.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

28.12.09

نصوص لم تكتمل



كلي

كلي يدور عن كلي فيك
كلي يناجي شمسك لين عافت لياليك
كلي ينتظر القمرة ... تسكر بعتم الضوى ... تستوى بصدري بدرة
وان قلت لك يا بعد كلي
هم  ..... ما اقدر حقك ... اوفيك





بعدي

بعدي انا طفل صغير يخطي ... ويجمع الخطا بكف العقل
يتعلم كيف يعطش الصبر ... وكيف يرتوى الفكر من سنين العمر



رمشك

رمشك .. يارمش عيني
ينهي بي كل السوالف ويبتديني
يسكب حروف الرضا على وجناتك والجبين



تناظرني
لا تناظرني بعين اللقا
لا تشعل النار باشواقي
ارحم خفوق من التعب سقا
كل الهوى وانتثر باوراقي



تغنج

تغنج يا شعرها
تدلل ... تثني ... تعاكس النور على خدها طيات
تشرب من سواد الليل وانتثر على وسادتي خصلات



قربها

آه يا قربها
ياللي سكبت الدفا مابين طرفي وطرفها
آه يا خدها ياللي لمع على صدري مثل السما ابدرها
آه يا عطر تغنى بحسها ... بصوتها ... وبكل دقات قلبي بحضنها



تحسيني

تحسيني شكثر ملهوف!
تحسين الوله فيني
تعرفين ان الجنون واقف على اعتابي
وعشقج سابيني
تحسين شكثر تعبان
تدرين عاد
ابي كفج يلملمني  .... ويكفيني



باجي العمر

باجي العمر سكرات
تثمل على اطرافها روحتك والجيات
باجي العمر فجر وضوى وانت معي نسمة هوى ... واحلى ربيع
باجي العمر انت وانا
وهمس القوافي بروحنا
وسطر طويل يكتب على وجه الحياة حلم صغير .... بيت يلم احلامنا
باجي العمر سنين تمر
وما بالحشا ... غيرك انت ... وغيري أنا




هناك 25 تعليقًا:

aL-NooR . يقول...

اذا هذه نصوص لم تكتمل و هي بقمة الروعة هكذا ..فلا اعلم اذا اكتملت !
قد تصيبنا بلسعة من طعم الجمال اللاذع

احببت كل النصوص
و اعجبتني نصوص خاصة ..
احببت "تحسيني " لدرجة تكرارها 3 مرات ! وااو زيون خيااال

تسلمين ..و يسلم من خط هالحروف
و يسلم من نسج طاريها
:*

******************

الزين يقول...

النور

بعد قلبي يالنور
عيونج اهي اللي حلوة

يسلم عمرج يارب ويحفظج من كل شر

:*

دمعة المقهور يقول...

الله يالزين

عجبتني فقرة باجي العمر سكرات ...

الله لايحرمنا من ابداعاتج

:)

Nikon 8 يقول...

يا زينها من نصوص مثل صاحبتها :)
ترا راحت عنا خرعة شريمة البنيه كملي لنا فضة وشاهين.
يا مسا الأنوار :))

الحــــر يقول...

أراها بجمال الكمال

والكمال لا يحتاج أن يكتمل


:)

ظــامـي ســـراب يقول...

الزيـــن :)

بدايةً كل العذر على غيابِ قسري وإن كنت أرتوي بجل النصوص وهمسات النفوس المتواصلة هنا

لا تناظرني بعين اللقا
عجباً بأي العيون تريدينه يا الزين!

موقنٌ أنا بأن احساس كاتب النصوص لن يصل إلى حد احساس مريديه بما يخط وينثر لذا أقول متأدّباً بأن الجنون الساكن فيكم بلغ أوجّه...
والله يبلّغنا الياي!

تبارك الرحمن ويحفظج بحفظه

Reem يقول...

كنت أظن أنني قادرة على فصل الجمال عن بعضه ، و تحديد الجميل و الأجمل فـ الأكثر جمالاً ..

هنا ، ضعت في تفاصيل كل مقتطف ..
المعاني جميلة يالزين ، تفرح القلب لي نطقها :) ! .. ماشاءالله عليج ..

و بعض النصوص تقف عند نقطة ، تبدأ عندها بإكمال ذاتها بما تحمل من حس و معنى ..

و إنتي نصوصج مكملة لذاتها ..
و جميلة :)

سلة ميوّه يقول...

من قال أنها لم تكتمل؟؟؟



كوني بهذا الكمال


حبي:*

الوتيــــــــــن يقول...

"تحسيني شكثر ملهوف!

تحسين الوله فيني

تعرفين ان الجنون واقف على اعتابي

وعشقج سابيني

تحسين شكثر تعبان

تدرين عاد

ابي كفج يلملمني .... ويكفيني"


آنا ياللي مالي شغل حسيت فيه
هكذا تُجسَد الكلمات .. ولا يتقنها إلا قلة وانتِ منهم

أزور عالم المدونات عندما تضيق نفسي بي وأفرح عندما أجد سوى فيما تكتبين

كوني بخير يالزين :*

rabo3a75 يقول...

تحسين شكثر تعبان
تدرين عاد
ابي كفج يلملمني
تحسيني صراحة مو صج قتلتيني في هالكلمات
واييييي شي شي عجيب

لا عاد والبيت الياي ضربتي على الوتر
تدرين اشكثر اموت على هالجملة
(وان قلت لك يا بعد كلي)

يا ويل ويلي من حلات كلاامج الذباح

وما اقول الا اشكر حياتج وفنج

SHOOSH يقول...

as sweet as u

الزين يقول...

دمعة المقهور

:*

ولا يحرمنا من طلاتج يالشيخه

الزين يقول...

نيكون

بعد قلبي
:)

انشاء الله عن قريب بينزل جزء يديد

:**

الزين يقول...

الحر

:)

يعل عمرك طويل

ما تقصر يالشيخ

الزين يقول...

ظامي

لا تناظرني بعين اللقا لسبب واحد

تأثير النظره الأولى بعد طول الغياب
شي ممكن يفقد الطرف الثاني توازنه
زخم المشاعر اللي تحمله هالنظره
شعور ممكن شلون اقولها
يشلع القلب
:)

عين اللقا مو بس نظره يا ظامي
صح!

وجنوني هنا لا يضاهي جنونك هناك
واتصور كل من يكتب مشاعره باريحية فهو مجنون في زمن اعتلت فيه الجسور
وبتنا نرتدي الف ثوب وقناع

شكرا لك يا ظامي
وربي يخليك ويعز غاليك ويحفظك قول آمين

الزين يقول...

ريم

احرجت جدا
لما اييني هالكلام من انسانه تنافسني بكل المعاني
تنقلني لأجواء صعبه انتقل لها مع اي نص
تسقيني احاسيس رائعه لا يتقنها سواها

هنا اقف
واعجز عن الرد

شكرا لك من اقصى اقصى القلب يا ريم
:**

الزين يقول...

سلة

:**

الله يا سلة قصتج لاعبة بحسبتي

:)

الزين يقول...

الوتين

:**

يا بعد قلبي انتي
تصدقين عاد
انا بعد حسيت هالجزئية حيل
احسها طلعت من قلب قلبي
:)

لا تباعدين

الزين يقول...

ربوعه

:)))

اسم الله عليج

:)
اشكر متابعتج ووجودج

بس ترى ضحكتني حياتج وفنج
وربي عسل
:*

الزين يقول...

شوش

:***

انتي السويت كله

دلوولي يقول...

تحسيني ...
يأبى الكمال ألا يكتمل إلا على يد الزين

الله يالزين عسى الله يزيدج من عنده بكل شي زين


صباح الخيرات و النيرات

Engineer A يقول...

تبقى نصوص مذهلة .. سامية في معانيها على الرغم من عدم اكتمالها!!


تحياتي

بنت الشامية يقول...

واحلى ربيع

باجي العمر انت وانا

وهمس القوافي بروحنا

وسطر طويل يكتب على وجه الحياة حلم صغير .... بيت يلم احلامنا

باجي العمر سنين تمر

وما بالحشا ... غيرك انت ... وغيري أنا

****
انها قصة حياتي

اختصرتيها بفقره....و تقولين لم تكتمل
؟؟؟؟؟

هالايام اكيد انت فوق السحاااااب
كلناااا فى انتظار المزيد

**:

الزين يقول...

دلولي

عسى ربي يحفظج ولا يحرمني من كلامج الحلو بعد قلبي

:**

صباح الطيب والعنبر

الزين يقول...

بنت الشامية

:)

فوق السحاب
ياااليت يا بنت الشامية

انا معلقة بالنص
اخاف انزل اتحسف
واخاف اطلع اتحسف

واقفه مكاني وناطره باص المواصلات
:)

تقهين محطتي اللي بركب منها الباص عدلة؟؟