.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

30.3.09

بغيت اسولف لك




تدري شكثر صباحي أجمل لأني ابتديته بصباحك
وغيماتي احن ... تحتبس بمطر شوقك ... تلوني بلون الوله
وتغسلني بطيب الدفا ... وحس الوفا
حتى الخضار ما مر على عمري ابد مثل اليوم ... أحسه ازهي
وأحس الدنيا كلها أبهى ...
أحس كل الكلام متزاحم براسي .... أبي أقول


لا تضحك علي .. بس كلامي ساعة يطلع بالفصحى وساعة بالعامي
:)
واحترت شلون اكتبه لك
واخترت اكتبه مثل ما يقوله قلبي
وقلبي مشتاق .. مشتاق .. مشتاق
تهقا هذا تأثير الجو!!



ليش هالجو يستفز فينا مشاعرنا
ويشعل خواطرنا بألف كلمة وقصيدة
نوال تقول


"حياتي كلها بيدك وحبك سيدي وسيدك"

إنت ملاحظ شكثر نوال توصفنا
واتغافل الوصف ... واغير نوال
ويشعلني عبدالمجيد واهو يقول لي


"ما أذكر متى ..ما كنت بحياتي ألتفت ما القى سواك إنت عمري اللّي ابتدى وأول حياتي مولدي لحظة لقاك .."

تشجيني هالأغنية ... تلف الدنيا وترجع فينا لمعنى واحد
إن حبي لك الحين مكفيني ... وشوقي لك مغطي سماي ... وهذي مو غيمات المطر
هذي غيمات قلبي الذي سهر .. يناجي طيفك ...
ويوم امطرت غنت لك


"سهيت بصفحة كتابي لقيتك بأول الآوراق.."

"انا لاهي مع كتابي لقيتك كل اوراقي.."


لأ لأ لأ


آنا مو محتاجه أغير الأغنية
أنا لازم أغير الجو


أحس إني طايره مع كل نسمة هوى ... والجو لاعب بحسبتي

تهقا كل البنات مثلي!!

إنت الحين ... تحس مثلي ... ودك تكون مثل هالطير ... تعلي في السما واكون انا على جناحك
تبي الصج عاد

أنا الحين أبي اكون جاسمين وإنت علاء الدين وعلى بساطنا نلف العالم بكبره
أبي أشوف الدنيا بعيونك ... لأنها أكيد احلي
تهقا أنا وإنت نصلح نكون علاء الدين وجاسمين


:)


لا تقول لي كبرنا على هالسوالف
لأن القلب اللي يحب عمره ما يكبر .. عمره ما يشيخ
ادري ... ادري ... أنا لو الله يفكني من هالرومانسية جان آنا بخير
بس هذي آنا ....



تدري انك ضحكتني لما قلت لي الله ياخذ الحب اللي ودرنا
وآنا أقول لك اللي يخلي الشوق اللي جمعنا
......



تدري شنو احلي شي بهالجو
إن يحسسك شكثر إنت قريب من روحك
تسايرها ... تحاجيها ..... وتحضنها
وبكل الدفا تحتوي هالعالم
وتقول اليوم أكيد أجمل ... وتبي تشوف انعكاس هالجمال بعيون الناس اللي تحبهم
وتدور على اللي "غابوا ولا بين خبر من يوم ما غابوا"
لاحظ شلون أصيل دخل علي بالخط
:)
ما مني فايده



عندي إحساس بالمصالحة
مع روحي ... معاك ... ومع كل من مر على دروبي
منهم من اخطأ بحقي ... ومنهم من اخطيت انا بحقهم
تدري شنو الغريب بالحياة ... انك بعد فترة زمنية لما تشوف شخص ابتعد عن دربك وتتساءل ليش..
يمكن ما تذكر سبب الخلاف ... ويمكن تذكره بس تشوفه حيل سخيف وسطحي
وتستغرب ليش ابتعتدوا وليش عاندتوا ... وليش تأخرتوا على بعض
تعال نصالحهم
ونصالح الدنيا معاهم
وننسى اصل الخلاف
ويبقى شي واحد بقلوبنا
مطر صافي يروي الخاطر المكسور


ليت الأيام كلها مغيمة
وليت المطر دايم علينا


قالت لي صاحبتي الصبح ان الدنيا اليوم راضية عليها
وفاتحة لها ذراعها بتحضنها
رديت عليها مدي لها ايدج وتمشي معاها ... سايريها ... وسولفي لها عن ايامج
وضحكنا على الفكرة


تدري شلون اشوف الدنيا
اشوف الدنيا صاحب ... يوم يراضيك ويعطيك
ويوم يصد عنك ويسحب عليك
واللي ما يكسرك منها أكيد بيقويك


تتصور إنها راح تمطر مرة ثانية
يمكن


!!


بس اللي أنا متأكدة منه إن مطر قلبي عمره ما يوقف
وعلى عشبك الأخضر دايم يزهر


وصباحك غيم ... ومطر ... ووله
وين ما كنت

هناك 27 تعليقًا:

esTeKaNa يقول...

وهااااك كلي
ضمني لك
احتويني...حنني
انا من لي شوف عينك
غير دربك دلني
:))
شمسنا كانت خجوله
والغيم يحضنها بحنانه
كل ألوان هالدنيا زاهيه
ونسمات الصباح تغازلنا
تضحكنا
تتداخل هني..بينا وبين ملابسنا
وتنعشنا
الدنيا كانت تمد ايدها
وكانت ايدي تحتضن ايدها
وابتسمت...
لأمي
لجارتي
لبايع القهوة بستاربكس
ولكل من مر صوبي
قلت لج الصبح؟
احس اني بلم الدنيا كلها بقلبي
رغم ان هالدنيا تجرحني
رغم انها ألمتني ومرات كثيره عورتني
!!
بس انا سامحتها...سامحت نفسي
وقررت بيكون هالصبح اجمل
بشوقي...باحساسي...بكل الناس اللي صبحت عليهم من الصبح وقلت لهم احبهم
كببببببببر الدنيا
سئلتج:
ليش احس هالصبح اني جميلة؟
واتفقنا...الجمال نور مشاعرنا يشع بعيونا وكل ملامحنا
زيووووووون
انا مخلوق شتوي
يحب الغيم يحب المطر
!!
ما زلت اشعر بالانتعاش
ما زلت ناسيه كل ملفاتي
ومجابله هالدريشه واطالعها
شلي انطره؟
مادري
:))
واي البوست يشرح القلب
انتي الفاعل الاصلي في شراحيه صدري وروحي
:**
صباحج غيم ومطر ووله

Najmah يقول...

صباااحج غيمة بيضا
صباحج مطر دافي
صباح العشب الاخضر
صباح الوله كله
صباحج حب حب حب
:*
الجو شي خياااالي
واحساسج احساسي
أسأل نفسي الصبح لو كل يوم أصحى
على هالجو شنو يصير فيني
زيووون
مابي اصير اليوم نجمة البحر
ابي اصير نجمة بالسمااااا
:p
يسعد يومج وكل لحظاتج
:*

Fskra يقول...

adre eni ga63aa o ma ast7y 3la wayhee o wdch tehfeeni kaf :P

sorry eni ma as2L waalah mn rdait el kuwait 7ada loooyaaa !!!

enshalaah soon I'll contact you sweet sis :* eL smooo7aaa

كبرياء وردة يقول...

وصباحج احساس
وحب
ووله
وصافي مثل غيمة
ورقيق مثل نسمة
وخير وفوق هذا ماطر

الجو يأثر فينا غصبا عنا

يخلينا غير

ودنا نشيل كل هالكون بقلبنا الصغير

ودي اطير

احساسي احساس وردة ارتوت بماي المطر

وودي وودي وودي

وربي يحقق أحلامي وأحلامج :)

I7na 3shagnaha يقول...

طلعت يا محلا نورها شمس الشموسة :))

wake up girl


و انا بعد بغيت اسولف لج و اصبح بس مالي بالحجي المنمق الخاثر:))

ما شاءالله عليج شلون حداقة و عندج كل هالحجي المصفصف


جان زين حداقتنا يعرفون يقولون جذي

صباحج أخضر زاهي:))

الزين يقول...

استكانه

:)

الله يذكره بالخير حوسن سمعت الأغنية اول مره عنده بمدونته وتعلقت فيها


شوفي هذا كله من تأثير حوارنا الصباحي
يوزي عني يا بنية انتي تدقيني سلف وانا ايي اكتب

:))


وصباحي اكيد يستوي احلى واجمل لأنج سعيده هالكثر

:**


احبش يا بنية

الزين يقول...

نجمة


صباح قلبج الولهان
صباح الشوق الغافي على كتابج
صباح يوزع الألوان
ويترك لوني الأخضر على بابج
صباح الخير نجمتنا


تبين تصيرين نجمة بالسما
وانا لازلت حورية البحر

كيفج

:)))))

ويسعد ايامج كلها يارب

الزين يقول...

فسكره

:$

ومغيره رقمج
ويطلع لي ان هالرقم مو موجود

واحتريت

وبزعل

الزين يقول...

كبرياء

:)

يعني كل البنات مثلي اليوم


تهقين الكل الجو لاعب بحسبته!!

الزين يقول...

احنا عشقناها

لووووووووووول

صحيت والله صحيت


صباح النور يا بعد نوري كله

:**

شفتي شلون
يطلع من الحداقه محنا هينين

وصباحج كلام(ن) زين مطيب على شفاهي

:)

Blog 3amty يقول...

أبي رقم كابوريا !

الزين يقول...

بلوق عمتي

@@

دق على بدالة المطاعم

SHAHAD يقول...

ياااااه يا الزييين
رجعتيييني أيااام اول
وذكرتيني باحسااس اول
وزمااان أول

ياااه يا حلوو هالمشااعر
والطيراان
والتحلييق
وحب الدنيااا

بهالجوو
يبيلناا بحر
يبيلناا قلب يحتويناا
شكلي راح أحتوي نفسي وأروح البحر : )

صباااحج سكر يا حلوة : )
وعسى دووم هالاحساسات : )

chandal/danchal!! يقول...

الحب كله حبيتو فيك الحب كله
وزماني كله أنا عشتو ليك زماني كله
حبيبي أوول للدنيا بحالها ولكل ألب بدئتو حس.... آه
يا دنيا حبي وحبي ... دل العمر هوا العمر هوا.... الحب وبس.... لا لا لا


أنا عيل أول ما شفت الجو جذي ... ناداني حبي الأول والأخير... قوايع ريلي تشخص علي من كثر ما حست بالأفنيو!

ما طرا علي غير السوق... استأذنت من الدوام ورحت تبضعت وما عجبني السوق ورجعت بخفي حنين!!!

وها أنا ذا أكتب تعليقي عند شيخة الرومانسية والحداق من بيت هلي يا ظلام!



مسائك طش ورش

:))

الزين يقول...

شهد


وصباحج شهد بعد قلبي

ايه حبي نفسك واستمتعي بالجو

ترى ما يتعوض

:*

الزين يقول...

ام الجنادل

يا دنيا حبي وحبي وحبي
ده العمر هو الحب وبس
واسقيني واملي
واسقيني تاني
اسقيني تاني من الحب
منك
من نور زماني
اسقيني ياللي من يوم ما شفتك
حسيت كاني اتخلقت تاني
وحسيت كأني اتخلقت تاااااني



الله علي انا معاج
المود كلثومي حده


:))

الحين بهالجو الراااائع رايحه تتسوقين
لااااا

انا مو معاج كلش


وليش عاد هلي يا ظلام
لووووووووووووول


عليج سوالف

ومسائج احلى من الورد يا جنجن

`~MnO YeNSa! ~` يقول...

سولفي يا حلو
سوالفج :*

انا مودي
عبـــــــادي اليوم



عيونك آخر آمالي وليلي اطول من اليم

كيف ألقى كلامٍ عذب يوصف دافي احساسي

عشقتك قبل مااشوفك وشفتك صرت كلي حلم

ابي رمشك يغطيني وابيك اقرب من انفاسي




جني سمعت طقة مطر
p;
لو انها امس رشت خوووووش رشة

طبعا
الزين وياي على الخط
يا حداقنتا المخضرمة

chandal/danchal!! يقول...

يا حبيبي يا عبير الشوق يا حبيبي
يا نصيبي من ليالي الشوق يا حبيبي

شعر ايــــــه دلكلام اللي فعينيــــك... آه... خلا احلى كلام يغير

عطر ايــــــه دلعبير اللي فايدييك بيئول ايدييك هيا العبير

ال
...آه... متعوب عليها

:)

سومة rules
:))

مساء البردي

Q8 uniQue يقول...

هذي كلمات شفافة قريبة من القلب

,

وهم على قولة عبد المجيد ...

" تتلخص الدنيا بحبَّك إيه وربَّك ياللّي ماغيرك ضروري "

الدنيا تصير حلوة "بس" لمن نشوفها بعين الحب الصافي بعين العطاء الوافي

شكراً لج الزين

ميمة السبيت يقول...

ويييييييييييييييه يالزين ذكرتيني بايام الأغاني والرومانسية والحب والشووووووق ياسلام ...


دي كانت ايام الله يرحم

SKY يقول...

الله يالزين والله جد شرحتي قلبي لول كنت منقمتة وقريت بوستج واستانست

الاغاني حدها عجيبة خصوصا اغنية عبدالمجيد

وانشاءالله الله يسمع منج وتمطر بعد ما شبعنا من المطر غسل جبودنا شوي ونبي بعد زيادة

المقوع الشرقي يقول...

الزين
هلا مساج المطر اللى لا الله الا الله ما وقف قاعد يرذرذ الحين..وبروق ورعود شكله الليل بيحلب حلب
مساء الرومانسيه
وكلامج العسل..لقلبج الاعسل:)
جنجن..الله يهداج سووووق ؟؟؟حرام عليج
قولى قهوه وتشوفين المطر معقوله تجحتين بالسوق كلللش مو وقته
من وين امطلعين الحب كله ..حلوه
عيل انا عانه على فيروز
اليوم الجو فيروزي
من الصبح وانا مستنه عليها

بتاح ... آلهة الفنون يقول...

:""(
انا بجيت جد
كلماتج هزت كياني
ياحلاتج :)

Kuwait يقول...

@@
شسالفه كلكم مستانسين بالمطر وانا ميته خرعه من الرعد والمطر القوي الي ما خلاني اشوف الشارع والبردي الي يتحذف بحجم الصخر وانا راده من دوامي زين ما بجيت :\

Fskra يقول...

tra ag6 rqmi hni 3adee mako mshaakil ;p

arqmch o amshy ;p

bs elmohm rthaach 3lay :***


add me hatha my new email

fskrr@live.com

Rossoneri يقول...

ايييييه ياللا صباح خير

الزين يقول...

منو ينسى

جندل

كويت يونيك

ميمة السبيت

سكاي

المقوع الشرقي

آلهة الفنون

كويت

فسكرة

روسونيري



كل الحب لكم على تواصلكم