.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

17.8.09

قصص معلبة ... الجزء الثالث


"عزيزتي نوف


تبعت التفاصيل معك .... التهمتها عيناي ... وتشبعت بها حواسي ... وحبستها أنفاسي ... لأرتويها شعورا آخر ...


نحن نعشق بكل خلجاتنا يا نوف.. يغادرنا العقل عندما تتسارع دقات القلب ... وتلهث بنا الأيام وراء حلم نتمناه... فنتبع خطاهم ... ونهمس ذكرهم ... ونعطيهم دون انتظار للمقابل ...

وبانتظار لحظة اللقاء ... نذوب وننصهر
فاخبريني ... هل التقيتيه ؟
شفتيه يا نوف
وشلون كان اللقاء ... شنو حسيتي .... واهو شلون كان معاج
شنو قلتي
وشنو رد عليج!!
ولما عينج تلاقت مع عينه ... كنتي بهالدنيا لو بدنيا ثانية

وشرايج نحط هالتفاصيل بالبوست الياي؟؟
إذا ما كان يضايقج ... أو يضايقه اهو .... أبي أحداث اكتب عنها ... أحس البوست واقف عند مشاعرج واحاسيسج إنتي بس


ما اعرف اهو وين كان ... معاج على الخط ... سابقج بخطوة .. آو إنتي سابقته بخطوات

لا تطولين علي بالرد ... وخلينا نخلص قبل رمضان
:)

كل الحب



الزين"









"حبيبتي الزين


أول شي الحمدالله على السلامة ... أتمنى تكونين ارتحتي وغيرتي جو


أنا ادري شغلتج بتفاصيل قصتي ... بس ما تصدقين شكثر سردج لها ومشاركة الناس لي معطيني إحساس بالراحة ....ويعجز لساني عن شكرج يالزين ... وربي يريح قلبج مثل ما ريحتي قلبي


نبلش نكمل يالزين

استمرت أحداث قصتنا بين مكالمات ابلش فيها يومي ... اشاركه تفاصيل حياتي واهو نفس الشي .. كنا مع بعض بكل لحظة ... البيت ... الدوام ... الشارع ... ليل نهار ... حتى اثناء النوم ... كنت أفز على طاريه تالي الليل وأكون ولهانة ... ساعات أطاوع نفسي وارفع التليفون عليه ... وساعات يعور قلبي يالزين وأقول اهو شذنبه ........حتى وآنا نايمه ... قلبي يشتاقه ....


افتح عيني على إحساسي بحاجتي له ... لصوته ... ولإحساسي بالأمان وأنا حواليه ... صار النوم ماله لزمه ... يتعبني لأن اهي الفترة اللي يكون فيها بعيد عني ... وساعات كنت اغفي وانا اكلمة ... تصوري يالزين ما يسكره ... اوتعي الاقيه معاي على الخط ... اقول له ليش ما سكرته ... ويكون رده شي ثاني ... يحسسني اني انا دنيته ... تصوري يالزين لما يقول لي ان كان ساكت ويسمعني اتنفس .... لما تحسين ان اهو يحب فيج حتى صوت انفاسج اللي انتي اصلا ما تدرين عنها ..... شكثر ممكن يملكج بهالكلمة ....


آنا يالزين كنت أتريا الفجر .. انتظر شمسي تشرق ... لأني ادري أن يومي بيبتدي فيه
تعرفين إحساس العطش المتواصل ... هذا آنا ... حد ما شربت ما ارتوي


وتسئليني شلون شفته؟


تدرين شعوري الحين شنو ... أبي أغمض عيني واسترجع الوقت ... نفس الصورة ... نفس التفاصيل ... نفس الشعور ... نفس الفرحة ... ونفس الخرعة
:)
ايه خرعة ... ومن قلب



الموقف كلش ما كنا مخططين له ....أو على الأقل آنا ما كنت متوقعته

كنت يا طويلة العمر مارة الجمعية قبل الدوام عشان آخذ لي سناك للظهر وعادة يكون بينا تليفون هالحزة

وكان اهو معاي على الخط وآنا اسولف معاه واخذ شوره شنو اخذ لي وشنو اشتري .. تفكيري كان كله مع صوته ... آنا قلت لج اني احب صوته!! مع إني ما اقدر أقول عنه إن حلو بس كان وايد يحسسني بالأمان ... معاه أنسى إن للكلام معني ... واسرح بعيد ... غريبة يالزين شلون شغلات صغيرة ما تشوفين لها أهمية ومع اللي تحبينه يكون وقعها مختلف ... واحساسج فيها غير

المهم قبل لا اشط واتغزل بصوته اكمل لج اللي صار
:)
الشاهد إن صوته كان مع الحوار اللي داير بينا يجرب ... وأنا مو ماخذه بالي ... ومشتطه بالسوالف ... ويجرب أكثر وآنا حتى مو قاعده اتساءل شلون صوته صار قريب لغاية ما التفت ولقيته واقف وراي


ولا تسئليني حزتها شنو كان شعوري

تاهت المسافات يالزين ... وكل الكلام تناثر ... والأنفاس تبعثرت ... ومدري الصورة اهي صارت مهزوزة جدامي ... ولا هذي رعشة قلبي ... مدري هذا النفس كان داخل صدري ولا طالع من صدره ... مدري هذي العين هي دنيتي ولا عينه اهو ..... هذا لونه لو لوني ....هذي ريحته لو عطري
منهي أنا في وجود اللي يعني الوجود .....منهي أنا بين الكلام ... إذا عيا الكلام يوصف لحظة وقف فيها كل شي .. وصارت الدنيا ممر بجمعية وعيون تناظر كل ما فيج تبي تشبع منج ... وشهقة تحمل خليط غريب من المشاعر ... خرعة ... على لهفة ... على شغف ... وحيا ممكن يلجمني
وبرد .... برد ... برد ....... والدفا كله واقف جدامي

وقلبي ... قلبي اللي موراضي يركد ... دقة لي ... وعشر له ....وبلحظة ينبت لي جناح ... وشعوري له اهو سماي... احساسي له ماله مدى .... والمدى ولا شي يم احساسي
وادور الكلمة اللي بقولها ... واهو مبتسم وبيني وبينج وده يضحك على شكلي
وين السلام
مشاري
لبيه
آآآه يالزين .... يقول لي لبيه ... يخليني املك العالم كله ويلبسني اياه خاتم في طرف اصبعي واهو ينطقها ...
وجنا المسافات فقدت معناها ... وصار اللي بيني وبينه خطوة او اقل ... حتى عيني عيت تناظر عينه
فديت الحيا واللي يستحون آنا
يوز عني ... ترى شكلي بصيح
ليش عاد
شدراني ... لا تسألني أسئلة ما اعرف أجاوبها الحين
شفيج
شفيني !! ... بموت من الحيا
أدري
رفعت عيني فيه ... لقيت الدنيا استوت جدامي بهاللحظه شي ثاني
تدري ... ليش تسوي فيني جذيه
ما تبين تشوفيني !!
وكانت عيوني تبتعد ... خايفه تفضح جوابي ...
ردي!!
مشاري ... قلتها وكلي ذايب بمشاري
يا كله وبعده
اووووش ... ترى والله يغمى علي ... ماني حمل كل هذا
يبتسم

والله طلعتي طويلة مع الكعب منتي هينه
ايه ايه تطنز
لا والله زين طولج وانتي واقفة يمي واللي يعافيج لا تغيرينه
كلش ماكو اكثر من هيك احباط

كانت السوالف غير يالزين .. مختصرة بس تحمل كم من المشاعر بشكل ما تتصورينه ... وتوتري كان منعكس عليه ... يحاول يسوي كنترول على الأمور .. بس اهو متوتر اكثر مني .. الكلام اللي نبي نقوله وايد ... واللي تقوله عيونا اكثر ... ومع هذا ما قلناه
رعشة قلبي ... ورجفة ايدينه كانت تحجي عني وعنه
عيوني اللي تتصدد ... وعيونه وهي تلاحقها قالت كل شي ... شكثر اهو يبيني ... وشكثر انا ابيه

.............

ابي اوقف هني ... احساسي إن كل هالتفاصيل وهم ......... وهم
متعب الشعور يالزين
حيل متعب

اسمحي لي
سلام "


نوف

هناك 25 تعليقًا:

Framboise يقول...

اي يا نوف الشعور متعب صح بس عيشي هذيج اللحظه كنتي طايره وبتطيرينه احنا وياج لو ما هزة الواقع

aL-NooR . يقول...

اخيــــــــــــه يالزين ..نسيت اللي بالدوام ... و شغلي .. حتى فاتحة توكس باكله ..يسمع حسج ...ما كليته

وديتينا بيعـــد .. اقصى السما ..بتفاصيلج ..و تفاصيلها

مشكوووورة .. تستاهلين :*

*****************************

LaReina يقول...

صح انا مالي اي تجربه بهالشي اللي يسمونه حب .. بس انا بقولج شي .. الحب صح ما يستأذن قبل ما يدخل علينا .. بس نلقاه فجأه مالكنا .. يحركنا .. يخلينا نمشي بدون ما نفكر .. ونحن البنات يحليلنا يا حبنا للرمسه الذربه .. ومنو ما يحب هالرمسه ... بس في زماننا هذا .. ترى اغلى ما عند البنت عزة نفسها .. ولازم نفكر قبل ما نطيح طيحة ما نروم نوقف من بعدها ... يا نوف احترم شجاعتج وقوتج في استرجاع الاحداث وسردها .. واشكر الزين على سردها للموضوع ... بانتظار باقي القصه ..
همسه اخيره لنوف .. محد ترى يستاهل ..وياربي يعوضج باللي نسيج مشاري وطوايف مشاري

الاوركيده يقول...

هلا بالزين

بصراحة محد يقدر يلوم نوف لان الحب اذا صار مايشبأذن والمشكله اذا حبينا نستسلم بكل مافينا ومانفكر حتى لو كل شي واضح جدامنا بس مانشوف إلا اللي احنا نبي نشوفة بالشخص اللي نحبة!!!

الله يعوضج سانوف باللي يحبج ويصونج ويقر احساسج اللهم آمين

غير معرف يقول...

قبل لا ابلش تعليق أشكر الزين على سعة صدرهـا

وأشكر كل اللي ابدو رايهم بالموضوع واللي انصحوني لأني فعلاً احتاج نصيحتكم وانكم تحطون نفســكم مكاني قبل لا تردون

الاخت موزه اشــكر لك تفاعلك وكنت في يوم من الايام افكر مثلك إن مافيه أحد يســتاهل بس ســبحان من غير الموازين عندي وصارت هالعبارة فيها اسـتثناء
الســالفة مو بس رمســه أو كلام حلو
الســالفة كانت مشاعر يمكن ماقدر اوصفها وان وصفتها ماراح توصل بالضبط مثل ماهي
الســالفة ياموزة إني حبيت بكل مافيني وفكرت وقررت وحبيت

ميمة السبيت يقول...

** الموسيقى شي مو صج من وين تيبين هالسوالف .. صراحه كلها ذوق مثل اللي حاطتها

- مساء الورد عالزين كله :)

LaReina يقول...

ترى هاي المصيبه يوم تحب بكل ما فيك ..
وتنصدم في اللي تحبه ..
ومثل ما قويتي قلبج و حطيتي رسالتج بيدين الزين انا متأكده انج بتطلعين من هالوضع اقوى من اول ..
مثل ما يقولون هاي كبوة حصان .. الضحيه كان فيها قلبج ووانتي قدها يا نوف .. وسردج للموضوع ترى وايد بيفيدج لان فعلا بتشوفين الامور من منظور ثاني ..

أتيت متاخرة يقول...

واااااااايا خذت قلبي بالتفاصيل نوف
خذتني لقبل 18 سنة من عمري
خذتني لتفاصيل أول مرة اشوفه ..... وآنه اقرا تفاصيل لقاه استرجعت كل اللي صار لي حتى يدي بدت ترجف وقلبي صارت حالته حالة
أخيييييييييييييييييييه يضرب الحب شو بيعزب يا نوف

الزين ترى مالي خلق ونفسية لقصص الحب بس شاسوي بهالقليب اللي متعبني
يلا نوف خلصي قبل رمضان ..... لأن آنه قصتي بروحها يبيلها شهر مثل مسلسلات رمضان .

حسافتج يا كويت يقول...

حبيت اسلم واكون اول من يباركلج بالشهر الفضيل



مبارك عليج وعلى الاسرة الكريمة الشهر يا الزين

وتعودونة بالخير والصحة يا رب

Marwah Albahrani يقول...

الزين ..

بعد ما اندمجت بالقصة و حسيت دموعي تنزل

!!!!

وقفتيها ...

صعب يكون اللي تبيه مو لك

بس طول الوقت جدامك

بانتظار التكملة

تحياتي

قلب طفله يقول...

"" نحن نعشق بكل خلجاتنا يا نوف.. يغادرنا العقل عندما تتسارع دقات القلب ... وتلهث بنا الأيام وراء حلم نتمناه... فنتبع خطاهم ... ونهمس ذكرهم ... ونعطيهم دون انتظار للمقابل .وبانتظار لحظة اللقاء ... نذوب وننصهر ""


الزين صح لسااااانج و تسلم ايدج

:**


نوف

و الله احساسج و كل كلمه كتبتيها

قلبي يرجف معاهم و دمعت عيني

ربي يصبرج و يعينج :(

SHAHAD يقول...

لا لا نوف شناويه علي !!
زيووون ببجي :(
فيه شي ينبض يتحرك داخلي
ذكرتوني بشي عجزت انسااه يالزين


أنتظر التكملة بـ شغف

ميمة السبيت يقول...

* كل عام و انتوا بخير و مبارك عليكم الشهر :)

الزين يقول...

Framboise

:)


مهما نطير لابد يوم نرجع لقواعدنا

وانتي ناطرة الأيميل

قولي لي قريتي اللي وصيتج عليه

!!

الزين يقول...

النور

لووووول

اسم الله عليج حياتي انتي

:**

الزين يقول...

موزا


ومنا الى نوفا

:)

خليني انا اشكرج على ماتبعتج حبيبتي

:**

لا عدمناج يالغالية

الزين يقول...

دمعة المقهور

وبالمهلي حبيبتي



ومنا الى نوف

مشكوره يا دمعة على المشاركة الجميلة
:*

الزين يقول...

اتيت متأخرة

:))))

يغربل ابليسج يالسمية

ذبحتيني ضحك


اسم الله على قلبج وما عاش التعب
:**



ويالله انا بانتظار قصتج خل نشوف شعدنج

:)

الزين يقول...

حسافتج

يا هلا في بو الزين

يسلم عمرك

ويتقبل منك صيامه وقيامه يالشيخ
:)

الزين يقول...

مروى البريني


صعب يكون اللي تبيه مو لك

بس طول الوقت جدامك



اخيه يا مروى

وايد صعب

وايد

:**

لا تباعدين ترى انا وايد مستانسه اني رديت اشوفج عندي

الزين يقول...

قلب طفلة

تبين كلينكس

:)

امزح معاج

:**

الزين يقول...

شهد

يااا مرحبا بالشهد


والبقية

تأتي

:*

الزين يقول...

ميمة

وانتي بخير وصحة وسلامه حياتي

:**

كويتي يقول...

قصه اكثر من رائعه وانا اقرأ خنقتني العبره لاني عشت القصه بكل تفاصيلها وحسيت كأنها عني وما اخش عليج صار كل ما فيني يرجف لحظات العشق جميله واسعدها بلقاء الحبيب وتكون الساعات دقايق معاه وكلها ذوبان وانصهار .

كويتي يقول...

قصه اكثر من رائعه وانا اقرأ خنقتني العبره لاني عشت القصه بكل تفاصيلها وحسيت كأنها عني وما اخش عليج صار كل ما فيني يرجف لحظات العشق جميله واسعدها بلقاء الحبيب وتكون الساعات دقايق معاه وكلها ذوبان وانصهار .