.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

20.10.09

زحمة شغل .. مدونات ... فيس بوك ... وبلاك ليست



7:00
صباح الثلاثاء
مؤشرا على تناصف الإسبوع وقرب نهايته
بانتظار نهاية الإسبوع بفارغ الصبر ... احلم برحلة حداق بغض النظر عن توافر الصيد ... فللبحر قصة اخرى ترويها شمس بوادر الشتاء ولطافة الهواء ودفء الشمس اللذيذ وهو ينعكس على كل ملامحي



7:30
تجولت بين المدونات باختلاف طرحها ... وتنوعها بين الجاد والأدبي والسوالف الخفيفة والتي تتسم بعضها بخفة الدم مما يضفي على بداية يومك ابتسامه تكون دافعك لمباشرة عملك رغم رتابته وضغوطه أحيانا
ولم أجد شيئا يستجد على قائمة الأمس غير ثلة بسيطة عرفت عنها تدفقها الدائم .. وغالبا ما انتظر جديدها
لأكتشف ان جو الرتابه قد عم على عالم المدونات ... واعتلت غيوم الإحباط الكثير منهم خصوصا من كان طرحها سياسي لما آل له حال البلد
واتجه الكثير من المدونين لموقع الفيس بوك لتقضية باقي اليوم بجو اجتماعي قريب الى جلسة الديوانية ولقضاء وقت ممتع اكثر ما بين سوالف وتعليقات احيانا لا تحمل غير لوووووول وكااااك وهاهاهاهاها



8:00
جرائد ... وقصاصات من المجلات والكثير من الأخبار المحلية والاقتصادية والنفطية ..
توارد الكثير من الورق على سطح مكتبي منها المستعجل ومنها ما يمكن تأجيله سمح لي بالسرحان قليلا والدخول بنقاش هامشي مع من تسكن عقلي .. وتناشبني كل يوم في كل شي اسويه

ومع فنجان القهوة فتحت ايميلي ابحث عن تواصل من قريب يضفي على يومي شيئا من الحميمية وقليلا من الدفء الإنساني لأجد ان حال الإن بوكس لا يختلف عن حال المدونات فهو ملئ بالرسائل الغير مرغوب فيها واللي نسميها جنك ميل .. والكثير من الإيميلات الرتيبة .



9:00
تليفوني يأبى أن يركن للصمت .... وتهل الطلبات اليومية ... ليبدأ ضغط العمل بخلق عشرتعش ايد لي حتى استطيع أن أوفي بكل المتطلبات بنفس الوقت

ردي على خط الدوام ... ردي على الموبايل ... جهزي رد بالأيميل وبعثيه كشديد الأهمية .... وجهزي مذكرة تلخصين فيها المشروع الفلاني وين وصل .... ليكون فنجان القهوة من آخر أولوياتي ... فيبرد ... واطلب غيره .. ويبرد واطلب غيره .. إلى ما لا نهاية
اهم شي بالموضوع إني كاسره خاطر التي بوي وياب لي عصير فريش بدل فنجان القهوة اللي مو قادرة اشربه



10:00
أجد الفرصة أخيرا لارتشاف القليل من القهوة العربية والتهام تمرة لأكسر مرارة القهوة بحلاوة التمر الصقعي الذي اعشقه
وللمرء فيما يعشق مذاهب
فما يستهويني من طعام قد لا يستهوي غيري ... وتتنوع الأذواق حتى لا تبور السلع ...
عموما آنا لا تستهويني النكهات المحلاة بالسكر أبدا ... ما أداني الكاكاو وتقلب جبدي من ريحته... انقث من الدونت ... اشرب قهوتي من غير سكر .... واكتشفت رغم هذا كله اني اذا احبطت ما اييب راس الإحباط الا قطعة من البلاك فورست والكثير من الكريمه الدسمه
اذا عندكم تفسير افيدونا افادكم الله!!



BLACK LIST

لو كان لك الخيار بوضع بلاك ليست شنو ممكن تحتوي هالليست ؟؟
بالنسبة لي أنا البلاك ليست مالتي هي عبارة معظم الأكل اللي امتنع عنه وكلش مو من ضمن نظامي الغذائي
مثل الفاست فود
الأكل المطعم بنكهات والوان صناعية
المعلبات بانواعها
الأكل الكثير الدسم .. الملح ... او السكر
وحتى البهارات الكثيره ما ارجحها


اعتقد هذا اقصى شي ممكن اسوي له بلاك ليست ...
وهنا يتبادر إلى ذهني سؤال ... لو كان عندي human بلاك ليست
منو ممكن يكون بهاللسته
لأجد الأخت اللي متربعة براسي تجاوبني من غير تردد
ماله داعي بلاك ليست لأن متى ما وصلوا انج تلغينهم اساسا من حياتج ... فاذن البلاك ليست مالتهم مالها داعي
فوجود لسته تحمل اسماءهم تعني انهم لازالوا موجودين في زاوية معينة من تفكيرج
وعدم وجود هذي اللسته دلالة على عدم وجودهم بتاتا بحياتج
هم رد منطقي
...



سؤال اخير قبل لا اسوي ببلش للبوست
شنو رايكم بالبلاك الليست اللي تكتب من قبل بعض الناس الفاضين في بعضا من البنات والأولاد مع الكثير من الأوصاف الجارحة لكل منهم
وتتداور اللسته على كل من يملك هوت ميل ... ياهو ميل ... وغيره
وتوصل للدواوين ... ولكل جمعة شباب أو بنات وتكون الأسامي المذكورة هي محور قيل وقال ومناقشات عقيمة
وتنحط سمعة المذكورين بهاللستة على المحك
!!

هل هي ظاهرة وسلوك جديد استجد على مجتمع محافظ ... تحكمه قيم وعادات ودين ينهي عن اغتياب الغير ورمي المحصنات

ولو كانت ظاهرة سلوكية مرفوضه اذن شلون استمرت ... وصرنا نسمع بلستة الجامعة الأمريكية ولستة جامعة الكويت ... وغيرها وغيرها

واخيرا ... شنو الحل وشلون ننهي هالظاهرة؟؟؟؟








وحان وقت العمل
....







هناك 39 تعليقًا:

mellow يقول...

أول ما قريت عن كلمة بلاك ليست أو اللسته على قولتنا بذيج الأيام قلت شخبارييييييييييييييييييي

و أذكر مرة قاعدة أسولف عنها عند خالتي جان تقول بييييييييييه هذي من أيامنا "السبعينات" و هاللسته تنكتب.

من عقبها عرفت إن السبب من ورا كتابتها فضاوة زايدة لا أكثر ولا أقل.

أهم شي البورتر إلي ياب لج عصير ... بارد و خالص ...بس إنتي قولي له العصير صار دافي روح حطه شوي بالفريزر و رد لي إياه

غير معرف يقول...

عزيزتي

موضع خفيف حلو على الصباح




شوفي بالنسبة لي الفاست فوود آكلة يالسنة مرة , لأن الدهون اللي فيه عالية ومشبعة جدا لتحافظ على الطعام فترة أطول مما تخزن دهون غريبة بالجسم قد تصبح مع الأيام Jelly ! هذا غير مضارها الصحية على تركيبة الدم وتغذيتها السيئة للمخ..

وأعتقد في نوع مخصص من أكواب القهوة للمحافظة على سخونتها أطول فترة ممكتة قد تمتد الى أربع ساعات تحصلينها في محلات الكوفي شوب ..


أما البلاك لست فأنا أؤيد طرح صديقتك , النسيان التام و النهائي أفضل من عوار الراس و البلاك ليست ..



والأمر الآخر من وجهة نظرى لا يوجد شيء محصنة و غير محصنة ..

الغيبة تظل غيبة ونميمة , اذا كانت الفتاة شريفة أو غير شريفة هذا الأمر ليس من اختصاصنا بل من اختصاص الله , حتى لو كانت سيئة ما نتكلم وتظل غيبة و نميمة سنحاسب عليها , وما أدرانا أصلا قد تكون شريفة وقام أحد بالتشكيك فيها وتشويه سمعتها زورا و بهتانا على الملأ مما فتح الأبواب لغيره لاغتيابها و المساس بها وحتى لو كانت كذلك ليس من شأننا ..


هذه نصيحة مني للجميع : الغيبة تظل غيبة و نميمة ولا أحد يستحقها ولا يتوجد ثغرة تسمح لنا باغتياب الآخرين .


بالنسبة للركود التدويني أو السياسي بشكل عام ليس فقط في التدوين بل في الكويت كلها .. حتى الشوارع نوعا ما فاضية وليست مزدحمة مثل السابق خصوصا في هذا الشهر .. أنا أيضا أشعر بالضجر و الملل على غير عادتي ربما هذه العدوى انتقلت للجميع حاليا..


أو ربما نحن بانتظار السنة الجديدة بفارغ الصبر على أمل أن يتغير شيء من واقعنا السياسي ..


احياتي لك اختي الفاضلة

الزين يقول...

ميللو

لا والله مو شخباري

لا زالت تكتب وتوزع وينذكر فيها اسامي بنات الناس

حرام اللي قاعد يصير يا ميللو



سكتي هالبورتر كله متعاطف معاي

من يشوفني مزحومه بالشغل اكسر خاطره

ما اوتعي الا صحن في تمر
ولا بسكوت
ولا بقصص لي تفاحه ويايبها

:)

حبيب

لووووول

الزين يقول...

غير معرف

الدهون المعالجة والمهدرجة اللي تستخدم بالفاست فود وتعطيه نكهته المميزة هي احد اسباب امراض الكانسر يعافينا ويعافيك من الشر

البيبسي احد اسباب هشاشة العظام وتآكل الأسنان واستنزاف الكالسيوم من الجسم

انت متصور عيالنا جدام شنو بنيتهم بتكون لأن حاليا هذا اكلهم الرئيسي
يعني ما يمر يوم من غير ما ياكل وجبة سريعة

وشكرا على التوصية راح اشوف ستاربكس اذا عندهم

بس المشكله انا اشرب قهوة تركية

:)


"أما البلاك لست فأنا أؤيد طرح صديقتك , النسيان التام و النهائي أفضل من عوار الراس و البلاك ليست .."

:)

الحوار كان بيني وبين الأنا وصديقتي هي الصوت الصغير اللي نسولف معاه احيانا بينا وبين نفسنا

وياكثر ما اسولف مع هالصوت

:)

احم



بالنسبة لرمي المحصنات فكل الموضوع اني حبيت استشهد بجزء من الآيه

الغيبه هي الغيبه مالها اسم ثاني
قال رسولنا الكريم صلى الله عليه وسلم
"ايحب احدكم ان يأكل لحم اخيه ميتا"
وقال الله سبحانه وتعالي في كتابه الكريم
"ولا تنابزوا بالألقاب بئس الإسم الفسوق بعد الإيمان"

وانا اقول دع الخلق للخالق
لو كل منا اعتنى بشئونه الخاصه ما وصلنا لهالمستوى من الأخلاق

وارد واقولها
احنا عندنا ازمة اخلاق بمجتمعنا

لو كل واحد عامل الناس مثل ما يحب يعاملونه ما وصلنا لهالمنطقه المحرمة



وانا وياك
الركود مس كل شي
حتى ايقاع الحياة اصبح شبه متوقع
وتحس الناس في حالة انتظار وترقب لشيء ما


:)

تحياتي لك اخي الفاضل
ولمشاركتك الكريمه

ولا تباعد

SHOOSH يقول...

آنا ما عندي بلاك ليست

صلح عام مع الكل

:)

صباحج عسل نفسج

و لويتج الصبح شبيهه بلويتي

و تسلم العشرتعش ايد يطلعون لج لما تشتغلين

و خصوصا الإيدين اللي كتبوا هالبوست

Framboise يقول...

هلا بالزييين ....

سيده نطيت ليه البلاك ليست واوافق راي اللي متربعه بداخلج و متكوكسه بعد هاهاها فعلا انا ماشوف في داعي لنلغي ناس من حياتنا لان مع الوقت ما راح انشوف الا الزين وهالايام الواحد لازم يشوف من كل شي وجوود يتعلم مايمنع ان ما نرد نحتك مع هالناس بس لازم يكونون مثال جدامنا يذكرنا باللي تعلمناه

اما لستة البنات والشباب اعتبرها سخافه وماعندهم سالفه ولا رادع :<

ReLaaaX يقول...

ولو إني متأخره شوي بالرد بس هم صباحج خير ونوير ;**


بالنسبة لزحمة الشغل .. على انها تسبب في بدايتها التوتر إلا إني أحبها ! لأني أحس إن مني فايده :))


انواع الاكل اخاف اسطر لج الاكل اللي مااحبه تخترعين شلون آنا عايشه ليلحين !؟ سبحان الله مادري ليش عسره بالاكل ؟

الحين سكتي كل يوم طاقه ويهي شلاله ورايحه الرحى اشوف شعندهم يديد واذا مالي خلق طرشت السايق اييب لي شي حق العشى يكون الحين كلش اسكت كل شغلي اورغنك


باجي الشغلات اللي كنت ناويه اكتب عنها نسيتها والله ! --> ولازالت تعاند وماتبي تاكل اوميغا 3

الاوركيده يقول...

مساء الخير يالزين

تسلم ايدج على هالموضوع بالنسبة حق البلاك ليست ساعات احتاجها واحط فيه ناس المزعجين بالنسبة لي وخاصة اللي يتطفلون على حياتي الخاصة شكو ماادري

:(

اما بالنسب حق الليستة انا اقول حرام البنات وراهم اهل يعني اللي قاعد يكتبها يرضى يحط وحدة من اهله


الله يهديهم ويكافينا شرهم

:)

المقوع الشرقي يقول...

الزين كله
ما استذوق الفاست فود
أتم يوعانه ولا آكله
أحسه أستغفرالله ..فضلت أكل ..
:)
أما البلاكلست
ستاير النسيان
نزلت بءالها زمان
يا حلو النسيان صج نعمة
بالنسبة لي ما عندي بلاك لست ..مجرد الأنسان يكون عندي شفاف ترانس برنت
ما اشوفه مو متواجد في ختى خيالي
أنصحج هالتقنية زنزون ..مفيييدة ومريحة

..
الليستات خبري بنص التسعينيات هبو فيها ..وكانت اوراق توزع
واكتشفوا منو اللي كاتبينها
ولى يومج مالهم ويه..أشسوت عليهم
ما عندي الا هالكلمتين
حرااام
وعيييييب

...
ويا حلو القهوة العربية مع الخلاص
غرامي
:)

Nikon 8 يقول...

فلسفة بلاك ليست الأوادم وايد إعجبتني
طالما هي موجودة فهذا يعني أنهم موجودين داخل أذهاننا
والله إنج صاجو ما كو إلا أسوي لهم ديليت وبس
مسا الخيرات يا جميل :)

غير معرف يقول...

مساءج توت...

راح اجاوب من آخر البوست :)
بالنسبه للبلاك لست هذي..أذكر إني تعرفت على هالموضوع وأنا بسنة ثالثة طب ! يعني بال 2004 تقريباً! عن طريق زميلة لي تدرس معاي بالخارج واتابع هالسوالف! فسألتها ..شنو تستفيدون ؟ وشنو المغزى لما تنكتب هاللسته! وقالت لي إن هذا الموضوع من زمان وإني داثره وقديمة! المهم إستتفهت هالشي..وأقولج اللحل الوحيد لهالظاهرة العبيطه! إن الناس شوي ..مو وايد شوي بس يستخدمون مخهم..وشوي هم مو وايد بس شوي يهدون السطحية اللي اهم فيها! ...وتدرين الشرهه مو على اللي يكتب اللست اللي يتناقش وإلا يطل فيها!
وصدقيني( من تتبع عورة الناس تتبعا لله عورته)
والحمدالله يارب على نعمة العقل!
ثاني شي :) إصدقين...مره طرت في بالي أييب ورقة وقلم واكتب الناس اللي مابيهم بحياتي مع السبب! ماقدرت..اكتب الاسم تالي اشطبه اقول حرام بعطيها فرصه ثانية..هالكلام كنت عنونه شوي:)
لما كبرت...مخي صار يبرمج نفسه بدون ما احس على ناس خلاص مايتقبلهم وناس مو ملزومه فيهم...فقمت ما اجامل واتعمد ما اجامل واللي جدامي المفروض يفهم إنه خلاص مو مرغوب فيه..بس اكتشفت للأسف إن في ادعل..ماكو فايده فيهم يبيلهم مو بلاك ليست إلا بلاك الف لست :)
امممم وبالنسبه للشغل ..يعطييج الف عافيه يالزين
ذكرتيني لما اختب واكون يعني مدلعه نفسي وماخذتلي ستاربكس قبل لا اروح الدوام ومن اوصل الدوام اتيني شغله جايدة تخليني اهدها وعلى ما ارجع والا القهوة ( ايس كوفي ) بس وحياتج هم اشربها :)



الزين ...الملل شي طبيعي من ظمن دورة الحياة :)
وعساني اكسر مللج بالبوست الياي :)



حبي يالزين واكثر:**

بو محمد يقول...

اختي
ابن آدم مثل الحب بالضبط
قيمة الحب من قيمة الماي اللي ينحط فيه، و الا هو فخار خلو الياهل لي دزه يكسره

قيم ابن آدم من قيمة ما يحمله عقله و قلبه من فكرة و إحساس، الفراغ الذهني يؤدي إلى خلو العقل من التوجيه إلى النفع و الاستنفاع و بالتالي يتصرف المرء بتصرفات ينكرها أهل العقل و تنحدر إلى مستوى منحط

أوادم بدون عقل اختي شيصيرون؟ دبش و انتي بكرامة اختي

و القلوب فارغة من أي إحساس، و بالتالي يغيب كل من التأنيب و الحرج و الحياء و بذالك يصبح واحدهم مخلوق آخر لا هوية له

غريب السلوك بكل صوره

و الذي يضيع من وقته و لو للحظة للإلتفات إلى ما يطرحه هؤلاء أو ما ينتجه هؤلاء قد أضاع جزءا من حياته بلا فائدة

أوادم لا تستحي و لا تنتخي اختي و لا عندها غارية أصلا، و تدعيم تزايدهم ملحوظ

ما عليه

أبعدكم الله عن هؤلاء و أخلى طريقكم من الحرام و أهله إن شاء الله

دمت و الأهل و الأحبة برعاية الله

chandal/danchal!! يقول...

صارلي يومين ما شفت امي من كثر المشاغل... اليوم طلعت مبجر من الدوام ورحت تغديت عندها شعوم مشوي ومشخول ومرق سمج... تقولين حامل بعتوي!
.
.
.

اتفق معك بسالفة الصقعي واختلف بالبلاك فوريست, ما تعرفين على الحلو اللي يسحن... ما اييب راسي غير البريد بودنج مع اميريكانو

:p
.
.
.

ماي الزهر وماي الورد من الموبقات مو بس بلاك لست... وضيفي عليهم الحبك!


اتمسي بالخير

:)

الوتيــــــــــن يقول...

من بعد فضة طلعت البلاك ليست !!

صباح الورد يالزين

ممممم منطقي جداً مبدأ عدم وجود بلاك ليست للأشخاص الملغيين أصلاً من حياتنا :) عجبني هالمنطق

ياستي البلاك ليست هاذي أذكرها من أيام الجامعة من 2003 .. فعلاً الكللام للي فيها جداً جارح بكونه يحتوي على أسماء كاملة للأشخاص مع عوائلهم ... وكنت أسمع من هنا وهناك بعض المتخوفين من ادراج أساميهم بهاللسته .. إما خوفاً من غلطة أرتكبها بحق كاتبي اللسته فأدرجته فيها .. أو أن يكون صاحب اللسته منغاض أصلاً من هالأشخاص

لكن ما نقول غير what goes around comes around صح؟

أما عن البلاك ليست مالتي ... فا أكيد تحتوي على الفاست فوود والبيبسي والككاو

وكلهم أحبهم لوووول .. بس ودي أهدهم
وفيها بعد بعض المدرسات زميلاتي في القسم واللي عقدت مع نفسي صلح بعدم الاقتراب منهم أكثر من حد معين وعدم ترك مسافة لهم للاقتراب .. أفضل بوايد

يعطيج العافية .. ذكرتيني بلوية الدوام من الصبح لي نهاية الدوام .. كنت عرضي اليوم .. ودشت الناظرة علابو طابه علي ولا تحصل مدرسة ثانية قاعده احتياط عن حصتي هيهيهي انقص ويهها .. بس علشان تبطل سوالف صادوه مالتها

يعطيج العافيه .. قرقت وايد :s
متى تكملين فضة شاهين؟ ترى بديت أءلف من مخي تكملة بس خلصت القصة عندي بسرعه .. لا تبطين يالزين

jonoon 3aqel يقول...

اول مره اسمع عن بلاك لست تتداولها المجالس و الدواويين !!!

عاد كلش مب شي..برأيي تقلل من قيمة الشخص اللي يتداولها اكثر من الشخص المذكور فيها >> اذا كنت فاهم الموضوع صح
=====

الله يعينك ع الشغل و الدوام..معليش..عيشي احساس انك تنتجين شي و انك تسهلين حياة شخص ما..و ساعتها كل هالتعب بيتحول لرضا ما تتصورينه..

==
لو لي بلاك ليست ؟!؟! ما ادري..تصدقين..انتي نبهتيني حق شي..علاقاتي مع كل الناس تظل محدودة..و لما تقوى العلاقة مع الشخص يكون لأنه فعلا يستاهل..و الباقي يظلون زملاء..او اصدقاء من الدرجة الثانية..
فما تتطور العلاقة لدرجة انهم يحرقون قلبي و احطهم ف البلاك ليست..
و الاهل طبعا ما اقدر احطهم فيها>>>>> لأنه عيب..و مب احسن لي لو انعرفت هاللسته حق حد هههه:)

دمتي سعيدة..و دامت صباحاتك مشرقة بالامل و الرضا و الطاعه

تحياتي

Amphibious يقول...

انا ماعندي human بلاك ليست
انا عندي human ليست فيها الناس اللي ابيهم واللي برى الليست مالي شغل فيه :)
بوست حلو كالعادة :)

ميمة السبيت يقول...

** صباح الورد على زينة البنات

- شخباري اللسته هذي سوالف التجارة أول ، و البلاك لست هذا يريت يصير عشان مو بس بلوك إلا بلوك دلييييت فور إفر ، ناس وايد مالها لزمة و للأسف تنفرض عليج بشكل ماتقدرين تتجاهلينه آه يا قلبي آه

حسافتج يا كويت يقول...

صباحج ورد ووايت ليست إن شاء الله


بالنسبة للبلاك ليست فانا ماعندي ولا مرة فكرت ان عندي شي احطة في خانة البلاك ليست في حياتي

من اليوم بفكر شون بحط


اما بخصوص البلاك ليست او ليستة البنات والصبيان

طبعا هذا شي مرفوض بتاتا

بس قبل على ايامنا في اوائل التسعينات
اذكر إني سمعت ان بنات وايد تعدلوا لما طلع اسمهم وخافوا او ان اهلهم انتبهو لهم وجابلوهم

ولكن طبعا حتى لو ادى هالشي لاشياء افضل
يظل هالفعل مشين

وكيفية محاربتة تتم في ان تعقب هذة الليستات من قبل الداخلية ومعاقبة منفذها وإرسال صورتة وهو حليق الراس بالإيميلات

اجار الدين كشمش يقول...

حطي بالج تحطيني على البلاك ليسست

؟؟؟؟؟

انا ابي على راس الطاقه عندج

اما الليستات .فكاتبها مريض نفسسيا ولا يحسب خطورة ما يقوم به من جهله وقلبه الاسود وتربيته الزفره

فمالله

الزين يقول...

شوش

وهذا الصح
اهم شي تتصالحين مع ذاتج وبالتالي تتصالحين مع الآخرين

وقمة النضح انج ترحمين حتى عدوج

يسلم عمرج من كل شر

وصباح الورد بعد قلبي

الزين يقول...

Framboise

@@

يا بنية انتي وين اختفيتي

طمنيني على امورج ابي اعرف شنو صار معاج

الزين يقول...

ريلاكس

لا كلش منتي متأخرة

مو اي زحمة يا ريلاكس
ساعات في زحمه تطلعج من طورج

وادري فيج من النوع اللي صعبه بالأكل

واخذي الأوميغا يا بنية
لا تخليني اييكم البيت
:)

الزين يقول...

دمعة المقهور

تبين نصيحتي
الغي شي اسمه بلاك ليست للناس
لا تحطين لهم لسته بالمره عشان لا ترجعين لها وبالتالي تفكرين فيهم

واللي يحطون اللسته اياها ما يخافون الله

وكما تدين تدان
باجر ربج يراويهم

الزين يقول...

المقوع الشرقي

يا صباح كل شي شرقي
:)

انا مثلج ما استذوق الفاست فود وريحته تقلب جبدي

لووول
عجبتني ستاير النسيان
عنوان حلو حق قصه

شفاف !!

انا بالنسبه غير موجود بالمره
المضوع صعب بالبدايه
بعدين تتعودين عليه

تصدقين لما الحين في ناس فاضيه تكتب نفس اللستات

اهااااا
وطلعتي من عشاق الخلاص
ترى وايد حالي الخلاص
وانا اي شي شيرته زايدة ما ينزليش من زور

هابي ويك اند وكوني طيبه صديقتي

:*

الزين يقول...

نيكون

:)
الضبط يا نيكون
دليت من غير ما تفكرين مرتين

صباحج كل الخير وتباشير شتويه جميله مثل روحج يا نيكون

الزين يقول...

سلة ميوة

صباحج مشمش

مدري ليش يطري علي المشمش من اشوفج
:)

تصدقين ولا يستفيدون شي
هي سطحية بالتفكير وعزج الله سفاله بالأخلاق


وطلعتي قلبج اخس من قلبي
بس تدرين مع الوقت اجبرت نفسي
لما الطقه تييج من نفس الشخص وبنفس المكان وتعيشين نفس الألم
حزتها بتسوينها

دلييييت ومن قلب


اقول لج سر
انا تكون الزحمه قاتله بالشغل
عزج الله ادخل الحمام
وعندنا احنا الحمام فيه نوعا ما جلسه بسيطه

شويه تركيز
وتنفس بعمق
وماديتيشن على الخفيف
نفتح الشكرات
ونسلك مسارات الطاقه
وارجع المكتب
متجددة النشاط
بس هذا اذا حصلت وقت
:)


اما بالنسبه للملل
فانا اكثر وحده ملولة
ما تصدقين شكثر
احب الآكشن في كل شي
كسرة المود حلوة

مووو


:)

الزين يقول...

بو محمد

اول مره احس من تعليقك انك منفعل
:)

هم دبش مثل ما تكرمت

انا براي تتابع ارسال هاللسته من شخص لآخر يساعد على ا نتشارها ويعطي هالإنسان عديم الإنسانية اللي سواها الإحساس بالإنتصار

واي انتصار
!!

انا براي التوعية تصير من الأهل لأبناءها اللي في سن الدراسه

التركيز على الناحية الدينية اكثر من العيب

برايي ان العيب يتغير
بس الحرام ثابت

يحفظكم الله يالشيخ
ويحفظ حبايبكم

الزين يقول...

جندل

بعدي

عليكم بالعافية وربي يحفظها لكم
ويطرح البركه بعييلج

على فكرة ترى انا واااايد فاقدة احنا عشقناها
سلمي عليها سلام جثير

ويحبج للشيرة
انتي نمله وتذكريني بوحده من اهلي
تموت على الشيره

وياااا زين الحبك يا بنتي
مع اني ما اشرب شاي
بس اذا تواجد الحبك
لا بد منه

:)

وصباحج فيروزي خاااالص

الزين يقول...

الوتين

انتي تركي فضه على جنب
التنويع مطلوب
والتشويق ملزومين فيه

:))))

شفتي اللي ذكرتيهم كلهم الكاكاو والفاست فود هذولي في دراسات تقول انهم من احد اسباب الكانسر الله يحفظج

حاولي تقللين منهم


وفضه وشاهين كل يوم احد
لأن اكتبها بالويك اند
تحتاج صفاء ذهني
وجو معين

:)

وصباح الفل حبيبتي

الزين يقول...

جنون عاقل

ايه اصبر ياجنون
ما وصلت هالهبه عندكم قطر بعد

والله يحفظكم منها

بالنسبه للإنتاجيه فلا تحاتي
لا تشوفني اتذمر شويه
بس خل يوقف الشغل شويه
اطلع غيره
ما احب اقعد فاضية


اهاااا

وطلعت حذر بالتعامل مع الناس
:)

ولك مثل ما دعيت يالشيخ
ربي يحفظك في غربتك ويوفقج ويردك سالم غانم لأهلك قول آمين

الزين يقول...

AK-47

@@

لا اله الا الله

انت من وين طالع
ووين هالغيبه يالشيخ
ان شاء الله تكون بخير انت والأهل
ترى لك فريه

الزين يقول...

ميمة

صباح الخير حبيبة قلبي انتي
:*

بلوك ودليت وانتر انتر

لووووووول
يعني سطر يديد

الزين يقول...

حسافتج

ياا اهلا وسهلا في ابو الزين
لك فترة ما زرتنا
لعل المانع خير ياخوي

بنات تعدلوا بعد اللسته
!!

غريبه

تهقا يسوونها الداخلية
انت شايف المردويسه اللي بالشارع
والداخلية تتشطر على البنات بس
اما الأولاد فما اعتقد

وصباحك طيب يالشيخ

الزين يقول...

اجار الدين

:)
افا يا ذا العلم
مو قلنا ما عندنا بلاك ليست للناس
وبعدين هل يعقل انت احطك بالبلاك ليست

:)

والطاقه كلها لك افا عليك
بس انت تامر

بحفظ الرحمن
ولا تسوق سرعه
:)

ZooZ "3grbgr" يقول...

زيون

أبي أروح حداق

بس أخاف أبجي نفس المرة اللي طافت لما السمجه قاعده تموت جدامي

:/

الزين يقول...

زوز عقر بقر

لوووووول

ذكرتيني بوحده تعرفينها
لما راحت معاي الحداق اخر مره

اول سمجه صادتها قامت تتأسف منها

"آنا آسفه ... والله والله آسفه"

لوووووووووووووول

تصلحون تطلعون مع بعض

غير معرف يقول...

حسيت بزحمه مررررررررره ..
وانا اقرى ...وجالسه اناظر حولي اثريني ماني خاليه منها ...):

مشكووره موضوعك مره رووعه ..ورتب في راسي اشياء كثيره بحذفها من حياتي ..واعيد برمجتها ...

كل الحب لكي ..(:

حسافتج يا كويت يقول...

هلا بالزين


ماكو مانع غير إني مقصر وشويية كسل

لكن ربي يشهد إني ادش واقرى بس ساعات مايوالم إني اترك تعليقي


اما بخصوص التوبة
ف صج سمعت عن وايد تابوا

خاتون يقول...

السلامـ عليكمـ ..
تعرفين تحدقين ؟
أنا احب السياسة و بما أني أبي أظل في بيتنا و ما أنطق فما أكتب عنها أخليها سوالف تختفي بسرعة بمجرد ما أقفل حلجي و حلج اللي حوالي ^_*

حلوة زحمة العمل و أحلى شي لمن يخلص اليوم و تحسين أنج خلصتي كل شي و ما في شي سقط سهواً أنجاز

أنا بعد ما احب الككاو و لا الدونات بس أحب الدونات الي أناأسويها غير عن برا تماماً
أما الملح و البهارات و الفلفل هذولا غرامي بالحياة علشان جذي الكل يقولي أنتي مشاغبة السر بالأكل
جربي تآكلين فلفل أحسه أكلت المغامرين و أنتي تحبين المغامرة ابتدي بالتدريج و إلا روحي مغل محل علشان يعرفونج على التوابل بصورة لائقة U miss a lot

أما People بلاك ليست ما أحبها لأنه كل إنسان حتى عدوي إحتمال بالمستقبل صديقي أو شركاء عمل .
أما الغيبة فصايرة حدثو لا حرج
واقعنا السياسي لن يتغير إلا إذا تغيرت النفوس ...واقعنا السياسي يتغير إذا تغير واقعنا المجتمعي فالسياسي الفاسد خرج من بيئة فاسدة و ما عادت القيم و الاخلاق الوطني تنغرس بالبيوت و هاذي النيجة
بوست زاخر ...بانتظار المزيد
Luv U'R writing^_^