.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

16.7.07

الزين ..... كلاكيت ثالث مره


الزين .... كلاكيت ثالث مره

الزين : الأوتيل عجيب ... خيالي

هو : مستانسه

الزين : وايد ما تصدق شكثر ... بس ناقصنى انك تكون معاي

هو : شلون

الزين : بسيطه ... ادز لك سعفه بس تمسك عدل
.. نص ساعه وانت عندي نشرب شاي مع بعض بالبلكونه
هو : خوش فكره

الزين : صج ... يعني انت بتيي عشاني لو عشان الشاي

هو : الأثنين يالزين ... الأثنين


الليل تقضى وخلص

شبقى فيني من شوقي تدور عليه

بعلومك انا ابخص

عندك مليون شي تنشغل فيه
بنيتي انتظر العمر كله

وبنيتك تعطيني شوية ثواني

هو : شسويتي اليوم ..... وين رحتي

الزين : كل شي اوو ولا شي .... تدري ودي اسبح بالبحر... ابي الشمس تلوني
ابي الملح يذوبنى ... ابي التراب يغازلني .... وابي هذيج النخلة تضللني
.. ابي اكون جزء من الصوره اللي جدامي .. احسها .. المسها .. اذوق طعمها

هو : سبحى ..... بحر عمان كله لج

الزين : تيي وياي نسبح يميع

هو : انا مو مال بحر ... انا حدي حمام السباحه

الزين : ايه صح خلنى اسبح بروحي مثل الميده

هو : هههههههه مينونه

الزين : اكيد مينونه خصوصا انك ماتحب الميد
.. بس تدري انا ما عندى مانع اصير لك صبوره

هو : انتى حورية

الزين : همممم ... حورية كويتية في بحر عمان .... يا سلااااام
... وايي حداق عماني يصيدني ويعطيني الدانه عشان ارضى فيه

ألا يا نول

علمنى ليه رماني دهري وسط الجول

ونجل فيني بدروب الهوا حلو الزول

الا يانول


هو : انتى من وين تييبين هالحجي

الزين : منك ... منى ... من الجو ... من الحاله اللي اعيشها

هو : أي حالة تقصدين؟؟

الزين : لا تشغل بالك ... انا حالاتي كثيره ... وكل يوم لي حاله

هو : وممكن اعرف شنو الحالة اللي انتي عايشتها الحين

الزين : ما اعتقد تبي تعرف

هو : يعتمد

الزين : علي؟؟؟

هو : على الحالة

الزين : اوكي ... انا ابيك الحين يمي .. بهاللحظة .... ابي اشوف عمان بعيونك
... ابي احسها بكلامك .. بلونك ..... حتى بسكوتك


هو : الزين ..... وينج

الزين : موجوده .... ما تحتاج تدور علي .... اشتقت لي؟

هو : اكيد

الزين : شكثر

هو : مادري

الزين : يعني شلون .... هذي شلون افهمها بالله

هو : مادري يعني وايد

الزين : ليش احس فيك بعيد

هو : انتى بعمان

الزين : انت بعيد بفكرك ... بروحك .. بقلبك ... الدروب اهي اللي تتباعد مو القلوب

وانت بعيد.... بعيد وايد

الزين : تعال نحلم

هو : شنحلم فيه

الزين : ايدي بيدك .... تسايرني واسايرك ... تراب البحر يلاعب ريولنا
... تلون عيونك سماي ... وعطرك يلف هواي ... وانسى الدنيا وانت معاي

خطاوينا على تراب البحر تلف فينا دنيا كلها اسرار

خطاوينا تسير الهوا فينا وتحجي قصة الماضي قصة البحار

ترك اهله ترك ناسه

ترك الثغر الذي باسه ... ترك عالم ما داسه

ركب بانوش معلي شراعه دوم ومخلى

وراه عالم يسرى كما الأحلام ... يقول يا مال

خطاوينا تجر فينا حنين سنين

قصص اسرار

لها في قلبي بيت ودار

وسط صندوق مبيت

حزاوي امك وامي

وديرة جدك وجدي

ودانه تأسر البحار

وتدري شصار.... لقى الدانه..... نسى اهلة

نسى من باع الدنيا من أجله

وصار بعيد
بعيد عن العين .... وبعيد عن القلب

هناك 31 تعليقًا:

Almas يقول...

مرحبا

رائع يا زوزوتا

كلام جميل وتسلسل بالأفكار عجيب

عيشتينا في جو القصة

جد رائع

تسلم إيدج

Eva يقول...

روعة يا الزين روعة

جد I mean it

هو : انتى من وين تييبين هالحجي
الزين : منك ... منى ... من الجو ... من الحاله اللي اعيشها


هالمقطع , ينّني ، ذكرني بشي
شي حلو أكيد ، والله ينّني !

___

وعطرك يلف هواي ... وانسى الدنيا وانت معاي


و العطر ، العطر بروحه قصة صح ؟ العطر لما يشكل قصة و قصيدة و شي يكمل كل شي حلو
أو شي حلو يكمل كل شي

ZoZOta يقول...

عزيزتي الماس
حياج الله بمدونتى المتواضعه
وجدا سعيده لأني امتعتج

وان شاء الله ما تكون آخر زياره

ZoZOta يقول...

ايفا

الرائع وجودج عزيزتي

:))

ادري انج عشتى الجو والقصه

اقرى البلوجات السابقه وبداية القصه في كل الحكاية اشتقت لك
والزين كلاكيت ثاني مره

اكيد بيعجبج اللي راح تقرينه

الله يحفظج حبيبتي
واتمنى ما تكون آخر زياره

NewMe يقول...

عندما نفترش الرمل
يلفنا عشق السماء
يصبح الهيام ضرورة ملحة
مثلهما تماما
ليت شواطئ عمان ورمالها
تحتضنهما معاً
جميل الخيال الذي رسمته في عقلي
دومي بحب
تحياتي

محـــــارة يقول...

ليش جذي ؟؟؟!! ذبحتيني معاج يا زوزوتا أي زوزوتا صج أنج الزين كله

تعبت من كثر ما أقرأ وتطلع الأااه من عمق قلبي تنشط فيني الذكرى الي نستها أيامي

الزين أو زوزوتا بسألج يمكن تكونين أدرى ليش لهم نفس الرد حتى نفس الذهول .. ونفس الحجي واحنا هايمين نردده ونحلم فيه

الله يقطع بليس الحب الي ماله ريول

واصلي والله يسامحج :( .. يا حلوج ويا حلو قلمج وعذوبته

Mishari يقول...

تصدقين كرهته ؟
ليش ما ادرى

الأستاذ بلاليط يقول...

صباح الخير

نعم كما اسلف الجميع لقد عيشتينا القصة من بدايتها الى نهايتها


الله يعطيج العافية

ZoZOta يقول...

new me

لولا جموح الخيال ما استطعنا الإستمرار
انا عن نفسي ما اقدر اعيش من غير خيال

تسلمين يالشيخه

ZoZOta يقول...

محاره

اسم الله عليج من الآه وتنقطع ايدي قبل لا اذبحج يالشيخه

اخييييييييه يا محاره
والله ما عندي رد على سؤالج
مادري والله مادري

بس الموضوع قاعد يخليني الف حوالين نفسي
وايد يسألوني نفس السؤال

اذا عندكم احد يعطيني الجواب
دليني عليه بلييييز

ZoZOta يقول...

مشاري

:)

والزين بدت تتعب
والخاطر شكله بيطيب

الله يسهل

ZoZOta يقول...

الأستاذ بلاليط

اتمنى ان تكون القصه قد اعجبتك
بس صدقني نهايتها قريبه

خلك معاي

عثماني يقول...

قلمك عذب يا زوزوتا

مليئ بحبر الرقه و الهيام

فليسلم لنا قلمك

hamdool يقول...

كلام إنسيابي ويدش القلب

إستمتعت وآنا أتطفل عالحوار

بين شخصين و إندمجت وايد وياهم

تسلم الأيادي اللي كتبت



بس اللس زعلني شي واحد

لما دخلت شفت ال

profile views: 888

يعني آنا ييت خربت هالرقم الحلو

بس راح أعوضج بالكومنتات أوكي

:)

esTeKaNa يقول...

تهقين عذوبه ورقه الزين
عشق الزين
فكرها
وخيالها
هو شي متحفز ومستعد للحب فيها؟
او هو انعكاس لحبه لها؟

بمعنى...لو لم يكن هو هو

هل كانت الزين بهذه الروعه؟

ZoZOta يقول...

عثماني

يا حيا الله الشيخ
لك وحشه
وينك ماشفنا لك شي يديد من زمان
مشتاقين حق سوالفك

مرورك اليوم جدا اسعدني

ZoZOta يقول...

حمدول

اول زياره لك واتمنى ما تكون آخر زياره
سعيده ان الحوار اخذك للحظة عاشتها الزين معاه

اتمنى انك تكون قريت الحوارات السابقه
راح يعجبونك

ZoZOta يقول...

استكانه الغالية

سؤالج خلاني اوقف للحظة مع نفسي وافكر

اعتقد ان شوية من الأثنين

الزين لين حبت تكون انثى من عالم اسطوري
تعطي ولا تبخل تعيش الحب لأقصى حد
تكون كل النساء
تعيش كل القصص
تهيم بمشاعر لم تكن قد عرفتها من قبل
تتذوق العشق كفنجان قهوة في الصباح الباكر
يسقيها الحياة
تشرب لترتوي
وتخضر
ويملأ اريجها كل الكون

اكيد وجوده في حياتها له دور
هو بالذات

Mishari يقول...

أحسن /:D

ZoZOta يقول...

مشاري

:)
انت وايد شايل عليه
تهقا احسن انها تفل ، تترك

تعبت وانا افكر

SolaimaN يقول...

هالتصفصف بالحجي يونس

:)

ماشالله عليج،جني قاعد معاهم

بس لوعتي جبدي بالاخير الله يسامحج

:(

كل هالشوق وهذي اخرتها؟

ZoZOta يقول...

:))))))

لوعت جبدك عاد يا سليمان الله يهداك
ما عليه نعوضك بالبلوج الياي
مرنا مره ثانية
وان شاء الله تلقى اللي يسرك

:)
بركد جبدك هالمره

SolaimaN يقول...

ايه هذا الحجي

مشكوره زميلتي العزيزه

:)

فراوله يقول...

مساالزين
لكل الزين
غاليتي زوزوتا..كم نعشق وكم نحب..وكم ننتظر لحظة لقا في من نحب
بذمتج هو يستاهل كل هالمشاعر من الزين؟؟
اتمني النهاية تكون أسعد مما نتصور
دمت بحب
ابدا
:)

Fahad Al Askr يقول...

حبيت عمان من حديثك، والبوست أكثر

Mishari يقول...

ما احب اللى يتغلى على غالية

لما يكون فى وحدة تشيل الريال بالكلام شيل لازم اهو يبادلها بنفس القوة

hamdool يقول...

Ra7 agrahom bs eb shar6 wa7ed >>
etha ketabtay esmy 3adel

ana hamdool

mo

حمدول

;p

ZoZOta يقول...

عزيزتي فراولة

يا ليت النهاية كانت بيدي

كانت راح تكون غير شكل

ZoZOta يقول...

فهد العسكر

لمن ادين بشرف الزيارة يا فهد

حياك الله
عمان بلد جميل وشعب اجمل وانا ما ذكرت الا احساسي فيها

اتمنى انك ما تقطع زياراتك

ZoZOta يقول...

مشاري يا مشاري

القلب وما يعشق

الله كريم

مشكور على اهتمامك

ZoZOta يقول...

hamdool
hamdool
hamdool

يالله عاد اقرا الباجي الحين

:))