.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

18.3.10

سوالف نهار ... ويك اند

اول مشهد

صار لي يومين انام من الثمان واصحى تالي الليل شبعانه نوم ومصحصحه على الآخر ... واستمتع بهدوء السحر .. وسكون البيت .. وغفوة النهار على وجه الفجر
احلى شي لما تحس ان الكون كله نايم وانت صاحي تحسب له انفاسه .. وتملك كل المساحات لك وحدك .. تسرح وتمرح .. وتلون كل جدران الحياة على هواك ... وتكتشف ان في امور ما تطري عليك بالنهار بس تالي الليل تتسلط على منامك مثل ابليس والعياذ بالله .. وتبلش تطحن براسك ...



اهم شي .. ليش ما نتذكر الأمور اللي معسرتنا الا تالي الليل؟


 


ثاني مشهد

هم صار لي يومين ادخل المكتب على الثمان .. الزحمه مو صج ... يقولون اسبوع المرور ... وكمعادلة طردية لهالمعلومه وانعكاس فكري بمخوخ اللوادم صاروا يتسحبون بالشارع اخس من قبل ... على اساس يلتزمون بقوانين المرور احتراما لهالإسبوع ... يرحم والديكم .. سنه كامله مالكم شغل بالقوانين المرورية يت على هالإسبوع .. كملوا جميلكم ورحموووني من التسحب






ثالث مشهد

من بلش الإسبوع وانا التي بوي يصبح بويهي ويتشكى من سكرتيرة المدير ... انها مأذيته وانها تطلب قهوة عشان تاخذ الكاكاو وما تشرب القهوة تكتها بالزباله .. ارجع البيت الاقي شغالاتنا متناتفين .. والثنتين يشتكون عندي

تدق لي صاحبتي تشتكي من بنتها انها ملعوزتها عسره ومراهقتها صعبه صعععبه
اقعد مع زميلتي تشتكي لي من زوجها وتتباكي على ايام العزوبيه
ادخل عزكم الله الحمام بغسل ايدي الاقي الزميله الثانية تشتكي لي من مديرها وان ما قيمها عدل هالسنه
ارجع مكتبي القى موظف يشتكي من شغلة تصك راسي ومو شغلي اصلا
....



من قال لهم اني حائط المبكي!!






رابع مشهد

دخلت البيت اول امسات لقيت قطوتين ناطريني على عتبة المدخل بعز الشمس ..
"شمقعدكم بره هالحزة"
يتطالعون ويرد علي عزيز .. وهاب عنده موضوع بيكلمج فيه
اوكي .. لحقوني داري
يمشون يم بعض ويتساسرون وانا اصعد السلم .. واسمع واحد يقول للثاني .. "انت قول لها .. احسن"
"وهاب .. لازم تعرف تقنع الناس .. مو كله انا اقنعهم "
اوقف بنص السلم .. التفت عليهم .. اقعد .. واقول لهم تعالوا قعدوا يمي .. نسطر ثلاثتنا على السلم .. اتنهد واسألهم شفيكم
عزيز "وهاب يبي يشترك بالأشبال"
"انزين؟"
"وابوي مو راضي"
"ليش مو راضي"
"عشان احنا صغار"
"زيون ترى احنا مو صغار" يقولها محتجا
"وشنو المطلوب مني"
"قولي له ان احنا مو صغار .. "
"وليش انت ما تقول له"
"مااا يصدقني"
"وليش تبي تشترك بالأشبال"
"لأن وناسه .. يروحون رحلات كل مكان .. ويروحون مزرعة ويلعبون"
"مزرعة مثل مزرعتي اللي بالفيس بوك؟"
"ايه مثلها "
"خلاص انا اخليكم تلعبون بمزرعتي"
يتطالعون ... ويشتط عزيز
"زيون ... ترى احنا نفهم ... مزرعتج جذبيه .. هذي اللي يروحون لها صجية"
اسكت شويه"ادري تفهمون بس حتى انا اشوفكم بعدكم صغار على الأشبال ..نطروا لين السنه اليايه ويصير خير"
"الله!!! ... والسنه اليايه متى تصير؟؟"
"عقب جم شهر تكونون كبرتوا زياده وابوكم يخليكم وانا اكلمه لكم بعد شتبون"
"اصلا اذا كبرنا ما نحتاج تقنعينه ... احنا نعرف"
"اهاااا ... يعني تعترف انكم مو كبار"
"اففف .. قلت لك ماكو فايده " يقولها وهاب وهي متملل .. يقف ويهبط السلم
اتبعه بعيوني ... التفت لعزيز
"شفيه هذا؟"
"انتوا شفيكم .. مرة تقولون احنا كبار ولازم ما نسوي شي غلط .. ومره تقولون احنا صغار وما يصير نشترك بالأشبال .. الحين احنا كبار لو صغار بنعرف؟"
اتنحنح .. اتنفس بعمق " تبي الصراحه مادري .. سئلوا ابوكم .. لأني انا بعد صغيره وما ادري .. واذا بغيت شي لازم اكلمه واقنعه"
يطالعني ثم يقهقه " يعني انتي دادا مثلنا!!"
اضحك لضحكه احب راسه " قول لهم يحطون غداي .. يابو لسانين"
"بس ترى الكبار مليقين" يقولها وهو ينزل السلم
اخليه وادخل غرفتي
مشكله اذا الطفل صار عنده حجه ويعرف يرد



خامس مشهد

اثقل شي علي موعدي الدوري بحسين مكي جمعه
اصحى الصبح متعسره .. ما اقدر اشرب قهوتي
اطلع تصيدني الزحمة القاتله
اوصل المستشفى المواقف مليانه كالعاده
ادخل المستشفى هدوء قاتل
اروح المختبر صخخخخه
ايي باخذ رقم اشوف البنات قاعدين يسولفون
اطل عليهم .. "ماكو رقم؟"
تضحك بوجهي مرحبه " لا ماكو رقم تعالي"
اشمر عن ساعدي لأخذ عينة الدم " وين المرضا .. عادة المكان يروش فيهم ... جنه الكانسر يوزعونه بالتموين اسم الله عليج... (اشهق بعد ان تخطر على بالي فكره مو صج) .. كلهم ماتوا؟"
تضحك علي " لا بس خلصناهم بسرعة"
"اشووووه"
شي يشرح القلب لما نشوف بنات كويتيات صغار توهم متخرجين ونفوسهم طيبه .. وويهم صبوح ... ويسوون شغلهم بحب ... الله يحفظهم يارب ... يغيرون نفسية المريض 1000%








 سادس مشهد

هذي رابع استكانة قهوة عربية اشربها اليوم
:)
يعني بخفف المنبهات







سابع مشهد
من اين يأتون ملائكة غير مجنحين
يهبونك القرب دون مقابل
ينسكبون بعالمك دفئا .. يروون العطش ... ويحبونك لشخصك
لأنك انت فقط

صديقتي ... كنت كالفراشه عندما لمحتك عيناي .. وكنت الربيع الذي اقتنص فرحتي
وعندما تلجمت كلماتي بين احضانك .. وفوق صفحات سلامك لي
لم املك الا ان اهمس ... U made my day
تدرين اني احبششش صح
الحمدالله .. الدنيا بخير


لما تلقى اللي يهتم ويعطي ويتواصل ويتعنى عشان بس يشوف ضحكة عيونك
قول الحمدالله ... الدنيا بخير






مشهد من العمره

اطوف حول البيت ... ادعو لكل من اوصاني ... اتذكر البعيد قبل القريب .. يزدحم الطواف .. كل معلق بذاك البيت وما يرمز له ... اتذكر من رحلوا ... واتذكر من بقى ... واتذكر من نسي ... واتذكر من نسى ... وادعو لهم جميعا ... واسرح صامته .. لألاحظ عزيز صامت ايضا .. منكس الرأس .. ممسكا بيدي باصرار .. " ليش ساكت ... شنو تفكر فيه .."
" ما افكر .. قاعد اقول حق الله ابيج تصيرين زينه"
........
وبكيت ... بصمت


السعي كان مرهقا .. ويكون الكرسي المتحرك الحل المريح بالنسبة لي ... وبعد آن ينال التعب من وهاب وهو ممسكا بيد اباه ... اجلسه بحضني لنكمل السعي معا ... يتملكني التعب ... ويكون دعائي بصمت... لأنتبه لوهاب يرتل آيات من جزء عم ... استمع اليه حتى ينتهي
...
" وهاب !! ... "
يبتسم بفخر" اقرا لج بعد"
"اول شي قول لي من علمك"
" المدرس اللي ايينا العصر .. يحفظنا ويعلمنا نرتل"
ابتسم برضا " وعزيز بعد"
" لا عزيز حافظ بس ما يعرف يرتل كله يضحك "
احضنه .. واطلب من رب العالمين ان يحفظه من كل شر
كانت هالعمره مختلفه ... شفتها بعيونهم ... بنقاء ارواحم ... وشفافية وصدق رغبتهم برؤية بيت الله والقرب منه



:)

 


نهاية اسبوع سعيدة للكل


هناك 29 تعليقًا:

سلة ميوّه يقول...

هذا للنشر:)



ربي يشفيج ويشفي مرضانا وجميع مرضى المسلمين...

صعي يكون الواحد (( حائط المبكى ))

واهو بروحه فيه من البجي مايغرق الحائط ...


ربي يحفظج لكل من تحبين...

حبي:*

جبريت يقول...

انتي غلطتي

اول شي من بعد صورة البوسه

كتبتي ثالث مشهد بعد ان انتهينا من رابع مشهد

المهم

المشاهد لابد ان تمر علينا ونتيقن لها ونسايرها اما عزيز ووهاب ماهم صغار بل هم كبار طالما عنده الحجه لكن الصغر الي فيهم انهم لم يجربوا الحياة بعد والانفصال عن الاهل لأوقات طويله مثلا انا لما كنت صغير ما ياخذوني المخيم معاهم خوالي وعيال خالي لانه بسرعه احن ابي ارد البيت بعدها فهمت انهم عيال خالي لما طلعوا معانا مزرعتنا اهم سوو نفس الي سويته لانهم يفتقدون احد يثقون فيه مثلما كنت افتقد احد اثق فيه بطلعاتهم البر

NOIR يقول...

المشهد التاسع:
و المشهد الابدي

ما نستغنــــــى عنج

الله يحفظج:*

بنت الشامية يقول...

اول شيئ بسم الله عليك من كل مرض
والله يعطيج الصحه والعافيه

اذا انتى كله تستمعين لشكاوي الناس اللى ما تخلص....لان الصبر نفذ
وخلص منهم
انتي من حقه تشكين....؟؟؟؟؟
لج الله وحده هو اللى يدري بعبيده


مساكين هاليهال والله ان وهاب وعزيز صاجين....على كيفنا نسويهم مره كبار ومره صغار.....الله يعينهم علي الكبار
بروحنا متقلبين ما نستقر على راي
والاهم انا احنا كله صح ونشوف احسن منهم

زيون قلبتى على المواجع هالايام انا بحوار مع واحد من عيالي..... ما ادري متى بينتهي.... وشهبينتهي عليه..؟؟؟

الله يعيني على حسن القرار والتدبير
هذا بروحه هالحوار قامتني هاليومين واااايد هذا من صوب
ومن صوب ثاني مدون الهنا
اللى متربع بمدونتي


الحين زيون احتاج الكاكاو والا ..لا..؟؟؟؟؟؟؟

نهايه اسبوع سعيده لج وللاسره الكريمه

Seema* يقول...

#1
We can not stop thinking so whenever we clear our mind from something, something else comes to replace it.
#2
khaleeha 3la allah ;P
#3
People love/need to talk and even when you no reply or wasn't actually listening...just you being there would be helpful and means alot! <3
#4
ana l7d al7en ma adri etha kent kbera aw 9ghera? :\
7asab el.mawqif net9araf..s3at akon 3mlaqa w sa3at atqala9 :p
#5
Esmela 3alaich mn kl shar ;*
ajir w 3afya sis : )
#6
you know ena mo zain fa la tkathren la'ena enti elli btebtalshain bil.akhir!
#7
Allah ykhalekom lba3ath : )

Taqabal allah 6a3tich & enjoy your weekend!

مـي يقول...

يالله ياربي يلبسج الصحة والعافية .. وياجرك ويحفظك من كل شر..

بوست منوع ، ممتع ، رائع كالعادة..

أحببت كل المشاعر الصادقة فيه..

بائعة السمسمية يقول...

اللهم رب الناس
اذهب الباس
واشف انت الشافي
لاشفاء الا شفائك
شفاء لايغادر سقما
.
.
.
مادري شقول
بس والله اليهال يفهمون احسن منا واحيانا احس اني ابي عيالي يتخذون عني قراراتي

وتدرين ساعات لما اسمع شكوى احد وانا مافيني شي استمرض مادري ليش
يمكن اعيش الحاله
عشان جذي مو كل من احب اسمع شكاويه بعدين ليش يعني؟؟؟؟
ليش نشكي للي ما لهم قدرة ونترك صاحب القدرة والامر والتدبير
الله يدبرج بتدبيرة زينة
ويكشف ضرج واميمتي وكل مريض يارب
ونهاية اسبوع حلوة على قلبج

Reem يقول...

جميلة نهاية الإسبوع بين كلماتكِ ..
أحب وهاب و عزوز ، الله يحفظهم ؛*
و أحبج .. يا عساج بخير و صحة على طول

chandal/danchal!! يقول...

قبل لا اعلق على المشاهد الممتعة اقولج اجر وعافية وان شاءالله تكونين من الفائزين من هالابتلاء وربي يكتب لك الخيرة بكل امورك
.
.
.

شقصتك مع اللي يتسحبون؟... شمعيلكم؟

:)

صارلي سنين ما اسمع انذار السرعة بسيارتي... ذاك اليوم كنت حادرة من الشاليه (انا اللي اسوق وهذي من النوادر)... كنت طالعة قبل اختي بربع ساعة واختي وقفت وطلبت اكل حق اليهال وتعدتني عالبراد عند نقطة ضباعية

:p

العمرة... الله يهنيج ويتقبل منج صالح الاعمال... احلى شي تعلمين اليهال على الزيارة السنوية... اول سنة رحت عمرة كنت بثانية ابتدائي اذكر على صلاة العصر امي عيزت توصيني باني اتبع الامام بالصلاة وانا اهز راسي بالسمع والطاعة بمنتهى العبط والبلاهة... خبري بس بالتكبيرة... وركضة سلفطت الصلاة وسلمت وتشرقدت انطر امي تخلص... زين ما داست فبطني!


كتبت تعليق اطول من البوست والقطو اللي عندي يلبح مو مخليني اركز... الله يحفظهم يبيلهم قلب

شكلي لي عودة على رواقة

enjoy ur wk/end

:)

Sami يقول...

الله يحفظج من كل شر ...و يعطيج الصحه و العافيه

سعدت بمشاركج مشاهد من حياتج ...نفس المشاهد مرت علي بشكل اخر

كسرتي فيني ...قبل يوميين اشتغلت تسويق لمدونتج لبنات العايله...بالاخص رواية فضه و شاهين ...اختفت من الوجود ...لييييش

غير معرف يقول...

برافو ،،، بوست اينن

اجار الدين كشمش يقول...

يوست خفيف على القلب ...لكن قمتيني

بهالمستشفى الودر .....محد حتى أييب طاريه والله انج شجاعه

لكن يالله العافيه لج ولعييلج

بس تكفيين لا تييبين طاري هالمستشفى

انا خواف ولاااا ازور احد فييه
............
بعدين اذا انتي هالايام ماتنامين
انا اعتقد نومي العمييق الظهر ...اما الليل ...انا سويره خلقه واقووم الصبح مدروخ
الله يحفظج والصيف يااي سسافري تصحي

فمالله

DiLLi O MiLLi يقول...

"‬ليش ما نتذكر الأمور اللي معسرتنا الا تالي الليل؟‪"

تروالي ...
عتمة ووحشة الليل وسكونة ،،، هو السبب في تذكر لحظات موحشة ومؤلمة.

عسى الأمور اللي معسرتج تبقى ذكرى فقط ،،، وتكون حياتج مليئة بالفرح من اليوم وطالع.

:**






لوووووول
وشحقة الطيارة ؟!!
طلعي مبجر وتسحبي حالج حال الأوادم

:)






لوووووووول
لاحوووووو … أنا نفس نمونة سكرتيرة المدير بالضبط !!
القهوة التركية لازم تييني بوش ،،، لأني ما أشرب ألا الوش
ومعاه قطعة كاكاو وباجي القهوة ترد المطبخ ،،، ما أستحمل أشربها كلها!

:)







أماااا القطوتين فحطي بالج عليهم ،، ووسعي صدرج معاهم
ززززووووغه سوالفهم ،،، ربي يحفظهم

:)






‏‪‬Kiss Cancer Good‪-‬Bye ‪!!‬
‏It should be ‪"Kick Cancer's Butt"!‬
:)
وسلااااااامات عمري مااا تشوووفين شـــــــــر








الملائكة حوالينــــا يا حبيبتي أنتي
يتقاسمون معنا الألم والفرح
لهم في القلوب مساكن
وفي ذكرهـــم عبق المحبة

والدنيا بخير بوجود أحبابنا ،،، الله لا يخليـــــج منهــــم يااارب

:***‪ ‬





وعمــــــــرة مقبــــــــــولة
وتقبــــل الله منك صالح الأعمال حبيبتي

:*





.

Mamloo7a Q8ia يقول...

مساء الخير على الغاليين

اعوذ بالله من ابليس
يتسلط علينا في ساعات الهدوء والسكينه ويخربها بالافكار
والذكريات اللي تعسر

وصاجه ما تطري علينا الا توالي الليل
:(


هههههههه
حلوه حائط المبكى
ما ادري ليش هالتشكي
الواحد اللي فيه مكفيه
والشكوى لغير الله مذله


ههههههه
ربي يحفظ لج هالقطاوه ويصلحهم
ويبلغج فيهم يا رب
وتشوفينهم في احسن الاحوال


الف الحمدلله على سلامتج
وعساج ما تشوفينه طول عمرج
ويحفظج من كل شر
ويكشف ضرج وضر كل مستضر


يا حلات الصديقات الصدوقات
اللي يحبونج لذاتج لا لمصلحه
الله يديم عليكم صداقتكم
ولا يحرمكم من بعض
ويخلي لنا احبابنا


عمره مقبوله
وعسى الله يتقبل دعائج
ودعاء وليدج
ويحفظج ويخليج لهم
ولكل احبابج يارب
ويخليج لنا بعد
:****

ونهاية اسبوع سعيده على الكل
:)

kal ho na ho يقول...

ربي يشفيج ويشفي كل مريض ..ياربي ياحبيبي..


ودمتم

غير معرف يقول...

اللهم رب الناس
اذهب الباس
واشف انت الشافي
لاشفاء الا شفائك
شفاء لايغادر سقما
----
عمره مقبوله ان شاء الله

اشكيلي وابكيلك P:

الحال من بعضو زوزيتا :)

الحمدلله على كل شيء

hv a nic day

TRAB

خاتون يقول...

مشهد1
نفس أحساسي بالضبط لكن أول مرة أقرى و بأسلوبج تعمق أحساسي و صار عندي شوق لهاللحظات أكثر ما بقى وايد على نومت البيت *_^
مشهد2
انا اشهد
مشهد3
الله يعينج يقولون الصراخ مفيد بهالحالات روحي الشعب و ركبي جبال الثلج و صرخي
مشهد4
يا حلوهم عفيه توسطي لهم ترى حليوين

مشهد 5
ليش عندج موعد دوري هناك؟؟؟
مشهد6
مالي خلق اكمل رد ابي اعرف جواب مشهد 5
بس على العموم القهوة مفيدة
مشهد7
عسى الله يكثر حبايبج و يحفظكم لبعض

مشهد العمرة
عسى ان شاء الله دعيتي لي هههه
و سلامات ليش تعبانه تصدقين ضاق خلقي أعدج صديقة
و عسى يارب ما أشوف فيج لا ضيقة و لا تعب و يخلي لكم هالحلوين و يحفظهم القرآن آمين
أشتقت لزوارتي هنا ^_^

الدانة يقول...

صباح الخير ..
شدني اسمج جدا , احب هالاسم لدرجة انتي مفكرة ان اذا ربي رزقني بنت راح اسميها اكيد الزين ..
اسلوبج شيق , كويتي بحت , حلو , مميز
يعطيج الف عافيه..
وسلامات ماتشوفين شر ولاباس عليج
بحفظ الله
الدانة

ميمة السبيت يقول...

** وانا بجيت من صباح الله خير كله من عزوووووز و اكره شي عندي اني ابجي

ماكو اطهر و لا انقى من قلب الطفل

الله يحفظة و يشافج و يشافي جميع المسلمين

حبيلي عزيز و قوليله ترى اهو محجوز حق جوى بنتي من الحين :)

زهرة الرمان يقول...

الله يحفظج لنا ولمحبيك .. و الضعف يخلق من جوفه القوة .. ففي الابتلاء نعرف انفسنا أكثر ونكتشف كم نحن أقوياء بعون من الله .. وذلك حين يكون الانسان تكمن قوته في روحه.

..
سرد خفيف وعميق للمشاهد ...

أنا عن نفسي بطلت أصير حائط مبكى .. لأن ياعزيزتي السلبية والغمته تنقل لاشعوريا للنفس وتحسين روحج مثقله آخر اليوم ..

فقلبت الاستراتيجية للاستماع للأحبه والأصدقاء والزملاء :) أول ما يبدي الحوار بموسيقى حزينة أو غاضبه أقلب الموجه تحفيز ايجابي و تقليل للنفس الكئيب و تشتيت لموجات الغضب :)
و أطفي في داخلي لاقط الكآبه.

Antonio يقول...

يحفظج ربي يا الزين ويشافيج من كل مكروه يارب :)

مشاهد اعجبتي كثيرا واستمتع معها بنهاية اسبوع جميلة :)

اطال الله بصحتك وعافيتك

وبانتظار الزين دائما وابدا

ودي
تقديري
احترامي
وداعائي بشفاكي

المقوع الشرقي يقول...

زنزوون
الغلا كله

مازالت الدنيا بخير
لو خليت خربت..مازال في ناس طيبة ..مثل النسمة الباردة
يعطوون بلا مقابل
يحتوون..بلا حدود

الله لا يخليج من حبايبج

DiLLi O MiLLi يقول...

صبحج الله بالخير حبيبتي
:**


أنا مسيره عليج مرة ثانية عندي تعقيب على تعلق أخوي أجار الدين







أجــــار الــــدين كشـــمـــش




صبحك الله بالخير طال عمرك
:)


عندي تعقيب على كلمة قلتها ... أنت قلت :
"انا اعتقد نومي العمييق الظهر ...اما الليل ...انا سويره "

الكلمة أهي "سويره"!
هذي اللي تنقال بمثل "سوير الليل" ... كلمة "سوير" خطـــــأ
ماكو كلمة بالمعجم الكويتي أسمها "سوير"!

الكلــــــــمة الصحيحـــــــة هي : "ســـويهــــر "
ولما نقول "ســــويهــــر الليل" يعني ســهران الليل
:)

وترى الكلمة الصحيحة أنا توني من جم سنة بس عرفتها من زوجة عمي
:)
ولا أنا كلة أقول : سوير الليل!




وسلامتك ...

:)





.

Engineer A يقول...

الله يحفظج ويخليج ..

مشاهد عجيبة .. واقعية .. ومثيرة! :)

ودمتي بصحة وعافية

الزين يقول...

لكم كلكم
حبي ومودتي
وسامحوني اشغلتكم علي
بس موضوع المستشفى كان من عرض السوالف
وكنت معتقده ان الكل عارف هالموضوع لأني نشرت من قبل اني كانسر سيرفايفر

انا بخير وعافية ولله الحمد والمنه
وربي من علي بالشفا
وحباني بنعمه ما حبى الكثير فيها
وخسروا معركتهم مع مرض ما يرحم مثل هالمرض

كثير كانوا معاي يراجعون وشفتهم يختفون وحده ورى الثانية
ولما كنت اسأل دايما الجواب كان مؤلم

الموضوع له اشجان كثيره
وانا فخوره اني اقول اني كنت مريضه وشفيت
عشان اعطي الناس الأمل ان في ناس تشفى منه وترجع تعيش حياتها بس بفارق بسيط
تعرف قيمه الحياة اكثر
بعد ما قربت من الموت
وتعرف ان اليوم اللي يروح ما يرجع
وتعرف ان الحب هو علاج لكل شي
وان المغفرة والرحمه هي طريج السلام والهدوء النفسي
وان العطاء هو سبب للإستمرار
والإبتسامه هي دوا لكل زعل

تعلمت شغلات وايده
واعتبر نفسي محظوظه ان الإمتحان كان صعب
بس تعديته

الموضوع لما الحين مو عادي بالنسبه لي
مراجعتي لما الحين تحمل قلق وخوف
بس برحمة رب العباد اتخطاها
واتعامل معاها كشيء عادي وروتيني

وتمر الأيام
وتمشي الحياة
وربي يرحم كل اللي راحوا وياجرهم
ويرحم حال اللي ابتلاهم وهم ياجرهم


بالنهايه
لكم كلكم اعتذاري اذا كنت سببت لكم اي ضيق

وربي لا يحرمني منكم

سبمبوت يقول...

حميمية كلماتك تجعلني ابتسم، تدمع عيناي ثم ابتسم مرة اخرى

ربي ينشر رحمته طوق حولك اينما ذهبت وذهب احبابك.

kal ho na ho يقول...

عسى ربي يتمم عليج ..ويلبسج ثوب العافية .. ويثبتج على اللي أنتي فيه..ياربي ياحبيبي ..


ودمتم

خاتون يقول...

حبيبتي و الله
الحمد الله طمنتينا
عسى ربي يلبسج الصحة و العافية لي آخر يوم بحياتج و يبارك بعمرج و ما ينحرمون حبايبج منج
آميــــــــــــن

U know WHO يقول...

زيوووون
توني أمر بلوقج اليوم
انتي مريضة !!!!
عورني قلبي..
:(