.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

2.10.08

هذرة ... وشوق



مسافرة ... وكل اللي حولي مبتهجين لوجودي معهم ....الا انا!!!

ابي ارجع الديرة .... يعني انا حدي بعيدة عن بيتي وداري ومكاني واغراضي واشيائي يومين عقبها يبلش المزاج يعتفس ... والتزم الصمت

شهالقصة ... احن على السفر .... ولين سافرت ابي ارجع البيت ...

اشتياقي لوسادتي شي مو طبيعي لدرجة اني ممكن ما انام كلش ليش ان المخدة مالتي متغيرة ... قلت آخذها من قاصرها واييب مخدتني معاي .... بس لما اشتاق حتى للصوفا اللي بغرفتي وقعدتي عليها وصوت الشارع ... وشباكي اللي يطل على الشارع العام ... ومراقبة السيايير من بعيد ... اشتاق حتى للصباحات الرتيبة ...

اشتاق لغرفة المعيشة وهدوء الصباح الباكر بالويك اند ورائحة القهوة وصوت خرخشة الجرايد والشمس المنعكسه على قطع السدو المتناثرة بالوانها الفوشيا والعنابي والسكري وسرحاني بالوانها ومتابعتي لخطوطها مع افكاري المتناثرة حولها .... اشتاق لشجرتي الصغيرة وسوالفنا الحميمة والخاصة احيانا ... لخطواتي على عتبات السلم ورائحة بخور الصباح ليوم الجمعة واحساسي بان هذا اليوم مبارك ويختلف عن باقي الأيام ... اشتاق للاب توب ماااالي وربعي وسوالفنا العبيطه تالي الليل .. اشتاق لهمسات الحب المبعثرة بيننا ... لسخافتنا احيانا ولعمقنا احيانا اخرى .... اشتاق لكتبي المهملة على النايت ستاند بالقرب من فراشي ... لضوء الأباجورة ..... لموسيقاي المفضلة وهمهمتي معها ... وتراقصي احيانا على الحانها .... لهمس أغطية سريري وانا اتقلب بحثا عن اغفاءة مساء ... عن حلم لم اكمله هناك ... عن كلمة ماذا لو وأنا انظر للسقف مراقبة خيالات يدي بين ظل ونور ... للون غرفتي ودرجات الأزرق هناك .. اشتاق لصوري وصورها .. لأحاديثي الصغيرة معها ... للمزح .... للبوح ..... وللهمهمات الغير مفهومة احيانا قبل النوم

اشتاق لرائحة البحر وصوت مكاين الطراد وريحة الزيت المخلوطه بالبانزين بالمرسى ... اشتاق لزفرة الييم ... لملمس البرابيج .. لشكة الميدار ... لتراص الأمواج على قرف الطراد ... لكلمة فيه نابر .... لإبتسامة انتصار وانا اسحب الخيط ... لإستلقائي بعد تعب وعناء على الصدر ومراقبة النجوم .. والإبحار بعيدا بحلم لم يكتب له ان يتحقق ... لصوت الحداقه من بعيد اثناء الصلاة عند العشاء .... لصوت اليامال .... لسدرة العشاق بصوت شادي الخليج

ليوم غد .... والإستيقاظ رغم التعب

حتى الدوام اشتقت له

تهقون انا صاحية!!

العيد بالسعودية لا يختلف عن العيد بالكويت ... بين زيارات عائلية ومواجيب وشكليات مالها اول من تالي ... وزحمة يا دنيا زحمة .... كل مكان زحمة .... شوارعهم ... مطاعمهم .... وحتى بيوتهم ... وانا وحدة لا اطيق الإزدحام ... ففضلت الجلوس بالمنزل ... سوالف وبلع ... وقهوة وشاي .. وشاي وقهوة .. وحبق .... وكم اعشق الحبق براحته .. بنكهته المشوبة بمرارة الشاي من غير سكر .... لم اكن من محبين شرب الشاي ... اليوم بت اطلبه ... واطلق على بعضهم اسم سيدة الحبق

في رمضان تابعت مسلسل عيون الحب .... المسلسل لا بأس فيه .. هدي حسين باداءها المتزن .. الهام الفضالة ودراريع انسام الخلف ... وهند البلوشي والمبالغة بالأداء وصوتها اللي كان ينرفزني

اما محمود بو شهري فكان مبدع وضابط الدور وكان يضحكني بطريقته المميزة وشلون ضبط دور الولد الصايع وكلمته الشهيرة " ترى انتي وايد شايفة نفسج" علقت معاي .. وصرت اقولها للكل

ما عليه هذي من تبعات متابعة المسلسلات الرمضانية

اما الداية ... فلقد اصرت حياة الفهد على انها تخش الحقيقة المرة لموزة الصغيرة لين آخر حلقة عشان تضبط حبكة القصة ... مع اني ما انكر انها بدعت بآخر مشهد ... القصة كانت محزنة ومملوءة بالدموع ... العيدروسي بضعفه .. جمال الردهان بنواحه على ولده ... منى شداد كانت تخرع مع شعرها بالحلقات الأخيرة ... مو فاهمة شنو المغزى من كشتها الطايرة على طول ...باسمة حمادة كانت عجيبة اهي وامها ... اداءهم كان حقيقي لدرجة انك ممكن تصدق انهم اصلا موجودين بمكان ما ... وممكن تشوفهم بأي بيت ... عيسى بملامحه الكويتية وابتسامته المشرقة وسماره اللي ياخذ القلب ... على فكرة انا احب السمار


غريبة هي الحياة ... تجمعنا بالكثيرين ... منهم من يترك بصمته هنا او هناك ومنهم من يدخل ويخرج دون ان تعلم بانه رافقك بالرحلة ... قعدت اقلب اوراقي ... اتذكر فلان وفلان وفلانه ... وينهم الحين ... شنو تركوا ... وليش مشوا ... او ليش انا لغيتهم من حساباتي .... شنو اللي حصل حتى باتت حتى التهنئة بالعيد مالها لزمه ولا مهمة حتى لو جاءت منهم ...

صديق احترم رأيه جدا همس بأذني ان العفو ما هو الا احسان تكافئين عليه من رب العباد ...

صديقي ... احتاج الكثير من الوقت لتدريب النفس وتطويعها على ما يحب الله ... هو جهاد اتمنى ان افوز به بالنهاية ... شكرا لك لأنك كنت هناك ... شكرا لرقيك .... ولإهتمامك

حاولت ان اتصور حياتي من غير تدوين ... من غير مدونة .... وسألت نفسي شنو اضافت لي من قصص الزين ... ولا زلت احسبها .... اذا خلصت الحسبة بعلمكم

صديقات المساء والسهرة .... احبكم ... ويبي لنا روما من قلب

على الهامش

لوما انت ... ما كنت انا

اشتقت لهواك اكثر من شوق سما ليلي للسنا

اشتقت لذاك الحضن ... لهمس صوتك على قليبي يحن

حتى اسمي اشتقت اسمعه

من شفاهك إنت يا عمري آنا


هناك 60 تعليقًا:

7osen يقول...

خوووش بوست

عجيييب
وعفوي ومليء بالخواطر المتتالية.

وانا بعد وايد احب الحبق عجييب مع الشاي :)

Blog 3amty يقول...

أول !

Blog 3amty يقول...

:(

حسبالي أنا الأول .. توقعت أن أكون الوحيد اللي قاعد أتحرى بوستج اليديد ..




عموماً


الواضح من سطور البوست بأن لديك ولاء لكل ما هو حلوك أياً كان هذا الشيء حتى وان كان شي (كريه) مثل ريحة زفرت الييم وغيرها، ولكنج وفية لكل منهم وتبادلينهم (الفرية)وتشعرين بتأنينب الضمير أن لم تصليهم وتناجيهم :)

بوست "صافي" المشاعر ..

وناطرين بوست العودة تره طولتي

:)

`~MnO YeNSa! ~` يقول...

وااي
خلص رمضان

و احساس العيد
احساس مكرر
يمي الى الرتابة

احببت هذا البوست وبكل تفاصيله

عفوي , حلو وايد حلو
جربت العيد هناك
غيــــــــــــر
سهر
اكل
اكل
جاي
ومكسرات
وسوالف تالي الليل
بس
here
taste so Different

بنرد الدوامات
احب الدوام
بس الله يعينا على الزحمة
ما احب الزحمة
at all :(

terkwaz يقول...

بوست غرقت بتفاصليه....

Najmah يقول...

اييييه هذي قصتي

اهلي عارفين لي

احن احن ابي اسافر

ولا سافرت احن ابي ارجع

الاماكن لها قدسية خاصة عندي

ومن صغري وانا مارضى على اصغر اشيائي

وما ارضى احد يدخل داري او يمسك شي فيها بدون لا اسمح له
:)

السفر يعلمنا الشوق
ويعلمنا شلون يكون طعم الحياة بدون الفواصل والنقط

يالله صديقتي ردي

ترى السهرة مو حلوة بدونج
:*

THE BOSS يقول...

انه الشوق و الاشتياق:
****************************
يا الله لا تقطع رجا كل مشتاق
بامرك يا رب الحلم يصبح حقيقه
وأنا أدري أن الوصل تاليه لفراق
ولولا الأمل .. ما تحمل النفس ضيقه
أمس سرى في تالي الليل براق
قلبي يفز لنوضته بتخفيقه
وسمٍ بكور صادق الوبل دفاق
لو شافه الظميان يبتل ريقه
عله على دار الوفا ..دار الأشواق
دار صفت لأهل القلوب الرقيقه
فارقتهم ما ليلةٍ خاطري ضاق
واليوم للسلوان ما أجد طريقه
يا كود حرفٍ لي كتبته بالأوراق
مثل السراب اللي يسلي بريقه
والله لو كل المخاليق عشاق
ما شفت لك نفسٍ تعذب دقيقه
بدر بن عبد المحسن
وعطني ولعه

أتيت متاخرة يقول...

صاجه
حلات العيد بالديرة ... حتى لو الديرة ما فيها شي يونس

تسلمين على هالبوست بتفاصيله الصغيرة الي تاخذ القلب

darkness يقول...

مساج الله بالخير

تدرين يا الزين ان النسم يوله عليج
ان ضي النهار يسالنا عنج
ان الشارع يدور عينج
ان النجوم تناديج
و الليل يحتريج

و اليم متشفق عليج
و الموج يصرخ باسمج
و البانزين يطير بالجو لجل يلحق اثرج
و المرفا ضيع
محد قد يرسى؟

زيون كل شي اشتاق لج

---------

منو صديقات المساء و السهره شنو مصادقه خفافيش انتي؟؟

و يه يه يه

اخر البوست شي شي عجييييييييييييييب

بنت سيف يقول...

أولا :: الحمدلله على السلامة .. هذا البوست .. هو بشارة عودة الزين .. بكل تميزها ..

ثانيا :: انا من الناس اللي شردوا عن العيد .. مع إني أحب العيد في الدوحة .. إلا إن هالعيد صعب علي .. هو ثالث عيد لي بدون الحبيب ..

وما عندي حل .. فشردت .. جيت لمكان بارد .. مافيه أي روح ..

أما الشوق .. فخليه على صوب .. هذا وجع بنفسه

ما أبغي اكتب أكثر .. وجعي كبير ماله حدود ..

بس حبيت اقوللج .. قولي الحمدلله .. أنج تقدرين تعيدين ..

وشوفي أحوال غيرج .. من اللي اخترب عليهم العيد لنهاية العمر

اعتذر .. عن كلامي .. يجوز يكون قاتم .. بس حالي .. مب احسن من حال الكثير ..

وارجع واقول الحمدلله رب العالمين ..

وكل عام وأنتي بخير



تحياتي


بنت سيف

ابو لطيف يقول...

اشواقي تنادي اشواقي
وتردد فيني اصدائي

وحنيني فيها وانيني
قد هاجت منها انوائي

اشواقي تبحر في سفني
وتكاد تمزق احشائي

اشواقي لضمك يا داري
ولسهري فيك وغطائي

اشتاق اليك اشيائي
لتضمي بينك اشلائي

اشواقي ابذلها مددا
بفيض عطاءٍ وسخائي

لا اقوى يوما مفارقتك
من فرط حبي ووفائي

اعياني البعد عنك زمناً
وتقربي منك ... دوائي

ما فاد الضمآن لبنا
بل لا ينشد الا الماءِ

فاعيدوا اشيائي فوارا
او ردوا الزين لاشيائي

الخيلاء يقول...

لو ما انت ما كنت انا

عجييب .. قريت هالجمله نسيت شنو كنت بعلق ..

دايما في جمله في بوستاتج اتوديني عالم ثاني

:)

على نفسها جنت براقش يقول...

يا حلو هالهذرة

عيدك مبارك

:)

ZooZ "3grbgr" يقول...

إييييييييييه
تاخذين الانسان عالم ثاني
عالم حبيت فيه شي ما احبه
آنا عكسج أحب السفر
دام اني بيدي تذكرة الردة
أستلذ باللحظه اللي أحس فيها بحرية

حريتي بأني أوقف بمكان محد يعرفني فيه
وأكتب شي محد يقراه
وأكلم ناس ماراح أشوفهم
وأغرس شتلة صغيرة
يمكن يوم أرجعلها
ولابتوبي بحضني
أحبه ويحبني
ويردني للكويت وأهل الكويت

على فكرة
الله يهنيج بنبضات قلبج ويهني اللي يحس فيها
وحبيت احساس صديقات المسا والسهرة
صديقي الوحيد اللي مايفارقني
لابتوبي :\

لا تقطعين .. حبيتج :)

تراب الكويت يقول...

تفاصيل ..

تجمعنا بنهار وشمس
تنثرنا بقمره وليل

تفاصيل..

فيها يذوب الهمس
يغني الشوق مواويل

تفاصيل..

تحكي حكاية امس
واحساس الوله يهد الحيل

---

chــاي أخضر يقول...

أحس أني قاعده أسمع كلماتج

كثري من "الهذرة" -على قولة براقش -
مستمعه فيها



إلا شنو حبق ؟!

فريج سعود يقول...

كل وانتي بخير




شنو الحبق ؟

على فكرة ترى انتي وايد شايفة نفسج

3bady يقول...

ليش مخليه تفكيرج طوول الوقت بالهم ليش ما اتقولين انا بوخر عن ضيقة الخلق و اضحك و اونس نفسي و احلل سفرتي بدال حسرتي :))

هشيم المشاعر يقول...

احلى ما في الموضوع اسلوبك المسلي
بانتظار جديدك

غير معرف يقول...

العزيزة ( الزين )

لن اجاملك حتما وسأقول كل ما يدور في رأسي .

على الرغم من متابعتي الدائمة لما تكتبين إلا اني كنت افضل أن لا أعلق على ما تكتبين , ربما لسببين لا ثالث لهما ألاول هو يقيني بأن تعليقي سيفسد نشوتي بقراءة ما تبدعين والسبب الثاني أني لم أكن أعرف كيف تتم كتابة التعليقات .

أما عن مدونتك فهي ملاذي حين اريد الاسترخاء بأبداعاتك وخصوصا مع تلك الانغام الجميلة التي تصاحبني في قراءة المدونة .

وأما التعليقات فلكم يسعدني أن تكون مدونتك هي اول مكان يحتضن اول تعليق لي في عالم التدوين رغم قراءتي للعديد من المدونات .



مودتي واعتزازي ؛

واعذريني على الاطالة

( ناصر )

Selezya يقول...

تـردين بالسلامه انشالله
وتقعدين تحوسين بالبيت لمن تملين

:)

الزين يقول...

حسين

:)

يا حيا الله حسين
الله يسلمك ومن ذوقك

عجيب الحبق مع الشاي صح

:)

الزين يقول...

بلوق عمتي

منت الأول
انت الثاني

اهم شي انك هنيه ليش مهم تكون الأول؟

خنت حيلي اخيي اللي قاعد يتحرى
لا خلا ولا عدم

شفت شلون انا طبعي مو شي
اذا تعودت على شخص او شغلة صعب اني اتركها وامشي

:)

بوست العودة بالطريج
لا تباعد

الزين يقول...

منو ينسى

ايه والله خلص عسى الله يعودنا على امثاله

تصدقين جنج ويانا

سهر واكل وخرابيط مالها اول من تالي

بس هم عيد الكويت احلى
مع اني صار لي سنتين اقب بره الكويت قبل العيد

والدواااام ياينا يركض
بذمتج لج خلق

:*

الزين يقول...

تركواز

:)

حياج الله حبيبتي
وجودج يسعدني

الزين يقول...

نجمة

شوفي يا نجمة
لو مو قايله هالحجي جان شكيت انج صاحبتي

:**

كاني رجعت وين بروح يعني
:)

الزين يقول...

the boss

ونعطيك ولعة ليش لأ

:)

خوص قصيدة

الزين يقول...

اتيت متأخرة

يا هلا ومرحبا
حيا الله المتأخرة

ان شاء الله دوم مستانسة بعد قلبي
يسلم عمرج يارب

:*

الزين يقول...

دراكنس

سيدة الإزدواجية

:)

حي مساج بعد قلبي
يه يه يه
كل هذا انا
والله طلعت خطيرة وانا مادري

صديقات المساء والسهرة
انتي تعرفينهم زين


:)

الزين يقول...

بنت سيف

الله يسلمج يالغالية
:*

ترى الحال من بعضه
وهروبنا لنفس السبب
افتقادي لها بالعيد اكبر واقسى من اني اتحمله

ومن وقت ما رحلت وانا اعيد بره الكويت

كل من شايل همه وجرحه يابنت سيف

وماابيج تقولين ان العيد اخترب عليج لنهاية العمر
هذي حجة الضعيف

احنا في مرحلة التقاط الأنفاس

ولو انها طولت
بس بالنهاية بنرجع ونوقف على ريولنا ونكمل

واللي راحوا ارحم لهم
المرض مافيها كرامه حبيبتي
والموت راحه رهم


كل عام وانتي احسن واقوى واطيب

:**

الزين يقول...

بو لطيف

:)
استرسالك بالتعليق
يلجم قلمي

الزين يقول...

الخيلاء

:)

تدرين اني ولهت عليج
:**

ودايما وجودج له طعم ثاني

الزين يقول...

براقش

حلت ايامج قولي آمين

ايامج سعيدة بعد قلبي

:*

مُحَسّدْ يقول...

خواطر حائرة

وهمهمات مشوبة بالشوق

الزين يقول...

زوز

اذا تبين الصج انا احب السفر
بس ما احب اطول
بسرعه احن حق مكاني
عشان جذيه سفراتي كلها قصيره
اول يومين اشتط واستانس

وتالي اعتفس بس ابي ارجع


نبض قلبي مو شرط يكون لواحد معين
او وحده معينة يالشيخه

ساعات يكون حالة اعيشها ومن خلالها اكتب

وصديقات المساء والسهرة هذولي حبيباتي

الله لا يحرمني منهم

ولا يحرمني من طلاتج يازوز

واذا انتي توج تحبيني
انا حابتج من زمااااان

:)

لا تباعدين

الزين يقول...

تراب

:)

صح لسانج بعد قلبي

:**

الزين يقول...

شاي اخضر

:)

بعد قلبي

شوفي يا ستي الحبق هو النعناع الجبلي

ريحته قوية وطعمه شوي يخلتف عن النعناع العادي

واييبونه من المدينة المنورة

مع الشاي يعطي نكهه حلوة

الزين يقول...

فريج

وانت بصحه وسلامه

الحبق نعناع بري او جبلي مثل مايسمونه اللبنانيين

:)

وحلوة منك ترى انتي وايد شايفه نفسج

الزين يقول...

عبادلي

@@

من قال تفكيري بالهم

انا اكثر وحده تحب الوناسه والضحك

:)

الزين يقول...

هشيم المشاعر

:)

حي الله اهل السعودية

وخلج متابعه ولا تباعدين

:*

الزين يقول...

غير معرف

عزيزي ناصر
سعادتي بتعليقك تضاهي سعادتك

شكرا لكلماتك الطيبه ومشاعرك الرقيقه
شكرا لك لمشاركتي اجواء مدونتي

اتمنى انك تستمر بالمتابعه
ودامك دليت الطريج
تعليق بسيط منك اكيد راح يسعدني

لا تباعد

:)

الزين يقول...

سيليزيا

يا هلا ومرحبا

انتي وين اختفيتي
لج مدة ما بينتي ومكانج كان مبين

:*

kuwaitawy يقول...

ارسلت تعليق ولا اعرف اذا تم ارساله او لأ لأن الصفحه لم تكتمل بعد ارسال التعليق


اتمنى ان الارسال تم لأني لا استطيع كتابته مره اخرى :)


تحياتي

Sn3a يقول...

ياحلو بوستاتج يالزين

تصدقين انا ماني فاهمه قصه كشه منى شداد
تلوق مع مشاهدها الشريه باخر الحلقات


لا الدايه كان روعه
روعه شوي!
شفتي لما يهدون ايد بعض ويمسك حديد الدريشه
انا صرخت قلت ليشششش
وبجيت

مع العلم ان ملو واهم يقولولي اخواني بيطلع اخوها
تدرين اني ثاني يوم حطيت هالوطن بس اتمنى اشوف حلقه ثانيه غير وان يتزوجون
اخيييه
وقمت افكر بعقب هالمشهد شلون الناس طلعو من بيت موزة واهيا معرسه
واخر شي يقولونلهم مو معرسه

زين شبيسوون بغاليه
وهالعيسى المسكين شلون بيجابلها

انا مادري ليش افكر بالمسلسلات الحلوة لين بعد الحلقه الاخيره لول


جني قرقت
يلا باي

محـــــارة يقول...

منقهره قبل يومين راده على بوستج وانصدمت أن مو موجود :(

عموما حبيت أبارك لج بالعيد وكل عام وانتي بخير وتقبل الله طاعتج يالغاليه

أشوفج بأقرب وقت بعون الله

فراوله يقول...

مساالورد والجوري
غاليتي الحبيبه
تقبل الله طاعتج
وعيدج مبارك
ومن العايدين يارب
:*

ShLaLaT يقول...

الله عليج زيونه

الزحمه تخليني اتغير 180 درجه
هل عشقت الوحده ؟؟
او حياتنا صارت بازدحام مستمر ؟؟

زحمه سوق
مطعم
شارع
حتى بيتنا اذا صار زحمه
ودي اورلي اي زاويه اقعد فيها بروحي
واسكر اذوني
!!
الله يعينج



المسلسلات
تابعت آخر حلقات الدايه
ابداااااااااااااع بما تحمله الكلمه من معنى
صح احب سوالف اول
وبيوتهم ولبسهم وسذاجتهم
بس الابداع يلعب دور كبير

حبيت الدايه بس ما حبيت التنديل
حبيت الفريه
حبيت مال سعد الفرج مال الطاعون نسيت اسمه


اللي حرني بالمسلسل بدريه مرت شعيب
هذي الزوغه شلون تحولت جذي ؟؟ @@
مسكينه جكر
وبنت منى شداد تنرررررررفز لو مختارين غيرها احسن
ما احب الحواجب المتصله والمحفوفه !!

الاسمراني يشوق تحسين صج صغير وكويتي !!
حبيت شخصيه شعيب
مت من الضحك على ابو بدريه

عزيز ملييييييق ملييييييق مسكين ما ينبلع
حتى الهنيدي ما عجبني دوره !!


ممممممم
الحمدالله على السلامه
:*

غير معرف يقول...

تردين بالسلامه ترى الديرة و اهل الديرة ولهانين

بوخالد

qesat_5ayal يقول...

الشوق حراق
ولا كنا مسافرين كل شي يطري عليا نشتاقله



الحمدلله عالسلامة
:*

Barrak يقول...

اشتقت لهواك اكثر من شوق سما ليلي للسنا




دائما رائعه

ودائما كلماتك قريبه منا

الزين يقول...

محسد

اهو شوق من قلب يامحسد

من قلب

الزين يقول...

كويتاوي

:$

ماوصلني الا هالتعليق

الزين يقول...

سنعة

:))

هذا واهم قايلين لج انه اخوها وانصدمتي
تبين الصج انا احتريت
كنت عايشه قصتهم وقاعدة واتحلى على هالعيسى يختج شكله صج كويتي وياخذ القلب
:)

انتي تفكرين بالمسلسل حتى بعد ما يخلص لأن تبين نهاية ترضيج

تبين تعيشين اسطورة السندريلا

يازينج ياسنعة

:*

الزين يقول...

محـــــــــــــــارة

ما ياني شي
ولاشفت تعليق غير هذا

شقصة التعليقات اللي تختفي

@@

الزين يقول...

فراولة

وانتي بخير وصحة وسلامة بعد قلب

:**

الزين يقول...

شلالات

تصدقين عاد انا بالزحمة افقد تركيزي
اتدوده

عموما المسلسلات اللي تاخذ طابع الكويت قبل احلى من المودرن

مسلسلات الحين كلها دراريع انسام الخلف طايرة ومكاييج مدري شلون صايرة

:))
تصدقين نفس سؤالي بدرية شلون قلبت جيكرة يا حسرة قلبي
كانت شحلوها

وصاجه هذي من وين يايبينها ويها صج نحيسه استغفر الله

ابيه شفتي ابو بدرية يو لت عيسى كف
وكفخ شعيب معاه

مت من الضحك
بس حرني

والبريجي احبه على خماله
يختج هالولد يدش القلب

الله يسلمج بعد قلبي

:**

الزين يقول...

غير معرف

بو خالد

اهل الديرة والديرة
تشتاق لهم العافية

:)

الزين يقول...

قصة

:*

ايه والله ايه والله

الزين يقول...

براك

:)

نتعلم منك يابراك

لؤلؤة يقول...

الله يا الزين..
كلامج مامله...صار له مكان بالعين بدال الاذن..
لو خذتني الدنيا ها اليومين ماصدق يوم افضى علشان أمرج واقرا سواليفج..

همهمات في قلوبنا..لكن الزين بس اللي تظهرها :)