.

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

23.6.08

لا طبنا ولا غدا الشر


أصفط سيارتي ... أدخل الجمعية .. القف لي سلة ... اتمشى على الراحه وانا سرحانه مع افكاري ..... تحسون ماعندي شغل .... ومن زود الفضاوة قلت اروح الجمعية ... واذا تبون الصح انا اذا متضايقة اروح الجمعية ... ... مركز سلطان .... سوق شعبي ....اشتري لمجرد الشراء .. خرابيط .. خرابيط .... لين اقول بس

عقبها ارجع البيت وانا مستاااااااااانسه وضميري مرتاااااح على الآخر

المهم مو هذي سالفتنا ....

وانا اتفرفر بين الرفوف واسمع هالحوار الطريف ...

هي : حبيبي تبي هذا
هو : مادري ... اذا انتي تبينه حطيه
هي : آنا عادي عندي ... بس إذا إنت تحبه ناخذه
هو : انتي تاكلينها
هي : مو على طول
هو : يعني ما تحبينها
هي : لا مو مشكلة عندي
هو : انزين ما تبين غير هالنوع
هي : حبيبي اذا انت تحب هالنوع نشتري هذا
هو : في بيضا وفي حمرة
هي : يعني انت ما تحب الخضرا
هو : جنه البيضا احلا
هي : اهم غير عن بعض
هو : ايه طعمهم غير
هي : انتوا تسوونه في بيتكم
هو : مو دايما
هي : انتوا تسوونه
هو : ساعات
هي : يعني ما احطه بالعربانه (حطوا اللي بتحطونه وفكونا ... شو بناااااا)
هو : كيفج
هي : حطه انت تحبه
هو : تعرفين تسوينه عاد
هي : ايه عادي ... سهل ترى (هاااو .... شنهو اللي سهل!!)
هو : مو توهقيني

تضحك والدلع يتكتكت
هي : لا بسأل أمي لا تخاف
هو : لا سألي امي ... تعرف تسويه زين (يا حمش ... ايه ريال .....من اولها امي احسن)

@@
يخرب بيت الدلع والملاقة ذبحني الفضول بعرف شنو هالحمر والخضر وتحبينه وما تحبينه
اللقافة ذبحتني

جان ارجع قري والف صوبهم
ولا جدامي شي قصير جذيه ولابس جينز وتي شيرت احمر
وكاب مكتوب عليه NY
ويمه شي اقصر منه ... وترصص ماله اول من تالي ... وبلكونات طالعه لا تحصى ولا تعد... ومكياااااااج ... مكيااااج ... وحجاب بو دور ونص ... كاسرة رقتبها على جنب وبيدها شنو تهقووووون

قوطي فاصوليا خضرة

ههههههههههههههههههههههههه

طلعت هالمناقشات والمفاصلات والدلع والتدلع وخاطرها وخاطره على قوطي فاصوليا خضرة
بمووووووووت من الضحك

شكله الحبيب توه متزوح ومدلعها على الآخر

اهم اصلا يايين الجمعية ما يدرون شنو يبون .. اللي قوطي فاصوليا سوى لهم ازمه
اشوه انها خضرة

وربي كان بخاطري اقول لهم المعلبات ما تصلح يا أمي ... كلها مواد حافظه ... تييب لكم الكانسر حسافة عليكم وانتوا توكم معارييييييييس


المشهد الثاني

واقف وجدامه العربانه ملياااااانه اغراض ..... متأفف وكاره عيشته ... يرن موبايله ... هلا بو خلود ... هلا حبيبي ... ايه بالجمعية مع الأهل .... لا ياي لكم ما اطوف ... متى تبلش المباراة ... ايه بس خل افتك من هالحوسه ... صار ... سلام ابوي انت

هو : يلتفت عليها .... يالله ما خلصتي ... ماصارت ... ساعة تحوسين
هي : هاااو اصبر شوي ... يعني بالله انت عبالك الجمعية بتخلص منها بساعه
هو : شنو هذا ... شحاطه ... رديه رديه رحم الله والديج .... ما تعرفون الا تشترون وتقطونه بالثلاجه وتنسونه وكله بجبود الخدم ولا بالزبايل
هي : وانت كل ما حطيت شي بالعربانه قلت لي شيليه .... بالله عليك عيل ليش يايبني ... يعني العيال ما ياكلون
هو : ابوي انتي ... لين بغيتي تطبخين لهم انتي اشترى هالشغلات
هي : زين عاد .. بلشنا بالتنقز

تهقون هذول شكثر صار لهم متزوجين
حسيت اني رازه ويهي بينهم وقاطه الإذن مشيت عنهم وانا اقول الله لا يبلانا
ما نبي هوووناااااااا ...

المشهد الثالث

بيده الموبايل ويحوس ضايع بين شغل الحريم ... ومنقص ويهه ... يتكلم بصوت يحاول انه يكون واطي
ايه يبه ... هاااا ... شنو لونه؟؟

اكو وردي واكو ازرق واكو بنفسجي
شدراني شمكتوب عليه
بالله عليج انتي مطرشتني اشتري توست مثلا.... ايه ايه ... انزين شالفرق بين مال الليل ومال النهار .... ههههه كلش ما كو سالفة .... خلاص عرفته ... المقوسه!!

@@
وه .. وه ... وه
يغربل ابليس حريم هالأيام .... من الحيا انا جيورت ودخلت صوب حفاظات اليهال

المشهد الرابع

دخلت المكتبه بشوف لي مجلة سخيفة تسوى اتسلى فيها قبل لا انام ... عاد انا اكتشفت ان احسن طريقه عشان اييك النوم انك تقرا اي شي سخيف وما يحتاج تفكير

الأول : كلمها يالله
الثاني : شلون
الأول : شوفها قاعده تطالعك
يعدل كشته
الثاني : شلون شعري حمود
الأول : زين زين يالله عاد خلصنا كلمها ولا بمشي

الأولى : امبيه هيون قاعد يطالعج
الثانية : حلفي ... واي يا قلبي .... شفتي شعره
الأولى : واااااااي رفيجه زوقه ... بس شكله منفس
الثانية : يمكن عنده وحده
الأولى : امبيه امبيه كاهم يايين صوبنا

وهنيه اشتغلت نحاسة الزين .... جك ... جك ... جك بالعداااال جان ارتز بالنص بينهم وآنا اتبوسم ومرتااااااحه على الآخر

البنت تدودهت ورفيجتها سحبتها
الولد اخذ يوتيرن
ورفيجه طلع من المكتبه

جيل يضيق الخلق
صج لين قالوا هم يضحك وهم يبجي


آخر مشهد

الأب : يبا اقعد خل نحاسب
الولد الأول : يبا سعودو كلا كاكاوي
الأب : سعوووود .... تعال هنيه
الولد الثاني : يبا والله ماكليته .... اهو كلاه وعطاني اكمله
الأب : شلون تاكله من غير ما نحاسبه
الولد الثاني : ما قطيت القرطاس
#$%&
يكفخ اخوه
الولد الأول : آآآآي
الولد الثاني : أعلمك بالبيت تفتن هااا

يلتفت عليهم الأبو وعيونه تطلع شرااار
بنته الصغيره : يبه ابي ماي
الأب : روح عزيز ييب حق اختك ماي
الولد الأول : شنو.... خل تنطر لين نروح البيت
بنته الصغيرة : يبه ابي ماي
الأب : عزيز ييب لنا يا يبا بطل ماي
الولد الأول : يبا شنو كله انا كله انا
بصوت مثل الرعد شلع قلبي من الخرعه

روح يييب ماي اقول لك

يمشي واهو يتحلطم

الكاشير : 75 دينار حضرتك

الأب : شنو... 75 دينار على كاكاو وحلاو وخرابيط يهال
الكاشير : ايوا حضرتك
الأب : لا يبا انت اكيد غلطان .. ارجع احسبهم مره ثانية

لا حووووول هووونت خلاااااص

اتلفت ماكو كاشير فاضي .... والزحمة اخنقتني ... وصيحة اليهال
احط سلتي باللي فيها ..... واطلع من الجمعية

ولا طبنا ولا غدا الشر

هناك 60 تعليقًا:

QiYaDiYa يقول...

افا كل هاللوية و اخر شي حطيتي السلة و طلعتي !!

بوست ممتع ..

اهم شي الفاصوليااا p; p; p;

darkness يقول...

هههههههههه

امبيه موتيني ضحك


عاد كنت منقمته

اول المشاهد قلت نطري هذا بس بالاول تالي يصبخ فيها القاع

و انتي ما قصرتي وريتينا بالمشهد الثاني شلون يصبخ فيها القاع


يبه جيل هالوقت غير

ما ادري شلون صايرين

اللي يضحك و اييب لج الاكتئاب لما ياهل يتحرش فيج

وااي

لأ
لأ
لأ


ودي اقول له يا يمه انا كبرت امك عيب

:)


الله يونسج بالعافيه

Яeema يقول...

إستانست لما شفت حبيبتي قياديه
قياديه أسلم عليجمن عالمالبلوغر





نرجع لموضوعج

تبين تعاقبيني؟؟
وديني جمعيه

أشكاااال

و تحسين ناس فاضيه

يعني هذي لو عندها شي تسويه ما قعدت على قوطي معلب سنة تناقشه

بس مالج شغل فيها لي يات الصجيه و تبي شي بتحن
هاهاهاهاها


الموقف الثاني مال الرياييل و في رف إلألي شسمونه!؛

مسخره الصراحه

يعني ما تقدر تزرق 5 دقايق بس حق هالشي!

شدعوة


وعلى السله لما تنحط إذا في زحمه
واااااااااااااايد سويتها

ماكو إلا العافيه
هاهاهاهاها

الخيلاء يقول...

LoooL
الزين اي جمعيه هذي يونسون الرواد
الواحد كل ما ضاق خلقه يوسع دره عندهم

:)

Shaima'a Alkandari يقول...

حلووووووه

صج صج ضحكتيني

عاد اشوه ان في احد مثلي لي دشيت
الجمعيه وزحمه ومستعيله وتعبت اهد اغراضي واطلع

تعالى الحين انتى خربتي على الصبي بو شعر وعليه عليه الحين رفيجه يمشي والحبيب ماتغزل فيهااا


وااى الجمعيه يبيلها تفرغ وعلى الراحه عشان تشترين كل شي وهم لى اعتقدتي انج شريتي اللى تبينه يطلعلج شي مادري من وين

ويحليلهم معاريسنا خو شنو يبيله الفاصوليا وفيها اسأل امى ولا امك


صج بناتنا الحين واحنا البنات وضام نفسي وياكم فشله مانعرف نطبخ

وطفارتي يوم ام او ابو يزف الياهل جدام الناس حرام يكسر شوكته ويخليه مايثق بنفسه












بوووست حلو زيوووووونه

تسلمين حبيبتي

a7La eNG يقول...

ايــــــــــــــه يا زين الجمعية
متى قطعتها عسى الله لا يحاسبني بس :P

لما هب الشعب يروح الجمعية
as a couple
!
waaaaaaaaaaaai3
حبة ملاقة على شوية سخافة و من هاللي شفتيه و اغبر بعد ..

بس ريلي ما قامت توديني ..

و الا التلقط هذا يونس .. انا اغطس عن الخرابيط من الصوابين و الكريمات
لي شفتي وحدة شبه مبسطة على الأرض تقرا المكوناااااااات فا هذي انا
:D



يا حلوج والله ..
:**
و لا قرصتي هالبارع و بو شوشة ! لو كاتة على شعره من فاصوليا الأخت ام البلكونات
;)

5roofa يقول...

وااااااااااي زوزووو مت مت مت من الضحككك

بعلق على كللللل شي من الونااسه لوول

1

تصدقين صايرين الي يتزوجون و اهم صغار مادري شلوون دلعهم لووووول بس كل هالنقاش علي وتالله انا حسبالي تفاح
p;

2

ما احب هالنووووووع الي ياي الجمعيه و يتافف يا كثرهم بجمعيتناا

كل طاقين بووز و الحرمي يحوسوون ولا يوقف مكان واحد و اهي تروح و ترد عليي

لووول اي ليش اعذاب خوو

اتوقع تره صارلهم يمكن اذا مو غلطانه 3 سنين
p;

لالا اتغشمر يمكن 7 والله اعلم

لووول

3

لوووووووووووووووووووووووووول بددددع

وااي مت مت مت من اضحك حست دمه خفيف هالريل

لووووووووول

4

خربتييي عليهم لووووووول مساكين جان خليتي يترزق الله

شخباري ايام الجمعيه لوول

زوزو واااااااااي ايام المراهقه الاليمه لوول

5

امبي عاد هذيله عااااااااديييييي اذكر لمه كنا صغار مع ابوي بامريكا

كل عيالهم ياخذون شي واحد
و احنا الله وكيلج كل وحده فينا عربانته برووحه لووووووول

كويتين مانعرف

انتيييييي عسل والله ونستيني من صج الله يفرحج دنية و اخره

salamz sis...

حسام بن ضرار يقول...

عيل لو داشه مركز سلطان الضجيج

شنو بتقولين؟

اعتقد مدونتج بتنترس من مواقف اسخف و افظع من هالمواقف

:)

ShLaLaT يقول...

لوووووووووووووووووووول عقب كل هالمشاهد طلعتي بدون شي


انا عبالي بتقولين شريتي ب 200 دينار لوول


بس نصيحه اذا صج تبين تستانسين روحي الفرع مو الجمعيه

دواعييييس واشياء غريبه
وتضطرين مرات تغييرين شغلج وتختارين نوع ثاني وتجربين شي يديد


وفاااااضي ماكو احد :)
وناسه :)

As YoU LiKE يقول...

منو يقول انج قاطة اذنج ؟

روحي دشي مركز سلطان بس مال شرق واضحكي .. خصوصاً اخر الليل :)

مُحَسّدْ يقول...

من راقب الناس مات هما !!

7osen يقول...

الزين بوست عجيب وناسه ودي مايخلص
ههه
كل هذا صار بالجمعية

والله مت من الضحك اكثر شي على الموقف الاول
اخضر واحمر واخر شي يطلع فاصوليا
لا ويقول لها تعرفين تطبخينه ههههه
مسكين إذا فاصوليا تعرفين تطبخينه عيل شلون ياكل مجابيس هذا هههه

صراحة عجبني هالموقف

يعطيج العافيه

بس ليش ماحاسبتي على اغراضج

هههه

Fahad Al Askr يقول...

أنا اللي غلطان داش اليوم

قلت أتنفه عند أم شوقي حبيبتي زيون، طلعت متضايق وضغطي مرتفع

إلا بالله عليج يوم إنج رايحة الجمعية، وطلعتي ما شريتي شي، السلة وين قطيتيها قبل الكاشرير والا صوب البرد، وبعدين تعالي هون، رايحة أي جمعية النعيم وإلا مبارك الكبير، وشنو هالنماين اللي ملاقيتهم.

وهاللي رايح مع مرته يشترون قوطي فاصوليا ما أدري بزاليا ما يستحي على ويهه ماخذ وحدة ما تعرف تسوي فاصوليا ما أدري بزاليا، عيل المجبوس شلون، من لونوتر وإلا الميرديان بنت الأكابر

وشدعوة واحد يشتري خماجير وحلاو وبطل ماي حق عياله بخمسة وسبعين دينار، شنو شاري أكل حق مصارعين؟

يعني تلوميني لما أقول إن الكويتيين فيهم وايد هيلق؟

ما أقول إلا الله يهداج يا أم شوقي

قلب طفله يقول...

هههههههههههههههههه

الزين اللي متكدر يروح الجمعيه

يشوف تحف و عجايب رب العالمين لووول

بس ابو فاصوليا و حرمه الدلوعه

نكته امحق دلع :S

تسلمين زيون ع البوست الونيس :))

فريج سعود يقول...

المحادثات عن الفاصولية مو علشان ياكلونها علشان بعد ما تفضّي القوطي تحطه تحت حجابها
وليش نحاسة المكتبة ؟ تلقينهم ليلحين يدعون عليج
طلعتي مني هينه

صبا يقول...

زيوووون,,

حسافه علي الوقت واللويه والزحمه
وآآآآخر شي انغثيتي وطلعتي من المولد بلا حمص وفاصوليا خضرا بعد :))

اتصدقين عاد ,,,انا إذا ضاق خلقي اروح الجمعيه واتطمش واتشري وارد ويتعدل مزاجي :))

يامعوده هذي ماتعرف تسوي فاصوليا اتهون
عند وحده ثانيه اول ما تزوجت راحت ويا زوجها الجمعيه ريلها يبي يشتري جاي يوم سالها اي نوع تين قالتله ليش !!
قالها علشان نشربه يعني ليش ؟؟
ردة عليه وهيه تضحك وتقوله بكل سخافه ما عرف اسوي جاي !!!

وسوالف الجمعيه واااايد وما تخلص
خوووش بوووست
منوع
جاكليت مثل صاحبته:***

lawyer يقول...

لووووووووووووووووووووووووووول

ههههههههههههههههه

مت ضحك

يختتتتتتتتتتتتتتتج هذا ام الفاصوووووووليا

لو انا طقيتها

لا بووووووووكم لا ابوووووووو من دوودهتوووووو

انااااااااا قلت ديووووووركس

فاصوووووووووووولياااااااااا

الله ياخذ العدوووووو بس


هههههههههههههههه

يختج لا تلوميناااا اذا صعنا
ريااااااااييلنا سرسريه

شووووووووفاي هذااااااا مستاااااانس و منشرررررررررح صدره شاري كوتكس

و الي وووووعليه شاريه ماجبه البيت بس يززززف فيها

انا عندي نصيحه

المرا اتطرش ريلهااااا الجمعيه .. و بين غرض و الثاني

تكتب كير فري (( شسوي مالحق وياك ))

ديووووووركس (( عشااااانك انت اذكرك ))



حمدلله و الشكر

اما السله الي انقططططططططت

متعووووووووده دايماا ..

انا مثلج اشتري لمجرد الشراء
طبعاااااااا ما فيني خير ارووح الصالحيه

حدي بووووووميه فلس و المباركيه

اسحب عشرين و اصرفهاا انصاص و دنانير و مابقى احد في البيت ما اشتريله

مكسرات فنايل

ليفه !

قلاصات حق الخدم !

عجبوني من بوميه فلس

خمااااااااااجير وايد
و ارد

Flowera يقول...

لووووووووووووووووووول
انا قاعده أقرى الموضوع وكنت بالفراش بنام

موتييييني من الضحك
خاصة مالت الفاصوليا

اهم شي رديتي من الجمعيه وانتي مستانسه ولا لاء ؟

Kuw_Son يقول...

المشهد الأول:
لوووووووووووووول ... والله اللقافة و ما تسوي .. خليهم بحالهم .. يمكن الموضوع خاص
:P

المشهد الثاني .. 5 سنوات زواج و فوق
:P
ما شاء الله عليج .. ما تطيحين إلا على هالمواقف؟
:P

المشهد الثالث:

أخيس موقف ! المفروض يصور القوطي اللي في البيت قبل لا يروح الجمعية و يدق عليها !

المشهد الرابع:

قاطعة الأرزاق
:P
بس زين تسوين يا الزين .. شغلج زين

المشهد الأخير:

وايد يتكرر هالمشهد .. الله يعينه هالأبو على عيال المغثة !! الربادة في اليهال تطلع الشيب
:P

الزين يقول...

قيادية

ياهلا ومرحبا
وساعة المباركه

اول مره تزوريني عشان جيذيه بقول اسوي لج قهوة بيدي بعد قلبي

:$

شفتي ... ما قدرت انطر
هذي تدحر تبي ماي
والأبو يصارخ بيشتكي على الجمعية
والطابور واصل نص الجمعية

وبس داج راسي من اللوية
خليت السله باللي فيها وطلعت

متعج الله بالإيمان وطاعة الرحمن بعد قلبي

ههههههههه ملاقة الفاصوليا شي ثاني

عليهم بالعافية

لا تباعدين

الزين يقول...

داركنس

:)

عليج بالعافية حبيبتي

واقع

واااقع

ماننحاش منه

الله يخليج يتعلمون فينا
اول شي يتحرشون باللي اكبر منهم على ما يضبط الشغله بعدين يحول علي اللي بعمره

لا بارك الله فيه من جيل
مطيحينا من عين روحنا

:$

وياج يالشيخه وياج
دنيا وآخره

الزين يقول...

ريما

ايه شفتي الحبايب كلهم تيمعوا عن الزين
وبيت العز ما يخلى ابوي

هاااو ليش اعاقبج
عيل من يشتري لج احتياجاتج
ليكون مثل صاحبنا

حرام يا ريما مو كل من فاضي
في ناس صج رايحين يقضون شغل

والريال اللي رايح يشتري حق زوجته غرضها يمكن ملزوم واهي عذرها معاها
عندها بيبي ... توها والده .. الله العالم

بس اهم شي مستانس واهو يشتري لها .. يتحرش فيها بعد ياحلوه

:)

ويه انا سالفة السله اللي تنحط عدي وخلي

عادي وحلوة الحياة

يعافيج ويطول لي عمرج

الزين يقول...

الخيلاء

:)

اخاف اقول لج اي جمعية اروح الاقيج جبالي

ونرجع نكتب بوست عن بعض

:)))))))

بعد قلبي والله

الحمدالله بالسلامه وتقبل الله طاعتج

:**

الزين يقول...

شيمااااا

ايه يبيلها قلب ما يتعب وجيب ما يفضى

:)

تصوري ام فاصوليا عرست

شبلاهم عيل السنعين قاعدين
مثل ما تقول امي يطول بعمرها
كل ساقط له لاقط

مسكينه مجتهده وبتسأل امها
يا حيييل الله

شيوم آنا اخترعت يوم صرخ عليه
صبت عظامي

قلت الللللله من وين طلع هالصوت
شلون هالياهل بعد قلبي

الحلوة عيونج ويسلم لي قلبج

:**

الزين يقول...

احلا انجنير

هلا وغلا
وه وه وه

تو ما نورت مدونتي
ياربي من فرحتي مدري شسوي
شتشربين انا واللي بالمطبخ كله تحت امرج

خوش شي
لقيت من يشاركني اهتماماتي بالتسوق
احنا اصلا لازم يسوون لنا اشتراك
وآخر السنه يعطونا مكافأة على التواصل المستمر مع الجمعيات

:))))))

ايه الله اللي شفته وما قلته بعد ما العن

سكتي انا هالأيام عندي هبة يديه
بس ونيييييييسه
تعرفين محلات الفلبينيات
اروح وابسط واتسأل هذا حق شنو وهذا شيسوي
واشتري اترس لي جيس
وارجع البيت اجربهم على شغالاتنا
شرايج فيني بس

هههههههههههه

ابيه طلعتي اخس مني بالتقري
والتفحص

بس والله ساعات تطيحين على شغلات تسوى

:)

على طاري بو شوشه
عقب ما طلعت من الجمعية ولا كاهو متسند يدخن سيجاره جنه صج

ضاعت الحبيبة منه

ههههههههه

خليها على الله

:**

سعيده بمرورج ما تصدقين شكثر

الزين يقول...

خروفة

علقي ابوي علقي

شورانا

سالفة دلع المعاريس بس اول الأيام
تالي الله يستر عليهم

والرياييل المتأففين هم الأغلبية للأسف الله يجيرنا منهم ولا يبلانا يا رب

والأخ اللطيف شكله خوش زوج مطاوعها يا حليله

والبزران اللي عبالهم يكبرون يشربون من ماي البحر
ما عجبني الوضع كلش

انتي اللي عسل ياقلبي

:*

الزين يقول...

حسام بن ضرار

حياك الله يالشيخ
رحت رحت وشفت الهوايل
ورجعت البيت وانا كارهه شي اسمه مركز سلطان

وفضلت اني ما اكتب عنها لأنك عقب بتقول الكويتيين هيلق

استغفر الله

على العموم

منورنا يالشيخ وساعة المباركه

الزين يقول...

شلالات

:)))

شفتني طلعت ايد ورى وايد جدام

لا شوديني الفرع
انا احب اضيع بالمكان من كبره

اي فرع تروحين

يمكن فرعكم غير عن فرعنا

:)

خيرتي بروح طيور الجنة
اشتري صحون بلاستك و فوط للمطبخ

ياحسرتي اختربت
:$

الزين يقول...

As YoU LiKE

والله انا حسيت اني قاطه اذني

شسالفة مركز سلطان مع الكل!!!!

الكل يقول لي روحي مركز سلطان
الملاقة اللي شفتها تكفيني

اقول لك موقف
اثنين شباب واحد املق من الثاني
قاعدين يدورون ديودرنت

واحد منهم شال العلبه جان يقول حق الثاني هذا مكتوب عليه قابل للإشتعال

تهقا لو احطه واولع سيجاره (.....) يولع

ويطالعني ويضحك

ياااااااملقي
الله يلوع جبدك

ياربي اكو شي اسمه ملافظ حسنه وسلوك عام

شنو هذا

وعلى باله انا بضحك وياه
عوووع

حرمت
لا جمعيات بعد اليوم

:)


وخزياااااه
انت اول مره تعلق عندي وانا اخذتك بالطوشه

منورني يالشيخ

الزين يقول...

محسد

@@

الله كريم
هم بعد قالوا احسنوا الظن

:$

الزين يقول...

حسين

:))))

كسرة مود بس عشان تشتاق للنوع الآخر

حلوة مني الآخر

هااااو ايييييييه

انا بعد قلت الا بشوف شنهو هالأحمر والأخضر

بغيت احذفهم باللي بيدي كثر ما تناقشوا وآخر شي على علبة فاصوليا
@@

عالم ما عندها سالفة
بس تذكرت دعاية خدييييها
خدييييها كليهاااا

مالت جالكسي تعرفها؟؟

ههههههه
ملااااااااااااااقه

ايه الله يعنيه
هذا بيشبع بيض وجبن قلاصات فقير

شوف تبي الصج

انا بغيت اطلع فيهم من غير ما احاسب
بس قلت حرام
بعدين الله يحطني بالنار
وانا ما اعبر على الحروره

:q

ششششششش

ترى انا اليوم فاصلة
واستر على ما وايهت

سلام

بنت سيف يقول...

الزين ..

أول مرة اكتب لج رد .. بس اقرا لج دايم ..

الصراحة ما قدرت .. ذبحتيني من الضحك ..

أم الفاصوليا .. هايفة من قلب .. وايد باردين .. بطوا جبدي ..!!

حسيت بالاحراج .. من بو ألوان اللي مطرشته مرته يشتري شيسمونه ..!! شي يفشل ..

وعجبني .. تعبيرج عن صراخ الأبو على ولده .. علشان ييب ماي لأخته ..ههههههه

والأخير .. زين سويتي في مراهقين هالزمان .. اللي يبغي لهم .. ساعات سطار علشان يكبرون .. "بعد يعدل كشته" ..

عزيزتي .. ما قصرتي .. قطعتيهم .. تقطع ..أجديتي ..

أفكر اروح الجمعية .. عندنا .. يمكن الحال غير ..بس متأكدة يبقى الحوار نفسه .. والغلاء أزيد

بنت سيف (من قطر)

الزين يقول...

فهد

@@

ليش يا بابا ليش
ليش داش بشرك

سلم اول
قول لج وحشة

سيدة على الريج زف
اسم الله عليك من ضيقة الصدر والضغط حق عدوينك يابو عسكر

والله اذا تبي الصج
ناديت البنقالي
عطيته السله وفوقهم دينار
وقلت له رد الأغراض مكانهم

الله اعلم عاد ردهم لو لأ
اهو وضميره

خساير وعماة عين يابو عسكر

وه عاد يافهد النعيم!!
مارحتها ابد
الا اذا انت بتوديني هذا شي ثاني
بس ياخوفي تمشي وتلشط بالناس

اعرفك مالك جبد على التكفخ والزف

وااااااااي
شدراك عياله مصارعين تصدق كل واحد عرض الكبت
يهال هالمتن !!!

لا بس تبي الصج اهو شاري شوية غريضات للبيت

والله لا يراويك ملاقة عياله
تييب الحارج

ايه والله ايه والله
ما الومك لين قلت فيهم هيلق
نظريتك طلعت صح للأسف

الله يهدي الجميع يابو شوقي

شششششششششششش

تعال بحاجيك


انت صاحي
@@

الزين يقول...

قلب طفلة

:))

ايه والله يبتيها
امحق دلع

يسلم عمرج بعد قلبي

الزين يقول...

فريج سعود

:)

انا خبري يحطون قوطي روب
ما دريت انه علبة فاصوليا
لاحوووووول

استينوا بناتنا

نحاسة المكتبه ما عجبني الحال ياسعود
شنوهالتبربس
يهالواااا

توهم طالعين من البيضه
عاد موت وصلت دعوتهم السقف

ومن قال اني هينة
:)

ابدا ماني هينة

الزين يقول...

صبا

هلا بعد قلبي

ايييييييييه حسافه على الجهد المبذول بالبحث والتمحيص بالجودة وانتهاء الصلاحية

قميضه على التنقي
عاد انا لما اتسوق اتسوق بذمه
:$

آخذ وقتي عدل
عيل طلعنا عندنا نفس المبدأ
:)

ايه ايه ماكنتوش
حلو التغيير مو؟

الزين يقول...

لوير

وه وه وه

مالي شغل فيج
بلبس نقاب وبمشي عنج

مااااا اعرفج
انتي خبقتي الزبيل مره وحده

@@

وطلعتي من عشاق بو امية هااااا

الزين يقول...

Flowera

عليج بالعافية كل هالضحك
ان شاء الله دوم يارب

لا والله لا طبنا ولا غدا الشر يالشيخه
الزيارة ما حققت الهدف

:$

الزين يقول...

كويت سن

1
مو لقافه
اهم صوتهم عالي
ولو كان الموضوع خاص خل يقعدون في بيتهم يناقشونه

دلع وملاقه
عاد انا شذنبي اتحمل


2
شكلهم تسع عشر يعني مبلشين يكدشون شويه
:$


3
احلف بس
@@ يصوره
والله التكنولوجيا تنفع بهالحالات
:)))))))))))

4
اقول بس
ما يشوفون شر
قلة حيا وتبربس


5
اذا تبي الصج
عيال مثلهم مانبي
شي اييب المرض
استغفر الله
بروحي ما احب اليهال اللي بعمرهم
يازينهم واهم عمرهم بحول السنتين ثلاث
عقب .... يوخر عني احسن

ما اصلح ام هاااا


:)
حياك الله

الزين يقول...

بنت سيف

:)

حيا الله اهل قطر
وساعة المباركة حبيبتي

واذا ما علقتي مره ثانية ترى تدفعين غرامه

كيفج عاد تحملي

:)

charisma يقول...

لووووووووووووووول
واى واى شهالصيييحه حسيت الدنيا تفتر فينى وانا اتخيلهم حوالى ههههههههههههه
ما تنلامين لى قطيتى السله ومشيتاى

انا عيل عكسج الجمعيه ما ادشها الا ظهر ولا تالى الليل هدوووووووووء

المواقف موتتنى ضحك

اما المعااريسسسس انتيييكه
وفى ملاحظه ليش كله الى يتمييعون مو لايق عليهم وتلاقينهم مأساة !!
عمرى ما شفت وحده التدلع ولايق عليها الدلع !! مو عمرى عشان لا اظلم البنيات
نااادرااااااااا

وهالى يصرخ على عياله ما ادرى ليش تخيلته ياى الجمعيه فى بجامه
هههههههههه

:**

صقر قريش يقول...

بعد هاللوية قطيتي السلة!!مواقفج مضحكة مبكية اما المشهد الأول فهذا يسمونه حب فاصولي توهم في بدايتهم
الله يهني سعيد بسعيده لكن على شرحج لأشكالهم الله يهني الغول بالغولة:) أما
موضع المغازلجي فآنا أذكر شفت واحد اتوقعه بالثانوية قاعد يلاحق وحده ومأذيها طبعا وآنا اخوج كلش ماواطن
هالأشياء(لأني ولد مطوع:)) فرحت للغثيث
وعطيته زفة السنة بساعه المهم جان أقوله شوف إذا كنت ترضى إنك تشوف واحد يغازل إختك ذيج الساعه غازل بنات الناس لأنك بتكون ديوث والديوث مايشم ريحة الجنة عاد إهو قاعد ويعتذر
وباس راسي :) وقاعد يقول سامحني وسامحني
قتله لاتعتذر مني استغفر واعتذر من رب العالمين وه قاعد ويشكر فيني :).

عموما مابي أطول موضوعج اختي الزين وايد حلو يعطيج العافية عليه

صقر قريش يقول...

إذا كنتي مالة وتبين تغيرين جو فاخذي واحد من أهلج وروحي تمشي على البحر بعد الفير بين المارينا مول والمركز العلمي لي شروق الشمس يعطيج إحساس حلو .

حسافتج يا كويت يقول...

واللي يرحم والديج بأي جمعية هالاوادم

شكلها طماشة بالعذر لا ضاق خلقج رحتي الجمعية

انا بعد ودي امر هالجمعية

مبدعة با الزين

وواللة ونستيني وضحكتيني وانا ضايق خلقي

وكلة كوم والبلابل المعاريس كوم

ثبتي ويهم؟؟؟

داير انشاء الله شوفيهم بالجمعية

انا ما اواطن الجمعيات بس ساعات اجامل ام العيال واروح وإذا رحت هي الورقة اللي بيدها نخلصها وبسرعة نحاسب

ونختار الوقت اللي ماكو زحمة بس أنا اكتشف إني أحب الخرابيط هالكاكاو والبطاط والعلوج وخرابييييييييييييييط

نوصل البيت شزينا نضحك

وبعد يوم انتخانق

اهي تقولي انت تشتري هالخرابيط وانا اكلها واسمن

واتعومس مادري شرد عليها ليش فعلا انا اشتري و ما اكل وهي اللي تاكل وتعصب


شكرا يا الزين


حبيت بوستج هذا

هذيان يقول...

الجمعية بتصير مكاني المفضل وبجابل قواطي الفاصوليا وابقعد
اللللللللللللللللللللللللله أكبر كل هالحجي عند رف الفاصوليا وناسه
حجي فاصولي من يحصل !!!!

GUCCI-q8 يقول...

ههههه
تسلمين زيون والله تينن وتخفف من هالحر هههه
وياز لي وايد
واذا تبون الصح انا اذا متضايقة اروح الجمعية ... ... مركز سلطان .... سوق شعبي ....اشتري لمجرد الشراء .. خرابيط .. خرابيط .... لين اقول بس

عقبها ارجع البيت وانا مستاااااااااانسه وضميري مرتاااااح على الآخر

حتى انا يصير معاي هالشي
ههههههه

esTeKaNa يقول...

واااااي يا زيون واااااي
هذي مدام فاصوليا من صجها
!!
هذا موحب
ولا دلع
هذا شي ايب الحاااارج ماعبر عليه انا
واي واي الله يرزق كل من نيته
انا لو واحد يقعد ساعه يقولي جذي
يمكن احذف قواطي الفاصوليا كلها
هههههههههه

Noor يقول...

لوووووووووووووووول

مت من الضحك الصراحه علي هالمواقف
و اخر شي اتحطيين السله و تمشين

اتذكريني بنفسي مرات اسويها عادي وصج اشتري لمجرد الشراء و استانس

:)

بس علي المشهد الاول انا لو ني منج ادعمهم بالعربانه علي الدلع البايخ و السخافه
كلها فاصوليا

اما الثاني وخزيااااااااااه
ولا بعد تشرح له
فشله الصراحه

وفعلا بوست ممتع
:)

الزين يقول...

كاريزما

شفتي .... شي مو طبيعي ... داج راسي من صيحتهم

قطيت السلة ومشيت

والله يا كروز انا الظهر بالدوام ما اوصل البيت الا بالأربع ويومي ينتهي مبجر

تسع انا قايلة تصبحون على خير
ومو معقولة بالويك اند بروح الجمعية

:)

ولا شرايج انتي

المعاريس انتيكة
@@
ليتج شايفتهم
اهو جنه بقه
واهي ... الله لا يبلانا
يبيلها شفط وشد
والدلع ... الدلع
الحين من وين كان يطلع هذاك الصوت الناعم مدري

امبييييييييه
استاثمت من وراهم وربي
خلاني سااااكته

والله يصارخ على عياله بالجمعية
هذا شلون بالبيت

مسااااااااكين

صباحج عسل حبيبتي
:*

الزين يقول...

صقر قريش


يا حيا الله اخيي صقر قريش
ايه والله حب فاصولي
المشكله انه خضر
كلش موبشي

هههههه
ابيه انت منت هين
زين تسوي فيه
لو كل واحد سفيه لقى واحد مثلك يعقله ما صار عندنا مثل هالأشكال


حياك الله اخوي وساعة المباركه

الزين يقول...

صقر قريش

كلش مافي مجال
الكل وراه دوام
حتى انا

يعني الواحد يصلى الفجر
ينام عشان يصحى الساعة ست
وركضة ركضة لين الأربع

يعين الله يالشيخ
ومشكور على النصيحه
:)

الزين يقول...

حسافتج

اقول بو الزين

ودك نروح نفس الجمعية ونتصادف وكل واحد يرجع يكتب عن نفس الموقف وماندري ان احنا اللي كنا بببببلللب

مدري شفيني
صايره ما اعرف اتحجي
@@

ياحسرتي كثر ما عيبت على الناس
ايه مقيوله العياب عند الباب

:))))

ايه صاجه اخيتي ام الزين
يعني انت تشتري واهي تسمن
حرام عليك

حبيتك العافية ابوي انت
وابركها ساعة يوم انك استانست

الزين يقول...

هذيان

:)))))))))))

انتي دمج عسل
ايه والله حجي فاصولي على قولتج

يازين هالطلة وصاحبتها
منورتني بعد قلبي

الزين يقول...

GUCCI-q8

شفتي شلون
نغير جو المدونة شوي
اخاف تنقثون من رومانسيتي

شوفي اكو دراسه نفسية للحريم تقول ان افضل عرج للإكتئاب عند المره الشرااااااء

الله يبعدنا عن الإكتئاب
الله يصيبنا احنا كتئوب
شي مصغر من الإكتئاب
:))))

حبيبة قلبي والله
:*

الزين يقول...

استكانه

:))))

شفتاااي
يعني الحين عرفتي شعوري حزتها
شي يقث

سكتي
انا بغيت اسوي نفسي مادري واكفخها بالسله
كلش الدلع مو لايق
تعرفين التوصوص اللي تحسين طالع من الخشم
شي يلوع الجبد

يالله العفو والعافية
خل اروح استغفر ربي شوي
ترى وايد استاثمت من وراهم

الزين يقول...

نور

يا هلا ومرحبا
اعتقد اول زيارة لج

اذا ماني غلطانة


ايه والله انا ليش ما فكرت اسحب لي عرابه واكفخهم فيها

لااااا بس حرام
عايشين جوهم
كلها يومين وبروحهم يكفخون بعض
:)

اما بو الألوان فانا اشوفه رجل عصري جدا

احم احم
هههههههههههه

منورتني يالشيخه

Mok يقول...

:))

ray يقول...

زيون حلاص اقتنعت

أنا و انتي وحدة من الثنتين : يا مستنسخينا من بعض أو خوات

أنا بعد , وجهتي الجمعية

:) أنا سالفة البلكونة , الانسان لازم يحترم جسمه , اذا متينة ستطلّع الله يهداها لابسة ضيج , حتى على العصاقيل مو حلو ... الناس ثقة

الزين يقول...

Mok

;)

good one haa

الزين يقول...

Ray

:))))

I told u before
we're much alike

:*