آنا احبك بكل جنون

وتبي تعرف من أكون..

انا الهمسه بعتم الليل

انا ظلك اذا بين مع شمسك بدلق سهيل

انا التنهيدة التعبه ... انا العاشق اذا اشتاق ودق قلبه

انا الموجه وانا لشراع ... انا البحار اذا ضيع بهواه دربه وابعد باع وباع

انا سرك الخافي بوسط عينك ... وعلى رمشك الغافي وبجبينك

انا الشهقه العطشى لروح الطيب بيدينك

انا الخيمة الزرقا فوق الكون .. ومن غيري ضوى فجرك ابد ما يكون

انا صمتك لي عزت الكلمة ... انا صوتك انا النهمة

انا الفكرة لي تاهت معك الأفكار ...

انا الخاطر وبالخاطر تبات النجمة والقمرة تحت جفني أنا سمَار

انا السكر انا العنبر انا نويرتك الصفرة وبعد عشبك اذا خضَر

انا الدفوة بعز البرد وانا وجدك اذا جمر

انا الصدفه على بابك .... تقول للشوق وش جابك

وتنشد عن جنون الحب ... تدور على اعذاري وعن اسبابك

انا طيرك اذا وقَع ... يدور يرتوي ضميان ... وسقاه الماي بوسط كفك

انا الساري بتالي الليل ادور عن شفيف الضي ابي قربك

وبعد تسأل !!

كيف اوصف لك حالتي وانا الولهان

انا اللي بات على صدرك ينشد الراحه

انا اللي ضيع ايامه يداوي بالسموم جرحه ويسأل خافقه الشقيان عن افراحه

واذا الدنيا معي مالت ... ادور بسمتك حولي ... واغض عيني عن قلبي واتراحه

تعال يمي ...... اسمعني

بقول لك شي

انا كلي يا بعد كلي فدى حسك

واذوب بلحظة بس اسمع انا همسك

وحضنك يعني كل الكون

انا احبك بحيل الحيل

وبكل جنون

أمانه ياللي تعرف منهو انت

لا تبعد مهما يكون

.............

بس