.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

9.2.09

كيف يهرب رجالنا من الواقع


بالأمس همس لي صديق بأني عنصرية ... وقصصي محصورة على النساء ومشاكلهم ومشاعرهم وهمومهم ... عندها أجبته بأني امرأة ومن الطبيعي أن اكتب عن هموم النساء لأني وحده منهم ...


- "حاولي تتكلمين عن هموم الجنس الخشن"
- "وإذا قلت شي ما يعجبكم... شيفكني منكم"
- "لا تخافين إنتي قدها"


وطالبني بكتابه قصة عن هروب الرجال



محاولتي سوف تكون متواضعة .. واللي يعنينا على الهجوم المضاد



وتبدأ الحكاية .......



دخلت مقهى ستاربكس تبحث عن صديقاتها ... تتلفت يمنة ثم يسرة ... تبحث عن ملامح تحفظها وإذا بكف تلوح لها من بعيد نحن هنا ... فتبتسم وتلوح لرد التحية ... بنفس اللحظة تلتقي عيونهم ... وتجده يتنقل بين تفاصيلها ... متنقلا بعينه من حذاءها المريح حتى أطراف أصابع يدها وأظافرها المصبوغة بإتقان باللون البنفسجي القاتم ... تتخطاه لتصل لصديقاتها ويبدأ السلام وتتناثر القبل والأحضان



تقبل احدهم بالمشروبات المليئة بالكافيين ليبدأ الحديث بتناول الهموم ... يتبعه القليل من النميمة المغمسة بآخر أخبار فلانة وعلانة .... ثم يدور الحديث عن آخر صيحات الموضة وما استحدث بالأسواق من تنزيلات والنيو كولكشن ... ويتخلل الحديث مقتطفات عن طفلة هذه وبنت تلك ... حتى يفتح باب الشكوى من الأزواج


تتناول فنجان الإسبرسو ... ترتشف منه القليل وهي مغمضة عينيها لتستمتع بتلك المرارة التي تعشقها ... ترفع عينيها لتجده يرتشف قهوته ويتابع تحركاتها ... تلتفت لصديقتها ... تبحث بين ملامحها عن أي دليل لملاحظتها باهتمام ومراقبة من يجلس أمامها فتجدها منشغلة بالحديث عن مزاج شريك حياتها المتقلب .....ثم تعود لتنظر إليه بتوتر .. ترفع كفها لتمسح على شعرها وتتأكد أن خصلاتها لا زالت منصاعة ولم تتمرد بعد


وتسرح مع أفكارها حتى يلفت انتباهها سؤال إحداهن

"اوكي بما إني امرأة فممكن افهم تقلبات المزاج اللي نمر إحنا الحريم نتيجة لحرب الهرمونات الدائرة بأجسادنا .. بس الرياييل شقصتهم ... يعني شسالفة المزاجية اللي هابه عليهم هالأيام ... اهو فايروس بالجو ولا شالسالفة؟؟"


"وليش تستكثرين على الرياييل مزاجيتهم ... أنا أتصور نفس المؤثرات اللي تعفسنا ممكن تعفسهم"


نلتفت لها كلنا


"غلطانة... حسبيها عدل ... أصلا الريال ما عنده القدرة على احتمال ال mood swings اللي نمر فيها .. ولو جرب هالجحيم يمكن ينهار "


"أو ينتحر"


يقهقون لطرافة الموضوع


" آنا أتصور طبيعتهم مأهلتهم إنهم يتحملون الضغوط الخارجية لسبب واحد ... إن ما عندهم ينون هرموني "


"هذا ما عندهم وهالشكل اقل شي اييهم يتكودون ... تعالي شوفي الواحد منهم لين صدع ... على باله بيمووووت ... كله صداع ... مير أن ما جرب الحمال والطلق والولادة وتوابعهم ... ترى كلش الرياييل طاقة التحمل عندهم مو شي"


"اهي غير بس ... يعني الشغلات اللي ممكن إحنا نتحملها اهم ما يتحملونها لأن طبيعتهم تختلف... اعتقد هذي كل السالفة"


" الا ما قلتي لي فطيم شصار على طناقير ريلج"


"هذا اهو ... لا حجوة ولا نص ... صرنا نكلم بعض بالإشارة الله وكيلج ... وإذا سألته شفيك .. قلب على جنب وحط راسه ونام .... مدري شقصته هالريال من ايي من الدوام حط راسه ونام ... تقولين مخدر ... يقعد المغربيات ويجابلنا واهو مبوز ... يشرب الشاي بسكات ... ويجابل التلفزيون لا كلمة ولا نص .... ومن الساعه تسع رد حط راسه ونام"


"وه .. غبرة ... اخاف بس عاضته ذبانة تسي تسي"


"وشتطلع هااااا ذي"


"ذبانة النوم ... هااو ما سمعتي فيها"


"ياحسرة قلبي .... يعني شسوي ... أقول له يروح يفحص"


" فطيم وانتي سيدا صدقتي ... تقص عليج ياماما"


"عيل شقصته هالريال ؟؟؟"


تعتدل منيرة وتعدل نظارتها


"زوجج في شي شاغله ... أو قاعد يتعرض لضغوط يحاول ينحاش منها بالنوم"


" @@ شينحاش منه ... انزين وليش ما يقول لي"


"يمكن لأنج إنتي جزء من المشكلة ... أو تذكرينه فيها نوعا ما"


"هاااااو ... ليش بالله ... هذا وآنا مسوية له يا دهينه لا تنكتين"


"شوفي .. شوفي ... آنا قريت بكتاب النساء مدري من وين والرجال مدري من أي كوكب إن الريال ساعات يحب يعتكف في كهفه .. ويقول لج المؤلف خلييييه .. ولا تحارشينه ... اهو محتاج مساحته من التفكير لين يطخ ... وإذا طخ لعني والديه"


"حرام عليج ... ليش اهو غرام وانتقام"


"هاااو عيل شله حاقرها ... بعد متضايق خل يحجي ... شمعنه احنا نقعد نبربر ونقول كل شي "


تلتفت لهم ....


"تبين الصج عاد .. حمدي ربج إن مجابلج بالبيت ... اللي عندي زين أشوفه ... ما بين شغله ودواوينه والشاليه بالويك اند ... وسفراته مع ربعه بالعطل ... آنا احصل الفضالة"


"انتي ريلج يحب الدوارة ... وبعدين كلهم هالشكل الديوانية هذي شريكتنا"


"لأ ... آنا حاسه إن في شي ثاني ... ماهو الأولي ... الريال ما يطالعني ولا يطل بويهي .. مثل اللي مسوي شي وخايف يطل بيوهي لا اصيده"

وتنتبه لها خمسة اجواز من الأعين


"يعني شنو؟؟؟؟؟!!!!!"


"مادري لا تسئلوني يعني شنو ... بس أحس السالفة فيها أكثر من ديوانية"


"وانتى ليش ساكتة ... ليش ما تقولين له"


تسرح قليلا ...


"مابيدي شي .... ما عندي دليل ... كله إحساس وبس "


"يا حبيبتي المره عندها سنسر ... ينبها إذا الريال عنده وحده ثانية"


"مادري ... اخاف أكون ظالمته ... وبنفس الوقت مستغربة صدته"


ترفع عينيها ... لتراه يتابع حديثها من بعيد ... وتتساءل ... شنو اللي شايفه فيني ... ليش متابعني ... وليش ما اشوف هالنظرة بعين اللي عندي ... شيللي تغير ... وين كل ذاك الإهتمام .. والشغف ... والغيرة ... والحب والشوق .... شنو اللي صار له


"هييي ... وين وصلتي؟؟"


"ما وصلت ....... وياكم"


"سكتوا ... آنا اللي عندي نمونه ثانية ... شريكتي من نوع ثاااااني ... أربعة وعشرين ساعة مندعس بديوانيته يلعب بليي ستيشن ... وما تسمعين إلا صراخه"


"هاااو ... راجع بالجهل ... شيلعب عاااد"


"شدرااااني .. نوبة دخلت عليه يلعب كرة قدم ... وتميت قاعدة ربع ساعة ولا حس فيني كثر ماهو مندمج ... تقولين مغيب "


"والله هالرياييل جنهم يهال"


"تصدقين كل ما كبروا ... صاروا شي ثاني"


"والله يازين اللي عندي ... ماله الا كتابه ودفاتره ... لو بس الله يفكه من سوسو"
"سوسو!!! وشتطلع سوسو هذي بعد؟؟"
"هالسيجارة ... يختج مدخنة ما تطيح من ايده"
"ويييه ترى مو زين ... حق الأمراض والريحه الشينه... ولين قعد الصبح ... كح وكح"
"عيزت فيه .... زايد هالأيام بعد"


"اللي عندج حبيبتي عايش بعالم آخر .. العن من اللي عندنا كلنا"


"عالم ثاني عالم ثاني ... بس اهم شي ادري شعنده وشوراه ... وبعدين خليه يلهي بكتبه مو احسن له من الخرابيط .. على الأقل لين بغيته احصله"


"ترى منور احس ان ريلج كلش مو واقعي لا تزعلين"


"يا سلام ... وليش يعني"


"كثر القراية أثرت على تفكيره .... ترى والله القرايه الوايده ما تصلح"


تنظر لها منيره وتفضل الصمت


"الحين انا بسئلج ... صج صج .. اهو يقول لج كلام حب مثل اللي يكتبه؟؟"


"سؤالج في اقتحام للخصوصية ... بس هم بجاوبج ... الحياة يا عزيزتي مو كلها كلام حب ورومانسيات ... ساعات الريال ما يحتاج يقول عشان تعرفين ... يعني ابسط تصرفاته ممكن تقول لج شكثر يحبج ويرغبج ... تفانية بخدمتج انتي وعيالج ... شلون يدور راحتج ... ابتسامته لما تدخلين عليه ... لمته لج الصبح قبل لا يروح الدوام ... حتى سماعه لسوالفج السخيفه يعني يحبج ... وجوابي لسؤالج ايه يقول بس مو بالعربية الفصحى .. :)"


"وه يا شينج لين تميلقتي ... وبلشتي تعطينا محاضرات"

"اقول جنه خذتنا السوالف "
"ايه والله ... قوموا قوموا مشينا"
"منووور نطري بتمشى معاج ابيج بسالفه"


تعطيه نظره يستقبلها بكل اهتمام ثم تحمل حقيبتها وتغادر مع منيرة




ضغوط مادية .... مشاكل العمل ... روتين الحياة الزوجية .... انعدام الحوار .... رفض لمعطيات وأفكار مجتمع لازال محلك سر .... هموم البلد ... احباطات مختلفة الألوان ... كلها قد تجعله يهرب ... هروبه يختلف عن هروبها ... لكنها بالنهاية هروب


بليي ستيشن ... ديوانية ... سفر .. علاقات مرفوضة ... نوم ... مزاجية ... وأحيانا كتاب


هي وسيلته للتعبير عن رفضه لوضع ما ..



ويتبع مع هروبها ...










هناك 24 تعليقًا:

قانونى كويتي يقول...

الزين

يسعد صباحج اول شى

وثانى شى صح ما يمنع ان الواحد يتكلم عن الطرف الثاني

وما اتصور احد عنده مانع

والشى الثالث ماشاء الله عليج دشيتى بكذا موضوع وبكذا قصة


وانا بس بعلق على اللى قاعد يخوزز وبخلى باجى النقاط حق الاخوان اللى بعدى


شغلة المخوزز هذى صراحة ظاهرة للاسف الشديد صارت منتشرة بكل مكان وبكل وقت


يعنى بالجمعية بالسوق بالمستشفيات بالشرع بالشبرة بسوق اليمعة الخ الخ الخ


صرات منتشرة بشكل وايد وملفت للنظر

اللى احسه ان الفراغ الكبير اللى يعيشه الشباب اهو السبب

وهذا يرجع لابتعادهم عن الدين الاسلامى

وهذا اهو اللى خلالهم عديمى الاحساس والرجولة

وخلالهم ينظرون للامور بنظرة شهوانية

وكل تفكيرهم ارضاء شهواتهم فقط لاغير

على العموم هذا نظرى واسمحولى على الصراحة وعلى ابراز السبب


وتحياتى واسف على الاطالة

سبمبوت يقول...

محاولة جميلة وطرح واضح لأمور يومية بسيطة. شرايج الزين، لمدة يوم كامل قعدي تخيلي انج زيد مو زين. شنو يلبس زيد؟ شلون ياكل؟ وين يروح مع ربعه؟ لما يحب منو يحب؟ واذا حب هل راح تكون طيبة ووصريحة و أمينة ام راح تكون وحدة فعلا تؤلمه وتكسر قلبه!

ترى .. ماذا يحس الرجل عندما ينكسر؟ موضوع جميل سيكون اجمل عندما تسطره أنامل امرأة.

ANGEL HEART يقول...

اكثر من روعه

وفعلا انتي قدها كتبي ومحد بيزعل ولا يتحسس لانج تكتبين الواقع سواء بالنسبه للمراه او الرجل

اعتقد في سبب قوي ومهم لهروب الرجل اهو عدم اقتناعه بالمراه اللي تشاركه حياته او عدم حبه لها او انسجامه معاها وهالشي اسبابه تختلف من واحد لي الثاني يعني ظروف عادات ابناء مصالح مشتركه يبقى عدم الحب والانسجام سبب للهروب

ودمتي بخير

lawyer يقول...

واااااااااااااااي


انا عن نفسي ما اقدر اتحمل ولا بلوووووووووة من هالبلاوي


عفوااااااااااا الريايل


تراااااااااااااااااا ممكن كلهم ظاهرهم زين

بسسسسسسسسس عشرررررررررتهم تبييييييين شغلاااااااااات حتى لو بسييطه ما اعبر عليهااا





انا يقتلني الريال المتجاااااااااااااهل


عادي اصصصصصصصصصصصصصرخ و افجر فيه









خوووووووووووووووش ربع

مبتلشيييييين في رياييلهم
حتى الوقت الخاص الي فيهم
قاعدين يفكرون في حل حق رياييلهم

وتلاقين الريال ولاداري

secret يقول...

أنا ما عندي مشكلة

استلمينا عدل مدل و لا تحاتين ما راح اقول عنصرية ..

أصلا ساعات اقول نستاهل :)))

اما موضوع الـ
mood swing

فحتى الانتحار ساعات ما يفيد :)

مشكلة :)

ZooZ "3grbgr" يقول...

لوووووووووووووووووول

يعني بتقصين علينا ولا عليهم كاتبه عن الرياييل

زيوووون ماكو فايده

قصيتي عليهم بسطرين بالآخر

مو كل الموضوع بلسان بنات

مو مصدقتني

تبين الدليل

ماشي



"سكتوا ... آنا اللي عندي نمونه ثانية ... شريكتي من نوع ثاااااني ... أربعة وعشرين ساعة مندعس بديوانيته يلعب بليي ستيشن ... وما تسمعين إلا صراخه"


شريكتي

لوووووووووووووول

خخخخخخخخخخ


شفتي شلووووون

رديلنا صوت البنات

هدي التماسيح ما يبون متحدث

صج ليش يسمون نفسهم تماسيح؟

تشبهاً بلاكوست عليه اللعنه؟؟

JooJ o MaJooJ يقول...

ترى فعلا الرياييل ساعات يبون يقعدون ابروحهم اعيشوون ابعالمهم إلي ليل حين ماني عارفه إشموديلهم..يعني مو ضروري إكون عنده و حدة او مشكلة بس مجرد يبي إكون بروحة..أنا مادافع عن الرياييل بالعكس حدهم غمووووض او أردا من الحريم بالموود او ماينعطوون ويه او مايستاهلون المرة إلي تعطيهم عينها..إلي اتدوس على راسهم احبونها..ولي تعطيهم عيونها اخلونها مو كفوو... بس أن إكتشفت هل الشي فيهم :S
سوري طولت تحياتي جووج

om comment kuwait يقول...

الزين
اولا القصة حلوة بدون مجاملة

و اسلوبج شيق و يشد القارىء يقرا لاخر سطر

انا قريت اخر فقرة اكثر من مرة
-------------------------------
للاسف قصتج تعكس الواقع

و هروب الرجل مشكلة بس لازم ينوجد لها حل

حتى لو حل مؤقت

-------------------------------
اسمحيلي مروري الاول على مدونتج :)

Eng_Q8 يقول...

والي يجمع كل الصفات الي قلتيها اتهقين مرته راح تنتحر ؟؟

الله يعين الي بتاخذني

وبعدين هذا مو هروب الا من القهر ان ما نقدر انسوي شي خليها على ربج

والله يخليلي سوسو اهي الي فاهمتني بهالدنيا

الزين يقول...

قانون كويتي

صباحك خير يارب

حاولت جهدي اني اغطي الموضوع زين

اما اللي يخوزر فله قصه ثانية ولا تاخذها بالصورة المجردة

:)

حياك الله يالشيخ

الزين يقول...

سبمبوت

لو بتخيل اني ولد

@@

صعبه تصدقين

بس فكره حلوة بفكر فيها وبشوف شنو يطلع معاي

:*

وصباحج سكر

الزين يقول...

اينجل

بعد قلبي

:*

من طيبج يالشيخه

مو شرط السبب يكون المرأة
احنا قلنا الأسباب تختلف ويمكن اصلا المرأة ما يكون لها وجود بحياته

:)

وكل من له شقى اللي له

الزين يقول...

لوير

:)))

ادري فيج

صايره ارهابية وتبين تفجرين

يا كافي الشر

والله اهي كلها قصه والحبكه تقول لازم يسولفون برياييلهم عشان نعرى طرق الهروب عند الرياييل

يعني المخرج عاوز كده

شرايج انتي بس

:))

الزين يقول...

سيكرت

ياهلا باخوي الغايب

ايه والله المود سوينجز قاتل ترى



ودائما لك مكان فاضي هني ما يترسه الا وجودك يا سيكرت


قرت عينا فيك ياخوي

الزين يقول...

زووووووووووز


يا حياتي انتي

وربي فقدتج كبر الدنيا والله العالم

غيابج ضيق خلقي وخلق ناس وايدين

لا تسوينها مره ثانية يالشينه



وسالفة التماسيح اخاف اقولها انطق

:))))


يازين ردتج والله

الزين يقول...

جووج

انتي لج المكان كله وطولي على كيفيج بعد قلبي

:*

وبعدين لا تعممين ترى فيهم الزين وفيهم الشين

زي حلاتنا

الزين يقول...

ام كومنت

بعدي قلبي وهذا من طيبج

وليش للأسف احنا نبي نعكس الواقع

وحياج الله بمرورج الأول اللي اسعدني وايد

الزين يقول...

مهندسنا

ايه ايه راح تنتحر وخل يزهب له سبير

:))

والله يحفظك من هالسوسو اللي تالفتك يالشيخ

charisma يقول...

ههههههههههه
يااالله صباح خيير

يا حلو النماين الى ذكرتيهاا
وما خفيه كان اعظممممممممم

كل من يهرب من الواقع وما ادرى متى بتعدل حالنا


صبحج الله بالخييير
:**

Corpse Bride يقول...

الزين..

هالقصه دليل شامل كامل للشباب وتزواج المستقبل...

انا اقول اسهل واحسن هروب البليستيشن والطفوله المتاخره الي عنده اهون من اي شي ثاني...

يعني كلش كلش لعبي معاها وشاركيه الهروب..

يعطيج العافيه..

نبي هروب بناتي..

الزين يقول...

كاريزما

:))))

الله يستر من الخافي

ويا مساء الوله كله

:**

الزين يقول...

كوربس برايد

:)

عيل انا اقول اللي يقرا اهون الكل

هادي وشحلييييييييله ومامنه ازعاج

هههههههههههههه

شرايج فيناواحنا قاعدين نختار على
هوانا

الهروب البناتي ياي بالطريجي

:*

كبرياء وردة يقول...

كلنا نحتاج للحظات من الصمت والاختلاء بنفسنا

بس هالفترة المفروض ما تطول

لان الصمت قد يفهم على انه صد وهجر وكره وقد يسبب جروح في الطرف الثاني

Manal يقول...

ابدعتي بكل صراحة

واقع مرير

لا نعلم كيف نتوخاه

دعينا نقرء


بانتظار المزيد
:)