.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

11.9.07

نور ... اخذيني معاج


الزين : صاحية؟….مو نايمه؟

نور : صاحية

الزين : اقدر اسولف معاج شوي

نور : قولي

الزين : تعبانه

نور : من شنو؟

الزين : من الظلمه

نور : ادري

الزين : شدراج؟!

نور : احس فيج

الزين : تشوفيني؟

نور : دايما .. أنا حولج وحواليج

الزين : ولهت عليج

نور : وانا اكثر

الزين : ما عندي أحد اقول له

نور : قولي لي أنا

الزين : انتى هناك

نور : وهنيه بعد

الزين : بيقولون مينونه

نور : ما يدرون .. ما عليج منهم .. لا تفكرين باللي بيقولونه

الزين : فراقج ذبحني .. ورمضان على الأبواب.. ساعديني اعدى هاليومين…. احس اني
قاعده اختنق بدونج

نور : لا تقولين جذيه .. أنتى اقوى

الزين : ماني قادره اواصل

نور : عشاني بتواصلين

الزين : شلون .. وايدج مو بيدي

نور : بتقدرين

الزين : صرت ما أعرف نفسي

نور : بس تعرفيني انا … اتبعيني

الزين : تذكرين لما كنا صغار.. تذكرين رمضان

نور : اذكر

الزين : تذكرين لما كنتى تيوعين تالي الليل وننزل نطبخ

نور : ههههههه .. اذكر.. مرقة الربيان

الزين : ههههههه .. كانت بربس

نور : كانت حلوة

الزين : تذكرين سهرنا لين الصبح .. تذكرين السوالف

نور : انتى تذكرين؟

الزين : لا تسأليني .. انا عايشه على هالذكريات

نور : ثبتي أكثر

الزين : ابيج يمى …. ابي اتسند عليج

نور : انا رحت خلاص … انتى كملي

الزين : خليني اشوفج .. خلى الحلم اييبج عندي

نور : مو بكيفنا

الزين : نور

نور : صبري واحتسبي

الزين : صبرت … والصبر مر

نور : حليه بالإيمان

الزين : قاعده احاول

نور : حاولي اكثر

الزين : غرفتج مثل ما اهي

نور : اشوفها

الزين : ودي يرد فينى الزمن وتكونين هناك

نور : ماكنت مرتاحه .. كنت وايد تعبانه
الزين : ادري .. كنت احس فيج

نور : كنت اداريج

الزين : تغيرت …ما عدت الأولية

نور : انكسرتى

الزين : وايد … روحتج اكسرتني

نور : غلطانه

الزين : ليش؟

نور : اللي يحبونج وايد .. واللي محتاجين لج اكثر .. حطي محبتج لي فيهم

الزين : انتى غير .. مو مثلهم

نور : ما عليه .. ماكو احد مثل احد

الزين : ابيج انتى

نور : انا مو عندج

الزين : ليش ما علمتيني شسوي قبل لا تمشين

نور : انا لمحت لج .. انتى ما استوعبتي

الزين : كنت قوية لأنج يمي … ما هقيت ان ليه طال الوقت بضعف جذيه

نور : منتى ضعيفه .. يتهيأ لج .. كنتى اقوى منهم كلهم

الزين : كنت اقوى عشانك

نور : والحين صيري بعد عشاني

الزين : تعبت .. تعبت يالنور … ابي الضوى يدخل قلبي

نور : اهو موجود .. دوري عليه .. انتى اللي معتمته

الزين : خذيني معاج … خذيني عندج

نور : خلج واقعية .. هذا مو تفكير.. هذا ضعف

الزين : محتاجه لوجودج يمي

نور : عمرى ما تركتج .. روحي دايما معاج

الزين : عشان جذيه لما رحتى .. روحى انا اتبعتج

نور : زيون

الزين : ابي اصيح

نور : صيحي .. بس تذكري اني ارتحت

الزين : ابي ارتاح معاج

نور : ذكرينى بالخير … ادعي لي .. محتاجه الدعاء

الزين : ربي يرحمج

نور : ربي يصبرج




هناك 41 تعليقًا:

khaled يقول...

للـغلا عنـوان اسمه ذكرى الزمن الجميل
فـ دعي أحبابك بـ قلبك فـ هم ملح الحياة حتي وان رحلو عنا اي كانا سبب الرحيل
جميل الصبر بتحمــل ذكرى جميلة والخوف يعني الحنين الي الماضي :)

shakshaka يقول...

allah e9abrich enshalla yalzain.. edma3at 3aini 3la hal 7ewar broo7i 3la 6raif an6er elshaaarah 7ag elbachwa hehehe

غير معرف يقول...

lefraq 9a3eb adre wo mafe kelma btwasech :( bs yalzain kelna n7tajech wo nabech entay tadren eb mokantch 3ndna:(

ur biggest fan :( love u :***

Q8DOLL يقول...

اسم الله عليج
والله يصبرج يالغاليه
هذا رمضان حلووو ويذكرنا بحبايبنا اللي فقدناهم
عزانا ذكرياتنا
حبيبتي

a7La eNG يقول...

غرقت بدموع
.
.
و اذا رحتي معاها
وين نلقى الزين ؟؟
.
.
الله يمسح على قلبج
و يصبرج
و يجبر كل كسر
عساها بروضة من رياض الجنة
و تحفهااا الملائكة
.
.
من عرفت هالمكان و انا اقول فيه شي
أثاري الكلام يطلع من قلب غير عن اي قلب ثاني
زين قوية .. هالشي معروووف
لكنها .. انسانة
تحتاج للحظات الضعف و الحزن
تفرغ شحنتها السالبة
و ترد لنااا
زين على زين
:**
.
.

qesat_5ayal يقول...

زين
احنا أحيانا نميل
بس ترى ما ننكسر

خلينا نميل بمرونة
عشان نرجع نوقف بقوة

الله يرحمها
ويرحم موتى المسلمين


لنا الصبر
لنا الله

النحيـس يقول...

يا الله

ربي يرحمها و يسكنها فسيح جناته
و يصبرك يا الزين و يمسح على قلبك

الزين

نور اللي تعرفك غير عن الناس
و تحس في كل همسة فكر و حس في داخلك
تقول انك قوية و طول عمرك كنتي قوية

احنا مالنا كلام ثاني
:)

صباح الخير يا الزين

1001 Nights يقول...

bachaiteeni...
La 7awla wala guwata illa billah...
I am so so sorry. Alla ybarid 3ala galbich.

الله يرحمها و يغمد روحها الجنة

Broke يقول...

الله يعين قلبك يا الزين

المناسبات دايماً ما تثير مشاعر الحنين بقوة لأشخاص غابوا عنا

بس أحس انه احنا محظوظين لأنه نقدر نعبر عن مشاعرنا بالكتابة .. و مثل ما قالت لي احدى الصديقات قبل فترة ..الإستشفاء بالكتابة أمر عظيم


::

غير جذي
تدرين شنو يعني أرتاح لما يزوروني و يلموني بالحلم .. خاصة بالعيد

أقوم من النوم مستانسة .. كأني شايفتهم صج


أتمنى انك تحظين بنفس الشعور كل ما نفذ صبرك

7osen يقول...

احس إنج من فترة مو مرتاحة

هذا رمضان ياي وأهو يهدي النفس والروح

الله يوفقج إنشاءالله ويصبرج

والله يرحمها

بوست وااايد مؤثر

:(

magnoonah يقول...

مابي اكلمج ولا حتى احاجيج واذا صرتي قويه وطلعتي من انكسارج وعرفتي ان الدنيا ما تسوى


تعالي قولي لي


قبل ما اروح كل عام وانت بخير وتقبل الله طاعتج
(الله كبير وقوة العبد بقوة قربه من ربه)

5roofa يقول...

الله يرحمها

واااي قطعتي قلبي جد الله يعينج وي ثبرج و يمسح على قلبج يااارب

slamt 5aytoo

sqalamz...

esTeKaNa يقول...

كل ما اقبل رمضان
نتذكر كل حبيب فقدناه
اهم بنعمه
دام لهم قلوب محبه
ماتنساهم بكل ركعه
وتدعي لهم بكل سجده وحزه
عسى الله يرحم نور
ويسكنها جنات النعيم
ويصبر قلب الزين
ويرزقها اجر الصبر
اللهم امين

مبارك عليج الشهر
كلنا خواتج يا الزين وانتي لنا الاخت الحبيبه والغاليه
:**

charisma يقول...

بوستيين وما قريتهم
:/
انا احب بوستاتج ما يطوفنى شى
رادتلهم ان شااءالله
بس بقولج مبارك عليج الشهر حبيبتى ومن عواده
وان شاءالله اجازه انا بمضان
وقاعدتلج
:**

MANAF يقول...

كل عام وانتي بخير

وعساج من العايدين والفايزين يا رب

محـــــارة يقول...

الله يرحمها ويغفر لها .. قادره بعون الله تعيشين وتسعدين بحياتج إذا أنتي تبين هالشيء

الله سبحانه أخذها جسد بس روحها فيج .. والأهم أنج تصادقين نفسج ولا تعاقبين حياتج عل فقدانها فالأكيد راح تكون سعيده أكثر إذا شافتج سعيده بحياتج

أدعي ربج والي يحبونج أنوار مو نور وحده بس الأهم الزين تغلي وتخاف وتحب الزين

الله يحفظج وينور دربج

محـــــارة يقول...

نسيت اقولج كل عام وأنتي بصحة وسلامه .. زيون حبيبتي شوفي الجانب الحلو بحياتج ووكلنا حواليج

النحيـس يقول...

مبارك عليكم الشهر

و عساكم من عواده بكل الخير يا رب

:)

charisma يقول...

الله يرحمها ويقمد روحها الجنه امين
وفعلا اهم محتاجين الدعاء منا
لازم ما ننساهم
اهم السابقون واحنا الاحقون
عصرتى قلبى يالزين

حاسه بكل كلمه
ادرى فراقهم صعب
:(
الله هم لا اعتراض

:**

Shather يقول...

الله يرحم النور ..
و يطرح البركه بالزين و يصبرها ..

الكل رايح ما يبقى الا وجهه سبحانه ..

الله يصبرج و يصبر كل من فارق غالي او حبيب ..

ZoZOta يقول...

خالد

هم ملح الحياة فعلا يا خالد

:)

اشكرك على كلماتك الرقيقه

ZoZOta يقول...

شاكشاكا

اسمحى لي

والله ما قصدت ابجيج

:*

ZoZOta يقول...

غير معروف

انتى وبس

يا بعدهم

:**

ZoZOta يقول...

كويت دول

الله لا يحرمنى منكم

ومن تواصلكم

:*

ZoZOta يقول...

احلا مهندسه

فهمتينى واااايد زين

:*

ZoZOta يقول...

قصة خيال

انتى اليوم التعليق المفضل عندي

ننحنى بمرونه بس ما ننكسر

صح

وايد صح

:*

ZoZOta يقول...

النحيس

اقدر اقول لك صباح الخير

تثنى على كلامها

وتقول لي نحيس

بس عفيه ابي عنوان مدونتك

اذا سمحت

وجودك الدائم مشوقني اقرا لك

:)

ZoZOta يقول...

1001 night

الدعاء ثم الدعاء ثم الدعاء

اعينوني وادعوا لها معاي

مشكوره على وجودج اليوم

ZoZOta يقول...

بروك

بالضبط

الإستشفاء بالكتابه

هذا اللي قاعده اسويه

تحملوني بانكساراتي

بحزنى

بتعبي

بالنهايه انا مالي غيركم يقرا لي

ويسمعنى حاليا

بعد غيبتها انا لجأت للكتابه

وصارت اهي المتنفس الوحيد لي

فسامحوني اذا ثقلت عليكم

الحلم

آآآآه يالحلم

ما تصدقين لما اشوفها شلون ارتاح

احس انها فعلا زارتني

الله يوعدني

ZoZOta يقول...

حسين

مشكور على الأهتمام

ما تقصر يا خوي

ZoZOta يقول...

مجنونه

ما تبين تكلميني

الله يا قلبج

تقدرين على زعلي

وانتى يعني تدشين تزفيني وتطلعين

على العموم

ناطره زفتج لي يوم عرسي

:)))

ZoZOta يقول...

خروفه

:**

ZoZOta يقول...

استكانه

:*

القلوب شواهد

انا فقدت اخت وحده

بس الله رزقنى بخوات وايد

لو بعدهم ما اخلص

كل اللي علقوا عندي

كل اللي تعاطفواوياي

كل اللي سمعوني كلمه حلوه
نقد

كل اللي احرصوا يشوفون جديد الزين

كل اللي حبوا الزين من غير ما يعرفونها

كلكم خواتي

شفتى شكثر انا حظيظه

ربي لا تحرمنى منهم
ولا يحرمنى منج يا استكانه

ZoZOta يقول...

كاريزما

علينا وعليج

ويتقبل منج صالح الأعمال يارب

وناطرتج

ZoZOta يقول...

مناف

وانتى بخير وسلامه

وينعاد علينا وعليك بالعفو والعافيه

ZoZOta يقول...

محاره

يا بعد جبدى والله

كلامج مثل البلسم

:*

ZoZOta يقول...

النحيس

كل رمضان وانت بصحة وعافيه

وينعاد عليك ويتقبل منك يارب

ZoZOta يقول...

كاريزما

صحيح

اللهم لا اعتراض

:*

ZoZOta يقول...

شذر

اللهم آمين يالغالية

الله يتقبلها يارب بواسع رحمته

:*

نون النساء يقول...

الزين
.........
.........

من لحظات هالضعف هذي يالزين
تنبثق القوة على الإستمرارية
بالرغم من كل شي


:**

ZoZOta يقول...

نون

:**