لحن ووتر
وصباح ملئ بمتناقضات الألوان
يكتسحني تعب البارحه
النوم ذو عزة وسلطان ... يأبي ان يخضع لرجائي
البس ثوب الليل وانتظر ان تشرق الشمس
كان الحديث معها مطولا
حنين لأيام قد مضت وافتقاد
ويزيدني المطر حزنا ... كانت تعشق المطر صغيرة ... تحلق مع الغيمات ... تجمع الريح بين اضلع الفرح
والغريب انها كرهته فجأة ... باتت تكتئب مع ازدحام الغيوم على شباك نهارها ... تبحث عن الشمس في صدور الآخرين
وتسدل ستائرها مع اول زخه!!
ليش؟؟
ما احب الظلمة
بس انتي تحبين المطر
هذا مطر ما يروي يالزين
!!
تخفي عيناها ... بارعة هي بابتلاع غيومها ...
لا تمطر ابدا ...
..............
وتأتيني حلما ... محلقا بجناحين من وتر ولحن
تعزف على بقايا الأرق ... تهمس لي الأمان .... أنا بخير
ولهانة عليج
تلثم همستي ... وترتشف مطري ....
لا تبجين .... احنا قلنا ماكو بجي
احنا قلنا راح تتشافين
مو بيدنا يالزين
أدري .. لا تقولين لي شي اعرفه
ولا تعقليني ... خليني احزن مثل الباجي
خليني اصيح
ابي ارتاح ... دموعي تعبت
روحي تعبت .... النور ..... انا مالي ظل .... حتى انعكاسات الضوى ما تنفع معاي
انتي مغيبة الشمس ... مغربة الحياة ... وناسية ان للعمر باقي
بس مو معاج
معاهم .... معاهم كلهم .... يحبونج .... لا تنسين انهم يحبونج
ليش ما تزوريني الا اذا زعلت
لأني احس فيج .... اتعب معاج
عطيني بشارة ... ابي بشارة .... ابي اصدق ان باجر احلى مثل ما علمتيني ...
زيووون
انتي قلتي باجر ... وما مر عليج باجر ... رحتي من غير ما تشوفين باجر
زيوووون
لا تناديني
اصحي ..... انتي غرقانة
بشنو ... بالحلم
........
افتح عيوني .... الاقي باجر صار اليوم
واليوم الدنيا قاعدة تمطر
والمطر ما يروي .... ما يروي يالنور
عطشانة
.................
والعطش مطول زمانه
.............
وما ابي اكمل خلاص
كافي اليوم
..
