.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

5.10.08

وهم هذرة ...




من الصبح شاربه عشرتعش فنجان قهوة ... سحنوا جبدي ... والحارج هالكني ..... ويومي راح يكون حافل بالنشاطات .... يعني أتصور على آخر اليوم ببلش اهلوس من التعب ... شعور قاتل لما تداوم وانت مو نايم الا ثلاث ساعات


آنا عندي سؤال .. النومه ليش تتنيحس أول أيام الإسبوع وتطرها طرارة
أبي يمر علي اسبوع ما أعاني فيه من هالسالفه .... عندكم حل؟



أول يوم دوام بعد العيد بايخ حده ... يعني من السبع لما الثلاث بس تسلم وتعايد بالناس ... انزين وبعدين ماكو هده ... ثمان ساعات ضايعة بالسلامات والتليفونات اللي كلها مجاملات وابتسامات لما تحس انك على الساعة ثلاث ويهك تحنط على نفس الوضع .... متى يطق الجرس ... وربي عندي شعور المدرسة



ليش العطور تمثل جزء كبير من ذاكرتنا .. عندي عطر من زمان عنه .. ناسيته ... آخر مرة خبري فيه كنت بعمان .. اليوم الصبح شفته قبل طلعتي ورشيت شوية على ملابسي .... بلحظه افتر راسي ... وكل ذكريات السفرة رجعت لي .. غرفتي ... البحر ... حرارة الشمس ... النافورة اللي جبال الغرفة ... صوت الماي ... همس النخيل بالليل ... سوالفي مع صاحبتي ... ملمس التراب تحت أقدامنا وإحنا نتمشى على البحر ... وصحبة لن أنساها ما حيت ... أحاديث صغيرة... نظرات تبحث عن مستقر لها .... ومشاعر متناقضة تلف الأجواء



اليوم حبيت نفسي أكثر ... حسيت إني سويت شي كبير ... وسامحت شخص كان ممكن ما أسامحه ابد ... سهلت له خط العودة .. فتحت له كل الأبواب ... مديت له ايدي .... وقلت له آنا اكبر من هالموقف ... ويمكن اكبر من الحياة أحيانا.... إنت غلطت وآنا غفرت ... رغم الألم ... رغم الجرح .... رغم القهر ... الا إني قدرت اخطي على هذا كله وآخذك بالحضن ...... شعور الغفران شي لا يوصف ... يداوي كل جرح ويخليك ترتقي فوق كل الصغائر



عندي مليون فكرة أبي اكتب فيهم .... غير القصص والحوارات ... بوستات ما تنعد ماكملت .. ابلش وما اكمل ... وأحس الأفكار قاعده تحوس براسي ... واسمع كل الشخصيات اللي في بالي يحجون بنفس الوقت .. وأذوني فيها زنه مثل خلية النحل .... ومو قادرة أركز ... احتاج ارتب أفكاري ... واستعيد أنفاسي بعد رمضان ... وابلش اخلق عالمي اللي عن جد افتقدته ... وللناس اللي يحنون ومنتظرين ... طولوا بالكم علي شوية ... شكلي صاكيني عين



البارحة كان الحوار مختلفا ... اجتمع الصوت بالصورة ... وكان البوح الرقيق والضحك العفوي سمة مكالمتنا .... رسم صوتك حروفا افتقدتها منذ زمن ... شوق ووله ... وكنت اعلم بانشغالك الدائم .... وانتظر لحظة صفاء نلتقي بها لنتجاذب أحاديثنا المعهودة ...

صديقتي الرقيقة .... مكالمتنا البارحة كانت هي أجمل عيديه تليقتها منذ زمن ... ربي لا يحرمني منج



على الهامش

ابسألك قبل لا امشي تاركه
ما تساءلت في يومٍ من أكون
وليه لجل عينك آهاتي تهون
وليه نجمتي تضوي فوقك إنت بس
وليه رمشي ما يتعدي رمش عينك
هي حقيقة ضعفي ... لو هي سطوة القسوة بجبينك
ليه تعاند .... ليه ترد الكلام ... ليه تصد وأنا كلي ملك ايدينك

هناك 35 تعليقًا:

Blog 3amty يقول...

:)

Blog 3amty يقول...

أنا بعد يبيلة مره أحتل فيها المركز الأول بالردود عندج لأحتفظ بالكاس !


على الطاري النوم والتعب، انا بلشت "أهلوس" .. بعنى أن بلشت أوزع أبتسامات فقط للي يكلموني!!

نمت على الثلاث وهذي فزعتي من 6 !!

ليش الإجازة تكون خميس ويمعة مدتها يومين، ليش ما تصير خميس ويمعة مدتها 5 أيام بالإسبوع !

بعدين شدعوة الواحد يداوم 8 ساعات أشحلاتنا برمضان نداوم 4 ساعات والشغل ماشي المفروض طول السنة نداوم 4 ساعات بس تكفون لا تخلونا نصوم السنة كلها !!

بنت خالتي أنا خل أطق على دقمه (نشر تعليقك) عشان لا أخورها أكثر .. أشوفج بلوقج على خير ..

Purplecious يقول...

نايمه الساعة 3:30 الفجر

و صايمه مو شاربه قهوة

و الدوام شطــــــــــوله مو راضي يخلص

على طاري الجرس أذكر رحنا مره غرفة الوكيله و طقينا الجرس

لوووووووول

و العطور يا سلام عليها

حتى انا أمس اختي عطتني عطر كنت ناسيته بوحده من جناطي و العطر من عطور الشتا ريحته قويه وايد بس احبها
عاد اشوه ان الجو حلو براد حطيت منه و حسيت ان صار الشتا
:)

البوست روعه ودي أعلق على كل شي بس مافيني عيوني قامت تغمض بروحها

7osen يقول...

انا نايم مثلج 3 ساعات بس
وحدي دايخ الحين
مع اني مو اول يوم اداوم صارلي 3 ايام مداوم

:)

اي والله صاجه العطر دائماً يذكرك بلحظة معينه مرت عليك ، حلو وايد هالشعور خصوصا اذا كانت هاللحظة مميزة

:)

تصدقين ما حبيت كلمة سويت شي كبير وسامحت شخص
العفو من سمات الناس الطيبة اللى من داخلهم ظيف
بس كلمة سويت شي كبير يمكن تشوه هالصورة
:)

لازم ترتبين افكارج
واخلقي عالمج الخاص اللى مرة كتبتي عنه بوست
انا للحين احاول بس ولا مرة قدرت انفصل عن العالم الخارجي وعن الافكار اللى مستمرة في طرق جدران ذاكرتي
:)
الزين
بكل صراحة بوستاتج جداً جميلة انا دائماً انتظرها واكون سعيد لما القى شي يديد

يعني لا تطولين في ترتيب افكارج
وانتي عارفه هالايام الجو وايد حلو
والشعور محتاج بوست حلو منج من بوستات الزين الرومانسية
:)

تحياتي لج عزيزتي

kuwaitawy يقول...

الارق في بداية الاسبوع شي طبيعي


وماكو حل ههههههههههههههه


لا


لا



اكو حل


تكونين سهرانه وما تنامين الى آخر يوم ويك اند وبعد المغرب


احلى حل :)


الله يكون بعونج

terkwaz يقول...

الغفران تحرر النفس...

في شخص من سابع المستحيلات اسامحه
لكن سامحته بيوم وسامحته على بيسوي بالمستقبل

فعلا مالبث شهر ورد اردى من اول...

مع ذلك سامحهفي تلك اللحظه وحتى الان اسامحه

وطابت النفس وضعت على الهامش مجامله فقط...


غير كلماتج
الصوره وفقت باختيارها...
ذكرتني بنفسي ...

حبيت بوستج ...
وحبيت الصوره..
وحبيتج اكثر .

ضـاد يقول...

اول شي عساج من عواده

بعدين,, معظم الاوادم مايكونون نايمين زين بأول يوم دوام.. وبيني وبينج هذي حلاتها :)

تولهت على الدوامات وعلى الزحمه البايخه خصوصا باول اسبوع وعلى رفيجاتي وعلى مكتبي وعلى كل شي.. شوقتيني :(


بس هم البطاله شي حلو p;


هنيئا لك صفحك و غفرانك.. شي كبير و صعب و الله قدرج عليه




صح عالطاري...

الصوره عجيبه!



:)

نون النساء يقول...

مادري من وين اتييبون القلب عشان تشربون القهوة ...

بالنسبة لي هاذي تراب بني مغلي بماي

ياااااااي ... عفية عليييييج زيوون
مو زييييييييييييييييين ..



ما أحب العيد والسبب المعايد والتبوس والسلام ... يااربي امس شايفتكم شكووووو... لو انعطى عيدية جان ارتزيت اول وحده لووووول


بس مافيششششش غير البوسة
شبي فيها هاذي





زيون
عارفه احساس الغفران ومجربته
فعلاَ راحه ما بعدها راحه .. كافي انج شلتي من قلبج شي سلبي قاعد يؤثر ويتغلغل بالروح والغفران الوسيلة الوحيده عشان يتلاشى ويحل محله برد وسلام ...


وعيدج مبارك متأخره <<< ماكو فايدة
:P

غير معرف يقول...

مرحلة فوضى .. وتعدي

والحال من بعضه

ZooZ "3grbgr" يقول...

لوووول جنج تتكلمين عني
اليوم يقولولي بالدوام
جان كل يوم بتشربين جذي قهوه
يبيلج ميزانية نثرية بس لج
ومو نايمة الا الساعة 4
وقايمة 6 ونص
وينية ليلحين مو نايمة
الله يستر لا انام على الكيبورد
بوستج وايد حلو
وصورج احلى
يلا كملي بوستاتج الحلوة
:)

محـــــارة يقول...

زيووون أنا مثل حلاتج مانمت غير ساعه وحده والعصر مانمت إلا حدود ساعه وبعدها طلعت اتفطر برا متواعده مع الأهل نتفطر على البحر

شوي وابجي لما قعدوني بالرغم أني صاحبة الفكره قبلها بيوم

بس الجو كان روعه رغم لخبطة المخ الي اعيش فيها وصعوبة حتى التفكير


وبسالفة العطور توقعت هالشغله فيني بس عطر ما أذكره إلا من سفره وعطر أتذكر فيه حج وعطر أتذكر عمر الطفوله وغيره وغيره .. فيه عطور مع الوقت صرت احرص احط منهم بكثره إذا كنت اعشقهم بمناسبات مهمه بمسيرة حياتي

حبيبتي استودعتج الرحمن ومشتاقتلج موووت

secret يقول...

بالنسبة للدوام .. الحال من بعضووو :)

و على سالفة النومة نصحوني أتبرع بالدم .. يقولون الخلايا تتنشط زيادة و النومة تصير خفيفة و مريحة و ما يتعسر الواحد بالقومة و كل شوي سنووووز :))

و بعدين ترى الصور اللي تحطينها وايد حلوة .. جنج بتنافسيني :)
أتغشمر ترى انا من تلاميذج :)

qesat_5ayal يقول...

عيل ماهو مسمى الشعور لما يكون الواحد مو نايم إلا ساعة ونص ومداوم
والدكتور ينكت من الصبح

:(


وعلى قولتج شعور مو حلو يكون الواحد تعبان ومجبر يجامل لأن كان عطلةومناسبة
ولا بيكون من ضمن الناس اللي شايفه نفسها وما عطي ويه
:\




أنا اليوم بنام مبجر
إن شاء الله أنام مبجر


عجبني اللي على الهامش
تصبحين على خير
:)

الخيلاء يقول...

ياكره النوووومه النحييسه

امس نمت عقب صلاه الفير

ليش يعني و انا اول يوم العيد نايمه الساعه 9

ترى ننطرج اشتقنا و اشتاقت حواسنا و مشاعرنا لشي يهزها و يرويها

ومن مثل الزين يروي :)

THE BOSS يقول...

شاربه كوفي شوب كامل و تبين يجيج النوم شلون؟؟؟؟؟؟؟؟؟؟؟؟؟؟؟؟؟؟؟؟؟؟؟؟
وعطني ولعه

تراب الكويت يقول...

أن تعفو .. ممكن
أن تنسى .. تلك هي القوة
وعهدي فيج قوية
وماحب اشوفج ضعيفه

الدنيا ما تسوى زيون صح
دع الخلق للخالق
ناخذ الحذر فقط

المزاج لازم حبه فوق وحبه تحت
:**

الزين يقول...

بلوق عمتي

ايه صحيح انت متابع لا يستهان به

@@

انت نايم البارحه؟؟؟

لأن شكلك قاعد تهلوس

الزين يقول...

بربيليوس

يارج الله بعدي انتي
الحال من بعضه

البارحه قلت يعني بنام زين
طل

لين الثلاث وانا اتقلب
صار لي ليلتين ما انام مثل الناس
ولا حتى اغفي بعد الدوام

حبيبتي انتي
الله يعطيج العافية
ويتقبل منج يارب

:**

mellow يقول...

هذا إنتي قلتيها...نطر النوم طرارة
آنا أصلاً ما أنام (لا أنام مثل فاتن حمامة)
تييني أيام أواصل وأرد البيت و ما أقدر أنام الظهر ،و لا صار بالليل ما أنام إلا ساعتين و أروح الدوام جنه باخيني بفليت يا حافظ.

ما تشوفين شر حبيبتي إن شاء الله تترتب أفكارج بس إنتي ريْحيْ ولا تضغطين على نفسج... الكلمات خيرتها راح تطلع ( ما إنوجدت بمخج إلا علشان تطلع)

و بانتظار جديدج

الزين يقول...

حسين

لي يومين اداوم وانا مو نايمة زين
وناطره الويك اند على احر من الجمر

العطور وما ادراك مع العطور
:)

شوف سالفة كلمة سويت حتى انا ما حبيتها لما انتبهت لها
بس لو كنت انقرصت من هالآدمي مثل ما انا انقرصت منه وقلت لك بروح الته كف وادوس في بطنه وتالي تغاضيت وهونت
وهذا انجاز بالنسبه لي بما اني شرارة وعصبية
شنو كنت بتقول لي ؟
زين سويتي

من هنيه يت كلمة سويت
صدقني يا حسين
مو كلنا عندنا القدرة ان احنا نسامح ونغفر ونتغاضي
وحتى اللي ممكن يسويها
ساعات ممكن يوصل مرحلة ان ما يقدر خلاص
وما يطوف

افكاري محتاجه مخدة ونومه سنعة
وطلعة بحر مسائية
وتبلش تورد

:)

جريب
واااااايد جريب


تحياتي

الزين يقول...

كويتاوي

اييييييييه شكله ماكو حل

اني اعااااااني من الأرق

الله
يعني اواصل يومين

يمكن انهار
ابلش ارطن بلغات العالم كلها

لا يا معود انت ناوي علي
بروحي ماني قاصرة ينون

الزين يقول...

تركواز

الحوبه تبطي ما تخطي
صدقيني

حبيت تعليقج ومتابعتج
ودخلتي مزاجي

:)

بـابـل يقول...

وليه لجل عينك آهاتي تهون
وليه نجمتي تضوي فوقك إنت بس

ياسلااااام

شهالأحاسيس النادرة يالزين



وبس

بابل

الزين يقول...

ضاد

ياااااااا هلا وغلا

والله يعودج على امثاله بعد قلبي

تدرين عاد انا اسوأ شي عندي قعدة الصبح وطريج الدوام

ايييييو

والصورة حدها حلوة

توني الاحظ تصدقين

:)

الزين يقول...

نوووووون

:**

ولهت عليج وعيدج مبارك
وترى البوستين اللي فوق عناد فيج عشان لا تقولين مابي بوس ابي عيدية

:))))

تصدقين انهلكت امس من الحارج
بس بطلت وحرمت وتبت

بخفف قهوة راح تقضي علي

:$

الزين يقول...

محسد

حد الفوضى

كلنا نعااااني يالشيخ

يعين الله

الزين يقول...

زوووووووز

نفتح لنا كوفي شوب انا وياج
شورانا

والبارحه نمت على الساعة ثنتين

شلون نعدل نومتنا
ترى وايد تعب

:(

الزين يقول...

محــــــــارة

يا شين فقرة النوم يا محارة

على سالفة العطور عندي لج سالفه لما اشوفج بقص لج
بتعجبج

ومشتاقتلج اكثر يالغلا

:**

الزين يقول...

سيكرت

اخ يالنوم ادوره بالتفق

تهقا اتبرع بالدم لو اسوي حجامه

قالوا لي حتى الحجامة تنفع
انا بصراحه ما احب تقزز الأبر
والحجامه العب تشرط موس

:$

وسالفة انك من تلاميذي كبيرة علي
انت صورك شي ثاني
والحق ينقال ذوقك حلو

:)

الزين يقول...

قصة

هذا يسمونه شعور الا شعور
يعني عقبها تفقدين

على الهامش حق اللي حسب نفسه على الهامش

يخرب بيت الهامش واهله
ملعوزينا الهوامش يا قصه

:)

الزين يقول...

الخيلاء

البوست الياي لج عشان حجوتج هذي بس

:**

الزين يقول...

the boss

انت عطني ولعة جود الله ورحمته انام

:q

الزين يقول...

تراب

المزاج في تذبذب مستمر

يتراقص

:)))

الزين يقول...

ميللو

:)))

ضحكتيني على سالفة فاتن حمامه
وانتي صاجه

والأفكار يايه طياره

:)

الزين يقول...

بابل

حيا الله المنسي
خطوة عزيزة وساعة المباركه

:)