.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

16.1.11

نكشه



سينما .... وفيلم جاد

صوت طحان نفيش .. ووحده وراي تكسر بنك باندماج مو طبيعي .. يعني ما تبلع ريجها بالمره .. وكلش مو على بالها الناس اللي حوالينها

عيالها يتهاوشون على الناتشوز .. وهي مندمجه بالتكسر .. وغااارقه بنكهة الملح .. حبيييبتي

الفيلم بصوب واهي بصوب .. وعيالها مطشرين الناس اللي يمهم بنجرتهم بكل صوب

"يمه عبيد ما يعطيني نفيش .. يمه حمود خلص الناتشوز عني .. يمه فيني !@#$ بروح الحمام!!!"

تلتفت عليها .. تنقزها بحجوة .. تقول شوووووش لعيالها .. الإخت غرقانه بالبنك وعلى بالها قاعده بدلق سهيل بالمباركيه

كان ودي حزتها اتسلق كرسيي واطلع لها انتشها ..

لكن شقول غير .. تبا لكم .. ويخرب بيت الهلاقه


بعدها بكرسيين او يمكن اكثر مدري ..

واحد ما لقيت له تسميه وبصراحه ما سمعت له غير همساته الجشه واللي ما فهمتها عدل .. ومعاه الإخت فاتنة المقاهي

الأخوان مواعدين بالسينما!!!

يا الهي !!!!

الشاهد ان الأخ مدري شكان يقول لها او يسوي لها لأن المؤثرات الصوتيه اللي كانت توصل لي مو ماشيه مع الفيلم كلش .. أبد .. بتاااتاً

تكركر على ودنه ومياعة مالقه .. واصوات اخرى .. احم ..مابي افسرها لأن كل تفسير يفشل اكثر من الثاني

وكان ودي ودي ودي .. وهم ودي اطل عليهم عشان اعرف شالسالفه بالضبط .. قتلتني بلاغة الشف

طبعا طلعوا قبل لا يخلص الفيلم بدقايق وما شفت وجيهم

حساااافه ...

وثكلتك امك يا هذا ..... مره ثانية لا تييبها السينما لأن البنت فضيحه



نيي للصفه اللي تحتي على طول .. بنتين ياحليييلهم وايد ستايلهم عجيب غريب .. بس المشكله مو بستايلهم .. المشكله بموبايل وحده منهم اللي كان يرن كل شوي ورنته اغنية راب .. والعجيب بالموضوع ان الأخت ما تسكر الرنه قبل لا تعرف منو داق .. يخرب بيت ذوقج .. رنة موبايل وراب .. ليش يا امي .. ليش يا قلبي .. خلصت الأغاني!!

طبعا غير انها طول الفيلم كل شوي رازة الموبايل تشوف مسجاتها .. وتكسر عيني بالليت كسره مو طبيعية

وسحقا لهيك جيل .. وايد عندهم ارتباطات مهمه


وطبعا احنا شعب الله المختار وما نتحمل نقد ولا نرضى احد يقول لنا ليش ومو عدال ولا سنع

عشان جذي لحية تحشمها ولحية تحشم نفسك عنها مثل ما يقولون

...


مشكلتنا بالكويت مع عدم ادراك حدود حرياتنا وخط انتهاءها عند بداية خط حرية الآخرين ...

مشكلتنا بالسلوكيات اللي صارت عامه مثل المرافق العامه .. مالها كلاس ولا فيها رقي ..

مشكلتنا لما توجه احد وتقول له هذا ذوق عام يرد عليك انا مرتاح مع نفسي انت شدخلك

استغرب من وين يتنا هاللامبالاة .. عدم احترام الآخر .. السلوكيات الخطأ بالأماكن العامه .. نتكلم عن اللبس والماركات والستايل والترند .. نشتري اغلى السلع .. واحنا ابسط اصول الأتكيت ما نعرفها .. ما نطبقها


التلعلع بالكافيهات شله .. اللي يمج تسمعج ترى

سوالفك مع صاحبك بالموبايل على حد صوتك ليش .. ترى القهوة مو ديوانيتك

عيالج يرمحون بوسط المحل عشان حضرتج تبين تتفرجين على النيو كولكشن وبيدج جيس بطاط !! تمشين وتنطعين فيه ... ليش .. ليش .. خاطري اعرف ليش

انت وصاحبة الجلاله ماشين وراكم ثلاث ارتيريات وحده ماسكة لها بنوته ام سنتين والثانية تدز عربانه فيها بيبي والثالثه يايبينها تشيل عنكم الجياس .. شهالزحمه .. هالبطر

زوجتك يمك .. وعيونك على طاولة البنات اللي جبالك !!!.. عيب عليك

تكلمين الويترس جنها فلبينية اهلج .. هم عيب عليج

تبي تدخل من الباب وجبالك بنت .. ما تعرف تنطر لما البنت تدش اول .. ليش لازم تسابقها على الباب وجتفك يطق بجتفها .. والله عيب ... وايد عيب

تبين تتفرجين على اللي بيدي وشدج ليش على بالج السالفه مدافع ومخامط... استغفر الله ..

واللبس اللي مو بوقته ولا مكانه فهذا موضوع ثاني وحدث بلا حرج

وعيالنا اللي كلهم معضلين وغصب يتحركون تحس فيه متوتب حده .. يا عوينتي

واللي يايه مو ماشطه شعرها على ابو انها ستايل .. ما قالوا لج انج جنج ام السعف والليف!

وقواطي الروب يااااربي .. متى بتنتهي هالهبه ..

ومراهقينا متى بيتعلمون ان الصوت العالي مو ميزه ولا مرجله

وبناتنا بسكم من الترصص .. الحشمه دليل على احترامج لوعاء يحمل روحج

وبس

بس ...

لو بتم اعد ماراح اخلص





همسه ..

كنت ابحث عن عينيك بين كل هذا الجمع التائه بزحمة المقهى .. علها تلتقي عيناي فتلثمهما بكل الوله المتعب بصدري .... وصدرك







هناك 54 تعليقًا:

Haitham هيثم Al-Sheeshany الشيشاني يقول...

الحرية مفهوم "نسبي" في النهاية! خخخخخخ

:)

الإخت غرقانه بالبنك وعلى بالها قاعده بدلق سهيل بالمباركيه

ترجمة بليز :)

الزين يقول...

ومن قال ان هذي حريه يا هيثم

تدري وين المشكله
بتفسير الحريه الخاطيء

لي عوده معك

بس افضي
لوووول

شكلي قاعده اهدد
:)

chandal/danchal!! يقول...

مساء النكشات
ولو انه ماله علاقة كلش
بس تذكرت زاوية لسعة للناقدة ليلى احمد

:)

زين تسوين ولا تخلين بقلبج, خبقي زبيلج وفضفضي عن الزين ومتابعي الزين

عبدالله يقول...

صراحة صراحة قريت الفقرة الاولى .. واعجبتني التعابير .. والا اللي مرته يمه ويخز في البنات ههههه ماله حل منتهي ^_^

ورجعت تحت قريت المكتوب بالآخر .. وحسيت انه بروحه يستاهل تدوينة : )

مايطلع من الزين الا الزين (حكمة اليوم)

الحــــر يقول...

أخييتي
الحريه ان تعدت الاخلاق أصبحت وقاحه
وتعريف المجتمع للوقاحه بأنها حريه أكثر قباحه

تحياتي

الليوان يقول...

للحين ما قريت بوستج..
بس عقب ما نزلت بوستي لقيتج منزلة والا نفس حروف العنوان مع تغيير حرف وااااحد
انتي نكشة
وانا نحشة
شنو هذا توارد خواطر... !!!

بقرا البوست وارد لج
:***

الليوان يقول...

قريته..

يختج القعدة بالبيت صايرة احسن موووووووو !!!

والله أأيدج ...نعرف نشتري لبس لعيالنا بس ما نعرف نعلمهم ابسط ادبيات التصرف خارج حدود البيت...

يختي والله عاللي يعصبون..

والهمسة يابنية قاتله
بس خلاص ..وقت امتحانات
خفي الهمسات لما تطلع النتايج
وبعدين عفسينا على كيفك

:)
:***

الزين يقول...

هيثم

شوف يالشيخ
متى ما كان معاك شخص اخر يشغل نفس الحيز اللي تشغله .. اذن حدود حريتك تنتهي عن حدود حريته

ما تكون راحتك على حساب راحته
ولا تصرفاتك على حساب وجودك
مراعاتك لوجود اخرين حولك هذا نوع من الأدب
تحفظك ببعض التصرفات واللبس
هذا نوع من الرقي
اختيارك لمفرداتك هذا تربيه صح
صوتك الواطي هذا اتكيت

ندعي المدنية وما ندرك ابسط اصورها
للأسف بعضنا يشبه فلاح ترك حقله بالتو وما عنده فكره شلون يتعامل مع البشر بعد ما كان تعامله مع سوري على الكلمه حيوانات وبهايم

هذا ممكن اعذره
بس اللي لابس اخر موديل وشاري لي سياره بهذيج القيمه هذا شلون اعذره
المدنية اصبحت مظهر فقط


اما البنك فهو نوع من المكسرات اذا صح القول وتلاقيه عندنا بالكويت بكثره
وبايران
:))))

احم

دلق سهيل هو مطعم شعبي في اقدم سوق بالكويت وهو المباركيه

وحياك الله يالشيخ

الزين يقول...

جندل

قلبي متروس يا جن جن من شي شفته يوم الجمعه

لوووعه
حسيت اني بكوكب ثاني
من وين طالعين هذوله
!!

انزين ياربي وين نروح
ان قعدنا تمللنا
وان طلعنا طقتنا البوهه

وخبقنا الزبيل وخلصنا
مع اني ما احب سوالف التحلطم كلش

مـي يقول...

أنا ماجربت أدخل سينما غير المركز العلمي ..
اليهال هناك زوغة ، كل واحد يحسب قاعد في بيت أبوه .. وعفويتهم شايله الصالة..

/

ماعلينا من هذا كله..
بس السطر الأخير ..
له نكهة خاصة .. وحديث خاص .. وحميمية المقهى ..

Haitham هيثم Al-Sheeshany الشيشاني يقول...

و الله معك بكل حرف بس... هيه هذي ال"بس" اللي تذبح!
في ناس حرام فيهم الكلام لأنهم حالات "بهائمية" ميؤوس منها

**** يا جمااااااااعة
الزين عازميتنا على بنك في أقدم سوق بالكويت... أنشرو الخبر :)))))

سبمبوت يقول...

يا سبحان الله .. كل ما ارجع من الديار البعيدة تحوشني كلتشر شوك،كأني نسيت إللي جرى وإللي كان بعدين اعزي نفسي واقول بس هذا الواقع. يبيلنا دهور عشان نشيل العفن ونزرع بداله جذور خضرا. صاااااااااااااااااااجه بكل كلمة قلتيها في شي مفقود في كثير من البشر .. كثير!

الزين يقول...

عبدالله

والهمسه اللي باخر البوست كانت هي الثقل كله

فعلا تستحق بوست

نحاول نكتبه هاليومين
:)

Sami يقول...

كلشي و لا "دلق سهيل " الي بالصالحيه .. نسينا ما كلينا :)

الزين يقول...

الحر

صدقت يالحر
هذا حالنا هاليومين
قباحه في قباحه
الا ما رحم الله

الزين يقول...

الليوان

القلوب شواهد يا ليوان قلبي انتي
:*

الزين يقول...

الليوان

ايه والله ايه والله
ابرك وايد من هالنماين المستشريه بكل مكان

اهو الرك على البيت يالليوان
اذا اهم خارج بيوتهم هالنمونه شلون داخل البيت

واذا الأم قاعده تكسر بنك بالسينما شتتوقعين من العيال

ايه ايه اعرف اعصب ترى
مو كلي دلع
:)

والهمسه طالعه من قلب
..

والله انا راحمه حالكم
ولا في بالي قصه شي ثاااني

:*

الزين يقول...

مي

ولا تدخلين الا في اي بي
هالأشكال يستخسرون يدفعون 6 دنانير للتذكره

شي يلوع الجبد

والسكر الأخير هو كل النكهه
:**

ووحشتيني

الزين يقول...

هيثم

:)
تعال اعزمك على مشاوي
وفطير مشلتت

الزين يقول...

سبمبوت

سارة قلبي
الكلتشر شوك هذي انا اعيشها كل ويك اند
وما احتاج اسافر
انا واصله مرحلة اني افكر اهاجر
وبدون مبالغه

وما اعتقد هذولي لهم صلاح
مسوين لنا غزو واكتساح
وين ما تروحين تلاقينهم

شنو الحل
!!

سلة ميوّة يقول...

ليش أنا الكويتيه الوحيدة التي ادور لحظة مفيدة لتسكير التلفون وتستغلها


عند باب السينما


يمه انا بدش الفلم مع البنات مدة الفلم ساعتين..عطيني ساعه بعد على ما اوعى واذكر اني صاكه الجهاز مو اتحاتين...سلام...

وحياتج...واطفييييييييييييييه...

ياربي الواحد يعني يوم قرر يدش السينما فهذي ساعتين من حياته قرر انه يهمل فيهم اي شي غير مجابل الفلم! خلاص..صك تلفونك!!!

واما عن قواطي الروب والترصص...
ياخيتي صايره والله اكره اطلع...
كل ماطلعت ورحت احد المجمعات:)
احس رايحه حفلة سواريه...!!!
والكل لابس نافش الا انا!!


شفيهم الناس ربي يهديهم...

وتعالي على العضلااات
ههه انا استانس اراقبهم واهما يحاولون ياكلون لهم همبرجر...

محاولات عقيييييييمه مايقدر يمسك البرجر من الصوبين...

اذا بعلق على كل اللي قلتيه ماخلص..وبتيني البجوة...

الزين...الله ياجرنا...هذا اللي اقوله...

الله ياااااااااااجرناااا!!!


لوف يو جيرل:**

الزين يقول...

سامي

@@

هاااو
انت متصور اني انا واستكانه ولوير نفس هالنماين عشان قعدنا بدلق سهيل


اقول لك تكسر بنك بالسينما يا ساااامي
ومن الصوت مو اي بنك
وعيالها يتهاوشون على الناتشوز
وولدها يبي يروح بيت الراحه على حد صوته يقولها

يااا راجل
!!

Haitham هيثم Al-Sheeshany الشيشاني يقول...

هايني بالمطار عم أقص البوردنج :]]]]

الفطير المشلتت هذا لإخواننا المصريين
أنا بدي لبنة/زيتون/ زعتر/ منسف :)

لوووول

ما تقصرين يا الزين

بنتشرف إحنا اللي نعزمك على الأكلات الأردنية + الشيشانية :)

الزين يقول...

سله

ومن سمعج وربي احطه على الهزاز
ما ابي احد ينزعج

وهاللي مواعدين يا علهم الصلاح
ليش يعني
ياربي السينما فيها ناس
ويهال
يسمعون ويشوفون
!!

عيييييييب
وايد عيب يا سله
انا اصلا افتشلت من صوتها
دلع ومياعه ..
اييييييو

انزين انتوا مو داشيت تشوفون الفيلم
احنا شذنبنا

انا من طلعت من السينما وانا اتحلطم على اختي
واتحلطم على الناس
وابي افر اطلع من المول

:$

ايه والله
انا محتسبه الأجر
لووووول

لوف يو مور بيبي سله
:*

الزين يقول...

هيثم

:)))

سريع الآكشن يا هيثم

تعال واحنا نعزمك على اكلاتنا الكويتيه
راح تستهويك ان شاء الله

بالمقابل انا ابي منسف
:))

شرايك فيني وانا اتشرط
لا خلا ولا عدم يالشيخ
وخيرك سابق

t7l6m.com يقول...

أحس الأعصاب شابه حمر
يابابا حطيت مدونه كامله إختصاصها التحلطم وما قلت نص اللي قلتيه بهالبوست
شوفي أول بوست لي علشان تشوفون مناحي أخرى للتحلطم في بلدنا المعطاء حق ناس نصهم مو كفو
Welcome to kuwait

panadool يقول...

لووووووووووووووول

أمحق على هيل جيل
وحتى الجيل الياي

موصج هالسرعة بالتغيير للأسوأ

ناقصنا بس سينما سيارات
حزتها تعال فجج

Safeed يقول...

واقعيًا، السبب هو أن الناس تتنازعهم رغبتين الحريّة والعدالة، وفي ظل طغيان واحدة يتم التوجه للأخرى، على ((إطلاقهما)) لا يمكن لهاتين الرغبتين أن تتواجدا.

طبعا المقصود بالكلمتين بالمعنى العام، حريّة وعدالة عامّة مو فقط "سياسية" كما يتم تصويرها حاليًا.

مجتمعنا في الكويت قاعد ينحو منحنى فقدان العدالة الاجتماعية، في الاسرة وفي البيت وفي العمل وفي اغلب مجالات الحياة، هناك شعور عام بالغبن وعدم العدالة، فلان معاشه اكثر مني وما يشتغل مثلي، فلان شهادتي احسن منه وصار مسؤولي، هالزلمة ياخذ مكان والكويتي قاعد، امي ما تعدل بيني وبين اخواني .. إلخ الاسطوانة المعهودة.

وفي السنوات الاخيرة بدت هالحالة تزيد اكثر واكثر لدرجة إن التحلطم صار وجبة يومية عند الكويتيين للتذمر.

في ظل الشعور بعدم العدالة يتم الاتجاه نحو ممارسة متطرفة للحرية، وأولها هو ((التحرر)) من قيود المجتمع، فهي ابسط مبادئ يمكن عصيانها بدون مقاومة كبيرة.

لذلك للاسف هذا النوع من التحرر الزايد انعكس بواجهة التحرر من اخلاقيات وآداب المجتمع بشكل عام، واخلاقيات وآداب العرف الديني بشكل خاص. هو نوع من التمرد على عدم العدالة ونزوع نحو الحرية لاثبت الوجود في قبالها.

المسألة تتشعب أكثر .. لكن بكتفي لهني ..

واشوه اني مقاطع السينما من سنتين :)

Engineer A يقول...

والله يا زين قلتي نص اللي بخاطري ..

يبيلي اقعد واجابلج مجابل واعزمج على تركش كوفي بس مو بمقهى بليييز وافضفض لج النص الباجي

هالناس ماتدري ان حرياتها توقف عند حريات الآخرين وان في شي اسم ادب .. اخلاق .. ذوق .. بس مع الاسف هالقيم معدومه عند البعض

انا حضرت فيلم الاسبوع اللي طاف والله ما تهنيت فيه ! مادري اركز مع احداث الفيلم اللي جبالي والا مع الياهل اللي يحن بحضن امه يمي واللي قعد يبجي بجي زين ما رجع بحضني!!! والله عيب واستغرب من هالام اللي ولا هامها !!

يعني لو ولدي والا بنتي تبجي بالسينما - مع ان هالشي ماراح يصير لاني ما اخذ عيالي عروض متأخره وافلام ما تناسب عمرهم - من يحن اسحب نفسي على طول واطلع ولا اسبب ازعاج للاوادم ! صج عجبه !


وعلى اللي يمشون ووراهم ٣ خدم شايلين عيالهم واجياسهم هذا زين ،، مره شفت واحد ومرته بروحهم ووراهم فلبينية شايلة اجياسهم !!! لييييييش؟؟ عيزانين يشيلون جم جيس بروحهم؟ لي هالدرجة وصلوا الناس؟؟

والا الاخ اللطيف ومرته اللي عشتوا تخاف على اظافرها لا تتكسر .. طالعين مع عيالهم ( ولد وبنت) وكل واحد ماسكته خدامه شكل !! والله استغرب بصراحة ! لا وجان زين مقعدينهم يتعشون معاهم بنفس الطاولة مخلين اليهال والخدم بطاولة واهو ومرته بطاولة ثانية ليش مطلعين عيالكم بعد جان طلعتوا بروحكم !!!

صج شي يقهر لا وبعد عندي تحلطم وايد بس ما ينفع قلت لج يبيله قعده :)

سوري على الطواله :)

الجودي يقول...

ايه يا الزين غردي يا قلبي غردي

ذاك اليوم أبد نفس الموقف الفلم جد و السطر إلي وراي كله يهال و الأم حاجزة سطر ثاني بعيد عنهم و ما اظن عيالها بروحها ياعني جان عيال الزوارة كلهم يايبتهم السينما و يتهاوشون و ناس اتنظ على ناس وهي أبد خبر خير مو حولهم و مع التعوكس الله يسلمج إلي ريل البنت بظهر كرسي ... بس يا ماما .. بس يا حبيبتي ... التفت عليهم عطوا اختكم إلي تبي لا اتزعلونها ... هذا في البداية عقب عاد خلاص التفت و قلت لهم إلي اطلع صوت يا ويلها و عقب شلت عمري و مشيت امحق فلم بشوفه طيروا أبو التركيز وما شفت منه شي ولا أذكره مير مااذكر إلا مطامرهم وراي و كل اشوي كافخين ظهري

و طبعا هالسالفه دايما تصير إذا مو ياهل اتلاقين الحرمه إلي وراج اندمجت و شاتت الكرسي ..ما ادري هذه الحركه شنو يسمونها

أما السطر الأخير هذه الزين إلي نعرفة الله لا يحرمنا من رومانسيتج :***

BookMark يقول...

ايه يالاتكيت
اهو بصوب واحنا بصوب

انا دشيت سينما البيرق
لاتشوفين الحضانة الي هناك
الناس على بالها بروي مو سينما تهد يهالها وتمشي تتسوق :/
لا والأم السنعة توصي المراقب الهندي على اليهال: شوف هذا ثلاثة بجا أوكي !!

والله صرنا ماندري وين نروح
يعني لازم نسافر عشان نستانس!

وحيد في المنزل يقول...

ما عندي شي اضيفه اكثر من اللي قلتيه
بردتي قلوبنا فيهم
كرهت روحة السينمات بسبة هالاشكال
و كرهت الطلعه بعد
و احاول قد ما اقدر اخلي بيتي مملكتي
حتى سينما في البيت مسوي
لكن مرات الواحد وده يغير جو
بس ملاحظة
الموسيقى الراقية االي اسمعها و انا اقرا الموضوع بصوب
و هلاقة الناس اللي تتكلمين عنهم بصوب
هههههه
شكرا الزين

أحمد محمدي يقول...

السلام عليكم

الحل الوحيد تروحون الفلم في اواخر عرضة لما تكون السينما فاضية وفي اماكن مافيها زحمة او مناسبات
او اشتركوا بشو تايم !

اما باقي الامور الاخلاقية فالكلام اهني ما يحلها

وشكرا

الزين يقول...

تحلطم

:))
اووه ما شفت شي يا تحلطم
والله يا تحلطم الوضع صار مزري والناس صارت تهوى الهلاقه

امس اسولف مع صاحبتي واتفقنا ان يا نصير هيلق مثلهم عشان نتعايش مع الوضع
او نهاجر

الحل كان ان احنا نهاجر

تهاجر معانا!!

الزين يقول...

بنادول

جيل مولي
جيل تعبان
تصور عاد عقب جم سنه مخرجات هالجيل
شنو بيكون المستوى

!!

من صجك انت سينما سيارات؟؟

جان علوووم
قول الله يستر على هيك ناس وهيك منتاليتي

وحيا الله بنادول

الزين يقول...

سفيد

ودي اصفق لك
:)

التفسير اعجنبي جدا
منطقي ومعقول
الإحساس بعدم العداله الإجتماعية والتفاوت الواضح بالمستويات خلق عند البعض نوع من التمرد
وصارت السالفه انت عندك انت تقدر
انا بعد عندي واقدر
وكل من يضع نفسه بمقارنات مع الآخر
والمقاريه هذي تخلق نوع من الفوضويه والفضاضه بالتصرفات العامه
واختلاف حاد بمقاييس الذوق العام

عدم الرضا والقناعه هي سبب اخر لما نشهده من مظاهر ندعي انها من تبعات المدنية
واهي مالها شغل بالمدنية بالمره

وبالفعل الموضوع متشعب اكثر من جذي
واتمنى اشوف له موضوع عندك
:)

وشكلي بسوي مثلك واقاطع السينما ما وراها الا الخساير والمغثه

مشكور يا سفيد على كل تعليق جميل تتركه عند الزين

الزين يقول...

انجنير ابرار

يالله انا ما عندي مانع
:)

ARTFUL يقول...

الهمسه خطيييره

D;


مادري ليش كان ودي اروح السينما بس كرهتيني فيها

بروح مباراة الفحيحيل والتضامن!!

الزين يقول...

الجودي

@@

من صجج!!

لأ لأ لأ
الوضع فعلا مزري
ولازم يكون في قوانين فعلا صارمه لمرتادي السينما
ويمنعون دخول الأطفال على حسب تقييم الفيلم

والسطر الأخير اهو كل السالفه
:**

الزين يقول...

بوك مارك

امبيه
وانا على بالي اللي شفته وايد
سالفتج مو صج
هذولي من وين يايين
شنو ثقافاتهم
!!

بالضبط
صرنا لازم نسافر عشان نعيش مثل البشر
استغفر الله

الزين يقول...

وحيد بالمنزل

بالضبط
تقول مليت من حكرة البيت وودك تغير جو
ترجع البيت راسك شايب من شي شفته

تهقا اغير الموسيقى واحط شي يناسب الهلاقه اللي شفتها لووووول

شكرا لك يالشيخ على المتابعه

الزين يقول...

احمد

وعليكم افضل منه

انا ما اشوف تي في
ولا عندي اهتمام لا بالشو تايم ولا غيره

وروحتي السينما للأفلام اللي تسوى المشاهده فقط
مع العلم اني ما احب طلعة الليل

مناقشتي لأفكاري
او الفضفضه اللي سويتها
اوالتحلطم اللي صار
اعتقد انسب مكان له مدوني ومساحتي الخاصه فيني للتعبير

وفيك تشوف شكثر في اراء جميله استفدت منها
مثل راي سفيد
والحر
وسبمبوت
وسلة ميوة
وجميع الأخوة اللي عطوني من وقتهم وشاركوني تجربتهم

:)

هني هناك مو مهم
المهم نناقش افكاري حتى لو كانت بسيطه
مشاركتنا لبعض بتجربتنا تثري جميع الأطراف

مشكور على رايك

الزين يقول...

ارتفل

الهمسه خطيره لأنها مختصره
:)

ونصيحه مني لاااا تروح
الا اذا بتدش في اي بي

غير معرف يقول...

ترى حتى انتي ماكنتي تطالعين الفيلم الا اذا همم كانوا الفيلم اللي جايه انتي تشوفينه ..


طنط حشريه ^^

الزين يقول...

غير معرف
"حشريه"


عفوا بس اهم كانو وراي فمو معقوله بترك الشاشه وبجابل وراي

ثاني شي اصواتهم العالية منعتني من التركيز على الفيلم
واللي خلاني قاعده ان اللي معاي يبون يكملون

اخر شي حبيبة قلبي
شنو مضايقج بالموضوع!!

انسان يقول...

معاج بكل شي كلتيه الا بنقطتين المجسم والي ترصرص اعتقد هذي حريه شخصيه بعيده كل ابعد عن الاذيه


شكرا على البوست

صفحات مُلطخّة بحروفي يقول...

للحرية حدود ،
تنتهي عندما تمّس حُرية الآخرين ..

آنه أكثر شي يقهرني الصبيان
الزعاطيط اللي يتمشون والزقارة
بيدهم ، على أساس إنها رجولة =|

t7l6m.com يقول...

ماكو هجره إن شالله
ولازم نتحالف كلنا ونخليهم يزهقون من الهلاقه
قاعدين على جبود الخمّه ويا إحنا ويا إحنا
لازم يتعدلون وبنتطنز ونعلق على سوالفهم ليما يتعدلون
وبإذن الله النصر حليفنا

U know WHO يقول...

يا صباحووو زيووونة..

هلقني واهلق : هذا حال الديرة الحين
مو بس اللي يسوونةبالكويت، تعالي شوفي البدايع اللي بره الكويت ,,,
عشتو يعني صارو كشخة ويروحون ديرتهم لندن اشفييج وعينج ماتشوف الا المهلقة !

كل واحد يعكس تربيته وبيئته ,, هذا نتاج الـ .... أقول ؟ ولا مالي خلق اعكر مزاجي ومزاجج ؛)

اما على السينما .. في الفالنتاين حضرت فلم المفروض رومانسي في احدى سينتمات لستر سكوير.. السينما فللل !!
الحلو باللي كانو وراي من ديره مجاورة.. ههههههه سوو الهوايل ماسووها الانجليز والاجانب اللي بالسينما كلها .. تمنيت ان كرسي السينما يفتر واجابلهم واشوف الشو متى بيخلص .. +18
دة كان حتتة شو ما صارررر ؛)

ودي افضفض بس استحي !!!

اشرايج نسوي جك لست , هلاقه ستايل وكلاس ستايل يمكن يمكن يشوفونها ويهبون فيها ويتسنعوون !!

الزين يقول...

انسان

اصبت
يمكن بهالنقطتين ما كنت موضوعيه
وتكلمت عن رأيي وذوقي الخاص

اعتذر منك ومن بقية القراء

اسعدني وجودك وحياك الله

الزين يقول...

صفحات ملطخه بحروفي

زقاره
!!
لا هذي تهون على اللي تكوكس مرتين جدامي ب 360 وربعه يصفقون له ويصرخون يشجعونه

شي شي

الزين يقول...

تحلطم

يعني نسوي حمله عليهم
!!

يازت لي الفكره

نزيد من بوستات النكشات

الزين يقول...

يونوهو

امبييييه
انتي ملاحظه هالشي
دلوا الطريج ..

شوفي انا ما اقعد بلندن على طول انزل كاردف
بس في رحلات التسوق المكوكيه اشوف شي ما شافته عيني من قبل
تطقني البوووهه

الظريف بالموضوع ان وين ما تمشين يمشون وراج
وشنو تشترين يقلدونج
@@

واخزيااااه
عيب والله عيب

تهقين هذولي لهم عدال وسنع
والله يا حبيبتي لو يتسنعون باللبس
لكن السلوكيات بتم هي هي
استغفر الله

عندي من السوالف ما يشيب له الأطفال
ولندن وباريس صارت لهم يا ماما
شوفي لج ديره ثانية
انو روحي بوقت المدارس

:**
وحشتيني يالغلا كثر ماكو بعد

Seema* يقول...

يزاج الله خير
بردتي جبدي!

إن شاء الله توصل "النغزة" لكل من تعنيه.