هي تنظر له بكل غنج .. تسرح بتفاصيله ... تغرق بملامحه ...
هو يغيب بتفاصيل الصحيفه التي بيده ... يقلب صفحاتها ... وتتوه نواظره بين اخبارها
تتنهد ....
يتنحنح ....
تتصنع ... تكح .....
يبتسم .....
تعرف انه يراها ... ويعرف انها تتشاقى
تحرك الشاي بكوبها الصباحي بصوت لتشد انتباهه
يخفض الجريدة قليلا لينظر لها من خلف رموشه
تنظر له بكل براءة وهي تخفي ابتسامه منتصره
ينظر لها بكل استسلام ليضع الجريدة جانبا
تهمس وهي تخفض عينيها للشاي مرتشفه قليلا منه : شنو فيها الجريدة؟
يرد عليها وهو يتناول فنجان قهوته : المعتاد ... ماكو شي يديد
يصمت .. تتنفس بعمق
هي : وبعد
يشعل سيجارته : ما بعدج بعد حبيبتي( يبتسم ) ليش احس عندج شي بتقولينه
هي : اليوم شنو!!
هو : الأحد
هي متملله : ادري الأحد .. يعني شنو اقصد .. أي تاريخ
يلتقط الجريدة .. يبحث عن التاريخ ثم يجيبها : 21 مارس
هي بنفاذ صبر : ايييه .. يعني شنو؟
يفكر قليلا : مادري .. شنو يعني؟؟
تغمض عينيها لتتمالك شيء من عصبيتها المعتادة .. ترفع شعرها لتبرز ملامح يعرفها جيدا .. ويحبها كثيرا
هي : 21 مارس ... يعني عيد الأم ... صح!!
يرسم فوق ملامحها ضلال عينيه وهي يجيب : صح!! بس إنتي من متى تهتمين حق هالأمور
هي : مو عشاني .. عشان امك ..
هو : أمي !!
هي : ما تبي تشتري لها هدية؟
هو : اشتري لها انتي وانا اوديها اقول مني ... وبعدين تعالي ... من متى انتي تفكرين بأمي
هي بشيء من الغضب : من زمان .. وبعدين هذي امك ... يعني المفروض انت اللي تشتري لها ... (تبتلع ريقها بشي من الحيله ) وتشتري لي بعد
ينتبه : بس انتي بعدج ما صرتي ام
تضع التوسته من يدها .. تخفض السكين : يعني شنو ... بس الأمهات لهم حق بهاليوم ... بعدين تعال ... بيي اليوم اللي بصيرفيه أم ... ولا هذي نقزة يعني
يضع كفه على خده وهي ينظر بعينيها : لا مو نقزة ... بس ما تحسين ان احنا نطرنا وايد
تعتدل وتتهيأ لمعركة تنتوي ان تنتصر بها : شنو مقياسك للوايد خل افهم؟
هو : اربع سنين يا نورا وما تشوفينهم وايد وكفاية؟؟
هي : يعتمد على اكتفائك من أي نوع ... صنف لي اياه ... انت شنو حاسبها بالوقت ... ( وتكمل بتهكم) وباقي بس تغنيها لي حالك حال نوال
هو بشيء من النرفزة : علميني شلون تنحسب؟؟
هي : انت مو قادر تستوعب ان الأمومه استعداد نفسي ..
هو : فطرة ... انا اشوفها فطرة
هي : ما قلنا شي .. بس انا موحاسه اني ابي اصير ام لما الحين ... يعني مو شفقانه على الياهل .. والفكرة مو قاعده تثير بنفسي الا صورة متعبة مو مستعده لها الحين
يلتقط جريدته مرة أخرى ويصمت
هي مستاءة : يعني ما رديت
هو من وراء الجريدة : ما عندي رد ..
هي : لا تصير جذي
يخفض الجريدة : شتبيني اقول .. في البداية قلتي نحتاج نقضي وقت مع بعض اكثر وتو الناس وتونا متزوجين ... تالي قلتي نحتاج نرتب حياتنا اول ونركز على شغلنا عشان نكون مستقرين ماديا اذا صار عندنا ياهل .. تالي قلتي الماستر ماخذ وقتج .. ومع الدوام ما عندج وقت حق مسئولية يديده ... وكل هذا خلصنا منه.. شنو عذرج هالمره
تنظر له دون ان ترمش ..
يرفع الجريدة .. ويغيب بغضبه عنها
تقترب منه ... تجلس بجانبه ..
يتغافل عن قربها ... تتنحنح ... تدندن اغنية تغنجه بها ..يبتسم .. تبتسم معه
هي : تذكر اول ما عرفنا بعض
هو يراقب حركة شفتيها منتظرا ما سوف تقوله : ...... اذكر
هي : قيل لي عنك ما لم تقله زليخه في يوسف
يضحك : وبعدين
هي : طلعوا جذابين ...
هو : ليش شنو قالوا لج؟
هي : تدفع جم واقول لك؟
يضحك باستسلام : دفعنا وخلصنا ... قولي يالله
هي : دفعت!! ليش احس ان هناك معنى متواري ماراح يعجبني
هو : يوزاي ... ماكو معاني متوارية .. انا قاعد اطفرج
هي : اهااا .. خوش عيل ..
تبتعد قليلا عنه
هو بتأفف: نورا ...
تلتفت له : شنو!! شقلت انا الحين
هو : شفينا الحين!!
هي : مافينا .. ( تنظر له بعين يملؤها العناد ) انا ابي هدية عيد الأم .. يعني شنو ... ترى كل الزوجات يستاهلون هالهدية مو بس الأمهات
هو : جان سموه عيد الزوجات ... وبعدين على فكره ماكو شي اسمه عيد الأم ..
هي : هااااو .. يعني اهو على كيفك ... كل العالم يحتفل بهاليوم الا انت ما يصير عندك
هو : آآآخ يا قلبي ... انا بعرف ليش كل المناسبات لها مصب واحد ...
هي : عشان احنا اساس الحياة .. ومن غيرنا حياتكم ما تسوى جيلة بنك
هو : بنك هااا!! والله انا اللي بنحاش وخيرتي بتلاقوني متنكر وابيع بنك
هي : حياااتي ... ليش كل شي اقوله لازم تقلبه دراما ... وبعدين ... رب العالمين وضع سر خلقه كله فينا ... ليش تنكر هالشي
هو : دراما !! ماشي ..... وتقصدين بالسر العيال صح!!
تغضب .....هي : وانا مو كل ما قلت شي حكرتني بهالزاوية
يصمت قليلا ثم يخاطبها باستسلام : قومي نتمشى شوية بالأفنيوز
تستبشر وتنفرج اساريرها : هياااا ... (تحضنه كطفلة وتسرع لتغير ملابسها )
هو بصوت مرتفع حتى تسمعه : بس ترى انتي قاصه علي
هي ضاحكه : ادري
هو : الله كريم
هي تظهر من داخل الغرفة : بس ترى انا احبك
هو : ادري
هي : بس تدري!!
هو : ايه شنو اكو بعد؟
هي : يا ملقي .. ( تتركه لتغيب داخل الغرفه ثانية)
هو : شنو نشتري حق امي
هي : أي شي .. مادري طقم مواعين حق يوم الزواره
هو يفكر : يعني هم الهدية لنا !!
وهي تسرح شعرها : مادري والله .. شوف انت شنو بخاطرك لها
هو : وشنو بخاطرج انتي ؟
تتهادي مقتربه منه .. تبتسم بغواية : خاتم صغيرووووون .. شفته من اسبوع وقلبي منشلع ابيه
هو : منشلع على الخاتم؟؟
تستغرب سؤاله : يسسس ... شنو تبيه ينشلع عليه مثلا!!
هو : على بالي منشلع علي
هي : ليش ينشلع عليك؟
هو : مادري .. من زود الحب يمكن!
هي : حبيبي ... انت خاطرك تتدلع
هو : حياتي .. ليش انتي تعرفين تدلعين؟
وهي تغادر حضنه : ويييييييه ما يسوى علينا هالخاتم .. كله خاتم هالكبر وندفع عليه كل هالضرايب .. واسبوع قبله ندلع واسبوع بعده نطبخ ونشبع
هو : انا لو ماخذ لي لبنانية مو ابرك لي ... الدلع اربعة وعشرين ساعة وببلاش ... وكل كلمة والثانية تقول لي تؤبرني
هي : ويييييييه اسم الله عليك ... جان يابت طوايفها كلهم وخلتك تحوس بالجوازات تدق لهم اقامات وفيز ... وكروت زيارة .. لا وتشغلهم عقب ... وكل هذا قاصة عليك بشوية ورق عنب ... وتبوله حامضه ... وآخر شي اهي اللي تقبرك وتاخذ ولد عمها عقبك اللي ناطرك تنفقش عشان يفسفس بيزاتك
هو : ليش عمري انتي شنو قاعدة تطبخين لي غير الباستا .. والبطاط المقلي ... وعن الظليمه البيض والطماط ... وليش تفاولين علي بالموت .. بل .. الله يا أنتي ... هالكثر قلبج اسود
هي : هااااو ... الحين آنا صرت قلبي اسود عشان قلت الصج ... وبعدين قول لي مو الشهر اللي فات مسوية لك مجبوس !! صج انكم مثل القطاوة .. تاكلون وتنكرون ...
هو : يزاج الله خير .. لا صج بارتني ... قبل شهر صاجه
هي : تدري شلون ... بطلت .. مابي لا خاتم ولاغيره ... ( تدخل غرفتها وتغلق الباب)
هو : شقلت انا ... !! انا هالباب بقط مفتاحه من الشباك واخلص .. كل ما قلت لها شي اندعست بالدار وقفلت الباب
هي من خلف الباب : ترى اسمعك ... وبطل تتحلطم جنك شايب ماكلين عشاه
هو هامسا : بل ... عفية اذون ( يرفع صوته ) انزين احاجيج ... كبري راسج وقومي دامج لبستي ... نروح نشوف صغيرونج ... اقصد خاتمج
صمت ...............
هو : نوير....
صمت ..........
هو : نواره ....
صمت
هو : ام النور ...
صمت .........
يتوجه للباب ليطرقه ... يفتح فجأة ... هي تحمل حقيبتها مبتسمه : يالله
.....
هناك 68 تعليقًا:
يختيييييييي
ايشوقوون و الله!
تعالي شوفيني و انا شاقه الضحكه اهني بالمكتب و اضحك
ههههه عياره هالنورا جنها انا
حبيــــــتها السميه حيـــل
يلا خنشوف الصغيرونو شصار عليه شروه و لا لاء
ويتنج..
ثانكيو على التدريب المجاني
مادري متى اتعلم اصير تيبيكال
:")
ان كيدكن عظيم يا الحريم
شلون تيتت راسه يوديها يشتري لها الخاتم عفيه كيد فيها مو راضي يخلص لووووول
هني لها الخاتم والله يرزقها بالذريه الصالحه عن قريب انشالله ويبرونها ليل ونهار
سوت سالفه حق عيدالام ولويه علشان اهي تبي هديه
والله الحريم كيدهن عظيم
ولو شتسوي انت بتطلع الغلطان
ولازم تبرر غلطتك
انزين آسف شلون!!! ما يكفي
D;
يازينج ويازين سوالفج
إيه هذي السوالف الي تونس
لاتشوفيني وانا متربعه اقرا البوست
وشاقه الحلج
لا واتعبره معاهم على كل جمله
يازينج يالزين
ربي يحفظج ويخليج
حبي:**
كل يوم وكل لحظه والامهات بخير وصحه وسعاده دائمه لا تنتهي بوجود ابنائهم واحبابهم
في موقف هزني مر علي من شهور قليله خلاني اتنفس امي اكثر من قبل ...الله لا يحرمني منها ولا من قلبها
ولا من بوستاتج :**
waaaaaaaaaaaaaaay
انتي ليش تعورين قلبي في هالحجي
والله تعورين القلب
ابي ريال جذي
ياربي ماكو ماكو كلهم مصارعين ابي واحد رومانسي ماكوووو
:(
يا حلوج و يا حلو سوالفج :*
يا حلو نويرة مي هينه هالبنت
عيارتها غير نمونة :*
و مسكين ريلها فظيخ ..
و آخر شي بوديها الافينيوز
p;
خووووووش بوست زيون
لا تشوفيني منشكحة بالدوام :)
**************************
أقول بس يا حلوج و يا حلو نوير
ما تلاحظين وايد تيبين طاري نورة بالقصص يظهر أسم وحده عزيزة أو لأنه ما تعرفين وحده بهالأسم... المهمـ
توني كنت عاد قلت بهجم على مدونتج و أطالبج بهالنوع من قصصج اللي ما في لها نظير في ناس يقلدونج لكن وش يجي الفرع عند الأصل
تعجبني طريقة وصفج الدقيق و تمليح المشاهد العادية بالحياة عندج قدرة أنج تقلبينها حق فلم و لا بعد مستوى هوليودي
كثري بوستات فينا شوق حق بوستاتج
*_^
:)))
عجيب البوست
والله يحفظ لنا أمهاتنا ويخليهم لنا اللهم آمين ..
وكل عام وكل الأمهات بخير :)
يازين سوالفج ياالزين. يحليلهم يونسون نوره وبعلها، بس حرام ليش ماتييبله بيبي. وايد اربع سنين اذا صح تحبه اكيد تتمني تييب منه بيبي، وبعدين شنو ماعندهم دوام بيروحون الافينيووو الصبح، اي يمكن ماخذين اجازه. :). تسلم الانامل اللي كتبت
D:
حلآآتهم عسل ،
يسلملي هـ الفكر :$
بـ التوفيق يآ رب
و بـ انتظآر الآتي :D
"وكل هذا قاصة عليك بشوية ورق عنب ... وتبوله حامضه ... وآخر شي اهي اللي تقبرك وتاخذ ولد عمها عقبك اللي ناطرك تنفقش عشان يفسفس بيزاتك"
عيوني دمعت من الضحك شنو شلعت قلبه يحليلها
زيون .. احبج
تعليقي غلى البوست الي تحت ..شالنحاسه ليش مغطيه الرقم ...ابي اشتري السياره
تسلم ايدج على القصة
وكل عام وامج بخير يارب وانتي بصحة وسلامة :*
يا حب هالنورة حق نشفة الريج... جان خذت فيزته وشرت الخاتم وماعون شيش طاووق من قصر النخيل تساحله فيه عشان يحرم يقول لبنانية!
:p
كل عام وانت بخير... خوش سيناريو كما عودتينا
:)
كيدهن عظيم
بس لو ماهو وده
ما خذالها
:)
لووووول
ورء عيناااب وتبوووولي
زيين تسووين فيهم ويالله نلحق معاهم راس
لوووول
وينك يا جبريت
يقولج يقومون بخالاتهم
خلا ينبهم
:))
;)
صـــــــــــــاجه بكل حرف
زيووونة
شخباري تنطر الخاتم !!!
ولا هدية ّ!!
أقول.. تنرفزت ؛)
صج كويتيين
يتهاوشون ويطلعون مع بعض مطنقرين ومبوزين .. شللي حادكم !!
ههههههههههه العنوان تبكل كويتي
من قالج ؟ قول الزمان يازيون ارجع يا زمان ...!!1
اشحقه اتنهوض علييه يا ماله ما ادري شقوول ؟
الدنيا انقلبت ...اليوم الريال عيونه وحواسه كله على راتب الزوجه
ما تدرين ان رواتب الزوجات بالمؤسسات الخاصه من 2 الي 3 الاف دينار ....!!1
والريل طرق خريج وخلينا نقول مدير او مراقف ..ما يتعدى راتبه الالف
الرياييل قاموا يتنهوصون على زوجاتهم ...اشتري لي ساعه او ترى تذاكر السفر عليج ..وخاصه اذا عندها فلوس من اهلها ..حجزي لنا بالوطنيه ما نبي الجزيره مالت الفقاره
هذولا هم يالزين ازواج المستقبل
البنات اليوم اشطر واكثر التزام بالعمل واصلا تفانيهم بالعمل الخاص
يشخطووون الشباب الف مره ...العلاوات والدورات والبونص كل للشابات
بالنهايه ...قلبي البوست فوق حدر !!1 خلي الزوج هو اللي يترج ويطر من زوجته هديه
فمالله
زيونة حبي كيف الحال ؟؟
والله ولهت عليج وعلى كتاباتج الحلوه
بس شنسوي لهينا في الدنيا وما نقدر نحك راسنا ....
صاجة كل الكويتييين نفس الحال
وبعد اشكر حياتج واشكر فنج...
نوير
:)
عسى الدوم السعد فالج يارب
@@
تبين اكمل؟؟
زوز عقر بقر
عسى بفايده عاد يازوز
:$
جبريت
:)
وما خفي اعظم
يهنيك ربي بالعافية ويسلم عمرك ويحفظ لك حبايبك يا جبريت
ارت فل
:)
انا معطتكم عينه بسيطه من سوالف بنات الكويت
السوالف اللي بتيي اجيد
:))
سلة
:)
اهم شي ان السالفه عجبتج
وعلى بالي انا بروحي اللي متربعه ومتبوسمه على سوالفهم
اكمل؟؟
صبا
اللهم امين ولا يحرمها من برج وووصلح
حبيبة قلبي انتي
:**
النور
:)
مو يقولون خفة طينة البنت بعيارتها
لا ريلها مو فظيخ لا يغرج
اذا كملت السوالف بتعرفين ليش
:)
شرايج نكمل؟؟
واي مي
:)))))
بس يا بنية صوتج واصل الين الخفجي
ماكو مثله
بس بالقصص هذا
خاتون
تدرين عاد ما عندي احد قريب مني اسمه نورا
بس انا احب هالإسم
انا عموما احب الأسامي العتيجه والمتجدده
:)
هوليوودي مره وحده
بعد قلبي انتي
ربي يجبر بخاطرج على هالكلام الطيب
:*
انجنيرا
اللهم آمين ياربي ولا يحرمنا من اجرنا وبرنا لهم
:*
تكانه
:)
يازينج انتي اللي تدققين بالتفاصيل
وما عندهم دوام ماخذين اجازة
يسلم عمرج يارب
:*
هند
:)
وناسه
!!
انثى ملائكية
حياج الله وساعة المباركه
لا تباعدين
الوتين
:))
عسى دوم ياربي هالضحكه
:**
احبج اكثر
:)
سامي
ان شاء الله بس ارجع البيت ادزه لك
وعلى طاري قصة فضه
انا شلتها لأني قاعده اسوي عليها تعديلات واضافات
وان شاء الله يقدرون يقرونها لما تنزل السوق
:)
وحياهم الله يقدرون يتابعون القصه اليديده
:)
الأوركيده
يسلم عمرج يارب
ويخلي لج حبايبج قولي آمين
:)
جندل
:)))))
كله بصوب وسالفه ماعون الشيش طاووق بصوب
فصلت عليها يا جن جن
:**
ياربي انتي عسل
عسسسسسسل
وانتي وكل الأمهات بخير وعافية
المقوع
اصلا ما ينفع معاهم الا هالنمومه
الساكته والمطيعه ما تمشي مع رياييل الكويت
يبي لهم وحده تشذونهم
صبري اذا لي خاطر اكمل
:)
بتشوفين الكيد على اصوله
نانو
:)
يت على هواج
يو نو هو
وهذا المطلوب
هذي صورة من حياة الزوجين الكويتيين
انا ما احب انقل صورة وردية وبعيده عن الواقع
واسم الله عليج من النرفزة
:*
اجار
:)
ايه والله صاج
الصورة انعكست الحين
يعين الله يا اجار
عاد لو قلبت القصه تهقا بيسكتون لي طوال الشوارب
بيقولون اني عنصرية ومتحيزة وظالمة رياييل الكويت
تعال فجج عقب
ربوعه
انا بخير وعافية
وفاقدتج وايد
الله يعطيج العافية حبيبتي
:*
** يعني شناطرة بلة ماتحمل ؟ تبي يدش عليها و بيدا ياهل من غيرها ؟
انا اقول بلا دلع و خرابيط و يله ختقط الحبوب و تتوكل على الله و دلع زيادة مانبي وترى انا اللي بدوره وحده .... بنات اخر زمن جبح :(
قلت بنطر واشوف التعليقات وبعدين اعلق
انا ما احب العياره والدلع الماصخ
وما احب المراة اللى تستخدم دهائها مع الزوج الطيب وتستغل طيبته بخبث ومكر.....وهذا هالايام اللهم ياكافي زايدين
ليش تستخدم ام الزوج غطاء لطمعها الشخصي..... اللى ما له حد
وبعدين ست الحسن والجمال ليش ما تيب عيال......الانانيه عاميتها عماي
انا اقول له بدل لا يوديها الافنيوز
يردها بيت اهلها لما تستعد للزواج نفسيا وعاطفيا يردهاااااا
حدي معصبه ...خفت على الكي بورد
هذا مو تبيكل كويتي مره وحده
حرام تجمعينا معاها
زيون لو تيني جنه جذي ....تهقين شسوي فيهاااااا
هههههههههههههههههههه
تحياتي يااحلي زيون
ميمة السبيت
:)))
ترى ردة فعلج على المواضيع هذي صج تضحكني
احسن انج صج محتره
:*
يا حبي لج يا ميمه
عجبه
بنت الشامية
@@
من وين طلع كل هذا
امبيه اول مره اشوفج معصبه ترى
اللي مو عبدالملك ما قدر عليه
قدرت عليه هالقصه
:)))))
شوفي يا بعد الشامية واهلها
بنات هاليومين هذي موديلاتهم
وانا قاعده اسمع قصيص تشيب الراس من جناين هالوقت
ما ابي اخرعج
بس اللي يسوون قله
والله يا بنت الشامية لو تييج وتييني
يمكن نجحتها من نهار ثاني
:)
احم
لا لا احنا طيبين
نقوم سلوكها
ما نبي عنف
لوووول
ياحلوج يالزين والله
تدرين جني قاعدة اطالع شاشة تلفزيون جدامي
تشدني تفاصيلج وارد اقراها اكثر من مرة
بس ترى شنسوي يعني تهقين لو بس اي واقول:
حبيبي شفتلي خاتم بالسوق ذاك اليوم وشاقني واااايد عادي حياتي تشتريلي اياه؟؟؟؟ @@
شنو الرد؟؟؟
يمكن :
-وكل ما عجبج شي تبينة
-مادري..... اشوف
-شكثر عندج خواتم ..وشتعوة قاعدة تلبسينهم لي
-بعد...مهر ونقينا وهم للحين تبين اشتريلج...كافي دبلة العرس@@ بذيج القيمة
...السنع فيهم بيقول
-حبيبتي تبين اعطيج فلوس والا اروح معاج اشترليج اياه
-ميخالف تنطرين للشهر الياي هالشهر شوي مضغوط
.. وما نخلص ترى اكتبلج هني حياة كاملة
بس شاطرين.. اللبنانية احسن والسورية اسنع..أف منهم
ضحكتيني ولامستي احساسي وتكفين كمليها
الله لايحرمنا من هاليد المبدعة
دمتي بسعادة وخير
وسوري عالاطاله ^-^
يا حلوج يا زين ويازين سوالفج
متعه الحياة الزوجية جميلة من نافذتك
جعلتنا نستمتع بها وبتفاصيلها :)
يا زينج ويا زين سوالف
الله يخليج لنا وما يحرمنا منج
ما ابي اكبرج لكن أنتي أم المدونين بابداعاتج المتواصلة "كل عام وانتي بخير يا استاذة المدونين"
ودائما بانتظار الزين
:)
ودي واحترامي الدائم
لو سمحتي استاذه الزين أنا ما أجبر بخطر أحد
هذا تقديرج تقبليه بصدر رحب *_^
الزين
!
هل تقصدين القصة من تحت ليبل تيبيكال كويتيين وإلأا
تيبيكال كويتيات
لأني ماني امصدق انه التيبيكال كويتي
عقب ماحرمته مرته من العيال اربع اسنين
ومن المجبوس شهر
ومن قراية الجريدة صباحا
وقامت وصكت الباب ابويهه
يقوم بعد كل هذا
يوديها
تنشف له رصيده
بشروة اصغيرون
!!!
واااشاهييناااه
:(
نزقٌ طفولي بفطرةٍ ربّانية وبديهة الدهاة تلك التي تجسدها بنات أفكارك
: )
أمّا المقاربة بين الإستعداد النفسي والفطرة أجدها فصلاً محورياًّ في فن فن الإستقطاب بنفس أصيل أمدّه الله بمداده
يا جعلها تبطي سنينج يا الزين :)
انقول
اول مرور
في عالم الزين
نقول انتي زينة وايض
انا حلم
مودتي للزينه
أحببتُ تصنيفك للكتابة على أنها
"Typical kuwaiti"
:))
الليوان
تدرين عاد
الرياييل يقولون العساره من الحريم
والحريم يقولون العساره من الرياييل
وانا اقول العساره من الطرفين
وكل فعل له ردة فعل
بغض النظر عن اللي بلش واللي رد
وسالفة الحياة الزوجية هي اخذ وعطى مو الكل يطبقها
والحوار احيانا معدوم
والإلتزامات هي الطابع المتعارف عليه
والروتين يتسلل من كل الثقوب
والعلاقه تصير 1 2 3
خطوات حفظها الطرفين وانتهى الموضوع
والسالفه كلها وع
:)
وانا بلشت اخوره
...
انتونيو
ترى مو دايما حلوه الصوره من نافذتي
ويمكن اللي الياي بخليك تغير رايك
مشكور على الإطراء
ولا اني اشوفه وايد علي
بس هم مشكور
دائما تسعدني زيارتك
:)
خاتون
:)))
نعرف نزف بعد
يا حبي لج
:*
جاسم
يمكن تبيكال كويتيه
اكثر من تبيكال كويتي
بس ترى اكو من هو وايد ولا تستغرب
وانا ما اييب قصتي الا من واقع ملموس
:)))
وضحكتني على واه شاهيناه
ربي يسعدك ياجاسم
ظامي
ومن طول الغيبات يا ظامي
واحنا ظمينا كلماتك
ولعل المانع خير لهذا الغياب
وبنات افكاري من غير هالنزق الطفولي
ما يكونون بنات افكاري
:)
شكرا لك
ويا جعل ايامك تطول
سيما
تبيكال كويتي اكيد
:)
أدور بفرح غامر ..،
هنا أنا بين صفحات الزين دائما // ولكن بصمت يلجمني ,
شاغبتي شيئاً في داخلي ..، حب ودلع بنات .. وتستمر الحياة ..
~ طلي على تعليقي على كومنتاتج بال2 بوستس الأخيرين عندي..،
زيوووووووووووووووون
احبج احبج احبج
وااااااااااااااااااااايد
الله يخليج خليها تحمل
بشوف شتسوي فيه و اهي حامل؟
حالمه
يا عسي الفرح دايم ثوبج
وتم قبول النداء
:*
داركنس
هلااااااااااااااااااا
:)))
احبج اكثر
:****
يعني تبيني اكمل؟
عجيييب يالزين ضحكت وايد
يعطيج العافيه والله لا يحرمنا منج
بلو هوب
ان شاء الله دوم هالضحكه يارب
:)
إرسال تعليق