.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

26.10.10

الخطابه أم فلان

أم فلان ما قصرت ومشتغلة شغل مضبوط
موقع مرتب
وخدمات آمنه على قولتها

يزاها الله خير عن جميع عزوبية الفريج .. اقصد الديره
مو هذا المطلب
المطلب هاللي مقدمين ورازين ويوهم كأعضاء لهالموقع
وشوووله الأسامي العويه!!!!!




كله بصوب واللي حبوب حده بصوب!
يا عوينتي



 اسير الشوق!!
هذا قبل الزواج صرت اسير عقبها شبتصير

operator
بس حبيت اصلح السبلنجججج





عيمي متزوج وعندي بنت
احم ... ما عندي تعليق

ثلاثيني وسيم!!
يااااا لهوي
هذا لقطه على قولة المصريين
اهم شي ان يجمع العمر بالوسامه



لأ لأ لأ لأ
مااا اعبر صافية وحنونه وحنان القلب
من فين لا فين يا حجه؟؟

خالد الطيب!!
مو جنه اكو مسلسل بنفس الإسم؟؟

عزوبي جاد!!
احلف..

ابجد هوز؟؟
ليش يعني
اريد تفسيييراااا




على هامش الخطبه
اقصد البوست


الوم الصبح على شقة ضوى طماع

الوم الغفوة لي هلت ولون الفجر خذاها بساع

الوم الحلم لي عزم يفرش جناحه بليل هزاع

يغافل راحتي عني ويزيد الأوجاع

ويزرع بالخفوق همٍ لحظ ما يعرف البذل ... مناع

الوم الصحوة والفكرة .. الوم الأمس لي سلم لوعد بكره

ينفض عن كتوف الوجد غبرة السكرة

يصحي بالضمير اللوم ... يمزع عن هدب عيني ستار النوم

الومه وبالحشا غربه ... تحاكي بهجعة دروبي ظمى دربه

تناشد عشية الوسنان .. تترجى ... تضم الرقاد .. تبي الراحة

تلاقي اليوم قد اجفل وطوى جراحه

واظل انعس .. اناشد ليلي بلذْ الرقاد

والوم اللوم لي اشعل بجسد ليلي هواه وعاد

يعاف النوم .. ويغزل من هدِم دجنه نهير اللوم



هناك 42 تعليقًا:

أبوفلان يقول...

انا ملاحظ العيم اكثر ناس ليش ؟ :-)

داهم القحطاني يقول...

موضوع ظريف حده
بس منو شال رقم الخطابة من الصورة ؟ :)

mjkout يقول...

لوووووووووول
الله يهداج ليش مسحتي اسمها و رقمها خل الشباب يستفيدون .... (شنو هاللي طاير بيكفخني في احد حذفني بشي ) لا لا لا خلاص هونت زين سويتي مسحتي الرقم و الاسم منو يبي هالخدمات اصلا


المسلسل سليمان الطيب

Kuw_Son يقول...

عاشت الخطابة .. الغاية سامية .. بس للأسف تم إساءة استخدام الوسيلة !

كفانا لوماً .. ولو إن اللوم في بعض الأحيان يحسسك ان اللائم يهتم :)

مساء الخير يا الزين :)

مـي يقول...

[الوم الغفوة لي هلت ولون الفجر خذاها بساع]
/
روعة..
يازين الغفوة لي هلت..
ومن رقتها خذاها لون الفجر ..

إيييييه

يازين الزين

///
ياليت حبوب ياخذ حنونة .. يلوقون على بعض ..!

دخلي موقع زواج مسيار تلاقين بلاوي أكبر !

ميمة السبيت يقول...

** اهم شي الصافية شنو لبنه لول

تحمدي ربج ترا العقل نعمة

الزين يقول...

ابو فلان

....

من قال
مخلوط الموقع

!!

الزين يقول...

داهم

لوووووووووول
انت هذا اللي ذابحك
الرقم اللي انشال

:)

الزين يقول...

محمد

يااااويلك من زيزي
يا سواد ليلك

عدل
وانا اقول جني سامعة بمسلسل نفس الشي
:)

الزين يقول...

ولد الكويت

سامية ومديحه وهم فوق البيعة مزنه

واحنا بعصر التكنولجيا ولازم نوظفها في خدمة المجتمع
:)

وبتلوموني ليه
...


مسا الأنوار يالشيخ

الزين يقول...

مي

بذمتج مو احلى غفوة اللي تييج على الفجر
وبلحظه يأذن وتقومين تصلين وتطييير النومه

:)

تصدقين ايه المفروض يرتبون هالموضوع بينهم ونخلص

يبي له ادخل واكتب بوست عنهم
:)

الزين يقول...

ميمه

الف الحمدالله والشكر

:*

الليوان يقول...

ههههههههه
تكفين انتي من وين تطيحين على هالاشياء
:)

اهم بصوب وتعليقج عليهم بصوب
عاد توني رادة من المستشفى مع بنتي عندها اشعة..وتعبانة ومالي خلق بس قلت بدش شوية ..ضحكتيني وطار التعب


وبعدين معاج..
انتي ما تيوزيييييين
اشهالحجي اللي يخدر...
بصراحة .. اظلم كلماتج اذا بعلق عليها يالزين..
بس هالمقطع يوصف حالتي وااااايد
" الوم الغفوة لي هلت ولون الفجر خذاها بساع "

ياربي يسعدج ويرزقج حبة ورضاه ويتمم عليج الصحة والعافية

" شلونج؟؟؟ "

ناعمة الهمس يقول...

في ناس تحب تستظرف مبين من الموقع من اساميهم

الوم لومج اللي اصدح وسط النهار يصرخ يا شاعرة بكلمات عبقة

panadool يقول...

الزميلة المتألقه دائما


موضوع حوش

موضوع الخطابات بالمواقع الألكترونية وقناة مسيار وبعض المجلات والمكاتب أمر إيجابي من باب التسهيل بالزواج

وكل ساقط وله لاقط

ولكن المشكله بوصف الشخص لنفسه أو البنت لنفسها
غالبا لايكون الوصف دقيقا


خصوصا لما يكتبون شاب وسيم أو يقدس الحياة الزوجية (:


ومره لفت نظري شخص كاتب إنه عنده 3 حريم ويرغب الرابعه بعمر 18 وهو بعمر 44 !!!!!!!!

تكفه وين بتلحق عليهم أقصد العاطفه والجنس متي بيمديك


مساء الخير

بنت الشاميه يقول...

الزين .....لاحظتى اول من علق
هم شبااااب

الله ياهم يجبون هالسوالف
جان زين نسوي فيهم مره دقه.. ونصيدهم
نحط لهم رقم واحنا اللى نرد عليهم
شراااايج .... فكره شريره وايد
ههههههههههههههههه

مساء الخير ياوجه الخير

الزين يقول...

الليوان

هههههههه
عندي مصادري الخاصه
واذا تبين الصج هذا اخ عزيز علي حط اللنك على تويتر
واستلمته انا

:)


اسم الله عليها الصغيره
علامها؟؟


انا زينه واسأل عن علومج انتي بعد قلبي

الزين يقول...

ناعمة

تهقين !!

والله جنه من صجهم

:**

مشكووووره على التواجد الرقيق

الزين يقول...

بانادول

الزميل الخوش على قولتك

انا لاااا اوافقك الرأي وكلش ما اشوفه ايجابي
من زين الزواج عاد اللي راح يبتدي من موقع الكتروني لو قناة تي في

وصج لين قالوا رزق القطاوة على الخاملات

وعلى الوصف تقول لك حنونه وتطلع بطلة مصارعة
تقول لك ناعمه وتطلع جنها زولية من خشونتها

هذا غير الشباب حدث ولا حرج
وباجي تعليقك بحط يمه طووط طووط طووط

ههههههه
ريتد +18

حياك الله وساعة المباركه

الزين يقول...

بنت الشامية

لووووووووووووول
هذول اللي علقوا
اللي ما علقوا وخاب رجاهم لما ما لقوا الرقم اكثر

من الصبح مدونتي ما فضت تصوري
:)))

يخرب بيت شيطانج
شلون يبتي هالفكره
تصدقين ليتني مسويتها
الله ياهي علووووم تطلع


مساج فل وميه يا بعد الشامية واهلها
:**

ARTFUL يقول...

والله مسخره

D:

الواحد قاعد يسأل وينبر ويقعد مع خطيبته 1000 مره

ويدعي ربه الله يتمم

هالدور من النت

kuwaiti_cool يقول...

الأخت العزيزه الزين
مساء الفل والياسمين والجوري

اضحك الله سنك

رديتيني بالذاكره لأكثر من خمسه عشر عاما
كنا ايامها نقرا بالمجلات صفحه الخطابه
واكثر ماكان يضحكني
لما كنت اقرا
فتاه ذات قوام ممشوق جميله ذات لون حنطي ترغب بالزواج من قبلي
وانتي رايحه
بس الحين تطورنا :)

حسافه راحت على شباب الثمانينات الي يحطون صورهم بالمجلات بصفحه التعارف
ويكتبون تحت الصوره
من هواياته تبادل الصور :)
يعني صايد الحركه


شكرا لك

سلة ميوّة يقول...

أنا ما جذبني

الا ابجد هوز
اظاهر هذا يبي ياخذ قلوبنا احنا المدونات هههههههه

حسبي الله على بليسج شلون طحتي عليهم:)




على الهامش:

صح لسانج:**

رورو الشخبوطه يقول...

توني ادري في خطابات الكترونيات والله وقاموا يواكبون العصر..

بس باجي قروبات بالبي بي :\

خخ ..

مرسي..

I7na 3shagnaha يقول...

shaghlat al kha6abah sayra habah halyam

thak alyom ywaz3oon i3lanat kha6abah b mwagif el jam3ya

tsadgeen its good job o warah ajer

o mayabeelha ras mal

i will think about it :)

7osen يقول...

ههههههههه ضحكتيني والله أسامي عجيبة

........
الوم الغفوة لي هلت ولون الفجر خذاها بساع

صح لسانج

:)

الزين يقول...

ارتفل

:)
شفت الخبال

الزين يقول...

كويتي كول

صباحك طيب يارب

لا تنسى جمع الصور والطوابع
يعني اذا تبين تراسليني انا علي الطوابع

لوووووووووووول

الزين يقول...

سله

وه وه وه اسم الله علينا
مو قاصرنا الا ابجد هوز
احنا جذي ومو خالصين
لووووول


بعثت لج ايميل
...

ردي

الزين يقول...

رورو

انتي من صجج

اكو جروبات على البي بي

ومره كتبت عنهم
زواج مسيار
:)


وعش رجبا ترى عجبا

الزين يقول...

احنا عشقناها

شوفي عاد
احنا نفتح جمعية للخطابات
وراعي النصيفه سالم

انا وياج بالحسبه
لووووووووووووووول


واذا كثر الشغل
استعنا بخدمات جن جن

الزين يقول...

حسين

انت ضحكت
لو عيل شايف ويهي وانا اتفحص الأسامي

هذولي اللي حطيتهم
اللي ما حطيتهم علووووم

:)

ولسانك يارب

t7l6m.com يقول...

أجمل هامش
تعبير في غاية الإبداع والجمال
تسلم إيدج

وموقع الخطابه جمبزه وعياره
وإللي بيتزوج عن طريقه أسبوع مايطول زواجهم بإستثناء العزوبي الجاد
يومين مايطول زواجه

Sami يقول...

ينوا و قعدوا

Blog 3amty يقول...

اللعبة بعد ما أتزوج وتمر السنين، أقولها تذكرين وين طحت عليج .. تذكرين نكّج الحقير .. الله والله أيام حبيبتي سبحان من جمعنا !!

MSMAAR يقول...

لول
ليش ماكو ارقام

ذكرتيني قبل ايام اللي يح\ون صورهم بالمجلات
والحبيب شاد حيله هوايتي اربي العصافير يعني قلبه طيب وحنون :)
الصوره اللي حاطه تقولين يربط ثيران

الزين يقول...

تحلطم

مشكور على الإطراء الجميل
مشكور لأنك متابع
ومشكور على ابداعاتك بمدونتك

وذبحتني ضحك على سالفة العزوبي الجاد
:)

الزين يقول...

سامي

لا لا هذا مو ينون
هذا شي فوق الينون
ماله اسم اصلا

الزين يقول...

بلوق عمتي

ولد العمه
وين هالغيبه كلها
لك فرية يالشيخ

الزين يقول...

مسمار

:)
ماكو ارقام عشان انا ما اسوي دعايات حق هالأمور الدايخه

من صجك انت
!!

اصير انا وام فلان يميع
لووول

يربط ثيران عاد
:)))

اضحك الله سنك
وحياك الله

bananaQ8 يقول...

هذا جنه موقع الخطابة ام حسين :)

Princess Sara يقول...

أنا أقول خالد الطيب ضروري ضروري يالزين يخطب حنان القلب :)

و لا ما توافقيني الرأي ؟؟
هههههه فصلت من الضحك !! بس سؤال:من صجهم؟؟