.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

19.7.07

تعب قلبي .... الزين كلاكيت رابع مره


الزين : تعبتني معاك .. تعبتني

هو : قصبن على والله مشغول

الزين : وانا تعبت من انشغالك .. انت منت فاضي لى ... تعبت من حالة الوله اللي مالها تالي
.. انت اصلا تقريبا منت موجود بحياتي

هو : لا تقولين جذيه .. انا كلي لج .. انتى حياتي

الزين : وينه .... ما اشوفه هالحجي ... انت حتى لما تكون مشتاق ما تقولها

هو : الزين .. عطيني وقت ... احتاج اتعلم

الزين : وقت ... انا مستعده اعطيك عمرى عشان كلمة وحدة حلوة
.. انت يا فلان بخيل ... بخيل علي بمشاعرك ... وانا
صعب علي .. وايد صعب انتظر شخص .. كلمة ولهت عليج يستصعبها


هو : لا تقولين جذيه ... انا قاعد احاول

الزين : مو كفاية

هو : شلون ... قولي لي شنو يرضيج

الزين : ابي من وقتك زياده .... ابيك تلغى عقلك للحظة ... تخلي قلبك يحجي من غير تحفظات
.... انت ذبحتني ببرودك
بهدوئك ... خنقتني

هو : خنقتج ؟؟؟؟

الزين : ايه خنقتنى .... حجمت مشاعري ... صرت خايفه اقول
... خايفه اتكلم لا انفهم غلط ... انت حتى الخيال رافض تعيشه معاي

هو : زين .... انا قلت لج من البداية انا واحد ريولي بالقاع ... عقلي يسبق قلبي ... احسب حساب الكلمة قبل لا انطقها

الزين : مو معاي ... انت لو صج لي معزة عندك ... لو انا ملكت جزء صغير من قلبك
... لو انا حويت جزء اصغر من حياتك ما كنت راح تحاسب معاي ... كنت راح تحس اني نفسك
... انا انت ... احنا واحد

هو : زيون .... زيون ... انتى شقاعده تقولين

الزين : اقول اللي احسه .... غيابك يجرحنى يا فلان

هو : انتى فيج شي .... قولي لي عشان اعرف اريحج

الزين : كل هذا وما قلت ... ياربي .. فلان .... انا بسألك سؤال..... انت تعرف تعصب .... تعرف تنفعل

هو : انتى شنو تبين توصلين له .... تبيني اعصب ... وبعدين وعقب ما اعصب وازعل

الزين : يا فلان انا حاسه انى مولعه .... وانت قاعد بالثلاجه

هو : يعني ترتاحين لين عصبت وزعلت عليج

الزين : مادري شنو ابي ... وما دري شنو يريحنى

هو : اوكي هدي شوي ... ذكري الله ... انتى وايد معصبه

الزين : يعني شنو ... على بالك ان ياهل تقص على بكلمتين

هو : زيون .... شفيج اليوم ... شاللي تغير

الزين : قول شاللي مافيني .. انت يننتني ... طلعتني من طوري... وتسألني شاللي تغير
... ما تغير شي ... لازاد ولا نقص ... انا مادري انا شنو بالضبط بالنسبة لك ... وين مكاني بحياتك

هو : انتى الزين .... حبيبتي

انفعل ... خلني أحس أنك معاي

كسر الدنيا بيدك ... اعصر دموعي بكفك ... وانت تتنفس هواي

على صوتك .... هزني بقوة ... خلني احسن أن حبك ..... أقوى

خذني بأحضانك وقولي ..... رضوتج فيها ... رضاي


الزين : فلان

هو : ابوي إنتي

الزين : انا بمشي .... بفل

هو : وين رايحه ... شنو اللى صار .. الزين أنا ماني قادر افهمج

الزين : تعبت يا ولد الناس ... وماني لاقية راحتى معاك

هو : انتى أكيد تتغشمرين

الزين : ......لأ ما اتغشمر

هو : زين ردي علي

الزين : ..... شقول

هو : يعني شنو شقول؟ ...... قولي اللي في بالج

الزين : قلته............. وخلص الحجي

هو : ........... ؟

الزين : اخليك

هو : برجع أكلمج

الزين : باي

هو : برجع أكلمج زيون


أبرحل تاركه احلامي معاك

جروحي كثيرة ودواها هواك

أبرحل ... وقصصنا تسايرني

تذكرنى بضنى حبي

تذكرنى باللي جرى بيننا

أبرحل واتركك

يمكن رحيلي يحركك

يمكن غيابي يكوي دمعتك

يمكن تكون الزين ماهي قصتك



هناك 26 تعليقًا:

غير معرف يقول...

مادري ليش يا على بالي بطوط
وزيزي
:)



مو قلت لك من
اول كلاكيت



يابنت هذا مايعرف يحبها
وماصدقتيني
قلتي ان انا اللي عندي مشكلة
:)
قلت لك خسارة فيه كل هالمشاعر
يمكن
هو زين
يمكن هو طيب
بس مايعرف لها
..

صدقيني بتتعب معاه
ببساطة
هو مايفهم لغتها

..
ومااعتقد لها خلق تعلمه
ولا هو عنده صبر يتعلم
..
احلى شي
"بدي ِفل"

زيزي
تحياتي لك

(كوكا)

همسة التحنان يقول...

كلاكيت ممتع
تحياتي

7osen يقول...

فعلا يمكن الزين ما هي قصته
:
الزين هدي أعصابج شوية
:

مره شفت حلقة من برنامج اوبرا وعجبتني واايد دائما اقولها كمثال حي

كانت عن الرجل اللى يحب وما يحب
الرجل اللى واقف بالنص

اوبرا أسألت الضيفه قالت لها لما تسألينه انت تحبني شنو يكون رده

ردت ،،، يقول احبج لكن ،، وبعدين تبدأ الأعذار من
مشغول ،، ما عندي وقت ،، ما قدرت ،، مو فاهمج ،، انطري شوي ،، بعدين ،، خلينا بالحاظر ،، وهكذا

اللى يحب ما يقدر يتأخر ما ينشغل ما يقصر مايقدر يقاوم سيل مشاعره مايقدر يتنفس بدون اللى يحبه

اللى يحب يتواصل ويوصل ويتصل

اللى يحب يحتوي ويكتوي ويروي ويرتوي

اللى يحب ماينام وما ينلام وما يعيش الا بالاحلام

اللي يحب ياعزيزتي مايقدر يخفي حبه
لازم يكون دائماً يبي القرب لازم يكون متواصل بالمحبه لازم بدون ما تطلبين يكون موجود لازم يحس بحتياجج لازم تكون مشاعره مثل مشاعرج اللى متلهفه ومنتظره دائماً

ولا صدقيني يكون ما يحب

اتمنالج مشاعر مثل مشاعرج
وحب يقدر هالشعور


تحياتي يا زوزو العزيزه

محـــــارة يقول...

زيون أي خلي البوستات حاميه جذي .. مانقدر تقطعين فينا :)

يمكن يحبها بس مايفهم لها ماقدر أظلمه .. وهذي مشكلة البنت شلون تعلمه شنو تحب وشنو تبي

ساعات أحس بالرجل غباء غريب الأطوار لازم تشرح له شنو يسوي عشان يشبعها بالحظه معينه .. يعني تقوله فرضا مشتاقه يبتسم ويقول حتى أنا .. تتكلم وتتغزل يقابلها أبرود تعبر عن شوق جارف يرد عليها برد غبي بلأخر لما تعصب يقولها شفيج انزين انا شدراني شنو تبيني أسوي أو اقول ؟؟

عجبني رد أخوي حسين وايد

بس لما الي يحب ومن قلبه ساعه يعبر ويتفاهم ويساير الي يحبها ويشبعها غرام وتنفيس عن الحي وتمر عليه لحظات ينقطع وينسى حتى نفسه لأنه منشغل .. شلون يقدر الطرف الثاني يتفهم أنشغاله لأن اباله أن أهوه الحبيب فشلون يسلى من دونه هل معناتها نساه أو ما كان حب من قلب ؟؟

الحب خريطه معقده تختلف تضاريسها على حسب من يحكمها

واصلي حبيبتي إبداعج لا توقفين ناطرج يا الزين كله

غير معرف يقول...

لك ايامي او تبخل في دقيقه ا جل وشلون لو كانت ثواني بخيل في العطاا ماهي طريقه واحد مرتاح والثاني يعاني
لما قريت هالحوار تذكرت كلمات هالأغنيه
http://song4.6arab.com/Kazem-Elsaher_Lak-Ayami.ram

عبله:)

Shather يقول...

واااي زوزوتا انتي احد دازج علي ؟؟؟

قلبي قلبي ...


انا بفهم الريال لما يقول انا لمن احب ابدي عقلي على قلبي اشايفنا ؟؟
بهايم نمشي و ناكل اي شي نشوفا جدامنا ؟؟

بس زين سويتي ..
كليتيه قبل لا يتعشى فيج

:P

charisma يقول...

مساء الورد

والله مشكله زوزوتا هالصنف من الرياييل
ههههههههههه

ترى مشكلته هذى فى اغلب رياييلنا
ما يتكلمون ما يعرفون


وايد رياييل ما يعرفون ان احنا نحتاج الاهتمام

نبى الاحتواء نبى حسهم وجودهم

رعايتهم اهتمامهم

واذا قلتيله قالج انا احبج وانتى بقلبى

احنا نحب نسمع

نبى التحلى الكلام

هالنوع متعب اعرفه زيين
لول

بس يختج حلو :))

والله انا اخاف من بياع الحجى الى يصفصف حجى حلو طول المكالمه

صدقينى هذا الى مو عاجبج اهو الى عشرته تنشرى بالغالى

بس متعب يعنى كبرى عقلج معاه

وايد عاجبتنى هالحوارات
مو بس كلام فاضى
تعكس وايد امو اتواجها كل انثى

خليهم يقرووون خل يعرفون احنا شنحتاج منهم

اييى والله احنا نحترق واهم برود الدنيا

ههههههههههههههههه

تسلم ايدج

بس انا اقول حق زين خل تعطى فرصه
شكله يحبها وايد حرام
:)

AseeL يقول...

قد يكون ليس عصفورها

او قد يكون

دعي الايام تهديك اليقين

تحياتي

الزين يقول...

عزيزتي كوكا

يحبها
ما يحبها
الموضوع كله صار يتعب
ومش محرز


على فكرة بطوط او اللي كان يركض ورا زيزي واهي اللي مطنشته

يبيله والله

:)

تحياتي عزيزتي

الزين يقول...

همسة التحنان

حياج الله للمرة الأولي
واتمنى ما تكون الأخيرة

الزين يقول...

اخيييه يا حوسن

حطيت ايدك على الجرح

ما عاد الكلام ينفع
وماعاد الموضوع يسوى
وعافك الخاطر خلاص

الزين يقول...

محارة

حامي هاااا
:)
الياي احمى

وكل طراق بتعلوم
وترى صج ما يحبها

الزين يقول...

عبله يا عبله

امس لاحظت ردة فعلج عند كلمة ابوي
كان يقولها لج هااا
حسيت

حبيبتي اهم يقولونها ما يقصدون فيها الا الترحيب
احنا نحسها غير
تحرك شي فينا
ويليتهم يحسون

يخرب بيت ابة الحب واللي دلنا على طريجه
انا اقول لج
no more baby
no more

hitt the road jach

الزين يقول...

شذر

:)))))
ضحكتيني وانا كلش مالي خلق

بس ترى محد دازني عليج
وعلى فكره هذي المقبلات
الطبق الرئيس على الفرن

خلج وياي

الزين يقول...

كاريزما

خليهم يتعلمون
وخل البنات يعرفون
ان مو كل شي لونه اصفر ويلمع يعني ذهب

تهقين اعطيه فرصه
والله تعب قلبي
وماعاد فيني
الموضوع بكبره قاعد يستهلكنى
وما عاد فيني حيل

الزين يقول...

اسيل

من طول الغيبات

ما اعتقد الأيام بتهديني اليقين
يقين المرأة قلبها
وقلبي يقول لي بح
مامنا رجا
ما يصلح للزين

ما راح يفهمها
ماراح يعطيها كثر ما تعطيه
بيعذبها
تفل وتتركه اسلم لها
قبل لا ينكسر قلبها

فراوله يقول...

مساالغلا للغالين
حبيبتي زوزوتا
اذا تذكرين من قبل شنو قتلج...الوحده تبي الشخص اللي بقلبها يكون معاها دوم..تحسه ويحسها ، يحتويها وتحتويه، بكل وقت وكل لحظه نبي نلتفت نلقاه جدامنا...مو بس بوقت الفضاوة
تري الزين لها البخت والحظ اللي الله خاشلها اياه..بس مع نفس الشخص وايد صعبه الا اذا اهي ودها تعطيه فرصة
اهني ماعندنا كلام غير نتمي لهم السعادة
باذن الله تعالي
دمت بحب صادق باذن الله
:)

MANAF يقول...

انتي حبج اكبر من حبه

بس هذا الجواب

ادري شتبين

بس اهو ما يقدر عليه

!!

Unknown يقول...

انا اقول الزين صارت دعلة واهو مبين بايع

عَذبة يقول...

قرأت قصة الزين..

ومنذ بدايتها وضحت النهاية..
الايجابي هنا انك كتبتِ عنه.
.!
لاننا
لانكتبهم الا حين يموتون بداخلنا...

نهيل التراب على آخر ذكرى...ونرحل. عنهم
.غير آسفين..

جميعنا..نغرق ثم نسبح..ثم نغرق مرة ثانية..ونطفو بعدها..وقد نموت…قبل ان نحيا مرة ثانية..

..

ما أود ان أقول زينه ..وعن واقع تجربة..
لا تطيلي وقت في علاقة..أنت تدركين منذ

بدايتها إنها ليست ما تحلمين به..
الوقت الضائع هنا

هو ملك لانسان لم يأت ِ بعد..

وما تحلمين به سيأتي حتما.
.ماأخشاه.
.
أن يأتي..وأنت لا تملكين مقومات استقباله..

لانك أضعت كثير من الوقت فيمن لايستحق..!!
أن
.يأتي وأنتِ لا تملكين حرية الاختيار.
.!
أو .

.أن يأتي متأخرا كثيرا
!!


..
إكليل ياسمين لنبضك و
دمتِ كما انتِ ..دائما نقية .بيضاء ندية..

sologa-bologa يقول...

هذي عين ما صلت على النبي

:)

مبين عليه خوش ريال
بس الظاهر ما يعرف يعبر عن اللي
بداخله
وفوق كل هذا عملي أكثر منه رومانسي

تحمليه

ودمتم بحب وود

الزين يقول...

فراولة


الزين احسمتها
وقالت له اهو مو راحتها
وانها بتمشي وبتفل

اهو طالب فرصة ثانية
وما اعتقد حكايتهم بتستمر صدقيني

الزين يقول...

مناف

ادري انك فاهم

ماعاد له لزمه
ما عاد مهم
ماعاد له نفس الطعم والإحساس والوجود

انتهى

الزين يقول...

مشاري

والله كلامك يعور

دعله عاد

ماهي دعله
شارية
والحين باعت
قبل لا يقول لها انه بايع

الزين يقول...

عذبه

بالضبط هذا ماكنت افكر فيه
كلامج اعطاني القوة واليقين

مشكوره

الزين يقول...

سلوقا بلوقا

الصبر مل من صبري
وام كلثوم قالت للصبر حدود

وانا اقول بس كافي

حياك الله بمدونتي