.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

12.2.09

حوار انشقااااقي


كرشخ ..كرشخ ... كرشخ


تقلب الصفحة .... لا تجد ما يشد اهتمامها .. تضع المجلة على طاولة القهوة ثم تأخذ مجلة اليقظة ... تبحث عن صفحة الحرملك ... حكاية جديدة ... لإمرأة تبحث عن الحياة في حضن رجل ..


تتناول كأسها لتنهل منه المزيد من الثلج ... كرشخ .. كرشخ .. كرشخ


وتستنكر هدر الكرامة واستباحة أحلامنا نحن النساء في مجتمع يطلب من المرأة الإنحناء لهيمنة شهريار أو سي السيد
تغضب من ضعف صاحبة القصه لتقلب الصفحة ... جرائم النساء في المجتمع المصري ... ودائما هناك رجل خلف الروايه ... الرغبة وراء تحقيق الأسطورة ونشد النهايات السعيدة


كرشخ ... كرشخ ... كرشخ
المزيد من الثلج ... تحس ببرودته تصل إلى أعماقها ...
"هممممم" وتغمض عينيها بارتياح


يرن الهاتف ... تنظر له لبرهة ... هل أرد؟؟
يزعجها المتصل بإلحاحه


"الو"
" واااي ليش ما حاقرتني ماتردين"
"مالي خلق .... "
"وه من الله السعا ... اخليج عيل"
"لا لا .. تعالي .. قولي لي شبغيتي"
"ما عندي سالفه ... قلت بهذر معاج شوية"
"ههههههههه... مالج من العادة قاعدة بالبيت هالحزة"
"ويه ... مالي خلق اللوية ... وبعدين يختج وين ما اروح الاقي هالحبيبة جبالي ... شالسالفه ... الحين كل الناس صايرة تحب!!"
"هههههه .. الله يهنيهم ... إنتي شحارق خبزتج"
"شحارق خبزتي ... أبي أحب حالي حالهم"
"إنتي يا بنية ... ماكو شي ثاني يشغل بالج"
"مثل شنو ... حتى المدونات هالأيام صايرة تضيق الخلق ... ماكو سالفة"
"ايه اشوفهم ... صايدهم ركود فكري شكلهم"
"من تقرين له هالأيام ؟؟"
"اللسته المعتادة إذا عندهم شي يسوى"
"قريتي حق استكانة آخر بوست"
"ايه قريته"
"قتلتني فيه ... من وين يابت هالسوالف كلها... كانت قمة بالرومانسية .. حسيت بآخر البوست إني بصيح"
"و إنتي اقل شي يصيحج"


تتناول المزيد من الثلج ... كرشخ .. كرشخ


"هاااو شنو صوته هذا .. شتاكلين"
"ثلج"
"ما تيوزين من هالطبع"
"وليش ايوز ... يبرد علي"
"بهالبرد ... الدنيا صقعه بره والناس تدور الدفا وانتي تاكلين ثلج"
"إنتي داقه عشان تناجريني"
"لأ .. داقه عشان اقول لج إن فيني انشقاق عاطفي"
"اسم الله علينا ... شنو هذا فايروس يديد!!"
"من صجي ... فيني انشقاق عاطفي وبموت منه"
"ايه عاد شنو يعني انشقاق عاطفي فهميني "
" يعني قلبي يبي يشق صدري ويطير يدور له حبيب ... أبي أحب ... وبنفس الوقت ما أبي أحب وصلت المعلومة الحين ... "
"والله على بالي عندج سالفة"
"من صجي لموي ... فيني رغبة للحب ... وعقلي رافض الفكرة .. معاند ما يبي يحب .. يعني منشق عن الرتل ... ماشي لحاله"
"الحين هذا اهو الإنشقاق العاطفي"
"شرايج إنتي بس"
"أول مره اسمع فيه"
" اشتغلنا شماتة... أنا بعرف بذمتج ما ودج تحبين ... ما ودج تجربين الشعور اللي تكتب عنه استكانه ......و نجمة"
"شله عوار القلب ... أنا مرتاحه هالشكل ... اكو وحده عاقله تدور الشقا"
"مو شقا يا لميا ... مو شقا"
"شنهو عيل؟؟"

"هو شعور يصعد بالقلب بالسما
تالي ينزل مطر
يخلق بحر
منه تذوقين الشهد
منه تخبرين الحياة
بحلوها ومرها
منه تحسين التعب ويا القهر
منه يكون للدموع طعم غريب
منه يكون للسهر أحلا قمر
ويمكن بدر
لجله تنادين العمر
يوقف بعيد
لا ما يمر
منه تعرفين الدفا
وطعم الوفا
وجمر الجفا
منه تكونين الحياة
وشوق المشاعر
وجرف الشجون
وكل الجنون
وشوية عقل"


"إنتي لو بس تبطلين تحلمين ... بتكونين بخير"


والمزيد من الثلج ......كرشخ كرشخ كرشخ


" وانتى بطلي تاكلين ثلج... أنا أسناني عورتني ...إنتي شلون"
"وآنا قلبي عورني كثر ما قلت لج ماكو شي اسمه حب ... شبابنا ما يعرفون يحبون وبناتنا مستذبحين يدورون اسطورة مو موجودة الا بالقصص"
" يعني الحب اللي نرسمه ونحلم فيه مو موجود .... يا حسرتي عيل انا شدور عليه"
"خياااال في خيااااال .. واهو الخيال دايما يزين لج الأمور .. دايما يبالغ بالتصوير والوصف .. خيال ... ما لازم يكون جذي .... بس اتصور الواقع شي مختلف يعني مثل ما نقرا ما اعتقد في ... بس اكيد في جزئية صغيره صج ... وموجودة"
"بعد بعد .. كسري مياديفي"
"يعني خلاص هونتي ما تبين تحبين"
"ليش اهو بكيفي ... مو آنا اللي اختار والحب عمره مايكون قرار أو شعور يطق الباب ويستأذن"
"هذا صوت العقل!! .. بس تدرين ... ساعات يعطيج مؤشرات صغيرة جنه يستأذن وانتي تتصددين عنها ... لأن عاجبج شعور اللحظة ... وتلاقين له الف تفسير يخدر منطقية تفكيرج"
"مؤشرات!!"
"ايه مؤشرات .. مثل الصوت الصغير اللي في راسج يقول لج انحاشي .. واكو دقه زيادة بقلبج تقول لج هذا غير.. واكو نفس بيسبق الكل يقول لج بروح له"
"انشقااااق ... هذا اهو ... إنتي تعرفينه .. في شي مو قاعده تصرحين فيه مو قاعدة تقولينه .. في قصة آنا ما اعرفها ... قولي!! "

تتناول كأس الثلج مرة اخرى ...


"مو الحين يمكن تالي ... وعن اللبحه الزايدة ... يعني لا تحنين"
"ماني حانة على شرط تقصين لي"


تسمع صوت تحطم الثلج تحت اسنانها

تصمت لبرهة


"الووو لموي ..."
"تالي ... تالي ... يالله انا ماشية ... تبين شي"
" اوكي براحتج ... بنطر تالي ...وأمري لله سلام"
" احمدك يارب هههههه سلام حبيبتي"



امـا نفس الحب عندي حاجه تانيـــه
انـت فين والحب فيــن
ده انـت لو حبيت يوميــن
كان هواك خلاك ملاك


وتهرب بالتهام المزيد من الثلج








هناك 34 تعليقًا:

Najmah يقول...

لأن البنت لما ترفض شي بواقعها
تدور القلب اللي يفهمها
وتحس بحاجتها للحب اللي يسندها
يمكن تسمعه بأغنية
أو تقراه بمجلة
أو تهرب منه.. بقطعة ثلج
:))
وبالنهاية ندري
كل احلامنا مجرد احلام يالزين
:)

MKSARAT - SAYED SAAD يقول...

تعرفي اني بحب اقرقش التلج
بس ده ملهوش دعة باي حاله ملل ممكن اتعرضلها
مسألت وقت
كل شئ له وقتة وينتهي
كل الاحترام
سيد سعد

~ هند ~ يقول...

وكلنا بننطر تاالي ..






>> شلنا البتاع من التعليقات :)

حسافتج يا كويت يقول...

الزين

الواحد من يقرى مواضيعج غصب يعيش فيهم


ناطرين الكلام هذا يتصفصف في كتاب حلو
شدي حيلج

علشان نتصفحة واحنا كرشخ كرشخ كرشخ

7osen يقول...

مرحباااااا

شلون زيون إن شاءالله بخير


حبيت صوت اكل الثلج
هههههه

عجييييب

حلوة حواراتج ، لازم تكتبين حلقات مسلسلة بحورات واقعية لأنج تجيدين رسم الشخصيات .....


:)

بإنتظار الجديد

قولي لها لاتدور على الحب لأنها ماراح تلقاه
الحب هو من يجدنا لا نحن مانجده

:)

كبرياء وردة يقول...

اااااخ يا زمن اغبر

صارت حياتنا باردة

صرنا ندور الحب ونركض وراه

صار ودي اكل ثلج

بس اذا مرضت رح حطها براسج زيون:p

اجار الدين كشمش يقول...

ان موووووجووود

بالتب اللي فيييه الثلج

شمختني اضافرهااااا

ماني طااالع بره التب ابي تجمييد مشاعري بالثلج

ماااابي حب ...!!!1
لانننننننننن
السبب هو ان مفهوم الحب ..هو الارتباااااط بالزواج !!1 هالاياااام

ولذلك ...اغلب النساء لاتعيش الحب كاحب

انما العطش و العطش
هو
العطشششششششش
فمالله

فريج سعود يقول...

اي والله حايشنا جمود فكري ما ادري اشمنه ؟

Tekana يقول...

very nice :)

واحلى مافيها كرشخ كرشخ :)

Manal يقول...

صباحك ورد احمر مع اكبر قلاص فيه ثلج
:)

يعني الحين بنات الكويت
اكثر من 50% يستذبحين على الحب والزواج؟

والله يمكن

بس هل هذا اهم شي في الحياة؟
@@
-

ما ادري
بس الي مقتنعة فيه
ان الاحاسيس لدى الجنسين تنجذب الى ناحية الاستقرار الروحي والعائلي والاسرة في مرحلة من مراحل العمر

وهنا تكمن لمسة الاسرة في ذلك
بان تاخذ هؤلاء بالاحضان
وتوفر لهم الحنان الكافي
وما تضيع نصيب الابناء بالبحث عن ذات مال وجمال
او اي شيء آخر يقف امام الاستقرار الرومانسي

:)

البنات ما ينلامون
الاهالي على الاغلب ينظرون الى ابنائهم على انهم مازالوا اطفال
ويستبعدون حاجتهم العاطفية والرومانسية
ويزيد الضغط على البنات والشباب
والبنات اكثر بحكم المجتمع

بس سؤال
شنو المجلة الي كانت تقراها
؟

:)


دمتي بحب يالزين كله

قصصك تحمل معاني الزمن المزري

سبمبوت يقول...

حب؟ ح ب ؟ حاء باء ؟
كم مرة سمعنا هذه الكلمة؟ كم مرة شاهدناها في الأفلام وقرءناها في القصص والروايات؟ كم مرة تكلمنا عنها مع صديقاتنا؟ وكم مرة دقّت قلوبنا بدل النبض دب دب .. حب حب؟

الكلمة موجودة في المعجم .. اذن هي موجودة في الحياة. كل ما تتطلب قليل جدا من الإيمان، وكثير جدا من قناعة قاسية ان يضيعنا قطار الحبيب فنجده بعد حين في محطة أخرى.

غير معرف يقول...

لما كنت بامريكا كانوا يقولون

those who eat ice
are sexually frustrated

سامحيني وانا اخوج
لا تاكلونه بره البيت

ZooZ "3grbgr" يقول...

خوش بوست للفالنطاين

ثلجي متقوقح

انتي واستكانه ونجمة ببوست واحد

هفت علي بروده من الشاشه

على فكره

احب اسم لميا

:")

charisma يقول...

وه زيوون شهيتيينى اكل ثلج
والله اذاا انتكست منج
هههههههههههه

شوفى انا وصلت لقراااار الالا وهو
اريح قلبى واجمده قطييته بالفرييزر واعييش الخياال واستمتع فييه

وبسسنااا والا شرايج يا اوخيتى

:**

qesat_5ayal يقول...

أنا أعرف الانشقاق
:)


استمتعت بالحوارات حتى أخر حرف


شكرا حبيبتي

الخيلاء يقول...

اول كرشخ عبالي صوت تصفح المجله p;

ياحلات الحب الي نقراه عند استكانه لو فيه منه بارض الواقع جان احنا بخير اخر بوستين ايننون اسم الله عليها

و هالحب لازم يسمونه الحلم الضائع كل من يدور عليه :)

الزين يقول...

نجمة

:)

كل انجاز نحققه يبدأ بحلم بالنجمة

ليش التشاؤم

:*

صباحج خير

الزين يقول...

سيد سعد

اهلا اهلا

اخبارك ايه يا سيد

:)

وعليك بالعافية الثلج

انا ما قلتش ان ده له سبب عند كل الناس

بس لميا كانت بتهرب بالتلج

هي دي وسيلتها

:)
وصباحك سكر

الزين يقول...

هند

وتالي ياي بالطريج

انتظري رسائل الغياب



ومشكووووره على البتاع

:*

الزين يقول...

مبيوق

:)

اييييييييييه ياحسافتج

يبي له شغل وعباله

وانا كلش ما عندي وقت ولا لي خلق

:)

وكرشخ كرشخ احلى شي الموضوع

الزين يقول...

حسين

ياهلا يالشيخ

انا بخير وعافية

والله يا حسين الكل حب صوت اكل الثلج


اصبر علي بسوي حواراتي مسلسل على قناة همممممم

اللي اهي

حق رمضان بس على شرط تتابعها

:q

وانا معاك

الحب اهو اللي يلقانا بدون ما ندور عليه

الزين يقول...

كبرياء

هههههههه

ضحكتيني على ودي اكل ثلج

اكلي يا ماما والبانادول علي

:*

الزين يقول...

اجار

يا حسرتنا بالتب مره وحده

!!


تبي تتجمد مشاعرك

وما تبي تحب

شوف لك طلب واحد من البلورة

اثنين ما يصير

:)))


وبعدين انت معترض على شنو

النهاية المنطقية للحب هو الزواج

تبي تحب ببلاش

!!!!!


عيل خلك عطشان

وعطشان اسمع يا نهر

.....

الزين يقول...

فريج

اسم الله عليك ما عليك الا العافية

انت خايف تحوشك عين

يمه منك

!!

الزين يقول...

تكانه

وكرشخ كرشخ كرشخ

:)

الزين يقول...

منال

وصباحج طيب مبخر مع فنجان قهوة

:**

من قال ان الزواج اهم شي
بالعكس انا اشوف بوقتنا هذا بناتنا مو هالكثر هامهم الزواج ولا مستذبحين عليه

خصوصا بزمن صارت البنت تشيل هم البيت اكثر من الريال
وذا اصلا كانت مرتاحه بحياتها فالزواج بيكون زيادة مسئولية اهي بغنى عنها

بس خلينا لا ننكر ان في مرحلة عمرية معينه تتمنى يصير لها بيتها وعيالها وتستقر

وهذي سنة الحياة يامنال



:))

والمجلة اللي كانت تقراها هي كوزمو

تالي حذفتها وقرت اليقظة


وقصصى تحمل واقع تعيشه الكثيرات

:*

الزين يقول...

سبمبوت

:)

ما عندي اضافه على تعليقج

كلامج صح

مشكوره يالشيخه على التواصل

:*

الزين يقول...

غير معرف

:)

الأمريكان متأثرين بنظريات فرويد وايد

وهذا اكثر عالم متعقد نفسيا
from his sexuality

:)

and they said he was gay

والعلم عند الله
:)

any way

eating ice is a sico tactic to compress somthing u dont want 2 feel or think about

socially
emotionally
and maybe sexually

:)


thanx for the advice bro.

الزين يقول...

زوووز

:))))


ايه نعم طالع من الفريزر

تدرين عاد

اسم لميا اقترحته استكانه

:)

الزين يقول...

كاريزما

هههههههههههه

ياربي الحين كلكم بتاكلون ثلج وكله مني

ترى ما يجوز

:)))

هم الخيال حلو

وصباحج حب يارب

:**

الزين يقول...

قصة

:@

شلون عرفتيه

سعيدة باستمتاعج

:*

lawyer يقول...

الحييييييييين

كرشششششخ كرشششششخ كرشششششششششخ

شنووووووو؟؟



صوت الثلج والا الجرايد و الا شنووووووووووو






البوست بصوووووووب و كرششششششخ بصووووووووب

الزين يقول...

الخيلاء

يكفينا الشر من الأحلام الضايعه

انا احلامي جدامي بحيل الله

:))


وصباحج حب يارب

:**

الزين يقول...

لووووير

ياربي مادري ليش لما تعلقين احس قاعده تصوتين علي من بعيييييييييييييييد


هذا صوت الثلج يا امي

عيزت وانا اقولها هالحجوة

وخلاص بغير اسم مدونتي من قصص الزين ليه

مدونة كرشخ كرشخ

:)))