قصص معلبة ..... الجزء الأول

ليتني اقدر اجمع نجومي من على صدر السما
وازرعهم بصدرك
لجل عينك تشوف كيف اظلمت دنياي من بعدك

ليتني اقدر اعدي المدى ... وارسم بطرفي لون السحاب
واجمعه بلون الغياب
واعصره غيمه سخية تسقى سنين العذاب

ليتني موجه بحر... تلتهي بعــــــيد وما تعطش للنهر
ملحها مر .... وترابها سهر
وتنسى ان للهوى سلطانِ قوي.... إذا الخافق أمر

وتبدأ الحكاية

" عزيزتي نوف

آلمني جدا ما قرأت ... اشعل الأفكار المتلاحقة في نفسي ... واحيا وجعا كان ... وقد تناسيته .... وجعك ووجع الكثيرات مثلك...

موانع اجتماعية واعراف قد بليت ولم تعد تصلح الا لزمان قد رحل ....

موانع مذهبية تسقى من ماء آسن ... وتنبت عفنا قد اسقمنا وامتص روح الكثيرات منا

نعم سوف اكتبك ... وربما يقرؤك هو .....

ولكن قبل كل شي ...

ابيج تكونين متأكدة من قرارج ... ومشاعرج .... وما تكونين متحاملة عليه .... ولا ظالمة لنفسج ...

ابيج تطلعين بره الصورة ... وتعطيني التفاصيل .... ابي اجملها قبل اتعسها ... لا تخشين عني شي الا للضرورة القصوي او للحفاظ على هويته

ارحمي عيوب قد تكون جزءا من شخصيته واحببتها يوما ... ولم تبالي فيها .... ولا تقطعي حبال الوصل .... لله تصاريف ... وللدوائر لقاء... وانا اعلم انك سوف تلتقينه في يوم ما ..... هنا أو هناك

نحن لا نقطع جسورا قد تصل بنا لأرض قد اسعدتنا يوماً .... فلنترك له خط رجعة ....
وخلينا نحاول نترك له مجال يشوف قصتكم من وجهة نظر ثانية ... وممكن القراء يساهمون معانا برأي يحرك ما ركد من مياه مشاعركم او ان يصفى ما تعكر منها

وقبل كل هذا لازم تعرفين شغله ... الله ما يظلم بني آدم ... احنا اللي نظلم نفسنا .... وربج ما يمنع عنج شي الا فيه صالح لج .... وساعات في قصص حب افضل لها انها تكون مجرد قصه ... تنتهي على اعتاب واقع اقسى منها بعد ما نحارب عشانها ونمحي كل الخطوط الحمرا ... ونضحي بالكثير......ونهد كل الجدران اللي منعتنا عن لقاهم ....... حتى نصل لدقة قلب قد اسرتنا يوما ما

انا مع الرومانسية .... ولكني واقعيه لأبعد الحدود .... وماراح اشجعج على شي ممكن تهدمين معاه اشياء اهم واعمق ....

وماراح احكم عليج ... ولا عليه ..... ولا راح اوجه من يقرأ قصتك عند الزين لإتخاذ صف احدكم ....

انا راح اسرد القصه بس .... وبامكانج انج تعلقين بغير معرف اذا تحبين تقولين شي ما انقال .... او تاخذين لج زاوية وتتابعين وهذا ممكن يساعدج تشوفين الأمور بصورة اوضح او من زاوية ثانية

ولك الحق بأن توقفيني اذا ما اكتفيتي قبل النهاية ... لك الحق ان تنبهيني لنقطه تحتاجين ان اركز عليها ...

ولك الحق بأن تتوقفي لمجرد التوقف ......... هي قصتك

بانتظار التفاصيل

كل الحب

الزين"

" عزيزتي الزين

شكرا لك .... شكرا من اقصى القلب ... احتجت الفضفضه ... فكنت انت من تلقفتني على كفوف من الحب والإحتواء ....

تعبت يالزين ... والله تعبت .... يمكن تشوفين قصتي ما تفرق عن قصة فلانة وعلانه ..... وان الألم هو ما تغير .... بس بيتم الم .... وشوق موجع ... ورغبة بالإبتعاد رغم ان قلبج يوده .... ويحلم بوصله .... بس بعده اهون من ضعفه واستسلامه .... كل الظروف ضدي وضده ... بس انا كنت مستعدة احارب .... اهو قط اسلحته بسرعة واستسلم .... وين غلاتي عنده .... وين السهر .... وين الدلال .. وين نوفه اللي عشقها ... وين مكانها الحين بقلبه .... بسرعة رخص يالزين .... وبسرعة مشى

خليني ابلش معاج من اول

...................................

لي مدونة .... اكتب فيها ما يلفت انتباهي من مواضيع خفيفه وقصيرة .... وساعات افضفض فيها واسولف عن نفسي .... بسيطه بكلماتي ... وحرة .... كأني فراشه ...عشقت التحليق بين زهور تشبهني .... اقرأ للكثيرين والكثيراث .... واللي شدني منهم عدد قليل جدا .... الكل اصحابي ... فأنا ارى هالعالم بعين النحلة ....

وكل ما قرأت زياده كل ما عرفت زيادة .... اعشق الشعر بانواعه .... واحب العمق بالأفكار ... رغم اني قد لا اتقن كتابتها احيانا .... الا اني احب النص الجيد ... واعشق الكلمة الجميله ... ولي نظرة وراي بكل ما يكتب

وكان اهو يعلق عندي .... كلماته مختلفه ... له حس آخر ... بعد آخر ... وعمق شدني لمعرفة ما يكتبه هذا المدون

ايه مدون ....

ولا تستغربين ... هذا العالم يجمع الكثير من القلوب .... ثم يفرقها بكل قسوة ... نحن نتعارف فكريا .... نفهم توجهات بعض ... نتناقش ... نتفق ... ويمكن نختلف .... وتبدأ القلوب بالهمس ... دون ان يعي العقل ما يحدث ... مافي شي يترجم كل المؤشرات اللي ممكن تجذبج ناحية شخص معين ... وما تدرين شنو صار الا لما يكون صار وخلص

تعليق قد يشدك ... والآخر قد ينفرك ....
وبوست قد تتوقفين عنده .... والآخر ممكن تسبين صاحبه وتطلعين وانتي تحلفين انج ماراح ترجعين تقرين لهذا المدون او المدونة

وبين بوست ....... وتعليق ورد

اشتعل شي ما .... نقطة صغيرة كرأس الدبوس .... لم ادرك انها ستكبر وتتسع حتى تأكل كل المساحات المعبأة او الفارغة في صدري

ولازال قلبي مشتعل فيها ... وآآه يالزين .... شكله شي ما ينطفي حتى لو عمري انطفى .....

واهمس النقطه بصدري .... تنطق بيوفي اسمه ... مشاري

وبليز لا تغيرين اسمه ... سميه باسمه .... وقولي له ... قالت مشاري صاحوا الخلق لبيه من زينها كل الخلايق مشاري

فاقدته زيون ..... وايد .... وايد

اكثر مما يحتمله قلبي الصغير

. . .

سامحيني يالزين .... بس شكلي بوقف اليوم هني .... احتاج اجمع افكاري .... كلي تلخبط .... وكلي ينتحب .... يرتجف .... يطلب اطراف الوصل ....

كل الكلام وكل الهجر رجع لي بلحظة ... وكل التفاصيل

. . .

لي عودة .....

سلام

نوف"

يتبع