.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

6.4.09

صندوق الحكايا ...... الحكاية السادسة


لا زالت .. رغم السنوات ...رغم الاعتياد ... تفتقده كثيرا عندما يسافر.... وكأنها تفطم من حضن لازالت في حاجة إليه ... هل نتألم عندما نفطم أول مره ... هل يكون الألم مشابه لما تشعر به الآن..


تجمع ما يحتاجه من حاجيات ... بعض الملابس ... بيجامته القطنية ... فهو يحب ملمسها وإحساسها على بشرته ..


"شمعنى هالبيجاما؟"


يفكر لوهلة


"تصدقين مادري ... يمكن لأنها تذكرني في بيجاما كنت أحبها وايد يوم صغير .. كنت لما البسها أنام أحلاها نومه .... تصدقين واحلم أحلام عجيبة ......وعلقت عليها لين قطتها أمي بالخش عشان لا ادري"


تبتسم وهي تمزح معه


"إنت خاطرك ترد تعيش طفولتك مره ثانية حبيبي "
" وانتوا تخلون احد يعيش طفولته .... "

تبتسم لتقول له

"اشوه على بالي بعد ... اللي عندي مكفيني مو ناقصني واحد زيادة"


تصمت قليلا ثم تبادره

"بجيت!! ... اقصد لما قطوها ... البيجاما ...... بجيت!!"

يضحك

"إيه آنا كنت دلوع بسرعة أبجي"
"اييييييييييو .... ترى ما يلوق"

ثم تلتقط زجاجة عطره ... تستنشق عبقها بتلذذ ... وتسأله


" تبي هذي لو أحط لك وحده ثانية ..."
" حطي لي هذي ... وآبي قرشة الطيب معاها بعد ... ولا تنسين البخور وعدة المبخر"

تلتفت له وقد تغير صوتها ... وتقرصه على زنده

"شعندك ... طيب وبخور وعطور .... تعااال ليكون بس"

يقهقه مشبعا غروره بغيرتها المباغته رغم الم القرصة

"آآي ... آآي حرام عليج ......."
يدلك موضع الألم بعد ان تتركه ناظرة له بكل تحدي
تغارين علي حبيبتي"


تنظر له وهي مدعية اللامبالاة ثم تكمل عملها

"لا ما أغار ... بس ما أحب احد ياخذ شي لي "
"تتحسفين تقولين انج تغارين"

تتجاهل سؤاله متجهة لعدة الحلاقه .... تجمعها بحقيبة صغيرة
وتتذكر كم تحب ذقنه النابت صباحا ... وملمسه الخشن ... وانعكاس ملمس وجنتيها مع بداية فكه القوي ...

تبعد المبخر من تحت ملابسه ... فقد تشبعوا بكل ذلك العبق الشرقي الذي يعشقه وتحرص هي على وجوده بملابسه دائما


تطوي الثياب ... لترصها بالحقيبة ... ليتني كنت مثلكم ... سهل أن اطوى واندس هناك .... ليرتديني ... ولا أفارق ملمسه .....


"حطيت أدويتك"
"ايه .... بس باقي دوا الضغط "
"اهم شي .... عيل إنت شنو حاط!!"

تتأكد أنها لم تنسى شيئا .... تعيد تقليب حوائجه ... كل شيء هناك ....


تلتفت فلا تجده هناك تنظر إليها .... تسحبها خلسة ... ترشها بالقليل من عطره ... تخبؤها بين ملابسها وهي تبتسم ....... تغلق الحقيبة

تهمس لنفسها وابتسامة رضا تضئ ملامحها

"كل شي جاهز"



يحضنها بكل حب ....


"بكلمج أول ما اوصل"
"اهم شي تكلم عيالك .. مالي خلق جعاوير تالي الليل أبي أبوي"

يضحك

"إن شاء الله ..... ديري بالج ... خليت لج كل أرقام التليفونات المهمة"
"اهم شي مال التكييف"
"كلهم موجودين ....نسلم عليكم"
"بحفظ الله " وهي تطبع قبله على كفه المصافح لكفها


يعم البيت هدوء قاتل ... هل كان صوته هو من يحييه .... وكأن الحياة قد افتقدت جزءا كبيرا من روحها ....


تعود لتجلس مع أطفالها


"يمه متى بيرد أبوي"


تخنقها عبراتها
هاااو ... أنا شفيني صح ما استحي على ويهي ... عيل اليهال شيسوون


يمر الوقت بكل تملل .... تنتظر مكالمته .... تتأكد ان اطفالها قد خلدوا للنوم ... عتمة البيت اعمق بغيابه ...

يبدو سريرها أوسع واكبر ... مكانه الخالي مؤلم ... تفتقد أحاديثه قبل النوم ... تطفئ النور ... وتغمض عينيها محاولة النوم .....


ويرن موبايلها


"حبيبي"
"نمتي"
"لأ ... انطرك تدق ... شلون كانت رحلتك"
"لا باس ... ترى أنا ما أحب السفر .... وايد احاتيكم"


تبتسم


"ادري فيك ... بس تسوي روحك قوي جدامي"




يسأل عن الصغار ... يتطمن على احوال الكل ثم يسألها



"احاجيج ... بيجامتي ما حطيتيها؟؟"



تقهقه بكل خبث



"بلا ... حطيت لك الشورت بس"
"هااا ... ليش بالله... ووين راحت البلوزة"



وينحني صوتها ليلامس قلبه بكل دلال



"عندي ...بحضني ... عشان اقدر أنام"



تتذكر مقولة أمها .... اخذي شي من ريحته وحطيه تحت مخدة عياله ... عشان لا يمرضون وينامون عدل لين سافر



تبتسم ... وتستنشق ما تناثر من عطره عليها ....تحتضنها لتستسلم للنوم أخيراً


هناك 36 تعليقًا:

Najmah يقول...

خانقتني العبرة
انا ماحب السفر
أتذكر قبل
كل ما ابوي يبي يسافر
أكتب له رسالة واخشها بين ملابسه
واذكر مرة عصبت
رحت بغرفته انخشيوت شقيت جواز السفر
عشان مايسافر
^_^

ترى قصصج قتلتني
:)

chandal/danchal!! يقول...

ولدي حاشه بوشنيتر لما زوجي راح ألمانيا مع عمته عشان تتعالج

وفلبينيتي طنقرت علي وزتتيتها المكتب

صج تعومست لما سافر... والله يا إنه نور عيوني


بعد مرة ثانية ما يروح الا وحاطة قحفية بكل ربعة بالبيت!!


الله لا يخليكم من ابوكم ويرد بالسلامة


مساء الشوق صديقتي السيبيرية

:)

Barrak يقول...

هي تستسلم للنوم
ونحن نقف مشدوهين لتلك الصوره

الجميل في صندوق الحكايا الحكايه السادسه بالتحديد
ان الحوار ممكن ان تتخيله ايام الغوص والسفر القديم ايام الوفاء والاخلاص والمحاوره بين الزوج وزوجته المتعطره بالاحترام بين الطرفان

وايضا ممكن ان تتخيل هذا الحوار في ايامنا هذه


اشكرك

احببت هذا المقطع
عندي ...بحضني ... عشان اقدر أنام

Kuwait يقول...

@@
وهاده ريلها ينام بالشورت بس :\
واااااخزياااااااااااه ;q

I7na 3shagnaha يقول...

مساء الرومانس اللي ما اعبر عليه

:)

كل ما افج صندوقج المبيت

احس اني

emotionless

o

hopeless case

:)

darkness يقول...

تطبق الدنيا لي تفارقنا
يبتعد كل الضجيج
شي غريب
عالم جديد
نفس الشوارع
نفس الوجود
بس بدون لا روح و لا طعم


تهقين ليش؟

DiLLi O MiLLi يقول...

*
*
*

أولا : شنو هالنحاسه ؟؟
البيجاما كانت تذكرة ببيجامته وهو صغير اللي كانت تخليه ينام خووش نومه ويحلم احلام جميلة .. الأخت تطخ البيجامه !! أشووله ؟؟!!
بالعون الريال ما نام ... عسى مو مسافر وايد؟ الله يساعده!!
وبعدين خلته طرق الشورت .. بالعون (ثانية) ياله ألتهاب رئوي!!
:)



ثانيا : شنو " جعاوير " ؟؟!! موو موجوده عندي بالقاموس الكويتي ؟؟!!



ثالثا : ما فهمت " وانعكاس ملمس وجنتيها مع بداية فكه القوي"؟؟!!
ميخالف صويحبتج ساعات تطلع غشيمه ....




:)

ميمة السبيت يقول...

والله الحين الرياييل يبون الفكة مايصدق متى يوصل المطار ..

قصة حلوة واحساس جميل

بانوراما يقول...

" تبي هذي لو أحط لك وحده ثانية ..."

لوووول عجبتني لو

SKY يقول...

هيهيهي انا وحدة كنت امرض لما يسافر ابوي

فامي كانت تخلي لي غترته عندي لما انام ;)





عجيبة القصة مثل كل مرة,,

SKY يقول...

هيهيهي انا وحدة كنت امرض لما يسافر ابوي

فامي كانت تخلي لي غترته عندي لما انام ;)





عجيبة القصة مثل كل مرة,,

كبرياء وردة يقول...

زيووون

يصير ادخل داخل الصندوق
وتقفلينه علي ؟

ReLaaaX يقول...

اهااااااااا عرفنا الغمنده!

ممكن يكون كلام الامهات صحيح لأن فعلاً وايد استمرضنا واحنا صغار خصوصا مع السفرات هذي !

`~MnO YeNSa! ~` يقول...

الله
يبختنا
كل يوم رساله من الصندوق
عساه عامر...
اسفر ياااااااااي
ينشلع قلبج ..
ويروح معاهم..

يالعيارة ..
ما خذيتي الا البجاما عــــاد
قايلتلج مجرمة من زمان p;

عندي تساؤلات
بس اكتشفت ان
دلي الغالية
قامت بالواجب و سألت يا حلوها

ممممممممممم
waitin for the answers ;p

I need more massages
كل يوم يصيـــــر؟
امووون صح p; ؟

بو محمد يقول...

ما إيي من الزين إلا اللي ازين من الزين
روعة و الله
إذا قلت لج إني عشت القصة كلمة كلمة و سطر سطر تصدقيني اختي؟؟؟ أحداثها اغلبها ماره علي
بكل اختصار، سافرت اكمل دراستي و محمد عمره 40 يوم، و يوم شفته كان عمره سنتين يايني يركض ويا اخته بالمطار

الله يرد كل غريب سالم غانم لاهله إن شاء الله

دمت و الأهل و الأحبة برعاية الله

الزين يقول...

نجمة

@@

ليش خانقتج العبره

ذكرتيني بخروفه الله يذكرها بالخير
على كل شي تبجي وتخنقها العبره

:))


شرايج ابطل اكتب
ترى تعبت كل يوم قصه

الزين يقول...

جندل

:$
ولدج وآمنا بالله من الله
بس فلبيمينج شهالنحاسه

الله يحفظه يارب ويديم عزه

ايه ايه

طشري القحافي
:)))))))

الله يخلي كل الأبهات قولي آمين
:q


صباح الوله بعدي انتي

:*

الزين يقول...

براك

:)

انت اللي مشكور للمتابعه يالشيخ

ولا خلا ولا عدم

الزين يقول...

كويت

:)))))))))))))


تصدقين لما كتبت القصه وربي خطرتي على بالي

وقلت الله يعيني على تعليق كويت النزغه

:*

يا حبي لج ولشطانتج ودمج العسل

الزين يقول...

احنا عشقناها

صباح الناس الطيبة

:**


اسم الله عليج
يمكن انا اللي عاطفية ورومانسيه بزياده

:)

وانتي اللي طبيعية

ترى كلش مو شي تكونين رومانسيه
اخذيها مني

الزين يقول...

داركنس

:*

خارج نطاق الموضوع

عشان الجواب بيكون بيني وبينج

:))

شلونج؟؟

الزين يقول...

ديللي

$

$

$


مو نحاسه
ترى تحبه بس اهي شويه شطانه منها

مدري شكثر مسافر
تبين اسألها

:))))))))))))))))))

وه وه وه

فالج البر ليش عاد تفاولين على بطل قصتي




جعور بفتح الواو
يجعور بكسر الواو
تجعورا بضم الواو

وجمعهم جعااااوير

قاموس الزين المفهرس
كيفي عااااد


واللي ما فهمتيه يعني اهو حاضنها وخدها يم حنجه

لازم نفسر يعني

@@

بس طلع اطول منها
:)))))))))))))))))))))))))


وترى بروحنا ياينا انذار ان بيشيلون بلوقنا

لا تتسببين علينا

:@

الزين يقول...

ميمة السبيت

@@

ما عندنا هالموديل
واذا انوجد يااااويله

;)

الزين يقول...

بانورما

@@

يازت لك

عندي زياده اذا تحب اطرش لك

:)

حياك الله يالشيخ

الزين يقول...

سكااااااي

يا حياتي انتي

:**

بعد قلبي ما تقصرين هذا من ذوقج

الزين يقول...

كبرياء

ههههههههههههههههههه


يصير يصير

هالكثر عاجبج!!

الزين يقول...

ريلاكس

:)


يالله تعلمتي شي يديد

شرايج فيني بس

:*

Najmah يقول...

لا لا لا بليييز
بس هالشهر بس
:))

الزين يقول...

منو ينسى


والأجوبه تلاقينهم بردي على ديللي

وتمونين اكيد

:*

الزين يقول...

بو محمد

ما تقصر ياخوي
اخجلتم تواضعنا

:)

الحمدالله اللي الله ردك لهم سالم غانم
ويعطيك طولة العمر وتفرح فيهم يارب

دمت بكل الخير والعافيه

Corpse Bride يقول...

الزين كله..

الله يرد ابوهم بالسلامه..

ويصبرها على حنتهم..

انا ما ادري شلون امي كانت اتحمل حنتنا متى يرد وليش طول ومخامط التلفون..

وعسى دوم كل يوم قصه..

:**

Kuwait يقول...

وانا اموووووت عليــج وعلى رومانسيتج بعد قلبي :***

Yin يقول...

بجيتيني وذكرتيني برحلات الحبيب
وكأنك تصفين ليلة سفره
ما أقدر أنام لين يدق
وإذا راح الحج مسجات طول الطريج
ولازم تكون ريحته موجودة بس على مخدته
مو شي اليهال داشين ولا أنا لامة فانيلته !!

الله يحفظ لكم أبوكم وأحبابك وكل من يعز عليك

حكاية من أحلى الحكابات ...

شكرا شكرا شكرا على هالحكاية الراقية وسردها الجميل

سعدت جدا بمروري من هنا
:)

الزين يقول...

كوربس برايد

:**

حياتي منو فينا ما ينن امه اذا سافر ابوه

كلنا ترى

الزين يقول...

كويت

بعد قلبي

اسم الله عليج

الله يحفظج يارب

:**

الزين يقول...

yin

وانا سعدت اكثر بمرورج

خصوصا انج من ريجة الغالية زوز

:*