والشكل المقبول والذكاء والكاريزما الثقافية والاطلاع
وقدرته على الكلام وايصال مشاعره صح
سمعتي
صح:)

موضوعج وااااايد حلو
بس اللي يسهل على الناس الله يسهل عليه

باي

الزين يقول...

حسافتج ياكويت

انت ويييييييييييينك

اكيد زيون مليهتك يازينها زييينااااه
وشلون أم الزين

الله يحفظكم يارب بس والله لك وحشه
وفريه هاااااااالكبر

ايه ايه شفت شلون قلبت على الرياييل
:)))))

نتحرش شوي ونتشاقى عل قولة اخوانا بالشمال

بس بالنهاية نرجع على طريقتنا

واذا تبي الصج مالنا غناة
:)

شوفتك اليوم بمليون دينار

Najmah يقول...

الايميل يعور القلب
..
تصدقين
كنت ناطرة هالبوست وخايفة منه
:P
الشكليات تروح والطبايع تبقى
المهم يكون شكله عادي متقبل
ويكون صج ريّـال
يتحمل المسئولية
وشخصيته قوية (طبعا قوة الشخصية بمعناها الحقيقي مو بالعصبية والمنع)
مرن وسمح بالتعامل
تدرين شنو المشكلة
ان (غالبا) الريال الكويتي مايتكلم عن مشاعره
والبنت تبي اللي يسحرها بكلامه الحلو ويدلعها ويعبر لها عن حبه
صدقيني اذا لقت هالشي راح يصير طوله وقصره وصوته و .. و .. شي هامشي حيل
والرسول عليه الصلاة والسلام قال
دينه وخلقه :))

5:20 يقول...

كل شي بالدنيا نصيب

ماكو ريال كامل ولا مراة كاملة

بعتقادي مهما خذيت اي انسانة طبعها شين او زوجة خذت انسان طبعة شين بالنهاية اللي يبي يعيش يتكيف مع اللي جدامة وإذا صار اللي جدامة يستاهل واللة مو اغير اطباعي بس إلا اغير حياتي بكبرها


بس وين اللي يستاهل


بوست جدا راقي وينم عن رقة احساس من كتبة

الزين يقول...

خروفة

ايه حتى انا كسرت خاطري
احنا البنات مساكين ونكسر الخاطر

ومحنا شريرات احناطيوبات وبسرعه ينقص علينا

كلمتين طيبين وطاح الحطب يا قلبي

ههههههههه

شفتي المواصفات الخطيره
يختج انا ابي مكستيمي وبخلي لج مكدريمي

أخييييييه بس اخيييييه

انتي عجيييييبه طلعتي على هواي
:**

عاد تبين الصج ماكو احلى من جلحة وملحة الكويتي

يازينه

وهم شبابنا طيوبين وما ينعافون
:)

الزين يقول...

شلالات

يازين عقل بناتنا والله


خل ايون يشوفون
الوحده منا تتمنى وتحلم بس نصيبها هناك مكتوب بعرض السما
من قبل لا تنقط بحشا امها

انا اتصور اذا توفرت الأساسيات بيدنا نخلق سعادتنا

اهم شي الرضا والقناعه والحوار يكون موجود
ويخاف الله فيني ويداريني ويشوفني ست الستات

الباجي ايي مع الوقت
الحب وملحقاته

انا احب آخذ مشاعري بتأني وجدية وما استعيل واعطيهم اي كان
واعتقد انتي مثلي

ولا انا غلطانه؟

الزين يقول...

صالح للشعر

بما انك مو الأول وطلعت الرابع وبما اني تأخرت بالرد على تعليقك السابق
فلك حق تطلب من الزين اربع طلبات

بس هاااا مو طلبات تعجيزية
يعني خلك خوش ولد وعطني شي اقدر عليه

او ممكن يكونون اربع اسئلة
براحتك

:)

نرجع على التعليق

ايه والله ما تنلام والله يلوم اللي يلومها

تعال بقول لك !!

يعني مو لازم انا اخطب او انت تخطب

بس المفروض ان الشباب ياخذون علاقاتهم مع البنات بشكل جدي اكثر

ليش يقعد يعلقها معاه وتالي يقول حق امه اخطبي لي

اذا انت ضد العلاقات قبل الزواج وتبي تاخذ وحده اصلا ما تعرفها ولا تعرف شي عنها
ليش تأذي بنت الناس معاك وتخليها مثل البيت الواقف

حرام صح لو لأ

امثلتي تعجيزية
وما اعتقد في وحده عاقلة تكون هذي شروطها

انزين عاد شنو معناتها شلولخ
بس تصلح باللفظ

خلك مفيد وعطنا المعنى بالمره
:)

سمعت والله سمعت لا تصرخ باذوني
وكلامك عين العقل

وربي انا سهله
@@
اوكي ماني سهله بالمعني الثاني
هممممم

الكلمه كلها شكلها مو راكبه
:$
انت ليش مصعبني هالشكل

على العموم

مرورك ومشاركتك برايك اثرت معلوماتي عن الشباب والشبيبه

مشكور يالشيخ
ولا تغييب

ترى اسحب منك الأوفر

:)))

ShLaLaT يقول...

لا افا عليج مثلج
يقولج بالتأني السلامه

نتأنى بعد شورانا

بس اهو وينه ؟؟ P;

ManalQ8 يقول...

شلونج الزين

ان شاء الله بخير

الايميل ماكان طرحة غريب بالنسبة لي

هذا واقع


وعندي وجهة نظر بالنسبة للمقطع


.. بس لي متى نرضى بمثل هالنظرة المتدنية لنا احنا البنات ... هل لازلنا جواري نباع ونشترى على اساس الجمال؟؟؟؟؟؟؟


يعني الصراحة
البنت الي يعجبها لفت النظر

وانها تكون ملفتة

وحسب طبيعة الخلق

فان الله سبحانة وتعالى

خلق لكل انسان طبيعة وغريزة بداخله
الرجل يلفت نظرة الجمال اكثر من اي شيء في المرأة

والمرأة تعجبها رجولة الرجل قبل جمالة


اتوقع هذا ما يفسر سر مشاكلنا
وبالخصوص المشكلة التي طرحتها الاخت صاحبة الايميل


تقبلي تحياتي
وان شاء الله لم اكن ضيف ثقيل





موفقة
:)

صالح..للشعر يقول...

انا مو شيخ زين :)

فريج سعود يقول...

تبون كل هالمواصفات حق صاحبات الركب السود وين العدالة يا الزين ؟

ray يقول...

زيوون

البوست طماشة ;)

اللي دازة الايميل عجيبة
I salute her

و انتي اتيننين

و لا سالفة التمويه , صاجة :D

thats the second comment I post. I don't know whats wrong with this page.

sologa-bologa يقول...

الحمدلله
ولا صفة من الصفات موجودة فيني

لا شكلا ولا مضمونا
:)

يعني ما أصلح أكون زوج مثالي بعين ست الكل


اعتقد والله اعلم
إن كل الصفات ممكن تكون موجودة عند الشباب ما عدا صفة وحدة

إنه ما يتابع القنوات الغنائية
وما يشوف نانسي وهيفا
هذي اللي مستحييييلة


ودمتم بحب وود بمواصفات مثالية
:)

Lavender يقول...

"بالله عليج واحد أمه معتله فيه وخواته ينحاشون من شكله وربعه قاصين بثقل دمه .. انا ليش آخذه ... عشان مخابره؟؟؟؟ ولين انصك علينا الباب وتجابلنا شسوي بالمخابر"



هاهاهاهاهاهاهاهاهاها واااااي موتيني من الضحك !!!


ايييييييييييييييي واللــــــــــــه شســــــــــوي بمخابـــــــــــــــره !! ههههههههههههههههههههههههههه

PearL يقول...

وايد عجبني الموضوع

وايد عجبني راي الاخت في بداية البوست
وايد معاها حق


و وايد عجبتني المواصفات المطلوبة

افف لو نلقى واحد بهالمواصفااااات

بس وين نحصله

5roofa يقول...

لووووووووول مو يالزين لانه مالنا غير الجلحان

ولا ايوولج ابطال هالمسلسل و تبين اجلح لوول

لالالا و الف لاااااااااا

salamz sis...

Kuw_Son يقول...

ومو كل ما بغيت تتحلى عليها قلت لها لبسي أحمر ؟؟؟؟؟ @@ خلصنا عاد راحت موضة الأحمر غير بالألوان لو سم

هاهاها .. أهم شي هذا !!

أنا بعد هالمواصفات .. أضمن 90% من بنات الكويت تفكيرهم جذي !!

لا بالله تزوجنا !!

الخيلاء يقول...

الله الله يالزين شهالمواصفات فل اوبشن بس بزياده :)

يكون هين لين له هيبه و حضور اهم شي :)

U-Turn يقول...

لووووووووووووووول
ايي ايي عندج إياهم :p
والله بردتي جبدنا

والي البنت الي دازه الإيميل حبيت أشكرها
لأن كلامها مو كله صح بس فيه شي من الصحه برايي طبعا :]

بس بيني وبينج الحمد الله ان مو كل شبابنا عندهم هالمنطق :) وهالنظره للزوجه


والله بناتنا شحلوهم قنوعات وما يبون إلا إلي يسعدهم ويقدرهم ويخاف الله فيهم :)

بس ويينه هذا الي بيقتنع بهالكلام

بس بالمقابل ماكو واحد اييج رايت بالضبط نفس المواصفات ولا وحده نفس الي حاطها إباله

والواحد لازم يتنازل شوي
والعشــره والعمر بينهم راح تخليه يشوفها أحلى وحده وتشوفه فارس أحلامها :)


بوست ممتع ... ضحكنا شوي.. وفكرنا شوي .. وتساءلت شوي :)

تسلم إييدج
وعساج على القوة

the.thinker يقول...

:) ما أقول الا تسلم ايدج .. كلام رووعه وحددده من القلب :)

وهم الحلو انج (ظغطتينا) لوول والدليل .. ردود بعض الشباب =) كل واحد يقول انا مو جذي لووول .

يعطيج العافية وخيتي ^_^

esTeKaNa يقول...

يا صباح الزين
يا صباح الهنا
:)
تحية كبيرة لصاحبة الايميل
ودي اصفق؟
جكجكجكجكجكجكجك
حق صاحبة الايميل
:D~
اما حق الصديقه الناطعه ام الشروط العجيبه ففعلا بدعتي
زيون
انا لو القى هالمواصفات الجماليه كلها بشخص واحد راح اتدوده
اتم ساكته
!!
بسنا احلام يا زيون بسنا

يا يمة يا صديقتي
حلاته اجلح املح
كويتي حتى النخاع
قمة رومانسيته حجوة تطلع في الوقت الضايع
خفيف طينه
واي زيون
خف الطينه بروحه نعمه من الرحمن
:)))


زوقه البوست
واللي قبله عجبه
صار عندنا فريق بنات وشباب
:)



ترا قايمة من ذاك الفير وشابكة
وفاتحة بلوقج ولهانه عليج
يارب تكونين بخير
:**

قلب طفله يقول...

اسم الله على ست الكل الكويتيه

شروطها وايد سهله و متوفره

و ماكو احد احسن من احد

<< من يشهد للعروس :P

و صاحبة الايميل سطرت درر مو

هذا الواقع للاسف ..

تسلم ايدج زيووون بوستج عشره

على عشره يبرد القلب ^_*

بس لصبايا و للشباب كلن بياخذ
نصيبه و المقسوم له قبل يطلع على الدنيا لو اختلفت المواصفات كليا
عن المطلوب وقت الصج القسمه
و نصيب تتم :)

الزين يقول...

نجمة

اسم الله على قلبج من العوار حبيبتي

كنتي خايفة من البوست؟؟

ليييييش

البوست هذا مو أكثر من كسرة مود
والمواصفات لا تمت بالواقع بأي صلة

عديها سالفة شاي ضحى
نسولف ونضحك ونتسلى ونرجع بيوتنا حق واقعنا

:)
لا تاخذين كل شي جد يا نجمتني تتعبين تالي

اما عن مشكلة ان الريال الكويتي ا يتكلم عن مشاعره او بالأحرى ما يعرف يعرب صحيحه
بس اعتقد جيلنا احنا عنده قابلية يتعلم

وفي بوادر تبشر بالخير
:)))
ولا شرايج؟

شوفي اعرف وحده تموت على الحلاة وحاطه مليون صفه تعجيزية بالريال اللي بتاخذه ويحق لها اهي مثل القمر
تصدقين لما يت وحبت اللي حبته مافيه ولا صفه من المواصفات الجسدية اللي كانت شارطتها

حبت عقله يانجمه حبت روحه اخلاقه تعامله معاها ويمكن حبته اكثر لأن شافت شكثر شاريها ويحبها

ومثل ما قلتي اذا صارت الصجية ننسى كل هالمواصفات ...

بنات شنسوي

:**

الموضوع هذا لو بنتكلم فيه ما يخلص
انت تريد وانا اريد
والله يفعل ما يريد

سلام

الزين يقول...

5:20

ماكامل الا وجهه سبحانه وصح لسانك
كله نصيب

:)
بالضبط عفية عليك احنا لما نحب نتغير على حسب هوى الطرف الثاني من غير ما نشعر

الطرفين يبلشون يكيفون حالهم مع بعض
تلاقي كل الإختلافات تسقط
وعشان يمشي المركب وتتسهل الأمور
والأثنين منهم بيحرصون على رضا بعض وراحة بعض

لا تقول وين اللي يستاهل
اللي يستاهلون كثير
افتح بصيرتكم مو بس بصرك وبتلقى
ولا تنسى ان الطيبون للطيبات

ما قلت لي شنو قصة الأسم خمس وثلث؟؟؟

:)

الزين يقول...

شلالات

اييييييييه

هذا السؤال

وينه؟؟

الزين يقول...

منال الكويت

انتي وين اختفيتي
ولهت عليج حيل

شهالغيبة
امتحانات بعد؟

كلامج في الكثير من الصحه يا منال
ويعين الله


ولا تغيبين هالكثر مره ثانية ترى يصير عليج غرامه
:)

وابد منتي ضيفه
انتي صاحبةالمدونة افا عليج

بحفظ الله حبيبة قلبي

:**

الزين يقول...

صالح للشعر

:)

ادري انك مو شيخ
بس انا طبعي كل الناس عندي شيوخ باطباعهم واخلاقهم الزينه

هذا المقصد مو اكثر

:)

وهم حياك الله

الزين يقول...

فريج سعود

ويقولون ليش البنت تتشرط

يافريج يابابا يا اخوي
الملافظ سعد
اللسان الحلو والكلمة الطيبة تجبر الخاطر

وبعدين تعال بقول لك
الحين الشباب يتشرطون ويبون مثل البنت اللي بالصوره ما عليه

بس البنت تتشرط مايصير
نبلش ننتقدها
:)

اوكي بنات الكويت ركبهم سود
رياييل الكويت شعندهم غير الكروش

شهر زمان من يتزوج يكرش
يعني اهي تحمل واهو يحمل معاها
بس الفرق اهي تييب له ضنى اهو شنو اييب لها؟؟

:))))

اقول فريج
انت بتقول وانا بقول وما نخلص
بنت ديرتك اهي اللي تضفك وتعزك وترزك وتحفظك بغيابك

لا تصير عليها جاسي

وحيا الله أخيي فريج
مو عاد تزعل
تدري تمون تقول اللي تبيه بمدونتي
ومن غير زعل

الزين يقول...

ray

ريووووو
بعد قلبي من زمان عنج
تعالي انتي بشنو مشغوله لهدرجه؟؟

ايه ايه طماشه ويونس
ما تصدقين انا اكتب واتبوسم اتصور ردة فعل وردود البلوقرز واضحك

واللي دازة الإيميل قالت اللي بخاطرها
وكلنا نحييها

وانا اينن العاقل ادري
قالوها لي من قبل
:)))

وسالفة التمويه ترى صج
ابيه عندي لج سالفه على التمويه تغشين من الضحك عليها
وبنفس الوقت تقهرين
وما تنقال هنيه
بدزها لج ايميل وتطمشي عدل

وساعة المباركه ياقلبي اللي شفتج عندي

:**

الزين يقول...

لافندر

شفتي شلوووووون
اهي المخابر مهمه بعد هم المنظر لازم شوي يسر العين

تصدقين عاد
نوبة قريت قصه عن اعرابي كان جييييييكر ما ينبلع وزوجته مثله

دخل عليهم عابر سبيل وشاف ثلاث اطفال يلعبون يم بيت الشعر مالهم فسأل عابر السبيل الأعرابي هذولي من عياله كثر ما انبهر بحلاتهم وجمالهم

المهم رد عليه الإعرابي انهم عياله فرد عليه قال اكيد امهم ينحجي بحلاتها
رد عليه الأعرابي امهم هذيج اللي قاعده تحلب الغنم عشان غداك
التفت عليها ولا خسف

استغرب عابر السبيل وما استحى وسأله شلون انت هالشكل جيكر ههههه وزوجتك اجكر وتييبون عيال حلوين

قال له انا اعشق زوجتي بكل ما تحمله من عيب في الشكل وجمال بالجوهر وهي نفس الشي
واللي تشوفهم هذول نتيجة هالحب

:)
شففففتي

يعني صج الحب يصنع المعجزات
وفي امل بتحسين نسل الكويتيين
على شرط كل واحد يحب زوجته على عيوبها
والزوجه نفس الشي

:))

وانا رديت على تعليقج المختصر في بووووست

ما ايوز من هالطبع

سعيده بمرورج

الزين يقول...

بيرل

@@

حلم علم
انتي لج غطات عجيبه

بس دخلتج اليوم علي نوزع عليها حلو وقهوة

شوفي واحد بهالمواصفات يبيله مزاج عالي
ومكان هادي وخيال شاطح

وحطي المواصفات اللي تبينها وعيشي اللحظة

:)))))

ادري انا فاصله بس مالنا الا الخيال ياوخيتي

ولا بذمتج اكو واحد بهالمواصفات كلها
ما اعتقد ما اظن انخلق

وحياج الله حبيبتي

:*

الزين يقول...

سلوقا بلوقا

سقط سهوا وطافك الدور
بس هم رجعنا لك

:)

شوف يا طويل العمر
الزوج المثالي مواصفاته تختلف من ست كل ليه الثانية

يعني اللي بالنسبة لي انا مثالي ممكن يكون حق غيري كلش ابد بتاتا مو مثالي
فما تقدر تحكم

ولين يت بنت الحلال
وحبت الشيخ سلوقا
ذيك الساعة السالفة مافيها مثالية
فيها بحبه يا بابا وبس
ولا انت شرايك؟؟

وسالفة نانسي وهيفا هذا داء ماله دوا عند كل الشباب
والله يعينا عليكم
:)

عسى بس ما تعورت من الطيحه
اقصد سقط سهوا
:))

حياك الله اخوي

او مثل ما تقول انت
ودمت بكل المواصفات الغير مثالية
اهو حلاته هالشكل

الزين يقول...

خروفه

المثل يقول مالك الا خشمك لو كان عوي

وانتي عاد فسري المثل براحتج

:)

الزين يقول...

كويت سن

:)))
شفت شلون
ما يصير كله احمر
شفيه الوردي
الشذري
البرتقالي

يعني لازم احمر

تهقا معظمهم جذيه؟؟

ما راح اعقب
اقرا تعليقات البنات وانت تعرف

وحياك الله
مرورك دايما يسعدني

الزين يقول...

الخيلاء

يكون هين لين له هيبه و حضور اهم شي :)

عجبني

انا ابي مثل هذا
عن جد عجبني

:*

الزين يقول...

يو تيرن

:)
ايه ايه بتولاهم ما عليج
الله ياحنا نبي الشاره عليهم

البنت تتكلم من واقع اهي عايشته صاحبتها اختها بنت عمها

بس اهو واقع بغض النظر عن واقع منو اهو

وانا وياج باللي قلتيه فعلا
ما اييج اللي في بالج صبابه

مشكوره وايد
بالفعل هذا كان الهدف من البوست انج تضحكين وتفكرين بنفس الوقت

حياج الله وسعيده بمرورج طبعا

:**

Shather يقول...

يفضل أن يكون يتيم وخواته متزوجات منعا وتداركا للمشاكل


لول هذي سامعه مشاكلها وايد


الله يرزق كل مؤمن و مؤمنه الزوج الصالح اللي يبرد جبدها :P


و على فكره الصوره اليديده اللي بواجهه المدونه جميييييييلة

:*

7osen يقول...

زيوون شفيج على الريايل

هاااا

كل هذي مواصفات

وين تحصلونه هذا

هههههه

صراحة كان عندي كلام وايد عن بوستج هذا
بس ماني قايلة

اهم شي صوت جورج كلوني
ضحكتيني

magnoonah يقول...

صاحبة الايميل على كثر ما ضحكتني وعلى كثر ما .................. على كثر ما قلبت المواجع للاسف هذا الحال


ومو من حقنا نعترض لانه عيالنا فل اوبشن واييون من الوكاله مع كتيب خاص فيهم وكفاله مدى الحياة


والشكوى لغير الله مذله

:)))



زيون مو مهم الشكل كثر ما هو مهم اخلاقه واسلوبه وطريقة تعامله معاي انا بالذات ومع الناس عموما يعني لو حلوو وروحه ميته شسوي فيه

وحيلج فيهم

بعد عمري طيبتي خاطري

وتحياتي لنصيرة المراه
؛)

Q8i Blogger يقول...

اقول هذي الاوصاف متأكيد تبونها من الكويت ؟

آخر شي بتاخذ واحد مكرش .. اجلح املح .. وبتقول هذا حبيبي وحلم حياتي


بس انا عبالي صج هذي افكار البنات لين وصلت لجمه وحسيت الاوصاف كلها بطيخ

هذي اهي :
أن يتقبل أن يكون عندها أصحاب وأصدقاء من الجنسين بدون ما يشتغل عليها بنظام غيره وأصول


متأكده من الموضوع ؟
مايبون أحد يغار ؟

اعلمج بالحريم ولا ماله داعي ؟

Najmah يقول...

لاا تعرفين الخوف المترقب اللي يضحك
:))

لوووووووووووووووول
زيووووون
موتتيني من الضحك على سالفة الكروش
لووووووووووووووووووووووووووووووول

:Pp

الزين يقول...

المفكر

يسلم عمرك يارب

هم الضغاط ساعات منه فايده
ولا شرايك

:)

يعافيك ويخليك

مشكور على الزيارة

الزين يقول...

استكانه

احم احم
مساج الله بالنور والسرور وماي الورد والطيب والبخور

:)

ايه ايه خل نصفق لها
البنت ما قصرت وخسفت بالأولي والتالي

ياربي
:***

وربي ماكو انطع منج

انتي تسكتين انا آخذ اكشن سريع
تعال يابابا انت مالي انا

انا سويتك ومحد ياخذك
:)))))

ايه ايه نبيه حده كويتي
يحب المموش
ويعشق الزفرة
واحلا كلامه لين قال حشا يوفي
اخييييييييه


واهم شي خف الطينه مثل ماقلتي
ما احب الريال مبوز ومقلدم
ولين تكلم ودج تحطين ايدج على حلجه وتقولين له اسكت الله يخليك


وولهت عليج العافية
ترى مو اكثر مني صدقيني

انا بخير دام حسج بالدنيا يااستكانتي

:**

الزين يقول...

قلب طفلة

احنا البنات كلنا عشرة على عشرة الباقي على الشباب

كلهم يبون بينولوبي او سلمى او مونيكا

محنا تارسين عينهم يا بنية

وما يدرون ان حلاة الثوب رقعته منه وفيه

وكلن ياخذ نصيبه

وزواج عتريس من فؤاده باطل

شكوووو مادري

:)))

مشكوره ياقلبي

:**

الزين يقول...

شذر

ايه وياملنا من مشاكل الخالات والحموات

الله يستر

اللهم آمين حبيبتي

مشكوره

انتي اول وحده تقول لي حلوة الصوره

:**

الزين يقول...

حسين

والله مافيني شي

ياربي حبيت اتحرش فيكم شوي
ما يصير

ما شبعتوا من العقل والرومانسية؟

لاااااااا بليز قوله
ابي اعرف رايك انت بالذات

على طاري جورج كولوني

راويت الصوره واحد من الأهل قلت شفته شحلاته

قال لي هذا منو
قلت له جورج كولوني

تدري شرد علي
قال لي ياكلج اسد انتي ويااااه

هااااو

الله كريم
اشوه ان الكويت مافيها اسود

:)))

الزين يقول...

مجنونه

ايييييييييه يا مجنونة
هذا حالنا احنا البنات
مساكين والله احنا
بس محد مصدق

انتي عارفه رايي مسبقا من ناحية الشكل

ماني قايله
سر بيني وبينج
صح؟؟


ايه نعم نصيره المرأة آنا

:**

الزين يقول...

كويتي بلوقر

ليش هالمواصفات اصلا موجوده بالكويت؟؟؟؟

ويستاهل المكرش دام انه كويتي
ومن ريحة ديرتي وأهلي

تعلمني؟؟

انت ليش معصب؟؟

خل البساط احمدي
ترى الضحك يرد الروح

:)

مو احنا قلنا كسرة مود

هذا عيبكم يالكويتيين
كل شي تقلبونه جد

جنكم تتصيدون علينا

شوف اهو الموضوع ان ....

ولا تدري

نخليه حق بوست ثاني
عن الغيرة

شرايك؟

مشكووووور وايد على المرور

لؤلؤة يقول...

يالزين
موضوع الكلام فيه مايخلص....
لكن عند النصيب ماينفع جورج كلوني ولا مكدريمي :×
المهم ولد ناس يخاف الله ...
الله يرزقج ويرزق كل البنات :)
(شفيه الأحمر...بعده يمشي!!!)