ليه غاب بدري .. الرابع

تغوص قدماي الصغيرتان فوق رمال الشاطئ الرملي وأنا اتبع اطفالي وهم يلعبون هناك ... تتلاحق خطواتهم خلف موج يتكسر بغنج .. وينوح بشجن ... ويحتضر بشوق ....

اجلس ... واحتضن حفنة من التراب بكفي ... اعصرها ... لتقطر من بين اصابعي تفاصيل حاولت ان اخفيها تحت سواد عيناي ... وحدة وسهر وتعب ... وشوق لا يموت ... يتجدد كل يوم مع التفاف شمس الصباح حول ذلك الكون الفسيح الذي ضاق بروحي ... واوصلها لنزع لا ينتهي ... ينادي ليلا دائما يفي بالعهد .. وبدرا لا يكتمل ابدا بعد ان خانت ايامه ذلك الوعد

يقترب طفلي مني

" ماما ... متى بيرجع بابا من السفر "

احتضن وجهه بنظرتي الضائعه ... وبنفس السؤال الذي يكسر بريق اخضرارهما هناك

" جريب ماما ... جريب ... " اقولها بشيء من الضيق

تصرخ لمى ابنتي الصغيره وهي تنادي عبدالرحمن " حمني ... شوف شوف .... ما تقدر المايه تصيدني"

فيهرع لها ليسابقها باصياد اطراف الموج بفرح طفولي ينعش ابتسامتي التى تأبي ان تولد الا بصحبة اطفالي ....

ويعيدني ذلك الصوت إلى هناك ... وطني الذي اشتاقه كل يوم لأنك تسكنه ... إلى البحرين ... واتذكر جسر الشيخ خليفه ... وصوت امواج قد اجبرت لتتكسر تحت اقدامه ... واهمس كعادتي عندما احادثك وانت البعيد " تذكر يا بدر ... تذكر جسر الشيخ خليفه " ...

.......

" انا باقولك سر"

يبتسم بهدوءه المعتاد .. يقترب مني وهو يصطنع الإهتمام

فأضحك كطفلة قد استساغت اللهو معه

" بدر ... ترى من صجي اتكلم ما امزح "

" جيف ... ومن قال انج تمزحين "

" انت ... قاعد تضحكني ... وآنه بتكلم جد"

" حقاَاااا ... وآنه بعد بسمع جد .... يالله عاد قولاي"

" طيب ... صبر شوية خل استجمع شجاعتي ... الموضوع شويه ... احم .... صعب"

يكتف يديه ... ويجلس وهو ينظر لي بشيء من التوتر

" آنه بقول يعني ... باجر لو يعني ... لو الله كتب لنا نصيب .... همممم .... آنه ... ( انكس عيناي للأرض بكل الخجل... ابتلع ما تناثر من حيائي ... واهمس ) آنه ما اقدر اعيش بعيد عن أمي ... أقصد يعني ... انت بيتكم بالمحرق ... وآنه بيتنا بالمنامه ... مو جنه بعيد شويه عن بيت امي .... ( انظر لعيناه ... احاول البحث عن ردة فعله ) المشوار ياخذ له نص ساعه بالأحوال العادية ... وبالزحمه ساعة واكثر ... وايد .. مو!!"

يتراجع للخلف بجلسته ... يبتسم " ايه وايد ... آنه كل يوم اعاني من هالمشوار .... تدرين من المحرق لما الصخير شقد احتاج عشان اوصل ... ساعة وزياده ... ( تمتليء عيناه بذلك المزح الذي اعشق ) بس ما عليج ... آنه باحل لج الموضوع ... وباطلب من الحكومة تبني لنا جسر يختصر المسافه بين المنامه والمحرق ويخفف الزحمة شوية ... وهاللون الطريج ما راح ياخذ منج اكثر من عشر دقايق بالكثير.... شرايج فيني"

تتسع عيناي بكل الدهشه احاول ان اصدق ما يقول ... وانا اعلم ان بدر لا يمزح كثيرا ... هو انسان جاد بطبعه... ومزحه الآن قد وضعني بمنتصف المسافه ... بين فرحة التصديق .... وشقاوة المزح والتكذيب

" الحين آنه اقول لك اتكلم جد ... ترد علي بمزح هاللون " اغضب وابدء بحمل كتبي

يقهقه ملئ اشداقه " تعالي ... وين رايحه"

اقولها بغضب " بروح بيتنا"

تلين لهجته ... ويختبئ بين طيات صوته حنان لم اعرفه الا منه " ترى ما كنت امزج ... والله ... صج راح يبنون جسر يوصل بين المحرق والمنامه ... "

التفت اليه بعين قد اتسعت دهشة وفرح

" صج!!"

" ايه صج ... وبعدين تعالي .... انتي من الحين شاغلة نفسج بتفاصيل بعيده ... ريحي راسج يالزينه ... الأمور بكره بتتسهل ..."

يبتسم برضا ... وابتسم بخجل

.............

" ماما .... ماما "
وهي تهز ذراعي لتنتشلني من افكاري

ارفع عيناي للمى وقد ابتلت اطراف ملابسها بالماء ...... واسرح بملامحها ... هي تشبه اباها كثيرا ... اخذت لونه ... والكثير من ملامحه ... رغم اخضرار عيناها الذي يشبهني كثيرا ....

"آنا يوعانه "

ابتلع حديثي مع نفسي لأسألها " نرجع البيت... "

تهز رأسها ايجابا وقد زمت شفاهها بطريقه تنم عن الرجاء" باجر بتودينا بروي"

اهز رأسي لها ايجابا فتثب فرحا وتنادي حمني

اجمع اشلاء نفسي وما امتزج من روحي مع رمال قد خلفتها مهجورة .. وحيدة هناك وانا متجهه لسيارتي مع اطفالي

كنت اخاف من المسافة بين المحرق والمنامه ان تبعدني عن امي ... ولكني بالنهاية اخترت ان ابتعد عنها بآلاف الأميال ... اخترت ان ارحل عن شوارع المنامه ... اخترت اني ابتعد عن دواعيس المحرق الضيقه ... اخترت ابتعد عن لون الخضار بلوز البحرين ... وصوت النخل لين دار الهوى وهمس للسعف بالشوق والحب لأرض دايما تمد وتسقي اهلها بماي اللقاح .. وروح المرقدوش ... والحلوى البحرينية ويمها القدوع والقهوة بريحة الهيل ... والطيب وريحة البخور ... وثوب النشل ... وحنة امي شريفه ... وعين عذاري ... وصوت الجميري .... وبالزينة ذكريني ليه غيبتني بحور ....

اخترت ابتعد بعد ما ضاجت فيني الأرض ... وابتعدت عن كل الخلق ... وكانت فرصة زواجي من خالد هي الحل الوحيد اللي لقيته عشان اتغلب على كل الألم ... والدوا اللي اخترته عشان اداوي فيه جرح الفراق

وفارقت ديرتي ....

فارقت البحرين .. مشيت وتركت وراي قصه سكنتني مثل ما سكنت احداثها كل مكان جمعني معاه

مستعدة اتولد لك من جديد

وابأة وحدة تانية غيري مستعدة

كنت مستعده انسى العالم اللي حولي ... انسى فروقاتنا الإجتماعية والمذهبية ... انسى ان بدر من بيئة ترفض وحده من مذهبي وانسى ان اهلي كلهم بيوقفون بويهي وبقولون لي لاء مو هذا اللي تاخذينه ... مو احنا اللي نعطي بناتنا لناس ما يناسبونا من جميع النواحي .. كنت برخص برضاهم .. ولكن ...

خلونا نكمل شنو صار

...

تميت انا وبدر نتلاقى بصدف نختلقها .. نتعمدها ... ونتنفس هواها

الى ان ييه اليوم اللي تجرأ ... وبلش يسولف معاي ... وصار اللقاء العابر ... كلش مو عابر ....صار شي حتمي ... نخطط له ... وننتظره ... مابين مواقف السيارات ... وممرات الكلية ... والمكتبه .... والكافتيريا كانت تطول السوالف المختصرة ... وتصير قصص تحكي تفاصيل يومنا ... دراستنا ... واحيانا مشاعرنا .. وله متواري ورى عيوني ... وشوق مكشوف بين كلامه ... وصارت امانينا وحده

بدر كان انسان مختلف بشكل ملفت... على الأقل بالنسبة لي ...

كان جاد بكل شي ... هدفه واضح جدام عيونه ... عارف اهو شنو يبي ... واي درب يوصله للي يبيه

كان وسيم بشكل ملفت ... ومتحدث بشكل ممتع ... جنتل بشكل يخليني دايما اقارن بينه وبين باجي الشباب ... ويخاف علي وايد بطريقة كانت ساعات تضحكني ... لأني ما تعودت احد يخاف علي كثر امي ... بس خوف بدر كان شي ثاني

في البداية كنت بيني وبين نفسي محددة طبيعة العلاقة ... وعارفه ان اللي بينا ماراح يتطور ... آدري اني كنت منشده له بشكل مو طبيعي  ... بس ما فكرت ان الموضوع راح يتطور بهالشكل ...ولا مر على بالي اللي ممكن يحصل

واللي حصل كان شرارة لقت لها جذوة اشتعلت فيها وما انطفت ابد ... وكان قلبي يجدد هالشرارة بكل مره يغيب بدر عن عيوني واشوفه عقبها .. كان كل شي يداهمني ... وبقوة اكبر من مقاومتي  ... شعور جارف ... ما املك الا اني آسبح مع تياره .. وآنسى كل حدودي ... وتحفظاتي

لما كان يلتقيني بعد يوم طويل ... ينتظرني بمكان تعودناه مثل ما تعود اهو علينا ... ينتظرني عشان نتشارك جوع اللحظه ... وسندويشه اهو شاريها لي ... وعصير كنت آحبه ... وكيكة صغيرونه امه مسويتها له وما كانت تدري ان هالكيكه اللي تحمل كل عبق الهيل والزعفران بتكون من نصيب مزيان ... اذكر اول مره عطاني هالكيكه عجبني وايد طعمها رفعت عيني وسألته

" الله بدر ... شنو ذي الكيكه ومنو مسويها ... شقد طيبة"

ابتسم وهو يقاوم ضحكته " الحين انتي ما تعرفين شنو ذي ... وتسمينها كيكه"

" ليش انا قلت شي غلط ... ذي مو كيكه"

ولم يتمالك ضحكته هذه المرة" ذي يسمونها قرص عقيلي يالزينه ... ما اكلتي مثلها من قبل"

اعتراني الخجل " وين يعني باكلها ... انت تدري ان امي ما تعرف تسوي هاللون كيك"

نظر لعيني بطريقه حبست انفاسي " خلاص ... من يوم ورايح آنا باييبلج منها"

اذكر ان في بداية علاقتي معاه كانت كلماتي كلها بالنسبه له غريبه ومهجنه وكان دايما يضحك علي ويقول لي

"لا يسمعونج الناس ويفكرونج مجنسه ومنتي من اهل الديرة ... تحجي عدل يابنية "

وكان يعلمني شلون تكون مخارج حروفي وكلماتي بحرينية ... يعني بدر كان المصحح اللغوي اللي يتابع لهجتي ويعدل فيها ... واكتشفت مع الوقت ان بدر صحح اشياء كثيرة بحياتي ... مو بس لهجتي

كان يداريني ويحتويني مثل طفله تييه بعد تعب يومها الطويل ... يشبع جوعها .. ويروي عطشها .. ويهديها الفرح على طبق من انتظار لباجر ... عشان يتكرر اللقاء

وكان لما يغيب وما يداوم احس اني ضايعه ... بين هاجس تعبه ... وتعب قلبي من غيابه ...

ايامها ماكان عندنا شي اسمه موبايل ... كنت انتظر رجعتي للبيت ... اسحب التليفون لغرفتي .. واكلمه ... ما كنت ابتدي مكالمتي بالطريقة اللي تعودوها الناس

كانت اول كلمه اقولها هي" وينك"

وكان جوابه دايما واحد " كاني ... موجود .. حواليج ..ساكن كل شي فيج يالزينه ... انشغلتي علي "

وكنت اتصنع عدم القلق واختلق اسبابا اخرى

" لاء ... بس كنت احاتي المحاضرات اللي طافوك"

............

ما اذكر اللحظه اللي قالها لي ... ما اذكر الكلمه شلون كانت ... كل اللي اذكره ان احنا اكيد التقينا عشان نحب بعض ... نكون لبعض ..ونخطط لحياتنا مع بعض

دراسات عليا ... عيال بعددهم واساميهم .... وبيت راح ينبني بمكان ما يبعدني عن امي ...

وجسر انبنى عشان يقرب الدروب بعد ما تلاحمت الأرواح وذابت القلوب ببعض

جسر يحضر معاي صكات الدهر .... وقصة ما انكتب لها عمر ...

كنت كل ما تضايقت امر عليه ... آنزل واتمشى حواليه ... اسمع سوالف البحر ... ويسمع اهو سوالفي عن بدر

ومشت ايامنا فينا بدروب يغزلها الفرح فوق ملامحنا .... نرتب جدوالنا مع بعض ... ونحرص ان يكون في ساعات فراغ بالنص عشان نلتقي فيها ... حتى الكورسات الصيفية كنا ناخذها يميع ... ولو كان تخصصي مثل تخصصه ... اتصور كنت باخذ محاضراتي معاه .... وعدت السنين ...

الا ان بلشت فتنة الطائفية بالبحرين ... واشتعلت الأحداث بشكل مخيف ... يحمل الكثير من العنف ... والمشاهد اللي ما اعتدنا نشوفها عندنا  ... تفجيرات ... وقتل ... واعتقالات

 

وهذي سالفه ثانية ... بنكلمها بالجزء الياي

يتبع