.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

20.1.08

شهالأحلام ياربي؟؟؟


البس بيجامتي المفضله
استلقى بالفراش ... أطفي الأباجوره .. التقط مسباحي ... أقرا الورد اللي تعودت عليه ومن ثم ابتدأ بالتسبيح
واستسلم للنوم متمنية ان تكون احلامي سعيده

أنا في مكان ما .. لا أعرفه .. هو مدرسه ... مبنى حكومي ... مزدحمة مواقفه ... أطلع سويتج سيارتي .... أدورها

وين سيارتي؟؟؟ وين راحت؟؟؟ أنا وين صفطتها ... وأتم احوس وأدور حوالين المبنى وبكل المواقف..وانا شكلي ضايعه .. مو لاقية سيارتي .. والناس مشوا .. وانا بروحي واقفه .. محتاره وين سيارتي ؟؟؟
ادخل سكه فيها سيارة صافطه مو سيارتي بس اقول اهي سيارتي .. أركبها .. مالها بيبان @@... أصحى من الحلم

ألم مو طبيعي بمعدتي ... وميته حر

هذا الحلم يتكرر معاي وايد .. مت أبي أعرف شسالفته ... كل مره المكان يختلف بس النتيجه وحده أدور سيارتي ما الاقيها

سيارتي حبيبتى ... المشكله لو تعرفون شكثر احب سيارتي ... لدرجة اني الصبح لما اصعد السيارة احب السكان واصبح عليها .. لا تضحكون علي .. بس هذا اللي يحصل

هالحلم يذكرني بالمرحلة الإبتدائية لازمنى حلم واحد ... أروح المدرسه اكتشف اني مو لابسه جوتيي عزكم الله ... نفس الحلم مرارا وتكرارا ... خلصنا الإبتدائية ... يت مرحلة المتوسطه والثانوية ... عندي ريسايتل .. ابلش عزف على البيانو ... موسيقى من اروع ما يمكن ايي عند نغمة معينة ما القى مفتاحها على البيانو .. شايلينه ؟؟؟؟!!!!
وين راح؟؟ شلون اكمل المعزوفه؟؟؟ التفت الناس كلها تطالعني....ارجع ابي اكمل الاقي كل المفاتيح ملخبطه .. اصحى من الحلم مرعوبه من الريساتل متأكده اني بخوره

ظل الحلم ملازمني لغاية ما بطلت اعزف ... شهالشقا ياربي

كل هذا يثير عندي تساؤل ... ليش نفس الحلم .... ليش المكان غير والنتيجه وحده
البارحه كنت راح انزل الشارع اتأكد ان سيارتي موجوده ... لا تضحكون بس والله هالفكرة راودتني وتميت مده اتقلب عشان ارجع انام

الحين قولوا لي شسالفة هالحلم معاي؟؟؟؟ وليش يتكرر؟؟
وهم أبي أسأل تحصل وياكم هالسالفه ... حلم وايد يتكرر وبشكل مزعج

انا شكلي صكيت على أحلام فهد العسكر

هناك 44 تعليقًا:

Fahad Al Askr يقول...

يادي فهد العسكر اللي محنا خالصين منه، خوش بوست

بس

فريج سعود يقول...

خل اقول لج بالاول حلمي الي قاعد يتكرر معاي مثلج
انا من تخرجت من الثانوية الى اليوم احلم اني رايح الامتحان ومو دارس
وهذا الحلم يتكرر معاي من سنين
اما حلمج اذا سمحتيلي اني اجرب اني افسر حلمج على طريقة تعلم التحسونة براس القرعان
تفسير حلمك واحد من اثنين
الاول هو تفكيرك الدائم بالسيارة وحبك لها خلاها تسكن عقلك الباطن وتطلع لج بالاحلام بسبب التاثير النفسي
وفي هالحالة ماكو تفسير
بل اضغاث احلام
الثاني
بالنسبة لاحلامج الثلاث
المشترك بينهم وهم السيارةوالجوتي وانتي بكرامة ومفتاح البيانو
وهم ثلاثتهم من يحددون الوسيلة للطريق
وخصوصا السيارة فهي تمثل وسيلتك لاتخاذ طريقك
فتفسيري الي من الممكن ان يطلع صح او خرطي ما ادري
انك محتاره او ستحتارين في امرين هامين وكلاهما يأخذك الى طريق غير الاخر
ومن الممكن ان يكون هذين الطريقين اسلوب حياة او تخصص دراسي معين او خطيب المهم انه سيكون شيء ياخذك لطريق معين من الممكن ان يغير حياتج
والله اعلم
واذا طلع تفسيري صح قوليلي علشان اسوي لي برنامج تفسير على قناة فلاش

qesat_5ayal يقول...

صباح الخير
:)

ماجربت هالشي
لكن وايد اعتز بالحلم بحيث أعيش لحظاته كأنه واقع إذا كان ممتع
وأنتشي طول اليوم

واذا من النوع اللي يجعل علامات استفهام تراودني دوما
فأخليه إلى ان يفسره القدر


يمكن حاطين عينهم على سيارتج
:)


أحلام سعيدة يارب

M يقول...

بدايةً يعجبني تسلسل أسلوبج بالطرح, مثل ما يقولون "انسيابي" شي يجيب شي مش (جــك بوم) ولا أنا بنص السالفة ...

"ثم"

ماني خبير بتفسير الأحلام لكنّي أعتقد إن إذا الشخص اهتم بجانب معين بحياته وركز عليه زيادة عن اللزوم ينعكس هالشي على أحلامه.

أذكر على أيام الثانوية العامة "قبل" طبعاً كان ضغط مو طبيعي على الطالب ولعوزة ما بعدها ولا قبلها لعوزة وضغط أعصاب وتوتر وخوف من النتايج, المهم خلصت الثانوية وأخذت النتيجة وكملت دراستي الجامعية والوضع "أوكي" ...

وإلى اليوم يمر علي من فترة لفترة حلم إني بنص قاعة إمتحان آخر السنة ويعطوني الورقة ومادري شلون بسرعة يعدّي الوقت ويدق الجرس وأشوف ولا الورقة فاضية والمراقب يسحبها مني,
...فجأة أقعد من النوم وتغمرني فرحة وأحمد ربي إنه كان حلم.

الأحلام جزء منها على ما أعرفه ينتج من ضغوط الحياة اليومية والإهتمامات فيها, وعموماً اللي يدمن على شغلات "تفسير الأحلام" ويعطيها أكبر من حجمها أعتقد بيتعب (النهام مسوي شغل)

شكــــراً

`~MnO YeNSa! ~` يقول...

وايــــــــــــــد وايــــــد
تصير فيني مرات اروح امتحــــــان مو دارسة وايد وايد و كله اقوم مخترعة ..

اي صج يقولون ان السيارة حيــــاة يديدة .. الله اعلم

lawyer يقول...

اللهم اجعله خيييييير يارب

يقوولج الحلم لا تقولونه لان معلق على رجل طائر اذا فسر وقع لتفسيره

بس الافضل الانسااااان يقوم من النوم يتعوذ من بليييييس ينفث على الجمب اليسااااار و يستغفر و يقول اللهم اني اعوذ بك من شر ما رأيييييت

و انشاء الله خييييييييير يارب


يامعوووووووووووده تعالي شوفاي احلام فهد بسسسسسسسسس

كلا عليه القووووووووووم
حتى باحلاااااامه يتنقى الاوادم

Najmah يقول...

صباااح الخير والاحساس والطيبة

بقولج شي يضحك =)

تخيلي

انا قريت البوست بالليل قبل ما أنام وقعدت اتقلب أفكر بأحلامج

وتذكرت الحلم القديم اللي كان يتكرر معاي وخفت

فقعدت أقول الأذكار لما نمت جان أحلم فيج
:p
حلمت إنج داقة عليي وانا كنت بالمطار جان تقولين لي ترى أنا الزين

وانا اللي سويت لج البرنامج (لووول مادري برنامج شنو)

وقتلج حبيبتي والله حدج مشكوورة .. وبس مع السلامة
=D
المهم نرجع حق محور حديثنا
اقولج يمكن من 8 سنين حلمت إن وحدة شكلها يخرع لما الحين اذكر شكلها .. بكل مكان تطلع لي

كل ما اروح بمكان القاها جدامي واقوم مخترعة .. وتخيلي يتكرر الحلم

ولما اقوم وارد أنام يرد مرة ثانية ماينقطع =\

بعدين قمت أقول الدعاء (أعوذ بكلمات الله التامات من غضبه وعقابه وشر عباده ومن همزات
الشياطين وأن يحضرون) أكرره وايد قبل ما أنام

والحمدلله اختفى الحلم وراحت الأحلام المزعجة

احس الحلم اللي يتكرر له معنى

بس ان شاء الله خير يارب

احلام سعيدة ياصديقة أحلامي =)

غير معرف يقول...

مساء الورد

خير اللهم اجعله خير

ان شاااءالله ماكو الا العافيه

خل افسر حلمج شوفى يا اوخيتى

يقولج سيارتج اذا ضايعه بالحلم معناته

امانى واحلام تتمنينها بس ما تتحقق

تصير بخاطرج حييل بس ما تتحقق

تتبخر هذا تفسير سيارتج الشخصيه اذا ضاعت


:**

اقرى المعوذات قبل النوم وحافظج الرحمن الى عين ما تنام

كريزما
من الدوااااااااااااام
:///

Kuw_Son يقول...

فيج متلازمة الالتصاق القسري والحب الجبري للمركبات
:P

NewMe يقول...

هل الايام احلامي عن بحث تخرجي وبس..
اللاب توب فجأة يصير أكبر مني
تطلع له ريوول ويلحقني..
وأنا بالبجامة أركض بعيد عنه..
لوووول
امزح.. بس الاحلام هي انعكاس لما يدور بداخلك.. في حالتك ما اعرف بس اكيد انت تدرين..
وانا فعلا هالايام احلم كثير عن بحثي.. وفي مرة حلمت بتغيير الفكرة وقعدت من النوم وسجلتها.. واللحين انا قاعدة اغير فيه بناء على التحليل المنطقي بالحلم..
هم ما اعرف هذا شنو..
بس نصيحتي
استمتعي بالاحلام والحياة
ولا تحاتين ما فيج الا العافية
دومي بحب
تحياتي

5roofa يقول...

هلوووو

سمله عليج بخري السياره يا معوده و بخري نفسج ولا قطي صدقه على الحلم

و انشالله خير يمكن لانج تحبينها و تفكرين فيها وايد عشان جذي تحلمين فيها

يقولج الاانسان اغلب الاحلام الي يحلمها بسبب تفكيره بشغله او حبه فهيا وايد


لوول انا كله احلم اني طايحه من سلم و تعرفين الي لي طحين تخترعين و تفزنين من النوم كله ايلي هالشعور

انشالله ماكو الا كل خير


salamz deear...

7osen يقول...

مرحبا زوزو شلونج

شهالأحلام هذي

اللهم جعله خير

والله عمري ماعرف شي عن الأحلام

شوفي انا اقولج
الوحد يحلم بالشي اللى يفكر فيه وايد
وانتي لما تحلمين الحلم تقعدين تفكرين فيه وايد
على شان جذي يتكرر الحلم

:)

هذي تحليلي للوضع

تحياتي لج

Sn3a يقول...

تصدقين
مع ان كتاب تفسير الاحلام بالدرج يمي
الا اني ما افسر احلامي اللي تتكرر
وانا مثلج بكل مرحله حلم
احلامي بالمتسوط دايما اني قاعده اصعد جبل واطيح

ولين طاح الجمل كثرت سجاجينه

معني مخلصه ثانويه عامه من 4 سنين
وللحين احلم ان طايفني امتحان
او رايحه مو دارسه




فسري احلامج
جايز تذكرين شي
او تقررين تسوين شي

نايس بوست

بـابـل يقول...

صباح الخير

والله مالي بالأحلام وتفسيرها

بس انشاء الله حلمك خير

والناس يقولون اللي يفكر بشي معيّن قبل لاينام وايد

راح يشوفه بالحلم وانتى من كثر ماتحبين سيارتك يتلك بالحلم والله اعلم



وبس


بابل

بـابـل يقول...

صباح الخير

والله مالي بالأحلام وتفسيرها

بس انشاء الله حلمك خير

والناس يقولون اللي يفكر بشي معيّن قبل لاينام وايد

راح يشوفه بالحلم وانتى من كثر ماتحبين سيارتك يتلك بالحلم والله اعلم



وبس


بابل

ray يقول...

مت من الضحك زيوون , صحيت من النوم :P

صارلي فترى أبي أكتب عن حلم يفشل و كل ما أقول أبي أكتبه يصير شي ... بما ان الحين موسم الاحلام بالمدونات فشجعتيني :D بكتبه

جنة الحواس يقول...

أنا عندي حلمين شكلهم بيظلون وراي لين أموت ..

حلم إمتحان الرياضيات اللي كله متوهقة فيه

و حلم تقويم الأسنان و هذا عاد قصته ما ينشرح

بس كل أحلامي االلي تخرع و تتكرر تدور حول هالموضوعين

Aldenya يقول...

غيري سيارتج
وشوفي الحلم يتكرر أو لأ :P~

بس اقول مثل ما اقول المعلقين
ان حلمج ممكن يكون دليل لتعلقج بهالشي


نفس البيانو السيارة ... الخ

بس ترى هالحلم المكرر ينتاب الكثير من الناس

لاحظت الردود
ولاحظت نفسي
هم أنا عندي حلم دايما يتكرر
ومن زمان
احلم انى قاعده امشي بمكان هادي
سكووون
امشي وخطوه خطوة ارتفع عن الارض
ليمن أوصل فوق
وأفز فجأة من نومي واحس انه شي إميود قلبي
غامته
بس اقوم اتعوذ واقوم من الفراش
واشرب ماي وارد أنام

بس تصدقين
على طاري لاحلام
أعرف وايد ناس
يملكون الحاسة السادسة
أي يحلمون فيه يتحقق
وسبحانك ياربي
يتحقق بالضبط

:>

sologa-bologa يقول...

اذا كان مفتاح صول
فهذا يعني في أحد معاندج

وإذا كان مفتاح مي
هذا يعني مسوين لج عمل

وإذا كان مفتاح فا
فهذا يعني إن ديودرنت فا بيمنعونه من الجمعيات

أما إذا لا
فلا تعليق عندي أكثر من اللي قلته


شرايكم بالتفسير الموسيقي
مو أحسن من اللي يقول

عليك الحلم وعلينا التفسير


ودمتم بحب وود

Selezya يقول...

انشالله خير :)

صراحه انا اقول نفس فريج سعود اول تفسير انه الشي اللي تتمسكين فيه وتفكرين فيه وايد لازم يثبت بعقلج الباطن والعقل الباطن ما يطلعلج الا بالاحلام :)
يعني خفي على نفسج شوي من السياره لا تفكرين فيها وايد


انا الفتره الاخيره احلم بشي وتكررلي تقريبا 3 مرات بس بمكان مختلف عموما اهو حده خوش حلم فحدي مستانسه فيه :)) ودي يكمل مايخلص

Shather يقول...

صباح الخييييييييييير :}


اولا اللهم اجعلو خير ...

حلمي الاول مثل حلم فريج سعود دايما احلم اني رايحه امتحان و مو دارسه و تصك فيني الدنيا و تصير عفسه فسيولوجيه فيني .. ههه


و في حلم ثاني وايد يتكرر معاي .. دايما اروح يا اني اتسوق يا اني ادور ملابس و ما يعجبني شي و اتضايق او تشوفيني اختار اشياء و بالاخر ما اخذ شي منهم :\


من فضولي بتفسير الاحلام ماخليت كتاب تفسير ما شريته لول بس ماكو فايده

الزين يقول...

فهد العسكر

حياك الله

الزين يقول...

فريج سعود

عجييييييب التفسير

حيل منطقي

انا اقول تسوي بلوق تستقبل فيه احلام البلوقرز وتفسرهم

:))

لا خلا ولا عدم

الزين يقول...

قصة خيال

يمه يمه سيارتي

لا تخلين الوسواس يشتغل عندي

:))

الزين يقول...

Q8 uniQue

ياهلا ومرحبا يا حيا الله من زارنا
مشكور وايد على الإطراء

انا اعتقد هالأحلام تيي نتيجة السترس وضغوط الحياة

مالها تفسير سوي كثرة القلق والتفكير

مشكور يالشيخ على المرور وساعة المباركه

الزين يقول...

منو ينسى

انا كنت ادري ان كل واحد عنده حلم معين يتكرر له

بس كنت ابي اعرف شنو هالحلم

انا عارفه تفسير حلمي
اهو مو حياة يديده

اعتقد اني وصلت لمرحلة يديده من حياتي
ومو راضيه اتزحزح منها

مجلبه معاي

او مو عارفه شلون اطلع منها

:$

كلش مو شي

الزين يقول...

لوير

خلينا من فهد وأحلامه

انتي شنو الحلم اللي يتكرر معاج؟

الزين يقول...

نجمة

لوووووول خوش حلم

اهم شي صوتي شلون كان؟؟

ايه بلا

انا برمجت مخج عشان تحبيني وما تردين لي طلب

بس انتي ما تدرين

:)))))

حلمج اللي يخرع له تفسير انا اعرفه
ماراح اقوله هنيه

حبيبة قلبي انتي
يازينج من رفيقه للأحلام

:**

الزين يقول...

كاريزما

كلامج صح كان في شي في بالي وماصار

خيرة ان شاء الله

اهو ضاق خلقي شوية بس الحمدالله

الحين ولا بعدين

:**

الزين يقول...

كويت سن

سايكالوجياً احتمال وارد

ايدالوجياً تفكير زايد

ولك ان تختار

:)

بلوقياً ماعندي حجي زايد

تصويرياً وهذي هي اللغة اللي انت تفهمها احسن مني طبعا

عندك حس فني ولقطات عجيبة وايد

:))

وشكرا على المرور

الزين يقول...

NewMe

:)

حلمج ترى يضحك

صدقينى مو قاعده احاتي
بس الحلم تكراره مزعج

مليت ابي شي يديد
:))

يعافيج يارب

:**

الزين يقول...

خروفه

تدرين شنو يعني حلمج؟

ان اعصابج مشدوده وايد

وان نسبةالرومانسية بدمج خطيره

خففي وانتي تصيرين زينه

:**

الزين يقول...

حوسن

والله مادري يا حسين

بالعكس انا ودي اتخلص منه
احسه مزعج

الزين يقول...

سنعه

مدري والله

هل الأحلام اللي من هالنوع لها تفسير؟

يمكن تكون احلام وبس

:**

الزين يقول...

بابل ومن ثم بابل

كل شي جايز

مع اني ما فكرت بشي قبل لا انام

وبس

الزين يقول...

ريي

اشوة ان في احد ضحك

لأن الحلم صج يضحك

بس انتي حلمج شي ثاني

:)))

الزين يقول...

بروك

ياساتر

:)

اسم الله عليج من الموت

:**

ابي اعرف حلم تقويم الأسنان شكله فيلم رعب مشوق

الزين يقول...

الدنيا

بس تصدقين
على طاري لاحلام
أعرف وايد ناس
يملكون الحاسة السادسة
أي يحلمون فيه يتحقق
وسبحانك ياربي
يتحقق بالضبط

هنيه المشكله
انا احلامي تصدق يابنية
:))

يعني تخرع

الزين يقول...

سلوقا بلوقا

:))))))

بدعت

خووووش تفسير

الزين يقول...

سيليزيا

انا بعرف بس من قال لكم اني افكر بالسياره وايد

كوني اني احبها واستمتع بسواقتها مو معناته انها شاغلة بالي

ماكو شغل

:)))

الله يهنيج بحلمج

بس ما علمتينا عنه؟؟

Jobove - Reus يقول...

very good blog , congratulations
regard from Catalonia Spain
thank you

عثماني يقول...

الزين شلونج؟؟

هو احلامج اكيد لها تفسير

بس مادري شنو ؟؟

:)

مادري ليش حاط تعليق !!

بس ما يصير امر زوزوتا و مااعلق

حافظج الله يا الغالية

Najmah يقول...

مساء الحب زوزو

لووول وانا اقول شنو هالحب اللي مخليني مرابطة عندج :)

ابي اعرف تفسير حلمي :(
خلاص انطر منج ايميل :*

اذا طلع خوش تفسير بقولج تفسرين حلمي الثاني اللي قعدني اليوم :d
صج كاان فلم ررررعب

=\

J Daily يقول...

حلم الجوتي حلمان فيه بالابتدائي والمتوسط وتوقف

ان لما ادخل الجمعيه إلي عند بيتنا
افصخ نعالي او جوتيي عند الباب

او مرات ادخل واكتشف اني حافي (: