.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

25.3.08

مدونات .. مدونات .. مدونات


هو عالم آخر .. اكتشفت وجوده قبل سنة تقريبا يتراوح مرتادوه بين الجاد والساخر... الرومانسي واللي ما عنده سالفه ...اللي يبي يسولف واللي يحمل الحكمة بين كلماته مثل علامات الترقيم .. ناس تظهر ثم تختفي وناس تتابع دون ان تكتب وتعليقات منها المحابي والمجامل ومنها المعجب والمتأثر ومنها الحشرة مع الناس عيد.

أناس تختفي وراء الشاشه تداعب الأفكار خيالها لتقوم الأنامل بترجمة هذه الأفكار على الكي بورد ومن ثم تنقله للقارئ .

أسامي وهمية وربما اقنعه نخفي بها شخصياتنا لسبب أو لآخر .. شخصيات مختلفه نعيشها هنا في مدوناتنا ولربما تكون هي شخصيتنا التي لم يعرفها من حولنا من المقربون وغيرهم .

ناس تكتب عشان تعمر وناس تكتب عشان تدمر وهكذا الحال بالنسبة للتعليق والنقد .. ويامالك من الحجي والتأويلات والحش فيك في مجالس تضم القليل من المدونين والكثير من مرتاديها بالخفاء.

ناس حارقها هم الوطن وناس تجلد فيه وناس تكتب عن أطيب ما فيه .. ناس تحس مدوناتها تغسل القلب وترسم البسمه على شفاهك وتخليك تضحك من أقصى قلبك .. وناس تحملك همها وتشكي لك تجربة شخصية لا تضيف للكاتب والقارئ الا التحلطم والحنة .

ناس تقرا لها تحلق معاها فوق السحاب وتنقلك إلى عالم نتساءل عن وجوده .. عالم دغدغة المشاعر.. تهديك الحلم على ورق من سوليفان ... وهي تعلم أنها ممكن ان توصم بالعار والجرأة والعيب والحرام وكأنها هي فقط من تحمل مشاعر قد تلتهب وقلب قد يعشق وفؤاد قد يشتاق ولا تجد غير المدونة متنفس لتلك المشاعر.

وناس تكون واحة أدبية .. تاخذ منها المعرفة بطرق مختلفه ولكن بدون شك أجملها هو أبسطها بالتعبير.. وقد تكون تلك الواحة تميل الى التحرر الفكري نوعا ما وتدعو للتساهل في بعض الأمور وفتح البصيرة قبل البصر ... وهذول ناس ممكن يوصمون ويتهمون بالزندقة والعلمانية والكفر احيانا.

ناس عندها طرح سياسي يميني وناس يساري وناس ماسكة العصاة من النص والكل يبي يصلح رغم إن ساعات طريقة الطرح تكون مملة او حادة او ساخرة الا ان البعض تميز بالإسلوب الراقي والبعيد عن الإسفاف اما المتطرف منها الله يعينا عليهم.

ناس تكتب قرقيعان ومن كل قطر اغنية دون التخصص بنمط معين والقراية عندهم تحمل الكثير من المفاجآة الممتعة والمملة احيانا ...وناس القراءة لها متعة ما بعدها متعه حتى لو كان الناتج صفر.

بالنهاية .. شنو تعني لك هالمدونة .. شنو الفكر اللي تطرحه .. انت شنو تبي تقول .. كله يعتمد على قناعات وأهواء المدون .

مدوناتنا هي الدفتر اللي نسجل فيه يومياتنا كل ليله قبل لا ننام مثل ما ذكرت اخت عزيزة من المدونات .. نكتب بدون بهرجه ولا رتوش ولا رياء .. منت ملزوم تحابي أحد أو تجامل أحد .. اكتب مثل ما تحب .. بس اطرح فكر .. ناقش .. خل الناس تستفيد .. خل نستغل مساحة الحرية اللي اتيحت لنا هنيه .. من غير اساءة لأحد .. او جلد أحد .. او التقليل من قدر الآخر .

انا ما اعرفك وانت ما تعرفني .. تنزل بوستك .. وتسكر اللاب توب .. ترجع تعيش حياتك اليومية وتنسى فلان من المدونين او فلانة من المدونات ...بس اهو بعد ما يقرا لك .. تهقا بينسى .. او بيذكر افكارك اللي شاركتها معاه ..

اترك بصمة حتى لو كانت صغيرة .. لا تستهين بتجربتك الإنسانية ... أكيد في اللي راح يستفيد منها بغض النظر عن حجم الإستفادة . لا تبخل على الناس بفكرة حتى لو كانت صغيرة... ما تدري كل شي ابتدى بفكرة صغيرة من شخص مجهول وتبناها شخص آخر وصارت منهج حياة..

اكتب واكتب واكتب .... كلنا وياك ... طالمنا حرية التعبير مكفولة

حرر قلمك وصح ضميرك وتذوق الزين من الشين ...

يمكن باجر يذكرك التاريخ ... من يدري

ليش لأ........

:)

هناك 59 تعليقًا:

magnoonah يقول...

الزين انا اعرفها

او تقدرين تقولين افهم مساحه كبيره من تفكيرها
:)

كلامج صح وما نختلف عليه ووجهة نظرج ما عليها اي غبار فعلا هذا التدوين عالم مختلف ومشابه بنفس الوقت

يعني احنا نفس الشخص الي هو مدون باسم مستعار وشخص عادي يعيش الحياة اليوميه بكل ظروفها الاختلاف البسيط انه بالمدونه نكتب الي نفكر فيه بباطن العقل والي نقدر نقوله والي ما نقدر

وبهالطرح بنلقى المؤيد والمعترض والمو مهتم والمتفرج العادي وهالشي بهالعالك طبيعي

بالنسبه لي انا اشابهج وايد وواشوف انه المدونات حياة اخرى موازيه لحياتنا اليوميه تاثر فينا وناثر فيها

وهالشي اكيد


زوزو ما ادري جان حاسه بس اعتقد انج تعرفين انه في وايد ناس اثرت فيني هني وغيرت بحياتي شوي وانا سعيده بهالشي

وتحياتي للمدونه زوزوتا

غير معرف يقول...

موضوع واقعي حلو راقي بطرحة مايخلص مهما كتبنا فية

أنا شخصيا اكتب (أفش خلقي) واطلع المكبوت فيني وإن طاع زين أنا خوش ولد وان طلع شين انا مو خوش ولد

بالنهاية البلوق مكان مريح جدا لي وإن يكون في بعض الاحيان إدمان ولكن دامة يريحني مالي شغل بحد

------------ بالنسبة لتعليقك السابق للبوست اللي قبل هذا
فأنا جدا يسعدني كلامك ويكفي إني أهمس في إذنج وأقولج إني دخلت مدونتج أول مرة لسبب واحد فقط

إنج على إسم بنتي التي أنتظرها الشهر القادم بإذن اللة .

لهذا شدني الإسم ودخلت المدونة لأجد كتابات صاحبتها أجمل وأجمل

ولهذا استمريت بالدخول

ولك تحياتي

DiLLi O MiLLi يقول...

الله يا الزين
كلااااامج دُرر .. ربي يحفظج

تدرين أنا دخلت عالم المدونات .. تشيّر
هههههههه
وألحــــين أدمنتــــــها
:)

أنا مدونتي ماكنتوش
سياسية .. فكاهية .. أجتماعية .. شعرية
اللي يطري على بالي
أو
اللي يحرنــي





ألا شخبار الحداق ؟
:)
طلعت الركسة الأسبوع اللي فات والصيد عجييييب .. تل بهالنويبي
هههههههه



:)

Q80 Blogger يقول...

موضوع جميل عن عالم أجمل .. عشقته كما عشقتيه :)

Shather يقول...

---> تصفق

:*
ما تقصرين

فريج سعود يقول...

انتي ما عندج احساس


انتي عندج احاسيس الدنيا
والله بوست حلو ويشجع
والي احلى منه ان انا يطلع مني هالحجي
صج انا مستغرب
:)

`~MnO YeNSa! ~` يقول...

الله
هالمرة
غير
......
بكل بساطة
احببتهم
(المدونات :* )

sologa-bologa يقول...

اترك بصمة حتى لو كانت صغيرة .. لا تستهين بتجربتك الإنسانية

عين العقل، صح كل تجربة انسانية مهمة
مهما كانت صغيرة

بين السطور كنت ابحث عن شخصيتي
خليتي ادورها واراجع نفسي انا منو من بين اللي ذكرتيهم

هل انا من اللي بيعمرون او اللي بيدمرون
هل انا محترق على الوطن أو اجلد الوطن
هل انا واحة افيد الناس فيها واقدم لهم معرفة
أو انا اهذر واقول كلام فاضي
هل فعلا انا اشارك الناس وافكر بصوت عالي معاهم
او بس اصارخ واقول كلام مكرر

اقولج شغلة
يمكن بين السطور انتي تقصدين ناس محددة بدون تسميتهم
لكن انا شفت نفسي في كل سطر

ونفس الوقت هل اشارك الناس بتعليقات مفيدة
ام اشارك بس لمجرد المشاركة وتسجيل الحضور

فعلا المدونات عالم جميل من خلاله تعرفنا على شخصيات
اقدر اسميها خيالية لانها مو معروفة ونفس الوقت واقعية لانها موجودة فعلا لكن ما نعرفها
تعرفنا على مبدعين من خلال هالعالم
كونا علاقات وصداقات مع شخصيات ما نعرفها بالواقع
نساعد بعض ونوجه بعض وننتقد بعض
واحنا ما نعرف بعض..وهذا اجمل شي بالمدونات

انا طولت وايد واعتقد بعدي ما خلصت والتعليق صار اطول من البوست
:)
لكن اقول
مقالة رائعة جدا وبوست روعة وبامتياز
:)
وعلى قولتج
يمكن باجر يذكرنا التاريخ


لكن المهم ان نكتب ونكتب ونكتب
ونستمر في الكتابة

ودمتم بحب وود ورقيّ

بـابـل يقول...

صباح الورد


الزين موضوعك هالمرة غييير


المدونة دنيا ثانية نعيشها مثل ما إحنا نبي مو مثل ما إهي تبي

تسلمين يالزين



وبس


بابل

charisma يقول...

الورد

صح السانج
تدرين زوزو شنو احلى شى بالتدوين!

لما تمر الايام والاشهر والسنين وترجعين تتذكرين هاليوم وذيج الساعات
تذكرين فرحج والمج تذكرين س من الناس الى دش حياتج تذكرين فلانه الى اثرت فيج حييل وفلانه الى ضايقتج
تذكرين ذكرى ميلادج سفراتج روحاتج يياتج استمتاعج

انا شخصيا اشوف التدوين شى ممتع لصاحب المدونه نفسه

وشوفى كلالامى هذا كووم والتواصل بينا وصداقتنا بهالمكان
فرحتنا فى بعض
مشاركتنا على الحلوه والمره
نفقد بعض
سبحان الله المحبه الى تنولد من مجرد تواصل ونك نيم
كلمتج بالكومنت اتخفف الحزن اذا كنت زعلانه وحزينه واطيب الخاطر

وافرح واستانس على المشاركه بالضحكه والفرح

ونزعل اذا فقدنا احد نحبه بهالعالم

فعلا عالم

وبا بختى فى معرفتكم يا الزين
ووايد احمد ربى ان الله جمعنى في ناس مثلكم
الله لا يحرمنى منكم
:*

تسلم ايدج على هالبوست

GUCCI-q8 يقول...

تسلم ايدج
ويسعدني اني تركت بصمه عندج
ومشكوره وايد وايد
يا عزيزتي

Kuw_Son يقول...

بوست زين من الزين :)

أنا تراودي أفكار ودي أكتبها .. لكن أتحفظ على الكثير منها و إلا اتهمت بما لا أستطيع حمله ..

لازم نحاول نكون بالوسط .. لا إفراط و لا تفريط ..

الرفق لا يكون في شيء إلا زانه .. و لا ينزع من شيء إلا شانه

mantovani يقول...

عالم التدوين عالم جميل

و المدونين لهم مني كل تقدير و احترام

التدوين فرصة جميلة تؤمن اللقاء
بأشخاص راقين و مثقفين

الى الامام

و اتمنى ان يكون لي و لمدونتي تصنيف
جيد في عالم المدونات

و شكرا

Manooya يقول...

قوة يا زين في اول زيارة لي =)


موضوعج يشبه موضوع طرحته بس انتي على اشمل واوسع ..

بالنهاية اهي مساحة شخصية لكل واحد منا الحرية بالتعبير فيها .. بس على قولتج بشرط ما يجرح احد ..

وبالنهاية الي يبي يكتب شي يدام الناس اكيد يبيهم يشاركونه فيه باي شكل من الاشكال ..

فـالاحترام لازم يكون متبادل لانه جزء من الغاية الي اهي التعرف على الناس والتواصل وياهم ومعرفتهم من خلال هالنافذه الصغيرة

ومو شرط نكون نعرف بعض عدل .. يمكن عند بعض الناس جذي اصدق =)

تحياتي لج عزيزتي --<-@

Barlamany يقول...

الزيـــــــــــــــن

عــــــــــــــــــــــــــــــدل :)

جذيه عدل .. موضوعج حيل عجبني ..

واللي عجبني فيه أكثر.. الأكثر من رساله بين كل اللي قلتيه و يريتها توصل صح

يسعد لي صباحج

تحياتي :)

SolaimaN يقول...

يا سلاااااااااااااااااااااااااام عليج

رسالات كثيره يستشفها من يقرأ هالكلام بكل عذوبة

احسها كلمات تهمني جدا ،،وكأني انا المقصود مع انه كتب

بصورة عامة وبلا تفاصيل،،دغدغتي مشاعرنا بتلك الاسترسالات

وسرقت الكلام من مخيلتي العاجزة

،،

ارى انه عالم جميل من خلال نظراتك له

Najmah يقول...

تدرين
ماتوقعت اندمج واتعلق بهالعالم جذي

صار جزء مني
ومدونتي
احسها صفحة من صفحات قلبي اطلعت للدنيا


واصلي
وكتبي
واحنا معاج :)

Q8DOLL يقول...

زينة البنات
توار الخواطر بينا صار في هذا الشهر
بوستج قريب من بوستي
انا من الناس اللي تأثرت فيكم
وأحيانا كثيره أحملكم معي في عالم الواقع
أحببت أشياء كنت أكرهها او لا تهمني

تحياتي

M يقول...

بوست مميز, وكأنج استعرتي من كلماتنا عشان توصفين هالعلاقة اللي تربطنا مع "عالم التدوين".

مشكورة

7osen يقول...

مرحبااااا

شلون الزيين

إن شاءالله تكونين بأفضل حال


البوست جميل وحلو والكلام سليم

البلوق مساحة للحرية والتعبير

عبر عن نفسك وإنطلاق

أكتب وأكتب وأكتب
لا تتردد ولا تفكر شنو تقول

كتبوا

خلونا نقرا بعض

أتمنى ان الجميع يكتبون ويعبرون ويتوقفون عن الإعتزال

مانبي احد يسكر مدونتة

وانتي اول وحدة نبيها تستمر بالكتابة

:)

تحياتي لج عزيزتي

لج وحشه

:)

غير معرف يقول...

المدونة صندوق يومي نفسي حسي فكري عاطفي ... لم أميز مأريد أن أكتب ولكن المهم أني أعرف أني قبل مأكتب أن أكون صادق مع نفسي قبل اي شخص يقرأني .... ولم أكتب للأشخاص وأن يكون هناك من يمر المهم أن أكون مقتنع بما أكتب ... فــقط .. لا انتمي الي شيئ مثل البعض ... أو من يفتلون عضلاتهم للفوز بجائزة التعليق فقط للمجاملة .... أكره المجاملة في كل أنواعه حينما يتم مجاملتك في شيئ مقتنع فيه حتي لو أختلفت الأراء ....
.....
.....

حمدالله علي سلامتي ..
ورجعنا مع حروفج اللي تجمعنا :)

mtfa2el يقول...

الجميل هو اختبار الافكار و الكتابات من غير النظر الى شخص الكاتب نفسه
تعجبك او لا تعجبك الفكرة ..لكن تظل في حكمك و قرائتك بعيدا عن الربط بين الشخص و بين ما كتب

Selezya يقول...

عالم في قمة الجمال والروعة :)
أحببناه جميعنا :)

بنت الشاميه يقول...

موضوعج عجيب....ووايد حلو
عالم المدونات عالم عجيب غريب...بس حلو
تكتبين لناس ما تعرفينهم ولا يعرفونج وبعدها تتكون صدقات مع ناس تلقين نفسج وياهم ....وهذا سر الجمال فى المدونات

صداقه ارتبطت بالكلمه والفكر...ناس تحبينهم وتولهين عليهم
وناس ودح ما تشوفين اسمهم...ولا تعليقاتهم
بس الاهم ان تحررين نفسج وتكتبين كل اللى تبينه مع مراعاة
الاخلاق والاداب العامه
=======
اترك بصمة حتى لو كانت صغيرة .. لا تستهين بتجربتك الإنسانية ... أكيد في اللي راح يستفيد منها بغض النظر عن حجم الإستفادة . لا تبخل على الناس بفكرة حتى لو كانت صغيرة... ما تدري كل شي ابتدى بفكرة صغيرة من شخص مجهول وتبناها شخص آخر وصارت منهج حياة..
=======
كلامج جميل وايد
ودائما كنت اتسال هل تركت بعالم المدونات بصمه او اي صوره جميله فى مخيله ولو واحد فى هالعالم
هل لما اتوقف عن الكتابه راح احد يفقد مدونتى وقلمى.....تصدقين اخاف من الجواب......ء
لانى لما دخلت هالعالم انبهرت فيه وحبيته وشغل وايد من وقتى ومن فكرى
وتمتمتعت فى كل ما كتبت وقرات فى مدونات الاخوة والاخوات المدونين
والله كلامج صح
حرر قلمك وصح ضميرك وتذوق الزين من
الشين
اسفه طولت عليج وايد...بس انت السبب
لووووول

الزين يقول...

مجنونة

:)

مابي ازيد على كلامج شي لأنه وايد منطقي

كلنا قاعين نترك ولو الشي القليل في حياة بعض

بس المهم ان احنا نترك شي زين مو شين

:*

مشكورة وايد

الزين يقول...

حسافتج ياكويت

انا بعد اكتب عشان افش خلقي ساعات
بس فشة الخلق عندي شوي تختلف

:)

مسالة الإدمان لا تكلمني عنها لأني مريت بمرحلة أربعة وعشرين ساعة مجابلة اللاب التووب لما حسيت ان مالي حياة

النت والمودونة التهموا حياتي

اسمع كلامي وخفف
عشان تظل على طول بشوف ولهفة لعالم التدوين وما تفقد الشغف للكتابة

الهمسة وصلتني وونستني ما تصدق شكثر
الله يعطي ام العيال طلقة السهالة ويفرحك بالزين يارب

وعاد اذا الله سهل عليها وولدت بلغنا خل نفرح معاك

سهالات ان شاء الله لا تحاتي

الأجمل وجودك يا خوي وعساه وصل ما ينقطع

كل المودة

الزين يقول...

DiLLi O MiLLi

حبيبة قلبي انتي
هذا بعضا مما عندكم

:)

يا عزيزتي كلنا نعاني من الإدمان

وصدقيني مدونتج احلا ماكنتوش
التنويع مطلوب

ولو ان احيانا صعب
والشاطر فينا اللي عنده القدرة ينوع
وانتي ماشاء الله مدونتج ما تنمل

ولا تتغيرين نكهتج بتنويعج

:**

اما عن الحداق
فسكتي

كل مانوينا عزم الهوى
تقولين احد صاكنا عين

يا بختكم

عيل الصيد كان حلالي هاااااا

عليكم بستين عافية
يبيلنا روحه يميع

شرايج؟؟

الزين يقول...

Q8i Blogger

حياك الله اخوي
ومشكور على المرور

ولا تقاطع الزين

الزين يقول...

شذر

حيااااااج الله

ياز لج كلامي ادري

:**

الزين يقول...

فريج سعود

تصدق اول ما قريت اول جملة اخترعت

بعدين جنك صبيت علي ماي بارد

وصاااادووووه

انت ساعات تبدع بالحجي
ليش مستغرب

:)

الزين يقول...

منو ينسى

ايه قلنا نغير
نترك الرومانس والقصيص شوية
ونتكلم بالواقع

موضوع مختلف
ويمكن طرح مختلف ما تعودتوه مني

بس شرايج؟؟

اصلح مو؟؟

:**

غير معرف يقول...

way to go zayoon

keep it up babe

(F)

الزين يقول...

سلوقا بلوقا

ولقيتها؟؟؟ أقصد شخصيتك

اعتقد الإجابة واضحة يا صديقي
ما تحتاج تدور عليها وايد

وانت صاج
انا قصدت ناس وايد
وكان الموضةع حيل مختلف
وكنت ذاكرة اسامي وحاطة رايي وتأثير كل واحد علي

بعدين قعدت اعدل بالبوست
وايد اشياء شلتها
والبوست خذا منحى ثاني ما توقته

بس صار اجمل ومنطقي وواقعي وله وقع اكبر

انا متأكدة كل واحد فينا يقرا البوست راح يلاقي نفسه في مكان ما

حتى انا موجودة هناك بين السطور

:)

بالفعل المدونات عرفتنا على ناس وايد
منها الزين ومنها هالشين
منها اللي عطونا الإحساس ان احنا ملكنا العالم بمعرفتهم ومنهم من لعنا اليوم اللي سمعنا اسمهم فيه
وكرهنا حتى طاريهم

يمكن قلبي شايل شوي
بس اقول لك شي
والحين ييه دوري عشان اقول
اكتشفت ان مو عالم جميل مثل ما احنا نشوف وندعي

واكتشفت ان ممكن مدون بسيط يكون عنده
Hidden Agenda

واكتشفت ان الغلط سهل
والإعتذار صعب
واكتشف ان ابسط شي ان صاحبك يكسر فيك

يعني نسخة مصغرة من مجتمعنا الكبير
بكل موبقاته واخطائة وعيوبة

اسمح لي يا صديقي يمكن تشوفني متشائمة شوي
و يمكن حزة اللي رديت عليك كنت لابسه نظارة سودة

بس تعليقك اثار المواجع
بطريقة ما

:)

شلونك انت بس

دمت بكل الحب

الزين يقول...

بابل

مساء الخير

خلنا نغير شوي يا بابل
عشان لا تملون
وعشان تتعرفون على الوجه الآخر للزين

الله يسلمك وحياك الله

الزين يقول...

انتي من الناس اللي انا سعيده ان عالم المدونات عرفني عليها

تواصلج
نقاوة قلبج
حبج للكل
مداراتج حق القاصي والداني
روحج

كل شي فيج يا كاريزما يخليني اشكر هالعالم لوجودي فيه معاج تحت عنوان واحد

:**

الزين يقول...

GUCCI-q8

يسلم عمرج يارب
اكيد تركت شيئا ما هناك بين كل المشاعر المتباينة في صدري

مشكوره على تواجدج

:**

الزين يقول...

كويت سن

بالعكس
انا اقول لك اكتب واكتب واكتب

هذي مساحتك الخاصة للتعبير

اللي مو عاجبة لا يقرا
بكل بساطه

حياك الله يالشيخ وسلم على اخوي يوسف

الزين يقول...

مانتوفاني

عندي سؤال لو سمحت
يعني شنو مانتوفاني؟؟

اتمني ذلك ايضا
والكتاب مبين من عنوانه

:)

الزين يقول...

مانويا

يا هلا ومرحبا
وحياج الله
وصدر البيت لج ولنا العتبه يالشيخة
وساعة المباركه

بعد بقى شي ما قلته؟
:)

سعيده جدا بمشاركتج وبوجودج

أتمنى ما تكون آخر مره تزوريني فيها

الزين يقول...

برلمـــــــــــــــــــاني


عشان تعرف شكثر فرحانة بطلتك اليوم

وسعيدة جدا أن الموضوع ياز لك

:)

ان شاء الله توصل يا برلماني
ناس وايد تحتاج توتعي وتقول احنا شنو قاعدين نخبص

يسعد لي هالمسا

كل المودة

الزين يقول...

سليمان

وعد الحر يا خوي

:)

وجودك اليوم عيد

اهم شي وصلتك رسالتي؟؟

بانتظار عودتك كمدون
اترك التعليق عنك

نبي سليمان الرومانسي بو الكلام الحلو
الكويتي المصفف اللي يرد الروح

:)

الزين يقول...

نجمة

ولازلت اقول احنا شفنا جانب واحد من نجمة

نبي نشوف الجوانب الأخرى
انا متأكده ان ياما بالجراب يا حاوي

:**

الزين يقول...

كويت دووووول

اوووووووف
انتي وين كنتي

غبتي غياب طويل
وسعيدة بعودتج مره ثانية

:******

وأحيانا كثيره أحملكم معي في عالم الواقع

الله عجبني التعبير

تصدقين صح
ساعات تقرين بوست يظل تأثيرة عليج مستمرا لعدة ايام

تتفكرين فيه وتستشعرين كلامه

كل الحب حبيبتي ولا تغيبين مره ثانية

الزين يقول...

Q8 uniQue

مشكور لمتابعتك وتشجيعك لي يا مالك

يعني لي الكثير وجودك

الزين يقول...

حسين

لك وحشه اكبر

احرجتني بكلامك الطيب
مدونتك بالنسبة للزين واحة
مساحة كبيرة من الإحساس

استمر

الزين يقول...

خالد

الحمدالله على السلامة
وقرت عيون الكويت

:)

شلون السفرة
عسى مخا كثرت كالاماري

:)))

كلامك ذهب
وياليت الكل يفكر مثلك

ما تبي تعرف شلون دريت انت وين مسافر؟؟؟؟


:)))))

الزين يقول...

متفائل

يا عيني على الفلسفة

:)

عجبني رايك حيل متفائل

وين البوست اللي اتفقنا عليه؟؟؟؟

الزين يقول...

سيليزيا

حياج الله

وين هالغيبة الطويلة

كافي ان هالعالم عرفنا على ناس كثير حبيناهم وحبونا

وصار لقائهم عبر النت ضرورة تكمل يومنا

:)

وجودج اليوم اسعدني

شكرا لج

:*

الزين يقول...

بنت الشامية

:)

تبين الصج
اجمل تعليق وصلني بخصوص هالموضوع تعليقج

تدرين شكثر قريته وانا مبتسمه ومستانسه ان البوست حاز على اعجابج

واااااااااايد

كلامج كله صح
ناس يصيرون جزء من حياتج

وناس ودج ما تشوفين لوفة اسمهم عندج


لا تحاتين
انا اتصور انج من الناس اللي لا سمح الله غابوا عن ساحة التدوين الكل بيدورج
عشان ترجعين

لا تقولين بصمة
انتي تركتي بصمات صدقيني
بدون مبالغة ولا مجاملة

حياج الله في مدونة من قصص الزين
والبيت بيتج
لج الصدر ولنا العتبه يالشيخه

:)

الزين يقول...

بنت الشامية

:)

تبين الصج
اجمل تعليق وصلني بخصوص هالموضوع تعليقج

تدرين شكثر قريته وانا مبتسمه ومستانسه ان البوست حاز على اعجابج

واااااااااايد

كلامج كله صح
ناس يصيرون جزء من حياتج

وناس ودج ما تشوفين لوفة اسمهم عندج


لا تحاتين
انا اتصور انج من الناس اللي لا سمح الله غابوا عن ساحة التدوين الكل بيدورج
عشان ترجعين

لا تقولين بصمة
انتي تركتي بصمات صدقيني
بدون مبالغة ولا مجاملة

حياج الله في مدونة من قصص الزين
والبيت بيتج
لج الصدر ولنا العتبه يالشيخه

:)

الزين يقول...

غير معرف (F)

:)

Thanx dear cuz

u made my day

غير معرف يقول...

اشلون يالزين دريتي :)
جواب أنتظره في بطن الحوت :)

يالله يالله ناطرين

DiLLi O MiLLi يقول...

هههههههههه

يالله عند ويهج
:)

اللنج موجود في سوق شرق
الخيوط موجودة
الييم عليج :)
أحداثيات المحادق أمبرمجة عندي باللنج
مطارة الجويهه
والغدا معانا
ننطر الفِساد وننطلق


:)

esTeKaNa يقول...

تدرين شنو حسيت؟
حسيت بعيوني تطل بين كلماتج
وانفاسي تسمعينهابين سطر وسطر
وابتسامتي تفضحني وتقول:
ايييي يا الزينه اييي
هذا اهو
هذا اللي بقوله
هذا الي احسه
هذا البلوق
هذا سر كل هاللذه اللي نعيشها
:))
بوست متفق عليه من زمن
وأخيرا...بحتي فيه بأرق وارقى اسلوب
الله يحفظج يا الزين
ويبارك لنا بوجودج المهم دائما
:*

الزين يقول...

خالد

دريت للصدفة
واخاف اقول الكل يعرف
خلها للظروف

بس خوش مكان والله

الزين يقول...

دللي ومللي

تصدقين عاد
احنا بعد مرسانا بشرق
طرادكم جم قدم؟؟

شنو تبين الييم
ربيان
ميد
خثاثيق
مصران دياي

طبي وتخيري

:))))

الزين يقول...

عزيزتي استكانه

ما تقصرين ابوي انتي
ولا يحرمني منج

بس شرايج
طلع خوش بوست

:**

غير معرف يقول...

وااو
ملهبه بكل بساطه
محرك نفاث
اقنعتيني اكتب
اقصد انشر
وياما كتبت
شكرا

لؤلؤة يقول...

نفس السؤال يا في بالي يوم عرفت البلوق
هي بالفعل دفتر نخربش عليه...يا يذكرني الناس بخير عقب ما يقرون لي ،أو يذموني...
تسلمين يا الزين...وقدرج ربي على كل خير...