.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

12.9.08

سوالف يهال





رمضان السنه يختلف عن كل سنه ... لأول مرة منذ ست سنوات يكون له وقع مختلف ... إحساس أكبر بالروحانية ... ليس هناك ما يلهيني ... مبتعدة عن كل الرسميات والواجبات الإجتماعية ... ولست من محبي متابعة التلفزيون وسوالف المسلسلات الرمضانية ...قرار اتخذته مع هلال الشهر ... لن يلهيني عن رب العالمين شيء ... سوف أكون قريبة منك ما استطعت يا رب


عصرية أحد الأيام ... بعد ان تلوت ما تيسر لي من ذكر الله .... اشتقت لرائحة البحر ... للهواء المالح وهو يقبل أنفاسي .... افتح الشباك رغم حرارة الجو .... مع كسرة الشمس .... يخلو الشارع الا القطط وصوت سعف النخيل .... اغمض عيني واتنفس بعمق
ويصل إلى اسماعي صوت طفلين يسولفون


الأول : الحين انت ما تدري ... انا صار لي مدة اتدرب ... وكل يوم اشوت بالكرة ... عشان شوتي تصير قوية ... تصدق عاد هذاك اليوم رايحين ماكدونالد نتعشي وقاعد العب كرة ...جان اشووووتها حيييييييييل ولا اصيد القمر
الثاني : الله ... من صجك
الأول : ههههه ... حتى اهو انطفى ....كلش .... ما قام يشب عقب
الثاني : ايه عادي ... انا بعد شتها جان تروح الفضاء ومارجعت يعني انا شوتي اقوى من شوتك لأن الفضاء ابعد من القمر
الأول : قريت قرآن
الثاني : لأ ... ما اعرف
الأول : ايه حتى آنا .. بس أمي قالت لي برمضان الناس يقرون قرآن وايد .. عشان الله يحبهم أكثر
الثاني : أصلا الله يحب كل الناس .... إنت الحين تدري الله ما ينام
الأول : شلون يعني ما ينام ... ما يحس إنه عيزان مثلنا
الثاني : لااااا ... أمي تقول الله ما يتعب .... يعني الله قوي وااااايد
الأول : قوي يعني يغلب المجرمين ... مثل باتمان!!
الثاني : اقوى بعد .... وبعدين اذا صرنا زينين يعطينا فلوس
الأول : شلون ؟؟؟
الثاني : يحطهم بالبنك .... ويقول حق المسئول بالبنك عطهم فلوس
الأول : عيل ليش ما يعطي كل الناس مثل بعض
الثاني : يعني شنو؟؟
الأول : يعني ليش مو كل الناس أغنيا... ليش أكو فقارة
الثاني : @@ مادري ... يمكن ... يمكن ....شدراني فلوسه وكيفه
الأول : ايه والله احنا شعلينا .......... أنت صايم؟؟
الثاني : لا ماصمت ... أمي تقول لما اكبر شوية اصوم
الأول : ايه انا بعد صمت بس تغديت ... بس ما اكلت وايد ... شوية يعني انا صايم
الثاني : انت شنو بتشتغل لين كبرت
الأول : بشتغل شرطي ... عشان اصيد الحرامية ... وانت
الثاني : انا بشتغل رسول
الأول : @@ رسول شلون؟؟ ... اهو الرسول شنو يشتغل
الثاني : يشتغل صلى الله عليه وسلم
الأول : يعني شنو يسوي
الثاني : يسوي صلى الله عليه وسلم
الأول : اييييييييه ...
الثاني : رحت المدرسة
الأول : ايه رحت
الثاني : شنو اسم ابلتك
الأول : اسمه مادري شنو .... جنه اسمها خس
الثاني : ههههههه من صجك ... خس اللي ناكله؟؟
الأول : مادري انا بسميها خس
الثاني : انا اسم ابلتي عذير
الأول : طالع هذا ... اكو اسم عذير
الثاني : ايه اهي اسمها عذير
الأول : قصدك عصير ... انت اكيد ما سمعت اسمها عدل
الثاني : طالع ويهك ... اكو احد اسمه عصير
الأول : ايه البنيات كل شي يسمونهم ... مو مثلنا
الثاني : تصدق بو العز ... امس قاعد اتدورف ولا جان احوش الشمس ... صارت حمممممرة
الأول : جذاب ... اصلا محد يقدر يحوش الشمس ... اصلا الشمس بعييييدة وااااايد
الثاني : آنا ما اجذب ... وانت لما قلت صدت القمر ما قلت لك جذاب
الأول : بس انا ما جذبت .... انا قصيت عليك بس
الثاني : انا بعد اقص عليك
الأول : ههههههههه ..... ادري فيك انت كله تقص ......قوم خل ندش انا يوعان
الثاني : بس ما أذن
الأول : باكل سمبوسه
الثاني : اصبر خل اييب كرتي

يهرولان معا وتختفي اصواتهم تدريجيا مع اذان المغرب
اغلق الشباك وأنا اتذكر مثل أمي دايما تردده
خبري براحة البال يوم كان طولي شبر ... ما اجمل الطفولة وبساطتها




هناك 72 تعليقًا:

`~MnO YeNSa! ~` يقول...

اللـــــــه
شهال post
الحلو

يحلوهم و يحلو سوالفهم اليهال
تحسين ان ماكو تعقيد كلش بحياتهم
قمة بالبساطة..

البوست مريح مثل صاحبته :**

و زيون رمضان وصل
12 و داشين بال13
طار :(
و الحين قرقيعان و تقرقع
و لويه و مكسرات و حلاو
تخطرف يهال,, جو ثـــاني
وذكريات حلوة حيل حلوة

بس ابيج تجيكين على هالصبيان
لما يقرقعون وين يوصلو .. السما بعد ولا الشمس هالمره

يا حلو سوالفج :**
و تقبل الله طاعتج
صيامج و قيامج

تدرين
ولهت عليج والله :*

ZooZ يقول...

مره بالدوام
يت عميله هدت عيالها وراحت السيارة تييب بطاقتها المدنية ناسيتها
وقعدوا عيالها جدام مكتبي
وسمعي الحجي
الاول: تدري ان الواحد يقدر يروح الجامعه وايد
الثاني: اي ادري مو خالتي وايد تروح
الاول: لا لا اقولك وايد يعني خمس مرات شهاده من الجامعه .. انا قريت بالراديو يقولون واحد عنده خمس شهادات
الثاني: شلون راديو امي بالسيارة بس تسمع
الاول: لااااا راديو بابا تقراه بعد قبل لا يتكلم المذيع
الثاني: ابوي ما ياخذني معاه بالسيارة
الاول: ليش انك ياهل
الثاني: احنا توأم!!!! مو نفس الشي
الاول: لا انا ريال انت ياهل
طبعا انا دمعت عيني من الضحك
الاول: اقولك شي بعد.. في وحده حامل صارلها سنتين ماتبي تولد الا بكاس العالم
الثاني: الله بطنها لي الشارع هههههه
الاول: صج ياهل انت اقولك حامل من سنتين بس تاكل شوي ما ينتفخ بطنها عشان لا يطيح بالارض شلون تشيله
الثاني: انا اساعدها
الاول: انا بروح كاس العالم
الثاني: وانا بروح كاس الكون لما اكبر
قلت حق امهم لما ردت الله يخليج ييبيهم كل مره جان تقولي ابيعهم لج بخمسين على خرابهم هههههههههههههه

3bady يقول...

بدعتيي :) .. صج اليهال ما ندري اشلون انفهمهم عن الله سبحان و تعالى حتى و انا صغير كنت اطالع الدريشة اقول بخش عن الله ما يجوفني << استغفر الله كنت ما افهم

يعطيج العافية اختي وايد :)

محـــــارة يقول...

بوست اينن اليهال متعة الدنيا وكلامهم يوسع الصدر بس مشكلتهم يبون لهم مود الله يحفظهم

مرسي كثير على البوست

Salah يقول...

الله يحفظهم لاهلهم

والله يتقبل أعمالكم

mellow يقول...

لووووووووووووووووووووووووووووول
قاعدة أقرا حق إختي البوست .واي متنا من الضحك....سذاجتهم سر إبداعهم ، و عبقريتهم في لا منطقيتهم ، خليهم يسبحون في خيالهم قبل لا إيي الوقت إلي يعرفون فيه إن لكل شي حدود.

ManalQ8 يقول...

يا حلوهم والله
:)

اسم الله عليهم

sham7o6a يقول...

صراحة حسيت اني وايد مرتاحة عقب ماقريت البوست.. حده يريح القلب ماتحسين انه في شي اتحاتينه او شاغل بالج
جد بوستج حده عجيب الصراحة
احييج عليه حبيبتي

Sn3a يقول...

اهم شي
الرسول يشتغل صلى الله عليه وسلم

وصدق من قال
البنات كل شي قام يسمووونهم


يسلمو على هالبوست الحلو

صبا يقول...

يا حلو اليهال

خيالهم واسع ...ماله حدود

تلقائيين بكلامهم وافكارهم وحتي باحلامهم

يا حلوهم ..

ما في شي يشغل بالهم

وكل يوم عندهم غير

يا بختهم....

مردهم يكبرون

يوم كنت صغيره امي تنومني وتقولي الله يحفظج ويحرسج طول منتي نايمه

وتخيلي يا زيوووون
طول الليل اسهر وانطره ليما ادوخ وانام والصبح اسال امي واقولها
وين الله امس سهرانه ليش ما نام عندنا ... ما شفت احد يحرسني !!!

علي بالي انه ايي وينام عندي لي الصبح
وهذي حالتي :)))))

MO3ATH يقول...

بوستج قتلني لووووووووووول عيل يبي يصير رسول ها :)

اختي الصغيره فاهمه اكبر من عمرها ماشالله عليها بس مرات تنفصل جذي لووووول انا اتوهق مادري شنو ارد عليه :q

sologa-bologa يقول...

دائما اسئلة الأطفال أجرأ وأقوى من أسئلة الكبار اللي يخافون يسألون او يتساءلون

بس خوش أطفال
أتنبأ لهم إنهم فلاسفة المستقبل

:)

مُحَسّدْ يقول...

لم يبق من متاع الدنيا الا براءة الاطفال

نون النساء يقول...

يا حلوووووووهم ويا حلو سوالفهم وسوالفج ...

والله ضحكت من قلب قلبي على طاري انه يبي يصير رسول و يشتغل صلى الله عليه وسلم

ههههههههههههههههههههههههههههه


بخاطري ابوسه الحين

:*




بعدين زيوووون والله فضيحة هذا اللي حاطته على يسار البلوغ :P صدتيني ببوست خشيته لانه مو خوش بوست لووول

صقر قريش يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

ونستيتني يزاج الله خير:) والله هاليهال سوالفهم عجيبه ضحكني هذا الي يبي يصير رسول عشان يشتغل صلى الله عليه وسلم
اليهال قمة في البساطة والعفوية والصدق حتى في كذبهم صادقين!!والإنسان كل مايكبر تكبر الهموم:(الله يخليهم لأهلهم ان شاء الله تعالى ويصلحهم.

مبارك عليج الي تبقى من الشهر وسامحيني على هالغطة الي غطيتها عن مدونتج والله يشافي ويعافي ام سليمان ويرجعها لأهلها سالمة غانمة وكله اجر ان شاء الله.

be happy يقول...

واااااي ياحلوج يالزين وياحلو سوالفج وحجياتج انا صارلي دهر اتابعج واول مره اعلق عندج لان توني يديده بوستج هذا ذكرني بالايام الي مضت والي مستحيل ترد مره ثانيه

البوست جدا رائع مثل روعه صاحبته

الله يسعدج ويهنيج مثل ماتحاولين تسعدينا بكلماتج الشفافه

M. J. Kout يقول...

looooooooool
allah ekhalehoum likoum inshallah

le linguiste يقول...

لوووول
يبي يشتغل رسول
والله ضحكتيني
والله يتقبل اعمالج انشاءالله

Q8 uniQue يقول...

بوست لطيف ...

مفعم بـ
عفويّة بريئة

,

شكراً لج الزين على نقل هالمشهد

7osen يقول...

مبدعة


عجبني الحوار و وقته لأنه قبل الفطور
لما يصير السكون والهدوء
عرفتي تختارين الوقت المناسب

الله يتقبل منج إن شاءالله

Fahad Al Askr يقول...

راحة البال ما لها علاقة بالطول

عجبتني الشوتة اللي طفت القمر

darkness يقول...

وااااااي

يا قلبي

امبيه اسم الله عليهم

جد يشوقون

ليش لما يكبر الواحد يفقد البراءه؟؟

امبيه دمعت عيوني

:"(

lawyer يقول...

يازيييييييين البوست يششرررررررح الصدر




فهد العكسسسسسسسسسسسر

اشقصصصصصصصصصصدك يعني


طوووووووووووووووولي شبر !!!
و ما عندي راحت باااااااااااااااال

ابو لطيف يقول...

سوف أكون قريبة منك ما استطعت يا رب
......

هكذا هي احيانا المصائب او الابتلاءات او المحن تدفعنا الى داخل انفسنا لنكتشف فيها ما كان مختبئا فيها او خافيا علينا

وفي ذلك مصداق لقول الله سبحانه وتعالى
( وعسى أن تكرهوا شيئا وهو خير لكم )

فهنيئا لك عودتك الى نفسك

واسأل الله الثبات لنا ولك


-----

براءة الاطفال

تكاد تنقرض شيئا فشيئ الا ان يقاياها مازالت في ثنايا هذا الزمن

والخوف ان تتحول او يتحول ما تبقى منها الى ( براعة الاطفال )

حوار لطيف ... ان افقدناه بين اطفالنا فذلك يعني اننا في خطر


سلمت يداك وما خطت
ونفسك وما بثت
وروحك وما اعطت

ShLaLaT يقول...

الله ونااااااسه احب سوالف اليهال وصواريخهم

:)



يا حلوووووهم ويختي عليهم

صج ولا من تأليفج ؟؟؟

اتوقع صج لول
وياااااااازين ريحه البحر واللااااهوب اللي يكفخج لوول

:)


شلونج الحين حجيه ؟؟
:*

ولهت عليج

Najmah يقول...

صج زينة الحياة

احلى شي بالدنيا

وامتع سوالف اسمعها

واحلى لحظات اقعد فيها معاهم

:**

السوالف خياااالية

حبييييتهم وااايد

ياربي اللي قال شات القمر وانطفى لونه ودي ألمه:*

الله يحفظهم من كل شر


كل شي فيهم بريء برييييء
براءتهم تخلي عيني تدمع

واسئلتهم اللي ماتخلص تذكرني بنفسي

اخوي الصغير لما ايي ينام عندي

يذبحني بالاسئلة

نجمة شلون السقف مايطيح؟

وليش الفضاء بعيد؟

وليش الطيارات تصير صغيرة

مرات اغمض عيوني تعبت وانا اجاوب
:(

qesat_5ayal يقول...

يا حلاتهم
:)


أحيانا أحس براءتهم جرأة لا يتقنها الكبار
وأيضا نتعلم منهم التغاضي .. ترى هم ليسوا بأغبياء ولا فهمهم قاصر

هذا هو علم بصاروخ رفيجه ومع ذلك تغاضى .. عشان السعادة عشان يعيش معاه اللحظات الحلوة


:)

JooJ o MaJooJ يقول...

واااااي زوووغه
هذول وين لقتيهم؟؟
بهالزمن ماكو براءه طفوله.. يخرعووون

مبدعه الصراحه.. شرحتي صدورنا عسى الله يشرح صدرج

ماجوووج

الزين يقول...

منو ينسى

:)
الأطفال احباب الله
قعدي وسمعي لهم من غير ما يحسون انج ملاحظتهم ودخلي عالمهم

جربي
راح ينقلونج نقله مو طبيعية
ومودج راح يتغير 180 درحة

ايه والله رمضان طار الله يعودنا عليه ويتقبل منا ومنكم صالح الأعمال


وانا بعد ولهت عليج
اكثر مما تتصورين

:**

الزين يقول...

زوز

ههههههههه
ذبحتيني ضحك
بيني وبينج
متعه ما بعدها متعه سوالف اليهال
حطي لج بطن للضحك بس

سعيدة جدا بمرورج زوز
واتمنى اشوفج عندي على طول

على فكرة
زوز اسم الدلع مالي انا بعد
:)

يعني بينا شغله مشتركه

ساعة المباركه بعد قلبي

:*

الزين يقول...

عبادي

:)
تصدق عاد يا عبادي
مداركهم واسعه
ويقدرون يستوعبون اي فكرة
احنا بس اللي معقدين الأمور

يعافيك ويطول بعمرك يالشيخ

الزين يقول...

محارة

:*

تبين تستانسين
نزلي لي مستوى تفكيرهم
دخلي عالمهم وسمعي شلون يشوفون الأمور

شي مو طبيعي
اجمل من الخيال اصلا

الزين يقول...

صلاح

اللهم آمين
ويتقبل منا ومنك يارب

ويعودنا عليه واحنا من السالمين

الزين يقول...

منال

:)

شلون رمضان معاج
انتي وينج بالكويت لو بره؟؟

الزين يقول...

شمحوطه

:)

حياج الله بعد قلبي
ولا تقطعين زيارة الزين

الزين يقول...

سنعه

:))))

شفتي شلون

يسلم عمرج بعد قلبي

الزين يقول...

صبا

:)))))


ذبحتيني ضحك على نطرتج

ساعات اقول ليتنا ما كبرنا
الحياة وايد اسهل

بس اتصور حتى اليهال لهم تعقيدات اللي تعكر صفو حياتهم

كل واحد متاعبة على قده

:)

يا حيا الله صبا

الزين يقول...

معاذ

:)
اسم الله عليك

ايه شدراه على باله الرسول وظيفة

حلاتهم في براءتهم يا معاذ

الله يخلي لك اخيتك

الزين يقول...

سلوقا

تهقا

اطفال اليوم
فلاسفة المستقبل

بس يحتاجون بيئة صح
تنمي فيهم التفكير الفلسفي
ما تقيدهم بين اللي يصير واللي ما يصير
والجايز واللي مو جايز

:)

الزين يقول...

محسد

وانت صاج ياخوي
هي الشغلة الوحيده اللي تخليك تقول ان الدنيا لازالت بخير

الزين يقول...

نون

هههههه

شفتي شلون طحت عليج

وانا اقول ياربي مبين عندي في بوست

اروح ما القى شي

تعقدت

يازينج زيناه

:**

الزين يقول...

صقر قريش

:)

علينا وعليك

والله يتقبل منا ومنك صالح الأعمال يارب

ان شاء الله دوم مستانس ياخوي
وصج فقدتك

بس متأكدة انك ما تنساني

:)

الله لا يحرمنا من طلاتك

الزين يقول...

بي هابي

:)

حياج الله وساعة المباركة
تعليقج اليوم بعد متابعه طويييييله
جدا جدا جدا اسعدني

بس هاااا
لا تغيرين هالعادة
ابي اشوفج على طول

:)

الروعة في وجودج بعد قلبي
:*

الزين يقول...

M. J. Kout

:)

الله يخليهم حق اهلهم
وحياك الله اخوي

الزين يقول...

le linguiste

شفت شلون

انت وينك وشهالغياب
وليش وايد صخة عندك

لا يكون ناوي تسويها مرة ثانية

@@

حسابك عسير ان فكرت
عسيييير

الزين يقول...

Q8 uniQue

مالك

شكرا لتواجدك اليوم

اسعدتني

الزين يقول...

حسين

:)

بالضبط
انت الوحيد اللي لاحظ روعة التوقيت

احلى وقت قبل الفطور
سبحان الله
الشعور فيه يختلف
احساس بالسلام عجيب

الزين يقول...

فهد

وانت صاج
كل من تعبه على قده

وشوتة القمر لها قصة طويله
يمكن احطها في بوست ثاني

الزين يقول...

داركنس

:)

هذي حال الجنيا
ماكو شي دايم الا وجهه سبحانه

:**

الزين يقول...

لوير

محد ياب طاريج ياربي

:)

الا انتي تحبين تفضحين عمرج
يعني لازم الكل يدري انج قصقص

:)

الزين يقول...

ابو لطيف

:)

اللهم آمين

.........

بارك الله في عمرك
وجعل خير اعمالك خواتيمها

الزين يقول...

شيلووو

بعد قلبي

انا مثل الورد

واوضعاعي على العال

:**

حتى انا ولهت عليج وايد

الزين يقول...

نجمة

آخ يا نجمتي

ساعات ودي ارجع بالزمن ورى

همممم

وقول للزمان ارجع يازمان

:)

ايام البروي
واللعب بالحوش
:)

أيام تأليف القصص
وخرابيط اليهال
ولبس هدوم امي واهي ما تدري
وتعبثنا بحمرتها
وتقليد مدرساتنا

همممم
ايام الضحك من قلب

اخيييه

ما ترجع

الزين يقول...

قصة

:)))

ايه طوف له

يا حلوهم

شلونج انتي بس

تقبل الله طاعتج حبيبتي

:**

الزين يقول...

ماجوووج

:**

ربي يشرح قلبج بالإيمان وطاعة الرحمن
ويرزقج من فضله قولي آمين

:)

Najmah يقول...

آآآآآخ

ياليت اقدر ارجع يالييييت

:"(

اضحك ذيج الضحكة

اتكلم بدون حساب

واعبر بدون تفكير

ماشوف حولي الا سما صافية

وماسكن قلبي الا الطهر

وماعرف من الدنيا

الا ناس تحبني .. ودفا يهديني

وحضن يمسح دمعتي

وبلحظة .. يفجر ضحكتي

مااشوف بيومي الا بسمته

ماشوف الا قلوب تمشي معاي

نركض حول الشجر

نلعب بالتراب

نحفر اسامينا بالرمل

ونعد نجوم الليل

نتسابق بالقواري

ماقيد فرحنا تعب

ولا وقف لعبنا هم

ولا عرفنا شلون هالدنيا تدور

يالييييييييييييت يس

kAiKa-MGroMa يقول...

MmMmM

sOft & Big iMagination
D=.

Eng_Q8 يقول...

اتصدقين في حكمه بكلامهم

terkwaz يقول...

بذيج الايام
عبث بريء يلَهينا
ينَسينا ليالينا
نفكر بباجر ومشاويره
بين البحاره واللعب بالرمل
نشتط بوناستنا
نتراكض حفاي
ونطب بالبحر
نطمر لما يقرب الموج
ونغوص لما يروح...
___
ذكرتيني
عقب ماارد من سفره اقول
بطلت دريشه الطياره ودخلت غيمه وقمت العب فيها :))

MKSARAT SAYED SAAD يقول...

زوزوتا
صديقتى الغالية
كل سنة وانتِ طيبةوالأسرة الكريمة بخير
ربنا يعظم اجرك وأجر كل المسلمين
يتقبل منا جميعا صومنا ولاتنا ويغفر لنا ذنوبنا
اللهم أمين
تحياتي
سيد سعد

DiLLi O MiLLi يقول...

أأأييييييه أياااام الميهله
ذكرتيني بلعب كرة القدم مع عيال عمي
خوو أنا كنت صبيك (مووو بويه)!!
كانت ألعابي مسدسات وكور وسيارات
ماااا عمري كان عندي باربي (أظن على وقتي باربي ما نولدت) ههههههه
كبتي ما فيه ولاااا نفنوف لما وصلت الثانوية يالله كان عندي نفنوف واحد .. وكنت أستحي ألبسه ههههههه
بس من دخلت الجامعة .. لاااااا أسم الله علي ترست الكبت نفانيف ..
:)

يااااا حلاااات ذيك السنيين
كنا برائوووو ....


بس الديالوغ اللي بين هالولدين زززوووغه !!
أنا ودي أشتغل "أمير" لمدة سنة بس
أنخل فيها البلد من بعض الناس اللي واقفين بطريج تقدمها وأزدهارها
يصير؟



:)

mtfa2el يقول...

ينادي الثاني بو العز ؟؟
وينهم وين البراءة :p
بس دامهم يشوتون الكرة حبيتهم

حسافتج يا كويت يقول...

إييييييييييييييية يا الزين

لو الطفولة دائمة جان تمنيتها

الموضوع وايد حلو ووايد يلمس القلب فعلا تذكرت يوم كنت ياهل وجذوبنا البريئة قبل
اتصدقين لمن اشوف بنتي وهي نايمة اقول يا بختهة ماعندها هم وبعدين اقول مسكينة وراها درب طوييل ابتدائي ومتوسط وثنوي وجامعة وعرس وعيال ومسؤولية

محد مرتاح
ياالله حسن الخاتمة

الزين فعلا ماتكتبينة جميل وتعجبني كتاباتج لا فاضت قريحتج
واكيد قريحتج فاضت يومنج كتبتي هالكلام

ابي اصير ياهل ابي اناااااااااااااااااااام
ابي اناااااااااااااااااااااااااااااااام

اشكرج على رحلة الطيران بجنحان الطفولة خلال قرائتي للموضوع

الزين يقول...

نجمة

:**

الزين يقول...

كيكا مقرومة

الأطفال وما ادراك ما الأطفال

:**

لج وحشه

الزين يقول...

مهندسنا

حكمة وبراءة وتفكير بسيط

الزين يقول...

تركواز

يا زين بساطة احلامنا بهذاك الوقت

:)

حياج الله حبيبتي

keep on dreaming

الزين يقول...

صديقي العزيز والمخلص سعد

شكرا لك لأنك لم تنساني في رمضان
شكرا لك لتواصلك المستمر
شكرا لك لأنك هنا اليوم

كل عام وانت بالف خير انت وعموم الأهل والأصحاب

ادامك الله لمن احبوك وانا منهم

تحياتي

الزين يقول...

ديللي

يا بعد كل من راح وييه

انتي اختفيتي برمضان
ولج وحشه يالشيخه

تعالي بقول لج سر
ترى طفولتي ما تختلف عن طفولتج وايد
:)

الظاهر كل الحداقه هالشكل

واذا انتي صرتي اميره الكويت
انا ولي العهد

شرايح فيني
سيده ما صدقت

عاد انا كلش ما اصلح للسياسه وقلبي مو قوي
بسرعة ينكسر خاطر

:**

اصب لج قهوة

الزين يقول...

متفائل

يعني لأن ناداه بو العز صار مو برئ
حرام عليك

عيل لو تدري ان بو العز ينادي الثاني الوهبي شتقول

هههههههه

الزين يقول...

حسافتج

:)

كل منا يحمل طفل في داخله يا حسافتج

الشطاره انك تعرف تطلع هالطفل متى ما بغيت

وتخفيه متى ما اشتهيت

صدقني مو صعبه
واللعبه ممتعة
خصوصا ان عندك بنوته صغيره
باجر تكبر وتكتشف انك ممكن تكون طفل مثلها اذا شاركتها اللعب

واذا بغيتوا تلعبون نادوني
انا ترى احب البروي

ههههه

Ahmad يقول...
أزال المؤلف هذا التعليق.