انت معاي بكل صباح لندني
بكل شمس تلتحف غيمة مطر
بكل نسمة هوى ...
بكل ورقة شجر رقصت وهي تلتقي مع العشب الخضر
انت معاي بقهوتي بهذا الصباح ... بجريدة تحمل اسم الوطن ...
بساعة تسابق كل الزمن ..... تبي الوقت يمر ... لدفا كفك .. لحضن صدرك تنتظر...
انت معاي بكل ساعات السهر ... فكرة تعبر بخاطري .. وكلمة ... ودقة خفوق لشوف عينك تحتضر
انت معاي بكل لون البسه ... بكل شال كتفي يلتف فيه و يلمسه ...
بكل عطر انثره وزولي يحتويه ويهمسه
انت معاي بكل خطوات المسا ....
بين الدروب ...
تحت انكسارات الضوى ...
بانعكاس صورتي على ذاك الزجاج ...عند ذاك المحل .... ولوفه من يشبهك خلفي يمر ...
المحه ...
اتبعه .... يبتسم لي .....
واتراجع وخاطري منكسر
ماهو انت ... هو خيالي اللي تعب ....
هو الوله اللي مني كلي على طواريك ينسكب ...
انت معاي بكل السوالف والحكي ....
بضحكتي ...
بكحل عيني ...
بأحمر شفاهي ...
بخاتمي ... باسوارتي ......
بوقفتي هناك ... اناظر الشارع من شباك غرفتي وابعد ستارتي ....
انت معاي بعين لندن ....
تعد الضوى ... وتمسك بيدك النجم الذي على صدري هوى ....
انت معاي بطعم الربيع .... فاكهه متلونه على شفاهي طعمها يضيع
انت معاي ... بكتاب بيدي احمله ....
كل ما فتحته عيت عيوني اقراه واكمله ... تسرقني منه الطواري واهمله
انت معاي ... فوق صفحات اللحن ...
مع حكي الكمان لما يشتاق ويحن
مع بكي قيثارة تعبت من بعد المسافات وعيت تون
مع الغنج اللي الدفوف تحمله
مع غفوة ... تزرعك بالحلم .....وما تكمله
بكل الراحة والتعب
........
ما عرفت اقول شكثر انت معاي
تصدق ...
................
بس
هناك 27 تعليقًا:
آآآآي قلبي
احم احم
الحين تطمنت على غاليتي
إي جذي أبيج
وحشني زولك يا قمر
:*
وي أول وحده
صدق من قال
القلوب شواهد
وأنتِ معانا..
مثل ما اهوا معاج...
جميله يالزين
بكل الألوان
وبكل التفاصيل
تبقين أنتِ الأجمل
حبي :**
كلام حلو ومشاعر احلى
تحياتي لج :)
مع غفوة
تزرعك بالحلم
وما تكمله
..
عورتني كلماتج ..والتانغو
وكملتيها ..
بلندن
يوزي يا زنزون
.*
اه يالزين
يا مساء العسل قاعدة حتي متعسرة مو نايمة عدل من اليهال ولما نامو طارت النومة وقريت كلامج وغيرت المود كله
:)
الله يحفظ ياالزين
السلام عليكم اختي
ما أدري منين أبدي، الزخم الشعوري الكثيف يتلمسه القارئ بوضوح و لذالك صعب التوقف عن ترجمته، فقد بان كالسيل ينهمر انهمارا، القصيدة هذه تتلاحم مع فكرة "نقطة آخر السطر" التي طرحتيها سابقا
الزين من الكلام هو كلام الزين
هذي باتت مطبوعة بالراس اختي
لا فرق الله بينك و بين كل من أحببت اختي و جمعكم تحت ظل رحمته و بركته و توفيقه في الدنيا و الآخرة
دمت و الأهل و الأحبة برعاية الله
السلام عليكم اختي
ما أدري منين أبدي، الزخم الشعوري الكثيف يتلمسه القارئ بوضوح و لذالك صعب التوقف عن ترجمته، فقد بان كالسيل ينهمر انهمارا، القصيدة هذه تتلاحم مع فكرة "نقطة آخر السطر" التي طرحتيها سابقا
زين الكلام هو كلام الزين
لا فرق الله بينك و بين كل من أحببت اختي و جمعكم تحت ظل رحمته و بركته و توفيقه في الدنيا و الآخرة
دمت و الأهل و الأحبة برعاية الله
ما عرفت اقوول اشكثر انت معاي
تصدق
بس
الللللله كل هالنغزااات وللحين
تتوقعين ان ما قدرتي تقوولين اللي
تبينه
؟؟؟؟؟؟؟؟؟؟؟؟
ياااحلو الخيال
فمالله
الله الله يالزين الجو اللندني عامل عمايلوه معاج
:)
كلمات ولا أحلى ،، وموسيقى التانغو خلتنا نعيش الجو
مبدعة كالعادة ...
:**
مساء الخيرات
اتوقع في حس غريب
بين الكلمات اسمع صوت مطر
وجو بارد
ولا انا غلطانة؟
:)
الزين منهو عنده ...
:)
حياتي الزين كله انتي
الكلام عجبني ، الا طيرني فوق .. روووعة..
شلون الحين ، عجبني النص وودي آخذ منه لمسج ... يصير والا الحقوق محفوظة..؟
أول أربع سطور
بالمصادفه
هي أحد الصور الراسخه في أعماقي منذ 1997
أظنها من أحد لقطات
شريط إحتضاري
بالضبط ذات الأجواء والبلد وصباحا
يومها لاحقت عيني ورقه
وهي تتساقط وتلتف وتتراقص
بينما كنت ألاحقها بتسبيح
وعجب
كيف أن سقوط هذه الورقه التي أراها الآن مكتوب من قبل أن تخلق السماوات والأرض
سبحان الله سبحان الله
إلى أن سكنت على العشب الأخضر
لماذا هناك لقطات بسيطه
لاتمحى أبدا
مثل
لقطه حينما كان عمري ست سنوات تقريبا
في مطبخ بيت جدتي
أفتح الثلاجه
وأحس بالبراد من داخلها
وبينما كنت أمسك
بالباب وقد فتح بمقدار إنشين
فتوقفت وجاء في خاطري
إني لن أنسى هذه اللحظة أبداً ماحييت
وبالفعل
الزين
تخيلي قاعد أحتضر ويشتغل شريط الذكريات عندي
ورقه تسقط
ثلاجه تفتح
ومن هالطقه لقطات
لاتحضرني الآن
اتراولي بقعد أنفض من الضحك
وآنا إمغمض أشوف الفيلم
:))
واللي دار ماداري عبالهم
هذي شرقة الإحتضار
ترى صج شي يضحك واحد بموت
وقاعد يشوف نفسه لما كان عمره ست اسنين
وهو قاعد يفتح الثلاجه في بيت يدته
مو؟
:)
زوز
:)
اسم الله على قلبج يا بعد قلبي انتي
:**
ووحشتني قعدتج وسوالفج العجيبة
:)))
زوز
ايه اول وحده
والله انا حشيت فيج حس
:))
وشواهد يا قلبي شواااهد
سلة
حبيبة قلبي ياسله
جميلة دائما بحضورك
:**
تكانه
:))
يا اهلا بالغايبة الحاضرة
انتي غبتي ورجعتي
شلونج
:)
المقوع الشرقي
وه يا بخت عين من تحرش فيج
:)
وبعدين انتي تعرفيني لازم شويه اتحرش بالقلوب الساهية
:*
دمعة
يا اهر بام عبدالعزيز وغالية
ربي يخليهم لج
ما عليه ماكو ربا من غير تعب
وامهاتنا ياما تعبوا معانا
:**
بو محمد
وعليكم السلام والرحمة يالشيخ
:)
قلت وكفيت ووفيت ياخوي
ربي يحفظ لك حبايبك ويعز غاليك
اللهم امين
ولك مثل ما دعيت وافضل يارب
اجار
:)
شفت شلون
ساعات حد ما تقول هم تحس انك ما قلت
والخيال دايما جميل
بس الأجمل هو الواقع
فمان الكريم
:)
ديللي
يا بعد من كل من زارني
:**
حبيبة قلب الزين
سكتي
الجو والتانغو
مآآآآمرة
:))))
منال
:*****
منتي غلطانه
وبيني وبينج كلام ثاني
مي
:)
حبيبتي
المدونة واللي فيها تحت امرج
جاسم
:$
ما فهمت
تحتضر!!
ترى الكلام يعور القلب
لا ياالزين
آسف والله ماقصدت أعور قلبج بكلمة إحتضار
خل أشرحلج
كنت أشير إلى مصادفة إنه بداية البوست كان وصف دقيق لصورة تعيش في داخلي
رغم إنها صورة بسيطة لسقوط ورقة شجرة وصارت تتراقص في الهوا ولاحقتها الين طاحت على العشب الاخضر
كنت في لندن الصبح والجو نفس ماوصفتي
وعابر وسط حديقه
وقت ماشفت الورقه تسقط تذكرت
آية وما تسقط من ورقة إلا في كتاب
فا كنت متعجب إنه كل هالتفاصيل لسقوط الورقة مسجله في القدر
وبعدين ذكرت بعض اللقطات الثانيه
وقلت بمعنى اذا كان صج الواحد يشوف شريط حياته وقت الاحتضار شكلي بضحك لما إتيي لقطة وآنا امبطل الثلاجه
شكو الى الحين متذكرها مادري
وبس
:)
طبعا الزين خلاص صرت اقرالج ومايحتاي اقول رايي الفني ,, عمياوي أحط 10 من 10 بعدين اقرا ماشاء الله عليج
ههههه
جل من لايسهو
تصحيح الآية
"وما تسقط من ورقة إلا يعلمها ولا حبة في ظلمات الأرض ولا رطب ولا يابس إلا في كتاب مبين"
إرسال تعليق