.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

3.1.11

خواتيم 2010 وبدايات 2011


ما كتبتي شي عن النيو يير
شكتب !!

مدري .. كتبي عن احلامك المحققه .. وامانيج المجابه .. كتبي عن 2010 وطيبها معاج .. وكتبي عن دقات قلبج .. وخطى ايامج فيها .. كتبي عن الأفراح .. ويمكن الخيبات .. كتبي عن الوله والحب .. كتبي عن الصحبه الطيبه وصديقات قلبج وروحج .. كتبي ...

بس بس بس .. كل هذا بكتب عنه .. يبي لي بوستات مو بوست واحد

اختصري ..

اختصر !! ... مدري بس في امور ما تختزل بكلمه ولا تختصر بجمله ... واحساسج فيها اكبر من حرف .. شلون تقدرين تكتبيها وتختصرينها في بوست ينقرا بخمس دقايق اذا مو اقل
شنو يعني !!

يعني ساعات في بعض الأمور بقاءها بالصدور نعمه .. والحديث عنها نقمه
هااااو .. ليش نقمه
الحسد يا بنتي .. الحسد
صايرة متشائمة

 2010 ما تركت لي غير انصاف القصص والتشاؤم .. شنو تبيني اقول!!
وانجازاتج ؟
على صعيد شخصي !!
ايه نعم
لا تذكر .. او انا ما اتذكر ... اوووف ...تصدقين شكلي ما عندي انجازات .. شهالحاله!!

 ماني معلقه .. انزين وعلى صعيد عملي!!

 احلم بالتقاعد .. مليت من ربطة المكتب
هذا انجازج!!

 همممم .. هذا مو انجاز .. هذا شي ثاني

 @@
انزين على الصعيد العائلي !!

 اوووش .. ممنوع وهذا اتفاقنا من البدايه .. الأمور العائليه ما تناقش هني و جدام الناس

 هااااو .. خو ما قلنا فصلي خو ... عطينا شغلات عامه

 Sorry .. private section اسمحي لي

 نطوف العائلي .. تعالي علميني على العاطفي

((تنهيدة))


وليييين .. شبلانا !!!

 ما بلانا .. هذي منطقه حاره .. ومسيجه .. ومكتوب عليها خطر .. وممنوع الدخول
ليش!!

 ما ليش .. كيفي والله عاد ..

 لا لا زيون جد جد .. ليش ؟؟

 مدري .. يمكن المنطقه خطرة شوي ..وفيها مباني تحتاج Renovation
يا دافع البلا .. خطره ...وشنهو ذي اللي قلتيه؟؟

 Renovation!!

 وش ذا بالضبط

 يعني تجديد .. ترميم .. واحتمال جبيرهدام من العرج واعادة بناء
حالتج صعبه .. وحياتج محتاجه اعادة هيكله

 اهااا .. تقدرين تقولين جذي

 صبيتي الأساسات!!

 بيه .. منذ مبطي
مو جنه الموضوع ييه متأخر شويه!!
 ان يتأخر افضل من ان ما ايي كلش .. صح
 صح صح ... خوش عيل قولي لي شلون قضيتي ليلة راس السنه

 كانت ليلة مليئة بالتكنسل

 شلون !!

 ابد .. العصر كنت المفروض اطلع مع وحدة من البنات.. وكنسلت لظرف ما .. بعد المغرب المفروض ان في جماعه يتعشون عندي .. وكنت متجهزة ومتهيئه ومشتطه بطبيعة الحال .. وحده مرضت والثانية عذرها ما عجبني واثنينهم كان المفروض يعلموني مبجر عشان لا ارتبط
عصبتي !!

 تقدرين تقولين تعسرت .. وتحلطمت .. وعصبت شويه

 انزين وتالي ..
ابد .. كلمت حبيبة قلبي فطيم .. واتفقنا انها تيي تتعشى عندي .. وارد اشتط .. وهااام تكنسل لظرف عائلي

 اووووف .. معاندتج هالليله ..

 شكلها كان هيك

 وشسويتي عقب
شنو بسوي يعني .. عشر ونص انا حاضنه مخدتي ومستسلمه لسلطان النوم

 يااا عوينتي

 ايه ايه .. ادري اكسر الخاطر

 انزين وباجي الإجازه
ويييه سكتي .. يوم ثاني كان الوعد اني اروح الأفنيوز مع لوير

انزين

ودخلت علينا استكانه عرض .. وغيرت المود .. وكانت الوجهه المباركيه

من صجج!! انتي والمباركيه
ليتج شفتي ويهي .. دهشه ما بعدها دهشه .. جني بديرة ثانية .. وجني طايحه على كنز .. وكنت مستمتعه الى حد الثماله بكل لحظه.. وكل ضحكه .. وكل سالفه .. وطيب هالصحبه .. وصفاء القلوب اللي حولي .. ونجرتنا على شغلات تضحك مثل انجلينا جولي .. وفلانه من الناس .. والبرد اللي دش بعظامنا واحنا قاعدين بدلق سهيل :)
اليوم كله كان استثنائي .. وتركنا بعض على وعد برحلة اخرى بس لمكان اخر

تحبينهم!!

يعادلون روحي .. صديقات المساء والسهرة .. صديقات الأزمات والإنفراجات الجميله .. وصديقات قلبي الصغيرون
شلون تقولين ماعندج انجازات للسنة اللي فاتت عيل؟

ما فهمت!!

محبة الناس انجاز .. شوفي الناس اللي حولج يحبونج .. وشارين خاطرج .. هذولي انجازج .. ولا تتوقعين هذا شي سهل

((صمت))


سكتي يعني!!

قاعدة افكر ... وصور كثيره لناس تستاهل قاعده تفتر براسي .. وعسى ربي يقدرني واعطيهم المثل ولا اقصر بحقهم ..

واللي ما يستاهلون !!
ما يشوفون شر والله معاهم

انزين قبل لا نختم .. شنو امنياتج لهالسنه

كثيرة .. وكبيرة ...

عطينا مثال
كتاب منشور باسم الزين

على برودج هذا ... ما اعتقد

بلعي العافية .. ولا تكسرين مياديفي

اوكي .. راح اصدقج .. وبنتحاسب على نهاية السنه

بيني وبينج الأيام :)

انزين .. ختمي اللقاء لو سمحتي
شقول يعني!!

مدري كفيج

تصدقين توهقت .. مدري شقول

اختم بدالج!!
ختمي

اسلم على امي وخالتي وبنات خالتي وبنات عماتي وربعي بالثانوية وشلة كلية التعاسه واقول لهم كل عام وانتوا بخير واحب اهديهم اغنية صافيني مره لعبدالحليم

(( تدفعها بعيدا وهي تضحك))


قلبي ويهج زين

.....

تم














هناك 36 تعليقًا:

Yara يقول...

كل عام وانت بخير

تصدقين عاد حتى انا هالسنه كنت هوم ألون
حسيت اني محتاجه هدووووء واكون مع نفسي ولو سويعات

سلمي على لوير فاقدينها

ARTFUL يقول...

كل عام وانتي بخير اختي العزيزة

والله يجعلها سنة خير وبركة عليج وعلى احبابج

:)

الليوان يقول...

تصدقين شكلي بسوي مثلج...
نو فاملي ماترز ان ماي بلوق

ملاحظة!!
اليوم منزلة البوست مبجر..

والمحبة هذي عااااد don,t ask
بكل لغات العالم حبيتك والله العالم

الله يحقق لج بهالسنة وكل سنة..امانيج واحلامج..
ويرزقج طاعتة ورضاه

:***

Sami يقول...

افتخر فيج

أحمد محمدي يقول...

تذكرت احدهم وهو يقول لي الحياة كلها خسارات .. يارب دعنا جميعا نربح الجنة فهي خير من دنياكِ الفانية وسنواتها المالحة

وشكرا

Safeed يقول...

النهايات، تستبطن البدايات.
لكن حين تقترب النهاية، ننشغل فيها
أكثر من انشغالنا بما هو قادم. ربما لهذا لازلنا أمة نعشق العيش في الماضي بدلا من الاكتفاء باستحضاره.

كل عام وأنتم بخير وعافية إن شاء الله.

عبدالله يقول...

صدقتي .. وكلام القلب دام يوصل القلب ..

كان خاطري اكتب بوستة او بوستات بس مب عن نهاية السنة ولابداية السنة لاني ماحب مرور الزمن .. امقته وبشدة :|

الانجازات الاهم ممكن تكون خاصة .. حتى اقرب المقربين مايحس فيها .. مش لازم حد يعرفها .. احنا البشر مش دايما نكون كتاب مفتوح .. ممكن تكون قلوبنا مفتوحة ولكن العمق افضله يكون مثل ماهو .. محد يشوفه ..

كنت احاول اكتب بوست ومش عارف وبوستتج خلتني انطلق في الكلام .. شي غريب .. ؟ ما اطول .. الله يحقق امانيج كلها :)

Unique Girl يقول...

حديث يونس من القلب لي القلب استمتعت بقرايته

هم انا عبالي مو مسويه انجان بهالسنه

بس صج تعرفت فيها على ناس ما تنتطوف

ربي يخليهم لي ويخليلج الي عندج

ويوفقكم يارب وكل عام وانتو بخير

غير معرف يقول...

حدهاااااااااااااااا واحشتني لوير
سلمي عليها وااااايد واااااايد
:(

Seema* يقول...

Heh
مساء الأماني الجميلة
والبوح اللذيذ

كل عام وأنتِ بحلم وأمل وطموح! :)

Haitham هيثم Al-Sheeshany الشيشاني يقول...

مرح / جذاب / و ممتع كلهم سوا

happy 2011

إن شاء الله
و بتمنى نشوفلك كتاب و الله :)

حوارك + كلامك داااائما ً حلو :)

* يمكن سمعت المقطوعات 3 مرات كاملة! حسك حلو بالموسيقى، يروقني

أنا اشتغلت فترة ك dj في الإذاعة و ما عم بحاول أبيّن الشضص الخبير و لكن من ذوقك بقدر أبصم بالعشرة و العشرين إنك صاحبة ذائقة موسيقية عذبة و أذن (+ روح) موسيقية احترافية

** ليه ===> خطر .. وممنوع الدخول! :)

Manal يقول...

حبيبتي الزين
كل عام وانت بصحة وعافية

الله يديم المحبة بالقلوب ولا يفرقنا ان شاء الله
معرفتج وصحبتج بالدنيا والله يعلم

:))

حبيبتي
قبل كم يوم
كنت اقرا تدوينتج بعد اول لقاء جمعنا
غورقت عيني
وعرفت صديقاتي
واهلي
والكل على مدونتج
واحسدوني اني اعرفج من قبل ما يشوفونج

لانهم المسو دفئ الاحرف الي تجمع كلمات وصل بين القلوب
الي تخترق قلب اي انسان
بسهولة
لانها صادقة

:)

اتمنى سنة 2011 تكون سنة خير على العالم
وبشكل خاص اتمنى اعرفج اكثر
الله يجمعنا على خير

سلامي لفطيم
;)

esTeKaNa يقول...

صديقة قلبي وروحي
شريكة الجنون
ورفيقه البوح
وأخت دنيتي وقطعه من روحي
.
.
كل العمر وانتي بخير
كل العمر وانتي جميله قلبا وقالبا
تدرين شنو الانجازات؟
ادخال السرور بقلب من يقرا لج
تفريج كربه كل شخص حولج
الارتقاء بكل لحظة بفكرج وروحج
والكتابات الجميلة اللي ابدعتي فيها
فضه..ونتم ندور وما زلتي كل يوم تبدعين اكثر واكثر

زيون ..الله يحفظج ويشرح صدرج ويسخر لج من عنده ويرزقج الفرح بقدر ما تستحقين واكثر
:***

استحيت يوم قلتي دشت استكانة على الخط ورحنا المباركية
هههههههه
طاح برستيجي بالقاع
الحين انا مسويه روحي كلش
:P
بس كانت طلعه ممتعه،جميله،ناطعه،لذيذه بلذه الجاي بالحليب،ودافئه بدفئ جاي الفحم
لا خلا ولا عدم
:****

ميمة السبيت يقول...

** حبيبتي يالزين يازينج و يازين سوالفج قوليلي منو ممكن يكرهج و لا يعاديج و انتي الزين كله يالغالية

Ra-1 يقول...

ههه كل عام وانتي بخير وسعادة :)

t7l6m.com يقول...

كل عام وإنتي بخير مستمر ونجاح متواصل وإنجازات متتاليه
وبإذن الله نشوف كتابج ونقرأ :
ذكريات متقاعده، وبوستات عن فوائد ومزايا التقاعد
يجعله عام سعيد للجميع وعام تتحقق فيه كل الأمنيات والأحلام
ويرزقني ربي إن شالله بيت يديد أكبر وأحلى وبعيد عن جيران السوء

الجودي يقول...

احترمت القسم الخاص جدا

كل عام وإنت بخير و صحة و عافيه يا الزين

وربي يسعدج و اتحققين أمانييج بالقريب العاجل و نكون أحد إلي اتوقعين لهم على الكتاب :)

و صافيني مره حبيت اهدائها لج

الزين يقول...

يارا

كل عام وانتي بخير وصحه وعافية ورضا من الرحمن يارب

يعني انا معاج كنا هوم الون
احلا شي

وان شاء الله سلامج يوصل
:)

الزين يقول...

ارتفل

كل عام وانت بالف خير يالشيخ
وعسى الله يرزقك الصحه والعافية ومحبه الناس اكثر

ويبارك لك بشيوخه وام الدل وصاحبة الجلاله امهم

:)

الزين يقول...

الليوان

:)
ترى وايد اريح لج
نحتاج خصوصيتنا يالليوان
ابعاد الأمور الشخصيه عن البلوق يعطيج مساحات بوح اكبر
جربيها وقولي لي

ايه والله نزلته بكير يايه من البيت وبخاطري اكتب

يا حبيبة قلبي
والقلوب شواهد
انا حبيتج اكثر ومن اول تعليق
:)

اللهم امين ولج مثل ما دعيتي يالشيخه

:**

الزين يقول...

سامي

:)
الفخر لي لأن عندي ناس مثلكم حواليي
اعدهم اهل واصحاب
عسى ربي لا يخليني

مشكور ياسامي وعسى ربي يحقق امانيك يارب

الزين يقول...

احمد محمدي

صديقي العزيز احمد
عسى الله يرزقنا رضاه ولا يحرمنا من قربه ورحمته ويجمعنا تحت ظله يم لا ظل الا ظله

وكل عام وانت بخير يالشيخ

الزين يقول...

سفيد

صديقي ذو الحكمه اللامتناهية
وذو الإطلاله التي احب
دائما وابدا تعليقك يحمل لي من الفكر شيء اخر مختلف وذو عمق متناهي

كل عام وانت بخير
وعسى الله يوفقك ويحفظك وينولك امانيك قول آمين

الزين يقول...

عبدالله

ما نحتاج رسول من القلب للقلب
صفاء القلوب هو مفتاح التلاقي يا عبدالله

تصدق عاد انا ما كنت ناويه اكتب
بعدين دار هالحوار بيني وبين نفسي
فقلت ليش لأ
:)

اقول لك سر
عندي بعض الإنجازات الخاصه جدا
بس مثل ما قلت انا ما اناقش اموري الخاصه هني
سو ما ذكرتها
:)

ومحبة الناس هي قعلا اجمل انجاز ممكن افتخر فيه
ومثل ما تقول امه ربك اذا حب احد حبب خلقه فيه
عسى الله يرزقنا رضاه

وهالمدونه بيتك ولك مساحتك الخاصه للبوح
قول اللي بخاطرك ولا تحاتي يالشيخ

كل عام وانت بخير تنعم بالصحه والعافية ورضا الرحمن يارب

الزين يقول...

يونيك جيرل

:*
يعني انجازنا واحد
:)
ومحبة الناس اكبر انجاز ممكن يحققه الإنسان
فرحي فيه واستمتعي معاهم بكل لحظه
ربي ينولج امانيج ويسهل دروبج يارب

الزين يقول...

غير معرف

@@

يعني اقول لها منو مثلا
!!

الله يسلمج من الشر

الزين يقول...

سيما

يا قلبي يا سمسم
صباح القلوب الطيبه والعقول النيره
والقرب الألذ

كل عام وانت اجمل وارق
كل عام وانت تشبهين الزين في جوانب مختلفه بس ماني قايلتها
سررر

وكل عام وانت بخير يالشيخة
:*

الزين يقول...

هيثم

صديقي العزيز
كل عام وانت بخير يالشيخ
واذا تحققت امنيتي وصار عندي كتاب
بتكون لك نسخه موقعه ان شاء الله
والترجمه ببلاش بعد شتبي
:))

وعليك بالعافية الميوزك
ومشكور على رقة وعذوبه الإطراء
وصدقني ذوقي على قدي

خطر وممنوع الدخول لأن المنطقه مليانه حفر وعمال يشتغلون
:)))

محتاجه ترميم واعتقد الوقت مو ساعفني عشان اصلح اموري بشكل مريح
قول الله يسهل
:)

الزين يقول...

منال

((HUG))
:**

منول يا قلب الزين
رغم المسافات وقلة التواصل والإلتهاء بامور الحياة
الا ان لج بالقلب مساحه كبيره
ولج معزه تهز جبال
تدرين عاد عن جد ولهت على سوالفنا
وقعدتنا .. وبوحنا
وهفت عليك ريحه ذيج اللحظه اللي تلاقينا فيها .. وتجابلنا نقول ونقول ونقول

:**

ورجعت قريت نفس التدوينه بعد تعليقج
وابتسمت
لازلت اشوفج بنفس العين
جميله .. جميله .. جميله
عسى الله يحفظج من كل شر يارب ويخلي لج اخيي صلاح والحلوين اللي عندج

يا قلبي
لي الشرف انهم يقرون لي
وراح اكون جدا سعيده بتواصلهم دام انهم من طرفج

عسى ربي يجعلها سنه حب وراحه ورضى من الرحمن عليكم
وعسى ربي يحقق امانيكم ويسهل اموركم ويرجعكم ديرتكم سالمين غانمين

:**

والسلام وصل يا قلبي
انتي بعد سلمي على اللي عندج

الزين يقول...

استكانه

صديقة الأيام الصعبه
والبوح المسائي
والحضن اللامتناهي لقلب الزين
صديقة ايامي
وخرابيطي المسائيه .. وهلوساتي احيانا
صديقة الحكمه والهدوء والطيبه اللي تعرف شلون تطخخ اعصابي
لوووول

كل العمر وانتي معاي وحواليي
كل العمر وانتي ايدج بيدي نخطي قول التعب ونكمل دروبها ونغرسها ورد وزهر

والله يا استكنكن انجازي الحقيقي هو انتوا
قربكم ومحبتكم وتفانيكم معاي
سماعكم لي وصبركم علي
تفهمكم لراسي اليابس وعسارتي احيانا
استعيباكم لإختلافي وتقبلكم لهذا الإختلاف
واكثر يا استكانه اكثر
شعد شخلي من اصحابي اللي يصنعون ايامي وانتي وحد منهم

عسى الله يحفظكم ويخليكم لي يارب

هاااو شفيها لين دشيتي عرض
تمونين يا قلبي
ودشتج علينا سلايد غيرت مودي وصنعت ضحكتي بهذاك اليوم
حبيت الطلعه والسوالف
وضحكاتنا واستهجانا وتطنزنا ودهشتي بكل شي شفته
وتحسفت اني ما شريت شماغ للحداق
:)

بنعيدها صح!!

عسى الله لا يحرمني من لمتنا
ولا يغير علينا
وتعالي خل نرقي نفسنا
اصل الحساد كتااار ياختي
:*

وكل عام وانت لقلبي اقرب واقرب
احبشش

الزين يقول...

ميمه

بعدي انتي
وبعد حيي

وماكو احد محبوب من الكل
صدقيني .. الدنيا ما تخلى والناس ما يخلون

ام شي انتي من الناس اللي يحبوني
الباجي كلش مو على البال
اقصد اللي يكرهوني طلعا

وكل عام وانتي بخير وصحه وعافيه ورضا من الرحمن
وعسى ربي يحقق امانيج ويفرح قلبيج يالشيخه
:**

الزين يقول...

Ra-1


ترى شفت ضحكتج وسمعتها
:)

عسى ربي يسعد قلبج يارب
وكل عام وانت جميله كما عرفتك
:*

الزين يقول...

تحلطم

لوووول
الله يسمع منك
باجي وايد يالشيخ .. الله يسهل

وعسى ايامك كلها فرح مو بس السنه
الله يحفظك وينولك امانيك ويعطيك بيت على قدك
:)
ويفكك من جيران السو على قولتك

وكل عام وانت بخير يالشيخ

الزين يقول...

الجودي

اتصور انتي عندج نفس وجهة النظر بالنسبه للجزء الخاص
:)

وكل عام وانت جميله كما عرفتك

وعسى ربي يرزقج الصحه والعافية ورضاه
ويحفظ لج حبايبج وغاليج

ومشكووور على الإهداء
:***

Haitham هيثم Al-Sheeshany الشيشاني يقول...

نسخة موقعة + ترجمة :) ... يا سلاااام

I will hold u to that btw
:D

قلتيلي مليان حفر و مطبات؟ همممم طيب ماشي، إن شاء الله الإصلاحات بتكون سريعة و متقنة :)

chــاي أخضر يقول...

يلااااااااااااا زيووون حداا نبي .. أحس اني مشتطة اكثر منج على الكتاب..

لج مني كل معارفي عليّ Pp;