.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

27.10.09

قرب شويه




تعال نكتب على القمرة سوالف ليل
مطر للغيم

وفي سهيل



تعال نحجي للبحار نهمة شوق تقول يامال

تعال نطوي الزمن بساعة برمحة خيل



تعال واترك وراك الكل

بوسط حضنك ذوبني وابد لا تفل

واسكبني سكرة تسرق الأنفاس وسط كاسك

واصبح قبل كل الكل انا ناسك



تعال قرب

ابي احكي لك جم دقة يدق قلبي وسط قلبك

وكيف الروح ملكتها في وسط كفك

وكيف تسافر الآهات تعيي تبات على شفاهي مثل همسك


وانفاسي تلاحقها تغار منها

تبي تقرب وتحضنها



تعال الحين وتوهني بعالم ماله اي حدود

تعال وغلف الأشواق

وعلى هونك على قليبي

ترى عشقك هواه حراق

انا وثوبي النشل نفرح

بروح الطيب والمشموم

ونطلب من الباري سبحانه فرحتنا علينا تدوم



تبيها تدوم


!!



عيل قرب ولا تبعد

ترى بقربي بعد تسعد

وتنسى الهم والضيجات

وتطلب ترتوي مني بعد مرات
...

اكمل يا بعد ناسي


!!

قول لي بس

قول لي تخاف علي كثير من قوة احساسي

تبيني اخف عنك شويه

من عيوني وعلى راسي

بس بشرط
تعال انت .... و قرب مني شويه







هناك 56 تعليقًا:

صبا يقول...

وكيف تسافر الآهات تعيي تبات على شفاهي مثل همسك


وانفاسي تلاحقها تغار منها

تبي تقرب وتحضنها

الله عليج يا زيون
شقول وشخلي

ربطتي لساني وتوهتيني وما ني قادره اعبر
سوالفج الحلوه والله لا يحرمنا من هالحجي
الي يرد الروح


مشكوره يا الزين

صبا يقول...

الاولى :)

ومبروك عليج يا الصبا المركز الاول والميداليه الذهبيه ....

اشوه انج مطرفه الباب بقرا البوست مره ثانيه حسيت اني ما شبعت منه...
؛)

زيون أبي بعد




:*****

دمعة المقهور يقول...

يسعد صباحج يا أحلى زين

هذا الهوى اجمل حب عشته واروع حب عشته
فليتني حين اتاني زائرا بالورد طوقته ...
وليتني حين اتاني باكيا .. فتحت ابوابي له وبسته

ما أدري تذكرت هالبيتين من سعر نزار قباني

:)

حسافتج يا كويت يقول...

من اروع ما كتبت واروع ما قرأت


ابي احكي لك جم دقة يدق قلبي وسط قلبك


تعبير محد اييبة إلا الزين

ميمة السبيت يقول...

** الله الله الله شهالكلام الحلو ايه هذا البوست اللي يرد الروح و يعدل المزاج من الصبح ..

ماجذب من سماج الزين كله

هالحـــــزة يقول...

مبدعه ...

esTeKaNa يقول...

انا شنو قايله؟
مو قايله لج اللي اني اذا قريت البوست لازم نظرة جانبيه وفله شعر
!!
الحين شسوي
:pp~
.
.
.
كل هالحب ...ومع هذا دمعت عيني
عجيبه انتي عجيبه
:*

lawyer يقول...

زيون اتصدقين قمت اقرا هالبوستات و الحجي جني اقرا خبر سياسي بجريده الشرق الاوسط

امر عليه مرور الكرام و لا يهمني او يهزني او حتى اتأثر !!


زيون لحقاي علي هاا ترا جد الحاله صعبه

chandal/danchal!! يقول...

ضحكتني لوير

انا من نفس مدرستها (نشوفية)!

aL-NooR . يقول...

اللـــــــــــــــــه
مو عااااااااادي النص
فوق الخيــــــــال

انا مو قرب شوي
زين ما لميت الشاشة

ليكون المقصود غيري ؟
p;

قلت بختار بارت عاجبني ..احترت ..و توهقت لان كل كلمة بالنص ..مو عادية
:*

مسا النور ...وابداعات الزين

********************

7osen يقول...

تعال واترك وراك الكل
بوسط حضنك ذوبني وابد لا تفل

زيون شتبين بالضبط ؟؟

يبا أحنا غلابا مانتحمل كل هالكلام

والله كلامج يعور ....

الواحد بس تعب .. وتعود على الجفاف ، ليش تمشين بكلامج على جروحنا

أهنيج

هالمرة غير .. كلش غير ..

جنها قصيدة من قصايد فايق عبدالجليل
فيها أحساس لأخر حد وفيها رقة من نوع خاص وحب دافي ...

..
تعال قرب
ابي احكي لك جم دقة يدق قلبي وسط قلبك
وكيف الروح ملكتها في وسط كفك
وكيف تسافر الآهات تعيي تبات على شفاهي مثل همسك

اي والله
تعال ابي احكيلك جم دقة يدق قلبي وسط قلبك

ماتتصورين شلون الكلام أثر .. قريته بلحظة شوق وتمتعت وتعبت وكتبت ورديت دفنت الشوق بضلوعي وسكت ...


روعة وأكثر ...

مـي يقول...

الله الله ...

أحلى كلمات ، وأحلى مشاعر مكتوبة

اسمحي لي حبيبتي بعد إذنج باخذ منها مقاطع اسويها مسجات برسلها لـ....؟

;)

المقوع الشرقي يقول...

الزين كله
الللللللله
ما أقدر أقول أكثر
تسلم أحاسيسج المرهفة

fatto يقول...

مبدعه كالعاده يازينه البلوقات :)

ممكن اسوي (كوبي) على هالبوست العجيب واحفظه عندي :)

Nikon 8 يقول...

الله يهنيه
إشيبي بعد شهرزاد الرومانسية بكبرها تقصد عليه
مسا الأنوار يا الغالية
:)

ظــامـي ســـراب يقول...

الزيــن
"أنا وثوبي النشل نفرح"
توقفت عند هذه الثنائية منتشياً
ثنائية الزين وثوب النشل
ومكمن الدهشة في استقلاليةالكيانين وتناغمهما في الوقت ذاته
كم هي الفرحة بسيطة!
عسى قليبج بالفرح عامر يا الشيخة
"بروح الطيب والمشموم"

SHOOSH يقول...

عجيــــــــــب

:****

darkness يقول...

حلو النص

بيه كل هذا رد على باختصار؟

عيل شوفي ملكة الاحساس

و انا بريق الماس

زيووووووووون

وناسه انه تحسين نصوصي جذي

:)

مطعم باكه يقول...

ما ادري اقول صح لسانج :)

والا صحت مشاعرك .. وادام الله عليك كل حب وهناء وراحة .. :)

((تعال الحين وتوهني بعالم ماله اي حدود

تعال وغلف الأشواق

وعلى هونك على قليبي

ترى عشقك هواه حراق))

كنت في فترة من الزمن استمتع بالإحتراق ..! :)

صديقي يقول لي انك تُحب بمازوشيه - حب العذاب للنفس - ..!

دمتم بأمان ..

DiLLi O MiLLi يقول...

الله الله الله يا زيووون ،،،، وينج عن هالشعور من زمااان ؟؟!!
جمال بالمشاعر وروعه بالوصف !!
لوو تدرين جم مره قريتها ،،، !!
ياااا حلات المفردات القديمة ،،، القمرة ،،، سهيل ،،، نهمه ،،، يا مال ،،، ثوب النشل ،،، الطيب والمشموم .....
:)

(( وعلى هونك على قليبي
ترى عشقك هواه حراق )) ...

حلو يالزين ،،، حلوه سوالفج اليوم
:)

تذكرت مسفر الدوسري
وهذي أهداء مني لج ،،،، من روائع مسفر الدوسري

الغياب..
يلبّس من تحب ثياب..
من ورد
والوجد ..
يعطي الذكريات اليابسه..
نبض ومشاعر..
.. يكسي جفاف احزانك الصفرا ..
ملامح ..
من ندى واعشاب!
الغياب
مجنون.. يرسم ...
للشبابيك الضريره..
عيون خضرا..
تخلّي شوك البعد ورده..
والحصى ..لبلاب!
الغياب لو تدري يفتح..
للخيال ابواب
يعيد تشكيل الصور
ويجمّل الأحباب
والحبيب اللي تحبه
مهو نفس ذاك الحبيب
لوغاب
فـ الغياب ..
الحبيب يصير أجمل
الحبيب يصير أشهى
وماتشوف في من تحب
غير ماتحب
والخطايا..
تصير هدايا..ترتجيها
ويورق الغفران عندك..
من سراب عْتاب!
فـ الغياب..
الحبيب يصير أعذب
الحبيب يصير أقرب
يمتلي بوجهه مساك
تمتلي بنوره سماك
يمتلي بأسمه نداك
يصير كلك
وكل شي له يوديك ويدلّك..
تحس كنه..
ساكن فـ أوضح مراياك..
وفي ظلك!
وبلحظه ماتدري وش اللي..
شجّر ايدين المدى..
عِنّــاب!!
لا ولاتدري وش اللي..
حنّن الفرقا عليك
رقّت وخلّت حبيبك ..
في ظماك ينساب؟!
لا ولاتدري وش اللي..
يخلّي شوقك..
دوم يفتش..
في حقايب الوصال
ويسأل بلهفه عن اللي..
من عند الحبيب .. لك جاب!!
وتسأله لو كان يقدر
ياخذ شوية هدايا للي غايب:
بعض اغاني..
تطرد الوحشه في صدره
وشال دافي للشتا
وشمس لليل الطويل
وسقف يحميه ومظله..
حتى لايبتلّ شَعره
لاهمى حزن البعاد..
والوجوه أغراب.
وياخذ لخيمة رجاه..
من رجاك..أطناب!
الغياب..
يشفّف القلب ويسرّج..
فـ الحنايا.. شْهاب!
ياحبيبي..
غِيْب لو ودّك تغيب
فـ الغياب..
تصير "فيني" حاضر أكثر!
وقلبي رغم البعد يقدر
يوصلك من ألف سكّه..
ويدخلك من ألف باب!!
الغياب..وهاب!




:)

lilly يقول...

النص جدا راقي و رائع


عجبني هالبارت

تعال قرب


ابي احكي لك جم دقة يدق قلبي وسط قلبك


وكيف الروح ملكتها في وسط كفك


وتســـلم أيدج :)

jasem يقول...

شقول ؟
أقول أنا ويني عن هالمدونه
طول هالمده
بس قاعد أمر شاي الضحى
وماألقى يديد شاي
أثاري إتيمعون إهنيه
بالإدلال والقواري
من وراي
:)
زين يا الزين
امحاربكم
وماني قايل الراي
بس في شي غصبن علي بقول
لما كسرتي كسرة
:-
أكمل يابعد ناسي
!!
فاجأتيني
حسيتها قوية
إي والله يالزين قوية
بس خلاص
مضطر أصاحب
ما أقدر على إمحاربكم
الحقيقة
منهدين مع التغيرات الجوية
على مثل هالاشعار
الله يقطع ابليسكم لا إتشيشوني
أخاف أنهد مثلكم
وما أوقف إلى الصيف الياي
:)

Sweet Revenge يقول...

تعال انت .... و قرب مني شويه


ممكن تتحقق الاحلام يا الزين
ممكن يكون بينا وبين الفرح باب ومانقدر نفتحة


"ترى بقربي بعد تسعد

وتنسى الهم والضيجات

وتطلب ترتوي مني بعد مرات

اكمل يا بعد ناسي
"

اذا هالحجي كله مانفهم مافي داعي نكمل
مشكوره الزين
كلام ولا اروع

غير معرف يقول...

very well written
you always surprise me with your words
keep it up zyooon

الزين يقول...

لي عودة معكم

:)

أتيت متاخرة يقول...

الله عليج يا سميتي

كل حرف وكل كلمة لها صدى بنبض قلبي

ترى زيوننننننننا اللي يحبون يتعبهم هالحجيييي


سميتي ترى زعلانة عليج

عيل تسألين اذا متابعة شاهين وفضة أو لا

أفااااااااااااااااااااا
هاذي سؤال ؟؟؟ اذا ما اتابع قصص الحب منو بالله بيتابع غيري
انتي ما تدرين مسيفه كل الاجزاء بفولدر على اليسك توب وكل مرة اقراها بالبلوج وبعدين اسيفها واقراها من الجزء الاول لين بعد ما توصلين

ترى آبي رد اعتبار

أتيت متاخرة يقول...

آدري ما اعلق آنه
بس عذريني استمتع بالقراءة ومشاعر الحب اللي بالقصة تدوخني زيادة مع الحمل

بس بعد

هم متابعة

اجار الدين كشمش يقول...

قرب شويه

ازيد من هلي على باب بوسستج

مدازز .....كلى من يبي قربج

بس لاااا يحوووشج الغرور

خوووش قصيده سهل ممتنع تسرسح على اليوووف

فمالله

jonoon 3aqel يقول...

:)

جميل ماكان هنا..

"تبيني اخف عنك شويه

من عيوني وعلى راسي"

عسى راسك سالم اختي


صباح جميل..كقطرات المطر في قلوب تنتظره..
صباح وايت شوكلت موكا..و رزبيري مافن >>> في خاطري ف عشان كذا أطريهم :)


دام ابداعك


تحياتي

الزين يقول...

صبا

@@

ما اصدق انتي وييييييينج

وين اختفيتي

صبوي ترى صج ولهت عليج وفاقدتج من قلب

ردي فتحي مدونتج يالله عاد مصختيها

:$

الزين يقول...

صبا
:)

حلالج بعد قلبي

والبعد عاد يتعمد على المود

:***

الزين يقول...

دمعة

وصباحج بعد قلبي

:)

نزار شاعر المرأة
بس ما اقرا له وايد

شلونج مع الثقل؟

الزين يقول...

حسافتج

:)

الله يسلمك يا حسافتك
من طيبك يابو الزين

الزين يقول...

ميمة

حبيبة قلبي يا ميمة

اهم شي ان البوست ياز لكم

:*

الزين يقول...

هالحزة

:)

من طيبك
مشكور

..

الزين يقول...

استكانه

لووووووووول

دبري حالج
:*

وبسنا دموع يا استكنكن

نبي فرح

الزين يقول...

لوير

@@

وايد صعبه

كتير كتير

وعطيتج الحل بالفيس بوك

:)

الزين يقول...

جندل


هممممم

:$


حالتكم صعيييييبه

وحتى الموسترايزر ما ينفع معاها

:)

الزين يقول...

النور

لووووووووول

ايه انتي وغيرج
ما عليه لموا الشاشه هم مو شين

:)

وصباح الغيم بعد قلبي ياكل النور

الزين يقول...

حوسن

:)))


والله ما ابي شي
كل الموضوع اني كتب احساسي

واسم الله عليك من الجروح يالشيخ
منو منا خالي منها يا حسين

يعين الله

تهقا يقدرون يفرقون ان هالدقه اللي بوسط قلبهم هي دقة قلبنا

!!


وغلطان لا تدفن الشوق بضلوعك
قوله
قوله
وقوله

انت ترتاح واهي تسعد

:)

الزين يقول...

مي

:)

تمونين
وعليه بالعافية

الزين يقول...

المقوع الشرقي

:**

يسلم عمرج يارب ويخلي لج حبايبج بعد قلبي

الزين يقول...

فاتوو

:)

حفظي يا حياتي حفظي
عليكم بالعافية

الزين يقول...

نيكون

:)

ترى استحيت من صجي

صباح الفل والياسمين يا نيكون

:*

الزين يقول...

ظامي سراب

وهالفرحة جمالها ببساطتها يا ظامي

والثوب النشل دائما يبهرني باناقته ورقة تصميمه وانوثته الطاغية

:)

وعسى ايامك كله فرح يا ظامي

الزين يقول...

شوش

:***

اتمنى ...

الزين يقول...

داركنس

:)))


شفتي اختصاري انا شلون صاير

:**

الزين يقول...

مطعم باكه

وانا اقول صح بدنك يارب

وادام الله عليك نعمة الرضا وراحة البال

اكو مقولة تقول
لو ما حر الأشواق ما برد قليبي بقربك

اهي مو مقوله مقوله
اهو كلامي انا
:)


الإحتراق ساعات يكون جميل

...

وحب بمازوشيه شالمانع
جم مره بتعيش

!!

صباحك خير يارب

الزين يقول...

ديللي

يا بعد حيي انتي
على هالإهداء الجميل مثل وجودج بحياتي

:**

ربي لا يحرمني منج قولي امين

الزين يقول...

ليلي

:)

يسلم عمرج يارب

وتسعدني متابعتج يالشيخه

الزين يقول...

جاسم

:)

حياك الله يا جاسم بمدونة من قصص الزين

هذي مدونتي الرئيسيه
اما شاي الضحى فهي مدونة مشتركه بيني وبين حبيبة قلبي داركنس ونور المدونات نجمه

كتاباتي هناك لهم طابع مختلف جدا عن كتاباتي هنا

وسعيده لأنك دليت الطريج اخيرا
:))

ولا تزعل ولا تحاربنا
حجزنا لك كرسي بالزاوية يم الكوفي تيبل والشباك بعد شتبي

موقع استراتيجي

وشوراك
انهد واكتب
مدوناتنا هي متنفس لمشاعرنا
افكارنا
خواطرنا
وايامنا

نكتب عشان نعيش كلمات جميله
نستمتع فيها ونمتع الآخرين

:)

الزين يقول...

سويت ريفنج

سؤالج صعب

مو كل الأحلام لها بيبان تنفتح
ولا كل البيبان نملك مفاتيحها

الشكر لج انتي
:*

الزين يقول...

anon

:)

am always up ya walad

how is things

!!

الزين يقول...

اتيت متأخره

ياربي فقدتج
وصخه كلش
قلت اكيد ما تدري عن القصه

سوري منج السموحه
:**

ونرد لج اعتبارج من عيوني
:)

الزين يقول...

اجار

لوووووول

مدازز عاد يا اجار

نسوي لهم درب ولا يهمك


وما عاش من ينغر
ماهي الزين يا اجار
:)

وعليه بالعافية يوفك اللي تسرسح
..

في أمان الكريم

الزين يقول...

جنون

صباح وايت شوكلت موكا..و رزبيري مافن

الله

ترى صار خاطري فيهم
يالله وصل لي الطلب اواااام

:)