.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

3.7.10

4\0 واوووه افريكاااا


مساااكين الكويتيين
اكثر من الأرجنتين بمباراتهم اليوم
مالهم بالطيب نصيب
شجعوا ايطاليا طقتها سلوفاكيا
قالوا يا حيل الله مالنا الا البرازيل
يوهم اهل البلاد المنبطحة انبساطا  من سكان اهل  الهو واللاند  وقلعوهم  يبربزون في برازيلهم بعد التبربز اللي خنبقوه بالملعب المونديالي
وفجأة  ........... صاروا كلهم يشجعون الأرجنتين
@@
ويا حر قلبي حراه
ياااا فرحة ما تمت
مسحت فيهم المانيا الملعب رايح ياااااي
صاروا العن من فوطة رافي درويلنا وهو يغسل السيايير بنصايف القايله
اربعة اهداف ساحوكية .... انبطاحية ..... سهلة بسهالة تغير جونا من البوارح للهبوبي
الحين شلون
بنصير المان لو لكم شور ثاني
!!!
وياليت تقولون لنا من بياخذ الكاس بالمرة عشان نشجعة من الحين
جنة لنا بالموضوع ناقه او جمل
مير ان مالنا الا الشماته ياااا سعد

:)

على فكرة مدرب البرازيل اليوم قال بمقابلته الصحفية ان سوف يترك التدريب للمنتخب الوطني البرازيلي لأن اخفق في اداء مهمته
تهقون سووا له حملة ارحل .... فرحل!!

واوووووه افريكاااااا

ولا اوووه يامال مالتنا ابرك ....  مو!!



على الهامش
الصورة اللي فوق هذي صورة سباااجه بس النسخة الأرجنتينية بعد الهزيمة طبعا

قاموسي
يبربزون = يبربسون
تبربز = تبربس

هناك 48 تعليقًا:

BookMark يقول...

هذا جزاء الـ شعب بو هبّة p;

الزين يقول...

بوك مارك

على بالج ايوزون
!!

كل شعب له علامة جودة
احنا علامتنا هباتنا

:$

BookMark يقول...

يقولج شوهد "ميسي" بمحلات كنتاكي يجيّل لرحلة العودة

D;

الزين يقول...

بوك مارك

لوووووووووووووووووووووووووول

بدعتي

ما عليه خذ من جيسه وعايده مسكين
مسوي لهم دعاية بتطيح بجبدهم بعد الهزيمه الشنعاء

le Koweit يقول...

لوووووووول
والله صاجة :)

المانيا بعد لعبهم اليوم
اتوقع بياخذون الكاس

ANGEL HEART يقول...

لووول

ان اشغاله شماته على اخوي من يوم طلعوا الانجليز حرام جان يقول خلاص بشجع البرازيل طلعوا قال بشجع الارجنتين طلعوا بس تكفووون لا حد يشجع المانيا ماني تقبس لوول

Seema* يقول...

أحلى شي اللي ما يتابع كرة بالمرة ;p

Fankooshy يقول...

:(
صراحة، اليوم حزين وانا للحين مصدوم من الاداء والنتيجة..، يمكن لو بجى مارادونا جان طقيتها بجية معاه نفس بطولة 90 ...لكن الحق ينقال المانيا يستاهلون صج فريق مكاين مو اوادم تنظيم ولياقة وانضباط بالملعب..هذي المكاين السنعة مو احنا عود القلب يرجف مثل رجف المكينة..بالنهاية التانغو مثل ماقلتي انمسح فيهم الارض ومرسي ابن المعلم الزناتي اتهزم يا رجاله...بالانجليزي يا مينز

ويالزين بلا شماتة ان الله يمهل ولا يهمل...سأليني توني متشمت بالانجليز واليوم دوري لول

Antonio يقول...

والله يا زين انا لا ليلي ليل
ولا نهاري نهار ..

البرازيل انغلبت وطلعت ..
ضاع حلم الفوز بالكاس للمره السادسه

بس هذا حال الكره
والمنديال القادم ان شاء الله بالبرازيل
2014

وراح ننتظر هذا الحلم بالفوز فيه
ويبقى الوفاء لهذا المنتخب الذي جعل
الناس تحب كرة القدم وفنونها

واذا الله عطانا عمر ان شاء الله لازم نسوي رحلة للمدونين للبرازيل 2014

والروح الرياضيه مطلوبه واي منتخب يفوز الحين راح نصفق له ونقول يستاهل
والف مبروك من جد وجد ومن زرع حصد
والوفاء للبرازيل للابد ..

خوش موضوع وقلبتي المواجع يا الزين

ملاحظة : الفيديو مال موضوعج الي فات حطم مشاعر الفن عندي ..

وبانتظار الزين دائما

SHOOSH يقول...

الحمدالله الحكم نقذنا و صفر

ولا جان مطقوقين ثمانيه

mjkout يقول...

شكله الافارقة يايبين ساحر و مضبطين الملعب عدل
انا مالي بالكرة بس اللي اسمعه عن اللعب شي مو طبيعي

الليوان يقول...

انا عقب البرازيل
ماااااااااني مشجعة كلش
حتى مالي خلق اشوف اللعب


شسوي دمي اصفر
(القادسية + البرازيل)

@alhaidar يقول...

يمعودة إذا الكويتيين اهم القبسة عيل تكفيييييييين نزلي مناشدة لا يفكرون يشجعون هولندا ترى ما صدقنا فريقنا تسنع :))))

سلة ميوّة يقول...

هاهاهاهي

ضحكتيني ربي يسعدج دنيا وآخره


مالي بالكرة وربعها




وكل من سألني منو اتشجعين


قلت أشجع جووووووزووور القووومر



(جزر القمر )



يضحكون علي!!!




شقلت انا!!!



على الهامش:



مسى الخير:*

ARTFUL يقول...

ماني راد عليج

Sami يقول...

انا من الاساس المانيا .. ما لي شغل بهباتكم

ميمة السبيت يقول...

** Don't cry 4 me arjantinaaaaa

- انا اقول خلهم عالقادسية و العربي وايد احسن

Manal يقول...

زيووون
موتيني من الصجك
اي والله

الكويتيين اغلبهم اهل هباااااااااااااااات

مافي سبب وجيه لهباتهم

انا قلت مالي الا الفريق الانجليزي
والحمد لله
خلصت من حماس الكرة من انضربو من الالمان

=)
والحين صرت اشوف المباريات عالخفيف

لا اغير ولا ابدل
=)

aL-NooR . يقول...

انا مع الارجنتين من زمـــان
و حتى لو خسرانه
p;

قولي احنا البنات عادي بس الشباب
يبدعون بالتعليقات و التطنز ..
امس بالبيت مادين البوز و عاقدين النونة ..من ثاني قول اخوي بغى يصك التي في اصلااااااااا P;

ترا انا متابعة :)
حيل اعجبتني التفاصيل ..
و نقلت حتى توتر الحدث
اللي ابد ما عشناه..
تسلم اناملج يالزينة :*

********************

بنت الشاميه يقول...

انا احب الالمان وادعم فريقهم الرياضي
بس ابي الكاس هولندي
ليش ما ادري ؟؟؟؟..... يمكن احب التغير

لووووووول


شلونج يالغاليه
ادري مقصره.... بسكله من الظروف

الظروف مو المكاتيب
هههههههههه
من صج ولهانه عليج

بدون تعليق يقول...

بلللللللل اللي كلش مادرى عن كاس العالم .. احس اني الوحيد بالعالم اللي مايشوف المباريات :(

حسافتج يا كويت يقول...

يبتيها ييييب
صح صح صح
من صدمة لاخرى

Nora يقول...

انا كلش مو صوب اللعب الجميل ..


اسأل عن الاقتصاد .. و التاريخ

يعني اذا دولة نهضت من بعد حرب اشجعها

اذا دولة تعاني مجاعة و الا اقتصادها سكة .. هم اشجعها


و بالنهاية .. من الف ويهي ايبون قول لا حول و لا قوة الا بالله

تقبس بس مو اشكره
:P

يا زين قواميسج بس :**

الزين يقول...

حقوقي سابقا

هم انا اتوقع ياخذونه
بس توقعاتي سبقت توقعاتك من زمان

:)

الزين يقول...

اينجل

احنا شعب نموت على التقبس والتنقز

خلاص فريقكم خسر بسكم هبات
كل يوم لكم فريق
!!

غير نمونه

:)

الزين يقول...

سيما

تصدقين عاد ما كنت اتابع ولا اهتم
بس لمة الأهل وصراخهم سحبني

اقول لج شي
ما عندي فريق اشجعة
مع كل قول اصرخ مشتطه
لوووووول

لين انطرت من الديوانية هذاك اليوم
:)

الزين يقول...

فنكوشي

والله يا احمد اتصور لو المباراة مطولة شويه جان يابوا الخامس

لعبهم ماكان لعب ابد
مدري شقصتهم
طايحين لها سهر تالي الليل وايون المباراة مافيهم شده
اهم والبرازيل

انا شاكه بسحر الفودو
لوووووول

وانا ترى ما اشمت
انا اصلا مالي فريق
كل واحد يقول اصفق له من الوناسه

وما اعرف الفرق بين التسلل وضربة الجزاء
خلني ساكته عن الفضايح

الزين يقول...

انتونيو

@@

من صجك
انا ما خذتها على البراد
مو وايد مهم عندي

بالعكس اتطنز على اللي يحتر

:)

الزين يقول...

شوش

:)))))

ابي بدل متابعة
اصابعي تعبت وانا اباشرج بالنتيجة

الزين يقول...

ام جي

هي دي

انتي يبتها
انا بعد شاكه بالموضوع

:)

الزين يقول...

الليوان

:)

ما عليه هارد لك
المونديال الياي انشاء الله

الزين يقول...

احمد الحيدر

:)

اظنتي اهم اللي قبسنوا على الجماعة
لا ما عليك
الكويتيين مع القوي
والحين مسكوا خيط الفريق الألماني
الله يعينهم

الزين يقول...

سلة

اقول لج شي

قاعدة مع اهلي مجابلة مباراة اسبانيا والأوروغواي

مادري منو لابس ازرق ومنو لابس احمر
مشتطة حدي

لووووووووووول

سألتهم الحين الأحمر منو!!
ما بغيت الا عمري

خزوني خزة
ضحكت وقلت اتغشمر

ومساج عسل يا عسل

الزين يقول...

ارت فل

:)
يا ساتر
اللي قريته من هالجملة المختصرة كافي

الزين يقول...

سامي

:)
واللي ماله هبه شلون

احسن شي اني اشجع كل اللي يحط قول

الزين يقول...

ميمه

لوووووول

ايه والله هذا حدهم

الزين يقول...

منال

يا بعد عمري عمرج
زين تسوين شلج بعوار الراس

اذا تبين الصج انا اجابل ملزومه
حكم القوي

:)

الزين يقول...

النور

:)
من غير رتوش ولا كلام زايد
كنت اقول وينها النور

مشكوره على المتابعه
:*

الزين يقول...

بنت الشامية

يا بعدهم كلهم انتي
انا ولهانة اكثر
وربي لج فرية
تصدقين حتى وانتي تنزلين بوستات
احساسي انج مو بالديرة موجود

يالله عاد ردي
:)

الزين يقول...

بدون تعليق

@@

هل كيف
!!

عجيب امرك يا هذا
والناس مختبه
وانت تقول ما اتابع

الزين يقول...

حسافتج

ومن طول الغيبات
عشان نبطل هبات
كل يوم لنا فريق

:)

مشكور على التعليق اللي نشر واللي لم ينشر
شلون سميتي؟؟

الزين يقول...

نورا

لووووووووووووووول

تعجبيني يا ام النوير
ماكو فايدة
مخج شغال حتي بالرياضه وحسبتج تختلف

:*

يازينج انتي وزين طلاتج

sheeshany يقول...

هذي حالنا كلنا يا لزين
شكرا ً للتشخيص الحالاتيّ الممتع و .... الشقيّ كمان
:]

الزين يقول...

هيثم

:)
شكرا كبيرة بحجم السما لتواصلك المستمر يا هيثم

ودوام الحال من المحال يالشيخ

:))

I7na 3shagnaha يقول...

la7ad yshaje3 spain plz

:)

btw tsalim 3laich chanchan kahe mjablatni bil gahwa

o tgolich

todos con la roja

chandal/danchal!! يقول...

loooooooooooooooooool

ليش تتحرشين بسبائك!
:p


مو قلنالكم
todos con la ROJAAAAAAAAA

عاد انا ناذرة -الكاس عليكم والبلاليط علينا-... احتمال كبير تشوفيني بأخبار الوطن أوزع بلاليط على المشجعين الأسبان ببلازا مايور!... بس بدال ما ازيّن البلاليط بالبيض بحط "آنجوفيز"
:P


تصدقين عاد اني مع هولندا قلبا وقالبا!

كومباينيشن ما يعلم بيه غير ربنا!
:P

اللولو المنثور يقول...

المانيا مصخرت الأرجنتين
والعالم بكبرة حقد على المانيا
إلا اللي مصيفين فييها،، قبل لا يسافرون في البلاك بيري حاطين علم الأرجنتين ومن حجزوا التذاكر غيروا العلم ،، كأنها فئييييزة
و فازت الألمااااان العرب احتفلوا والبعض سكروا أكثر من الألمانيين نفسهم
ومن خسرت ؟؟ أاااااااهاهاهاهاهاهاي برد قلبي


-_-

اجار الدين كشمش يقول...

انا ما اعرف الا الاغاني والدقدقه

وانا وين رايحين بالدوانيه معاهم اذا قالوا البرازيل قلت الارجنتين

واذا قالوا انجلترا قلت المانيا
اسوي نفسي اعرف اللاعبين ومدكي اوي اوي
بس صادوني بفرق الخوال ..ما اعرفهم

طلعت اتمشى على اليال ..وخليتهم يصرخون

الا تعالي قولي لنا اشعرفج بالكره

اخاف سافرتي حق النهائي واحنا ما ندري اشكثر تحبين الكره ؟؟؟؟؟؟
ههههههههه