.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

9.6.08

كله يصير ...وحلوة الحياة


نلبس قناع
نخفي الكثير
وبالحياة كل شي يصير
نزرع أمل نحصد ألم
اعكس حروفك وحلمك يصير
تخطي شوية أو تخطي كثير
وتقرض أصابعك من الندم
وكله يصير
طفل صغير يرسم حياة
يرسم خطوط مالْها وجود
يحسب طريجه وايد سهل
يطيح ويوقف وما يمل
آه يا زمن كله حفر
وتراب وصحاري جهلت طعم المطر
آه يا ظلام ماله فجر
آه يا دروب سلْكها صعب
نمشي ونوقف من التعب
ونسأل متى يهل النسيم
والصيف يعزِل ويرتحل
آه يا سهر عمره دهر
مر وسقاني العنا وكاس القهر
أعرف صديج مني يضيج
كل ما وقف حظي معي
مني يغار وفيني يحسد ضي النهار
وكلنا بشر
كثر الوفا في أطباعنا ماهو أساس
أعرف زمان كان الوطن اهو الأساس
كانوا ربعنا بالتعب يبنون وطن
وكان البحر يعني الكثير وأهل البحر هم الرجال
اللي انبني بترابهم سور الكويت
وكله تغير واندثر
صار الأفينوز يعني لنا كل الحياة
وصاروا البنات برخص التراب
وصاروا الشباب مثل البنات من غير هدف
وسوق النخاسة ممتلي من هالبشر
وكله سوى وحلوة الحياة
والحق قلبه منكسر
والصدق عند باب كذبه انتحر
والدنيا صارت ملهى جبير
كل من لاهي بقصته
كل من يدور مطلبه
يركض يمين يركض شمال
يطلب صعب وسهل المنال
شلون تصير؟؟
تعال قول لي يالخبير
توصل هدف من غير تعب!!
وتقول لي يصير
والله عجيب .. إنت خطير
و إنت و أنا يا صاحبي نحلم كثير
حلمي أنا أصلح بلد
وصيت وغنى حلمك إنت يالفقير

وحلوة الحياة
وكله يصير





هناك 52 تعليقًا:

lawyer يقول...

للاسف ضاعت المبادئ و استمرت الحياه

خوش حكمه

Salah يقول...

للاسف صار هذا حل الديرة

غير معرف يقول...

اعكس حروفك وحلمك يصير



كبيرة يا الزين بكلامج كبيرة

وكلشي يصير

مهما قلت بصنع المصير

وبحدد حياتي لو شيصير

العمر يا بنادم قصير

والاقدار ربي يسويها وتصير

انت عليك تحلم وتطير

واتجاهد لتحقيق حلمك الجبير

وبالنهاية اللي ربي يقولة يصير

ومثل ما قالت الزين

اعكس حروفك وحلمك يصير

وكلشي بهالدنيا يصير

7osen يقول...

نلبس قناع
نخفي الكثير
وبالحياة كل شي يصير


أكبر مشكلة هالأقنعة إللي نلبسها ونخفي الحقيقة خلفها

وصحيح في هالزمن بالحياة كل شي يصير

كل شي

ذكرتيني بمقطع كنت حافظة حق أمين معلوف يقول

إذاكانت الحياة تخيفك وتسبب لك الأذى
وإذا كانت الكائنات القريبة جداً منك تغطي وجهها بقناع قبيح

فقل إنها الحياة

إنها لعبة ليس بالأمكان دعوتك إليها مرة أخرى
لعبة الملذات والألم
لعبة القناع
العبها حتى النهاية
كممثل أو كمشاهد

-----
شكراً لج الزين على هالبوستات وعلى هالتألق
مبدعة بكل معنى الكلمة

ray يقول...

زيون

هالموضوع و اللي قبله , يا ريت اللي ببالي يقرونه

Super Woman يقول...

ضربتيها على الوتر

اخ منج


اي والله كل شي صار وبعد بيصير
واحنا نشوف والزمن يمشي
كنا صغار وصرنا شباب والدنيا من حولنا تغيرت
نقول راح الكثير وبقى القليل
بس شكل القليل زايد
المجتمع كل ماله وينحط وينزل مستواه
والناس تغيرت
كان الابو له كلمه وكانت الام تنصح
وللأسف صاروا العيال كلمتهم الماشيه
والام تخرب بناتها


والصداقه حالتها حاله
قليل هالأيام تشوفين صداقه صجيه بمعنى الكلمه
زين اذا لقيتيلج بنت بنتين زينين
والباجي قطيهم بحر

والكويت !!! الأحوال اتوقع واضحه !!

الزين ما تحسين ان الناس اللي يحسون قليل ؟؟
هذا الابو ما عنده غاريه على بناتهم ومرته
وهذي الام مختربه قبل ما يختربون بناتها
وهذا الولد حياته طلعات وروحات وسفرات
وهذي البنت تلفونات وكشخات وحفلات

وبعدين ؟؟ متى تيي اللحظه اللي يوقفون فيها ويحسون ؟؟؟


مشكلة المشاعر البليده !!!



يعطيج العافيه
اختصرتي الحياة بحروفج الراقيه :)

`~MnO YeNSa! ~` يقول...

هلوو
زيون
شلونها

فقدج :*
خـــــــــــــوش بوست
كله حكم

صار ماكو حدود
حق اي شي

ما ندري منو الصح منوالغلط

نمشي ونوقف من التعب
ونسأل متى يهل النسيم
والصيف يعزِل ويرتحل
آه يا سهر عمره دهر
مر وسقاني العنا وكاس القهر
أعرف صديج مني يضيج
كل ما وقف حظي معي
مني يغار وفيني يحسد ضي النهار
وكلنا بشر


كلامج صح
100%

الخيلاء يقول...

الحياه تستمر و ماتنطر احد
عشان جذي لازم نمشي معاها بس نمشي صح
عشان يكون مشينا مثمر و عطائنا ملموس

غير معرف يقول...

نحن لا نعيش في مدينة افلاطون الفاضلة

5roofa يقول...

اييييييييي والله صاجه
صار الأفينوز يعني لنا كل الحياة
وصاروا البنات برخص التراب
وصاروا الشباب مثل البنات من غير هدف

صج صج صج دررررررر

و طبعا هالمقطع


يحسب طريجه وايد سهل
يطيح ويوقف وما يمل
آه يا زمن كله حفر
وتراب وصحاري جهلت طعم المطر
آه يا ظلام ماله فجر
آه يا دروب سلْكها صعب
نمشي ونوقف من التعب
ونسأل متى يهل النسيم
والصيف يعزِل ويرتحل
آه يا سهر عمره دهر

:"(

امبي ابدعتي فيي والله من صج قريته مليون مرررة و احس للحين ودي اقراه بعد

تسلم ايدج زوزووو

salamz sis...

charisma يقول...

الله يرحم حال هالبلد
الغصه لى الحين ابلعومى
اليوم من اصبحت مودى مو زين
وكتبت بوست هم مو زين
وييتج ://

والحق قلبه منكسر
والصدق عند باب كذبه انتحر
والدنيا صارت ملهى جبير
كل من لاهي بقصته
كل من يدور مطلبه


الحمدالله على كل حال
:**

البمبره يقول...

وازيدك من الشعر بيت
لي خطينا قلنا الزمن
لي غفلنا قلنا الشغل
لي غبنا قلنا ظروف البيت والعمل
بس
لي حبينا صار الزمن ما يصد
لي عشقنا صار الشغل بثانية يعتمد
ولي ولهنا كل الظروف ما تنوجد

صج كل من لاهي بدنيته
بس لأن الكل غفل عن شي اسمه
صلة الرحم وحق الجار
اهله والناس الي دار مداره
هذا مجتمعنا الحين
الأهل بعدى عنهم ما وراهم الا القيل والقال
الجار لالالا مالي شغل باحد شغل حسد والتدخل في شئوننا
عيل منو بقى
ايه الدوام
سكري مكتبك ولا تكلمين احد ترا يخربون صورتك عند المسئول
يالله ماكو الا نفسي وزوجي وعيالي
هذي عيشه؟؟؟

Blog 3amty يقول...

عمتي تسلم عليج وتقولج:



فصخني القناع
شوفي ويهي بإحتقار!


لمسي بديج سنين الضياع
مسحي بدربج دموع الإنتظار


هذا هو حال كل الرعاع
قناع ببطن قناع يخفي "عار"


بإختصار


ما نبي برائة أختراع
نبي يا يمة قائد وقرار !





Blog 3amty

Najmah يقول...

ايييييييه يالزييين

احلامنا تطووول
ويمر فيها العمر
تصدمنا الحياة
ويجرحنا الزهر
لا مااات الضمير
كل شي يصيير

لا صارت الجذبة فخر
والحلم بعيوننا يذوب
ويختفي بوسط البحر
كله يصير

مالنا الا الصبر
مالنا غير الأمل
يرسم وسط ليل طويل
نجمة تلوح
ونور وقمر

كله يصير
بس
تهقين حلوة الحياة
اذا كل شي يصير؟

GUCCI-q8 يقول...

اسلوب آخر

غير كل مره

متجدده

الله يعطيج العافية

فريج سعود يقول...

كبيرة
وتنفع اغنية حق محمد عبدو
بس يشيل الافنيوز ويحط العزيزية
:)

Kuw_Son يقول...

يا الزين .. كلماتج مو زين .. تعور القلب .. صج صار الأفينيوز أحد الهموم للشباب !!

بس تدرين !! .. كل شي يصير !

قلب طفله يقول...

درر يا الزين

للاسف هذا زمان الاقنعه و المشاعر

المغلفه بس تظل حلوه الحياه

لان فيها ناس ترفض هالمهزله .

تسلم ايدج يا روعه

دمتي بحب

Manal يقول...

دايما تتفردين بالاسلوب يا الزين

ما شاء الله عليج

كلمات وواقع حزين

ان شاء الله تفرج

kAiKa-MGroMa يقول...

كلام مُنمق

أحيي روح الابداع بداخلج :>

الله لا يغير عليج

yoyo يقول...

الحياة حلوه ونعيش ونشوف

كلمات رائعه مادري شقول بالتوفيق

الزين يقول...

لوير

:)

كل اناء ينضح بما فيه

مشكوره بعد قلبي

الزين يقول...

صلاح

الله يحفظنا

حياك الله ياخوي

الزين يقول...

حسافتج يا كويت

الله يسلمك ياخوي ويعز مقدارك يالطيب

كله يصير
كله

كل شي مقلوب بهالزمن

ورغم كل هذا لازلنا نقول حلوة الحياة
وعندنا امل في باجر

:)

حياك الله

الزين يقول...

حسين

العبها حتى النهاية
كممثل أو كمشاهد


مشكور على الإضافه
ومشاركتنا القليل من قراءاتك

كلي امتنان على متابعتك المستمره

مشكور يا حسين

الزين يقول...

Ray

:)

7beebty intay

just send them the link

:**

الزين يقول...

Shlalat

أخ منج إنتي

:**

يازينج والله

ماراح تيي اللحظة
ولا تنطرين الناس ينصلحون

ابتدي بنفسج واهل بيتج

لو كل واحد بلش بنفسه
المجتمع بنصلح من غير ما نحس

وهم نتم نقول
حلوة الحياة

لأنها بالفعل لازات حلوة
مو كلها مره

اذا اخترتي انج تشوفين مواطن الجمال فيها

شوفي الدنيا بعيون النحله مو بعيون الذبانه

النحلة تشوف الورد
والذبانه تشوف الزبايل

وانتي اكيد نحله

:**

الزين يقول...

منو ينسى

هلووووووووو بعد قلبي انتي

ما تفقدين عزيز يالشيخه
انا مثل الورد
وانتي؟

شفتي شلون
انا ام الحكم
:))))

مشكوره ابوي انتي

:**

الزين يقول...

داركنس

بالضبط

وين الخيرة بكل اللي قاعد يصير

ربج ابخص واعلم

:**

الزين يقول...

الخيلاء

انتي
صح
صح
صح

:**

الزين يقول...

خروفا

بعد قلبي يا خروفه

يسلم عمرج يارب

:**

الزين يقول...

كاريزما


اسم الله عليج من الغصه ابوي انتي
سهلي الأمور وهونيها يا حياتي

قريت البوست
مافيه شي
قلبج على ديرتج
حالج حال الكل

ييتيني وانا زدتج بعد عمري
:**

الف الحمدالله
هونيها وتهون ابوي انتي

الزين يقول...

محسد

سووووووووري

سقط سهوا
بس تداركنا الموضوع

نحن لا نعيش هناك
ولا اتخلقت هالمدينة الا في خيال فيلسوف

احنا نتأمل ونسعى
عل وعسى نحقق شي

ولا شرايك
اليأس حيلة الضعيف

والتغيير يبتدى بقرار
ويحتاج عزم

ووويييينك يا عزم
ووييينك يا قرار

:)

الزين يقول...

البمبرة

بيييييييييه

انتي صج قلبج متروس

هونيها وتهون ابوي انتي

:**

الزين يقول...

بلوق عمتي

يسلمها من الشر
وقول لها صح لسانج

وحياك الله انت
وعمتك

:)

الزين يقول...

نجمة

ولا تقنطوا من رحمة الله

اكيد بتبقى الحياة حلة
وبيبقى الأمل وموجود

والتغيير وارد

ليش اليأس يا نجمة؟

الزين يقول...

GUCCI-q8

التغيير مطلوب

عشان لا تملون من رومانسيتي المفرطه

ولا شرايك انت ؟؟

الزين يقول...

فريج سعود

:)))

عسل والله العزيزية
رايحين الحج احنا

انا ابي اصيل احلى

يصير؟؟

الزين يقول...

كويت سن

اسم الله على قلبك ياخوي

واقع ملموس ما يبته من عندي

ومثل ما قلت كل شي يصير

:)

الزين يقول...

قلب طفلة

بالفعل تبقى الحياة حلوة لوجود الناس الطيبين مثلج وشرواج

يسلم عمرج بعد قلبي

:**

الزين يقول...

منال الكويت

هلا وغلا

رجعتي الكويت لو بعد
اذا رجعتي الكويت غلطانه

الجو انتحاااااار

واذا ما رجعتي وحشتينا

والديرة تقول لج ردي

العياره شلون صايره

:)))))))))

الله يصلح الحال

وساعة المباركه حبيبتي

الزين يقول...

كيكا مقرومه

من ذوقج بعد عمري

وحياج الله

الزين يقول...

يويو

مشكور يالشيخ

وحياك الله

Blog 3amty يقول...

يحييج

(;

Manal يقول...

ضحكتيني

حبيبتي انتي
يالزين

لا بس صج قوليلي

اذا الجو مو ذاك الزود

ما ادفع سعر التذكرة واظل بمكاني احسن

:))

تسلمين يا الغالية على الكلام الحلو
:)

~FaHaD iN MiND~ يقول...

طفل صغير يرسم حياة
يرسم خطوط مالْها وجود
يحسب طريجه وايد سهل
يطيح ويوقف وما يمل
آه يا زمن كله حفر


this is life .. waid 7ilo postch yal zain kelshay engalab eb hal dinya il 9a7 9ar ghala6 wel ghala6 9ar 9a7 .. welii yen9a7 aw yetkalam 3nd il nas ma yefham o mo met7ather

fatto يقول...

بوستج واايد حلو .. عجبني .. وكلماتج أحلى

الزين يقول...

بلوق عمتي

ويبقيك

:)

الزين يقول...

منال الكويت

والله الجو لج عليه شوي

وما يعتفس الا بالويك اند

سمعتي عن جو نذل

هذا جونا

:)))

حياج الله ابوي انتي

موفقه وين ما كنتي

:**

الزين يقول...

فهد على البال

هذي حال الدنيا
ما تثبت على حال

يعين الله حبيبتي

وساعة المباركه

الا تعالي بقول لج انتي وين غطيتي

اكيد امتحانات

:)

الزين يقول...

فاتووو

الأحلى ودودج يالشيخه
وزيارتج الغير متوقعه

حياج الله اليوم ودوم

:)

غير معرف يقول...

يازمان العجايب
...
:)