.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

6.1.09

من حزاوي الزين ....... ليلى والذيب


تنتصف الشمس بصدر السماء
رغم البرد الشديد ... الا ان دفؤها يملأ غرفتها بحميمية ... تفتح عينيها ... تتمغط .... وتقلب على جنبها وابتسامة خفيفه تلون تلك الشفاه
يرن الإنتركم


ليلى : نعم
أم ليلى : نايمه لين الضحا العود .... قومي يالله ... السايق اليوم اجازته ويدتج ناطرة الغدا
ليلى : يمه حرام عليج ... تو الناس ... وبعدين هذي اجازتي ... شله الفزعه من الصبح ... يعني امي ساره الحين مثلا بتتغدى
أم ليلى : ما قلنا الحين .... بس على ما تقومين وتغسلين وتتريقين الا اذن الظهر ... وعلى ما تصلين الا الغدا جاهز ... يالله قومي .... اللغوة الزايدة الحين شله؟؟
تقفل ليلى الخط وتبدأ بالتذمر ... طول الإسبوع اكرف كرف الحمير ... ويستكثرون على هاليومين .. يارب شهالحالة


يرن الموبايل .... مسج صباحي
صباح الخير .....قهوة؟؟؟
ترد .... صباح النور حبيبتي .... وين؟؟
مسج ..... ستاربكس الجابرية
ترد ..... اشوف .... مو أكيد ...... بينا الو
وتنهض مسرعه لتغتسل قبل ان يصلها تليفون آخر من والدتها


ترتدي بالطوها الأحمر .. مع لفه حمراء .... وتنس شوز احمر .... تقف عند باب المطبخ


ليلى : ها يمه غدا امي ساره جاهز
الأم : هااااو يامال العافية ... شفيج مطقمه حمر بحمر ....
ليلي : اشششش .. يمه علامج انتي .... القصه تقول لازم البس احمر
الأم : ايييه ... (تمصمص شفايفها ) يعني الا احمر .. جان خلوه بنفسجي على المووووضه .. اللهم ياكافي احمر عاد ... فيج الحصبه ............اهووو بس .... خل تطلع لج روز الغدا للسيارة .... اقول يمه ... ابوج يقول لا تطلعين من الفرعي اللي يم الإشارة ... اكو حادث والشارع مسكر ... روحي من صوب الجمعية .... اطول الطريج شوية بس آمن لج
تمتعض ليلى وتغادر واهي تتحلطم



تقود سيارتها وهي ملتهية بالبحث عن أغنية تسليها ... ولا تعي لمن يتبعها بالسياره السبور من بعيد
يترك لها ..... تنظر له باستغراب ... شتبي!!
تفتح له الطريج ... يسايرها ..... تروق لها الحركة ..... تبتسم
تصل لبيت يدتها ... تنزل مشتطه بيدها سلة الأكل .... متكلوته في بالطولها الأحمر مشرقة كاشراقة بنات الكويت المعتادة :)
تسمع من يناديها
تلتفت


هو : اقول اختي
ليلى : نعم
هو : شويخ الصناعية من وين نطلع لها
@@
ليلى : شدراني ... ما ادلها
هو : دامج ما تدليها ... تعالي ادليج
ليلى : نعم ( تمثل انها معصبه)
بينها وبين نفسها ... واي يا زينه كيوووت ودمه خفيف .... قلبي .... قلبي
هو : لا...لا اتغشمر ..... هذا من بيته
ليلى : احلف بس .....بيت يدتي ...ليش في شي ... تبي شي
هو : لا سلامتج .... بس ريحة طباخكم صكت راسي قلت اسأل شنو غداكم ؟


ليلى تقهقه باللحن البولندي وتلوي الحلج على جنب


ليلى : مجبوس دياي
هو : انتي طابخة
ليلى : لا ويييه شعرفني ... روز شغالتنا اهي اللي طابخه .... تفضل تغدى معانا
هو : معاكم؟
ليلى : ايه ... انا ويدتي
هو : هههههههه (تبان انيابه ) عليكم بالعافية .... مشكوره ...... بروح اتغدى بماكي ...انا ما اكل عيوش لزوم الرشاقه ... ولزوم القز بعد
ليلى : عشتو ... على راحتك


يلوح بكفه ويرحل مشفطااااا(ن)

ليلى : جبح ويه ... ماكي .... خلف الله علينا .... مصيبة نزقه وزوغه


تدخل لتجد امها ساره متدثرة بالكبت كله من البرد ... تقبلها على رأسها

الجدة : وينج بطيتي علي .... قرصني اليوع
ليلى : ويييه يمه ..... شدعوة .... تو الناس على الغدا
الجدة : ايه اللي توهم متريقين اكيد ... انا يا أمي قعدتي من صيحة الديج .. ومن صليت الفجر ما رديت نمت .... ولويز هالمغبورة ما تعرف غير سلق البيض ..... ولا آنا شلي بطباخكم
ليلى : وه يمه من الله السعى .... اكلتيني بقشوري .... افا عليج انا ايي اطبخ لج
الجدة : ليش بنات هالأيام يعرفون يطبخون لو يدلون المطبخ .... هذول بنات اول .... توقف على الجدر لين يتسكر ... وتطبخ حق بيت حمولتها كلهم .... الحين عفية عليكم لين سويتوا ضلطه.... ولا فيزيييييه ..... وعلى بالها طابخه ذبيحيييه
ليلي وهي تقهقه : ضلطه عاد يمه .... اسمها سلطه ..... سلطه .. وهذيج اسمها بيتزا ... بعد قلبي انتي وخرابيطج
الجدة : أنا ما اعرف حق لوية اللسان مالتكم هذي ........قومي بس اهووو قومي .....نادي لويز خل تحط غداي


تفز ليلى من مكانها باحثه عن لويز ..... وهي تتحلطم .... عومه ماكولة ومذمومه هم يايبة الغدا وهم انزف ....


الجدة تهمس لنفسها.... ربي يكبر حظج يالويولو .... مدري وراج لما الحين ما عرستي ..... أخاف بس رابطينها هالبنت .... اسم الله عليها .....وه طفااااااا .... طفااااااا


وأثناء ذلك يتسلل الذئب ويعمل عمايله ..... (موسيقى حماسية درامية)


تعود ليلى مع لويز بصينية الغداء بعد هنيهه ( اتعب عل الهنيهه).... وتلاحظ التغيير على يدتها ....
تضع لويز الصينية وتعود لعملها
تقترب ليلى من امها سارة تشمشمها ونظرة ارتياب قاتله مرسومه على محيااااها


ليلى : .... يمه ..... علامها ريحتج تغيرت .... جنج حاطه عطر رجالي
الجدة اللي اهي الذيب : هذا طيب يديد توه يايبينه لي من الإمارات
ليلى : يمه .... علامها ايدج جنها مضرب تنس شكبرها!!
الجدة : من الخباز ..... ايه من الخباز
ليلي : اي خباز @@
الجدة : عن الملاقه .... خلاص قلنا من الخباز .... المخرج يبي جذيه .....يايب الحجي من عندي آنا
ليلي : زيييييييييين عاد لا تزف ...... انزين ليش عيونج حلوة وملونة هالشكل
الجدة : لابسة عدسات جونسون آند جونسون .... بعد!!
ليلى : وليش اذانيج طوال وايد
الجدة : هذولي مو اذان .. هذول تقوية حق الموبايل مع البلوتوووث
ليلى : انزيييييييييين .... شنو باقي بعد ..... ايه ليش خشمك ماله موديل
الجدة : ماعندي فلوس اسوي عملية تجميل ..... تسلفيني؟؟
ليلي : ما عندي ... ويعه .. زاهبين بس حق الطرارة
الجدة : كملي الحوار ... هين تالي يصير خير
ليلى : يا مامي خفت ... آخر شي .... ليش انت محلج ....
الجدة : عشان ... عشاااااااان .... عشااااااان ...... ألهمج فيه


ويكشف الذيب عن هويته ... حاذفا(ن) روب اليدة البرتقالي اللي متسلفته من لوير حق الحلقه


ليلى : واااااهاااااااااا ....... ( يعني مخترعة) هذا انت!!
الذيب : بعد شبدي وشبدتي .. ايه انا
ليلي وهي تكركر من الفرحه والخجل : خرعتني .... يا شينك .... انزين وين يدتي
الذيب : لا تخافين عليها .... خاشها بالكبت


يساسرها (قاعده تتغدى بالكواليس)


ليلى : انزين وشتبي مني الحين
الذيب : دورة على البحر ونرجع
ليلى : خزياااااه ..... ليش شقالوا لك ... ما وراي أهل
الذيب : اقول ..... مو جنه القصة الصجية فيها اكشن اكثر
ليلى : ايه بس ما تضبط ويانا هنيه بالكويت .... ما عندنا غابات
الذيب : يت على هذي ..... كملي كملي ..... خل الحق على المباراة
ليلى : @@ زييييين عاد .... احم ..........ويدتي نخليها بالكبت
الذيب : دقي على امج تيي لها
ليلى : ايه خوش راي ..... يالله عيل
الذيب : مشينا
ليلى : مشييييناااا
يدخل راج سايق اليدة

راج : ليلااااااا انتاااا صنو صوييي .... ومنو هازا نفرااااات
ليلى واهي مخترعة : خرعتني يعلك الضربة وانت شكو
راج : وين ماما ساراااا .... انا تبي سوي كلام سوى سوى
ليلى : شتبي خلصني قول ترى أخرتني
الذيب : خليني اعضه ونخلص
ليلى : تعضه !! ..... خوفك كل ما اكتمل القمر يعاوي علينا .... يصر مستذئب
الذيب : @@ تهقين
ليلى : ايه اهقا ..... اهقا
راج : ليلاااااا ...صنو في ..... سوي قرقر مع نفرات .....
ليلي : اووووش وعلة ..... فضحتنا .... شتبي انت الحين
راج : هههههههه .... ليلااااا .... انا في مهبة لويزااا ..... تبي سافر مومبي ..... سوي شاديييه
ليلى : انزين والمطلوب الحين
راج : تبي شوية سوي اتفاك ..... بادين ليلااااا..... تبي انا سوي شوية كلام بروهااا مع لويزا ..... انت شنو قول؟؟
ليلى : عله تعلك ... قاعد تبتزني
راج : صنو بابا .... انت ما يقول .... انا ما يقول
الذيب : اقول لج خليني اعضه ما رضيتي

تلتفت ليلى حوالينها ..... ترفع الطاولة وتدقها على راسه
يغمي على راج ..... تلتفت على الذيب .....
ليلى : أنا ما اتهددش
@@
الذيب : حبيبتي تبين شي ثاني قبل لا نمشي
وهو خايف من ليلى
ليلى : مر على طريجك باسكن روبنز ابي بررررد
الذيب : امرج .... حاضر
ليلى : مشيناااا
الذيب : مشينا

وخلصت وملصت ويات الدياية وعنننننننفصت

هناك 39 تعليقًا:

Najmah يقول...

اييييييييه
شفتي شلون
كل زمان له قصة ليلى والذيب
^_^
بس لحظة
وين الصيااااد؟

أحمد الحيدر يقول...

ربط جميل جدا اختي بين القصة وواقعنا المرير ..

واهم شي ان اهي قالتله اخير شي يالله .. يعني برضاها ;)


عموما عادة ما احب أعلق على الكتابات الادبية .. لأنني اتلذذ ومافي حروف توصف اللذة ..

بس فعلا شيء جميل اللي قعد تقدمينه بالمدونة ..

إلى الأمام دائما :)

Kuwait يقول...

لوووووووووووووووووووووول
المره اليايه نبي سنووايت ;q

الخيلاء يقول...

عجييبه القصه :)

ياحلو اليده زووغه

دمتي لنا مبدعه

الخيلاء يقول...

عجييبه القصه :)

ياحلو اليده زووغه

دمتي لنا مبدعه

Fankooshy يقول...

خوش قصة
ليلى والذيب اليديدة
حق عيال هالايام

أبو لطيف يقول...

تكويت الحكاية

مع لمسات عصرية

وكوميديا

الزيـــــن

عنوان للابداع دائما

حفظك الله ورعاك

طال عمرج

Eng_Q8 يقول...

اولا اشفيها ليلى خفيفه جذي ؟؟ مشكلة الخفه

لابسه لفه ؟؟؟ يعني متحجبه ؟؟

ويع مو لايق كلش احمر ومتحجبه اكره هالستايل

المفروض اخر شي يضيع مستقبلها ويقطها مو اتروح اتقز وياه خلي المراهقات يخافون ولو كل البنات مثل هالليلى على بنات الديره السلام

ميخالف شبيت عليج بس انبطت جبدي

وما تشوفين شر

مبيوق يقول...

هلا بالزين كلة


ليلى والذيب مودرن

بس وايد حلوة

mo3ath يقول...

هذولي مو اذان .. هذول تقوية حق الموبايل مع البلوتوووث

لووووووووول قتلتيني فيها D:

سلامات ليش قله نوم ومستشفى ؟

نون النساء يقول...

عشتووووووو يالذيب ..

سبورت
ودوره عالبحر

:P


وراها ليلى خفيفة جذي الله يهديها
مال تقرّص والله

esTeKaNa يقول...

loooooooooooooooooool
انا من تركرت بالطريج حق الذيب وانا مو يايزه لي هاليلى
خفيفه
!!
لااا ..واليدة شاكة فيها من لبست روب لوير ،يختج هالروب مو اي احد يلبسه
ههههههههههههههههه
عيل سكرو الكبت وفيه اليده
واي غشيت من الضحك
خربتي تاريخ الامم والشعوب بالقصه
بدعتي
ههههههههههههههههه
خوووووش قصه
:*

darkness يقول...

@@

يمه من بنات هالوقت

:(

ReLaaaX يقول...

وآنا عبالي بس خالتي تألف قصص على بنيتها !!!!


أثاري فيه احد يحورف بالقصص :p


تحححفه القصه وناطرين باجي القصص العالمية بتحريف من زيون

الزين يقول...

نجمة

لوووول نجوم

تصدقين ما فقدت الصياد الا لما قلتي لي

شرايج بس بالسايق

قام بدوره عدل


:*

حبيبتي

الزين يقول...

احمد الحيدر

ما تقصر يالشيخ

والله لا يحرمني من زياراتك


وان شاء الله هذي سلسلة بستمر فيها


وان شاء الله تحوز على اعجاب الأغلبية

:)

الزين يقول...

كويت

يازين هالضحكة

خلاص سنو وايت ولا يهمج

:**

الزين يقول...

الخيلاء

بعد قلبي انتي

اليدة زوغه وليلى بازع


وياحيل الله

الزين يقول...

فنكوشي

بذمتك بس موهذا اللي حاصل!!

الزين يقول...

ابو لطيف

لا عاد يابولطيف
ما وصلت للإبداع

هي خرابيط وسوالف تعب

والله يعينكم على اللي ياي

مشكور يالشيخ

ومكانك محفوظ دايما عند الزين

الزين يقول...

حسافتج

خطاك السو يالشيخ

:)

وتعيش وتاكل غيرها

اهم شي انهم ما كسروا همتك

كمل يالشيخ كمل

واحنا معاك

الزين يقول...

مهندسنا

انت ليش معصب يالشيخ

كلها قصه

وليلى لازم تلبس احمر

:)

ومو كل البنات ليلى بس هذا ما يخلينا ننكر ان اللي مثل ليلى موجودين

:)

وانت تمون اخو عزيز وغالي

والشر ما اييك

مشكور

الزين يقول...

معاذ

:)

الله يسلمك من الشر

ما تقصر يالشيخ

الزين يقول...

نون

ايه ذيب مودرن شرايج بس

:)

يازينج زيناه

صاجه يبي لها تقرص على موديل اول

:)))

الزين يقول...

استكانة

ابيه استكانه صبري

الياي شي ثاني

بفتر عليهم كلهم

بسوي من قصص الشعوب لي بروحي

:)


يختج متنا كل قاصين علينا رومانسية ونهايات سعيدة

نبي واااقع

ولا شرايج انتي

:**

الزين يقول...

داركنس

ايه ايه يمه منهم

انتي معاي على الخط

يمه منج

:*

الزين يقول...

ريلاكس

ههههههههه


انا عند ويهج

كل القصص عندي غير

والبقية تأتي ان شاء الله

:**

Shaima'a Alkandari يقول...

ياعيني على ليلى عيناااه


الحين خوش قصه وسيناريووا مفبرك عجيييب



مت من الضحك صج


عاد بروحي يوعااانه وصااايمه وقلتى اكلتى المفضله طابخيييينهاااا


مايصير





وسالفه راااج عجييب وخوش عضلات عند ليلى :) مشالله

مبيوق يقول...

أشكرج يا الزين

وبكمل إنشاء الله
وما قصرتي على هالتنوية

اصيلة با الغالية

Think-Become يقول...

hahahaاستانست وايد لم خرجتوا عن النص، فطست من الضحك، عاد كان ضايق خلقي قبل شوي و الحين صراحه ونستيييني :P

amazing funny piece/ kuwaiti edition :P

كبرياء وردة يقول...

ههههههههههههههههههههه

هذي تصلح ليهال هالايام

ابي سندريلا

ShLaLaT يقول...

لوووووووووووووووووووووووووول


يا سلاااااااااااااام سلممممممممممم


وش ذااااااااا
وش هااااازااااااا



يااااااا الاااااااااهي
نروووح من الطريج والطويل ولا القصير ؟
الطويل فيييييه وروووود حلوه
والقصيرر اجلح املح


امببببببببي مادري شقاعده اقول
بس ميته من الضحك
وااااهاااهااااهاااااااا
p;

Fskra يقول...

loooooooool zyoon el hbdaa bel a5eer mo 9j ;p

الزين يقول...

شيما

هههه

عاد لو تدرين اني كتبت القصه ونسيت سالفة الصياد

ونبهتني نجمه

جان ارجع واضيف راج


ايه ليلى تشيل حديد

:))

الزين يقول...

حسافتج


ما سوينا شي يالشيخ

هذا من واجبك علينا

وانت اخو عزيز وغالي

:)

الزين يقول...

Think-Become

وتستاهل الوناسه

خلك متابع

حياك الله

:)

الزين يقول...

كبرياء وردة


سندريلا ياي عليها الدور

:)

الزين يقول...

شيللوو


عسى الضحكه ما تفارق سنج ابد قولي آمين

:**

الزين يقول...

فسكرة

:**


بعدي انتي

شفتيها ليلى مي هينة ابد

متى الرجعه؟؟


يالله ناطرين