.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

13.10.09

نقطة نظام



وصول نقطة اللاعودة في بعض العلاقات التي تحيط بأسوار تواصلنا بالآخرين شيء لا ننكر انه مؤلم ... خصوصا إذا كان الطرف الآخر في تلك العلاقة قد استباح زاوية من نفسك ونشر عليها غسيله دون حياء ولون حقيقتك بأخطاء وألوان قاتمة وهمية من صنعة واستباح صفحة من حياتك ... تعنيك وتعني آخرين انتهت فصولهم بتلك الحياة ورحلوا دون عودة

وصورك بأنك اكبر الأخطاء التي ممكن أن يصادفها في دروبه ... وعثرة قد استفاق منها وتخطاها ويأمل أن لا يعود إليها ثانية

نقطة نظام

نعم نحن نخطئ لسبب بسيط إننا بشر ... ومن منا بلا ماضي ومن منا بلا خطيئة ......ولكن أن تقوم بنسف كل الجسور المحاكة بينك وبين الطرف الآخر من الثقة والأمان والعطاء لتتذكر شيئا واحدا فقط ... خطأ غير مقصود ... قد تدرك سخافته مع قليلا من النضج

هنا يجب أن نتوقف ... فنحن نحتاج نقطة نظام ... أعادة حسبة ... وصف أوراق

أنا ارفض العودة لنفس الدروب المغلقه ...


أسامح ... اغفر ... أتغاضى ...


ولكني ارفض العودة

تقبلنا للآخرين كحزمة واحده ...( زينها بشينها ) أمر له أبعاد كثيرة ... ونضج قل ما تجده حولك ...
هذا التقبل يخلق بيئة صحية لنمو أي نوع من العلاقات ... أخوة ... صداقه .. حب .... أو زواج

الأوليين يقولون حط الحلو فوق المر وكمل
وأنا أقول ... استثمر بالطرف الثاني وعمِر

والأولين يقولون الأرض الصبخه لو شنو تسقينها ما تخضر
وأنا أقول ... ليه حجت حجايجها الباب اللي اييك منه ريح "رقعه" بويه صاحبه واستريح


قبل فترة ...كنت مستغرقة بالاستماع لأحدى صديقاتي المقربات عندما اشتكت لي من صعوبة العلاقات بزمننا هذا ...

"زيون ماكو شي واضح ... كل شي مبهم ... ماكو حدود ممكن تتحركين بمحيطها وتعرفين اللي لج واللي عليج ... العلاقة مموهة ... وعمرها قصير .. وتتمين تلهثين فيها لين ينقطع نفسج ... وبالنهايه ماكو ... بح ... انتهت"

ثم تابعت ....

"أنا ما عندي وقت أضيعه أكثر ... كبرت وأبي استقر بعلاقاتي ... أبيها واضحة ... واعرف الحدود المتاحة لي عشان اعرف أنا لين وين ممكن أمد وأوصل واتحرك "


هي أيضا تحتاج نقطة نظام وإعادة صف أوراق ...

تقولون لي يمكن ما أحسنت الاختيار

أقول لكم مشكلتنا عدم الوضوح ... فأنا لا اعلم هل هو إيقاع العصر السريع لا يتيح لنا الوقت الكافي لعنْوَنة صفحاتنا ... أم أننا اكتفينا بالعنونة وأغفلنا التفاصيل


العيب فينا لو فيهم
غلطتي لو غلطتهم
مساحتي لو مساحتهم
منطقي لو منطقهم!!


نفتقد الحوار ... ونضع الحروف عارية دون نقاط ... وكم من الكلمات تمحورت لأنها غير منقطة ... وكم من المقاصد الحسنة قصفت لقلة وضوحها ... وكم من الظنون طغت .... لأن كل الظروف تأكدها ... وكم من الأقاويل تأولت ... لأنها لم تنقل بأمانه


نعم ....


نحتاج نقطة نظام ... إعادة حسبة ... مواجهه


وحوار

.....





وعلى فكرة قبل لا امشي همسه صغيرة اهمسها لكم


لا تحمل بين خلجات صدرك كره يضنيك أو غضب يتعبك
سوف تكون اكبر المتضررين بالموضوع

هناك 49 تعليقًا:

SHOOSH يقول...

يسلم بؤك

توني طايفة نقطة نظام

مؤلمة جدا جدا بس كانت ضرورية

محاسبة النفس ضروريه .. تخليج تنامين خفيفه

و مثل ما قلتي الكل يخطيء .. بس هم صح .. نسامح و نغفر و لكن يمكن ما نقدر نعود لنفس الطريق مره اخرى


:**

bent el deera يقول...

بوست جدا جميل
مشكوره :>

ميمة السبيت يقول...

** انا اطالب بنقطة نظام هالكبر و اقولج ابي :

فضه وشاهين فضة وشاهين فضه و شاهين فضه و شاهين فضه و شاهين فضه و شاهين فضه و شاهين فضه و شاهين فضه و شاهين فضه و شاهين فضه و شاهين فضه و شاهين فضه و شاهين فضه و شاهين فضه و شاهين فضه و شاهين فضه و شاهين

why me يقول...

من زمان وانا واقفه عند هالنقطه



:)


فهناك من لا يستحق هذه الكلمات













ولهت عليج تدرين :****

Manal يقول...

السلام عليكم الزين

ما شاء الله عليج
مواضيعج حلوة
وسرد جميل وتحليل ولا اروع

:))

من وجهة نظري المتواضعة، اشوف ان الانسان في هذا الوقت واتوقع انهم الاغلبية ما تدري شنو تبي من المجتمع بشكل عام

صارت الامور متشابكة مع بعضها لدرجة ان مو عارفين نكون واضحين مع نفسنا قبل ما نكون واضحين مع الناس

كثير من العلاقات في الزمن الحالي صارت بلاعودة
بالحياة الاجتماعية
الاسرية وحتى السياسية
سببها التخبط بالالفاظ وسوء الظن وعدم الوضوح بالشكل المطلوب الي يحدد العلاقة بين الناس

:)

عزيزتي الزين

نقطة النظام مطلوبة لمراجعة حساباتنا
ولان الانسان ما راح يتحمل ان يكون دائما هو المتحمل او بمعنى ثاني حمال الاسية دائما

هناك حد للاخطاء
وهناك حد لكلمة آسف

الغالية الزين
شكرا على الموضوع القيم

همسة
توني راجعة من الجامعة وما قدرت ما افتح مدونتج
وما قدرت ما اعلق

ارتحت لما تكلمت
وقريت شي ثاني بعيد عن مجال الدراسة

:)

حبيبتي
الله لا يحرمنا من طلتج الحوة في عالم التدوين
:)

دمتي بالف خير

Reem AlHajri يقول...

عن نفسي الحمدالله عندي قدرة على المسامحة و إني أكمل حياتي بشكل طبيعي ، بـ هالأشخاص أو بدونهم ..

عموماً حياتنا محتاجه لـ حدود ،تحد الأشخاص و توقفهم عند نقاط معينه .. كل شخص بحسب قربه و صلته فينا ..

و قواج الله يالزين

بو محمد يقول...

اختي

أكو ناس ترافج رفجة قلوب
و أكو ناس ترافج رفجة جيوب
و أكو ناس ما عندها إلا العذاريب و العيوب

كلام صديقتج اختي عدل و مو غلط و أنا ملاحظ اختلاف في أطباع الكثيرين و لكن مع ذالك ما زلت أوالم الطيبين بعد

و علشان جذي

اللي يمشي لي شبر أمشي له باع
و الا
أترك الداب وشجرته

دمت و الأهل و الأحبة برعاية الله

خاتون يقول...

نفتقد الحوار ... ونضع الحروف عارية دون نقاط ... وكم من الكلمات تمحورت لأنها غير منقطة ... وكم من المقاصد الحسنة قصفت لقلة وضوحها ... وكم من الظنون طغت .... لأن كل الظروف تأكدها ... وكم من الأقاويل تأولت ... لأنها لم تنقل بأمانه

تدرين أنه موضوعج صار مثل الملح على الجرح بالنسبة لي ،،، مفروض على هالموضوع تآخذين جوائز عالمية طبعاً الإسلوب ما راح أتطرق له و لا صور الجميلة يعني مدام الزين كاتبتها فهي زين على زين و ما مثلها مثل
فعلاً إفتقادنا للحوار و المكاشفة مشكلة أدت بالكثير من الصداقات لقبرها و قتلتها قتلاً أليماً،،عزيزتي ما أدري شلون أشكرج على الموضوع يمكن أنتِ مو فاهمة سبب حماسي حقه لكن لي أسبابي ...
فديت الموضوع و الراعيته واحدهم أزين من الثاني^_^

DiLLi O MiLLi يقول...

((عـــادي توقــع .. كل حــاجه بهــا الكون
تـــرا الليـــالي خيــبت حيـــل ... ظـــنــــي!))



معاها حق صديقتج لما قالت : أنا ما عندي وقت أضيعه أكثر ... كبرت وأبي استقر بعلاقاتي ... أبيها واضحة .


((أتعب على (الـطيب) تـرى رفـقته عـز
وإلا الردي ما فـاد نـفسه .. بـ يفيدك؟))






وأنا معاج زيون : نعم ،،، نسامح ،،، نغفر
لكن لما يتردد الشي ... هنا نحتاج نقطة نظام !

((المخطي ان جالك مع حسن الاعـذار

سامح خطا الزلات و اكسب اجرهـا


والزله اللي تْكـررت عـدة امـرار

الذنب فاضح و احتشم عـن عذرهـا)).






وأنا زيون : لا أحمل بين خلجات صدري كره يضنيني ولا غضب يتعبني
:)
بس ... وصلنا لعُمر لا يتحمل هذه الفوضي في المشاعر!



:**

غير معرف يقول...

في حروفك شيء من الصدق..وأشياء من الواقع الذي لابد منه...

أنت اجمل قلم يضعني أمام ما أفكر به...


بكل شيء تتفوقين يالزين
فكوني هكذا دوماً


فوق كل الإعتبارات...متميزه
بالطرح ...والإسلوب ..والفكرة



حبي وأكثر بكثــــــــــــــــير
:***

هالحـــــزة يقول...

ارجو الاستمرار ..

دمتي ودام قلمج ..

المقوع الشرقي يقول...

الزين كله
اوافق رفيجتج
ولو يرد الوقت متحسفة على وقت ضيعته
فى ناس ..أهيا جذي ..آنا اللي كنت أتعامى
..
مش ملاحظة شخصية مني بس ..ولكن سوء النوايا موجود بطريقة لافته

في ناس ..يستحقون أقول يستحقون العنا
لأنهم ..على قلبج..يبولج الخير..مهما تبعدتوا
وناس ..جنج كاته ماي ببحر
مهما ..سويتى..
مامش فايدة
نقطة نظام
تحياتى يالغالية

Nikon 8 يقول...

المثل يقول اللي ما يعدك راس ما لا تعده فائده
إستمرار العلاقات يحتاج وقت وظروف تكشف كل المواقف والمعدن الطيب كا ما صقل بينت قيمته
إنفتاحنا الواسع وتعدد علاقاتنا أتاحت لنا التعرف على ناس وايدين ولفترات قصيره فقط
وهذه ضريبة الحياة السريعة
الله يكون في العون يا الغالية
البوست هذا صرخة ألم وإحتجاج على عواطف مرسلة من طرف واحد ومتلقيها غير مهمتم لها بالمرة !

sologa-bologa يقول...

حلوة الهمسة الأخيرة

غير معرف يقول...

اختي سلة ميوه ..
كلامك صحيح وانا من الاشخاص الذين يعانون تخبط العلاقات ...وتبعثر الاوراق ..اتأمل نهاية لتلك الفوضى في العلاقات مع الناس ..كأ ننى على موج لم استقر ولم يستقر بي الحال عند نقطة نظام او تحول ...
تعبت وانهكت ...ومازلت اعاني منهم ومن تمكنهم لي في دواخلي رغم عزوفهم او تعديهم لحدودي الشخصيه والحياتيه ..
اتمنى ان اجد نقطة نظام واضع عليها اشارة المرور الملونه حتي يصبح لكل لون حد من حدود حياتي يقف عندها الاخرين ..
تحياتي لك ولمقالك التأملي ..(:

الزين يقول...

شوش

يسلم عمرج يارب

عاد تدرين نقطة النظام تكون لنا احنا اكثر من الطرف الآخر

نلملم مشاعرنا
نتوازن
نرتب افكارنا

و آآآكشن

واذا كانت العودة مستحيله
والطرف الثاني كان متغلغل بكيانج

الألم يصبح اكثر حده

بس بالنهايه هو الم وقتي
يزول مع الوقت

:*

الزين يقول...

بنت الديرة

مشكوره بعد قلبي وحياج الله

:)

الزين يقول...

ميمة

لوووووووول

من عيوني ذنَي

ان شاء الله جريب

الزين يقول...

واي مي

اذا من زمان واقفه عندها عيل ضاع من وقتج كثير

عطيها بانزين وحركي

:)

وولهت عليج العافية واهلها حبيبتي

:**

الزين يقول...

منال

وعليكم السلام والرحمه

:*

بعد قلبي يا منال يعل تحلا ايامج انتي وحبايبج


واحنا طلعنا متفقين

تدرين عاد منال
انا وصلت لمرحلة من التعب اقول
ايدي لو تعورني قطعتها
ما عندي وقت اضيعه على الم مبني على اسباب واهية وقلة نضج من الآخرين


وهمستج على عيني يا بعد عيني انتي
:**
ربي يوفقج ويكتب لج في كل خطوة سلامة
ولا يحرمني منج قولي آمين

:****

سلمي لي على الحلوة اللي عندج
جميلة كاردف
:)

الزين يقول...

ريم

يااا اهلا وسهلا
ريم عندي اليوم

لمن انسب الفضل لتلك الزياة

وعليج مخالفه

ليش شايلة التعليقات
خلينا نفضفض عندج يا شينج

بوستاتج مؤخرا تعطيني احساس اني قاعده اسمع ماجدة الرومي

:)

جميلة انتي يا ريم بكل ما تكتبين

شكرا للزيارة الرقيقة

secret يقول...

نقطة نظام صحيحة :)

طغيان البعض على حدود رسمت بيننا و بينهم، و توجيه التهم بعشوائية لا تمت لأي منطق بصلة، انما هو اكبر دليل على ضعف هؤلاء أمام حقيقة لا شك فيها هي اننا نملأ لهم فراغات يرونها بأنفسهم، و الواضح انهم يعانون منها بشكل قسري.

فهل يعني ذلك اننا نمثل لهم الدرجة المرجوة من الكمال و الرقي الإنساني؟

ان هجومهم بهذا الإسلوب ما هو إلا اعتراف صريح بتلك الحقيقة التي تستقر بقرارة أنفسهم، الا أنهم لا يملكون شجاعة الاعتراف، لما بهم من عدم توازن فتتولد تلك التهم الرخيصة.

نعم يالزين ..

هناك من يترك الكلمة عارية بلا نقاط، و هناك من (ينقطها) لنا بصدق المودة

شكرا جزيلا على الموضوع .. وايد عجبني

:)

الزين يقول...

بو محمد

كلامك صح
وعين العقل

وهذا اللي حاصل
وصحبة الطيب مع الطيب تجارة يالشيخ

عسى ربي يعطيك على قد طيبك
ويحفظ لك عيالك وامهم

:)

الزين يقول...

خاتون

كلنا يحمل بين ايامه نقطة نظام لعلاقة ما

مو بالضرورة كل علاقاتنا تكون ناجحه
مو بالضرورة الحياة تصفى لج وكل الناس يحبونج ويوالمونج

وانا فاهمة سبب حماسج
والدنيا علمتني ياخاتون اكبر راسي
واذا طحت بسرعة اقوم وانفض ثيابي وامشي

:)

ويازينج انتي وزين طلاتج

الزين يقول...

ديللي

:)

لهذا الحديث شجون يا ديللي

:)

ادري

وانتي لو الكل يفكر مثلج جان الحال سلم

:*

وآآخ من فوضى المشاعر

الزين يقول...

سلة ميوة

"أنت اجمل قلم يضعني أمام ما أفكر به..."

يا بختي
:)

والله يا سلة انا اكتب ما اشعر به
ما اختبرته بأيامي وعشته حد التشبع
مو اكثر

احاول اوصل افكاري بطريقة واضحه
واتمنى اني انجح
وكل مرة اكتب اكون قلقة من ردة فعل اللي يقرون لي

ابي اعرف اني خطي صح

:)


كل الحب لك يا سلة
:*

الزين يقول...

هالحزة

:)

ونحن مستمرون

شكرا لك لمتابتعك

الزين يقول...

المقوع الشرقي

سوء النوايا
وحطي تحتها مليون خط

بالضبط
هي مشكلتنا الأزلية
ماكو شي اسمه احسنوا الظن
وافتح باب الحوار
وخل الطرف الثاني يقول

نظن
نصدق الظن
ونتصرف على اساسه

:(

متعب الوضع صح

!!

ويعين الله
نحتاج نسترجع جلدنا وانفاسنا وقوتنا
ونكمل

.....

وصباحج رضا من الرحمن يارب

الزين يقول...

نيكون

لو كان هالموضوع متعلق بشخص بعيد ..غريب
مجرد صديق تهون يا نيكون

اما لو كان قريب

فتلك هي المصيبه

:)

الزين يقول...

سلوقا

@@

من وين طالع

!!

الزين يقول...

ذات

:)

عزيزتي ذات
مرحبا بك في مدونة من قصص الزين

:))))

ولا يهمج انا وسلة ما نتخير عن بعض
ثنتينا خوات
وانتي ثالثتنا

ونحن لا نجد نقط النظام
بل نخلقها

بيدج انتي بس تحطينها او تشيلينها
قوي قلبج
وبلشي تستدخدمين المشخال

خلي اللي يستاهل هو اللي يبقى بحياتج

كوني بخير صديقتي
وقلبي معك

الحــــر يقول...

الموضوع يستحق الوقوف عنده لأنه يحدث لنا جميعا ولكن ما همستي به كان أجمل

دمتي بهذا العقل
:)

lawyer يقول...

زيووووووووووون بووووووستج يبرد القلب

يسسسسسسسسسسلم هالايد الي كتبتهاا


فعلا كلام بالنسبه للعلاقات


اييج واحد في دوره مثلا خوش انسان
يحتاج رقم تلفونج حق باجر

تعطينه اياه بحسن نيه
يدز مسج نص الليل
تحقرين

تسألين نفسج من اعطاه الحق انه يدز مسج ؟


تخلص الدوره بعدها بيومين يدز مسج يسأل عن حالج

تكونين محتاره في مسجه

ان رديتاي عطيته ويه
وان حقرتاي عيب !

تردين بمسج
الحمدلله فاين . و نقطه يعني بس لا تسأل اكثر


تلاقينه بعد اسبوع يدق تحقرينه ظنا منج انه بغازل
يدز لج مسج يقولج انه استلم الشهاده بالنيابه عنج و بوصلها لج !!


وجك بوم داز سايقهم بالشهاده

تسألين نفس اشعرفه عنوان بيتنا!!


تصرفاته تخليج غصب تدزين مسج تشكرينه و هم نقطه.

الولد يمكن عاجبني
لكن شبي فيه و انا عمري 30

الي يعرف يخطط يوصل شهاده و يسويلي حركات و دل بيتنا و ياااااابها

يعرف يسوي شي ثاني


و حقراني له سببه ان مالي خلق اعطي من نفسي

اهو فهم هالشي ان صد مني و انه مو عاجبني


وتكونين انتي محتاره في هالزمن الغريب


ما اعرف اوقف عند النقطه الصح

مالي خلق
هذا بكل بسااااااطه

لانه كميه المشاعر الي في قلبي استنزفت تماما






تبين اعطيج مثال ثاني و ثالث و عاشر



احنا نعيش في زمن نحتاج كتلووج فيه للبشر


طريقه التعامل ويا كل واحد




اذا صرتي محترمه و احترمتي ذاتج = يعني ماتبيني

اذا صرتاي طبيعيه = مدري البنت جنها اوفر شوي !

اذا سمعتيه و ووقفتاي وياه في ظرف معين = حبتني !





كل التصرفات تفسر بالغلط

aL-NooR . يقول...

ودي المج على هالكلام :*

بس سؤال منو يفهمج غير نفسج ؟
مشكلتنا بهالزمن ..نظرة الناس دايما تحسب لها حساب !! مو ضروري احد غير رب العالمين و بعدين تبدين اولوياتج !!

كلها نقاط و سطر يديد
بس منو اللي يفهم ..
شرايج ننسخ زيون وايد ؟ تبين ؟
:*

****************

Reem AlHajri يقول...

الزين
هلا فيج أكثر ؛*
أنا كل يوم هني ، بس ما أطلع صوت ..
لول أصلاً حدي متابعه ، و مندمجه مع شاهين و فضه .. لا تبطين علينا عاد P;

و عالمخالفة ، ميخالف عطيني هالمره سماح ..

و الفضفضه ، تامرين أمر ، إن شاء الله بـ بوستات معينة أفتح باب التعليق ، و مايصير خاطرج إلا طيب ..

ما نرد الزين ؛**

و يا حلاة إحساسج ، و زيارتج .. يعل ما من قطاعه :)

العفو ، الشكر لج ..

jonoon 3aqel يقول...

الله الله..
ماشاء الله..كلام جميل و عين العقل..

بشكل عام..احس احنا نفتقد الحوار..الكل لاهي بشي يخصه..و لما نتكلم..ما نتكلم ف شي يتناول الشخص اللي يتكلم"أنسانيته و روحه"..

بس على فكره..مهما كان..راح تكون هناك العلاقات العابرة و الناس اللي نعرفها و نتقرب منهم لفتره..و بعدين يصييرون حالهم حال اللي ما بينا و بينهم الا اشلونك و اخبارك


الله يرزقك بالشخص اللي يفهم "الزين"و يحب "الزين"..و تكون لك صحبة ناصحة و فاهمة و عارفة تاخذ بيدك للمكان الصح

تحياتي

Mamloo7a Q8ia يقول...

تسلمين يالزين على هالموضوع
قلبتي المواجع يالغاليه...

في حياة كل واحد فينا صداقات
شي يدوم وشي ينتهي
بس عمري ما صورتها بأنها اكبر الاخطاء او كل هالكلام او حتى تكلمت عنها مع اي احد
هي علاقه كانت .. احترم فيها انها في يوم كانت صديقتي وكان بيننا عشره

واحنا يا وخيتي بشر ونخطي
وغيرنا يخطي
لكن للاسف كل واحد يشوف الخطأ بطريقته
او ما يشوف خطأه وهذا سبب المشاكل

نحتاج نقطة نظام نعيد فيها الحسابات
واللي يحب صج وشاري
يا الزين يسامح ويتغاضى
وانا عندي طبع اللي يسوي لي طيب ما اقدر انساه له طول عمري
حتى لو جرحني او غلط علي


تقبلنا للآخرين كحزمة واحده ...
( زينها بشينها ) أمر له أبعاد كثيرة ... ونضج قل ما تجده حولك ...


كلام صحيح يا وخيتي
انا دايما اقول اذا تحبين الشخص
لازم تحبين زينه وشينه وتتحملين
لكن اللي بايع يا وخيتي
ما يشوف الا الشين
وصاجه يا الزين الارض الصبخه لو شنو تسقينها ما تخضر

انا يا زيون شفت الموت في غرفة العمليات لما سويت عملية قلبي
وطلعت من الغرفه وانا مسامحه الكل وفاتحه قلبي للكل
وقررت اني ما اشيل بقلبي على أحد
وان الدنيا قصيره وفي أي لحظه ويمكن بسرعه نتركها
واني احب الكل واسوي اللي ربي بيحاسبني عليه
واني بوصل كل اصدقائي
اللي معاي واللي تركوني

وانا ولله الحمد ماشيه بهالطريج واطرش لهم مسجات في المناسبات
واشاركهم في افراحهم واحزانهم حتى لو هم ما يتواصلون معاي

والحمدلله مرتاحه وقلبي مرتاح وضميري مرتاح

وخزياه جني كتبت بوست عندج
المسامحه يا وخيتي
بس شسوي الموضوع وايد اثر فيني
وحسيت ودي افضفض عندج
:***

Peace يقول...

* تقبلنا للآخرين كحزمة واحده
ونضج قل ما تجده حولك ...


تقبل الاخرين ضروري و احترام رغباتهم كذلك

كفانا تحكم بالاخرين


*أقول لكم مشكلتنا عدم الوضوح

لكن عليناان نكون واضحين مع انفسنا اولا


بالتوفيق موضوعج حلو

الوتيــــــــــن يقول...

صباح الخير سلة ميوه :) شلونج؟

أسامح ... اغفر ... أتغاضى ...




ولكني ارفض العودة


هاذا ما أتعب كاهلي ثم استرحت
كل شي صعب لكن عند تنفيذ القرار فالمسألة تصبح هم وانزاح

صح لسانج على هالبوست الرائع

الزين يقول...

سيكرت

هناك من يترك الكلمة عارية بلا نقاط، و هناك من (ينقطها) لنا بصدق المودة


كل التعليق بصوب
والجملة الأخيرة يا سيكرت بصوب

يازت لي وايد

:)

واسمح لي اثني على كلامك

لعلاقات صارت صعبه
سواء القريبه او البعيده
السطحية او العميقه

كله ابتعد عن البساطه
وحسن الظن

ساعات احس ان اللي داير معارك
مو تواصل

متعب الشعور

صح


مشكور على التواصل يا سيكرت

الزين يقول...

الحر

:)

ما نحمله من غضب احيانا يتعبنا وحدنا
اما عن الطرف الأخر فقل ما يعرف او يدرك حجم الضرر الذي تسبب به

لذلك من الأفضل ان لا تترك الغضب يعكر صفو حياتك

عطه طاف

وصدقني راح ترتاح

:)

الزين يقول...

لوير

:)

يختج الناس صايرين مالهم مايه

كل ساعه لهم لون

صعب تحطينهم تحت خانه معينة وتتعاملين معاهم على اساسها

دودهونا حسبي الله على ابليسهم

:)

الزين يقول...

النور

:*

لمي لمي

ترى مسموح

:)))))

تدرين عاد

انا ساعات ما افهم نفسي وابي احد يفهمني

:)

والله

وبيني وبينج متعة اذا لقيتي احد يفهمج اكثر من نفسج

تشوفين نفسج بعيونهم شكثر انتي مختلفه

ننسخ زيون وايد
هممم

نوووو

ماكو احد كامل يالنور
كلنا نحمل كم من العيوب
بس الفرق ان احنا ننتبه لهالعيب وما نخليه يستشري فينا

:**

بعد قلبي انتي

الزين يقول...

ريم

يمه يمه اللي منخشين ورى الباب

هاااا

طحت عليج

:))))


سعيده من اقصى قلبي لمتابتعج

وبانتظار جديدك

:*

الزين يقول...

جنون عاقل

بس على فكره..مهما كان..راح تكون هناك العلاقات العابرة و الناس اللي نعرفها و نتقرب منهم لفتره..و بعدين يصييرون حالهم حال اللي ما بينا و بينهم الا اشلونك و اخبارك

كلامك صح
اوافقك عليه

وهذولي الناس يا كثرهم
احنا بالنسبه لهم محطات انتهت
واهم بالنسبه لنا تجربه خذت حاصلها


:)

شكرا على الدعاء الطيب وياربي يحفظك ويعطيك ما يرضيك

الزين يقول...

الغالية مملوحه

تدرين شنو تفتقد معظم علاقاتنا

الحوار

الوضوح

نزعل وناخذ بخاطرنا على افتراض ان الطرف الثاني عارف شنو اللي صار

نتخذ موقف
ويمكن نظلم بهالموقف
دون اعطاء فرصه لحسن الظن

نتغاضي ونغفر بينا وبين نفسنا
هم دون توضيح

لو كان الطرف الثاني اخطأ دون قصد نعتبر ان الخطأ مقصود

نظلم نفسنا قبلهم بهالظن
ننهي العلاقه
وبعد فترة نكتشف ان الخطأ كان بردة القعل المتسرعة
دون ان نفتح الباب ونواجه ونصفي الموقف

ونفهم


كثير حصلت معاي
وندمت
واعتذرت
بس عقب شنو
الضرر وقع
والشرخ موجود
ومافي مجال كل شي يرجع مثل الأول
الا اذا كان الطرفين وايد ارفع واكبر وانضج

من خلاف بسيط

:)

ربي يحفظج ويحفظ حبايبج
ويهدينا كلنا

:*

الزين يقول...

بيس

مشكوره على الزيارة يالشيخه

ولا تباعدين

بما انج من طرف بعض الناس

:)

الزين يقول...

الوتين

سلة ميوة!!!

مرة اخرى

اكو شي غلط بالموضوع

اكو لببببس



:)


يا جماعة لبسوا نظاراتكم بلييييز

لوووووووول

الوتيــــــــــن يقول...

الزين .... لا صج صج مصخت

سامحيني ياخيتي شكلي بروح مروان المطوع يعد لي ذاكرتي .. شخباري مروان المطوع!! شفتي شلون ؟ الذاكره ماتييب اليديد بس القديم ههههههه

عالعموم يمكن من روعة قلمج اتلخبط .. السموحه مره ثانية يا ( الزين)