.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

10.8.09

قصص معلبة .... الجزء الثاني


" حبيبتي الزين

تقبلي اعتذاري لأنسحابي سريعا ... فلقد كان اجترار الذكريات اصعب من ان تتحمله انفاسي المرهقة ....


وخليني اكمل لج قصتي ... انتي ما تتصورين شكثر عندي كلام ابي اقوله ... واوصله للي وده يعرف قصة نوف


تتابعت التعليقات من جانبه ... وتتابعت الردود من جانبي

ووصلنا حد اصبح التعليق والرد لا يفي بتجاذب الأحاديث بيننا هناك... ففضلنا ان احنا ننقل ساحة اللقاء الى الماسنجر ...

وعندما اعود بذاكرتي للوراء ... اجد ان احاديثنا كانت بسيطه وبعيده كل البعد عن مشاعرنا .... كانت احاديث تشمل الكثير من طبيعة عمله ... وقراءاتي المشابهه لإهتماماته ... كان ينظم الشعر ... وكنت معجمة وركيزة قواعده ونهاية قوافيه .... كنت اكتب في مجال دراستي وكان هو مرجعي بالكثير من الأمور ... لذلك كانت ارضية النقاش خصبة بيننا ... فتحت افقا اكبر وجوا مريحا لسبر كل منا غور الآخر ... ومعرفته بشكل افضل


كان صريحا معي لأبعد الحدود .... وكنت حابة صراحته الى ان اخبرني .....


نوف .... انا كانت لي تجربه بالزواج ... فشلت ... وكل ما اخذته منها هو الكثير من الخيبات ... وطفل صغير


انت كنت متزوج !!

نعم .... وما استمرت حياتنا الكثير ... انا ما ابي نتبدى غلط .... وابيج تكونين بالصوره

نبتدي .... ليش احنا ما ابتدينا!!

نوف

مشاري ... انت تعني لي الكثير .... بس احتاج افكر .... وضعك هذا يغير شغلات وايده ... ما ابي اخذ قرار الحين ... ولا ابي اقول لك ان الموضوع عادي

................


ابي افكر

من حقج ... وانا قلت لج عشان تفكرين صح ... ما ابيج تستعجلين

مشاري .... انا افضل اني امشي الحين .... ونكمل تالي

تالي

سلام


تدرين يالزين شلون موازيني اهتزت حزتها .... وشلون الموضوع صار له حسبه ثانية ... خصوصا اني توني رادة اثنين متقدمين لي بنفس الوضع ....



ومع هذا الموضوع ما اخذ مني الكثير من التفكير .... مشاري فيه كل شي ممكن يخليني اكمل معاه .... مقاييس الأهل ما كانت مهمة وايد بالنسبه لي حزتها ... كان كل شي فيني يطلبه .... ويبي يقرب منه .... حسيت اني منجرفه ناحية قصة حب راح توصلني السما ...


ولا تسئليني ليش كملت




!!



ما عندي الجواب ... ولما الحين مو لاقية جواب



كل اللي اعرفه اني كنت اصحى الصبح .... اسحب اللاب توب ... الاقيه شابك وناطرني
كل اللي اعرفه ان السوالف لها نكهة ثانية معاه ... وان يومي لازم يبتدي فيه وينتهي عنده
كل اللي اعرفه ان مشاري كان بالنسبه لي سما واسعة ... وافق ما ينتهي عن حد

وعلى ايده صرت انسانه مختلفه .... يمكن نضجت اكثر ... ويمكن صرت اشوف الدنيا بشكل ثاني ....



ويمكن دلاله لي خلاني احس اني امرأة مكتمله في سماه .... وما انكر اني ابد ما ينقصني الدلال في بيت اهلي ... لكن دلاله اهو كان غير ...... فاهمتني ... دلاله هوكان دلال الرجل لحبيبته ... نظرته لج توصل لي اقصى اقصاج ... تهزج ... وتحسسج ان انتي وبس



كلمة وحده منه تخليج تقولين ان هذي الحياة وبس ... وعتب صغير او زعلة صغيرونه تنسف يومج كله



بس تدرين .... انا ادري ان هذي سواة الحب اكثر من سواته


الحين عرفت

المهم بعدها رجعت له وكلي تبعه .... ما همني اللي كان ... اللي همني اللي بيكون
وكملنا .... كملنا يالزين

تدرين .... اول مره قال لي فيها ان يحبني كنت قاعده جدام تسريحتي ...
:)


وعمري ما شفت عيني تلمع مثل حزتها ... ولا روحي تشهق مثل لما سمعتها ... كلي تغير بلحظه .... تلون ... وصار ينبض بالحياة .. حتى قلبي ما كان يدق .... كان يشهق .... كان يتفلل ينتثر ... ويجتمع مع انفاسه واهو يقولها



حبيتني اكثر ... حبيت نوف اكثر لأن اهو حبها .... وحبيت كل تفاصيلي ....


حبيت حتى ابيات الشعر اللي قالها فزاع من يحبك كثر ما احبك انا وتغني مشاري فيها لي ... برجعتي من الدوام نرسمها سوى على كل تفاصيل الطريج ... على ارصفة الشوارع ... عند اشارات المرور ... مدخل منطقتنا... بيتنا .... وغرفتي



والأمور الصغيرة ..... مثل البسكوت اللي يحبه والكاكاو اللي يغيب معاه ... حتى العسل وقفشته الخشب ... كله يخليني اشوفه بشكل ثاني



شكثر يحب تراثنا وشكثر متعلق فيه .... ومو غريبه تلاقين جم كتاب ملازمينه عن المفردات الكويتية القديمه ... فهد بورسلي والخرقاوي وزيد الحرب


والكثير الكثير من ملامح مشاري ....

زيون ... انا حتى لما كنت اعصب ... واحتد ... واعلي صوتي .... وانسى ان اللي جدامي حبيبي .... كان يعرف شلون يمتص غضبي ويهديني ويحتوي كل ما فيني

من بعده اهو منو يقدر يواسيني .... من يقدر يمسح دمعتي .... ويحضن هم ليل ونهار يكويني .... من يداوي جرحي يالزين اذا كان اهو الجرح ..... مشاري




منو!!!

يتبع

هناك 34 تعليقًا:

ReLaaaX يقول...

عوار قلب :/


مازلنا متابعين :)

dm3t _almghor يقول...

بصراحة القصة وايد تعور القلب

صج الواحد اذا حب يشوف اللي يحبه غير حتى عيوبه تصير محاسن

ناطرين تكملة القصة

الله يعين نوف
:(((((((((

~ هند ~ يقول...

لأنها كانت تحبه .. كانت تشوف كل شي حلو

متابعه ..

الخيلاء يقول...

متابعه و على احر من الجمر

kuwaitawy يقول...

شي جميل لما تقرأ قصة حدثت في عالمنا



متاااااااااابع

aL-NooR . يقول...

ناطرة يالزين

بس جنة بسرعة خلص هالبارت P;

***********************

Sweet Revenge يقول...

:) متابعة

ميمة السبيت يقول...

* لايوقف :)

Manal يقول...

ما في واسطة
وتقولينلي القصة كاملة مو مجزءة
:)

بليييييز
اعزمج على قهوة شرايج
:)

أتيت متاخرة يقول...

للحين يالزين قاعدة اقرا .....
قريت كلام نوف ومشاعرها أكثر من مرة .... بس مو قادرة اكتب شي .... ولا اعلق

بنطر مثل الباقي تكملة القصة

أتيت متاخرة يقول...

ولا تسئليني ليش كملت






!!




ما عندي الجواب ... ولما الحين مو لاقية جواب


صعب هالشعور لما تعرف ان اللي تحبه مو لك ..... وتغالط نفسك وشعورك وكل ما فيك يتعلق فيه اهواااااااااا
صعب

Q80 Blogger يقول...

مشاااعر جميله

صج اذا واحد يبي ياخذ بريك من مغثة بعض المدونين .. يزور الزين !

fatto يقول...

عورتي قلبي يانوف

الله يصبرج حبيبتي

الم الحب الم مايحسه الي مار فيه

واتي يقول...

بقول لزين ولنوفاااا حبيبتي وأنا أقراء كلامج تذكرت قصتي حياتي وقصة عشقي

حبيت فوق 3 سنين ونص حدود 4 سنوات تقارب التفكير وقرب الأسلوب يعني تفاهم بالعقل وعقب القلب أخذ مكانه

قصه طويله عريضه تشبه كل قصص المحبين وبعد انتهائها على أرض الواقع أقولج من وحده مجربه

صدقيني الرجل صح يحب صح يعطي بس مايفدري روحه للحب مو مثل البنت تكون بايعه الدنيا بالي فيها عشان تحقق هالحب حتى لو كان كل بوادره مستحيل

كنت اعيش تجربة حب ومن بدايتها كانت لايمكن تكون بس هما كنت متوقعه أن راح يغامر عشاني بأمور وبلأخر صار يبي حياته وحبنا وأنا أبقى على الرف يتواصل معاي متى مارضى زمانه فيني

تزوجة غيره على أساس العقل وزواج تقليدي بحت ما أقص عليج وأقول قلبي يريف عليه لاااا ومن تجارب وسؤال البنات أن الحب الحرام استغفر الله متعته لأنه مبيوق ويكون ممتع لطرفين لأن مافيه إلتزمات أما متى ماتم الزواج راح يدش طقوس الروتين

المهم زوجي يحبني حب مينون ومو مقصر علي لا بالكلام ولا بالتدلع وبالمقابل زوج يبي إحتياجاته ويبي بيت كامل

حياة مشت بسلك المعتاد والي المجتمع يبيه تدرين شنو فرق حياتي الحين عن قبل أنها بين عيون الناس وربج راضي عليج مافيه تأنيب ضمير ولا خوف تموتين وماتعرفين شنو أخرتج

وأن الرجل الي فعلا يحبج وشاريج راح يعزج وتصرين باسمه مو بس مكان بقلبه إذا فعلا لج هالمكان ويكون بالظلمه

صدقيني حكمي عقلج قبل ماتستنزفين كل طاقتلج نصيحة مجربة والحياة راح تشوفين حلاوتها إذا رضى ربي عنا وراضيتي نفسج وعزيتيها


الله يهون عليج الإحساس الي تعيشينه عشته وتألمت عليه سنين وماقول إلا ربي يكون بعونج بس أخذي قرار عشان نفسج وتوكلي على ربج واستخيري بكل أمورج

حافظج الرحمن

كبرياء وردة يقول...

كملي :(

Najmah يقول...

mtab3a mn eb3eed w na6ra 3la a7ar mn eljmr
yalah kamlay
w ly ta3lee8 6weel lma af'9a enshalah

a7bich w miss u waaaayd

قلب طفله يقول...

اخ


عوار قلب و دمعة عين

ليش البنت اهي اللي تعاني

ليش البنت اهي اللي تتعذب

ليش البنت اهي اللي تغفر و تسامح

اخ بس اخ

ربي يعينج يا نوف


متااااااابعه زيووون


:*******

الزين يقول...

ريلاكس


:*

ومتابعتج تسعدني يالشيخه

الزين يقول...

دمعة المقهور


حياك الله

وماكو حب من غير عوار قلب



الله يعين القلوب كلها

:)

شكرا للزيارة

الزين يقول...

هند

اييييه ياهند

شفتي شلون عين اللي يحب غير

:**

الزين يقول...

الخيلاء

:*

ومتابعتج تهمني جدااا

الزين يقول...

كويتاوي

وكل شي ذكرته وراح اذكره واقع حدد مصير علاقة هالبنت بهالولد


خلك معاي ولا تباعد

الزين يقول...

النور

اهو البارت ما خلص بسرعة

بس ما ابي اطول عشان لا ينمل


:**

خلج معاي

الزين يقول...

سويت ريفنح

انتي ويييينج

وربي فاقدتج وايد

:**

الزين يقول...

ميمة

:)

تامرين امر

:*

الزين يقول...

منال

لوووول

لو قلتها لج كامله ما يكون فيها تشويق مثل الحين

:*

بدون واسطات

مو بنصير يران

قهوتج عندي ونسولف

:)

الزين يقول...

اتيت متأخرة

سميتي القمر

عطيها رايج
تحتاج مشورتكم

وراااح نكمل

:*

الزين يقول...

اتيت متأخره

اهو الحب

يغير الوان الأمور بعيونا

ويخفي عنا اللي ما نبي نشوفه

:)

الزين يقول...

كويتي بلوقر

:)

تسلم يالشيخ

وشهادة تعني لي الكثير واعتز فيها

ودايما لك مكان محفوظ بمدونة الزين

:)

الزين يقول...

فاتو

اسم الله عليج بعد قلبي

:*

الزين يقول...

واتي

شكرا لج

من اقصى القلب

على النصيحه الجميله

ومشاركتنا تجربتج

اتصور نوف قرت

واتمنى انها تستفيد من تجربتج

شكرا لج من اقصى القلب

والله يحفظج ويوفقج

:*

ولا تباعدين

الزين يقول...

كبرياء وردة

:*

ونكمل

الزين يقول...

نجمة


واحبج اكثر ومشتاقه اكثر واكثر

:**

الزين يقول...

قلب طفلة

:****

وخلج متابعه


ومشتاقين يالقاطعة

:)