.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

13.3.08

سوالف قلب ..ابتعد عني ماحبك وشتبي بي ..قدرك الغالي رميته بالثرى ..رابع سالفة


الزين : تطلعين
نورا : وين؟
الزين : ستاربكس حولي
نورا : اوكي مريني
الزين : صار

نورا : شفيج؟
الزين : ملخبطة... ضايعة
نورا : شصاير؟
الزين : كل شي ... كل شي يا نورا
نورا : زيون خرعتيني .. اول مره اشوفج جذيه
الزين : تعبانة وقلبي مكسور
نورا : ليش؟؟ ليش .. منو اللي مأذيج
الزين : اللي ما توقعته يأذيني
نورا : منو هذا ... شالسالفة قصي لي من الأول .. أبي أعرف كل شي


نورا : الله يالزين ... كل هذا يصير وأنا ما أدري ... شلون تغلطين هالغلطة ... شلون تهون عليج نفسك ... شلون تسوين جذيه ....اللي ماني فاهمته ولا قادرة استوعبة كنتي تدرين من الأول انكم ما تصلحون لبعض .. و عمركم ما راح تصيرون لبعض .. ليش تكملين
الزين : مادري ... مادري .. لاتعاتبيني يا نوره .. كافي اللي أنا فيه
نورا : أنتي حبيتيه؟؟
الزين : هم مادري ...كل اللي اعرفه انه كان ليلي ونهاري .. كان محور كل أفكاري ... شفت نفسي معاه .. عايشه أحلامة .. كلمة وحده منه ترفعني فوق .. وغيابه ينزلني تحت
نورا : كل هذا وما تدرين؟؟ وبعدين؟؟
الزين : اتفقنا ان كل واحد يمشي بطريجة .. ما نبي نحمل قلوبنا أكثر.. ما نبي نظلم بعض
نورا : عين العقل اللي سويتوه .. بتتعبون شويه بس بالنهاية اللي سويتوه اهو الصح
الزين : بس كنا لا زلنا نتواصل
نورا : ليش؟؟ شالداعي
الزين : يانورا انا ماشفت منه الا كل خير .. بالعكس انا احس اني اذيته أكثر
نورا : ليش اهو ما كان يدري بكل هذا قبل لا يجدم .. بالعكس أنا الومه اهو اكثر .. اهو اللي نصب لج المصيدة .. وانتي مثل الهبله على ويهج سيده
الزين : حرام عليج... لا تقولين جذيه... لا تحكمين عليه بهالطريقة
نورا : لا مو حرام ... اهو اذكى منج بوايد .. والحين مسوي روحه الضحية .... اهو عرف يحبكها عليج عدل
الزين : نوووره
نورا : ليش ما ترضين عليه؟؟
الزين : إنتي ما عرفتيه... اهو غير ... صدقيني
نورا : يا بنتي حسبيها بالعقل وفكري بالموضوع من اول .. منو اللي اقتحم حياة الثاني؟
الزين : اهو.. بس ما أقدر اقول انه اقتحام
نورا : ايه صح ... ما علينا ...منو اللي حط و تم يحط للثاني طعم ورا الثاني
الزين : اهو .. بس انا بعد جاريته... كانت اللعبة عاجبتي
نورا : يمه منج ... أدري فيج ... وبعدين تعالي قولي لي ....يعني اهو ما كان يدري من الأول انج منتي له
الزين : بلا ... وقال لي
نورا : عيل شاللي خلاكم تكملون ... ويوم حسك ضعيفه اهو ليش ما وخر .. مو المفروض ان اهو الريال ولازم يكون اقوى
الزين : مدري .... مدري .. شي ما عرفنا نسيره .. اهو اللي سيرنا... شي يقولج كملي وانسي مخاوفج .. شي يقول لج عيشي اللحظة .. غمضي عن كل اللي مخوفج .. تتدبر بعدين
نورا : ايه يعني قصى على روحج ...الزين ... اذا تبين الصج كان المفروض ما تكملون اثنينكم او اهو على الأقل يمشي وما يكمل .. مو ينطرج تتعلقين بعدين يقول لج مالنا امل
الزين : مو غلطته بروحه ... غلطتي معاه .. وبعدين القرار كان مشترك .. يعني مو بروحه أخذه
نورا : والحل؟؟؟
الزين : ماكو حل ... حلنا اهو الوقت .. يمكن احتاج وقت عشان اخطِي على اللي انا فيه واعديه
نورا : انزين وانتي شاللي متعبج الحين
الزين : الشي اللي المفروض ما يتعبني ... وجوده بحياة غيري
نورا : شلون يعني؟
الزين : مدري... اهو يتعمد او اهي صارت جذيه ....بس انا اول مره اشوف هالوي فيه .. احس فيه قاعد يجرح فينى بطريقة مو مباشرة... ولما عاتبته رده كان العن وامر
نورا : انتي مو تقولين انكم اتفقتوا تكونون أصحاب وبس
الزين : ايه
نورا : عيل وين المشكله ... زيون لا تكونين أنانية .. وحدة .. عشر .. مو شغلج
الزين : أدري والله أدري ...بس تعرفين ... لما الحين في شي غير في قلبي ... لا تقولين لي شنو ... اهو لازال هناك .. كلامه احساسي فيه .. روحه ... أحلامه.. أمنياته ... كل شي
نورا : انتي شنو اللي تبينه بالضبط
الزين : نورا ... رده عليه عورني حيل ... احس انه حرقني .. وصمته عقب هلكني أكثر .. عطاني احساس اني مو مؤهلة حتى اني اعتب
نورا : زيون ... خليه يروح يشوف حياته .. انتي ليش مأذية حالج
الزين : تدرين ليش ... لأني بنت .. والبنت تحس بقلبها لما يكون التصرف بدر من الريال عشان يغيضها .. عشان يحرها .. وانا متأكده هذا اللي حصل .. ليش.... ليش .. ليش مصر يقبح كل اللي كان بينا
نورا : إنتي من صجج .. طقيه بالطوفه ... انتي بس اللي مو عارفة تلعبينها صح
الزين : ليش انتي شايفتها لعبة؟؟؟؟ نورا .... لاتقهريني زيادة
نورا : وليييين بلشنا بالأعصاب ... الزين أنا قلبي عليج ولا اهو ترى ما يهمني
الزين : انتي ما تعرفين تقولين حجوة سنعة ... كله ماخذه الناس بالقوة
نورا : ايييه شنو تبيني اقول لج ... الحل عندج وانتي عارفته .. وانتي منتي غبية وادري فيج تبين احد بس يأكد رايج بينج وبين نفسج .. ولا تحتاجين احد يعطيج الحل ... الحل موجود بهالكور العوي .. وشكلج بخاطرج تتدلعين
الزين : ايه صح ... مو انا يوم اشتهيت اتدلع فكرت فيج .. موت عاد انتي مع الدلع
نورا : حبيبتي .. طولي بالج ... ولا تزعلين .. وبعدين انتي عندج الف من يشتري خاطرج .. اهو شنو يمهم ولا شي ..بالعكس انا اشوفه انسان ضعيف .. وما طلعت قوته إلا عليج إنتي اللي حبيتيه وغليتيه على غيره
الزين : حتى اهو حبني
نورا : طل ... لو حبج ما يعاملج بهالطريقة
الزين : بس .. بس .. ما ابي اسمع ملامه
نورا : انتي تحمدين ربج انكم ما كملتوا مع بعض .. هالآدمي راح يتعبج .. شوفي الحين شلون متعبج بحركاته اللي مالها معني
الزين : تدرين شنو اللي مأثر فينى أكثر ... طريقته معاها ... تذكرني بطريقته معاي بالبداية
نورا : قصدج اول ما سحب ريولج
الزين : أففففففف ... أنا غلطانه اللي قاعدة اقول لج
نورا : أبيج تشوفينه صح .. أهو رسم عليج ... منتي مصدقتني .. الأيام بتثبت لج .. ولا تخلينه يكسرج ... إنتي ما يكسرج الا اللي خلقج .. وبعدين تعالي انا بعرف ... من وين هالضعف كله .. عمرى ما خبرتج جذيه ... إنتي تلعوزين عشرة مثلة
الزين : قلت لج سكتي
نورا : هااااو .. الحين انتي يايبتني هنيه عشان تسكتيني لو عشان تسمعين رايي .. تدرين ليش كلامي يعورج زيون .. لأنه اهو الصج وتبين شوري..... تبين ترتاحين
الزين : شلووووووون؟
نورا : دقي سفلي فيه .. قولي له اللي بقلبج كله
الزين : يعني اصير اسوأ منه .. أو اصير مثلج
نورا : ما عليه بطوفها لج بس هالمره .....ايه صيري مثلي قوية ودام اسلوبه اهو جذيه ردي عليه بنفس اسلوبه
الزين : مو أنا يانوره ... مو انا وانتي تعرفيني زين
نورا : عيل لا تخلينه يكسر بخاطرج ويقص عليج ويسوي روحه مظلوم وضحية ....هو حية بس انتي اللي مسكينة والحوبة تبطي بس ما تخطي
الزين : لا تدعين عليه حرام عليج
نورا : بلا بدعي انتي شعليج ... انتي مو شايفه ويهج
الزين : والله ما يبت حق نفسي إلا عوار الراس ... أنا لو داقة على قماشة مو أحسن
نورا : احنا فيها .. دقي لها خل تيي
الزين : قومي .. قومي خل نمشي ........القعدة هنيه صارت كلها مالها طعم
نورا : بلا والله انا شايفة اشياء حلوة
الزين : ههههههه ... يغربل ابليسج ما تيوزين
نورا : ايه ضحكي ما عاش اللي يكسر بخاطرج يالزين .....خليه يولي ... باجر ربي يعوضج باللي يعرف قدرج
الزين : تهقين؟؟
نورا : اهقا .. اهقا ... عيل مساعد وين راح.... هههههههه
الزين : مساعد مات في بس يا بحر... وما قاموا يصنعون مثله
نوار : شفتي شلون .. مالنا الإ الإستنساخ
الزين : مينونه خالصه....مشينا
نورا : مشينا ... يا حوبيكا مشينا



هناك 42 تعليقًا:

`~MnO YeNSa! ~` يقول...

من احلى السوالف
حلو الصداقة
لما تكون جذي
كلها دعم
انا مع نورة


مو حلو اللي يحب يجرح
اذا جرح عرفي انه حبه راح
ولا من الاساس كان زايف

طائر بلا وطن يقول...

الحب هو من يختارنا لا نحن

و كما قال صديق

نحن نختار التصنيف
:)


أمر الإنسان بين عقله و قلبه

و غالبا ما تأتي الحكمة متأخرة
و من أفواه الجميع .. أو على الأقل
ما هو ظاهره حكمة و عقل

من فينا لم يعتمد قلبه ذات مرة
أو اتكأ على خطيئة و مضى لغاية نظيفة
أو حلم


و الأهم

مهما كان حجم الخطأ و مهما كانت النوايا
و مهما كان ظنك بها أو حتى ظن صديقتك



دائما هناك بداية
لك و له .. و لـ نورة
عشان ما تزعل
:p


صباح الخير

sologa-bologa يقول...

لو مكلمة قماشة جان قالت لج:
روحي طقيه مو بس اتصلي سفلي فيه
:)

اشقصة شخصية مساعد اللي مسيطرة عليج
:)

مو قلنا من قبل
مساعد علشان خاطر نورة دش الغوص
والمحارة صكت على إيده ومات مسكين
وآخرتها زوجوا نورة (اللي بالفلم مو صديقتج اللي بالقصة) حق علي المفيدي
:)


طلعتوا من ربع ستاربكس حولي
يعني جيراني أنا من محبي سيغافريدو حولي
اللي تحت ستاربكس مباشرة
:p


ودمتم بحب وود

بـابـل يقول...

مساء الورد


حوار حلو بين أثنين قلبهم على بعض

واللي إيده بالنار غير اللي إيده بالثلج يانوره

والدنيا ماتوقف عند محطة وحدة


أتمنالك كل خير وسعادة



وبس


بابل

غير معرف يقول...

بالطوفه على قولت نورا !!!! و انا اقول بعرض الطوفه يا زيون
سديقتي و اعرفها تفصل منه 5 لي بغت ؟؟؟؟مو صح؟
سديقتج

5roofa يقول...

امبي زوزوتااا

حسيت بمليون رد حق اسالة نورة

حسيت قلبي يتقطع وانتي تكملين تدرين ما بغيت اكمل

ماقدرت قلبي جد بلش يعورني ادري تعبتي من بجي

ادري مليتي تعيدين تقولين صيري قويه

بس هذا سبب ضعفي قصصج سبب ضعفي

جد مابي جذي الوضع مابي القصه مابي ولا شي

من صج صج صج هالمره قطعت كل شي باقي بقلبي

و مو انتي السبب مادري يمكن القصه

ولا يمكن انا
ولا يمكن مااادري

بس ضعت بين دموعي

اسفه والله حاولت بس ماقدرت من صج

salamz sweetee...

magnoonah يقول...

ما اخترت انا احبك

محد يحب الي يبي

(بدر بن عبد المحسن)


زيون معاها حق لانه زيون ما تقدر تغلب قلبها هذا احساس الحب يعاند العقل دايما من جذي يقولون عن الحب عمي


ونوره مو غلط نوره تفكر بعقلها قبل قلبها والحمدلله انها موجوده بحياة زيون

:)

بالنهايه زيون محتاجه وقت وراح تنحل مشكلتها

تعجبني طريقة تفكيرج واسلوبج

فعلا عشنا الوضع بصورته الواقعيه من دون لا نحس بالاختلاف او بوجودها كقصه عاديه

وانا احبج من دون دلع
:D

ويسلمـــــــوا

Q80 Blogger يقول...

جني اعرف بطل القصه

فراوله يقول...

مساالورد والجوري
غاليتي زوزو
الدنيا عبارة عن محطات فيها السعيد
واكثرها الشقي
ولكن الاجمل ان نجعل السعيد يزيدنا سعاده
والشقي نعتبره تجربه جميله رغم آلامها
انت من الذين يستحقون السعاده
ابدا
:*

الزين يقول...

أنا اتصور ان نوره وعلاقتها بالزين كانت اجمل شي بالحوار

نورة شخصية حقيقية موجودة بحياة الزين اللي تكتب هالحوارات

بس هالحوارات ابد ما حصلت
هي كلا محض خيال
وحوار من تأليفي يمكن اتقتنه لدرجة ان الكل صدق ان فعلا حصل
وان القصه هذي هي قصة الزين

:)

نقطة وحبيت اوضحها
مشكورة وايد على المرور
واول وحدة بعد

ياااااااااااااه
غير نمونه

:**

الزين يقول...

طائر بلا وطن

بالفعل مو احنا اللي نختار
احنا بس نصنف

دايما تحط التسميات في مكانها يا طائر

من منا.....

الظنون تختلف من شخص لآخر
والتاويلات تتعدد
والفسيرات تتلون

بالنهايةالنتيجة وحده
والبدايات الجديدة دايما تولد في ظل نهاية تجربة أخري

خصوصا تجارب القلب

نورا مسكينه
اقحمت اسمها بالحوار
وصارت تلام على اشياء ما قالتها

مشكور يا طائر على التواصل
ولا تغيب ترى نفقدك

الزين يقول...

سلوقا بلوقا

ههههههههه
مسكييينه قموش

مساعد قصتي معاه قصة
اقول لك بس ما تضحك على
كان في فترة معينة من حياتي فارس احلامي

:)
يمكن لأنخ كسر خاطري بالفيلم
ويمكن لأن حسيت بنقاوةحبه حق نورة
ويمكن لأن اي شي مستحيل نحبه ونتعلق فيه اكثر
وطبعا من المسحيل ان القى واحد مثل مساعد

يدخل الغوص عشاني
وياعوينتي يموت عشاني

بس والله حسافه على نورة
وحسافة على مساعد
وبس يا بحر لازلت احن له

ستاربكس حولي
big time
:)

عيل المره الياية بنزل لك
ويا تعزمني على قهوة
يا انا اعزمك

:)

حياك الله اخوي وعزيز وغالي

الزين يقول...

بابل

صباحك خير يارب

لو ما كانوا قلبهم على بعض ماراح يكونون اصحاب

وماراح تقول الزين حق نورة
ولا راح تقص لها وتشكي لها

والحياة محطات مثل ما قلت
والشاطر اللي يختار المحطة الصج وينزل فيها

:)

اتمنى لك المثل

الزين يقول...

غير معرف

سديييييييييقتي

:******

افصل عشرة عشرة
هههههههه

محد طايح علي الا انتي

يا بعد كل السديقات

:)

الزين يقول...

خروفة

امبيييه
انتي لما الحين تبجين

يا بنية هذي قصة
يعني تأليف
حوار ما صار الا في راس الزين

على شنو قاعدة تصيحين
شوفي الجانب الزين من الموضوع

الزين كانت اعقل واقوى من الموقف
وبالنهاية
الكثير من التجارب ما ننجح فيها
والقليل جدا منها ما تصيب
وهذي اهي الحياة
مرة وحلوة

طولي بالج ماماتي
:**

7osen يقول...

إللى إيده بالماي مو نفس إللى إيده بالنار

هذا الكلام حق نورررة

:)

شوفي أنا أعتقد إذا كان في أمل بين أثنين يحبون بعض مو لازم يفترقون
حتى لو كان هذا الأمل صغيييييير

لأنه ممكن ، ومادام ممكن ليش يستبقون الأحداث

بس اهو اكيد يحب الزين مادام يحاول يخليها تغير

هالعلاقات واايد معقدة ومايحس فيها إلا إللى عايشها
وأي واحد ثاني على طول بيقول خليه يولي وسويله ديليت وأنسيه

صعب هالشعور إللى تمر فيه الزين
عاد مدري أهي شخصية من خيالج وإلا إنتي

:)

غير معرف يقول...

7obeka 7obekaa 7ade estanst 3l post ;****** wo yabelaaa staaar wala shrayech :D

Najmah يقول...

تعجبني نوراا
:)


الزين ولهت على حروفج
استانست وايد :)

kuwaitya_7saweya يقول...

وناسه
صج ساعات يمكن الصديقه ماتقدر تقدم لج اي مساعده
بس كافي انها تسمعج لما تتكلمين وتفتحين قلبج
والله شي كبير

وعلى راي نورا اللي مايبينه ومانبيه
واللي نساك انساه
وعيشي حياتج
ودقي طلعي حرتج
مثل ماقالت نورا
والحياة سعيده

حبيت مدونتج
وناسه
اي وبضيفج عندي لو سمحتي وبعد اذنج

الزين يقول...

مجنونة

الحب عمي وما يحلى الا مع شوية جنون
جموح المشاعر هذ اهو اللي يعطيه الإثارة
الإحساس بالتحدي بين مشاعرج وعقلج
بين المنطق والإحساس اللي يناقض هالمنطق
فيضان الأفكار اللي تحسين فيه ويتبعه تمرد كل شي فيج
حتى انفاسج

كل هذا اسمه حب
تقدرين تقاومينه او تعاندينه بالبداية؟؟

ما اعتقد

نورة فكرت بعقلها لأن هالمشاعر مو قاعدة تطبخ داخلها اهي

وهناك فرق يا مجنونتي

عفية عليج قصة وحوار من الخيال
ابي الناس تعرف انها مو قصتي
وتتفاعل مع الحوار كقصة تحصل لاي بنت
بس مو الزين بالذات

يمكن انا حواراتي محبوكة عدل لدرجة الناس تصدق ان هالحوار حصل

بس انتي اخبر صح
:))))))


تحبيني من غير دلع
اشووووووه

مع اني من غير دلع ما اصير الزين
:)

يسلم عمرج يارب

:**

الزين يقول...

Q8i Blogger

اشك في ذلك
وحياك الله وساعة المباركة

:)

الزين يقول...

فراولة

مشكوره واااايد
اعتقد محد فينا ما يستحق يكون سعيد

المحطات كثيرة يا فراولة
وبين كل محطة والثانية يصير في غربلة حق مشاعرنا وافكارنا وحتى شخصياتنا
وبعد ما نعدي المحطة السابقه ونوصل لمحطة يديده نكتشف ان المحطة السابقه كلش ما كانت تناسبنا
تدرين ليش
لأن واحنا بالطريج تغيرنا

تهقين ذوقنا بيظل ثابت ومتطلباتنا بتم وحده ما تتغير
ولا الشي اللي يعجبنا الحين باجر ماراح يعجبنا

مدري
شكلي قاعده اخربط

اهم شي اني استرسلت بالرد عليج
يمكن لأنج وحشتيني

صباحج فل يالشيخه

الزين يقول...

حسين

مسكينه نوره
الكل يبي يقرص اذانيها

شوف يا حسين
ساعات الظروف المحيطه تغلبهم زتغلب هاالأمل الصغير
ويلقون نفسهم في دوامة تفكير ترهقهم وترهق مشاعرهم
والحب لما يصير فيه معاناة امثر من السعاده
ايي له يوم يذبل يا حسين ويخضع للظروف اللي كسرته
ويتغير شكله والإحساس فيه
ويصيرون الطرفين يحملون في قلوبهم حب بس مشبع بالمرارة
وهالحب هم بغنى عنه

احنا ما نحب على كيفنا
ولا نخلق الظروف اللي حوالينا
نحاول نطوعها بس لما تكون غير قابلة للتطويع شتسوي؟

اوخر احسن
اذا مو عشاني عشان الطرف الثاني
اوفر عليه المعاناة وعوار القلب
وانا اعتقد بهالحوار فلان فكر بهالطريقه
حب الزين لدرجة ان خاف عليها من اللي بييها
وفر عليها كسرة قلبها
لسبب واحد ان حبها اكثر من نفسه
باعتقادي هذا اللي حصل
يمكن غيري يشوف الموضوع بصورة تختلف
مدري

:)

من خيالي لو أنا؟؟؟

:)))))))

شرايك انت بس



حياك الله وساعة المباركه

الزين يقول...

غير معرف

:))))))

حوبيكا من قلب

بعدي والله
اهم شي انج استانستي

ستاااار اكيد

فوقه

:***

الزين يقول...

نجمة

:)

حبيبة قلبي انتي
والمسج وصلت حق نورا

وانا ولهت عليها بعد صدقيني
:**

ان شاء الله دوم مستانسه

الزين يقول...

كويتية حساوية

انج مجرد تفضفضين حق هالصديقه هذا مصدر للراحة

ساعات ما نكون محتاجين نسمع رايهم
بس نكون نبي نقول لهم ويسمعونا
وانهم يسمعون ويتفاعلون معاج
هذا اهم شي بالموضوع

حبتج العافية
وما تحتاجين تستأذنين
ساعة المباركه حبيبتي

7osen يقول...

عندي سؤال

:)

ليش دائماً تسمين الشخصيات اللى يكونون أبطال الحوار او المشهد او القصة
الزين ؟؟

يعني علشان تتخيلين نفسج مكانهم ؟
وتعيشين كل التفاصيل

ولا شنو ؟

:)

الزين يقول...

شوف يا حسين

عشان يكون عندي تصور للحوار والأحداث لازم تكون الشخصية الرئيسة هي انا ( الزين )
وعشان اضبط الحوار ويكون بهالشكل الواقعي لازم يدور براسي وانا ارد عليه كأن الموضوع حاصل لي ويمسني 100%

والزين بالحوار احس في تواصل بيني وبينها اكثر

اقدر اعيشها احسها واتكلم بلسانها
يمكن الزين بالواقع ما تكون طبق الأصل مثل ما اكتبها بس فيها مني وايد
احساسها.. عقلها.. ردات فعلها
وبعض الكلمات اللي تكررها بحياتها الواقعية
حتى نوره شخصية حقيقية موجوده بكل مواصفاتها
بس الحوار عمره ما دار معاها بهالشكل
وطبعا كل الأحداث اللي تصير كلها تأليف
ما حصلت اصلا
يمكن ناقشناها
قلنا شلون بنتصرف بهالموقف
بس القصة كلها خيال

تصدق حاولت اغير الشخصية المحورية بهالحوارت
ما عرفت اكتب
ما عرفت
لا تضحك علي
بس ساعات في شغلات ما نعرف نفسرها
وهذا اللي حصل معاي لما سميتها باسم ثاني

ان شاء الله عرفت اوصل لك السبب

غير معرف يقول...

كلام قلتة لمدونة صبا وأرد أعيدة لج ياالزين



أيها الحب

لقد أتعبت قلوبنا
وأضعفت قوانا
وجعات منا عظماء
ومسحت كلمة المستحيل من قواميسنا
ولا نفرح للهزيمة إلا إذا هزمتنا
ولك ما تشاء ولكن ارجعنا كما كنا أقوياء نتحكم بانفسنا كما نشاء
ويحك أيها زائر المفاجئ
كم تأتينا ونحن مشغولون بجمع الاموال ولذات الدنيا
ونترك كل ملذات هذة الدنيا و نخضع لك
ان أتيتنا تبعناك غصبا وطوعا عنا
وإن إنصرفت عنا بكيناك الدهر كلة

لا نعرف ماذا تريد وأين ستوصلنا
ولا تعرف ماذا تريد منا

ايها الحب
أما كفاك مجنون ليلى وقيس وعنترا
أما كفاك ملايين البشر
لمذا تصمم على وضع بصمتك على كل البشر

أيها الحب
لا أحد يحبك ولكن تجعلنا نحب من تشاء
ايها الحب
ألا إني اشهد أنك طماع وتجعلنا نحب البشر والحجر

ايها الحب
أسألك باللة أن تجعلني أحب اللة وأعشقة مثلما أحب خلقة كلة من ناس و حجر
وهذة الدنيا زائلة ويبقى حب ربي للابد

Barrak يقول...

بقولج شي

قبل جم يوم حشيت فيج
وقلت الزين من القلائل اللي تقدر تتجلى في ايصال احساس معين بسلاسه

سامحيني بس هذا الصج

charisma يقول...

:**

الزيييييييين اقرى الى بكتبه عدل وحطى فى بالج زييين
الحبيب عمره ما يكون صديق وعمرج ما تقدرين تتواصلين معاه عقب ما تتركون بعض

وسلامتج وتعيشييين

قطع وبتررررر انتهى ولا تلتفتييين ورا
يا حبيب يا فلالالالالا

اخذيها منى وانا اخيتج
:**

وعلى راسى نورا
:)

احلى حوار دار بينكم
ويا الزين تراج كوبى منى
وقاعده اعطيج خلاصه عمر :*
الله يحفظكم

DiLLi O MiLLi يقول...

ممكن تعرفيني على نورا ؟
عجبتـــني
:)

هذا أحنا يالحريم ... العاطفة تقودنا وليس العقل

أنا أقول تركية يولي موو كفووو
:)
شفت المقفي .. وربي ما أتبعه لو خطوتين
وأصبعي وهو أصبعي .. لامن غدرني أبقطعه


من كثر ما شدتني القصة .. لو الزين ألحيين جدامي جان عينتها من سذاجتها وضعفها !!!ء

:)


مبــــدعة !! شــوية عليــج يا الزين


:*

GUCCI-q8 يقول...

حلوه وايد وايد
والأحلى
استمتاعي بنوره حقانيه
بس شتسوين الصج قلتيه

: شي ما عرفنا نسيره .. اهو اللي سيرنا...
رائعه

Shather يقول...

حواراتج واقعيه و وايد تصيير

بس اكيد لمسات الزين تحلييها ;)

فتى الجبل يقول...

اللي يبيعج بيعيه برخص التراب اللي تدوسه ريولج

الزين يقول...

حسافتج يا كويت

مشكوره وايد على هالتعليق الحلو

ونعم بالله

زياره اول مره واتمنى ما تنقطع

الزين يقول...

براك

يا هلا ومرحبا
وساعة المباركه
وما تصدق زيارتك شكثر عزيزة على قلبي

وبعدين تعال قول لي انتوا الرياييل تحشون!!!

ومنو حشيت فيني معاه

ومشكور على رايك فيني
مشكووووووور جدا وايد
:)

لا والله من صجي
كلامك يفرحني ورايك اعده من الآراء اللي تهمني حتى لو كان نقد

الزين يقول...

كاريزما

ان شاءالله والغنيمة

والله يسلمج يالغالية

ايه ايه بتر ماكو لعب
:)

بس مو جنه البتر يعور كرووووز

:(

يسلم لي عمرج وخلاصته ولا يحرمني من نصايحج وطلاتج

:**

الزين يقول...

DiLLi O MiLLi

هلا وغلا

نورا
اعرفج عليها افا عليج

وترى اهي موجوده معلقة فوق تبي تروح ستار بكس

هههههههه

مسكينه الزين بتعينينها
حرااااام

لا تلومينها ترى القلب لين حب ما يميز
والعقل يكون مغيب لفتره
ولين وعى يكتشف ان اختياره ممكن ماكان يناسبه
او ممكن ما يناسب ظروف صاحبه

مشكوره على الكلام الطيب
من اقصى القلب

واشششششششششوة انج ادركتي انها مجرد قصة

ومو بالضرورة تكون قصتي
وبيني وبينج
ذبحوني اللي عبالهم قصتي

:***

الزين يقول...

GUCCI-q8

الحلوة عيونج
:**

نورا عاجبة الكل
وماخذه عقل الكل
بسميها شخصية الشهر

:)

بالطبع ما عرفنا نسيره
سمعتي عن احد سير الحب

والأروع تواصلج معاي

الزين يقول...

شذر

شذووووووووور

يا حيا الله الطيبه
الحوار مو وايد يصير
يمكن كل يوم يصير
بين اي بنتين تجمعهم صداقه
وقلبهم على بعض

مشكوره على المرور يالشيخه

الزين يقول...

فتى الجبل

اللي باعنا بعناه
ومن شرانا بغيناه
وبماي العين حضناه

وحيا الله الشيخ اخوي فتى الجبل

سلم على ام العيال وقول لها تقبل الله

:)