.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

12.1.08

ولد الحلال







يمه
علميني بصريني
كيف أعرف وكيف أميز وكيف أختار

شوفي يالزين .....وحطي حجوتي لج ترجية بذانيج الأثنين
وقبل اقولج لازم تعرفين
نصيبج لابد يصيبج والزواج ماهو لعبه
هوشراكه بين قلبين
يربحون ... يخسرون ... كله بيدهم وبيد الرحمن الرحيم
واذا بتعرفين ولد الحلال
بيكون مثل ما بتسمعين




ولد الحلال يا بنيتى
لما يشوف إن دنيته ذي كلها بعينج
لما يحس إن الحياة يعني بوسه على جبينج
لما يحقق طلبتج ويحطها بين ايدينج
لما تكونين بعد الكعبة كرمها الله جبلته
يذكرج للرحمن ويدعي لج بالهداية والصلاح والثبات بسجدته
وإذا صرتي بيومه انتي حبه وانتي سلوته
ولي بجيتي ولي شكيتى فزت بقلبه عزته ونخوته
ولي صحا بعد الرقاد من نومه
يناظر زولج ويعدج فجر يومه
ولما يرضيج لأجل يرضي ربه
ويطلب منج تدعي له يسمح دربه
ولما يحرص رزق يومه يكون حلال
ولما يفتخر ويقول للجميع ... هذي أم العيال
وحطي في بالج يا بنيتي مو كل طويل الشوارب ريال
الرياييل حبيبتي قول وأفعال
ولد الحلال يا الزين ما يرضى بالضيم
ولا يرضى يبات وقلبه مكسور وظليم
ولد الحلال يالزين عند الشدايد تلقينه ظهر
وما يرضى لج بالقهر
ولي مرضتي يسهر على راحتج حتى لو دهر
يبشرج بالأجر رغم التعب ورغم السهر
ولد الحلال يابنيه ليه شهقتى يسمى عليج
ولي زعلتي بالغلا يشتريج
ولي بعدتي يدور عليج يبيج
وبروحه يحضنج ويفتديج
وليه عطشتي يالزينه بيده يسقيج ويرويج
ولد الأصول لي قبل فزوا له كل الرجال
والأصول يالزين ماهي دشداشه وغتره وعقال
وحطي في بالج ترى امه ثم انتي
لوما امه ما استويتي زوجة له ولاكنتي أم لعياله
وهنياله من رضا والديه هنيا له
ظفر بالجنه بطيب افعاله





هناك 43 تعليقًا:

Fahad Al Askr يقول...

اي ناس وناس

مو قبول، البوست اللي قبله تحطين اسم لوير، وهالبوست تحطينه بدون أسمي

وبعدين الله يهداها الوالدة، جان قالت يمه ولد الحلال علشان تعرفينه، بس بحري عيون ولد العسكر وأنتي تعرفينه، ليش مكلفة على روحها وعادة 20 وصف

سلمي عليها وقولي لها يمة ولد العسكر يقول بعد فيه جم شغلة ما ذكرتيها عنها

lawyer يقول...

ولد الحلال يا الزين ما يرضى بالضيم
ولا يرضى يبات وقلبه مكسور وظليم
ولد الحلال يالزين عند الشدايد تلقينه ظهر
وما يرضى لج بالقهر
ولي مرضتي يسهر على راحتج حتى لو دهر

واااااي الود ودي اسوي كوووووووبي
حق البوست كله

اعلق على شنو و الا شنو


على الحكم؟؟
والا الموعض العجيبه


امج كلامها درر

بس من يعرفه

اكييييد في عيال حلال

ووايد
الدنيا بخييييييير

بس يبيله اتبصر


الله يسسسعدج
و يرززززززقج
يارب

واااااااااااااي

توني اعرف قدره يوم قريت وصف ولد الحلااااااااال


بووووووووووست روعه





فهد العكسر

انت لي الحين مصدق نفسك و عااااااشق رووحك

يالله قم بس قم روح تزووووووووج و فكنااااا
بعدين مرتك اهي الي بتقوولنا اذا انت ولد حلال




ياربي هالرياااااااااااااااااال
معجب بعمره

Najmah يقول...

قريتها حق امي :)

تقول لج صح لسانج و يارب يرزقج ولد الحلال اللي يحطج بعيوونه :)

اجار الدين كشمش يقول...

الزين ..قولي حق امج
ان هالاوصاف من عيال الحلال

انقرضواااااااااا

وامي ماهي زعلانه على بيتكم
لانكم ما عزمتوها وما رديتو عليها


فمالله

charisma يقول...

شسويتى فينى يالزيين
عفستينى عفيسه اااااااااخ
ما عليينه منى :(

قولى اميييين يالزيين الله يرزقج الريال الى فييه كل هالصفااة امين يا رب
:**
وصح الساانها الوالده
:)

qesat_5ayal يقول...

يالله
يالله

قولي أمين

يا عل تلقين من يسعدج
ويكون لج عون دنيا ودين


الله يشرح صدرج
بوست ،، لا اعتبره اكبر من مجرد بوست

انا مستانسة وفيني دمعةعالقة
:')
وايد وايد مريح

صبا يقول...

واااي علي كلام الوالده ؛الصراحه يعجز لساني عن الرد
البوست روعه وكل بوست احلي من الي قبله

اينن

قولي اميييين عسي الله يرزقج بواحد فيه هالوصف كله وزود

وحلو يطير العقل مثلج مو مثل

فهد العسكر جيكر

تحياتي بكل حب يالغليه

الزين يقول...

فهد العسكر

@@

وصل السلام وامي تقول لك يوز عن بنيتي

وبعدين انا شكلي بكتفي برد لوير عليك

:$

الزين يقول...

لوووووير

الله يسعدني ويرزقني

;-)

اهم شي

:))))

ربي يسعدج انتي ويعطيج على قد نيتج

وانتي صاجه يافطيم

لو خليت خربت

الزين يقول...

نجمة

الله يخلي لج الوالده

وقولي لها صح بدنج ومشكورة على الدعوة

:**

الزين يقول...

أجار الدين كشمش

ويه يا حسرة قلبي
اهم والديناصورات مع بعض

:))

لو خليت خربت يالشيخ

وبعدين ليش الزعل

احنا ما بينا هالسوالف

امك له صدر البيت ولنا العتبه افا عليك

تفج الباب وتدخل

حياك الله انت وامك يالشيخ

:)

الزين يقول...

كاريزما

شسويت؟؟؟؟؟

والله ما اقصد

:**


وياج يارب وكل البنوتات الحلوين مثلج


وصح بدنج يالغلا

الزين يقول...

صبا

تهقين لما الحين ما رزقني

:)

ايه صح انا وياج

فهد جيكر وايد

وانا احب المزايين

:))))

الله يستر

مشكوره صبا على المتابعه

مشكورة من اقصى قلبي

haifa يقول...

الزين

حرام عليج واللللله .. قلبتي علينا المواجع ..بذمتج هذا وين نحصل منه ..

شباب وهم شياب هالوقت الواحد منهم عند اول مشكلة صغيرة.. قام ينافخ ويقولب عيونه ويقولج شتبيني اسويييي!!!

هذا غير النفسيات والتناحة وقلة الذوق .. والواحد منهم مستعد يحفي وراج بس عشان شكلج .. وماله شغل لا بعقلج لابثقافتج ولا اخلاقج كله طااااف .. عشان جذي تشوفين الزواجات حدها سنة اذا مو أقل ..

عموما يرزقنا وياج ببيض هالصعو!! وبوسيلي راس الوالدة

darkness يقول...

ولد الحلال اللي يخاف ربه فيج
يعرف ربه و يشتغل لجل يكفيج

يكون لج الدنيا و انتي الشمس اللي تدفيه

امبيه امبيه امبيه شنو هذا كله يا الزين يا بنت ام الزين ابدعتي

Fahad Al Askr يقول...

لوير وصبا وزيون

سمعوني عدل ثلاثتكم

كل وحدة تتكلم عن نفسها، وبعدين ليش هادين المدونة والموضوع وأم زيون ومجابليني، أنا جيكر أدري، لا وآكل الجنجفة من القوطي، بس الحلاة حلاة الروح، أنا مؤمن بأن الكويتي حلاته بجلحته، مو يتكشخ ويتفرفر من محل مكياج لي مال عطور

وبعدين شكوا هادين مطابخكم ومتحرشين فيني، وخلوا عنكم التحرش بعيال الحلال وجابلوا دواماتكم

esTeKaNa يقول...

وااي يا الزين!!
أمي قاعده يمي واناأٌقراهالبوست
سرحانه اهي تشوف التلفزيون
وأقرا انا كلامج
فجأة تنهدت
والتفتت
اشفيج يمه؟
قريت لها البوست وقلت
يمه ابي من هالنومنه يبيلي
:)
قالت لوهو بالجمعيه شريته
لو الفاه بمكان يبت منه عشر وزعته على فلانه وعلانه
بس اقريه من الاول
نصيبج بيصيبج
:))
في من هالنومنه يا الزين
ولا هذيله راحو بزمان أول؟

الزين...ما نشوف منج الا الزين
ربي يحفظج لكل غالي يحبج:*

Mamloo7a Q8ia يقول...

يا سلاااااام عليج
ابدعتي
بس هالنماين والموديلات انقرضت من زمان وصاروا للاسف ندره
هذولا من زمن امي وامج مو في زماننا الاغبر
اللي الزواج فيه صفقات تجاريه
وحداق وصيد
ولا اشرايج حبيبتي؟؟

DiLLi O MiLLi يقول...

الله الله الله
أشهالكلمات .. أشهالسماحه بوصف ولد الحلال .. ذكرتيني بيدتي الله يرحمها



بــــس وينــه هالــولد الحــلال هــذا !!؟؟؟

بالحــــــــلم !!؟؟؟



يااااااااارب
الله يـرزقج بواحد مثلة أذا موجود



:)

فريج سعود يقول...

تعليقي الصجي بخشه بقلبي
تعليقي الثاني
قولي حق الوالدة
يما هذا الولد يعطونه المهر ما ياخذونه منه

J Daily يقول...

صفات كل الكويتين ((:

Abdulla Al Ameri يقول...

مرحبا ملايين و لا يسدن

مواضيعج والله انها حلوة

الله يرزقج و يرزقنا

فريج سعود يقول...

you too

غير معرف يقول...

love it i love it i love it i love it, sa7 sa7 ssa7 ,,Bravoooooooooooooooooooooooooooooooooooo

Jazz

جنون إحساس يقول...

آنا يتلي البجية بصراحة :"((
والصورة تكسر القلب, راحوا عيال الحلال والبقية مهددين بالإنقراض ..

عسى الله يرزق الجميع الآنسات :)

`~MnO YeNSa! ~` يقول...

وااااااااااي مو صج ... عورني قلبي فيـــــــــه جذي !!

يالله ارزقنــــــــا منهم عيال الحلال اللي يقر عينج لا شفتيه و شافج
و يشوف الدنيـــــا فيج و تشوفينها فيــــــــه

الزين يقول...

هيفا

ليش احس ان الصورة اللي حاطتها تمثل وحدة من شخصيات بوستاتي

او تحتاج اكتب فيها بوست
:)

عاجبتني الصوره حيل عن جد

نرجع حق تعلقج

اييييييييه وين نحصل منه عيزت اقول حق أمي هالحجي

بس حرام والله ترى مو كل الرياييل مثل ما تفضلتي
فيهم من يستاهل صدقينى

اهم بس قليلين وايد
وتحصلينه بطق العصي

بيض الصعو
:))))))

ربي يرزقج منه يارب ويعطيج على قد نياتج يا لشيخه

:**

الزين يقول...

داركنس

امبيه امبيه امبيه

يا زينج ياحلو تعليقج

:))

نورتي ومتابعتج جدا تسعدني

الزين يقول...

فهد العسكر

ياكم الذيب ياكم ولده

يمه عوافير اسم الله علينا

خير يعني قلنا راينا
وبعدين شعليك عندك من يدافع عنك
بس مو عندي

تدري وين

الزين يقول...

استكانة

ماميش من هالنمونه
آخر واحد انا حاجزته

:))))))

بس اذا تبين نسوي شروكه
والشرع حلل اربع

شرايج؟

فيه منهم لو خلصوا؟؟؟

فيه يا استكانه في
:)

ويحفظج
ويعطي كل البنات اللي بخاطرهم ولا يخيب ظنهم يارب

:**

الزين يقول...

استكانه

ابيه توني انتبه على سالفة الجمعية

تصوري عاد

جان الحين بنات الكويت ذبحه بالجمعيات
لحق لا تلحق

واحد للإستعمال والثاني سبير لين اخترب الأولاني

الله يالطمع

خلي شوية حق غيرج

:)))))))

وعاد يمالج من المكامش والتزرد

انا اخذته اول
لا انا اول

ابيه انا اندمجت وقاعده اسوي افلام

:))))

خوااااااااره

الزين يقول...

مملوحه كويتية

احلا شي بالموضع الحداق

انا بروح احدق جود الله يرزقنى بولد حلال
بس شنو بيطلع

هامور لو سبيطي

:))))

يا بنيات يا حبيباتي

تفاءلوا بالخير تجدوه

ربي يسعد كل البنات يارب
وانا وياهم

:**

الزين يقول...

DiLLi O MiLLi

كل وحده داشه تسألني وينه

:))))

ياليت بيدي
جان وزعت عليكم كلكم
وكل الوردات الحلوين اللي مثلكم

الله عاد حزتها يا كثر العرووووس

بالحلم؟؟؟

خل نحلم

ترى كل شي ابتدا بحلم

:**

حبيبة قلبي والله

الزين يقول...

فريج سعود

لا تخش شي بقلبك وقول اللي بخاطرك

انت تمون

ليش بعد مهر
اهي معطته راس المال وشقا عمرها بنيتها

هم بعد على هذا كله يبي مهر

:)))

انا اقول الطيبون للطيبات يالشيخ

لو شرايك

الزين يقول...

يعقوبوووو

ابد ما يبت شي من عندك وانت صاج

:))

الزين يقول...

الأستاذ بلاليط

يا هلا ومرحبا بأهل الإمارات

الأحلى وجودك يالشيخ

ويرزق كل من يحب الستر يارب

حياك الله أخوي

الزين يقول...

فريج سعود

Done

الزين يقول...

Jazz

:)))))))

7beebti walla

welcome 2 my blog dear

hope 2 c u again

:*

الزين يقول...

جنون احساس

يه يه يه

يا حيا الله من زارنا

اسم الله علينا من البجي ليش جذيه

بالعكس تأملي بالله خير وربي يرزقج

ومثل ما قلتها حق فريج سعود
الطيبون للطيبات يالشيخه

اما عن الصوره فهي من تصوير المبدعه المدونه بروك

الشكر بروحه ما يوفيها حقها
ابداع

صــــــــــــــح

:)

اللهم آمين

الزين يقول...

منو ينسى

اللهم آميييييييييييين يارب
ويرزق كل البنات
الطيبات مثلج وشرواج

:**

sologa-bologa يقول...

بصراحة قريت النص وضاق خلقي
لأن ولا شي من اللي قلتيه
ينطبق علي
:(

خصوصا

"ولي صحا بعد الرقاد من نومه
يناظر زولج ويعدج فجر يومه"

ما أفتكر لأن أول شي أناظره هو المنظرة
أطالع روحي وأضحك على العيون المتفخة
والخدود السايحة

"ولي بعدتي يدور عليج يبيج"

بصراحة ماراح أدور لأنها بتكون إما
في السوق أو في بيت أهلها أو طالعة
مع الصديقات في الكوفي شوب
:p

"وليه عطشتي يالزينه بيده يسقيج ويرويج"

لا ماراح أسقيها بيدي لأن إيدي ريحتها زقاير
وفي الحالة سوف أتسبب لها بالربو وضيق التنفس أبعد الله عنكم وعن السامعين كل مرض


الشي الوحيد اللي يمكن ينطبق علي
هو رضا الوالدة
وهم فوق هذا ميننها


حسافة فلست من سالفة ولد الحلال


كأني قتلت الرومانسية اللي بالنص
والنصايح اللي فيه
:p


ودمتم بحب وود

الزين يقول...

سلوقا بلوقا

اسم الله عليك من ضيقة الخلق

حسافه

طلعت كلش ما تصلح

بس انا اقول لك سر صغيرون كلش

اذا حصل لك بنت حلال

وحبيتها من اقصى قلبك

بيتغير كل هذا

صدقني

الله يخلي لك الوالده يارب ويديمها فوق راسك

هالله هالله فيها

مالك بركه غيرها

:)

ray يقول...

هالمرة راح أكتفي بالصمت

Being the pessimistically realistic blogger that I am these days

:)