.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

31.12.09

ملاس ... التالي




وييه باجر

والتقينا على الوعد .. والمشخاله استبدلناها بملاس ( يا فرحة جندل)
بغرف لكم من جدري اليوم وبستخدم اكبر ملاس عندي
مساحات البوح لدي اليوم من غير حدود ... بلا خطوط ... وبلا تحفظات


صديقة اعشق روح الفكاهة لديها سألتني اليوم مستعدة لاستقبال 2010 ؟؟ فكان جوابي دون تفكير بالإيجاب "وإنتي" وكان جوابها يثير الكثير من الأسئلة بخاطري " زيون .. كل السالفة هو رقم ... شالفرق بين 2009 و 2010 " وكان ردي لها جدا (زيوني .. نسبة إلى طريقة تفكير الزين ) احم
"اللي تغير مشاعرنا" صمتت لوهلة ثم بادرتي " ليش مشاعرج اليوم غير عن مشاعرج باجر"


تبون الصج ... سؤالها خلاني افكر صج شالفرق بين اليوم وباجر .. وفجأة تطاولت الملاس وجابلت الجدر احوسه .. ولا احد يسألني شنو الطبخه لأنها اكيد بتكون سمج :) عشان ابحث عن اجابه مقنعه لسؤالها
كل اللي اعرفه ان احنا بطبيعتنا البشريه نعشق البدايات بكل شيء ..


بقصصنا الصغيرة ...دائما البدايات تكون مشوقه وتحمل الكثير من الإثارة التي تحثنا على المواصلة حتى نكمل باقي الحكاية
بأحاديثنا لأنها نمسك رأس الموضوع من عرقوبه ومن ثم يتفرع بنا بعدها إلى مواضيع شتى نتوه فيها عن حقيقة بداية الحديث .. لتتحول الجلسه الى مجرد ثرثرة .. وهالثرثرة لها الأثر الأكبر بتغير المزاج الى حال اطيب ... او تجعلنا نركن للصمت لنتفكر اين كانت بداية الحديث ...
بمشاعرنا .. فهناك من يعشق حالة دغدغة المشاعر في بداية أي علاقه ولذلك هو متجدد بتلك العلاقات فلا يلبث أن يعتاد العلاقة المتاحه له الآن حتى يبحث عن علاقة جديدة تنعش ذلك الشعور السحري بين خلجاته .. ويصبح الموضوع بالنسبه له دون أي يدرك ادمان لتلك البدايات بغض النظر عن صحة الإختيار
بيومنا .. بالنسبه لي .. انا مخلوق صباحي ... اعشق بداية اليوم بشكل مو طبيعي لدرجة اني حتى بالويك اند اصحى من الصبح لأستمتع ببوادر الصباح المنعش ... واذا تأخرت بالنوم احس ان شي كبير طافني وما ابتديت يومي صح ... وبقية يومي تترتب على ذلك الشعور
بالإنطباع الأول الذي نتركه لدي شخص نقابله للمرة الأولى .. هذا الشعور اللي يخليك ترتدي قناع من الرسمية واسلوب متحفظ نوعا ما حتى يكون وقع تلك اللحظه على الطرف الآخر شيئا مختلفا .. ولكنه مستمرا باستمرار تلك العلاقه .. سواء كانت على المستوى الشخصي او العملي ... هذا اذا استمرت
بأول يوم نبتدئ معه اجازتنا السنوية واحساسنا المطلق بالحرية وعدم الإلتزام
بأول يوم نصبح فيه بديرة يديده اول مره نشوفها ... وكم الإثارة وروح الإسكتشاف اللي تخلينا نصحى من الصبح .. نتريق مع ان بالديره لا يمكن نسويها ... نكشخ وهذي لازم نسويها .. وننطلق في رحلة استكشافية على الأقدام لمعرفه كل ما يحيط الأوتيل من بوتيكات وكافيهات ... وابتسامه رضا وفرح تلون ملامحنا لأننا نجحنا باختيار الفندق المناسب

كلها بدايات صح
وكلها تعطيك الشعور بالتجدد
وكلها تفتح لك شبابيك جديدة على زوايا من نفسك تتوه منك أحيانا
وكلها تقول انا عندي القدرة اني ابتدئ من جديد .. واني اكون اسعد ... وان احمل بين خلجاتي امل يتجدد مع كل البدايات


السؤال الحين ... يصير نبتدي من غير ما ننتهي!!
ووين ابتدي وانا بعدي ما انتهيت ...


CLOSURE
النهايات تحتاج منا وضوح رؤيا ...شجاعة ... وسرعة قرار وحسم لا بد منه ... قدرتك على انهاء ماهو عالق ... هو بداية لأمر جديد سوف يشغل ذلك الحيز الفارغ لموضوع قد انتهى
بعض النهايات مؤلمة نعم .. ولكنها حتمية ...
واكثر النهايات ايلاما هو الموت ...
ترحموا على موتاكم .. فهم يستحقون الرحمة في لحظة حسمت لهم نهاية الطريق ...ولم يخطوا تلك النهايه بانفسهم
ترحموا لهم حتى تبتدؤا عامكم الجديد برحمة من الله سبحانه ... لهم ولكم


ادري وايد شطيت


بس قلت لكم السالفه فيها طباخ وملاس


ارفع غطا الجدر ... اجيك على سمجتي ... تعرقت مع البصل والثوم وبهاراتي (دراسين .. هيل ... مسمار ... ورق الغار .. كركم وقليلا من الملح ... وشوية كاري .....واعتقد حان وقت اضافه الخضرة من شبنت وبقدونس وكزبره ... وقطعتين من اللومي السحاري)
أعيد الغطاء مرة أخرى ... واجلس على الكرسي لأتابع حركة الشارع من موقعي الإستراتيجي
لتقتحم افكاري فضه بنفنوفها الململ الواسع والمشجر بالوان الربيع ... وبطنها الوارم ... وتقف خلفها عند الباب حصه ...
"بالله عليج متى بتكملين قصتنا "
اعتدل بجلستي ... وتطير بوهتي من الخرعة
"فضيض ... شطلعج من صندوق افكاري"
لتبادرني حصة بنزر " والله عاد كيفنا ... طالعين نحتفل براس السنه حالنا حالكم"
اتفحص حصه لأجدها ترتدي دراعة بيضا تشبه دراعة شريمة البنية .. وثوب تور اسود تلف طرفيه على رأسها وتحمل بديها عصايه مزرية ... شفايفها اسودت من كثر الديرم .. وكحلتها واصله اخر الفريج
اوجه الحديث لها " وانتي ليش كاشخه هالنمونه "
تمصمص شفايفها بشئ من الإستهجان " عندي حفلة زيران ... بروح اطلع اللي براسي كله ... شكارج انتي!  فيني ردح لين الفجر"
تقاطعها فضه موجهة الحديث لي " وانا متى بولد ... ترى ذبحني الثقل ... وبعدين خلي الناس ترسى على حل ... وتعرف اللي لها واللي عليها ... قومي اهو قومي كتبي ... جندل ولدت ... وسبمبوت جربت .. وانا لما الحين وارمه ... عاد هذي حاله بالله عليج"
يتركوني ويطلعون من المطبخ فضه بالمقدمة .. وحصة تتبعها لأستغرب شلون فضه حاضرة مع حصة !!!...

اطل على سمجتي شصار عليها ... هممم ... عجيبه الريحة ...
ابتسم وامرق عليها ... اتركها على النار واسرح مع افكاري ثانية
شنو الشغلة اللي ودي اغيرها بنفسي على السنة اليديدة


الصبر ووساعة البال ... احتاج اشتغل على هالنقطه فأنا اذا رغبت بشيء فلا املك من الصبر الا اسمه ... واذا سمعت شي ما يعجبني ... ما انطر اللي جدامي يخلص جملته .... يااا ويلي ... حتى نفس ما اخذ ... يمكن ساعات يكون معاي حق ... بس ساعات اخرى احس اني متسرعة قليلا ... وكان لازم اسمع للآخر تالي اقول اللي عندي


العصبية الزايدة ... نار الله الموقدة على قولة امي ... وإذا عصبت ما اميز شمالي من يميني .. لذلك .. افضل اذا عصبت ابتعد عن الكل ... سواء الشخص المعني او غير المعني ... حتى اهدأ ... ثم اعود بابتسامه شقاقية ... وهااا ... لا ترد تفتح معاي الموضوع مرة ثانية ... لأني ممكن اذا تكلمت فيه اشحن نفسي من يد ويديد ... لذلك مرة ثانية .. وجب التنويه


انت معاي على الخط صح!!
:)

المزاجية المطلقة اللي ممكن تعفس حياتي بلحظة ... واذا عرفت اتحكم فيها بيكون انجاز لي على مستوى العمر مو بس السنه ...


كلمة اخيرة لي ولكم


حبوا الكل ... حبوا بعض ... ورحموا الكل ... اولها انفسكم ... فنحن نستحق الرحمه من ذاتنا .... جلد الذات لن يروضها .. ورحمها سوف يطوعها ... جربوها ...
تسامحوا ... وتعلموا تترفعون عن صغائر الغير ... وتغضون النظر عن هفواتهم .. اخذوهم كحزمة واحده بعيوبها ومميزاتها ... وتعاملوا مع الكل على اساس انكم سواسيه معهم ... وكلنا لنا اخطاءنا اللي نتمنى ان الغير ممكن يغفرها لنا في يوم من الأيام
وتذكر انك لما تسامح ... تسامح لأجل قلبك انت ... لراحة بالك انت
لا تحمل بين اوداجك مشاعر سلبية لأي كان ... فليس هناك متسع في قلبك للزعل او الكره
املأ كل المساحات المتاحه بالحب والعطاء ... والرحمه

حاول ترحم عدوك وتنظر له بعين التعاطف لكم المشاعر السلبية اللي تجبره على ان يعاديك ... ترفع عن صغائره ... وعلمه ان اللين هو اقرب الطرق لنفسك ... للآخرين ... ولله ... وكم عدو رحمته لقيته بيوم صاحب ورفيج درب ...
بس هااا ... نرحم ... بس ما نأمن ... لأن الرحمة ساعتها بتكون سذاجة
نسيمها الرحمة الذكية
:)


اكشف الجدر ... واضيف العيش على المروق مع السمجه .. ارفع سمجتي بطرف الملاس .. ليحل الرز مكانها في قاع الجدر .. اسكر الجدر .. اوطي على النار ... واترك العيش يتسكر


حبوا ديرتكم ... وصونوا نعمتكم ... عرفوا قيمة الصحة ... راحة البال ... والإحساس بالسلام اللي نتمتع فيه من غير ما نعرف قيمته ...
وفتحوا ايدكم للعطاء ... عطوا كثر ما تقدرون .. مشاعر ... صدقه ... تسامح .... وطيبه ... ووقت واهتمام ..
بالنهايه ... كله راح ينعكس على يومكم ... حياتكم ... رزقكم ... وحتى ملامحكم

تذوقوا الجمال حتى في ابشع الأشياء ... وتذكروا ... ما عرفنا النور الا لما جربنا العتمه
ولا تنسون ... باجر دايما يوم جديد برزقه ... ولازم يكون اجمل


بيدكم يكون اجمل


وبالنهاية


كل عام وانتم ومن تحبون بافضل حال


اعتقد طبختي استوت ... وحان وقت النجاااب
وين الملاس !!


:)



Peace



هناك 24 تعليقًا:

~ هند ~ يقول...

رفعيلي شوية عيش حق الفطور :)

وانتي بأفضل حال يا رب..

دلوولي يقول...

كل عام وانتي بخير و زينه يالزين بين اهلج و حبايبج انشالله دوم
كلماتج تفتح آفاق للتفكير و التأمل بالحال الله يعطينا خير هالسنه اليديده و يبعد عنا شرها

دمتي ب ود

Hamad يقول...

hi elzain am always a silent reader with ur blog bs elyoom ma gedart lazem agoolch ena kalamch qema fel raw3a

Happy new year :)

SHOOSH يقول...

:)

آنا ما عندي ملاليس (جمع ملاس و مادري اذا صح او غلط)

حتى قفشه ما عندي

ولأ .. مو لازم تنتهين عشان تبدين

و مو شرط كل ما انتهيتي تقدرين اصلا تبدين من يديد

مرات وايد النهاية تكون شي مغلق

و مرات أكثر تقدرين تخلين شي مفتوح و تبدين عليه شي من اول و يديد

العفسه أونس

ولا شرايج ؟؟

chandal/danchal!! يقول...

بعد شنقول عقب هالبوست العجيب

قريته وأنا ناسفة "دودة القز" على جتفي
.
.
.

كثري من الشبنت وثوم ال يبل "اون ذا سايد"

كل عام وانت بخير وصحة وعافية

:)

Safeed يقول...

ففضفضة على الهامش.. يمكن ما لها معنى ..

تساؤل يطرأ على البال: ليش نحتاج دايما لتحديد موعد للبداية؟ ليش ننطر راس السنة، رمضان، العيد، بداية الدوام، أول الصباح .. إلخ عشان نحدد مصيرنا
ليش نربط مقاديرنا، رغباتنا، أمنياتنا، كل شي فينا بأحداث زمنية ننطرها تيي عندنا عشان ننفذ ارادتنا؟

أنا أحب أن أؤمن أن بدايتي ما يصنعها الزمن، وأن مشساعري ما تصنعها الاحداث .. إنما تصنعها (إرادتي)، إرادتي بالبداية .. وإرادتي بخلق شعوري .. وأحب أن أؤمن إنه اذا بدأت بشيء .. فمقدمته هي التفكير بخاتمته!

الله يجعلها سنة خير وبركة عليكم وعلى من تعزون وعلى جميع العالم ان شاء الله
وكل عام وانتم بخير

Nikon 8 يقول...

الله يعينج
عندج حزمة قرارت للسنة اليديدة
أنا واحد وأبولع بريجي إشلون بأنجح
؟
جميل أن نقيم أنفسنا ونتخلص من الطبع اللي يزعجنا أو نخفف منه
ولن ألا تعتقدين إنه
يا حلونا بأطباعنا ؟
:)
كل عام وأنت بألف خير

غير معرف يقول...

كبري الخط شويه انعمت عيني


كل عام و جدورج بخير ههههههههههه

دمعة المقهور يقول...

كل عام وانتي الأجمل يارب

الله يرحم موتانا وموتى المسلمين يارب

مالي بعد الكلام الحلو كلام يا الزين

الله لايبعد الفرح عنج يارب وعن احبابج

:)

ray يقول...

كل عام و انت بخير زووز

و مرقة السمك مالتي ما أحط فيها شبنت, بس كزبر واايد

و أحلى شي ان بس قفشة وحدة دهن و حقب ما تنحمس أقطها بالفرن

السمكة ما تتكسر تظل على عدالها و تتقدم بنفس الصحن

يعت

سلة ميوّه يقول...

كل عام وانت بخير
وربي يعوضج بهالسنه
وعساها سنة افراح وحب وجمال
وصحة وعافيه يارب
وعسى الله ينولج كل اللي في بالج



وترى الملاس والمشخاله
كانو قمّه بالروعه
الزين...
السنة اللي طافت
ماقلتها..لاني مو موجوده

الحين..اقولج..
انتي من اجمل الاشياء الي مرّت علي في 2009...
على تعاستها من سنها
فيها حلات...
تراج من حلاها...

ربي يحفظج ويزينج
فوق هالزين


حبي:**

غير معرف يقول...

انا من فترة أحب أقرالج واليوم أول مرة أحط تعليق .. بس حبيت اتمنالج كل خير وسعادة والله يعطيج وينولج كل اللى تبينه أحبج في الله وعسى الله يوفقج يا الزين:)
فاطمة

الوتيــــــــــن يقول...

ههههههههههههههه

زيون ... لقد صنعتي يومي
وتنقصيلي *_* من طبختج يوعانه

تسلم ايدياتج يالزين .. فعلاً كنت في مزاج متعكر .. وأحسنت التجاه عندما وقعت على (هنا) وعلى (سلة ميوة)

انتِ إيجابية وأحب هاذا الشي فيج .. بس لا تعصبين *_* بيدج ملاس دربالج علينا :)

كل عام وانتٍ بخير
كل عام وأنت جديده ومتفائلة ..
وكل عام وأنتي تصحين مبجر .. ولا تفوتين يومج

أسأل الله ان تكون سنة خير وأمن عليج وعلنا وعلى ديرتنا :) وديار المسلمين

Tekana يقول...

ياحلاة سوالفج ياالزين. وحلوة فلسفتج للامور. وسالفة المشخال والملاس هذي صج عجيبه. يعني نحتاج بين فتره والثانيه " نشخل" حياتنا عشان تطلع الاشياء اللي مالها لازمه. وفعلا مانحتاج بدايه سنه يديده عشان ننفذ قرارات اتخذناها او نغير شي فينا بس يمكن عشان نأجل قراراتنا نربطها بسنه يديده او بدايه اسبوع. قرقت وايد ماعليه بس لان بوستج خلاني افكر بشغلات وايد بحياتي صج يبيلها تغيير. كل عام وانتي بالف خير

بـــــقــشة يقول...

كـل عام وانتي بخير وان شاء الله سنه خير على الجميع ونشوف منها كل جانب طيب وتكون ابرك من 2009

reemas يقول...

كلمات عذبة رقيقة لا تأتي الا من الزين

تمنياتي لج بعام سعيد و جميل بجمال قصص الزين
كل عام و انتم بالف خير

Reem يقول...

كلامج جداً لامسني يالزين ، يمكن ليش ذكرني بكلام الوالدة :) .. كانت دايماً تقولي أنا و خواتي " حبوا نفسكم ، حبوا بعض .. عشان تقدرون تحبون الناس .. و الناس تقدر تحبكم "

و أغلب الكلام اللي إنكتب في هالبوست ، كان محبوس داخل صدري .. ماني عارفة بأي شكل أو صورة أقدر أطلعه ..

و أي صورة أجمل من أن تخرج تلك الكلمات من " جدر " الزين .. و بطبخة لذيذة !

الله عليج و على طباخج ..
أنا أقول إرحموا من في الأرض يرحمكم من في السماء ، مسكينة فضيض تبي تولد ! .. و الله إني حاسه فيها ، شكلها مثل إختي تعاني .. و الياهل عيا يطلع لول !

كل عام و إنتي أنقى يا جميلة :)

اقصوصه يقول...

سنه ميلاديه زاخره بالطاعات

اتمناها لك :)

rabo3a75 يقول...

هلا وغلا بالزين.....
الهم ارحم موتانا وموتى المسلمين
والله يذكرج بالشهادة مثل ما تذكرينا بالدعاء
اول شئ وايييد طولتي علينا بالقصة , نسينا وين وصلنا والاحداث اللي صارت

الصبر ووساعة البال ... احتاجها واييد وان شاء الله تكزن لي هبة من رب العالمين

العصبية الزايدة الله يبعدها عنا اجمعين

المزاجية المطلقة الله يفكنا منها وتروح مع 2009 وما ترد (عسى الله لا يردج)
وما اقول الا عسى الله يكتب لنا في 2010 كل الخير والحب والسلام ويثبت ديرتنا الي ما مثلها ديرة ابد
والسامع يقول امين

بنت الشامية يقول...

الفلفل والمعبوج واجار الطماط وثوم اليبل علي.....اكو مكان لى..؟؟؟؟
ترا اموت على السمج وبعد
من طباخ الزين
ونعومه اي والله ونعومه
ماكول العافيه

كل سنه وانت طيبه انت والاهل والعائله الكريمه
ان شاء الله تكون سنه حب وامن وامان للجميع

خاتون يقول...

تذوقوا الجمال حتى في ابشع الأشياء ... وتذكروا ... ما عرفنا النور الا لما جربنا العتمه

هاذي حكمتي بالحياة في مقاطع كثيرة وجدت نفسي بهذا البوست
طبعاً كتابة أخرى من كتابات الزين المدح الجزيل لا يكفيها فما بالنا بالمدح الخفيف لذلك سوف أكتفي بالصمت فالصمت في بعض الأحيان يكون أبلغ من الحديث
البداية و لذتها تتجسد عند الحريم بالرجيم و يوم السبت و على ما أيي يوم السبت إلا اهي تانكي لوووووووووول عاد بعدها يبيلها رجيم علشان فكرة الرجيم خخخخخخ أنا بعتباري انه كل شي بداية و ما فيشي أصلا أسمه نهاية مثلها مثل الحرارة و البرودة فالحرارة مو جودة و البرودة ليست موجودة هي مجرد غياب أو نقص في الحرارة
الله يرحم موتانا و موتا المسلمين أجمعين و يعفو و يغفر لهم
عجبني فكرة أنج دخلتي فضة و حصة و نكهة الفكاهية
و فقرة المسامحة كانت مقطع رائع روعته بمعانيه و اسلوب من طبعة حروفه ~*~
شكراً لأنك لا زلتي تكتبين و تبدعين و تمتعين ..اسلوب و فكر يستحق القراءة

shakshaka يقول...

To make an end is to make a beginning;*

saa7?

الزين يقول...

لكم جميعا تمنياتي بعام زاخر بالحب والعطاء والصحه والرضا من الرحمن سبحانه

منكم السموحه لعدم تمكني من الردع عليكم لوجودي خارج الكويت

لي عودة مع همساتكم الجميله

فاطمه

حمد

اسعدتني خطوتكم الأولى هنا

لا تباعدون


مودتي

الحــــر يقول...

الصراحة البوست خلة مـــخي جدر دبريلي ملاس يمعود

:)

كل عام وأنتي بخير