.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

8.8.10

انتم والقوة الخارقه

لما كتبت البوست اللي فات ماكنت متوقعه اني اشترك مع كل اللي علقوا بنفس الرغبه ... ان يكون عندي قوى خارقه ممكن تخدمني في مواقف معينه

اختياري لطاقية الأخفا كان وراه اسباب كثيره ... ولكن اقواها اني ابي انحاش من حاله معينه ... وعندي رغبه شديده بممارسة حياتي مثل ما احب ولكن بعزله عن الكل
ساعات مسئولياتنا الكثيرة والتزاماتنا تجاه الآخرين واللي يشاركونا جزء من حياتنا تشكل علينا عبئ
انا عن نفسي ودي اوقف كل شي لمدة يوم ... اتمتع فيه بالهدوء ... وبعيدا عن التفكير والتخطيط والتحليل والتمحيص .... وتوابعهم

اخذ نفس .... واغمض عيوني
ارتاح
بعدين ارجع اكمل

خلونا نشوف انتوا شنو قلتوا وشنو كانت رغباتكم ... وشنو تفسيري لهالرغبات .... وطبعا هالتفسير ممكن يحتمل الخطأ قبل الصواب ... فسامحوني مقدما وتحملوني

بوك مارك .. سريعة وتسابق الخيل ... ما تبي شي يسبقها ولا شي يفوتها ... تحب الإنجازات السريع وما تحب تأجل امورها ولا تترك امور ثانية عالقه ... رغبتها بالسرعة لأنها حاسه ان اليوم مو كافي ... وان عندها شغلات كثيرة تبي تخلصها ومو ملحقة ... واختارت الخيل لأن يمثل لها القوة ... السمو ... والجمال

سيما .. تبي تسمع اللي يدور ببال الناس ... عندها الإحساس ان في شغلات وايد ما تعرفها عن اللي حولها ... وتبي تعرف اكثر .. يمكن لرغبتها بالتقرب ... او للحذر من ناس تحاول تثق فيهم ... ويمكن عشان تحس بالأمان مع الناس اللي تدري انهم امانها .. وتبي تصدق نظرتها فيهم .... ويمكن عشان تعرف غيرها شلون يفكر وتقارن بين تفكيرهم وتفكيرها

امواج .... تبي تنسى ... مجروحه يا امواج .... ومنو فينا من غير جرح .... امواج ما تحتاجين قوة خارقه .... بيدج تنسين ... وبيدج تعيدين الذكرى وتجترين الألم

ارت فل ... تبي تكون السيد المطاع ... ما تبي نقاش ... تبي طلباتك مجابه ... قولي ارت فل .. تعاني من مشكلة ان اللي حولك مو دايما يسمعونك !!
برأي وممكن يكون غلط وادري انك ماراح تزعل ... انت تشوف نفسك على صواب في اغلب الأحيان ... والنقاش والجدال مامنه فايدة لأنك متمسك برايك ... وبالنهاية اللي في بالك بيصير ؟؟ عشان جذي تبي تطاع من غير تعب

سامي يا سامي .... صح احنا لابسينها ... بس هني ...مو هناك .... ويمكن لبسانها هني كنوع من الهروب من هناك ... عشان نقول اللي في بالنا من غير تحفظ

واي مي ... سلامج وصل ومشكوره ... بس كنت اتمنى اعرف شنو اللي في بالج

الحياة حلم ... شوفي المفارقة .... ناس تبي تنسى وناس تبي تتذكر ... انتي تحبين تحتفظين بكل شي يمر عليج ... تبين تاخذين له صورة ثابته في بالج ما تتغير ... وتبين تعرفين اكثر ... تحبين الأساسات الثابته ... والمعارف المتعددة ... والعمق بكل شي ...

ريماس ... تبي تمشي وتطق اللي بالشارع ....ضحكتني يالشيخ ... هذي ما يبي لها قوة خارقه ... هذي يبي لها تربية ووازع ديني ... وقانون يحترم
وايد انت شايل هم التدني بالآخلاق اللي حولك .. وودك الأمور تتغير ... وبرايك انها تحتاج شويه قوة .. وحزم عشان يصير اللي تبيه

نيكون تبين تحلقين على كل الأماكن اللي تسعد قلبج ... ما تحبين الروتين ... وتبحثين عن الجمال بكل شي ... والعمق بكل مكان ... تحبين تتفكيرين ... تتأملين .... وتخلقين عالم ثاني ... برأيج انتي اهو العالم المثالي ... ومع هذا واقعج دايما يشدك لنفس المكان ... وسؤال واحد يشغلج .... شلون!!

حسين ... تبي تكون علاء الدين ... مع بساطه ... تبي تطير ببساطه من غير تجهيزات ... تبي تعيش الحلم  ... واخترت هالبساط لأنك تبي تاخذ كل تفاصيل حياتك معاك .... ما تبي يتغير شي ... تبي تغير احساسك بس ... وتبي تشوف عالم يديد .. بس تبي تشوفه من بعيد ... ورغم انك تدور التغيير ... الا ان مو دايما سهل عليك انك تغير

ديما ... جناحان دون زخرفه ... حتى رغبتج فيها تواضع وعمق .... تحبين تخلقين الشي من الصفر ... اهم شي اساساته تكون قوية ... عشان اداءه يرضيج ... الشكل مو مهم ... المبدأ هو الأهم .... ما تحبين التكلف بكل شي ... ولا الألوان الزايده ... انتي بقمة البساطه وقمة العمق لدرجة انج من كثر ما انتي بسيطه ساعات تتهمين بالتعقيد

بصيص .... سوبرمان .... انتي طماع :)
تبي تجمع كل القوى مع بعض ... ما تبي ثغرة ... ولا تقصير من اي ناحية ... تبي تملك زمام الأمور بقوة وما تتقبل اي هفوات .... نيتك صافية .... ويمكن تبي تصلح كل شي ... ومو بيدك ... بس بيد سوبرمان
وعلى الهامش ... سوبرمان شخصية خارقة من صنع امريكي .... تهقا انت متأمرك!

ريم ... امبيه ترى تفسيري يضحك ... بس طلبج يضحك اكثر ... تبين عصاية تنظفين فيها العالم وتغسلينه ...
عندج مشكله مع الخدم !!
واعتقد انج مهووسه بالنظافه والترتيب
وتبين تطيرين .... يعني تبين تتحررين من قيود حاسه انها تحد من حريتج 


ميمه ... في ناس انتي ندمانه انج سمحتي لهم يدخلون حياتج .. وتبين تلغين وجودهم ... بس في شي مخليج متحملة هالوجود ... تبين نصيحتي ... كشيهم يا ميمه ... كشيهم .. ولا تجاملين على حساب مشاعرج ولا راحتج ... لأنج بالنهاية راح توصلين مرحلة الإنفجار ... وراح تخربين كل شي

اجار الدين ... كل من له شقا اللي له ... الله يعافي عمليات التجميل ...

ماله داعي .... الله يديم نعمة السعاده عليج ... انتي تحبين حياتج ...وايد ومرتاحه وما تبينها تتغير

الكويت ... مادري ترجمتي لاسمك صح لو لآ ... ارجع لردي لبصيص ... بالإضافه انك تبي عيونك تطلع ليزر ... تحتاج تكون نظرتك ثاقبه ولها تأثير على الغير.... وساعات تحس انك معزول وما بيدك سلاح تدافع فيه عن نفسك ... عشان جذي تبي عيون سوبرمان ..ووصفتها كسلاح تدافع فيه عن نفسك

الليوان .. احساسج ان الوقت مافيه بركه قال كل شي .... مشاغلج ما تخلص ... وتبين 24 ساعة فوق 24 ساعة عشان تقضين التزاماتج ..ويعين الله يالشيخه

بنت الشامية .... تبين قوة خارقة .... بس تبين شي ثابت ... وفوقه تبين مرضاة الله فيها .... انتي ما تؤمنين بالأساطير والخرافات .. ولا بأبطال القصص المحدثه .... ايمانج الراسخ خلاج ترجعين للقرآن ... وتستشفين منه القوة الخارقة اللي ممكن تساعدج بتسهيل حياتج... ومنها عصاة موسى

انتونيو .... شلون يعني تبي تكون آلة الزمن!!
تبي ترجع بالزمن لو تبي تجدم !!

ولد الكويت ... لا تعتذر يا خالد ... انت تدري ان مدونتي هي مدونتك ... ولك الحق انك تعلق بالصورة اللي تريحك ... وبالنسبه للقوة اللي اخترتها ... ارجع لردي على سيما لأنكم اخترتوا نفس القوة ... حياك الله وسعيدة جدا بعودتك

انجنير أ ... انتي صج طماعة .... وتبين العالم المثالي اللي ممكن يتحقق بامتلاكج لكل القوة الخارقه

هيثم الشيشاني .... منو عندك مريض يا هيثم !!

القوة اللي تمنيتها تدل على طبيعة طيبه وكرم وحب للغير ورغبة بمساعدة الناس ... عسى ربي يرزقج اللي في بالك ان شاء الله



هذا كان تفسيري المتواضع ... وسامحوني على القصور

ووعدنا بكره مع السندباد

:)


هناك 31 تعليقًا:

ARTFUL يقول...

لا ما حزرتي توقعت تفسرينها على هذا النحو

انا اقدر اقول عنج ان انتي تبي طاقية الاخفا علشان تبين تعرفين شدور حواليج وانج مو واثقة بروحج وتبين تشوفين شقولون وشسوون الناس وانتي مو يمهم

وعندج شغلات تخافين الناس يعرفونها وبنفس الوقت ودج تشوفينها

بس هذا مو صحيح انتي حطيتي السبب

:)

انا الحمدلله قدرتي على المناقشة جيده وأتقبل الراي الآخر ولا أعاني من اللي حوالي بانهم ما يسمعون كلامي بالعكس انا أعتبر مستشار جيد لكثير من أهلي وربعي (:

وانا ابدا ماني متمسك برايي ، اذا عندك ما يقنعني تفضل فيه وانا ما عندي مشكلة اصير معاك اذا كان كلامك مقنع (:

قدرة الاقناع حتى بالشغلات الغير مقنعه تسهل عليك وايد شغلات وتختصر لك وايد شغلات وتوفر وقت

مثلا ، عندي عميل أحتاج أبيع عليه أرض قيمتها 5 مليون ما يحتاي أثبت له بالأرقام والأدله والبراهين انه قوود ديل بس أقوله يا ولد الحلال اشترها وبيشتريها

لو أروح حق بنك وأقوله ابي قرض حسن علشان امول مشروعي بشوتني فينغر ، بس بهالقدرة راح يعطيني الفوس وهو يضحك

لو أيام الجامعة الدكتور عطاني أف بحتاج أكثر من واسطه وترجي علشان يحطها آيه بس بهالقدره كلمة وحدة ما تاخذ دقيقة أحول القريد من أف الى آيه

لو مرتي متضايقة من شغله ممكن بحوار بسيط أقلب حالتها 180 درجه بهالقدرة

ولو ولو ولو (:


ولا تحاتين ماراح أزعل

(:

الزين يقول...

ما حزرتها صح يا ارتفل
:)
انا اخر وحده يهمني الناس شيقولون عني
من ناحية الثقه هذي تحتاج تعرفني اكثر عشان تحكم وما احب اتكلم عن نفسي وشكثر لي تأثير على اللي حولي
القراب والبعاد سوى

يمكن بالسابق كان عندي اللي اخاف عليه
الحين الأمور تساوت
وما عاد يهمني شنو ينعرف عني ومنو اللي يعرف

وبالفعل انا امر بحالة ابي اختفي
تبي تسميه هروب سمه
ساعات تبي تتم يم الناس اللي تحبهم من غير ما يحسون
لأن اهتمامهم الزايد ممكن يشكل عليك عبئ في مرحلة من التعب انت واصل فيها لأنك تفضل الغياب على الحضور

وحاليا
انا طاقة كل شي بالطوفه
سووووو
ما خمنتها صح
مثل ما انا خلطت الأمور بالنسبه لك
بس على فكرة
ومن اول يوم عرفتك فيه من خلال التدوين
انت حاد ووايد مو شويه
تحاول تخفف من هالحدية بس ساعات تغلبك

سعيييدة جدا بمساحة الفضفضه اللي اكرمتني فيها وتكلمت عن نفسك بكل هالراحه

مشكور يا بو شيخه وعسى ربي يرزقك الصالح

Kuw_Son يقول...

I like your explanations .. Thanks for your sweet word ya alzain :)

Engineer A يقول...

هههههه ايييييييي مو ذابحتني الا هالمثالية اللي ابي اوصلها وآخر شي لا طلتها ولا طالتني!!

صج لي قالوا الطمع ضر ما نفع :)

بس تظل امنية ورغبة مستحيلة التحقيق فليش ما اتمنى احصل عليها كلها؟! :)

بانتظار السندباد

كل الود

الليوان يقول...

اي والله يالزين

ابي اسوي كل شي ومو اي شي

والوقت كلة ما يكفي

والله يعين من قلب الله يعين

حبيبتي انتي.....

reemas يقول...

اي والله صدقتي يالزين
ما يعجبني الحال المايل
و ما احب اي شخص يتعدى على حرية الاخرين في مكان عام
قمنا نكره نطلع ايام الزحمة عشان نتفادى الناس
يعني اقل ضرر ممكن نتعرضله لماالواحد ماشي مع اهله و عياله انه يسمعله كلمة وصخه من شوية مراهقين قاعدين يسولفون بصراخ مع بعض
او واحد يدخن في مستشفى .. و المسكله لو الواحد بيقعد يقولهم عيب و ما يصير ممكن يلقى روحه مطقوق. و ينتهي بالمخفر
طبعا اختياري الثاني كان راح يكون الطيران و التحليق بعيدا :)

Sami يقول...

اخاف اطغى ..اذا يتني قوه خارقه :)

Nikon 8 يقول...

صح وألف صح
ماشاءالله عليج
يا ست الفاهمين
:)
مسا العسل يا عسل
:))

BookMark يقول...

الزين
قريت تحليلج أكثر من مرة
ماني عارفة شقول
بس انتي صح
"مااحب أترك أمور ثانية عالقة"

أمي دايما تقولي انه لما وزعوا الصبر انا ماكنت موجودة :)

طبعا تقولها واهي ناقدة علي مو مدحًا فيني p;

شكرا يا ست الزين ;*

Reem يقول...

LOOL ، إحم ؛$ !
إستحيت ..

علاقتي بالخدم عادية ، أقرب للهدوء من التعقيد .. وو عالتنظيف ، تقريباً .. ما أحب أقعد بمكان عفسه .. بس مو لدرجة الهوس بالتنظيف ..

بس أحب أشوف العالم مكان نظيف ، لأن الأرض مسكينه .. وايد كرفناها !

لول أحسني كل شوي أبدع زيادة ..
مو جنه أسكت أحسن ؟

و إي أبي أطير ..
ودي أعيش الشعور :)

قواج الله يالزين ..

سلة ميوّة يقول...

انا مو موجوده:(


عاد انا ماكتبت رد...

لأنج أنا!!!
وأنا أنتي:)

طول عمري اسأل هالسؤال

وربعي الي تبي اطير
والي تبي تقرا الأفكار
أنا الوحيده بينهم
الي دايما تبي طائية الإخفا!!!



لنفس اسبابج
واسرار ثانيه
ابوح لج فيهم بالخاص:)


مساج الله بالخير ياغلاي

وسامحيني على القصور:***

qesat_5ayal يقول...

مرحبا

أنا شكلي عشان أفهم هالبوست لازم أقرا تعليقات البوست السابق

شدني وايد
لأني قبل جم يوم عشت الدور بأن لدي طاقة أخفا في الافنبوز ههه

الحين بما انه اذن
بصلي الفير
ولي عودة باجر ان شاء الله

Seema* يقول...

أجد فيكِ قدرة عجيبة "خارقة ربما؟" في تحليلاتك الدقيقة ; )
ماشاءالله

ARTFUL يقول...

انا اقدر اقول عنج ان انتي تبي طاقية الاخفا علشان تبين تعرفين شدور حواليج وانج مو واثقة بروحج وتبين تشوفين شقولون وشسوون الناس وانتي مو يمهم

وعندج شغلات تخافين الناس يعرفونها وبنفس الوقت ودج تشوفينها

بس هذا مو صحيح انتي حطيتي السبب

-----------------------

اختي الكريمه الزين ، أنا ما خمنت ولا حللت ولا أبي أحلل لان هذا مهو موضوعي هذا موضوعج

انا قلت انا أقدر أقول (أقدر أقول) انج اخترتي طاقية الاخفاء لأنج كيت وكيت وكيت ،، بس هذا مو صحيح (وهذا اللي ذكرته بالفقرة اللي فوق) بس انتي فسرتي سبب اختيارج وهذا الصح

نفس الشي بالنسبة لتفسيرج لي انا أقولج انا اخترت وانتي فسرتي غلط بالنسبة لي أنا ذكرت ليش أنا اخترت هذا الاختيار

عرفتي؟

:)

والسموحه اختي اذا كلامي يضايقج ،، يمكن الفكره ما توصل عدل وانا لا معصب ولا متضايق من كلامج وبالنهاية هذا رايج يمكن يكون صح أو غلط

يمكن يكون اسلوبي حاد وانا للأمانة ما اتعمد هذا الشي وان تعمدت فهو على ضحك او من باب الصراحه

وعادة أحط ابتسامات لأبين ان ما بيني وبين الكاتب شي اهو بس اختلاف في وجهة النظر

فكل المدونين اخوان واخوات عزيزين علي

وبس

:)

Antonio يقول...

عفوا الزين ما وضحت التعبير

آله الزمن : لانتقل لكل زمن اريده وأأخذ معي من يريد أن ينتقل الى اي زمن يشاء ...

تقدرين تحللينه ؟
:)

فيج البركه يا الزين :)
بانتظارج .

Amwaj يقول...

إي والله يالزين مجروحة بسبب هالدنيا اللي صاروا الناس فيها يلبسون ألف قناع وقناع عشان مصالحهم اللي غيرت نفوسهم وقست قلوبهم :(

aL-NooR . يقول...

و اللي ما مداها
تعلق على البوست
اللي قبل و تختار
شتسوي ؟


:*

الزين يقول...

ولد الكويت

:)
الحمدالله يعني اسعدت احد بتفسيري

دائما سعيده بمرورك يالشيخ

الزين يقول...

انجنير أ

حسيت فيج من هالنوع
وللأسف المثالية ما تنوجد بعالمنا هذا

وسبحانه ما في احد كامل مثله

:*

الزين يقول...

الليوان

تدرين عاد
انا من اصبح ابي اليوم يخلص ومن امسي ادور الصبح وابي الليل يخلص

:$

الزين يقول...

ريماس

وانت الصاج يا دكتور
لما تضيج فيك الدنيا تفكر تطلع تغير جو
ومن تطلع تتحسف
فصرنا من نفكر نطلع نقول وين نروح بهالزحمه وبين هالنماين

يعين الله يالشيخ
الحال كلش ما يسر

الزين يقول...

سامي

تطغي!!

ما اظن

الزين يقول...

نيكون

:)
يااافرحتي بالصح مالتج
انتي اصلا ما تعبت بتفسيرج
واضحه مثل عين الشمس
:*

الزين يقول...

ريم

:))))
يازين هالريم والله
ياربي ليش كل ريم خفيفة طينه ولها طلعات غريبه

اذا طرتي اخذيني معاج
:**

الزين يقول...

سلة

وناطره البوح الخاص انا
:**

الزين يقول...

قصه

يااا هلا باللي غابت ورجعت

ناطره ناااطره
وحشتيني كثر ماكو بعد

:***

الزين يقول...

سيما

:**

يقال لي اني قادرة على قراءة الناس بشكل مرعب احيانا

بصراحه انا ما اشوف هالشي
هي محاولات متواضعه عشان افهم اللي حولي
فقط لا غير

يا حلاتج
:*

الزين يقول...

ارت فل

اخذت الموضوع بجدية زايده يالشيخ
انت اخو عزيز وغالي وربي يعلم
ومن الناس اللي ما تجامل
وادري فيك لما تقول كلمة تعنيها

وجودك ومتابعتك وتعليقاتك تسعدني
لا تحط في بالك

ساعات نختلف بوجهات النظر مع ناس نحترمهم عشان نعرفهم اكثر

ولا يهمك
وبالعكس صراحتك اسعدتني

الزين يقول...

انتونيو

انت تعشق زمن اجدادنا وكل شي في عبق للتاريخ
تحب الماضي وتحس له وزنه وقيمته
وودك تعرف عنه اكثر وتتعايش معاه عشان تفهمه صح

اتصور ان شخصيتك مركبه
فيك شي من الشياب
وشي من الشباب

وتقدر تقعد وتسولف وتتعايش مع جميع الأعمار
لأنك من كل زمن تاخذ اللي ينفعك

عندك فضول تعرف باجر شنو فيه
وودك تحافط على عمق الماضي وتنقله معاك للمستقبل

اتمنى اكون فسرت صح
:)

الزين يقول...

امواج

ومن يسمعج
مع اختلاف الأسباب
بس تدرين
كل ما التفت لقيت الكل يعيش نفس الحاله

ربج اعلم بخبايا النفوس
وعمره ما يبتلينا فوق طاقتنا

:*

الزين يقول...

النور

تختار الحين يالنور
واحنا بالشوفه

:*