.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

18.5.08

بعد الإنتخابات .... نحتاج كسرة موووووود



مواصفات الزوجة المثالية في عين الرجل الكويتي

أن تكون خفيفة الظل طبيعية مثل الأمريكيات
أن تكون مثيرة مثل الإيطاليات
أن تكون طويلة وممشوقة مثل العارضات البرازيليات
أن تكون أنيقة مثل الفرنسيات
أن تعرف أن ترقص مثل المصريات
أن تحازيه مثل الجاريات وتصير له شهرزاد كل ليلة
أن تعرف أن تتغنج مثل اللبنانيات
أن تعرف أن تنظم له الشعر وتتغزل بجماله مثل البدويات
أن تكون بيضاء مثل السوريات
طويلة الشعر مثل الهنديات
مدبرة للمنزل مثل الفليبينيات
وتترس له البيت عيال مثل الفلسطينيات بس هااا لازم يتم جسمها مثل ما اهو ما يتغير حتى لو تييب عشر
ولازم تربيهم وتدرسهم مثل المدرسات
أن تكون مطيعة مثل اليابانيات
وأن تكون كريمه معه مثل الأميرات
وان تكون موظفه ورايحه الحج توفيرا للمصاريف
وإذا فكر وتزوج عليها لازم تسكت لأن هذا حقه الشرعي والقصور منها مو منه
واذا ما صار لازم تموت قبله عشان يلحق يستانس عقب عينها
وإذا صاحب عليها لازم تسكت وتحارب وتجاهد عشان ترجعه لعشها الهانئ لأن أكيد اهو دور وناسته بره لأن اهي ما تعرف تنوسه
وأن تكون مؤمنة مثل الصحابيات
وقنوعه مثل حريم أول
وأخيرا وليس آخرا أن تطبخ له وتحن عليه وتداريه مثل أمه
وتتحمل نحاسة أهلة وجيادتهم مثل سندريلا
وأن تعشقه مثل ولادة
وتكون بريئة مثل ليلى والذيب
وهادية مثل الجميلة النائمة
ورقيقة مثل بوكاهانتس
ومضحية مثل ليتل ميرميد
ودلوعه مثل بيتي بوب
ومنظمة مثل النملة
ودؤوبه مثل النحلة
وجامحه ... أحيانا طبعا مو على طول مثل المهرة
وشفافة وترد الروح مثل قلاص الماي البارد
ليه ناداها قالت سم
ولين قعد يمها غنت له وحشتني
ولين غاب قالت ياناسين الحبايب ليه القسوة
ولين خان صاحت متى يوعى ضميره ويعرف اكو ابن آدم يحبها الحب الصدوقي
ولين هبدها قالت له نااااارك ولا جنة هلي
واذا بغى شي صارت له مارد المصباح يطلب يجاب وعندها له كل شي مباح




أنا قلبي نضى من البوست
شلون انتوا

مع الإعتذار للرجال الحقيقيين بس هذا واقع حاصل واللي بيحتد خل ينطر مواصفات الزوج المثالي بعيون البنت الكويتية

وعلى فكرة مو كل الرياييل هالشكل .. ولا كلهم مو هالشكل ولوما الشين ما عرفنا الزين ورجاءا لحد ياخذ الموضوع بحساسية ، لأن البوست مو بالضروة يعبر عن وجهة نظر صاحبة المدونة فلا أحد يسبني بليز

لسبب واحد ... هذا البوست مجرد .....................كسرة مود

:))

هناك 83 تعليقًا:

Najmah يقول...

واااااااااي
وتلوموني لما اقول الرياييل انانييين!

يالله زيووون
متى نفتح جمعيتنا ضد الرجل؟ :))

Salah يقول...

أنا أضم صوتي للأخت نجمة وأطالب بفتح جمعية ضد الرجال!

بس خلوني رئيس الجمعية! أوكي؟

SolaimaN يقول...

oooooooooooooooooooooooooooh

@@

zoza

ako chetheh ?

la la ,,, hathe over

bas ham abe w7da hanmona

la ba3ad 7lat'ha ytema ;)

5:20 يقول...

أنا كنت ابي نص اللي قلتية


بس بعد الزواج أكتشفت أني غبي وغبي كبير

لأني أكتشفت أني ما طلبت صفة مثل صفة أم أعيالي


لو عيد بي الزمن لطلبت صفاتها


صدقوني بعد سنة للصبور و 4 اشهر للجمبازي وبس

تزول هذي الصفات بالزوجة وتسقط اقنعه الجمال اللي كان يركض وراة الرجل ويبقي السنع



السنع السنع السنع يا شباب

السنع يخلي المرة مثل الشية تموت وهي واقفة

5:20 يقول...

الشية= الشيرة

الشيرة= الشجرة

7osen يقول...

هههههههه

والله خوووش بوست ضحكتيني

بس هالمواصفات مو موجودة في بنت مستحيل

بس وحدة

إللي يبيها يقولي انا ادليه عليها

هههههه

Q80 Blogger يقول...

بس هذي شروطه؟

يحليله .. وايد طيب

لايشوف شروطي بس !! .. حتى اسمها الاول شرط .. وجنه اذكر قايل اسمها الثاني حق الوالده

Om MoD يقول...

رياييل هالوقت .صاجة يوخيتي ما يعجبهم العجب ..نادر ما تلقين واحد سنع ..بس ما ألومهم مو منهم من الوقت اللي عايشين فيه الله يهديهم حق أنفسهم وحق هالبنات اللي قاعدين :)
..

تقبلي مروري :)

5roofa يقول...

يااااااااااااربي

عسااني ما تزوجت و عساني ما حصلت ريل و عساني قعدت بروحيي اربي قطاوة و اخرع عيال الفريج

انسحنت لووووول

بط جبدي وين هالريال خل اكتب في قصه
p:

mersii 3ala el kasra el 3asal

salamz sis..

Super Woman يقول...

والله عاد البنت السنعه اهي اللي تبقى ويبقى سنعها

ولا الاميره النائمه شكوو ؟
وقلاص الماي شكو ؟؟

بعدين الريال مو حلو وايد يتشرط


عاد تصدقين الزينه
اكثر الرياييل اللي يتشرطون الله يرزقهم ببنات يمكن ما تنطبق عليهم الشروط
واهما اللي يبقون معاهم


اما اللي يتشرط خسران خسسسسسسسران
شروط سخيفه !! مالها داعي يعني

وبعدين الله خلقنا جذي يبونا على عينا وراسنا ما يبونا نقعد ببيوت اهلنا معززين مكرمين مدلعين احسن من لا ياخذنا واحد يحسر فينا الله لا يقوله


الله يرزقنا رياييل الحلال القنوعين والبسيطين والسهلين


ترا انا مو ضد الرجل بس ما احب اللي يتشرط وايد


ناطره البوست الياي على احر من جمر

mtfa2el يقول...

جنج تقولين المواصفات اللي ببالي
انا زايد بعد شوي بس اللي كتبتيهم كافين ..المشكلة اني قنوع

فريج سعود يقول...

انا راضي بالي بالصورة وبس
قنوع مو ؟

قلب طفله يقول...

شنو هالشرووووط و الانانيه
اللي متمكنه من كامل الاوصاف الكويتي :@

اتصدقين عاد ما يلقون مثل بنات الكويت و سنعهم لو يفرون القارات الست مشي مع تحفظي على البعض من الجنسين :P

تسلمين و الله على كسرة المود الحلوه ^_^

دمتي بحب

غير معرف يقول...

:))

شفيهم القصار

..

حلات البنيه قصيره

ضيفيها على القائمه


..

ولازم يكون عندها مشاعر مثل اللي عندج

:))








مناف

MKSARAT - SAYED SAAD يقول...

هاية البوست جنبتك هجوم شرس
لياقة جميله اعجبتنى
دمتى بكل ود
صديقك
صاحب المكسرات

الزين يقول...

نجمة

:)

حرام ترى مو كلهم انانيين
والقاعدة هذي تنطبق على الجنسين
اذا بنفتح جمعية نفتحها ضد السطحية بالتفكير بالنسبة للجنسين

ولا تنسين ان الرجل هو الأب والأخ والصديق وممكن يكون الحبيب ورفيق الدرب والزوج المخلص

تفائلي

ترى مو كل الرياييل يتشابهون

:**

الزين يقول...

صلاح

يمه منك تبي تلعب على الحبلين

شوي مع ابناء جنسك وشوي معانا
نخليك رئيس الجمعية

بس هاااا حط في بالك العضوات ماراح يكونون هينات

ولا شرايج نجمة

بنتحد كلنا
والله يعينك

الزين يقول...

سليمان

والله مادري انت قول لي اكو لو لأ؟؟

اوكي سجل اسمك وبنشوف شنو نقدر نسوي لك

او تدري شلون
انطر ليلة القدر وسجل طلبية

جوووووود الله ورحمته

:))

حياك الله

اما انتوا يالرياييل حالتكم كسيفه

الزين يقول...

5:20

بس شوف الله عطاك على قد نياتك

والطيبون للطيبات
تحمد ربك وتشركه ما طحت بوحده من فوق هالله هالله ومن تحت ..... ايه
يعلم الله

عفية عليك
السنع ثم السنع ثم السنع

وخلنا نقول مثل ما قالوا امهاتنا
ليه بغيت تضمها اسأل عن امها

بس

عفية عليك
ليتك بس تعلمهم

الزين يقول...

حسين

:)

حسييييييييين عندك منها
@@

دلني عليها بليز
بزوج واحد في بالي

وميته احصل له مثلها

اهم شي تصورتك وانت ميت ضحك
وضحكت معاك

الزين يقول...

Q8i Blogger

@@

اسمها الأولي والثاني

يااااااويل من تنقى
آخر شي ياكلها فشقي

حسافه عليك
مايناسبك الفشقي

:)))

5:20 يقول...

الزين عاد انا ما اامن بسالفة اسال عن امها

اوكي اسال ولكن مو شي اساسي اعرف وايد بنات زينين وامهاتهم فمان الله

والعكس صحيح اعرف ام خرجت اجيال ايام ماكانت مدرسة وربت طالباتها والسنع يقطر منها

وبنتها الله يستر عليها

Purplecious يقول...

لووووووووووووول

خوش بوست

أوحى لي بفكرة

بروح اكتب بوست

:***

فتى الجبل يقول...

تزوجت وخلصت

Najmah يقول...

ممممممم
عالأقل غالبيتهم
يعني مو شرط لي هالدرجة
بس فيهم شوي انانية
يعني حتى لما يحبون
حبهم تحسين أناني :P

لو مثلا اهوا طالع طول اليوم ومرته
قاعده بالبيت بروحهاا ولما اهيا بتطلع يقول لهاانا بقعد قعدي معاي ^_^


وصح كلامج ان من الجنسين
وفي رياييل يكسرون الخاطر
بس ندافع عنهم بالبوست القادم :P


..
لوووول
اناا موااافقه اكيد محنا هينات :))

Nora يقول...

LOL
:D

واللي يقول لج ما يبي عندها حوض
@@

لي اليوم افكر فيه ! كلش مو دارس احياء هههههه
.
.


كل من تشرط تغربل بذيج العينة اللي ما تسر لا خاطر و لا خطار !

فا خل يستريح .. و يشوووف جلحته و ملحته .. و يتذكر حور العين و يطلب الله الجنة ..


و شكرااااااااااا
ضحكت ضحك مواصفاتج قتالة بالصميم
:*

Lip Service يقول...

ابيها عبيطة و خبلة بيني وبينها ..بس جدام عيالها و جدام الناس ست الستات ...والله يستر علينا ونتزوج

Blog 3amty يقول...

والله مساكين الرياييل، ما نبي شي !

نتفه قحفية مغسولة، واذا في عيش بالثلاجة بايت صخنيه !


والله مساكين أحنا، بعد ما قريت هالبوست حسين أن أحنا وايد مظاليم، خنت حيلي !!

Q8 chili

qesat_5ayal يقول...

إي كسرة مود عدلة


العيب بشروط الرجال
ولا بنقص كفاءة النساء

فيهم الخير
:P


عندي امتحان
مو مركزة عدل

شكرا لخفة هذا البوست
شكرا لصاحبته

the.thinker يقول...

ههههههههههههههه والله بوست روووووعه تسلم ايدج يالزين ، أحس الكلام من صميم القلب :)


عندي اقتراح : انشري بقروبات الايميلز :)


ويعطيج ألف ألف عافية على هالبوست الحلو .

صبا يقول...

أمبي زيووون

عيل محنا معرسين ؟؟؟

عيل كل هالمواصفات وآخر شي يهبدها !!!

لا ماعليج اذا خليت خربت والله في وايد منهم روعه وعيال حلال والحنان ما عرفناه وحسينه فيه الا من الريال
الله يا حلو دفاهم وطيبت قلوبهم واحنا من غيرهم ما نسوي كافي دلعهم لنا
ودلعنا عليهم
وبناتنا احلي منهم مافي سنع وسنع وسنع وتشيله شيل بالمواقف الصعبه
وتداريه وتدلعه واذا زعلها تراضي
الله الله الله البوست وايد حلو
يدلدغ !!اشلون ما أدري ؛)

غير معرف يقول...

Hi Zozotz

laish hal eftera 3alaina

who doesnot want a perfect partner :)

regards

Bu Khalid

Lavender يقول...

هاهاهاهاهاهاهاهاها

فعلاً كسرة موووووووووود قوية

و فعلاً رياييــــل هالوقت مايعجبهم العجب

المشكلة أنهم يتشرطوون ومايشوفوون روحهم !!

يمكن بالغتي شوي بس في وايد من اللي قلتيه صح 100%

و عليا علينا والله شنبدي عليه ..

لي تغنجنا .. اندقرنا

و لي رقصنا .. اندقرنا

و لي صرنا طبيعيين ...اندقرنا

و لي تأنقنا ... هم اندقرنا


إرضاء الرجل غاية لاتدرك

charisma يقول...

لووووووووووووووووووووووووول

شوفى كل الرياييل الى يتشرطوون جذى

ياخذوون العكس تمااماا سألينى اعرف وايد حالالالات تشرط لمااا شبع وبالنهايه تنصعقييين بالى ياخذها
:))

نصيب ياختى نصييب

sologa-bologa يقول...

وناسة خوش مواصفات
ابيها كلها ما عدا

انها تكون مؤمنة مثل الصحابيات
ولا اتييب عيال مثل الفلسطينيات
ولا ترقص مثل المصريات

لا باخذ البوست بحساسية
كيفي
:)

ودمتم بحب وود
على طريقة الكويتيات
;p

Mamloo7a Q8ia يقول...

اي والله نحتاج كسرة موووود
هههههه
الاخ طالب سياره مو زوجه
حتى الزوجه بمواصفات
لا واللي يحرج عقب هالطلبات
ياخذ وحده مافيها ولا وصف من هالمواصفات ويصير لها عبود

انا بنضم ويا جمعية نجمه اذا ممكن

غير معرف يقول...

لا

مثل الهنديات مو ان شعرها طويل

مثل الهنديات ان شعرها يطيح بالأكل!

مادري ليش الهنود يتخصصون بسوالف الشعر بالأكل، حتى بالكافيهات والمطاعم!!

و اهم شي دؤوبه

hamssah يقول...

صديقتي زين
ايه الكلام الجامد ده انتي هايله والله
اسلوبك رائع ولطيف وساخر ولذيذ
وطبعا فيه شويه كلمات وقعت مني لاختلاف اللغه تعبت اوي لما عرفت ان الريايل يعني الرجال بس اديني بتعلم منك يا قمر
متابعه انشاء الله
همسه

غير معرف يقول...

aham shy bl mwthoo3 raqeqa methel pocahontes:P hathe yazt leee

ana ana ana:P

Kuw Son يقول...

أن تكون موظفة مافيها شي !! و هم إذا رايحة الحج زين على زين !! مو توفيرا للمصاريف .. بس العبالة اللي في الحج لا أكثر و لا أقل ..

أهم شي بيتي بوب !! الله يخلي بنتي اللي خلتني أشوف بارني و أحفظ أغانيه معاها :)

و ماكو حساسية بالعكس .. بس نحن بانتظار مواصفات الرجل بعيون ست الكل الكويتية !

الزين يقول...

Om MoD

ياهلا ومرحبا فيج يالشيخه وساعة المباركة

وعلى فكره مو كل الرياييل هالشكل وانا قلتها بالبوست

حرام في منهم اللي يستاهل ووعيه وتفكيره احسن من جذيه

سعيده بزيارتج

الزين يقول...

خروفة

اسم الله عليج شهالفال من الصبح
ليش يا ماما جذيه

مو كلهم والله مو كلهم

وبعدين ليكون على بالج البنات اهم اللي كاملين مكملين

اللي قلته بالبوست مو قاعدة
انا قاعده اتكلم عن شريحه معينه

ونطري لما تقرين مواصفات الزوج المثالي بعيون البنت الكويتية

بتتبرين من كل البنات

وانا ادري الكل بيشب علي

:)

الله يستر

الزين يقول...

شلالات

:) صج لسانج يبقى السنع بالنهاية

امي تقول مثل بس ما ينقال هنيه على سالفة التشرط والتنقي

واكثر اللي يتشرطون يقصون آخر شي بشروطهم

اقول شلالات عندي سؤال صغيرون لو سمحتي

انتي عصبية؟؟

لأن شكلج نار

تذكريني بنفسي قبل سنتين ثلاث

:)

مو معناته اني مو عصبية الحين
لازلت للأسف

بس الأمور صارت ابسط وشرارتي ما تولع بسرعة مثل قبل

:**

ياحبي لج

احسج سيده وما تلاعبين

زيارتج دائما تسعدني
وانا اهد تعليقك واسولف معاج

@@

لاحظتني!!

الزين يقول...

متفائل

والله يا بو التفائل انا أعرف اللي في بالك بالضبط

:)))

وأدري فيك تقول حق القناعه قومي وانا اقعد مكانج

الزين يقول...

فريج سعود

افا عليك
اسوي لك نسخة من الصورة وادزها لك

وانا اقدر اقول حق اخوي فريج لأ

بس والله لك وحشه

:)

الحين عاد مالك عذر تغيب
انتخابات وخلصنا

الزين يقول...

قلب طفلة

صبري
بهالبوست اهو تشرط
بالبوست الياي احنا راح نتشرط

او بالأحرى البنت راح تتشرط

تهقين بتصير احسن منهم؟

الزين يقول...

غير معرف

ما فيهم شي القصار
:)

حلاتها قصيرة
وخفيفة مثل الميدالية

مشاعر مثل اللي عندي ......

همممممممم

اللي مثلي وايد

بس الواحد يفتح عيونه زين وبيلقى


وبعدين تعال شهالغيبة
كلش مختفي مالك بيان؟؟؟

الزين يقول...

صاحب المكسرات

(هاية) ما بنقولهاش احنا الكويته
احنا نقول هذي

:)))

وحشتنا ياراجل اخبارك ايه؟

وزيارتك النهاردة اسعدتني جدا

سلام يا صاحبي

الزين يقول...

Purplecious

ههههههه

اهم شي ان بوستي الهمج تكتبين بوست عندج

يامال العافية يا برليووووش

:**

الزين يقول...

فتي الجبل

انت اصلا بره الحسبه
من غير كلام

:)

الزين يقول...

نجمتي

هههههه كللللللللش محنا هينات

نجمة

وبعدين تعالي اصابع ايدج مي وحدة

فتفائلي

:**

الزين يقول...

احلا انجنير

مايبي عندها حوض!!!!

@@

ليش حسيت انها مغسلة ويبي شكل الحوض يناسب عزج الله الحمام

استغفر الله
هذا يبي له شوته لين الباب

ليكون بس اهو موت
افففف

استغفر الله انا هالنوعية تلوع جبدي

اهم شي انج ضحكتي

اهي في الصميم في الصميم

بس والله الشباب روحهم رياضيه وعجبهم الموضوع

الله يستر من البنات في البوست الياي

:$

الزين يقول...

باسجيل

@@

طلباتك غريبه

الله يعينك عيل

الزين يقول...

Q8 Chili

بس هذي طلباتك

انت صج مسكين

كسرت خاطري

:)

حياك الله

الزين يقول...

قصة خيال

ربي يوفقج يارب

الله يعينج جو الإمتحانات متعب

شكرا لهالطلة الحلوة حبيبتي

وفقدتج وايد

:**

الزين يقول...

the.thinker

يعافيك ويطول لي عمرك

واقتراحك راح نطرحه على مجلس الإدارة المكون من صلاح ونجمه ومملوحة كويتية وطبعا الزين

وراح نسوي دراسة جدوي وجمعية عمومية وهالخرابيط كلها

واذا وصلنا حق قرار

ابلغك

:)))

وسااااعة المباركه

الزين يقول...

صبا

هههههههههههه

بلا بلا بنعرس
اكو احد حاصل لها بنات حلوين مثلنا ويقول لأ

ومثل ما قلتي لو خليت خربت

اهم شي ان البوست دلدغج
هههه

:**

الزين يقول...

بو خالد

:))))

تهقا افتراء

كلنا نبي الآخر يكون بمواصفات معينه

بس هل ممكن نحصل كل هالمواصفات؟؟

وما تقدر تنكر ان ساعات يكون عندنا شروط تعجيزية وانا اقصد من الطرفين

واشوف صرنا نعلق على كل بوست

:))

الزين يقول...
أزال المؤلف هذا التعليق.
الزين يقول...

lavender

:)

وهم ارضاء المرأة غاية لا تدرك
ومثل ما في رياييل يتشرطون في حريم اشروطه العن

بس جنه الرياييل اكثر

اعتقد لأن احنا نعيش بمجتمع ذكوري
والقرار بالنهاية للرجل

اهو يشوف ويقول ايه عجبتني وكاملة المواصفات

او ما ابيها غير مطابقة للشروط
بس هذا واقعنا

يعين الله يالشيخه

الزين يقول...

كاريزمااااا

اكيد كله نصيب

ربي يكبر حظج وحظ كل البنات
ويفكنا من هالأشكال اللي تتشرط

ما نبيهم

ويازين هالضحكة
:**

الزين يقول...

سلوقا بلوقا

يه يه يه

منين طالع
خلصت الإنتخابات هااا

اذ تحسست من البوست اخذ لك حبة زيرتك
نص ساعه وتصير زين

:))

ودمت بكل الحب والود على طريقتنا احنا المدونات

الزين يقول...

مملوحه

تعالي اول بلمج من زمان عنج

:**

والجمعية تحت امرج وخلاص بنسويها
لاحظي بس رئيس مجلس الإدارة ريال في جمعية ضد الرجال

:))

شكلي بسوي اعلان عن الجمعية وبشوف منو بينظم لنا

:)))

الله يستر

الزين يقول...

غير معرف

وييييييييييييع
ويع
ويع

بس بس الله يخليك لوعت جبدي

بنشيل شعر الهنديات هونا

شفيها بعد الدؤوبه شطايح فيها؟؟

!@#$%

الزين يقول...

همسة

صديقتي الرقيقه همسة متابعتك لي تعني لي الكثير رغم اني اكتب احيانا بالعامي
وانا عارفه ان صعب عليك تفهمي بعض الكلمات

على العموم اذا احتجتي اي ترجمه او تفسير

انا مستعده ورهن اشارتك

:)

الزين يقول...

غير معرف

انتي بكبرج بوكاهانتس
:**

بس الرياييل عميان مالت عليهم اقول

:))

الزين يقول...

كويت سن

:)

الله يخلي لك هالبنوته الحلوة ترى الأطفال هم ملح الحياة

ويبلغك فيها يارب ويجلعها من الذرية الصالحه

ومواصفات وشروط ست الكل الكويتيه عن قريب راح تعرفها ان شاء الله

تحياتي حق البنوته الصغيرونه
ودلعها حد ما تقدر

:)

مصعب يقول...

اي
شنو المشكلة
انا ودي احصل وحدة جذي مو عيب
بس ادري ان مافيكم وحدة نص هالشي
عشان جذي راح اقنع باللي راح ايي
الله كريم
ومدونتج حلوة وهذه اول زيارة لي وماراح تكون الاخيرة
تحياتي يا الزين (هـ) :)

Super Woman يقول...

لوووووووووول الزينه


شوفي انا مو عصبيه عصبيه
يعني ما اعصب على ي شي وبسرعه


بس ان حصل وعصبت او احتريت
ما اتحاجى كلش

وفي امور بسرعه اعصب عليها


اعصب بس ما اصارخ لوول

يمكن بالتعليق الاول شوي اشتطيت !! عاد انتي طوفي عادي


يا حلوج ويا حلو سويلفاتج

J Daily يقول...

عاد عن الحرشة

والبنات الكويتيات يبون
ثري مثل الوليد بن طلال
وجميل مثل براد بت
ومطيع نفس الجـ..... (-;
و
و
و
اترك الباجي لكم يامعشر الرجال ×:

5roofa يقول...

لوووووووووووووول

لالا والله انا من كثر ما اسمع طلبات المدرسات الصراحة قمت اتوقع الغير متوقع من الصوبين

:)

still nice post lol

salamz sis...

باغي الشهادة يقول...

راضي بربع هذه المواصفات وعساني أحصل

:-(


ونبرتك بالمقال بين التحرش بالرجال :-) وبين تسخّط من الحال :-(

الزين يقول...

صالح للشعر

سوري على التأخير بالرد
بس صدقني انا عمري ما أهمل أي تعليق

تواصلكم معاي يهمني كثير

نرجع لتعليقك

كل الرياييل يبون جذيه وآخر شي ما ياخذون جذيه ولا حتى ربع جذيه بس هذا مو معناته إن ماكو جذيه

بس اهم نصيبهم كلش مو صوب اللي جذيه

جني قلت جذي وايد صح
:)

ومشكور وعيونك الحلوة
وفعلا راح اكون سعيدة بزياراتك

الزين يقول...

شلالات

طاااااف من قلب افا عليج

وسويلفاتج احلى والدليل اني اخلي كل شي واطقها سالفة معاج

:**

الزين يقول...

يعقوبووو

الطيبون للطيبات يالشيخ
وكل من يعطيه على قد نيته

شلونك انت بس
من زمان عنك

:)

الزين يقول...

خروفه

:)

الزين يقول...

باغي شهادة

تحصل إن شاء الله باذن الله

وكله نصيب ياخو فاظفر بذات الدين
لو آنا غلطانة؟

:)

ايه ايه تحرش وسخط

البنات حالتهم كسيفه وناوين يسوون جمعية مناصرة المرأة ضد الرجل

اذا تحب تنظم

صلاح راح يكون الرئيس ونجمة نائبة الرئيس ومملوحه وآنا أعضاء

شقلت؟؟؟

Manal يقول...

الجمعية تأسست

انا اسستها

مقرها انجلترا

منو يبي ينضم لها

:)

الزين انا عقبت على آخر بوست

:)

magnoonah يقول...

الي انا مقتنعه فيه انه عمر الشكل ما كان له دور اساسي


القلب والحب والراحه الي نحس فيها هي الي توصلنا لمرحلة العش والجنون


من جذي الي يقولج هالحجي خليه يروح يبلط البحر

ما عندنا ناس تتشرط وهذا الموجود

:)

البمبره يقول...

زيييييييييييييون
صح لسانك
تكفين دزيها لفؤاد الهاشم
لأن باط كبدي بس يتطنز على المرأة الكويتية
وطايحله غزل بدينا ونانسي عجرم
يلا فقعيلي مرارته شوي

غير معرف يقول...

يبوون بنت فل اووبـشنز ؟!
تكفــوون عآد, هالتمـآسيح (الرجآل) صرعونآ بطلبــآتهمـ عآد الله وجمـآلهم اليووسفي (>_>)
وبعدين مآ فيهـآ شي الرجل يطلب بنت جميله خلووقه و محترمه, بس يحط شوية لمـت , لآن هآذي حور عين الصرآحـه مو آدميه.
وآولآ وأخيــرآ الجمـآل الخآرجي عبآره عن بروآز , مآ يعكس اللي دآخله , والجمـآل مع الوقت يزول - تقدم العمر وانجـآب الاطفآل حوآدث لآ قدر الله وغيرهـآ - أمــآ جمآل الآخـلآق والنفسيه الرآقيـه والمعآمله الحسنه هي اللي رآح تدووم , وهالتمــآسيح يطلبون المهم وينسون الأهـم (>_<)
يآخي ربي خلقهـآ كذآ,وش تبيهـآ تسوي يعني بلآ فـ شكلك انت ويـآه , تآخذ ريموت كنترول مثلآ وتغير في شكلهـآ ؟!! ( الذي خلقك فسـوآل فعدلك . في أي صوره مآ شـآء ركبك )
ياللي تتشرط جعل ربي يرزقـك بشبيهة كوندآليـزآ رآيس عشآن تعرف ان الله حق, يوم انك تحقر بنـآت الخليج يآ مـآل الحصـآ اللي تفضخ رآسـك بلآ =@

همسـة-خجـل Qtr يقول...

يبۈۈن بنت فل اۈۈبـشنز ؟!
تڪفــۈۈن عآد, هالتمـآسيح (الرجآل) صرعۈنآ بطلبــآتهمـ عآد الله ۈجمـآلهم اليۈۈسفي (>_>)
ۈبعدين مآ فيهـآ شي الرجل يطلب بنت جميله خلۈۈقه ۈ محترمه, بس يحط شۈية لمـت , لآن هآذي حۈر عين الصرآحـه مۈ آدميه.
ۈآۈلآ ۈأخيــرآ الجمـآل الخآرجي عبآره عن برۈآز , مآ يعڪس اللي دآخله , ۈالجمـآل مع الۈقت يزۈل - تقدم العمر ۈانجـآب الاطفآل حۈآدث لآ قدر الله ۈغيرهـآ - أمــآ جمآل الآخـلآق ۈالنفسيه الرآقيـه ۈالمعآمله الحسنه هي اللي رآح تدۈۈم , ۈهالتمــآسيح يطلبۈن المهم ۈينسۈن الأهـم (>__<)
يآخي ربي خلقهـآ ڪذآ,ۈش تبيهـآ تسۈي يعني بلآ فـ شڪلڪ انت ۈيـآه , تآخذ ريمۈت ڪنترۈل مثلآ ۈتغير في شڪلهـآ ؟!! ( الذي خلقڪ فسـۈآل فعدلڪ . في أي صۈره مآ شـآء رڪبڪ )
ياللي تتشرط جعل ربي يرزقـڪ بشبيهة ڪۈندآليـزآ رآيس عشآن تعرف ان الله حق, يۈم انڪ تحقر بنـآت الخليج يآ مـآل الحصـآ اللي تفضخ رآسـڪ بلآ =@

الزين يقول...

همسة خجل

:))))

انتي صج محترة ومنبطه جبدج

عجبتيني بتعليقج

اتمنى اشوفج دوم عندي

وحياج الله بعد قلبي

:*