.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

6.7.07

كل الحكاية اشتقت لك ..... نوال


الزين : اشتقت لك البارحه

هو : كنت تعبان والنوم سلطان يازين

الزين : ارتحت

هو : الحمدالله

الزين : تقدر ترتاح من غيري

هو : شكو

الزين : لا تقول لي شكو .. ما احبها هالكلمة

الزين : طلعت الشمس من غيرك

هو : ههههه ... بروحج

الزين : بروحي .. كانت ثقيله

هو : شلون قدرتي

الزين : ناديت اسمك واشرقت

هو : ما اقدر عليج بالحجي

الزين : انت تدري الحجي صنعتي

هو : شمسهرج لين الصبح

الزين : سهرانه على طاريك ..اناديك ....اغني لك

هو : شنو غنيتي؟

الزين : غاب بدري انا يا من يجيبه

هو : بييييييييه عتيجه

الزين : ليش ما تحب العتق

هو : احبه وايد


هو : زين

الزين : عيونها

هو : متملل وتعبان

الزين : تعال نسافر ....تعال نبعد ونروح ديره ما يعرفنا فيها احد

هو : وين تبين تروحين

الزين : مادري .....ابي مكان فيه بحر ما اشوف فيه غير اللون الأزرق

هو : تعالي نروح جزر الأباطور

الزين : جزر الأباطور؟؟؟؟ وين هذي

هو : هممم سألي سعد

الزين : أي سعد

هو : درب الزلق

الزين : ههههههه .......ماتيوز من سوالفك

هو : يعني انتي اللي تيوزين

الزين : انا؟؟؟؟؟

هو : انتى نزقه

الزين : بعضا مما عندكم

هو : مو كثرج ... انا نقطه في بحرج

الزين : انت بحري كله


انت تعرف كيف أحبك

وان عشقى هو حربك

وان سلاحك اهو قلبك

لين صارت دروبي ودربك

مستحيل ..... اتلاقى


هو : زين

الزين : عيونها

هو : بس جذيه .......ابي انادي اسمج

الزين : تحبه .. تحب اسمى

هو : انتي شكلج خاطرج تتدلعين

الزين : ليش لأ.. أنا بنت واحب الدلع

هو : بس انتى غير عن البنات.. انتي اعقل

الزين : انا مابي اكون اعقل .. ابي اصير مثلهم
هو : لا تتغيرين انتى جذيه مثل الحلم .. مو مصدق انه في وحده مثلج بهالوقت
الزين : ما قلت لي ...اشتقت لي

هو : اكيد.. وانتى تدرين انى اشتاق لج

الزين : ليش ما تقولها

هو : انا ما اعرف اقول ....ليش البنات دايما يحتاجون يسمعون هالحجي

الزين: لأنهم بنات ... ولأن البنت تحتاج تحس بالأمان
.... ولأن امانها متعلق بكلمتين منك ....ملاقه ... هااا

هو : منتى مليقه .... وانتي تدرين

الزين : حيرتني

هو : انتي حيرتيني

الزين : اوكي تعال نحط حيرتي على حيرتك ونحل هاللغز

هو : أي لغز

الزين : لغزنا انا وياك

هو : شتقصدين

الزين : ما اقصد شي


هو : زيون

الزين : هلا

هو : شكلج زعلتي

الزين : ماني زعلانه ..ولهانه
... والوله عندي وصل الخط الأحمر ولين ولهت وايد اصير عسرة
.... ومزاجي يصير كلش مو خوش

هو : زيون
الزين : هلا

هو : بوستج الأخير حلو

الزين : صج ...عجبك

هو : ايه وايد ... احلا شي لما قلتي ..... اتعلم كم رجمتني العيون ..... بكل الظنون

وبعدين تعالي .... ليش حافية القدمين؟؟ تدرين .. قولي حق الخال قحطة يضبطج

الزين : هههههههه .......درب الزلق مره ثانية

هو : على طول

الزين : اموت بدمك العسل

الزين : ماقلت لي ... انت اليوم احسن

هو : حديد.... تحاتيني

الزين : وانا عندي غيرك احاتيه

هو : مشكوره على مداراتج لي بالحبيبه


أداريك...

ولو حصل لي في عيني اخبيك

وامسك عروقي لا اتفجر ليه يابوا طاريك

واحبس الكلمة بلحظة ما تلمس شفاهي وتفضح كلمة حلوة قلتها فيك


هو : اخليج الحين

الزين : اوكي .....بسمع صوتك مره ثانية

هو : على حسب الفضاوة


روح وخذ قلبي معك

لجل روحي تتبعك

نبضه في صدري غريب

يرتجي اغلى حبيب

تنشد جروحي دواك

تجرع السم من جفاك

روح وخذ قلبي معك


في حفظ الله يالغالي

هناك 31 تعليقًا:

esTeKaNa يقول...

!! محظوظ هو بالزين
نادر اجتماع الرقه
بالذكاء العاطفي
بالرومانسيه الظريفه
احببت الحوار الممتع
واجزم ان كل من قرأه تمنى ان يكون له حبيبه كالزين
:)

TReSTeN يقول...

الزين

هذي مينوونة

بس بصراااحة ممتعة وندر وجوودها بهالوقت

طاهر خشاب / Taher Khachab يقول...

هو : على حسب الفضاوة

إنتو والله مشـكلة يا بنات!

لازم نحكي عطول ونردد نفس الكلام كل مرة بتسـمعونا و كل مرة بتشـوفونا. معليش طولو بالكم وتذكروا حسـب الفضاوة!

صحيح ما قالته
esTeKaNa
محظوظ هالزين كون حبك صار نادر هالأيام هادي.
ما يأسـفني كونك تعيشـين بعض الوقت وتأنفين العيش البعض الآخر : حسـب الفضاوة

فراوله يقول...

مساالعذوبة المنهمره من تلك الكلمات المتناثره بين ثنايا تلك السطور
غاليتي زوزوتا
عذوبة ذلك الحوار تتلخص بامنية صغيرة جدا
ان نتمني وجود هذا الحب بزمان خلت فيه المشاعر والاحاسيس
ولو كنت من الزين لما رضيت ان اكون للحبيب بس علي حسب الفضاوة
فهذا الحب يقتلني اكثر ما يريحني
انا حبيبي اريده بكل وقت احتاجه بجانبي وليس فقط بالفضاوه
دمت بحب وود ابدا
غاليتي
:)

غير معرف يقول...

تجرع السم من جفاك

اخييييى على هالكلمه يا الزين

احس انها طالعه من قلب

اهديك هالكلمات

عذبه انت كالطفوله كالاحلام كالورد

بس صج لازم يتجرع السم من جفاك لان انت عذبه وحبك عذب ما تستهالين الجفا وعلى قولته حسب فضاوته

غير معرف يقول...

مايحبها!!
مايحبها!!
صدقيني..
حرام
كل هالمشاعر تبذلها عليه
..
ذكرتيني ببعض قصص لوير
حب واخلاص ومشاعر من جانب البنت
وبرود وغرور من جانب الرجل
وكأن اللي خلقه ماخلق غيره
..
بطيتوا جبدي
افف



شهالذل؟؟

الزين يقول...

estekana

صدقيني انا الحظيظه
انا احببت الحوار اكثر منج لأني عشته
الزين حالها حال البنات
تدور على من يحبها وبصدق تهقين هالحب موجود

الزين يقول...

tresten

مينونه؟؟؟
يمكن لنها حبته
لنها ملكته قلبها ومكنوناته

نادر وجودها بهالوقت
ما اعتقد
في من الزين وايد
بس منخشين
دور على زينك تلقانا يا ترستن

الزين يقول...

straniero

لا حول ولا قوة إلا بالله
ليش هالهجوم على البنات
البنت عمرها ماكانت مشكله
المشكله باللي جامها وما فهمها
ايه شو بها احكي عطول وردد نفس الحكي اذا كانت هيك بترتاح
بالعكس كل ما حكيت كل ما عطيتك اكتر
واذا كنت كريم بحكيك
راح تهديك ألبا
:)

اما عن حسب الفضاوة فهذا واقع
الدنيا ممكن تشغله
تشغلها
ويكون التواصل حس الفضاوة
البنت متى ما قيدت اللي يحبها تخنقه
واهي تبي حر محلق دايما
عشان تحلق وتطير معاه

وبالمناسبة
انا اعيش كل الوقت بكل التفاصيل
واعطي كل شعور حقه
اشتاق بقوة واحب بعنف
بس عنفي انثوي
ما يحتاج سواعد قوية
يحتاج ذكاء
فاهم علي

الزين يقول...

فراوله

انا عندي مبدأ
انتي ممكن تملكين قلب اللي تحبينه
تملكين مشاعره
فكره
دفئه
حميمية العلاقة بينكم
بس عمرج ما تملكين وقته

خلنا نكون واقعيين
اكلي نفس الأكله كل يوم وثلاث وجبات
ما تملين
انا وحده امل
احتاج القرب والبعد بنفس الوقت
بالعكس هذا ينعش المشاعر
اما عن الفضاوة
فهذا يعتمد على اللي شاغله
شي ينسمح فيه
وشي ينزعل عليه

خليه ينشغل شوي
عشان يرجع لج لكل الشوق
وماكو احلا من لقيا المشتاقين

الزين يقول...

مجهول 1

مشكور/ مشكوره على هالأبيات
كلكم ذوق

وصدقوني كل انواع الجفا طعمه سم
حتى جفا الصاحب والصديق

دمتم بكل عافية
بعيدا عن سموم الحياة

الزين يقول...

مجهول 2

ليش
ليش ليش

انتى مجروحه ولا انا يتهيأ لي
شوفي حبيبتي
محد يجبر احد انه يعطي هالمشاعر
والبنت طبيعتها مشاعرها تكون واضحه اكثر
يمكن لأنها اللي يحركها قلبها
ويمكن هذا يحسسها بأنثوتها اكثر

وبعدين لوير قصتها غير
والزين قصتها غير

خلج وياي وراح تعرفين شلون وليش مع الأيام

واسم الله على جبدج من بطة الجبد
وصدقيني لو صار الحب ذل
ينعاف حزتها
الحب اللي ما يزيد من شموخ الزين
تعطيه وراها وتمشي
ورا تفكر لحظه تطالع وراها

مشكوره على التعليق
وخليني اشوفج مره ثانية

charisma يقول...

:)
احلى صباح مع هالبوست

الله يهنييهم ابعض
:)

وصدقتى الوحده فينا تبى تحس بالامان
وتبى تسمع
تبى اتحس بانوثتها بظل رجل
باحترامها بتقديرها

قله من يفهم هالشى

تسلم ايدج

qesat_5ayal يقول...

حوار رومانسي جميل

بس جنه ( هو) ما يعطي ويه ؟

:)

Shather يقول...

حوار اعادلي ذكريات ..بس مادري هالذكريات ادرجها تحت اي مسمى ..الذكريات الحلوه و الا الحزينه =)

بيوم قدمتلي صديقه نصيحه ..

قالتلي فيها ..
لو يتقدمون لج اثنين (واحد قلبه يهواج.. وواحد انتي تهوينه )
اشتري من يهواج

و تمر علي ساعات افكر فيها و اقول لو انحط بهالموقف .. ساعتها من بختار من بينهم ؟؟؟

و الاجابة ما زال جاري البحث عنها

تسلمين حبيبتي عالموضوع .. و الله يديم الحب بين الاحباب :}

نون النساء يقول...

مو كأنه طافني منج وايد؟؟

صباح الخير الزيــــــــــن



هو : أي لغز
الزين : لغزنا انا وياك
هو : شتقصدين
الزين : ما اقصد شي


^
^

يا ملاقتهم الرياييل اذا سوو روحهم ما يدرون ..


الحديث كان روعه ياالزين كله
والله مثل اللي قاعد ينغسل القلب
بماي بارد


:*
هالبوسة لج
من زمان عنج وعن البلوغر

الزين يقول...

كاريزما

صباحج عسل


الأمان وين الأمان

تعبنا واحنا ندور على الأمان

الله يرزقني ويرزقج

الزين يقول...

قصة خيال

اهو ثقييييييييل
وثقله يذبح

مشكوره على الزياره
ولا تقطعين

الزين يقول...

شذر

اختاري اللي يهواج
عشان لا تتعذبين بهواه

وكلام صاحبتج صح

اللي تحبينه يعذبج
ويسوق الغلا عليج
بس اللي يحبج يريحج
ويغليج فوق الناس

ولازال البحث جاريا
:))

الزين يقول...

نووووووووووووووووووووون

انتي وينج وين غطيتي
فقدتج من قلب
يالجاسية
تحرمينى من طلتج

طافج وايد
وطافني اكثر من وجودج

شفتي الملاقه
ويقولون ان احنا المليقين

ان شاء الله ينغسل قلبج يا قلبي

:****
ثنيتين على كل خد

لا تغطين مره ثانية
بلييييييز

AseeL يقول...

الكلام سهل وسلسل انسيابه
ولكن المشكلة في مصداقيته الدائمة

مجرد رأي بشكل عام لا اكثر :)


دمتِ بحب وسعادة

عثماني يقول...

الله يا زوزوتا

حوار عذب

غاب بدري انا يا من يجيبة
ياخذ اجر المولع في هواه

يا زينها من اغنية

الزين يقول...

اسيل

ولا فهمت شتقصدين
سوري
بس تعليقك مو واضح

دمتى بحب

الزين يقول...

عثماني

وكل حبيب تسامر مع حبيبه
وانا مالي حبيب اسهر معاه

هذي من اغانيي المفضلة يا عثماني
ما يطربي شي كثرها

ادري بنفسي عتيجه
بس بدوق عبق الماضي نفقد هويتنا
وللأسف الكثير منا فقدوها

دمت بحب

Unknown يقول...

جميل حب البنت وذكي واحسده عليها لان شكله مو كفو

المشاعر اذا ما كانت متبادلة واللذة تبادل بلذة والا ما اعتبره هالشى حلو

وارتجلت لج كلام الحين


وش الفايدة لو عطيت من غير تثمين
حبى لقلبه وهو مع غيرى متهنى
واثر البلا فينى انا ياحسين
شفت الموت فى بعده واثاريه مع غيرى متهني

MANAF يقول...

zozootta

:)

الزين يقول...

مناف

:))))))

اهم اشي

احلا شي


انك تلقى اخو دنيا
يمسح على جرحك
وينسيك الألم

تسلم يا مناف

الزين يقول...

عزيزي مشاري

مشكوووووووووور
حسيت قلبك مجروح على الزين
بس ما عليك الزين ماهي اي شي
صدقني

ما يقدرها ولا يكسرها إلا اللي خلقها

مشكور على هالأبيات الرقيقه
وانا سعيده ان كنت سبب لإلهامك بهذه اللحظة

دمت لي بكل الحب يا مشاري

طاهر خشاب / Taher Khachab يقول...

ٍسـلام
أنا آسـف كون كلامي إنفهم بالمقلوب.
ما كتبت إنما كان ليقرأ في المرآة.
أردت فقط أن أهاجم الرجال أمثالي. هو سـخط بحت لتصرفاتنا المبرمجة. أرجوا العذر إذا ما بدا العكس.
إذا شـي يوم كان بدوا يشـوفك أو يسـمعك هو يقبل جملة "على حسـب الفضاوة" بتعبير أوضح حبكم هل يمكن أن يقنن حسـب الفضاوة. أعاود ختامة حديثي كما في البوسـت السـابق
ما يأسـفني كونك تعيشـين بعض الوقت وتأنفين العيش البعض الآخر : حسـب الفضاوة

غير معرف يقول...

hehhehehehe wala 3alyyyyyy 7achyyyyyy ya ZoZotaaaaaaaaaaaaaaaaaaaaaaaaaaa heheheheeh (^_^) ya36eech el 3afya babe

غير معرف يقول...

3alyyych*