.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

14.3.10

كتبي عن الحياة ... كتبي عن الكاكاو


صباح السبت

صباحا مليئا بالكسل للتمتع بآخر ساعات الويك اند
هدوء يعم المنزل .. فمن يستيقظ باكرا في يوم كهذا غيري أنا وحماماتي .. وافتح شبابيكي على مصراعيها لأتغنى مع تلك الحمامات التي باتت تسابق أفكاري وهي تحلق بشكل دائري وبحركة منظمه متفق عليها وهي تتبع قائد سربها

ابتسم لإشراقة شمسي ... أتنفس مع تنفس تلك النسمات الصباحية اللطيفة ... وأسبح مع موسيقى مدونتي في عالمي وحدي الى ان يفتح باب الغرفه .. واسمع خطوات صغيره تتجه نحوي ...
تتوقف قليلا تلك الخطوات ... أضع كوب القهوة جانبا .. وانتظر ظهور الزائر الصباحي الغير متوقع

"منو"
يطل علي بعينيه الواسعتين وابتسامه شقاقيه عجيبه
"عزيز"
"يمه ... خرعتني .. ليش قاعد مبجر"
"عشان نايم مبجر"
"هممم .. جواب منطقي"
يضحك باستغراب"يعني شنو منطقي"
"تصدق ... ما اعرف اشرح لك يعني شنو منطقي .. بس أنا فاهمتها"
"زيون .. إنتي كنتي شاطره بالمدرسة"
واحتار بماذا اجيبه ... فمن يعرف عزيز يعلم انه لا يسأل لوجه الله ... دائما هناك قصه أخرى ينتظر أن يحكيها بعد جواب الطرف الآخر
" هممم ... مو وايد ... نص ونص .. ليش؟"
"يعني مثل وهاب ... عشان ابي اعرف"
طبعا وهاب هو نصفه الآخر .. توأمه .. وماراح تصدقون شكثر اهم مختلفين بكل شي مع انهم توأم
"وعقب ما تعرف"
"بس ... شنو بعد!! ... بعدين احنا لازم نعرف كل شي ... ونتعلم كل شي .. الأبله قالت جذي"
"وكل شي تقوله الأبله تسويه؟"
كان سؤالي ماكرا قليلا ... وكان جوابه صريحا جدا
"لا مو كل شي ... ساعات مالي خلق اكتب الواجب "
يصمت قليلا ... يتفحص اللاب توب ثم يسألني
"شنو كتبتي؟"
"ما كتبت"
"ليش؟"
ويا كثر ليشات عزيز "ما عندي شي اكتبه "
يفكر قليلا .. ينظر للسقف بتركيز ثم يلتفت لي مبتسما "عندي ذكره "( ذكره يعني فكره لاحظوا)
اضحك " شنو الذكره"
تتسع عيناه .. وتلمع بشكل جميل "كتبي عن الحياة"
"أي  حياة؟"
"حياتنا شفيج ... انتي مو كله تكتبين عن الموت ... فضه ماتت ... موزه ماتت.. مادري منو مات ..كتبي عن حياتنا "

يعني حتى عزيز محتج :)
مع العلم ان لما تملكه الفضول لمعرفة قصه فضه بعد نقاش عائلي بيوم الزواره ... قصيت له القصه بس ما قلت له شاهين ذبح فضه .. قلت له مرضت وماتت
"كلنا بنموت ... يعني كل الناس ينولدون .. يعيشون .. يكبرون .. ويموتون"
"هممم ... صح ... بس كل واحد يعيش غير"
"شلون غير؟"
"يعني انا عيشتي غير عن سلمان .. وسلمان عيشته غير عن غلويااا ... وغلويا عيشتها غير عن خلود... كل واحد غير.. يعني بيصير عندج قصص وااايد .. شفيج "
اصمت قليلا ... افكر قليلا " اوكي ... شنو يعني اكتب عن حياتكم"
"كتبي عن المدرسه انها مليقه ... هممم .. ولا اقول لج كتبي عن الصبيان اللي طقوني عند السلم وانا نازل من حصة الرسم ..جان اعلم عليهم الناظره .."
"في صبيان طقوك .. متى؟"
يقولها باستصغار "من زمان .. بس يوم ثاني طقيناهم انا ووهاب"
ابتسم " كفو.. انزين ليش ما قلت حق ابوك يروح يهاوشهم"
"لا خلاص ...علمت عليهم الناظره واهي هاوشتهم "
" عدل "
نصمت قليلا .. وكلٌ يسرح مع افكاره
يمدد رجليه .. يستلقي الى جانبي .. يشاركني الوسادة ... يرسم اشكالا بالهواء ... يمسك يدي ... يتفحصها .. يهزها ... ثم يعتدل
"عندي ذكره احلى "
"قول"
تتسع عيناه وهي مليئة بالإثاره "كتبي عن الكاكاو ... احلا شي بالدنيا"
"انت نمله صح .. كل شي فيه شكر تحبه"
يقهقه ثم يبادرني " بس ترى النمله ذكية"
"شدراك؟؟"
"انا ادري ... علمونا بالمدرسه "
"هممم .. وايد زين...(ثم اردف) بس انا ما احب الكاكاو"
يبتسم بتشكك وينظر لي بعين الريبه "لاااااا .. بس تاكلين بلاك فورست "
ارفع عيناي واهمس " ايه صح .. احبها"
يعترف "حتى انا احبها "
التفت له لأمطره بقبلاتي وهو يقهقه ... يصرخ بشقاوة ان اتوقف
يمسح خده ثم " وييييييع ... كله سعبولاتج"
اضحك باستظراف "يالتعبان .. بعدين اسمها سعابيل مو سعبولات "
يصمت قليلا " نفس الشي"
"تريقت؟؟"
"لا ناطر ابوي يقتل الخروف .. "
@@
" أي خروف"
"اللي كان يقول بياع امس بالليل ما سمعتيه"
" خروف يقول بياع؟؟ لا ما سمعته"
"ايييييييه .. شفيج هذا حجي الخرفان ... يعني مو مثلنا يتكلمون .. اهم يقولون بيااااع "
" عزيز ... ما يقولون بياع ترى ... يقولون امباااع "
يضحك لدرجة انه ينسدح وهو غشيان علي
"ترى انتي ما تعرفين .. كلامج كله غلط "
@@
استسلم " انزين وابوك بيقتله "
"ايه ابوي يعرف شلون يقتل الخرفان .. يعني قتاَل ..... ووهاب وياهم قاعد يساعدهم ... انا مالي خلق ... (يمتعض ) يوعاااان"
"ابوك قتال !! يا سلااااام ....وانت ناطر الجبده"
"والقلب"
"يمه !!!...عزيز ترى انت مفترس"
يؤكد"مثل الأسد يعني"
" تقريبا .. بس من غير شعرررر"
يضحك " بقوم آكل جباتي .. تبين"
"ايه ابي ... "
ننهض من السرير سويا ... يمسك يدي ... "بعدين ناكل جبدة الخروف"
"اييييييييو .. ما احبها"
ينظر لي باستغراب .. "عيل اكلي القلب "
@@



آآخ .. ليتني ارد بعمر عزيز ... صج الحياة لها طعم ثاني .. وزوايا ثانية ... وقصص مختلفه .. ابسط .. واجمل



هذا البوست برعاية عزيز وبناء على طلبه

:)

هناك 58 تعليقًا:

aL-NooR . يقول...

يا حلووووووووووه
وااااي ..حبيته ترى

تصدقين برائتهم تخليج تستطعمين طعم الدنيا تحسينها شي حلووو ..و تضحكين من قلب ...ودج لو تقعدين تسولفين و تطفرينهم و تجاوبينهم قد ما تقدرين ..
لو اني اطفر من اليهال بسرعة بس ..في نوعية يهال قعدته ما تنمل ..


اشوه طلعتي من ربيعي اما ما احب الكاكاو ..ولي شتيهيته يحتفلون فيني


يا حلو البوستات العفوية
شفافة مثل صاحبتهم
و عزيزان :*
هني و عافية


****************

Sami يقول...

يا يحليله ...الله يصلحه و يطرح فيه البركه :)

نون النساء يقول...

ههههههه يا حلو اليهال
وياحلو قلوبهم
وياحلو السوالف وياهم


بس ياكلون القلب إذا عقب سالفه ليش نفس اخواني التوام

ايليييين ماتخلص الليشات كلها
واتصيرين تألفين علشان اتردين على ليشاتهم..




الله يبلغكم بعزيز ووهاب وغلويا وكل اطفال العايلة ان شاء الله

Seema* يقول...

يا حلو عزيز ويا حلو سوالفه :")
Kids knows things you don't know
& Old people knows things you don't know.
For that you should sit with whom at your age, younger, and older.

meq8 يقول...

الله يخلي لكم عزيزان و و هابي
يعجبني اسلوبج القصصي أكثر من الأدبي ( النثر )
انت فعلا رائعة في السرد و السوالف
انا كل يوم ادش انطر فضة و شاهين
وانصدمت بالتفاصيل اليديدة اللي ذكرتيها بال blogg
متى شاهين ذبح فضة ؟
و ليش ما اقدر احصل blog الحلقات
و لك جزيييييل الشكر

الاوركيده يقول...

الله يحفظة ويحمي لج يالزين

سوالفة عسل وناطعة ومن كل صوب وحلوة مثلج

:)

chandal/danchal!! يقول...

يا زين عزيز ويازين سوالفه... يا رب يحفظه ويبلغج فيه وبكل العيلان

:)

انتي لو تشوفين الكشرة وانا اقرا البوست اللي يبيله اعادة من حلاته

وبعدين انتي من بأمره تصلحين حق اليهال؟... حلاتهم ببدلياتهم... طفارتي تصحيح الاخطاء للأطافيل... تعالي شوفي نجرتي مع مستر شربت!


يا زين الكاكاو زيناه (ودي آخذه بالوريد!)


قمت اعاطس لما وصلت البلاك فوريست!... يا ساتر, بلاك فوريست ولا عنها!

Nikon 8 يقول...

يا زين سوالفه وبدلياته البريئة
المهم إنج إنتي اللي طلعتي غلط وهو الصح
والله يحفظ عزوز اللي غسل قلوبنا بعفويته عن نكد حصة ودوابيرها !!!

BookMark يقول...

يمه حلاااته :)

اسمالله عليه

ساعات القعدة مع اليهال أونس من غيرهم ..
مو ساعات .. إلا دايمًا !

حالِمه .., يقول...

الله يحفظهم :*
ويلااا اكتبي لنا عن الكاكاو
:q

/

miss ur comments on my posts :(

Mamloo7a Q8ia يقول...

مساء الخير على الزين وزوارها

ربي يحفظ لج عزيز
ويخلي لج ذكراته
;)
زوغه وخف طينه
وحبيته اكثر لانه يحب الكاكاو
وانا من عشاق الكاكاو

الولد متذوق اصلي
:))

الله يخليهم لج كلهم ويبلغج فيهم يا رب
:**

غير معرف يقول...

هاهاهاهي وضحكة تالي الليل كبر السما



يثلم ربي والله ( ليش مو يسلم )
مادري ليش مع اليهال اصير ثرمه و لدغة والصاد سين والعين ألف مادري مادري...
على طاري انت نملة كلشي حلو اتحبه

اخو رفيجتي عنونو كل ماشافني استخدم سكرين ( سكر الدايت )

يقولي عووووع شنو هالشكر الي حتى النمله ما تحبه!!!!


عاد صج؟؟؟؟؟؟؟ النمل ما يحب سكريني :(؟؟؟


رب ييحفظه ويحميه
ويصلحه ويبارك لكم فيه


حبي يالزين ..من زمان عن هالسوالف الحلوا:) عاش الراعي الرسمي لهالبوست...عاش عاش عاش

:*

المقوع الشرقي يقول...

الزين كله

واااحلاته اسم الله علييه الله يحفظة ويخليه لكم..

اقرا البوست واتبسوم عليه..وعلى اسويلفاته

سللم قلبه

عطاج المفيد عيشته غير عن سلمان وسلمان عيشته غير عن غلوي
:)
قوليله رفيجتى بيتهم كله كاكاو
بسوي وياه حزب الكاكاويين
وهو القائد الأعلى للقوات الكاكاوية
وانا خل يحطني بفيلق الكت كات

أشرايه؟:)

DiLLi O MiLLi يقول...

لووووووووول .....
أما عزوز هذا نكتــــــــــــه !! أسم الله عليه
:)



وأنتي عســـــل ،،، كثري من هالخفـــــة الطينــــــــه!

:**





.

Tekana يقول...

ربي يخليه ويحفظه ويبلغ اهله فيه، صج اليهال عالم ثاني ممتع وبرئ وشفاف. لو اقعد ساعات اسولف مع ياهل ماامل احب سوالفهم

Unknown يقول...

زيون كتبي عن عزوز ووهاب وربي يحفظهم



عيل شاهين قتل فضه


ايا الظالم

may يقول...

صباح الورد
ياحلو البوست اللي يشرح النفس ع الصبح

الله يخليج لج وهابي وعزيز وسلمان وغلويا وخلود ، وكووووول اليهال يحفظهم ربي ويخليهم لنا..

تذكرت كلمة يدتي :
((( ياليت قلبي قلب ياهل )))

Antonio يقول...

الله يحفظه ان شاء الله من كل شر :)

واكيد بعد وهاب وغلويه وكل العيال ان شاء الله :)

بوست اسعدني جدا في الصباح الباكر ما اجمل ما تكتبين وما اجمل روح الطفولة العذبه التي نحتاج ان نعيشها مع من يمرون بها :)

الجلوس مع الاطفال راحة ذهنية حلوة جدا اذ يدخلونك الى عالمهم البسيط العفوي والمرح بنفس الوقت ...

الله يحفظهم ويخليهم لنا جميعا

الزين دائما تمتعنا بالزين

وبانتظار الزين دائما :)

قرمت يقول...

الله يطرح فيه البركة إنشالله ويخليه لأهله.. صج سوالف اليهال تونس، ذكرتني ببنت بنت خالتي الصغيرة تموت على شيء اسمه هدايا، كل ما أسافر تدق، تناديني خالي قرمت شنو بتيبلي؟

عزيزان فنتق الله يحفظه إن شاء الله

الزين يقول...
أزال المؤلف هذا التعليق.
الزين يقول...

عزيز يشكر لكم تفاعلكم واقبالكم المنقطع النظير على سوالفه

ويبشركم ان سوالفه مستمره
ويطالبني بكتابة بوست كل اسبوع عن قصصه
:)

على فكره عزيز يكتب قصص من طقة الفراشه جميله
والقطه هبله
والأسد شجاع

نوافيكم بها مستقبلا ان شاء الله

الزين يقول...

النور

حبتج العافية بعد قلبي
:)

شوفي مع اني ما احب اليهال
ولا املك القدرة على التكيف مع صيحتهم ولويتهم

بس هالأثنين غيييير
عزيز له سوالف تخليج تفكرين
ووهاب له حركات تخليج تستغربين

والكاكاو ريحته تلوع جبدي
:$

وصباحج عسل

الزين يقول...

سامي

الله يسلمك ويحفظ لك حبايبك
:)

الزين يقول...

نون

:)
خلي الليش
شنو يعني !!
شلون ترقعينها
كل موضوع او جمله تنتهي بشنو يعني

:)

ويبلغكم بكل الأطافيل اللي عندكم يارب

الزين يقول...

سيما

:)

صاجه
عجبني الكلام

الزين يقول...

Me

الله يسلمج بعد قلبي
:)
الناس فيما يعشقون مذاهب
انتي تحبين القصص اكثر
واكو ناس يحبون النثر اكير
وكلكم يسعدني تواجدكم وتعليقكم

اما الجزء الآخر لفضه وشاهين فحطيته اسبوع كامل
وشلته قبل يومين تقريبا
شلون ما شفتيه
على العموم
انتي واصله اي جزء
تركي لي ايميلج
وما يصير خاطرج الا طيب

وما تقدرين تشوفينهم لأني شايلتهم
وفي صدد الإضافه لتحويل القصه لروايه
:)

الزين يقول...

دمعه

ويحفظ اللي عندج يارب
وصبري خل يكبرون اللي عندج

وسطري من السوالف
:**

الزين يقول...

جندل

بعد قلبي يا جن جن
ويبلغج باللي عندج
وخصوصا ام النور

وادري فيج تحبين سوالف اليهال
:)

ما كنت اصلح له يا جن جن
كنت اتحرش فيه
واحلى شي لما تشوفين ردة فعله
:)

بلاك فوريست يس؟؟
علامها
انا اغرق فيها بشكل مو طبيعي
بس مو على كل حزة
:)

الزين يقول...

نيكون

ويييه
ما شفتي شي من البدليات
:))
انتي بس عطيه ويه خل يسولف
وسمعي

انا بسوي جمعية المناهضين لحصه
شرايج
:)

الزين يقول...

بوك مارك

ايه والله صاجه
قعدتهم ترد الروح

:)

الزين يقول...

حالمه

حبيبة قلبي ويحفظ لج حبايبج يارب

صعبه اكتب عن الكاكاو
:\
ما احبه

ان شاء الله
ولا يهمج امرج اليوم

الزين يقول...

مملوحه

صباح النور على البنور

يسلم عمرج يارب ويحفظ لج حبايبج يا مملوحه

مشكوووره وتسلمين على الدعاء اللي طالع من القلب

:**

الزين يقول...

سلة

لووووول
ضحكتج وصلت لين اقصى قلبي
:**
ياحبي لج يا سله

البوست الياي راح يكون برعاية وهاب
لأن غار من عزيز
:$

ويقول انا احب عزيز اكثر
واحترت معاهم
:)

الزين يقول...

المقوع

يسلم عمرج ويحفظ لج حبايبج يارب

بطرح عليه الموضوع لما يرجع من المدرسه وارجع انا من الدوام

:)
صدقيني بيوافق خصوصا اذا عندكم باونتي
:))

الزين يقول...

ديللي

لوووول
شفتيه
عجبه صح
:)

بس على الهواء مباشره شي ثاني
مع التعبير والعيون اللي كلها تبقق
والجلج اللي جنه بوك حمالي

:))

الزين يقول...

تكانه

صاجه
سوالفهم تنقلج لعالم ابسط واجمل واسهل
:*

مشكوره بعد قلبي

الزين يقول...

بدر

ان شاء الله
راح اكتب عنهم
لغاية ما اجهز للقصه اليديده اللي في بالي

:)

ايه والله ذبحها يابدر حسبي الله عليه

بس هل كيف انا ماشفتك تعلق عندي من قبل
وانت متابع فضه!!

الزين يقول...

مي

يااا اهلا وسهلا
:**

صباح العذوبه كلها
الله يخليهم لأهلهم كلهم
انا حدي اجابل واحد
لا تشوفيني لما يلتمون بيوم الزواره

يااا لهوي
ما اتحمل لعبهم ونجرتهم
ودي اسوي لهم ميوووت

:)
وترى وايد يخافون مني
احم

الزين يقول...

انتونيو

يسلمك من كل شر يارب
:)

شوف انا شكلي بتفرغ لسوالف اليهال هاليومين
:)

لين تملون
قصه فضه ارهقت مشاعري
وقاعده امخمخ بفكرة يديده


فمحتاجه كسرة مود
وباخذها لهية على عزيز ووهاب
وتحملوني

:)

الزين يقول...

قرمت

يحفظ لك حبايبك يالشيخ

انت اترك عنك عزيز
شوف وهاب اللي اذا كبر بيشتغل صلى الله عليه وسلم
@@

:)
متأثر وايد بسيرة الرسول عليه افضل الصلاة والسلام
وعلى باله الرساله وظيفه
:)

حياك الله ومشكور على المرور

ميمة السبيت يقول...

** شوفي زيووون انا دايما اقوول لصبيان ملاقة و اللي ما ياب بنية ما ياب بس اسمالله عليه عزيز وايد وايد غيرلي هالفكره ..

- الله يحفظه و يخليه لكم انشالله وتشوفون معرس

المقوع الشرقي يقول...

ام الدل

لج فريية

أد الدنيا

واحشانى

وتقولين لى انتى وين اتغطين

الحين انا اللي بانشدج

انتى وينننج

:))

.***

..


زنزوون

الباونتى والكت كات ..عيال خاله

:)

حسين يقول...

يحليله عزوز

ونبي بوست عن الكاكاو

الليوان يقول...

حبيبتي الزين
المال والبنون زينة الحياة الدنيا
والله يحفظ لكم كل اليهاهيل اللي عندكم
بس تدرين انا بنيتي الله يخليها نفس الطبع كل شي عندها شلون وليش
وشحقة ما تقتنع بسرعة باي اجابة
بس ماعليج يقولون هذي من علامات الذكاء:)
الله يخليلنا يخليلكم
ويبارك فيهم يارب
وحبي الكاكاو الله يعافيج
ترى اللي مايحبة ماحب ؛)
http://al-lewaan.blogspot.com/
اتشرف بزيارتج مدونتي اليديدة
ترى ماصار لي الا يومين
عاد شجعيني

جبريت يقول...

اولا لو انه عزيز واحد من عيال اختي جان ناحره بالدار مثل ما انحروا الخروف واحتمال اقتله خنقا لمجرد انه دش الدار

ثانيا

مع اني ما تابعت لا فضه ولا شاهين ولا رفيجه صقر بس صح كلامه ليش ما تكتبين عن الحياة؟؟؟

تسوين حبكه وربكه بالقصه طرف حب وطرف كره وطرف طيب وطرف لعوب وطرف مادري شنو لتوصفين التعدديه الحياتيه ترا اهم الي يشوفون صح واحنا الي نشوف غلط.

اما على الككاو نفس الحاله ما احبه ولا احب الحلو احب الموالح من انا صغير اعتقد السبب كان من العمه الي كانت تبي تغر حلجي مثل البلبل بالحلو الي اهي مسويته او انا صج ما استسيغ طعمه الله العالم

بس عسى مو نفس ولدنا ضروس مشلعه ومطشره ؟؟؟

الوتيــــــــــن يقول...

ويسلّم قلبه عزوز .. وياحلت الطفولة صج صج العمر اللي راح مايرد .. بس تبقى ذكراه أحلى ذكرى

ربي يحفظه لكم يالزين .. ويحفظج

تراب الكويت يقول...

صباحج كاكاوي النكهه P:

نقطة ضعفي الكاكاو :( للأسف ما تحبيه

شلونج زوزو

بوست يسحب الضحكه من قلب الملل:))

عسى الله يحفظهم ويحفظج من كل شر

دعواتي الصادقه وابي دعواتج بالمقابل

تراب من هناك ...

الزين يقول...

ميمة السبيت

انا مو زود مع اليهال وملاقتهم ترى
يعني كلش ما اعطي ويه

بس هذولي غير
لهم سوالف تشوق

وترى انا عندي البنات مليقين
مادري
!!
بس في بنات من دلعهم دعل
يعلون ويسلون

:)

ويبلغج باللي عندج يا قلبي انتي
:*

الزين يقول...

المقوع

ومنا لحبيبتنا ديللي


وكلهم شيره يا ام الحلاة انتي
:*

الزين يقول...

حسين

:)

بحاول اكتب عن الكاكاو

الزين يقول...

بائعة السمسمية

يسلم عمرج ويبلغج باللي عندج

والكاكاو جبدي تلوع من ريحه
وحلاته تييب لي الشرقه واقعد اكح من اليوم لين باجر

ما احبه
شسوي

الزين يقول...

جبرييت

يا اهلا وسهلا
زياتك الأولي لمدونتي اعتقد يالشيخ
وجدا سعيده فيها

ثانيا
@@
انا تصروعت من ردة فعلك لو عزيز اللي داش عليك
حرام
!!

لا انا غرفتي خري مري
يعني ممكن ارجع من الدوام الاقيهم ناطريني داخل
وحايسين الدنيا
وماكو صورة بمجلة مو راسمين لها شوارب
ولحية
وحبة خال
لاحظ
:) اهم شي الحبة الخال

وغلطان انك ما تابعت فضه
اتصور بتيي على هواك
لأن فيها من سوالف اللواوين
والبحر
تدور احداثها بالأربعينات
والقصه فيها وايد عتق
ووايد من تراثنا
:)


وان شاء الله قاعده احضر لقصه يديده
بس فيها وايد شقلبات فكرية
واحتمال انكره عقبها
:))



واخييييرا لقيت احد مثلي
ما اداني الحلو
تلوع جبدي منه
عطني موالح

ودام دليت الطريج
لا تباعد
حياك الله

الزين يقول...

الوتين


تصدقين عاد
لما اتذكر طفولتي
الاقي نفسي نزززغه
ومطلعه عيون امي مسكينه

:)

الزين يقول...

تراب

:)
صباحج بحلاة روحج يا تراب

انا بخير وعافية
انتي اللي شلونج ووين تغطين

ربي يحفظج ويسمح دربج ويسعدج ويرضى عليج

بس وين هناك
!!

جبريت يقول...

طريج المدونه ادله

لكن الميول عندي اكثر شي قريب للنظرات السياسيه وهموم القلب جعل هموم القلب بعيده عنج

بس اذا كتبتي موضوع عن الحداق او عرضتي شي من الحداق سأكون اول المتحديين بإذن الله لعرض مقاطع تل السمج وصورهم وكمياتهم بأحد طراريد البيت

U know WHO يقول...

زيوووونة
ياحلاته بوسعيد :)
خفيف طينة وعيار
عليكم بالعافية المعلاق ؛)

ReLaaaX يقول...

‎​‎​‏​‏​‏​‏​‏ واااااااي زووووغة زوووووووغة هالصبي تبارك الرحمن ..
حبيتهم اسمالله عليهم؛***
عسى الله يحفظهم ويبارك فيهم

NOIR يقول...

انا
ابي
عزيز
انا
ابي
عزيز
انا
ابي
عزيز!!
زووووووووووغه! امبيه حسيت عنده كرشه و عنده ظرس جدام الا مو مايل مكسور

وختي و ختي وختــــــــــي:**

عاش الكااكاو و عاش عزيز

ثيمج اليديد اينن! مترووس حياات
انا توني اشوفه ! كنت غايبه عن الكل حتى عن نفسي:)
الله يوفقج
goooo aziz sis