.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

23.1.11

قصاصات ورق .. له



ما اصعب الكتابة لك في جو مزدحم برنين الهاتف

واوراق العمل ...

وضجيج الشوق اللا متناهي

وفنجان قهوة قد مل الترقب المحموم .. فاستكان لبرودة الهواء الرتيبة




وددت لو افرغ صدرك من كل المكنونات

لأستملكه وحدي ..

املأ كل الفراغات .. وأتسيد كل الزوايا

وارقص على دقات طبوله بكل الجنون ..




برجك اليوم

انفعالات شديدة قد تطرأ على ملامح يومك... لا شك ان الاوضاع القلبية مربكة قليلا وتدعوك الى الركون الى صدر من احببت ..وقوع احداث تخرجك عن توازنك وتدفعك الى التنفس بعمق لاستنشاق بقايا عطر قد انكفأ على صدرك .. لا تعرقل مسيرتك او تشعر ازاءها بالعجز ...عليك المبادرة .

برجي اليوم

تتلقى عائدات غير منتظرة عبر مشروع جديد ... مكافأة قلبية قد تخطف انفاسك .. تبقى قلقاً بقية اليوم رغم قطرات واعده من التواصل النهاري .. امسية مناسبه لعقد الاجتماعيات لمناقشه المشاريع المؤجلة .. ستكون المقابلات ناجحة ... لا تتردد بقبول ماهو متاح .. فدائما تكون بداية الغيث ... قطرة.

لا اعلم كم تحقق منهما .. كل ما اعرفه انني عطشة لغيثك .. وبانتظار تلك القطرة ..




رغم عشقي لانسكاب روافدي في مصبك .. الا انني افتقد حالة بحثك عن الارتواء بين تيارات لهفي ...

وكلما تعلق قلبك بتلك الحالة من الطفو فوق صفحات جداولي ..

كلما ازددت انسكابا ... وترققا عذبا




لكم تساءلت عن تفاصيل يومك المتوارية خلف الستائر المسدله بألوانها المتباينة .. ولكم غمرني التفاوت بين مساحات انشغالك ومداد تواجدك ..

وعندما فتحت شبابيك شرفتك المطلة على يومي ..

وجدت نفسي متسللة بين انفاسك .. املأ فراغات صدرك .. وانتعش بإحساسك بالحياة

عندها فقط ادركت كم امتلكت مني .. وكم استوطنت منك

...


16.1.11

نكشه



سينما .... وفيلم جاد

صوت طحان نفيش .. ووحده وراي تكسر بنك باندماج مو طبيعي .. يعني ما تبلع ريجها بالمره .. وكلش مو على بالها الناس اللي حوالينها

عيالها يتهاوشون على الناتشوز .. وهي مندمجه بالتكسر .. وغااارقه بنكهة الملح .. حبيييبتي

الفيلم بصوب واهي بصوب .. وعيالها مطشرين الناس اللي يمهم بنجرتهم بكل صوب

"يمه عبيد ما يعطيني نفيش .. يمه حمود خلص الناتشوز عني .. يمه فيني !@#$ بروح الحمام!!!"

تلتفت عليها .. تنقزها بحجوة .. تقول شوووووش لعيالها .. الإخت غرقانه بالبنك وعلى بالها قاعده بدلق سهيل بالمباركيه

كان ودي حزتها اتسلق كرسيي واطلع لها انتشها ..

لكن شقول غير .. تبا لكم .. ويخرب بيت الهلاقه


بعدها بكرسيين او يمكن اكثر مدري ..

واحد ما لقيت له تسميه وبصراحه ما سمعت له غير همساته الجشه واللي ما فهمتها عدل .. ومعاه الإخت فاتنة المقاهي

الأخوان مواعدين بالسينما!!!

يا الهي !!!!

الشاهد ان الأخ مدري شكان يقول لها او يسوي لها لأن المؤثرات الصوتيه اللي كانت توصل لي مو ماشيه مع الفيلم كلش .. أبد .. بتاااتاً

تكركر على ودنه ومياعة مالقه .. واصوات اخرى .. احم ..مابي افسرها لأن كل تفسير يفشل اكثر من الثاني

وكان ودي ودي ودي .. وهم ودي اطل عليهم عشان اعرف شالسالفه بالضبط .. قتلتني بلاغة الشف

طبعا طلعوا قبل لا يخلص الفيلم بدقايق وما شفت وجيهم

حساااافه ...

وثكلتك امك يا هذا ..... مره ثانية لا تييبها السينما لأن البنت فضيحه



نيي للصفه اللي تحتي على طول .. بنتين ياحليييلهم وايد ستايلهم عجيب غريب .. بس المشكله مو بستايلهم .. المشكله بموبايل وحده منهم اللي كان يرن كل شوي ورنته اغنية راب .. والعجيب بالموضوع ان الأخت ما تسكر الرنه قبل لا تعرف منو داق .. يخرب بيت ذوقج .. رنة موبايل وراب .. ليش يا امي .. ليش يا قلبي .. خلصت الأغاني!!

طبعا غير انها طول الفيلم كل شوي رازة الموبايل تشوف مسجاتها .. وتكسر عيني بالليت كسره مو طبيعية

وسحقا لهيك جيل .. وايد عندهم ارتباطات مهمه


وطبعا احنا شعب الله المختار وما نتحمل نقد ولا نرضى احد يقول لنا ليش ومو عدال ولا سنع

عشان جذي لحية تحشمها ولحية تحشم نفسك عنها مثل ما يقولون

...


مشكلتنا بالكويت مع عدم ادراك حدود حرياتنا وخط انتهاءها عند بداية خط حرية الآخرين ...

مشكلتنا بالسلوكيات اللي صارت عامه مثل المرافق العامه .. مالها كلاس ولا فيها رقي ..

مشكلتنا لما توجه احد وتقول له هذا ذوق عام يرد عليك انا مرتاح مع نفسي انت شدخلك

استغرب من وين يتنا هاللامبالاة .. عدم احترام الآخر .. السلوكيات الخطأ بالأماكن العامه .. نتكلم عن اللبس والماركات والستايل والترند .. نشتري اغلى السلع .. واحنا ابسط اصول الأتكيت ما نعرفها .. ما نطبقها


التلعلع بالكافيهات شله .. اللي يمج تسمعج ترى

سوالفك مع صاحبك بالموبايل على حد صوتك ليش .. ترى القهوة مو ديوانيتك

عيالج يرمحون بوسط المحل عشان حضرتج تبين تتفرجين على النيو كولكشن وبيدج جيس بطاط !! تمشين وتنطعين فيه ... ليش .. ليش .. خاطري اعرف ليش

انت وصاحبة الجلاله ماشين وراكم ثلاث ارتيريات وحده ماسكة لها بنوته ام سنتين والثانية تدز عربانه فيها بيبي والثالثه يايبينها تشيل عنكم الجياس .. شهالزحمه .. هالبطر

زوجتك يمك .. وعيونك على طاولة البنات اللي جبالك !!!.. عيب عليك

تكلمين الويترس جنها فلبينية اهلج .. هم عيب عليج

تبي تدخل من الباب وجبالك بنت .. ما تعرف تنطر لما البنت تدش اول .. ليش لازم تسابقها على الباب وجتفك يطق بجتفها .. والله عيب ... وايد عيب

تبين تتفرجين على اللي بيدي وشدج ليش على بالج السالفه مدافع ومخامط... استغفر الله ..

واللبس اللي مو بوقته ولا مكانه فهذا موضوع ثاني وحدث بلا حرج

وعيالنا اللي كلهم معضلين وغصب يتحركون تحس فيه متوتب حده .. يا عوينتي

واللي يايه مو ماشطه شعرها على ابو انها ستايل .. ما قالوا لج انج جنج ام السعف والليف!

وقواطي الروب يااااربي .. متى بتنتهي هالهبه ..

ومراهقينا متى بيتعلمون ان الصوت العالي مو ميزه ولا مرجله

وبناتنا بسكم من الترصص .. الحشمه دليل على احترامج لوعاء يحمل روحج

وبس

بس ...

لو بتم اعد ماراح اخلص





همسه ..

كنت ابحث عن عينيك بين كل هذا الجمع التائه بزحمة المقهى .. علها تلتقي عيناي فتلثمهما بكل الوله المتعب بصدري .... وصدرك







3.1.11

خواتيم 2010 وبدايات 2011


ما كتبتي شي عن النيو يير
شكتب !!

مدري .. كتبي عن احلامك المحققه .. وامانيج المجابه .. كتبي عن 2010 وطيبها معاج .. وكتبي عن دقات قلبج .. وخطى ايامج فيها .. كتبي عن الأفراح .. ويمكن الخيبات .. كتبي عن الوله والحب .. كتبي عن الصحبه الطيبه وصديقات قلبج وروحج .. كتبي ...

بس بس بس .. كل هذا بكتب عنه .. يبي لي بوستات مو بوست واحد

اختصري ..

اختصر !! ... مدري بس في امور ما تختزل بكلمه ولا تختصر بجمله ... واحساسج فيها اكبر من حرف .. شلون تقدرين تكتبيها وتختصرينها في بوست ينقرا بخمس دقايق اذا مو اقل
شنو يعني !!

يعني ساعات في بعض الأمور بقاءها بالصدور نعمه .. والحديث عنها نقمه
هااااو .. ليش نقمه
الحسد يا بنتي .. الحسد
صايرة متشائمة

 2010 ما تركت لي غير انصاف القصص والتشاؤم .. شنو تبيني اقول!!
وانجازاتج ؟
على صعيد شخصي !!
ايه نعم
لا تذكر .. او انا ما اتذكر ... اوووف ...تصدقين شكلي ما عندي انجازات .. شهالحاله!!

 ماني معلقه .. انزين وعلى صعيد عملي!!

 احلم بالتقاعد .. مليت من ربطة المكتب
هذا انجازج!!

 همممم .. هذا مو انجاز .. هذا شي ثاني

 @@
انزين على الصعيد العائلي !!

 اوووش .. ممنوع وهذا اتفاقنا من البدايه .. الأمور العائليه ما تناقش هني و جدام الناس

 هااااو .. خو ما قلنا فصلي خو ... عطينا شغلات عامه

 Sorry .. private section اسمحي لي

 نطوف العائلي .. تعالي علميني على العاطفي

((تنهيدة))


وليييين .. شبلانا !!!

 ما بلانا .. هذي منطقه حاره .. ومسيجه .. ومكتوب عليها خطر .. وممنوع الدخول
ليش!!

 ما ليش .. كيفي والله عاد ..

 لا لا زيون جد جد .. ليش ؟؟

 مدري .. يمكن المنطقه خطرة شوي ..وفيها مباني تحتاج Renovation
يا دافع البلا .. خطره ...وشنهو ذي اللي قلتيه؟؟

 Renovation!!

 وش ذا بالضبط

 يعني تجديد .. ترميم .. واحتمال جبيرهدام من العرج واعادة بناء
حالتج صعبه .. وحياتج محتاجه اعادة هيكله

 اهااا .. تقدرين تقولين جذي

 صبيتي الأساسات!!

 بيه .. منذ مبطي
مو جنه الموضوع ييه متأخر شويه!!
 ان يتأخر افضل من ان ما ايي كلش .. صح
 صح صح ... خوش عيل قولي لي شلون قضيتي ليلة راس السنه

 كانت ليلة مليئة بالتكنسل

 شلون !!

 ابد .. العصر كنت المفروض اطلع مع وحدة من البنات.. وكنسلت لظرف ما .. بعد المغرب المفروض ان في جماعه يتعشون عندي .. وكنت متجهزة ومتهيئه ومشتطه بطبيعة الحال .. وحده مرضت والثانية عذرها ما عجبني واثنينهم كان المفروض يعلموني مبجر عشان لا ارتبط
عصبتي !!

 تقدرين تقولين تعسرت .. وتحلطمت .. وعصبت شويه

 انزين وتالي ..
ابد .. كلمت حبيبة قلبي فطيم .. واتفقنا انها تيي تتعشى عندي .. وارد اشتط .. وهااام تكنسل لظرف عائلي

 اووووف .. معاندتج هالليله ..

 شكلها كان هيك

 وشسويتي عقب
شنو بسوي يعني .. عشر ونص انا حاضنه مخدتي ومستسلمه لسلطان النوم

 يااا عوينتي

 ايه ايه .. ادري اكسر الخاطر

 انزين وباجي الإجازه
ويييه سكتي .. يوم ثاني كان الوعد اني اروح الأفنيوز مع لوير

انزين

ودخلت علينا استكانه عرض .. وغيرت المود .. وكانت الوجهه المباركيه

من صجج!! انتي والمباركيه
ليتج شفتي ويهي .. دهشه ما بعدها دهشه .. جني بديرة ثانية .. وجني طايحه على كنز .. وكنت مستمتعه الى حد الثماله بكل لحظه.. وكل ضحكه .. وكل سالفه .. وطيب هالصحبه .. وصفاء القلوب اللي حولي .. ونجرتنا على شغلات تضحك مثل انجلينا جولي .. وفلانه من الناس .. والبرد اللي دش بعظامنا واحنا قاعدين بدلق سهيل :)
اليوم كله كان استثنائي .. وتركنا بعض على وعد برحلة اخرى بس لمكان اخر

تحبينهم!!

يعادلون روحي .. صديقات المساء والسهرة .. صديقات الأزمات والإنفراجات الجميله .. وصديقات قلبي الصغيرون
شلون تقولين ماعندج انجازات للسنة اللي فاتت عيل؟

ما فهمت!!

محبة الناس انجاز .. شوفي الناس اللي حولج يحبونج .. وشارين خاطرج .. هذولي انجازج .. ولا تتوقعين هذا شي سهل

((صمت))


سكتي يعني!!

قاعدة افكر ... وصور كثيره لناس تستاهل قاعده تفتر براسي .. وعسى ربي يقدرني واعطيهم المثل ولا اقصر بحقهم ..

واللي ما يستاهلون !!
ما يشوفون شر والله معاهم

انزين قبل لا نختم .. شنو امنياتج لهالسنه

كثيرة .. وكبيرة ...

عطينا مثال
كتاب منشور باسم الزين

على برودج هذا ... ما اعتقد

بلعي العافية .. ولا تكسرين مياديفي

اوكي .. راح اصدقج .. وبنتحاسب على نهاية السنه

بيني وبينج الأيام :)

انزين .. ختمي اللقاء لو سمحتي
شقول يعني!!

مدري كفيج

تصدقين توهقت .. مدري شقول

اختم بدالج!!
ختمي

اسلم على امي وخالتي وبنات خالتي وبنات عماتي وربعي بالثانوية وشلة كلية التعاسه واقول لهم كل عام وانتوا بخير واحب اهديهم اغنية صافيني مره لعبدالحليم

(( تدفعها بعيدا وهي تضحك))


قلبي ويهج زين

.....

تم