.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

25.3.08

مدونات .. مدونات .. مدونات


هو عالم آخر .. اكتشفت وجوده قبل سنة تقريبا يتراوح مرتادوه بين الجاد والساخر... الرومانسي واللي ما عنده سالفه ...اللي يبي يسولف واللي يحمل الحكمة بين كلماته مثل علامات الترقيم .. ناس تظهر ثم تختفي وناس تتابع دون ان تكتب وتعليقات منها المحابي والمجامل ومنها المعجب والمتأثر ومنها الحشرة مع الناس عيد.

أناس تختفي وراء الشاشه تداعب الأفكار خيالها لتقوم الأنامل بترجمة هذه الأفكار على الكي بورد ومن ثم تنقله للقارئ .

أسامي وهمية وربما اقنعه نخفي بها شخصياتنا لسبب أو لآخر .. شخصيات مختلفه نعيشها هنا في مدوناتنا ولربما تكون هي شخصيتنا التي لم يعرفها من حولنا من المقربون وغيرهم .

ناس تكتب عشان تعمر وناس تكتب عشان تدمر وهكذا الحال بالنسبة للتعليق والنقد .. ويامالك من الحجي والتأويلات والحش فيك في مجالس تضم القليل من المدونين والكثير من مرتاديها بالخفاء.

ناس حارقها هم الوطن وناس تجلد فيه وناس تكتب عن أطيب ما فيه .. ناس تحس مدوناتها تغسل القلب وترسم البسمه على شفاهك وتخليك تضحك من أقصى قلبك .. وناس تحملك همها وتشكي لك تجربة شخصية لا تضيف للكاتب والقارئ الا التحلطم والحنة .

ناس تقرا لها تحلق معاها فوق السحاب وتنقلك إلى عالم نتساءل عن وجوده .. عالم دغدغة المشاعر.. تهديك الحلم على ورق من سوليفان ... وهي تعلم أنها ممكن ان توصم بالعار والجرأة والعيب والحرام وكأنها هي فقط من تحمل مشاعر قد تلتهب وقلب قد يعشق وفؤاد قد يشتاق ولا تجد غير المدونة متنفس لتلك المشاعر.

وناس تكون واحة أدبية .. تاخذ منها المعرفة بطرق مختلفه ولكن بدون شك أجملها هو أبسطها بالتعبير.. وقد تكون تلك الواحة تميل الى التحرر الفكري نوعا ما وتدعو للتساهل في بعض الأمور وفتح البصيرة قبل البصر ... وهذول ناس ممكن يوصمون ويتهمون بالزندقة والعلمانية والكفر احيانا.

ناس عندها طرح سياسي يميني وناس يساري وناس ماسكة العصاة من النص والكل يبي يصلح رغم إن ساعات طريقة الطرح تكون مملة او حادة او ساخرة الا ان البعض تميز بالإسلوب الراقي والبعيد عن الإسفاف اما المتطرف منها الله يعينا عليهم.

ناس تكتب قرقيعان ومن كل قطر اغنية دون التخصص بنمط معين والقراية عندهم تحمل الكثير من المفاجآة الممتعة والمملة احيانا ...وناس القراءة لها متعة ما بعدها متعه حتى لو كان الناتج صفر.

بالنهاية .. شنو تعني لك هالمدونة .. شنو الفكر اللي تطرحه .. انت شنو تبي تقول .. كله يعتمد على قناعات وأهواء المدون .

مدوناتنا هي الدفتر اللي نسجل فيه يومياتنا كل ليله قبل لا ننام مثل ما ذكرت اخت عزيزة من المدونات .. نكتب بدون بهرجه ولا رتوش ولا رياء .. منت ملزوم تحابي أحد أو تجامل أحد .. اكتب مثل ما تحب .. بس اطرح فكر .. ناقش .. خل الناس تستفيد .. خل نستغل مساحة الحرية اللي اتيحت لنا هنيه .. من غير اساءة لأحد .. او جلد أحد .. او التقليل من قدر الآخر .

انا ما اعرفك وانت ما تعرفني .. تنزل بوستك .. وتسكر اللاب توب .. ترجع تعيش حياتك اليومية وتنسى فلان من المدونين او فلانة من المدونات ...بس اهو بعد ما يقرا لك .. تهقا بينسى .. او بيذكر افكارك اللي شاركتها معاه ..

اترك بصمة حتى لو كانت صغيرة .. لا تستهين بتجربتك الإنسانية ... أكيد في اللي راح يستفيد منها بغض النظر عن حجم الإستفادة . لا تبخل على الناس بفكرة حتى لو كانت صغيرة... ما تدري كل شي ابتدى بفكرة صغيرة من شخص مجهول وتبناها شخص آخر وصارت منهج حياة..

اكتب واكتب واكتب .... كلنا وياك ... طالمنا حرية التعبير مكفولة

حرر قلمك وصح ضميرك وتذوق الزين من الشين ...

يمكن باجر يذكرك التاريخ ... من يدري

ليش لأ........

:)

23.3.08

سوالف قلب ... قصتى مع ليلى


ليلى...بنت جميلة .. لها عينان متسعة الحدقات سوداوتان كما الليل تحرسهما رموش طويلة ملتوية الأطراف .. اذا اغمضت عينيها انسدل رمشيها على تلك الوجنتان البيضاوتان مع غمازة جميلة على كل جانب .. لها ثغر مكتنز وردي الملامح ... وشعر اسود حالك يتوج كل هذا بتمرد وجموح .. لا تبعد خصلة عن وجهها حتى تتمرد خصلة أخرى وتثور مداعبة ناصيتها بالكثير من الدلال ..
رغم كل ما تتصف به ليلى من الجمال إلا إني كنت اشفق عليها..نعم ... لم يكن ما يجمعني بليلى مودة اوصداقة .. كان شفقة على حالها...لماذا؟؟؟ بتييكم السالفة
ليلى كانت زميلتي في نهاية المرحلة الإبتدائية.. كانت ليلى تأخذ السنة بسنتين .. ولم تكن مع أحد ... لم يكن لها صاحب أو صديق .. زميل أول معين .. لا اهي من الشطار ولا اهي من الكسالة .. كانت تجلس كل يوم في جانب ... تغير مكانها باستمرار ... لم يكن ذلك يعجب المدرسة .. ولكنها كانت تخضع لمزاج ليلى لسبب كنت اجهله حتى جمعتني بها الصدفة يوما ما بالفرصة بالفصل لوحدنا .... كانت تبكي ... وتنتحب كما الأطفال رغم اكتمال ملامح انوثتها المبكرة ... رم تمردها وجموحها امام قوانين المدرسة .. رغم تدليل المدرسات لها ومراعاتها بكل شي ... حتى الواجب الذي لم تكمله يوما ... والخطأ الذي لم تهتم باصلاحه ابدا .. "ليث يثوون فيني ثديه ... ليث ما يحبوني... ليث ما يبوني؟" ايه نعم كانت ليلى ثرمه لا تنطق السين
@@ "منو هذول .. ليلى شفيج .. شنو صاير"
"البنات كله يعيبون علي .. يقولون انا مبهذلة .. وثعرى قيفة مثلي .. ليث يعني عثان أنا ما عندي أم .. عثان أمي ماتت وخلتني وأنا ثغيرة"
"إنتي امج ميتة ؟؟؟" تدرون شنواللي عور قلبي اني اول مرة اصادف وحدة امها متوفية
"ايه ماتت عني وأنا ثغيرة"
"ليش.... شنو موتها"
"مدري ... راحت ايران وماتت"
"وانتي الحين شتسوين؟؟ منو عندج"
"عندي اختي اهي تحط بالها علي"
طبعا وين تلاقون الزين العيون غورقت بالدموع .. وقعدت ابولع بريجي
"اختج كبيرة؟"
"اختي بالمتوسطة"
"وشلون تعرف؟"
"أبوي قال لها لاذم تعرف لأن مرت ابوي مالها خلق"
وااااي بغيت انتحر .. انهيار الله وكيلكم لميتها وقعدت اصيح .. لدرجة ان البنت اخترعت ..وبطلت تبجي وصارت اهي تبي تراضيني
"الزين تبين تثوفين قبرها؟؟"
"هاااااا.. قبر منوووووو؟؟"
"قبر أمي"
"وووواي وانتوا ليش مصورينه؟ وليش تروحون هناك .. ما تخافون يطلعون لكم الميتين؟"
"طالع هذي .. خبلة انتي.. ماتوا ثلون يطلعون؟"
"وانتي ما تخافين تروحين هناك .. تشوفين كل القبور؟"
"أنا ما أروح وايد .. عثان اهي قبرها مو بالكويت.. بالنجف"
"بالنجف .. وهذي وين"
"بالعراق .. صج انج ما تعرفين غبية...كل اللي يموتون يودونهم هناك"
الله يخليكم منو فينا العاقل بهالحوار .. وحدة خبلة والثانية على ويها .. والأخت قاعدة تتشيطر علي بمعلومتها الخطيرة .. واللي لا افقه منها شيئااااااا
"انزين راويني الصورة خل اشوف"
وكانت اول مرة اشوف قبر بحياتي ... ما عرفت شنو شعوري .. بس بعدين عرفت انه احساس بالوحشة ..طبعا انربط لساني .. والعيون طلعت ليه بره
"ههههههههه.. حلو صح .. ثفيت مخترعة .. ترى عادي ما يخوف"
ما يخوف.. الا انصبت عظامي ... وطق الجرس .. وتميت طول اليوم عايشه القصة .. ومكتأبة عشان ليلى ما عندها أم ..وعسى ما تكلمت او تحركت ليلى إلا سرحت فيها والفت سيناريو حق حياتها من غير امها
خلص الدوام .. رجعت البيت .. اول ما شفت امي جان اصيح
"شفيج .. زوينه .. شفييييج تحجي .. اكو احد طاقج .. الأبلة مهاوشتج .. تحجي شفيج"
"يمه لا تموتين وتخليني.. بعدين يودونج النجفة ولا اقدر اشوفج"
أمي انصرعت طبعا
"هاااااو .. من قايل لج هالحجي .. من وين يايبته"
"ليلى قالت لي.. وقالت لي بعد ان ابوها تزوج وحدة ثانية ما تحبهم"
وبيني وبنيكم حسيت جنها سندريلا يوم ماتت امها ومرت ابوها شغلتها سيلانية حق بناتها وخفت على روحي اصير مثلها
" منو ليلى هذي .. وياج بالمدرسة؟"
"ايييييييييييييه .. "
"ويعلية مسكينة يا عوينتي .. وانتي يا أمي شلج بهالسوالف .. وبعدين يمكن اميمتها كانت مريضه مسكينة .. وانا كاني جدامج مافيني شي .. لا تخافين يا أمي "
"يعني ماراح تموتين"
"لا حول الله.... لا ماراح اموت لا تخافين"
"انزين اهم ليش يودونهم النجفة"
"النجف يا أمي النجف .. هذول يودونهم هناك لأنهم شيعة .. احنا ما نروح هناك"
"واحنا مو شيعة؟؟؟؟"
"لا احنا سنة"
"يعني شنو؟"
"يعني مسلمين"
"والشيعة مو مسلمين؟؟؟؟"
"بلا مسلمين بس غير عنا"
"شلون غير؟؟"
"زوينة .. ياحبج حق التسئل.. روحي بدلي عشان تتغدين"
وطبعا ظليت عايشة قصة ليلى لوهلة من الزمن يوم اسويها سندريلا .. ويوم قطر الندى .. ويوم ليلى الذيب وامها ماتت لأن الذيب اكلها.. ولكم ان تتصوروا شلون كان خيالي يشطح فيني ... الى ان اكتشفت ان ليلي لا تستحق تعاطفي معاها كلش .. وانها وحدة مو هينة وقوية .. وهذي سالفة ثانية كلش اقص لكم اياها في بوست ثاني
الغرض من هالبوست .. ليش لماكنا يهال ما كان يفرق ويانا سنة أو شيعة ... وماكان اصلا هالموضوع له أهمية كلش .. أهالينا عمرهم ما غرسوا فينها شغلة السنة أحسن او الشيعة أصح .. كنا كويتيين ومسلمين وبس
ليش الحين .. ليش اليهال صاروا يعيبون على بعض بسالفة انت شيعي ما فيك خير .. والشيعي يقول انت سني كافر
ليش؟؟ شنو الفرق؟؟ شنو اللي تغير؟؟؟

21.3.08

سوالف قلب ... سالفه لأمي


يمه
لميني دفيني
وبحضنج اخذيني
يمه عطيني الأمان
ليه جار على زماني وغدر فيني
وقولي لي ان باذن الله وبفضل دعائج ربي بيحميني
ولين انكسرت او ضعفت دايم تصبريني
يمة من غيرج يحس فيني .... من غيرج ينسيني هموم كثير
من غيرج وانا صغيرةعلى جناحاته أرفرف وأطير
ومن غيرج حلم فيني وتمناني
ويوم انخلقت بحشاه فز قلبه وسماني
يمه قولي لي ان باجر بيحلى
واني لين كبرت الدنيا معي بتحلى
وعلميني شلون اغفر وأنسى
وشلون أحن وأحب وما أجسى
علميني اكون مثلج
علميني الشموخ
علمني أمشى عالثرى والثريا هيَ كفي
وان كنوز الدنيا كلها ذي ما توَفي
حقج من عمري وقدري وما تِكفي
يمه زفيني عروس
وبالجنة علميني كيف أفوز
يمه يا كل الحياة يا بسمة عمر
يا نهر صافي ياماي الزهر
اعذريني حلليني
يمه منج انتي ما اقوى العتب
ما اقوى الزعل ما اقوى الفراق
ولو بدر منى قصور اغفري لي وسامحيني
واعرفي اني من غيرج ما اقوى الحياة
تصبح بعيني صحرا
وأمسى من بعدج يتيم
يمه اشتاتقك حتى وأنا بحضنج
حتى لو كبرت .. حتى لو حضنج هجرت
حتى لو صار لي بيت واهل
وصار بعادي عنج سهل
ولا تظنين اني لي عنج غناة
انتي امي وانتي بعد

كل الحياة



17.3.08

سوالف قلب .... سوالف نهار


عندما يفيض الشوق
وتشعر به كطيف يتبعك في كل لحظة
يقصي كل أفكارك ليأخذ مكانها في كينونتك
نفس الفكرة .. نفس الإحساس
نفس الدوامة .. لتدرك بالنهاية أن لا مهرب منه الا إليه
الشوق هو حاجة ملِحة تحتاج للإشباع
متى ما اشبع تحول لشيء آخر


طول ما إحنا عايشين حياتنا بهذا العالم نتشارك طاقاتنا و أرواحنا مع الناس اللي حوالينا بطرق مختلفة . تأثيرنا يلمس حياتهم يتخللهم ويلمس حياة الآخرين من حولهم . لما نتعب عشان نعيش حياتنا بعمق وبصدق ممكن نعتبر هذا انجاز بحد ذاته على الصعيد الداخلي . كل واحد منا بإمكانه النظر بصدق لنفسه... يكتشف حقيقة ذاته شنو اللي يعطي حياته معني.... و شلون يكسر كل القيود اللي تمنعه من انه يحقق أحلامه ويتحرر من الضغوط اللي تمنعه من إحساسه بقيمته وقيمة أفكاره ومشاعره. تناغم أفكارنا مع نمط الحياة اللي نعيشها ورؤيتنا الواضحة هو كل ما نحتاجه عشان نكون مثل ما نحب أن نكون.


تدندن لحن ... تنسى الكلمات....ألف فكرة وفكرة ومليون شغله بيدك ....ومشاريع مؤجلة .... و إحساس بالتعب
تبي ترتاح ... تبي تتحرر من كل القيود
ودك تطلع من الدوام
ودك تمشي بالشارع من غير ما يقولون هذا شفيه ماشي ليش مو راكب سيارته
ودك تقعد على البحر من غير ما يقتحمون خلوتك
ودك تقعد بقهوة تقرا كتابك من غير ما تتهم بـ show of ما عرفت أقولها بالعربي
ودك .. وودك .... وودك
في ديرة معظم اللي ودك فيه له اسم ثاني وما يصير
ديرة تنتقد فيها لأبسط الأمور
ويظل اللي ودك .. ودك وبس


إملأ الكأس منى
وتجرعه رويا
نملأ الأقداح شهدا نتذوقه سويا
ترتشف ما فاض من أشواقي مليا
تقصي الليل بلحظك تخلق فجرا بهيا
وأغدق أسماعي بصوتك واسقني كأسا(ن) هنيا
تلتقي أنفاسي صدرك تحكي قربا عفويا
املأ الأقداح هيا
وتجرعه رويا
........
هو نص لم يكتمل


اشتقت لج
كلمة كان ودي اسمعها منك اليوم
وانت اكثر.. أكثر .. أكثر
كان راح يكون ردي عليك

شفت شكثر خسرت

13.3.08

سوالف قلب ..ابتعد عني ماحبك وشتبي بي ..قدرك الغالي رميته بالثرى ..رابع سالفة


الزين : تطلعين
نورا : وين؟
الزين : ستاربكس حولي
نورا : اوكي مريني
الزين : صار

نورا : شفيج؟
الزين : ملخبطة... ضايعة
نورا : شصاير؟
الزين : كل شي ... كل شي يا نورا
نورا : زيون خرعتيني .. اول مره اشوفج جذيه
الزين : تعبانة وقلبي مكسور
نورا : ليش؟؟ ليش .. منو اللي مأذيج
الزين : اللي ما توقعته يأذيني
نورا : منو هذا ... شالسالفة قصي لي من الأول .. أبي أعرف كل شي


نورا : الله يالزين ... كل هذا يصير وأنا ما أدري ... شلون تغلطين هالغلطة ... شلون تهون عليج نفسك ... شلون تسوين جذيه ....اللي ماني فاهمته ولا قادرة استوعبة كنتي تدرين من الأول انكم ما تصلحون لبعض .. و عمركم ما راح تصيرون لبعض .. ليش تكملين
الزين : مادري ... مادري .. لاتعاتبيني يا نوره .. كافي اللي أنا فيه
نورا : أنتي حبيتيه؟؟
الزين : هم مادري ...كل اللي اعرفه انه كان ليلي ونهاري .. كان محور كل أفكاري ... شفت نفسي معاه .. عايشه أحلامة .. كلمة وحده منه ترفعني فوق .. وغيابه ينزلني تحت
نورا : كل هذا وما تدرين؟؟ وبعدين؟؟
الزين : اتفقنا ان كل واحد يمشي بطريجة .. ما نبي نحمل قلوبنا أكثر.. ما نبي نظلم بعض
نورا : عين العقل اللي سويتوه .. بتتعبون شويه بس بالنهاية اللي سويتوه اهو الصح
الزين : بس كنا لا زلنا نتواصل
نورا : ليش؟؟ شالداعي
الزين : يانورا انا ماشفت منه الا كل خير .. بالعكس انا احس اني اذيته أكثر
نورا : ليش اهو ما كان يدري بكل هذا قبل لا يجدم .. بالعكس أنا الومه اهو اكثر .. اهو اللي نصب لج المصيدة .. وانتي مثل الهبله على ويهج سيده
الزين : حرام عليج... لا تقولين جذيه... لا تحكمين عليه بهالطريقة
نورا : لا مو حرام ... اهو اذكى منج بوايد .. والحين مسوي روحه الضحية .... اهو عرف يحبكها عليج عدل
الزين : نوووره
نورا : ليش ما ترضين عليه؟؟
الزين : إنتي ما عرفتيه... اهو غير ... صدقيني
نورا : يا بنتي حسبيها بالعقل وفكري بالموضوع من اول .. منو اللي اقتحم حياة الثاني؟
الزين : اهو.. بس ما أقدر اقول انه اقتحام
نورا : ايه صح ... ما علينا ...منو اللي حط و تم يحط للثاني طعم ورا الثاني
الزين : اهو .. بس انا بعد جاريته... كانت اللعبة عاجبتي
نورا : يمه منج ... أدري فيج ... وبعدين تعالي قولي لي ....يعني اهو ما كان يدري من الأول انج منتي له
الزين : بلا ... وقال لي
نورا : عيل شاللي خلاكم تكملون ... ويوم حسك ضعيفه اهو ليش ما وخر .. مو المفروض ان اهو الريال ولازم يكون اقوى
الزين : مدري .... مدري .. شي ما عرفنا نسيره .. اهو اللي سيرنا... شي يقولج كملي وانسي مخاوفج .. شي يقول لج عيشي اللحظة .. غمضي عن كل اللي مخوفج .. تتدبر بعدين
نورا : ايه يعني قصى على روحج ...الزين ... اذا تبين الصج كان المفروض ما تكملون اثنينكم او اهو على الأقل يمشي وما يكمل .. مو ينطرج تتعلقين بعدين يقول لج مالنا امل
الزين : مو غلطته بروحه ... غلطتي معاه .. وبعدين القرار كان مشترك .. يعني مو بروحه أخذه
نورا : والحل؟؟؟
الزين : ماكو حل ... حلنا اهو الوقت .. يمكن احتاج وقت عشان اخطِي على اللي انا فيه واعديه
نورا : انزين وانتي شاللي متعبج الحين
الزين : الشي اللي المفروض ما يتعبني ... وجوده بحياة غيري
نورا : شلون يعني؟
الزين : مدري... اهو يتعمد او اهي صارت جذيه ....بس انا اول مره اشوف هالوي فيه .. احس فيه قاعد يجرح فينى بطريقة مو مباشرة... ولما عاتبته رده كان العن وامر
نورا : انتي مو تقولين انكم اتفقتوا تكونون أصحاب وبس
الزين : ايه
نورا : عيل وين المشكله ... زيون لا تكونين أنانية .. وحدة .. عشر .. مو شغلج
الزين : أدري والله أدري ...بس تعرفين ... لما الحين في شي غير في قلبي ... لا تقولين لي شنو ... اهو لازال هناك .. كلامه احساسي فيه .. روحه ... أحلامه.. أمنياته ... كل شي
نورا : انتي شنو اللي تبينه بالضبط
الزين : نورا ... رده عليه عورني حيل ... احس انه حرقني .. وصمته عقب هلكني أكثر .. عطاني احساس اني مو مؤهلة حتى اني اعتب
نورا : زيون ... خليه يروح يشوف حياته .. انتي ليش مأذية حالج
الزين : تدرين ليش ... لأني بنت .. والبنت تحس بقلبها لما يكون التصرف بدر من الريال عشان يغيضها .. عشان يحرها .. وانا متأكده هذا اللي حصل .. ليش.... ليش .. ليش مصر يقبح كل اللي كان بينا
نورا : إنتي من صجج .. طقيه بالطوفه ... انتي بس اللي مو عارفة تلعبينها صح
الزين : ليش انتي شايفتها لعبة؟؟؟؟ نورا .... لاتقهريني زيادة
نورا : وليييين بلشنا بالأعصاب ... الزين أنا قلبي عليج ولا اهو ترى ما يهمني
الزين : انتي ما تعرفين تقولين حجوة سنعة ... كله ماخذه الناس بالقوة
نورا : ايييه شنو تبيني اقول لج ... الحل عندج وانتي عارفته .. وانتي منتي غبية وادري فيج تبين احد بس يأكد رايج بينج وبين نفسج .. ولا تحتاجين احد يعطيج الحل ... الحل موجود بهالكور العوي .. وشكلج بخاطرج تتدلعين
الزين : ايه صح ... مو انا يوم اشتهيت اتدلع فكرت فيج .. موت عاد انتي مع الدلع
نورا : حبيبتي .. طولي بالج ... ولا تزعلين .. وبعدين انتي عندج الف من يشتري خاطرج .. اهو شنو يمهم ولا شي ..بالعكس انا اشوفه انسان ضعيف .. وما طلعت قوته إلا عليج إنتي اللي حبيتيه وغليتيه على غيره
الزين : حتى اهو حبني
نورا : طل ... لو حبج ما يعاملج بهالطريقة
الزين : بس .. بس .. ما ابي اسمع ملامه
نورا : انتي تحمدين ربج انكم ما كملتوا مع بعض .. هالآدمي راح يتعبج .. شوفي الحين شلون متعبج بحركاته اللي مالها معني
الزين : تدرين شنو اللي مأثر فينى أكثر ... طريقته معاها ... تذكرني بطريقته معاي بالبداية
نورا : قصدج اول ما سحب ريولج
الزين : أففففففف ... أنا غلطانه اللي قاعدة اقول لج
نورا : أبيج تشوفينه صح .. أهو رسم عليج ... منتي مصدقتني .. الأيام بتثبت لج .. ولا تخلينه يكسرج ... إنتي ما يكسرج الا اللي خلقج .. وبعدين تعالي انا بعرف ... من وين هالضعف كله .. عمرى ما خبرتج جذيه ... إنتي تلعوزين عشرة مثلة
الزين : قلت لج سكتي
نورا : هااااو .. الحين انتي يايبتني هنيه عشان تسكتيني لو عشان تسمعين رايي .. تدرين ليش كلامي يعورج زيون .. لأنه اهو الصج وتبين شوري..... تبين ترتاحين
الزين : شلووووووون؟
نورا : دقي سفلي فيه .. قولي له اللي بقلبج كله
الزين : يعني اصير اسوأ منه .. أو اصير مثلج
نورا : ما عليه بطوفها لج بس هالمره .....ايه صيري مثلي قوية ودام اسلوبه اهو جذيه ردي عليه بنفس اسلوبه
الزين : مو أنا يانوره ... مو انا وانتي تعرفيني زين
نورا : عيل لا تخلينه يكسر بخاطرج ويقص عليج ويسوي روحه مظلوم وضحية ....هو حية بس انتي اللي مسكينة والحوبة تبطي بس ما تخطي
الزين : لا تدعين عليه حرام عليج
نورا : بلا بدعي انتي شعليج ... انتي مو شايفه ويهج
الزين : والله ما يبت حق نفسي إلا عوار الراس ... أنا لو داقة على قماشة مو أحسن
نورا : احنا فيها .. دقي لها خل تيي
الزين : قومي .. قومي خل نمشي ........القعدة هنيه صارت كلها مالها طعم
نورا : بلا والله انا شايفة اشياء حلوة
الزين : ههههههه ... يغربل ابليسج ما تيوزين
نورا : ايه ضحكي ما عاش اللي يكسر بخاطرج يالزين .....خليه يولي ... باجر ربي يعوضج باللي يعرف قدرج
الزين : تهقين؟؟
نورا : اهقا .. اهقا ... عيل مساعد وين راح.... هههههههه
الزين : مساعد مات في بس يا بحر... وما قاموا يصنعون مثله
نوار : شفتي شلون .. مالنا الإ الإستنساخ
الزين : مينونه خالصه....مشينا
نورا : مشينا ... يا حوبيكا مشينا