.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

8.6.10

شنو اكتب؟؟


هل للصمت زحام ...

عندما تتدافع المسافات الفارغة من الحديث بين وبينك وتصبح كلمة " ليش ساكت" حتمية
تصبح مطالبتي بحقوق الملكية لتلك المساحه متسلطه تقهر بداخلك الحديث فتقف مترقبا تساقط حروفي بين يديك حتى تجمعهم بجملة " قاعد اسمعج"





تسلل الفراغ بين خيوط الشوق ... ورغبة اللقاء
جعلني افكر بتغيير كل ملامحي باحثة عن شغف متواري خلف انشغالك بكل التفاصيل البعيده عني

فهل يروقك اللون الأزق !!

 


هل عشق شهريار شهرزاد
ام أدمن قصصها والنهايات التي لا تأتي
وصياح ديك يلح عليه بسحب ستارالفجر بعد ان جرفه سيل العتمه وسحر الكلمة
وان لم تكن شهرزاد ذات حبكه قصصية تقطر شغفا
ونهايات مبهمة تحتاج تفسيرا وتفصيلا معرفا
هل كان بقاءها سيكون حتما
ام موتها بيد السياف بأول ليلة .... فرضا
يا ترى ما الذي حدث بعد الف ليلة وليلة !!



اتعلم

جمعت كل قصص الغرام من على ارفف الشغف
عرضتها للبيع تحت اسعارا مخفضه
ولم يشتريها الا التائهات خلف اسطورة تدعى الحب
نفضوا الغبار عنها ...
وارتشفوا احرفها مع فنجان قهوة يحتاج الكثير من السكر
ويتبع بمسكن لصداع لا يهدأ



عندما تساءلت عن حقيقة ما اكتب
وجدت الجواب معتصرا كل ارشيفي
.....
وادركت انني تعبت من كتابتهم
وارغب بكتابتي أنا ....
هي سياسة جديدة ... تتبع ديمقراطية جنوني وتمردي
فهل استجوب من قبل تيارات رفضك للبوح
ويطالبني تعقلك اللامتناهي بالرحيل !!





بيني وبينها على الهامش

فيني كلام وايد بس موقادرة اكتب
هممم ... كتبي سوالف
سوالف !! هممم ... مادري
كملي القصه
مو قادرة ... احس في سد كبير بيني وبين تفاصليها ... ناطرته يتعب ... وقطرة ورى قطرة الاقي السيل اخذني وكتبت وكملتها
اوكي عيل كتبي حب
مافيني ... تدرين كل ما ييت اكتب حب احس اني يوعانه ... تهقين هذي حيلة عقلية لضغط مشاعر تعسفيه تكتسحني بشكل قهري
@@  وسواس قهري!!
ويهج..
شفيه حلو ... مووو !!  ... وبعدين ترى الكتابة مو واجب ... ولا اهي صف حجي ... كتبي اللي تحسينه
واذا ما حسيت
الله يعينج
.......
"صخه"

انزين شنو اكتب!!

.......


هناك 47 تعليقًا:

الوتيــــــــــن يقول...

آنا اقول شلونج يالغالية!!!

لج وحشه ويبيلج قعده مع جاي وحب

مـي يقول...

تسألين شنو تكتبين ..

كتبي اللي تحبين..

عطي أناملج قليل من الحرية..

بتلاقينها على الكي بورد مثل راقصة الباليه ..

ترقص على أنغام هادية ..

ويراقبها جمهووور من المعجبين..

اللهم بارك..

الزين..
إذا قصة بدري متعبتج ، ريحي شوي ، يمكن تولهين عليها وتكملينها بعدين بنفسية أفضل..

بس لا توقفين ,,

والله أدمنت حتى ال(يتبع) في مدونتج ،،

***
وعلى الهامش ;) > بايقتها منج ..
[فتقف مترقبا تساقط حروفي بين يديك حتى تجمعهم بجملة قاعد أسمعج]
*
[تسلل الفراغ بين خيوط الشوق]
*
[جمعت كل قصص الغرام على أرفف الشغف.... وارتشفوا أحرفها مع فنجان قهوة يحتاج الكثير من السكر ويتبع بمسكن ...]
*
[هي سياسة جديدة ... تتبع ديمقراطية جنوني وتمردي فهل استجوب من قبل تيارات رفضك للبوح ويطالبني تعقلك اللامتناهي بالـ×××××!!]
*
الزين
بعد هالعسل كله وتقولين شنو أكتب..
كتبي يالزين كله..
الله يزين أيامج ولياليج برضاه..

ARTFUL يقول...

انا اقول سكتي ما يحتاي تكتبين
مهو غصب
وشكرا

(:

الزين يقول...

الوتين

انا اقول بخير يسلم عمرج يا قلبي انتي
:*

وعلى فكرة انا ما اشرب جاي

بس ما امانع بالقهوة
:)

المقوع الشرقي يقول...

الزين كله
أعتقد أدمن قصصها ولم يعشقها
فيه بلاغة شف موطبيعية
:)
ريلاكس حبيبة ألبي
ما تعتلي هم

وقت ما يجيج الالهام بتكتبينه لو على اكلينكس

جست ريلاكس

:***

الزين يقول...

مي

"كل هذا وتسئلين شنو تكتبين!!"
"حرام عليج"

:)

قالوها لي

تدرين في بالي افكار وايده
ابي ادخل بمود ليه غاب بدري
لأن في بالي عقبها قصه غير نمونه
بس مدري ابلشها الحين لو بعد رمضان

شرايج انتي؟

الزين يقول...

ارت فل

اوتش

وشكرا لك انت لرقة كلماتك وعذوبة تواصلك



:)

الزين يقول...

المقوع الشرقي

مي مي

انتي وينج
فيني سوالف ما يغطيها البحر
!!

بنت الشاميه يقول...

الظاهر انج متعسره اليوم

شربي فيمتو ...... ينعش الروح
على الاقل موجد و متوفر بالجمعيااااات
لووووول

ولم يشتريها الا التائهات
خلف اسطورة تدعى الحب

اني اعترض
الحب ليس اسطووووره بل حقيقه موجوده
بالحياة ..... الاشخاص ما يحسنون البحث عنه ولا يجيدون لان البحث عنه الحب فن و طقوس واصول
لا يعرفها الا الجاد بالبحث

زيووووون
كملت خطرفاتي بعد عندج
ما كفتني السياره الويه
ههههههههه
ما تشوفني شر من هالتعسر
:*

الليوان يقول...

مساءات من الحب انثرها هنا
فقط.....
لتعلمي.....
كم من الشوق يعتريني
حين ارى عنوانا جديدا تبدأ بة
هذة المدونة..المزينة..الملونة..
باحرف من الخيال
ليس لما تكتبين شبية على ارض الواقع
(كتبي مدام فيج عرج ينبض)
حبيبتي الزين
الله ياني ولهت على مود القصص اللي تعيشيني فية
طلبتج... يالزينة لاتوقفين
كتبي...حتى لو احرف شفافة ما تنشاف
بس كتبي
ولج من يقرا ..... ويحس


اسعد بوجودي هنا
تقبلي مروري

chandal/danchal!! يقول...

كتبي عن الزغاديد


يعني زغدودة الفارم تختلف عن زغدودة المدونات اللي بدورها مالها اي علاقة بزغدودة ركة الدوام!

سلة ميوّة يقول...

قلت


أحزاني بكتني...


قالت


مافي أكبر من جذي!!!!


قلت


اقري على هامش الزين



قالت

وبعدين معاكم...





الزين
مساءج ابتسامة

سلة ميوّة يقول...
أزال المؤلف هذا التعليق.
Seema* يقول...

الصعوبة هي في البداية.. فقط اعزمي على شيء وابدأي فيه.. إن كنتِ قادرة عليه.. ستجدين ما تتبعينه له حتى النهاية.

: )

aL-NooR . يقول...

انتي ادرى بهالشعور..
شعور تبخر الكلمة "مؤقتا"
شعور انج تحسين بكل اللي ينكتب
و تحسين بكل شعور و تحسين قلبج متروووووووووووووووس ..و تبين احد يقرف منه بس !..

لكن احنا الزم ما علينا
راحة الزين
و الزم ما علينا
احساس الزين ببيتها
مو شرط كثر الكلام
اللي يتسطر يدل على
القيمة و الحضور و انتي ادري ..
لو انا نفقد حروفج
بس اللي يحب الحرف
و يحترمه يقدر
انا الكاتب ~ مجموعة انسان


اممممممم
نبي قصة برمضان :*

**********************

alala يقول...

صباحك سكر :)

كملي لنا القصة لو سمحتي !!! اذا ما تبين مو لازم و لا تضايقين روحج :)

سمي بالرحمن و جابلي مدونتج و كتبي اللي تحسينه و اللي تبينه :)

المهم الرغبة في الكتابة ان لم تشعري بها لا تفرضيها ... خذي قسطا من الراحة و متى ما عاودك الحنين للكتابة اكتبي ما يحلو لك :)

و نحن قرائك اللي ما نستغنى عن ما تخطيه ...

why me يقول...

جمعت كل قصص الغرام من على ارفف الشغف
عرضتها للبيع تحت اسعارا مخفضه
ولم يشتريها الا التائهات خلف اسطورة تدعى الحب
نفضوا الغبار عنها ...
وارتشفوا احرفها مع فنجان قهوة يحتاج الكثير من السكر
ويتبع بمسكن لصداع لا يهدأ

====


عجبني هالبارت



الكتابه احساس


وايد انقطع عن مدونتي لان ساعات ما يكون عندي احساس احسه



الكتابه مو واجب
الكتابه مو سطر حروف

الكتابه فن
فن في رسم الحروف
مع كل حرف ادشين احساس حلو


وصباحج ورد

ميمة السبيت يقول...

** اذا كل هالحجي الزين و المبدع طلع و انتي ماتدرين شتكتبين

عيل كله خلج جذي تبارك الرحمن روعة

SAYED SAAD يقول...

ازيك يا شيخة الزين

بعد كل ده مكش عارفة تكتبي ايه
جميله بجد

والجميل اكتر ان اسلوب الكتابة مختلف عجبني تشبيهاتك وتصويرك للموقف

كوني بخير

Sami يقول...

متى نشوف اصدارتج بالمكتبات ؟

7osen يقول...

مثل ما قلتي كتبي نفسج
مع إن هذي أصعب أنواع الكتابة

أحيانا توصل فينا الشجاعة إنا نكتب كل مشاعرنا بدون مواربة أو تستر لكن دائما نعود لضعفنا ونتمنى إن ماكتبنا مشاعرنا بكل هالوضوح

عموما حنا دائما ننتظر كتاباتج
أي نوع كانت .. لأنج تعطين النص حقه وتتعبين عليه ... بس الصدق بالكتابة يوصل أسرع ...

عن نفسي أحب كتاباتج من هالنوع وااايد
أحس نظرتج فيها عمق وتأمل كبير

مقطع قصص الغرام التي لم يشتريها سوى التائهات عجبني كثيراً
يمكن لأني بحاجة لفنجان القهوة وحبة بانادول

تحياتي لجمال حروفك المستمر...

NOIR يقول...

الزين
اعشــق ثم اعشــق كتاباتك
ابداعك اللغوي مبدع

ما ادري شقول..
على قولتكم اهني" دمـــتي "

الله يوفقج يا زيونة
مقصرين بحقكم .. الدنيا تلاهي
لي عوده و بقوه

Antonio يقول...

جمعت كل قصص الغرام من على ارفف الشغف
عرضتها للبيع تحت اسعارا مخفضه
ولم يشتريها الا التائهات خلف اسطورة تدعى الحب
نفضوا الغبار عنها ...
وارتشفوا احرفها مع فنجان قهوة يحتاج الكثير من السكر
ويتبع بمسكن لصداع لا يهدأ

(صفقه وتحيه برفع القبعه)

وبانتظار الزين دائما

mjkout يقول...

قولي خعاخع عشر مرات بسرعه و راح تشوفين مواضيع الكتابة بروحها تتحاذف عليج

مـي يقول...

مممم

السالفة فيها قصة ثانية يعني

عاااراااافت الحين

يا سلام سلم !

لا يالزين لا

يا بعد عمري انتي ، شوي شوي علينا ،، ولو انج شوقتينا للقصة الثانية ، بس لا تنسين مزيان ، ترى ينكسر خاطرها جذي ، وانتي تكتبينها تفكرين بغيرها !!

***

للمعلومة
( ماشاء الله تبارك الرحمن )
لما عقلج يفكر بأكثر من شي مع بعض هذا دليل ذكاء ومواهب قوية..

***

الله يحفظج ويبارك فيج ويعطيج كل ما تتمنين وأكثر..

الزين يقول...

بنت الشامية

:)
ايه والله كنت متعسره حدي


ويازين الفيمتو بالصيف مع شوية برييه
عجييييب

والحب بالنسبة للبعض اسطوره
..
كثر ما انكسرت قلوبهم صاروا ما يصدقون فيه
وتبين الصج
بزمنا هذا ماكو حب حقيقي
اكو شغلات وايده وحب شويه

والشر ما اييج بعد قلب قلبي

:*

الزين يقول...

الليوان

يا بعد الشوق واهله
:**
ردت روحي من كلامج الحلو
والله يالليوان انا اكتب وايد
ولكن مو كل شي ينكتب يصلح ينشر
:)

اني اوقف ما اعتقد هالشي بيحصل
ومو بكيفي
:)
ووجودي بينكم ما استغنى عنه اصلا
فلا تحاتين

ومرورك دائما يلقى القبول
:*

الزين يقول...

جندل

:)))

اكتب عن الزغاريد
هم فكره

ههههه
عجبتني سالفة زغرودة الفارم
ترى انتي ادمنتيها

استغفر الله ركة الدوام اللي مالها زغروده
صار لي شهرين بالبيت وما ودي ارجع
يازين قعدة البيت
والراحه

Najmah يقول...

تعبت نفسيا
مادري ويني
ابي اتنفس
ومو قادرة اتنفس بدون قلم
اذا لقيتي قلمي ومشاعري
بلييييييز ناديني
:(

الاوركيده يقول...

الزين كله شلونج

اول مره اسمع اغنية الباك مالت مدونتج كنت حدي متنرفزة من اليهال وقعدت اسمعه حدي صرت ريلاكس

الزين مايطلع منا الا الزين

احبج حتى لو ماتكتبين شي كل شي منج حلو :*

الزين يقول...

سلة ميوة

وبعدين معانا

:)

بالضبط
يبي لنا احد يهزنا ويقول لنا بعدين معاكم

مسائج لواهيب صيفية
اخخخخ

الله يعينا على رمضان

الزين يقول...

سيما

اقول لج شي
البدايات كلش مو صعبه عندي
بس انا اصلا احس ان الكلام محتقن عندي
ومو عارفه اكتب

اول مره امر بهالحالة

مشكوره على النصيحه
:*

الزين يقول...

النور

:)
ما تعودت اسطر كلام يالنور
تعرفيني زين
ولا احب صف الحجي
واذا ماكانت كلمتي نابعه من احساس يجرفني لين اقصاي
ما اكتبها

بس يمكن زحمة الحجي اللي بداخلي مخليتني مشلولة نوعا ما

ويمكن التغييرات اللي مريت فيها مؤخرا بحياتي الخاصه مخلية تركيزي على الكتابه اقل

ويمكن حاجتي للإبتعاد صارت ملحه
اقصد الإبتعاد عن كل ما يقيد حرية كلمتي

وتبين قصه برمضان
:)

بنشوف

الزين يقول...

الالا

مسائج عمبر

راح اكمل القصه
ما تعودت اخلي شي ناقص بمدونتي
وراح اكتب اللي بخاطري
ان شاء الله

مشكوره يا الالا على مشاعرج الرقيقه
ومؤازتج الجميله

:*

الزين يقول...

واي مي

ومن قال الكتابه واجب

انا بغيت اشاركم جزء من حوار دار بيني وبين صاحبتي

شي يخصني
انا ما اتكلم ولا اكتب عن نفسي وايد
بغيتكم تشوفون جانب من طبيعة الزين
بس

مشكوره بعد قلبي
:)

الزين يقول...

ميمه

يااا بعدهم انتي والله
ياللي دايما مرفعة فيني
عسى ربي لا يحرمني منج

:*

الزين يقول...

سيد

اهلااااااا
ازيك يا سعد
عامل ايه

اخبارك ايه ياراجل
ميرسي خالص عالكلام الحلو اوي
ربنا يخليك

:)

الزين يقول...

سامي

:)
قريبا باذن الله

الخيلاء يقول...

كتبينا يا الزين .. مثل ماتعودنا منج تكتبين مشاعرنا و افكارنا .. احنا مازلنا موجودين ننتظرج تكتبينا :)

الزين يقول...

حسين

:)
يمكن انا مقلة فعلا بكتابة نفسي
واكتب الآخرين اكثر
ولي اسبابي
:)
بس شكلي بغير السياسه شويه

مشكور يا حسين
هذا اللي يعجبني فيك
انك تصدقني القول
وتعطيني رايك من غير مجامله
وانا احتاج هالشي من بين فترة والثانية


عسى ربي يحفظك ويحقق امانيك

الزين يقول...

NOIR

يا حبيبة قلبي انتي
ياللي لج وحشه كبر الدنيا
معذورة على الغياب يا قلبي
عسى ربي يسهل امورج
بس عاد لا تطولين

:*

الزين يقول...

انتونيو

:)
مشكور يا انتونيو على التواصل العذب دائما

الزين يقول...

MJ

لووووول

قلت قلت قللللت

وطلع الكلام شوف نزلت بوست يديد

الزين يقول...

مي

السالفه فيها قصص يا مي
ومزيان ما نقدر ننساها
لا تحاتين بكملها

والله وانتي الصاجه لما بالي ينشغل بمليون شغله معناته حدي مشتته

:)

الله يسهل
ومشكوره بعد قلبي على الكلام الطيب

الزين يقول...

نجمه

@@
اسم الله عليج
هونيها يا حياتي
وبسطي الأمور تتبسط معاج

:**

الزين يقول...

الأوركيده

بعد قلبي انتي
ترى توج تسمعينها لأني توني مغيرتها
:)

ريلاكس يا قلبي
واليهال ترى عسل على القلب لوما عسارتهم ساعات

الزين يقول...

الخيلاء

ياااا للهول
انتي ويييييييييييييينج
وربي فاقدتج واااايد اكثر مما تتصورين
وسألت عنج استكانه
وين اختفيتي وليش وشنو ولماذا وشحقه

مستعده اكتبج بس تعالي قولي لي شنو اللي شاغلك عني
:)