.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

12.6.10

ليه غاب بدري .. الرابع


تغوص قدماي الصغيرتان فوق رمال الشاطئ الرملي وأنا اتبع اطفالي وهم يلعبون هناك ... تتلاحق خطواتهم خلف موج يتكسر بغنج .. وينوح بشجن ... ويحتضر بشوق ....

اجلس ... واحتضن حفنة من التراب بكفي ... اعصرها ... لتقطر من بين اصابعي تفاصيل حاولت ان اخفيها تحت سواد عيناي ... وحدة وسهر وتعب ... وشوق لا يموت ... يتجدد كل يوم مع التفاف شمس الصباح حول ذلك الكون الفسيح الذي ضاق بروحي ... واوصلها لنزع لا ينتهي ... ينادي ليلا دائما يفي بالعهد .. وبدرا لا يكتمل ابدا بعد ان خانت ايامه ذلك الوعد

يقترب طفلي مني
" ماما ... متى بيرجع بابا من السفر "
احتضن وجهه بنظرتي الضائعه ... وبنفس السؤال الذي يكسر بريق اخضرارهما هناك
" جريب ماما ... جريب ... " اقولها بشيء من الضيق
تصرخ لمى ابنتي الصغيره وهي تنادي عبدالرحمن " حمني ... شوف شوف .... ما تقدر المايه تصيدني"
فيهرع لها ليسابقها باصياد اطراف الموج بفرح طفولي ينعش ابتسامتي التى تأبي ان تولد الا بصحبة اطفالي ....

ويعيدني ذلك الصوت إلى هناك ... وطني الذي اشتاقه كل يوم لأنك تسكنه ... إلى البحرين ... واتذكر جسر الشيخ خليفه ... وصوت امواج قد اجبرت لتتكسر تحت اقدامه ... واهمس كعادتي عندما احادثك وانت البعيد " تذكر يا بدر ... تذكر جسر الشيخ خليفه " ...

.......

" انا باقولك سر"
يبتسم بهدوءه المعتاد .. يقترب مني وهو يصطنع الإهتمام
فأضحك كطفلة قد استساغت اللهو معه
" بدر ... ترى من صجي اتكلم ما امزح "
" جيف ... ومن قال انج تمزحين "
" انت ... قاعد تضحكني ... وآنه بتكلم جد"
" حقاَاااا ... وآنه بعد بسمع جد .... يالله عاد قولاي"
" طيب ... صبر شوية خل استجمع شجاعتي ... الموضوع شويه ... احم .... صعب"
يكتف يديه ... ويجلس وهو ينظر لي بشيء من التوتر
" آنه بقول يعني ... باجر لو يعني ... لو الله كتب لنا نصيب .... همممم .... آنه ... ( انكس عيناي للأرض بكل الخجل... ابتلع ما تناثر من حيائي ... واهمس ) آنه ما اقدر اعيش بعيد عن أمي ... أقصد يعني ... انت بيتكم بالمحرق ... وآنه بيتنا بالمنامه ... مو جنه بعيد شويه عن بيت امي .... ( انظر لعيناه ... احاول البحث عن ردة فعله ) المشوار ياخذ له نص ساعه بالأحوال العادية ... وبالزحمه ساعة واكثر ... وايد .. مو!!"
يتراجع للخلف بجلسته ... يبتسم " ايه وايد ... آنه كل يوم اعاني من هالمشوار .... تدرين من المحرق لما الصخير شقد احتاج عشان اوصل ... ساعة وزياده ... ( تمتليء عيناه بذلك المزح الذي اعشق ) بس ما عليج ... آنه باحل لج الموضوع ... وباطلب من الحكومة تبني لنا جسر يختصر المسافه بين المنامه والمحرق ويخفف الزحمة شوية ... وهاللون الطريج ما راح ياخذ منج اكثر من عشر دقايق بالكثير.... شرايج فيني"

تتسع عيناي بكل الدهشه احاول ان اصدق ما يقول ... وانا اعلم ان بدر لا يمزح كثيرا ... هو انسان جاد بطبعه... ومزحه الآن قد وضعني بمنتصف المسافه ... بين فرحة التصديق .... وشقاوة المزح والتكذيب
" الحين آنه اقول لك اتكلم جد ... ترد علي بمزح هاللون " اغضب وابدء بحمل كتبي
يقهقه ملئ اشداقه " تعالي ... وين رايحه"
اقولها بغضب " بروح بيتنا"
تلين لهجته ... ويختبئ بين طيات صوته حنان لم اعرفه الا منه " ترى ما كنت امزج ... والله ... صج راح يبنون جسر يوصل بين المحرق والمنامه ... "
التفت اليه بعين قد اتسعت دهشة وفرح
" صج!!"
" ايه صج ... وبعدين تعالي .... انتي من الحين شاغلة نفسج بتفاصيل بعيده ... ريحي راسج يالزينه ... الأمور بكره بتتسهل ..."

يبتسم برضا ... وابتسم بخجل
.............


" ماما .... ماما "
وهي تهز ذراعي لتنتشلني من افكاري
ارفع عيناي للمى وقد ابتلت اطراف ملابسها بالماء ...... واسرح بملامحها ... هي تشبه اباها كثيرا ... اخذت لونه ... والكثير من ملامحه ... رغم اخضرار عيناها الذي يشبهني كثيرا ....

"آنا يوعانه "
ابتلع حديثي مع نفسي لأسألها " نرجع البيت... "
تهز رأسها ايجابا وقد زمت شفاهها بطريقه تنم عن الرجاء" باجر بتودينا بروي"
اهز رأسي لها ايجابا فتثب فرحا وتنادي حمني
اجمع اشلاء نفسي وما امتزج من روحي مع رمال قد خلفتها مهجورة .. وحيدة هناك وانا متجهه لسيارتي مع اطفالي


كنت اخاف من المسافة بين المحرق والمنامه ان تبعدني عن امي ... ولكني بالنهاية اخترت ان ابتعد عنها بآلاف الأميال ... اخترت ان ارحل عن شوارع المنامه ... اخترت اني ابتعد عن دواعيس المحرق الضيقه ... اخترت ابتعد عن لون الخضار بلوز البحرين ... وصوت النخل لين دار الهوى وهمس للسعف بالشوق والحب لأرض دايما تمد وتسقي اهلها بماي اللقاح .. وروح المرقدوش ... والحلوى البحرينية ويمها القدوع والقهوة بريحة الهيل ... والطيب وريحة البخور ... وثوب النشل ... وحنة امي شريفه ... وعين عذاري ... وصوت الجميري .... وبالزينة ذكريني ليه غيبتني بحور ....

اخترت ابتعد بعد ما ضاجت فيني الأرض ... وابتعدت عن كل الخلق ... وكانت فرصة زواجي من خالد هي الحل الوحيد اللي لقيته عشان اتغلب على كل الألم ... والدوا اللي اخترته عشان اداوي فيه جرح الفراق

وفارقت ديرتي ....
فارقت البحرين .. مشيت وتركت وراي قصه سكنتني مثل ما سكنت احداثها كل مكان جمعني معاه

مستعدة اتولد لك من جديد
وابأة وحدة تانية غيري مستعدة

كنت مستعده انسى العالم اللي حولي ... انسى فروقاتنا الإجتماعية والمذهبية ... انسى ان بدر من بيئة ترفض وحده من مذهبي وانسى ان اهلي كلهم بيوقفون بويهي وبقولون لي لاء مو هذا اللي تاخذينه ... مو احنا اللي نعطي بناتنا لناس ما يناسبونا من جميع النواحي .. كنت برخص برضاهم .. ولكن ...

خلونا نكمل شنو صار

...


تميت انا وبدر نتلاقى بصدف نختلقها .. نتعمدها ... ونتنفس هواها
الى ان ييه اليوم اللي تجرأ ... وبلش يسولف معاي ... وصار اللقاء العابر ... كلش مو عابر ....صار شي حتمي ... نخطط له ... وننتظره ... مابين مواقف السيارات ... وممرات الكلية ... والمكتبه .... والكافتيريا كانت تطول السوالف المختصرة ... وتصير قصص تحكي تفاصيل يومنا ... دراستنا ... واحيانا مشاعرنا .. وله متواري ورى عيوني ... وشوق مكشوف بين كلامه ... وصارت امانينا وحده

بدر كان انسان مختلف بشكل ملفت... على الأقل بالنسبة لي ...
كان جاد بكل شي ... هدفه واضح جدام عيونه ... عارف اهو شنو يبي ... واي درب يوصله للي يبيه

كان وسيم بشكل ملفت ... ومتحدث بشكل ممتع ... جنتل بشكل يخليني دايما اقارن بينه وبين باجي الشباب ... ويخاف علي وايد بطريقة كانت ساعات تضحكني ... لأني ما تعودت احد يخاف علي كثر امي ... بس خوف بدر كان شي ثاني

في البداية كنت بيني وبين نفسي محددة طبيعة العلاقة ... وعارفه ان اللي بينا ماراح يتطور ... آدري اني كنت منشده له بشكل مو طبيعي  ... بس ما فكرت ان الموضوع راح يتطور بهالشكل ...ولا مر على بالي اللي ممكن يحصل

واللي حصل كان شرارة لقت لها جذوة اشتعلت فيها وما انطفت ابد ... وكان قلبي يجدد هالشرارة بكل مره يغيب بدر عن عيوني واشوفه عقبها .. كان كل شي يداهمني ... وبقوة اكبر من مقاومتي  ... شعور جارف ... ما املك الا اني آسبح مع تياره .. وآنسى كل حدودي ... وتحفظاتي

لما كان يلتقيني بعد يوم طويل ... ينتظرني بمكان تعودناه مثل ما تعود اهو علينا ... ينتظرني عشان نتشارك جوع اللحظه ... وسندويشه اهو شاريها لي ... وعصير كنت آحبه ... وكيكة صغيرونه امه مسويتها له وما كانت تدري ان هالكيكه اللي تحمل كل عبق الهيل والزعفران بتكون من نصيب مزيان ... اذكر اول مره عطاني هالكيكه عجبني وايد طعمها رفعت عيني وسألته

" الله بدر ... شنو ذي الكيكه ومنو مسويها ... شقد طيبة"
ابتسم وهو يقاوم ضحكته " الحين انتي ما تعرفين شنو ذي ... وتسمينها كيكه"
" ليش انا قلت شي غلط ... ذي مو كيكه"
ولم يتمالك ضحكته هذه المرة" ذي يسمونها قرص عقيلي يالزينه ... ما اكلتي مثلها من قبل"
اعتراني الخجل " وين يعني باكلها ... انت تدري ان امي ما تعرف تسوي هاللون كيك"
نظر لعيني بطريقه حبست انفاسي " خلاص ... من يوم ورايح آنا باييبلج منها"

اذكر ان في بداية علاقتي معاه كانت كلماتي كلها بالنسبه له غريبه ومهجنه وكان دايما يضحك علي ويقول لي
"لا يسمعونج الناس ويفكرونج مجنسه ومنتي من اهل الديرة ... تحجي عدل يابنية "

وكان يعلمني شلون تكون مخارج حروفي وكلماتي بحرينية ... يعني بدر كان المصحح اللغوي اللي يتابع لهجتي ويعدل فيها ... واكتشفت مع الوقت ان بدر صحح اشياء كثيرة بحياتي ... مو بس لهجتي

كان يداريني ويحتويني مثل طفله تييه بعد تعب يومها الطويل ... يشبع جوعها .. ويروي عطشها .. ويهديها الفرح على طبق من انتظار لباجر ... عشان يتكرر اللقاء
وكان لما يغيب وما يداوم احس اني ضايعه ... بين هاجس تعبه ... وتعب قلبي من غيابه ...

ايامها ماكان عندنا شي اسمه موبايل ... كنت انتظر رجعتي للبيت ... اسحب التليفون لغرفتي .. واكلمه ... ما كنت ابتدي مكالمتي بالطريقة اللي تعودوها الناس
كانت اول كلمه اقولها هي" وينك"
وكان جوابه دايما واحد " كاني ... موجود .. حواليج ..ساكن كل شي فيج يالزينه ... انشغلتي علي "
وكنت اتصنع عدم القلق واختلق اسبابا اخرى
" لاء ... بس كنت احاتي المحاضرات اللي طافوك"

............



ما اذكر اللحظه اللي قالها لي ... ما اذكر الكلمه شلون كانت ... كل اللي اذكره ان احنا اكيد التقينا عشان نحب بعض ... نكون لبعض ..ونخطط لحياتنا مع بعض

دراسات عليا ... عيال بعددهم واساميهم .... وبيت راح ينبني بمكان ما يبعدني عن امي ...
وجسر انبنى عشان يقرب الدروب بعد ما تلاحمت الأرواح وذابت القلوب ببعض
جسر يحضر معاي صكات الدهر .... وقصة ما انكتب لها عمر ...
كنت كل ما تضايقت امر عليه ... آنزل واتمشى حواليه ... اسمع سوالف البحر ... ويسمع اهو سوالفي عن بدر

ومشت ايامنا فينا بدروب يغزلها الفرح فوق ملامحنا .... نرتب جدوالنا مع بعض ... ونحرص ان يكون في ساعات فراغ بالنص عشان نلتقي فيها ... حتى الكورسات الصيفية كنا ناخذها يميع ... ولو كان تخصصي مثل تخصصه ... اتصور كنت باخذ محاضراتي معاه .... وعدت السنين ...

الا ان بلشت فتنة الطائفية بالبحرين ... واشتعلت الأحداث بشكل مخيف ... يحمل الكثير من العنف ... والمشاهد اللي ما اعتدنا نشوفها عندنا  ... تفجيرات ... وقتل ... واعتقالات


 

وهذي سالفه ثانية ... بنكلمها بالجزء الياي



يتبع





















هناك 52 تعليقًا:

سلة ميوّة يقول...

يالشرييييييييييييييرة


اول شي..
صراحه احبببببببببج

تدرين شنو صارو عيوني قلوب حب
لما كانت البداية بالفصحى
واي واي :***

مت وناسه

وبعدين يازلي السردا لعامي وفجأة صرت أحبه وايد:)

لايق عليج .حلو وخفيف...

يازينة الزين

لاتبطين علينا بالأحداث
ا
لقصة مثل ماعودتينا


روعه


حبي:*

بدون تعليق يقول...

روعة .. لي عودة لقرائتها مرة أخرى ..

حلوة البحرين :)

المقوع الشرقي يقول...

زنزوووووون
ليش التعذيب
ويتبع
؟؟:)
لحقينا باللي بعدو
يا الشيخة
.**

may يقول...

اللـــــه

وايد حلوة الفقرات الانتقالية

رغم اختلاف الفترة الزمنية ، إلا ان الألفاظ تنقلني بكل انسيابية

متابعين

الله يزيدك من فضله ونعمه يالزين..

mjkout يقول...

لاااااااااااااااااااااااااااااااااا


علقتيني عالاخير توني مندمج بالقصة جان يطلعلي يتبع....

حتى الوقت مو موجود بالتلفزبيون يقولون يتبع بالاسبوع المقبل

Antonio يقول...

ايه

لي غاب بدري ....

وبانتظار الزين دائما

Yara يقول...

واو ...روعة يا زيونه

ذبحتيني في تفاصيل معينة

ميمة السبيت يقول...

** صباح الورد عالحلوين

NOIR يقول...

زيووون!!
اليوم كله بس مجابله القصه من اولها
ليش بس الطائفيه بالموضوع!
كنت اقرا و قلوب حب اشوفها و الوان احمر وردي بنفسجي
طايره طايره طايره
فجأ!
شفت لون اخضر و دم
ما ادري ليش
كسرتني فيني :(
WAITING......

كبرياء وردة يقول...

تفجيرات @@
متى صارت!

يازينج وانتي تحجين باللهجة البحرينية :p

حبيت القصة وتراني متابعتها من اولها

غير معرف يقول...

تحلفين ان هذي مو انتي
وان هذي مو قصتج

غير معرف يقول...

يمكن من أجمل اللي يحببني بقصّة إني ألقى فيها وجه شبه للواقع مهما كانت درجة الألم و الحنين اللي تنسكب من بين الحروف ؛.

حبيت كيف تشديّن انتباه القارئ باسلوبك ؛ وكيف يصير علينا نربط بين أجزاء الماضي و بين اللي وصلت له مزيان ..

و على فكره اسم مزيان جدأً جميل

مُتابعة لكِ =)

Engineer A يقول...

مبدعة يالزين :)

متابعة

Nikon 8 يقول...

وااااااااااااااااي
الله ياني أكره الفراق
أحلى قصص الحب ما يكتب لها النهايات السعيدة
ليش أبي أفهم ؟

حالِمه .., يقول...

تحكي واقعها/ حاضرها وجودها مع أبنائها..،
فلاش باك للماضي اللي ما ندري شنو صار فيه وشلون صارت من غير بدر/
وتفاصيل بعدها غامضه ما فهمناها..،

هالجزء يعطينا مقاطع من أحداث البحرين:
-إنشاء جسر خليفة
-فتنة الطائفية .. يمكن بحياتي ما سمعت عنها!!
ويبين انج مطلعه على الأحداث يمكن عن قرب..،
أو انها فكرة القصة شجعتج على الإطلاع :)

الذكريات الحلوه أيام الدراسه ..، غيرت جو بداية هالجزء اللي تعور القلب ..، وفيها حزن وشوق..،


تساؤلات وأنا أقرا:
منو خالد؟ وشنو قصته معاها؟ وشنو قصة غيابه؟ وينه مو معاهم ع البحر؟ شنو صار على أمها؟ وشلون بدر تركها أواهي تركته؟

شوقتيني زيون :)
وطول البوست حبيته واااايد :)

الليوان يقول...

مادري شقول....
بس اليوم اندمجت فيها اكثر من كل مرة
وتبين الصج اليوم حبيتهم...

بانتظار الجزء الياي
:)
تحياتي

BookMark يقول...

متابعين يالزين

حتى لو بسكات

بس متابعين

:)

ANGEL HEART يقول...

طولتي علينا يالزين :(

ناطره وكلي شوق لاحرفج العذبه

aL-NooR . يقول...

يالزينة ذكريني !! بعد !!
لاااااااااااأ
زيوون القصة .. طابعها مختلف
فيها بصمة واقع ..فيها حبكة و ذكاء في نقل الاحداث بين اعمار مختلفة .. حسيت بين كل كلمة و كلمة تنهيدة صغيرة ..ما كان ودي التفاصيل تخلص ... لاني حسيت بحرفيةالنص بس تدرين متى اكثر شي !! لما وصل فيني الشعور اني مو قاعدة اسمع اللي حواليني .. اندمجت اندمجت .. مع اني كنت مستغربة القصة بالعامية اول الوقت بس اقولج اياها عفوية و حروفها قريبـــــة
لدرجة ما تتخيلنها
حبيتها :*
ناطرة لان صج يازلتي ..
وكان ودي ما تخلص القصة لاني بكل بساطة استمتعت بكل حرف ...

تسلم الايادي :*
صبحج الله بالخير

******************

غير معرف يقول...

إبدآع يالزين

نآطرتج
إسمج روعه بصرآحه:)

الاوركيده يقول...

حلو ذكرى الحب الصافي وشلون كانوا عايشين بتفاصيل بدعتي يالزين بكتابتها كأني قاعدة اشوف القصة

قمت احب كلمه يتبع وكلي وله حق التكمله مع ان ريلي مهددني من مجابل اللابتوب في السفر :)))))

احبججججججج :*****

الزين يقول...

سلة ميوة

:))

ليش عاد شريرة
وانا احبج اكثر

ادري فيج تحبين الفصحى وشكلي بزيد الجيله عشانج بس

وعلى فكرة انا دايما ابتدي بالفصحي وشوي شوي اسحب على العامية

وان شاء الله ماراح ابطي
ابي افضى شويه عشان اكمل
هالإسبوع من بدايته لووويه


:**
حبيبة قلبي انتي

الزين يقول...

بدون تعليق

حياج الله وبانتظار عودتج

والبحرين حلوة باهلها

:)

الزين يقول...

اعتذر منكم للتأخير بالرد

لي عودة

صبا يقول...

هناك دروب وطرقات لا نعلم اي منها سالك لنا .. ولا تعلم ماهي اختياراتنا ... ما بين خطوط المستقبل والحاضر !!؟؟

كثيرا ما يدوم البريق حولنا , وكثيرا ايضا ما تنطفأ انوارنا , فهل هذا كله ايضا يا جميلتي من احمالنا..وتبقى الورقة الفاصله ... القدر المكتوب
فهو في لوح سجلته لنا الاقدار ....

الا توافقيني ان كثيرا من ذرات ونسمات الحب تبقى عالقة في اجواء النفوس ولا يمكن لرياح الفراق والبعد ان تزيلها
من داخل النفوس حتى وان توالت السنون



التنهد هو السبيل .؟؟!!
والعبث في ارشيف هذا المخزون والذي تبقى ذكرياته وبعبقها الجميل عالقة الى ان تقوم ساعاتنا يا الزين


...........

السموحه يا غاليتي ساكون خارج نطاق التغطيه ولكن انتي داخل التغطيه

مع السلامه
:****

صبا يقول...

هناك دروب وطرقات لا نعلم اي منها سالك لنا .. ولا نعلم ماهي اختياراتنا ... ما بين خطوط المستقبل و الحاضر !!؟؟

كثيرا ما يدوم البريق حولنا , وكثيرا ايضا ما تنطفأ انوارنا , فهل هذا كله ايضا يا جميلتي من احمالنا..وتبقى الورقة الفاصله ... القدر المكتوب
فهو في لوح سجلته لنا الاقدار ....

الا توافقيني ان كثيرا من ذرات ونسمات الحب تبقى عالقة في اجواء النفوس ولا يمكن لرياح الفراق والبعد ان تزيلها
من داخل النفوس حتى وان توالت السنون



التنهد هو السبيل .؟؟!!
والعبث في ارشيف هذا المخزون والذي تبقى ذكرياته وبعبقها الجميل عالقة الى ان تقوم ساعاتنا يا الزين


...........

السموحه يا غاليتي ساكون خارج نطاق التغطيه ولكن انتي داخل التغطيه

مع السلامه
:****

الجودي يقول...

بقراها من الأول

وسجليني متابعه بالياي


:)

مستمتعه

أسعد الله صباحج وممساج

الزين يقول...

المقوع الشرقي

بعد قلبي يا ميمي
لا والله حشا مو تعذيب
بس كنت لازم اوقف هني لأن الأحداث اليايه تحتاج لها بوست لحالها

واللي بعده قاعده اشتغل عليه

:***

وحشتيني

الزين يقول...

مي


:)
تدرين يا مي
وربي
انتي بالذات انطر تعليقج
ملاحظاتج ذكية وتونسي
انتي تفحصين الهيكل مال القصه
مو بس الفكره العامة والأحداث
وهذا اللي احتاجه

مشكووووره بعد قلبي
:*

الزين يقول...

MJ

واااي
انزين
حسيت اللااااااا طالعة من اقصى قلبك

ههههه
ضحكتني على الوقت
ان شاء الله جريب

الزين يقول...

انتونيو

:)

ايه يا محسن
شفت شلون

الزين يقول...

يارا

هممم

عندي تصور عن اي تفاصيل تتكلمين

:)

الزين يقول...

ميمه

مساء الجوري والياسمين على الطيبين

:*

الزين يقول...

نويرة
نواره
نورا

ههههه
مادري شنو اسميج

عيون زيون
لأن القصه تدور احداثها بهالفترة
ولأن فرق المذاهب يصنع القصه
بتعرفين شلون تالي

الزين يقول...

كبرياء وردة

ايه تفجيرات وحرق وتمرد
والناس طلعت للشوارع
وحرايج
والجيش استنفر
وهذا صار بالتسعينات
:)

خلج متابعتني عشان تعرفين شنو صار وليش صار

الزين يقول...

غير معرف

:)
هممم
يمكن
ويمكن لأ
بس ما احلف على قصص انا

الزين يقول...

bealei

سعيده جدا بتواجدك هنا
كنت بمدونتك
وسعدت اني كسبت قارئه جديده
ارجو انج تستمرين بمتابعتي

القصه راح تحلى
واكيد بتعجبج مثل اسم صاحبتها

الزين يقول...

انجنير أ

انا مبدعة بالقصص
بس انتي بسميج سندباد المدونات
تبارك الرحمن وصفج لسفراتج يشد وااايد
ويشوق

الزين يقول...

نيكون

الفراق موجود بحياتنا
وبأشكال مختلفه
وبمعدل يومي
في فراق يطول
وفي فراق ما بعده لقا
وفي فراق تلقين بعده باللي تركتيه
ويكون اللقاء صفحه يديده

عسى ربي يحفظ حبابيج ويجمعج معاهم على الفرح دوم يارب

الزين يقول...

حالمه

تعليقج اختصر كل محاور البوست
:)
وخالد راح تعرفين وينه وشنو دوره بحياة مزيان بالأجزاء اليايه ان شاء الله

شلون انتهت قصتها مع بدر
فهذا العوار اللي بتحسينه

خلج معاي

الزين يقول...

الليوان

اهاااا

طحت عليج
يعني ماكانت عاجبتج القصه

:$

الزين يقول...

بوك مارك

ليش عاد بسكات
احتاج اسمع رايكم
:)

الزين يقول...

اينجل

ايه والله ادري طولت
ومنج السموحه حبيبتي

:)

الزين يقول...

النور

:)
حبيت تعليقج
حبيته

ما عندي اكثر اقوله

الزين يقول...

برنسس ساره

:)
زيارة اولى!!
ماني متذكره
بس زيارتج ومشاركتج اسعدتني

مشكووووره

الزين يقول...

الأوركيده

:)))

لااااا
تابعي القصه
مالي شغل
ترى مالي غناة عنج

احبشش اكثر
****

الزين يقول...

ام الخلود

مشكوره على الدعوة

الزين يقول...

صبا

وين رايحه صبوي
وليش خارج نطاق التغطية

مسافرة!!

الزين يقول...

الجودي

اسعد الله كل ايامج يارب

وتسعدني متابتعج

:)

ANGEL HEART يقول...

مسموح ياللي تعذرت مسموح لو ماتعذرت :)

ناطرينج يازين ومنج السموحه اذا لحيني مو منا من الشوق لكلماتج اللي تلامس قلوبنا ومشاعرنا

مساءج ورد وعسل :)

غير معرف يقول...

ااه عورتي قلبي لم سردتي تفاصيل البحرين
كانت اروع واجمل واحلى ايامي لم سكنت البحرين بحكم عمل والدي بالسفاره الكويتيه بالبحرين
بالانتظار
سردج وايد حلو وانا طحت عالمدونه بالصدفه
تخيلي وانتي تقولين عن ماي اللقاح والمرقدوش والحلوى البحرينيه تخيلت نفسي اشم ريحتهم وغمضت عيوني وتخيلت اني اتمشى بالمحرق
ادعيلي ربي يهون غربتي وارجع ديرتي الكويت وانا بخير
لاني مسافره لرحله علاج بامريكا وصارلي 4 شهور الله المستعان

الزين يقول...

غير معرف

يا بعد قلبي قلبج
عسى ربي يسهل امورج ويشافيج ويرفع عنج ويخفف عليج غربتج ويردج ديرتج متشافية سالمة غانمه

اللهم رب الناس ارفع الباس اشفها انت الشافي شفاءا لا يغادر سقما

"اِلـهي كَيْفَ اَدْعُوكَ واَنَا اَنَا وَكَيْفَ اَقْطَعُ رَجائي مِنْكَ واَنْتَ اَنْتَ، اِلـهي اِذا لَمْ اَسْاَلْكَ فَتُعْطيني فَمَنْ ذَا الَّذي اَسْأَلُهُ فَيُعْطيني، اِلـهي اِذا لَمْ اَدْعُكَ فَتَسْتَجيبَ لي فَمَنْ ذَا الَّذي اَدْعُوهُ فَيَسْتَجيبَ لي، اِلـهي اِذا لَمْ اَتَضرَّعْ اِلَيْكَ فَتَرْحَمْني فَمَنْ ذَا الَّذي اَتَضرَّعُ اِلَيْهِ فَيَرْحَمُني، اِلـهي فَكَما فَلَقْتَ الْبَحْرَ لِمُوسى عَلَيْهِ السَّلامُ وَنَجَّيْتَهُ اَسْاَلُكَ اَنْ تُصَلِّيَ عَلى مُحَمَّد وَآلِهِ واَنْ تُنَجِّيَني مِمّا اَنَا فيهِ وَتُفَرِّجَ عَنّي فَرَجاً عاجِلاً غَيْرَ آجِل بِفَضْلِكَ وَرَحْمَتِكَ يا اَرْحَمَ الرّاحِمينَ ."

هذا الدعاء اذا فيج شده اقريه 100 مره على قعدة وحده بعد ما تصلين ركعتين تقربا لله وطلبي من ربج الشفا
والله سبحانه ان شاء الله بيستجيب لج ولا راح يردج خايبه
وانا بعد ماراح انساج بالدعاء
واذا حبيتي تتواصلين معاي عن طريق الأيميل هم ما عندي مانع
تركي لي ايميلج وما يصير خاطرج الا طيب
انا عارفه اللي تمرين فيه
ومريت فيه بكل تعبه والمه
الحمدالله على كل حال

وربج ان شاء الله بيرفع عنج ويعينج